บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[809] Yena sallena otiṇṇo disā sabbā vidhāvatīti sallanti satta sallāni rāgasallaṃ dosasallaṃ mohasallaṃ mānasallaṃ diṭṭhisallaṃ sokasallaṃ kathaṃkathāsallaṃ. {809.1} Katamaṃ rāgasallaṃ. Yo rāgo sārāgo anunayo anurodho nandi nandirāgo cittassa sārāgo .pe. abhijjhā lobho akusalamūlaṃ idaṃ rāgasallaṃ. {809.2} Katamaṃ dosasallaṃ . anatthaṃ me acarīti āghāto jāyati anatthaṃ me caratīti āghāto jāyati anatthaṃ me carissatīti āghāto jāyati .pe. caṇḍikkaṃ assuropo anattamanatā cittassa idaṃ dosasallaṃ. {809.3} Katamaṃ mohasallaṃ. Dukkhe añāṇaṃ .pe. Dukkhanirodhagāminiyā paṭipadāya añāṇaṃ pubbante añāṇaṃ aparante añāṇaṃ pubbantāparante añāṇaṃ idappaccayatāpaṭiccasamuppannesu dhammesu añāṇaṃ yaṃ evarūpaṃ adassanaṃ anabhisamayo ananubodho asambodho appaṭivedho asaṅgāhatā apariyogāhatā 1- asamapekkhatā 2- apaccavekkhatā 3- apaccakkhakammaṃ dummejjhaṃ bālyaṃ moho pamoho sammoho avijjā avijjogho avijjāyogo avijjānusayo avijjāpariyuṭṭhānaṃ avijjālaṅgī moho akusalamūlaṃ idaṃ mohasallaṃ. {809.4} Katamaṃ mānasallaṃ . Seyyohamasmīti māno sadisohamasmīti māno hīnohamasmīti māno yo evarūpo māno maññanā @Footnote:1-2-3 Ma. apariyogāhanā asamapekkhanā apaccavekkhanā. Maññitattaṃ uṇṇati uṇṇamo dhajo sampaggāho ketukamyatā cittassa idaṃ mānasallaṃ. {809.5} Katamaṃ diṭṭhisallaṃ . Vīsativatthukā sakkāyadiṭṭhi dasavatthukā micchādiṭṭhi dasavatthukā antaggāhikā diṭṭhi yā evarūpā diṭṭhi diṭṭhigataṃ diṭṭhigahanaṃ diṭṭhikantāro diṭṭhivisūkāyikaṃ diṭṭhivipphanditaṃ diṭṭhisaṃyojanaṃ gāho paṭiggāho abhiniveso parāmāso kummaggo micchāpatho micchattaṃ titthāyatanaṃ vipariyesaggāho viparītaggāho vipallāsaggāho micchāgāho ayāthāvakasmiṃ yāthāvakanti gāho yāvatā dvāsaṭṭhī diṭṭhigatāni idaṃ diṭṭhisallaṃ. {809.6} Katamaṃ sokasallaṃ. Ñātibyasanena vā phuṭṭhassa bhogabyasanena vā phuṭṭhassa rogabyasanena vā phuṭṭhassa sīlabyasanena vā phuṭṭhassa diṭṭhibyasanena vā phuṭṭhassa aññataraññatarena vā byasanena samannāgatassa aññataraññatarena vā dukkhadhammena phuṭṭhassa soko socanā socitattaṃ antosoko antoparisoko antoḍāho antopariḍāho cetaso parijjhāyanā domanassaṃ idaṃ sokasallaṃ. {809.7} Katamaṃ kathaṃkathāsallaṃ . Dukkhe kaṅkhā dukkhasamudaye kaṅkhā dukkhanirodhe kaṅkhā dukkhanirodhagāminiyā paṭipadāya kaṅkhā pubbante kaṅkhā aparante kaṅkhā pubbantāparante kaṅkhā idappaccatā- paṭiccasamuppannesu dhammesu kaṅkhā yā evarūpā kaṅkhā kaṅkhāyanā kaṅkhāyitattaṃ vimati vicikicchā dveḷhakaṃ dvedhāpatho saṃsayo Anekaṃsaggāho āsappanā parisappanā apariyogāhanā chambhitattaṃ cittassa manovilekho idaṃ kathaṃkathāsallaṃ.The Pali Tipitaka in Roman Character Volume 29 page 502-504. https://84000.org/tipitaka/read/roman_item.php?book=29&item=809&items=1 Classified by [Item Number] :- http://84000.org/tipitaka/read/roman_item.php?book=29&item=809&items=1&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=29&item=809&items=1 Compare with The Royal Version of Thai Tipitaka :- https://84000.org/tipitaka/read/byitem.php?book=29&item=809&items=1 Study Atthakatha :- https://84000.org/tipitaka/attha/attha.php?b=29&i=809 Contents of The Tipitaka Volume 29 https://84000.org/tipitaka/read/?index_29 https://84000.org/tipitaka/english/?index_29
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]