พระไตรปิฎกเล่มที่ ๒๙ ภาษาบาลี อักษรไทย
พระสุตตันตปิฎกเล่มที่ ๒๑ สุตฺต. ขุ. มหานิทฺเทโส

     [๘๐๙]   เยน   สลฺเลน   โอติณฺโณ   ทิสา   สพฺพา   วิธาวตีติ
สลฺลนฺติ   สตฺต   สลฺลานิ   ราคสลฺลํ   โทสสลฺลํ   โมหสลฺลํ   มานสลฺลํ
ทิฏฺฐิสลฺลํ โสกสลฺลํ กถํกถาสลฺลํ ฯ
     {๘๐๙.๑}   กตมํ ราคสลฺลํ ฯ โย ราโค สาราโค อนุนโย อนุโรโธ
นนฺทิ   นนฺทิราโค  จิตฺตสฺส  สาราโค  ฯเปฯ  อภิชฺฌา  โลโภ  อกุสลมูลํ
อิทํ ราคสลฺลํ ฯ
     {๘๐๙.๒}   กตมํ  โทสสลฺลํ  ฯ  อนตฺถํ เม อจรีติ อาฆาโต ชายติ
อนตฺถํ   เม  จรตีติ  อาฆาโต  ชายติ  อนตฺถํ  เม  จริสฺสตีติ  อาฆาโต
ชายติ    ฯเปฯ    จณฺฑิกฺกํ   อสฺสุโรโป   อนตฺตมนตา   จิตฺตสฺส   อิทํ
โทสสลฺลํ ฯ
     {๘๐๙.๓}   กตมํ โมหสลฺลํ ฯ ทุกฺเข อญาณํ ฯเปฯ ทุกฺขนิโรธคามินิยา
ปฏิปทาย   อญาณํ   ปุพฺพนฺเต  อญาณํ  อปรนฺเต  อญาณํ  ปุพฺพนฺตาปรนฺเต
อญาณํ   อิทปฺปจฺจยตาปฏิจฺจสมุปฺปนฺเนสุ   ธมฺเมสุ   อญาณํ   ยํ   เอวรูปํ
อทสฺสนํ   อนภิสมโย   อนนุโพโธ   อสมฺโพโธ  อปฺปฏิเวโธ  อสงฺคาหตา
อปริโยคาหตา  ๑-  อสมเปกฺขตา  ๒-  อปจฺจเวกฺขตา  ๓- อปจฺจกฺขกมฺมํ
ทุมฺเมชฺฌํ  พาลฺยํ  โมโห ปโมโห สมฺโมโห อวิชฺชา อวิชฺโชโฆ อวิชฺชาโยโค
อวิชฺชานุสโย   อวิชฺชาปริยุฏฺฐานํ   อวิชฺชาลงฺคี   โมโห   อกุสลมูลํ  อิทํ
โมหสลฺลํ ฯ
     {๘๐๙.๔}   กตมํ  มานสลฺลํ  ฯ เสยฺโยหมสฺมีติ มาโน สทิโสหมสฺมีติ
มาโน    หีโนหมสฺมีติ    มาโน    โย    เอวรูโป   มาโน   มญฺญนา
@เชิงอรรถ: ๑-๒-๓ ม. อปริโยคาหนา อสมเปกฺขนา อปจฺจเวกฺขนา ฯ
มญฺญิตตฺตํ     อุณฺณติ    อุณฺณโม    ธโช    สมฺปคฺคาโห    เกตุกมฺยตา
จิตฺตสฺส อิทํ มานสลฺลํ ฯ
     {๘๐๙.๕}   กตมํ  ทิฏฺฐิสลฺลํ  ฯ วีสติวตฺถุกา สกฺกายทิฏฺฐิ ทสวตฺถุกา
มิจฺฉาทิฏฺฐิ   ทสวตฺถุกา   อนฺตคฺคาหิกา   ทิฏฺฐิ   ยา   เอวรูปา   ทิฏฺฐิ
ทิฏฺฐิคตํ    ทิฏฺฐิคหนํ    ทิฏฺฐิกนฺตาโร   ทิฏฺฐิวิสูกายิกํ   ทิฏฺฐิวิปฺผนฺทิตํ
ทิฏฺฐิสํโยชนํ    คาโห   ปฏิคฺคาโห   อภินิเวโส   ปรามาโส   กุมฺมคฺโค
มิจฺฉาปโถ    มิจฺฉตฺตํ    ติตฺถายตนํ    วิปริเยสคฺคาโห    วิปรีตคฺคาโห
วิปลฺลาสคฺคาโห    มิจฺฉาคาโห    อยาถาวกสฺมึ    ยาถาวกนฺติ   คาโห
ยาวตา ทฺวาสฏฺฐี ทิฏฺฐิคตานิ อิทํ ทิฏฺฐิสลฺลํ ฯ
     {๘๐๙.๖}   กตมํ โสกสลฺลํ ฯ ญาติพฺยสเนน วา ผุฏฺฐสฺส โภคพฺยสเนน
วา   ผุฏฺฐสฺส   โรคพฺยสเนน   วา  ผุฏฺฐสฺส  สีลพฺยสเนน  วา  ผุฏฺฐสฺส
ทิฏฺฐิพฺยสเนน    วา    ผุฏฺฐสฺส    อญฺญตรญฺญตเรน    วา    พฺยสเนน
สมนฺนาคตสฺส    อญฺญตรญฺญตเรน   วา   ทุกฺขธมฺเมน   ผุฏฺฐสฺส   โสโก
โสจนา     โสจิตตฺตํ     อนฺโตโสโก    อนฺโตปริโสโก    อนฺโตฑาโห
อนฺโตปริฑาโห เจตโส ปริชฺฌายนา โทมนสฺสํ อิทํ โสกสลฺลํ ฯ
     {๘๐๙.๗}   กตมํ  กถํกถาสลฺลํ  ฯ ทุกฺเข กงฺขา ทุกฺขสมุทเย กงฺขา
ทุกฺขนิโรเธ   กงฺขา   ทุกฺขนิโรธคามินิยา   ปฏิปทาย   กงฺขา  ปุพฺพนฺเต
กงฺขา    อปรนฺเต    กงฺขา   ปุพฺพนฺตาปรนฺเต   กงฺขา   อิทปฺปจฺจตา-
ปฏิจฺจสมุปฺปนฺเนสุ   ธมฺเมสุ   กงฺขา  ยา  เอวรูปา  กงฺขา  กงฺขายนา
กงฺขายิตตฺตํ    วิมติ    วิจิกิจฺฉา    เทฺวฬฺหกํ    เทฺวธาปโถ    สํสโย
อเนกํสคฺคาโห    อาสปฺปนา    ปริสปฺปนา    อปริโยคาหนา   ฉมฺภิตตฺตํ
จิตฺตสฺส มโนวิเลโข อิทํ กถํกถาสลฺลํ ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๒๙ หน้าที่ ๕๐๒-๕๐๔.
https://84000.org/tipitaka/read/pali_item.php?book=29&item=809&items=1
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=29&item=809&items=1&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=29&item=809&items=1
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=29&item=809&items=1
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=29&i=809
             สารบัญพระไตรปิฎกเล่มที่ ๒๙
https://84000.org/tipitaka/read/?index_29
https://84000.org/tipitaka/english/?index_29