อิเม โข ปนายสฺมนฺโต เตรส สงฺฆาทิเสสา ธมฺมา อุทฺเทสํ อาคจฺฉนฺติ ฯ
ปฐมสงฺฆาทิเสสํ
[๓๐๑] เตน สมเยน พุทฺโธ ภควา สาวตฺถิยํ วิหรติ เชตวเน
อนาถปิณฺฑิกสฺส อาราเม ฯ เตน โข ปน สมเยน อายสฺมา
เสยฺยสโก อนภิรโต พฺรหฺมจริยํ จรติ ฯ โส เตน กิโส โหติ ลูโข
ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต ฯ อทฺทสา
โข อายสฺมา อุทายิ อายสฺมนฺตํ เสยฺยสกํ กิสํ ลูขํ ทุพฺพณฺณํ
อุปฺปณฺฑุปฺปณฺฑุกชาตํ ธมนิสนฺถตคตฺตํ ทิสฺวาน อายสฺมนฺตํ
เสยฺยสกํ เอตทโวจ กิสฺส ตฺวํ อาวุโส เสยฺยสก กิโส ลูโข ทุพฺพณฺโณ
อุปฺปณฺฑุปฺปณฺฑุกชาโต ธมนิสนฺถตคตฺโต กจฺจิ โน ตฺวํ อาวุโส
เสยฺยสก อนภิรโต พฺรหฺมจริยํ จรสีติ ฯ เอวมาวุโสติ ฯ เตนหิ
ตฺวํ อาวุโส เสยฺยสก ยาวทตฺถํ ภุญฺช ยาวทตฺถํ สุป ยาวทตฺถํ
นหาย ยาวทตฺถํ ภุญฺชิตฺวา ยาวทตฺถํ สุปิตฺวา ยาวทตฺถํ นหายิตฺวา
ยทา เต อนภิรติ อุปฺปชฺชติ ราโค จิตฺตํ อนุทฺธํเสติ ตทา หตฺเถน
อุปกฺกมิตฺวา อสุจึ โมเจหีติ ฯ กินฺนุ โข อาวุโส กปฺปติ เอวรูปํ
กาตุนฺติ ฯ อามาวุโส อหํปิ เอวรูปํ ๑- กโรมีติ ฯ
{๓๐๑.๑} อถโข อายสฺมา เสยฺยสโก ยาวทตฺถํ ภุญฺชิ ยาวทตฺถํ สุปิ
ยาวทตฺถํ นหายิ ยาวทตฺถํ ภุญฺชิตฺวา ยาวทตฺถํ สุปิตฺวา ยาวทตฺถํ นหายิตฺวา
ยทา อนภิรติ อุปฺปชฺชติ ราโค จิตฺตํ อนุทฺธํเสติ ตทา หตฺเถน อุปกฺกมิตฺวา อสุจึ
@เชิงอรรถ: ๑ ยุ. ม. เอวํ ฯ
โมเจติ ๑- ฯ อถโข อายสฺมา เสยฺยสโก อปเรน สมเยน วณฺณวา
อโหสิ ปีนินฺทฺริโย ปสนฺนมุขวณฺโณ วิปฺปสนฺนจฺฉวิวณฺโณ ฯ อถโข
อายสฺมโต เสยฺยสกสฺส สหายกา ภิกฺขู อายสฺมนฺตํ เสยฺยสกํ
เอตทโวจุํ ปุพฺเพ โข ตฺวํ อาวุโส เสยฺยสก กิโส อโหสิ ลูโข
ทุพฺพณฺโณ อุปฺปณฺฑุปฺปณฺฑุกชาโต ธมนิสนฺถตคตฺโต โสทานิ ตฺวํ
เอตรหิ วณฺณวา ปีนินฺทฺริโย ปสนฺนมุขวณฺโณ วิปฺปสนฺนจฺฉวิวณฺโณ
กินฺนุ โข ตฺวํ อาวุโส เสยฺยสก เภสชฺชํ กโรสีติ ฯ น โข อหํ
อาวุโส เภสชฺชํ กโรมิ อปิจาหํ ยาวทตฺถํ ภุญฺชามิ ยาวทตฺถํ
สุปามิ ยาวทตฺถํ นหายามิ ยาวทตฺถํ ภุญฺชิตฺวา ยาวทตฺถํ สุปิตฺวา
ยาวทตฺถํ นหายิตฺวา ยทา เม อนภิรติ อุปฺปชฺชติ ราโค จิตฺตํ
อนุทฺธํเสติ ตทา หตฺเถน อุปกฺกมิตฺวา อสุจึ โมเจมีติ ฯ กึ ปน
ตฺวํ อาวุโส เสยฺยสก เยเนว หตฺเถน สทฺธาเทยฺยํ ภุญฺชสิ เตเนว
หตฺเถน อุปกฺกมิตฺวา อสุจึ โมเจสีติ ฯ เอวมาวุโสติ ฯ เย เต
ภิกฺขู อปฺปิจฺฉา ฯเปฯ เต อุชฺฌายนฺติ ขียนฺติ วิปาเจนฺติ กถํ หิ
นาม อายสฺมา เสยฺยสโก หตฺเถน อุปกฺกมิตฺวา อสุจึ โมเจสฺสตีติ ฯ
{๓๐๑.๒} อถโข เต ภิกฺขู อายสฺมนฺตํ เสยฺยสกํ อเนกปริยาเยน วิครหิตฺวา
ภควโต เอตมตฺถํ อาโรเจสุํ ฯ อถโข ภควา เอตสฺมึ นิทาเน เอตสฺมึ
ปกรเณ ภิกฺขุสงฺฆํ สนฺนิปาตาเปตฺวา อายสฺมนฺตํ เสยฺยสกํ ปฏิปุจฺฉิ
สจฺจํ กิร ตฺวํ เสยฺยสก หตฺเถน อุปกฺกมิตฺวา อสุจึ โมเจสีติ ฯ สจฺจํ
@เชิงอรรถ: ๑ ยุ. ม. โมเจสิ ฯ
ภควาติ ฯ วิครหิ พุทฺโธ ภควา อนนุจฺฉวิกํ โมฆปุริส อนนุโลมิกํ
อปฺปฏิรูปํ อสฺสามณกํ อกปฺปิยํ อกรณียํ กถํ หิ นาม ตฺวํ โมฆปุริส
หตฺเถน อุปกฺกมิตฺวา อสุจึ โมเจสฺสสิ นนุ มยา โมฆปุริส อเนกปริยาเยน
วิราคาย ธมฺโม เทสิโต โน สราคาย วิสํโยคาย ธมฺโม
เทสิโต โน สํโยคาย อนุปาทานาย ธมฺโม เทสิโต โน สอุปาทานาย
ตตฺถ นาม ตฺวํ โมฆปุริส มยา วิราคาย ธมฺเม เทสิเต สราคาย
เจเตสฺสสิ วิสํโยคาย ธมฺเม เทสิเต สํโยคาย เจเตสฺสสิ อนุปาทานาย
ธมฺเม เทสิเต สอุปาทานาย เจเตสฺสสิ นนุ มยา โมฆปุริส
อเนกปริยาเยน ราควิราคาย ธมฺโม เทสิโต มทนิมฺมทนาย ปิปาสวินยาย
อาลยสมุคฺฆาตาย วฏฺฏูปจฺเฉทาย ตณฺหกฺขยาย วิราคาย
นิโรธาย นิพฺพานาย ธมฺโม เทสิโต นนุ มยา โมฆปุริส อเนกปริยาเยน
กามานํ ปหานํ อกฺขาตํ กามสญฺญานํ ปริญฺญา อกฺขาตา
กามปิปาสานํ ปฏิวินโย อกฺขาโต กามวิตกฺกานํ สมุคฺฆาโต อกฺขาโต
กามปริฬาหานํ วูปสโม อกฺขาโต เนตํ โมฆปุริส อปฺปสนฺนานํ วา
ปสาทาย ปสนฺนานํ วา ภิยฺโยภาวาย อถเขฺวตํ โมฆปุริส อปฺปสนฺนานญฺเจว
อปฺปสาทาย ปสนฺนานญฺจ เอกจฺจานํ อญฺญถตฺตายาติ ฯ อถโข ภควา
อายสฺมนฺตํ เสยฺยสกํ อเนกปริยาเยน วิครหิตฺวา ทุพฺภรตาย ทุปฺโปสตาย
ฯเปฯ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
{๓๐๑.๓} สญฺเจตนิกา สุกฺกวิสฏฺฐิ สงฺฆาทิเสโสติ ฯ
{๓๐๑.๔} เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
[๓๐๒] เตน โข ปน สมเยน ภิกฺขู ปณีตานิ โภชนานิ ภิญฺชิตฺวา
มุฏฺฐสฺสตี อสมฺปชานา นิทฺทํ โอกฺกมนฺติ ฯ เตสํ มุฏฺฐสฺสตีนํ
อสมฺปชานานํ นิทฺทํ โอกฺกมนฺตานํ สุปินนฺเตน อสุจิ มุจฺจติ ฯ
เตสํ กุกฺกุจฺจํ อโหสิ ภควตา สิกฺขาปทํ ปญฺญตฺตํ สญฺเจตนิกา
สุกฺกวิสฏฺฐิ สงฺฆาทิเสโสติ อมฺหากญฺจ สุปินนฺเตน อสุจิ มุจฺจติ ๑-
อตฺถิ เจตฺถ เจตนา อุปลพฺภติ ๒- กจฺจิ นุ โข มยํ สงฺฆาทิเสสํ
อาปตฺตึ อาปนฺนาติ ฯ ภควโต เอตมตฺถํ อาโรเจสุํ ฯ อตฺเถสา
ภิกฺขเว เจตนา สา จ โข อพฺโพหาริกาติ ฯ อถโข ภควา เอตสฺมึ
นิทาเน เอตสฺมึ ปกรเณ ธมฺมึ กถํ กตฺวา ภิกฺขู อามนฺเตสิ ฯเปฯ
เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
{๓๐๒.๑} สญฺเจตนิกา สุกฺกวิสฏฺฐิ อญฺญตฺร สุปินนฺตา สงฺฆาทิเสโสติ ฯ
[๓๐๓] สญฺเจตนิกาติ ชานนฺโต สญฺชานนฺโต เจจฺจ อภิวิตริตฺวา
วีติกฺกโม ฯ สุกฺกนฺติ ทส สุกฺกานิ นีลํ ปีตกํ โลหิตกํ โอทาตํ
ตกฺกวณฺณํ ทกวณฺณํ เตลวณฺณํ ขีรวณฺณํ ทธิวณฺณํ สปฺปิวณฺณํ ฯ
วิสฏฺฐีติ ฐานา ๓- จาวนา วุจฺจติ วิสฏฺฐีติ ฯ อญฺญตฺร สุปินนฺตาติ
ฐเปตฺวา สุปินนฺตํ ฯ สงฺฆาทิเสโสติ สงฺโฆ ว ตสฺสา อาปตฺติยา
ปริวาสํ เทติ มูลาย ปฏิกสฺสติ มานตฺตํ เทติ อพฺเภติ น สมฺพหุลา
น เอกปุคฺคโล เตน วุจฺจติ สงฺฆาทิเสโสติ ฯ ตสฺเสว อาปตฺตินิกายสฺส
นามกมฺมํ อธิวจนํ เตนปิ วุจฺจติ สงฺฆาทิเสโสติ ฯ
@เชิงอรรถ: ๑ ยุ. มุจฺจิ ฯ ๒ ยุ. ม. ลพฺภติ ฯ ๓ ยุ. ม. ฐานโต ฯ
[๓๐๔] อชฺฌตฺตรูเป โมเจติ พหิทฺธารูเป โมเจติ อชฺฌตฺตพหิทฺธารูเป
โมเจติ อากาเส กฏึ กมฺเปนฺโต โมเจติ ราคูปตฺถมฺเภ โมเจติ
วจฺจูปตฺถมฺเภ โมเจติ ปสฺสาวูปตฺถมฺเภ โมเจติ วาตูปตฺถมฺเภ
โมเจติ อุจฺจาลิงฺคปาณกทฏฺฐูปตฺถมฺเภ โมเจติ อาโรคฺยตฺถาย
โมเจติ สุขตฺถาย โมเจติ เภสชฺชตฺถาย โมเจติ ทานตฺถาย โมเจติ
ปุญฺญตฺถาย โมเจติ ยญฺญตฺถาย โมเจติ สคฺคตฺถาย โมเจติ
วีชตฺถาย โมเจติ วีมํสตฺถาย โมเจติ ทวตฺถาย โมเจติ นีลํ
โมเจติ ปีตกํ โมเจติ โลหิตกํ โมเจติ โอทาตํ โมเจติ ตกฺกวณฺณํ
โมเจติ ทกวณฺณํ โมเจติ เตลวณฺณํ โมเจติ ขีรวณฺณํ โมเจติ
ทธิวณฺณํ โมเจติ สปฺปิวณฺณํ โมเจติ ฯ
[๓๐๕] อชฺฌตฺตรูเปติ อชฺฌตฺตํ อุปาทินฺนรูเป ฯ พหิทฺธารูเปติ
พหิทฺธา อุปาทินฺเน วา อนุปาทินฺเน วา ฯ อชฺฌตฺตพหิทฺธารูเปติ
ตทุภเย ฯ อากาเส กฏึ กมฺเปนฺโตติ อากาเส วายมนฺตสฺส องฺคชาตํ
กมฺมนิยํ โหติ ฯ ราคูปตฺถมฺเภติ ราเคน ปีฬิตสฺส องฺคชาตํ กมฺมนิยํ
โหติ ฯ วจฺจูปตฺถมฺเภติ วจฺเจน ปีฬิตสฺส องฺคชาตํ กมฺมนิยํ โหติ ฯ
ปสฺสาวูปตฺถมฺเภติ ปสฺสาเวน ปีฬิตสฺส องฺคชาตํ กมฺมนิยํ โหติ ฯ
วาตูปตฺถมฺเภติ วาเตน ปีฬิตสฺส องฺคชาตํ กมฺมนิยํ โหติ ฯ อุจฺจาลิงฺค-
ปาณกทฏฺฐูปตฺถมฺเภติ อุจฺจาลิงฺคปาณกทฏฺเฐน ปีฬิตสฺส องฺคชาตํ
กมฺมนิยํ โหติ ฯ อาโรคฺยตฺถายาติ อโรโค ภวิสฺสามีติ ฯ สุขตฺถายาติ
สุขํ เวทนํ อุปฺปาเทสฺสามีติ ฯ เภสชฺชตฺถายาติ เภสชฺชํ ภวิสฺสตีติ ฯ
ทานตฺถายาติ ทานํ ทสฺสามีติ ฯ ปุญฺญตฺถายาติ ปุญฺญํ ภวิสฺสตีติ ฯ
ยญฺญตฺถายาติ ยญฺญํ ยชิสฺสามีติ ฯ สคฺคตฺถายาติ สคฺคํ คมิสฺสามีติ ฯ
วีชตฺถายาติ วีชํ ภวิสฺสตีติ ฯ วีมํสตฺถายาติ วีมํสิสฺสามิ ๑- นีลํ
ภวิสฺสติ ปีตกํ ภวิสฺสติ โลหิตกํ ภวิสฺสติ โอทาตํ ภวิสฺสติ ฯเปฯ
สปฺปิวณฺณํ ภวิสฺสตีติ ฯ ทวตฺถายาติ ขิฑฺฑาธิปฺปาโย ฯ
[๓๐๖] อชฺฌตฺตรูเป เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ พหิทฺธารูเป เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ อชฺฌตฺตพหิทฺธารูเป เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ อากาเส กฏึ กมฺเปนฺโต เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ ราคูปตฺถมฺเภ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ วจฺจูปตฺถมฺเภ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ ปสฺสาวูปตฺถมฺเภ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ วาตูปตฺถมฺเภ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ อุจฺจาลิงฺคปาณกทฏฺฐูปตฺถมฺเภ
เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ อาโรคฺยตฺถาย
เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ สุขตฺถาย
ฯเปฯ เภสชฺชตฺถาย ทานตฺถาย ปุญฺญตฺถาย ยญฺญตฺถาย สคฺคตฺถาย
วีชตฺถาย วีมํสตฺถาย ทวตฺถาย เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ นีลํ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
@เชิงอรรถ: ๑ ยุ. ม. โปตฺถเกสุ อยํ ปาโฐ น ปญฺญายติ ฯ
ปีตกํ โลหิตกํ โอทาตํ ตกฺกวณฺณํ ทกวณฺณํ เตลวณฺณํ ขีรวณฺณํ
ทธิวณฺณํ สปฺปิวณฺณํ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
สุทฺธิกํ นิฏฺฐิตํ ฯ
[๓๐๗] อาโรคฺยตฺถญฺจ สุขตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ อาโรคฺยตฺถญฺจ เภสชฺชตฺถญฺจ ฯ
อาโรคฺยตฺถญฺจ ทานตฺถญฺจ ฯ อาโรคฺยตฺถญฺจ ปุญฺญตฺถญฺจ ฯ
อาโรคฺยตฺถญฺจ ยญฺญตฺถญฺจ ฯ อาโรคฺยตฺถญฺจ สคฺคตฺถญฺจ ฯ
อาโรคฺยตฺถญฺจ วีชตฺถญฺจ ฯ อาโรคฺยตฺถญฺจ วีมํสตฺถญฺจ ฯ
อาโรคฺยตฺถญฺจ ทวตฺถญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
เอกมูลํ ๑- ขณฺฑจกฺกํ นิฏฺฐิตํ ฯ
[๓๐๘] สุขตฺถญฺจ เภสชฺชตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ สุขตฺถญฺจ ทานตฺถญฺจ ฯ สุขตฺถญฺจ
ปุญฺญตฺถญฺจ ฯ สุขตฺถญฺจ ยญฺญตฺถญฺจ ฯ สุขตฺถญฺจ สคฺคตฺถญฺจ ฯ
สุขตฺถญฺจ วีชตฺถญฺจ ฯ สุขตฺถญฺจ วีมํสตฺถญฺจ ฯ สุขตฺถญฺจ
ทวตฺถญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
สุขตฺถญฺจ อาโรคฺยตฺถญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
@เชิงอรรถ: ๑ ยุ. ม. เอกมูลกสฺส ฯ
[๓๐๙] เภสชฺชตฺถญฺจ ทานตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ เภสชฺชตฺถญฺจ ปุญฺญตฺถญฺจ ฯ เภสชฺชตฺถญฺจ
ยญฺญตฺถญฺจ ฯ เภสชฺชตฺถญฺจ สคฺคตฺถญฺจ ฯ เภสชฺชตฺถญฺจ
วีชตฺถญฺจ ฯ เภสชฺชตฺถญฺจ วีมํสตฺถญฺจ ฯ เภสชฺชตฺถญฺจ ทวตฺถญฺจ ฯ
เภสชฺชตฺถญฺจ อาโรคฺยตฺถญฺจ ฯ เภสชฺชตฺถญฺจ สุขตฺถญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ
[๓๑๐] ทานตฺถญฺจ ปุญฺญตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ ทานตฺถญฺจ ยญฺญตฺถญฺจ ฯ ทานตฺถญฺจ
สคฺคตฺถญฺจ ฯ ทานตฺถญฺจ วีชตฺถญฺจ ฯ ทานตฺถญฺจ วีมํสตฺถญฺจ ฯ
ทานตฺถญฺจ ทวตฺถญฺจ ฯ ทานตฺถญฺจ อาโรคฺยตฺถญฺจ ฯ ทานตฺถญฺจ
สุขตฺถญฺจ ฯ ทานตฺถญฺจ เภสชฺชตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ
[๓๑๑] ปุญฺญตฺถญฺจ ยญฺญตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ ปุญฺญตฺถญฺจ สคฺคตฺถญฺจ ฯ ปุญฺญตฺถญฺจ
วีชตฺถญฺจ ฯ ปุญฺญตฺถญฺจ วีมํสตฺถญฺจ ฯ ปุญฺญตฺถญฺจ ทวตฺถญฺจ ฯ
ปุญฺญตฺถญฺจ อาโรคฺยตฺถญฺจ ฯ ปุญฺญตฺถญฺจ สุขตฺถญฺจ ฯ
ปุญฺญตฺถญฺจ เภสชฺชตฺถญฺจ ฯ ปุญฺญตฺถญฺจ ทานตฺถญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ
[๓๑๒] ยญฺญตฺถญฺจ สคฺคตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ ยญฺญตฺถญฺจ วีชตฺถญฺจ ฯ ยญฺญตฺถญฺจ
วีมํสตฺถญฺจ ฯ ยญฺญตฺถญฺจ ทวตฺถญฺจ ฯ ยญฺญตฺถญฺจ อาโรคฺยตฺถญฺจ ฯ
ยญฺญตฺถญฺจ สุขตฺถญฺจ ฯ ยญฺญตฺถญฺจ เภสชฺชตฺถญฺจ ฯ ยญฺญตฺถญฺจ
ทานตฺถญฺจ ฯ ยญฺญตฺถญฺจ ปุญฺญตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ
[๓๑๓] สคฺคตฺถญฺจ วีชตฺถญฺจ ฯ สคฺคตฺถญฺจ วีมํสตฺถญฺจ ฯ
สคฺคตฺถญฺจ ทวตฺถญฺจ ฯ สคฺคตฺถญฺจ อาโรคฺยตฺถญฺจ ฯ สคฺคตฺถญฺจ
สุขตฺถญฺจ ฯ สคฺคตฺถญฺจ เภสชฺชตฺถญฺจ ฯ สคฺคตฺถญฺจ ทานตฺถญฺจ ฯ
สคฺคตฺถญฺจ ปุญฺญตฺถญฺจ ฯ สคฺคตฺถญฺจ ยญฺญตฺถญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ
[๓๑๔] วีชตฺถญฺจ วีมํสตฺถญฺจ ฯ วีชตฺถญฺจ ทวตฺถญฺจ ฯ
วีชตฺถญฺจ อาโรคฺยตฺถญฺจ ฯ วีชตฺถญฺจ สุขตฺถญฺจ ฯ วีชตฺถญฺจ
เภสชฺชตฺถญฺจ ฯ วีชตฺถญฺจ ทานตฺถญฺจ ฯ วีชตฺถญฺจ ปุญฺญตฺถญฺจ ฯ
วีชตฺถญฺจ ยญฺญตฺถญฺจ ฯ วีชตฺถญฺจ สคฺคตฺถญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
[๓๑๕] วีมํสตฺถญฺจ ทวตฺถญฺจ ฯ วีมํสตฺถญฺจ อาโรคฺยตฺถญฺจ ฯ
วีมํสตฺถญฺจ สุขตฺถญฺจ ฯ วีมํสตฺถญฺจ เภสชฺชตฺถญฺจ ฯ วีมํสตฺถญฺจ
ทานตฺถญฺจ ฯ วีมํสตฺถญฺจ ปุญฺญตฺถญฺจ ฯ วีมํสตฺถญฺจ ยญฺญตฺถญฺจ ฯ
วีมํสตฺถญฺจ สคฺคตฺถญฺจ ฯ วีมํสตฺถญฺจ วีชตฺถญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
[๓๑๖] ทวตฺถญฺจ อาโรคฺยตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ ทวตฺถญฺจ สุขตฺถญฺจ ฯ ทวตฺถญฺจ
เภสชฺชตฺถญฺจ ฯ ทวตฺถญฺจ ทานตฺถญฺจ ฯ ทวตฺถญฺจ ปุญฺญตฺถญฺจ ฯ
ทวตฺถญฺจ ยญฺญตฺถญฺจ ฯ ทวตฺถญฺจ สคฺคตฺถญฺจ ฯ ทวตฺถญฺจ
วีชตฺถญฺจ ฯ ทวตฺถญฺจ วีมํสตฺถญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ
เอกมูลกํ ๑- พทฺธจกฺกํ นิฏฺฐิตํ ฯ
ทุมูลกาทิปิ เอวเมว เนตพฺพํ ฯ
[๓๑๗] อาโรคฺยตฺถญฺจ สุขตฺถญฺจ เภสชฺชตฺถญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯเปฯ อาโรคฺยตฺถญฺจ สุขตฺถญฺจ
ทวตฺถญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
ทุมูลกํ ขณฺฑจกฺกํ ฯ
[๓๑๘] สุขตฺถญฺจ เภสชฺชตฺถญฺจ ทานตฺถญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯเปฯ สุขตฺถญฺจ เภสชฺชตฺถญฺจ
ทวตฺถญฺจ ฯเปฯ สุขตฺถญฺจ เภสชฺชตฺถญฺจ อาโรคฺยตฺถญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯเปฯ วีมํสตฺถญฺจ
ทวตฺถญฺจ อาโรคฺยตฺถญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯเปฯ วีมํสตฺถญฺจ ทวตฺถญฺจ วีชตฺถญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ
ทุมูลกํ พทฺธจกฺกํ นิฏฺฐิตํ ฯ
@เชิงอรรถ: ๑ ยุ. ม. เอกมูลกสฺส ฯ
[๓๑๙] ติมูลกํ จตุมูลกํ ปญฺจมูลกํ ฉมูลกํ สตฺตมูลกํ อฏฺฐมูลกํ
นวมูลกํ เอวเมว กาตพฺพํ ฯ
อิทํ สพฺพมูลกํ ฯ
[๓๒๐] อาโรคฺยตฺถญฺจ สุขตฺถญฺจ ฯ เภสชฺชตฺถญฺจ ทานตฺถญฺจ ฯ
ปุญฺญตฺถญฺจ ยญฺญตฺถญฺจ ฯ สคฺคตฺถญฺจ วีชตฺถญฺจ ฯ วีมํสตฺถญฺจ
ทวตฺถญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
สพฺพมูลกํ นิฏฺฐิตํ ฯ
[๓๒๑] นีลญฺจ ปีตกญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ นีลญฺจ โลหิตกญฺจ ฯเปฯ นีลญฺจ โอทาตญฺจ ฯ
นีลญฺจ ตกฺกวณฺณญฺจ ฯ นีลญฺจ ทกวณฺณญฺจ ฯ นีลญฺจ
เตลวณฺณญฺจ ฯ นีลญฺจ ขีรวณฺณญฺจ ฯ นีลญฺจ ทธิวณฺณญฺจ ฯ
นีลญฺจ สปฺปิวณฺณญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
เอกมูลกํ ๑- ขณฺฑจกฺกํ นิฏฺฐิตํ ฯ
[๓๒๒] ปีตกญฺจ โลหิตกญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ ปีตกญฺจ โอทาตญฺจ ฯเปฯ ปีตกญฺจ ตกฺกวณฺณญฺจ ฯ
ปีตกญฺจ ทกวณฺณญฺจ ฯ ปีตกญฺจ เตลวณฺณญฺจ ฯ
ปีตกญฺจ ขีรวณฺณญฺจ ฯ ปีตกญฺจ ทธิวณฺณญฺจ ฯ ปีตกญฺจ
สปฺปิวณฺณญฺจ ฯ ปีตกญฺจ นีลญฺจ เจเตติ อุปกฺกมติ มุจฺจติ
@เชิงอรรถ: ๑ ยุ. ม. เอกมูลกสฺส ฯ
อาปตฺติ สงฺฆาทิเสสสฺส ฯ
{๓๒๒.๑} โลหิตกญฺจ โอทาตญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ โลหิตกญฺจ ตกฺกวณฺณญฺจ ฯ
โลหิตกญฺจ ทกวณฺณญฺจ ฯ โลหิตกญฺจ เตลวณฺณญฺจ ฯ
โลหิตกญฺจ ขีรวณฺณญฺจ ฯ โลหิตกญฺจ ทธิวณฺณญฺจ ฯ
โลหิตกญฺจ สปฺปิวณฺณญฺจ ฯ โลหิตกญฺจ นีลญฺจ ฯ โลหิตกญฺจ
ปีตกญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
โอทาตญฺจ ตกฺกวณฺณญฺจ ฯ โอทาตญฺจ ทกวณฺณญฺจ ฯ
โอทาตญฺจ เตลวณฺณญฺจ ฯ โอทาตญฺจ ขีรวณฺณญฺจ ฯ โอทาตญฺจ
ทธิวณฺณญฺจ ฯ โอทาตญฺจ สปฺปิวณฺณญฺจ ฯ โอทาตญฺจ นีลญฺจ ฯ
โอทาตญฺจ ปีตกญฺจ ฯ โอทาตญฺจ โลหิตกญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
{๓๒๒.๒} ตกฺกวณฺณญฺจ ทกวณฺณญฺจ ฯ ตกฺกวณฺณญฺจ
เตลวณฺณญฺจ ฯ ตกฺกวณฺณญฺจ ขีรวณฺณญฺจ ฯ ตกฺกวณฺณญฺจ
ทธิวณฺณญฺจ ฯ ตกฺกวณฺณญฺจ สปฺปิวณฺณญฺจ ฯ ตกฺกวณฺณญฺจ
นีลญฺจ ฯ ตกฺกวณฺณญฺจ ปีตกญฺจ ฯ ตกฺกวณฺณญฺจ โลหิตกญฺจ ฯ
ตกฺกวณฺณญฺจ โอทาตญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
{๓๒๒.๓} ทกวณฺณญฺจ เตลวณฺณญฺจ ฯ ทกวณฺณญฺจ
ขีรวณฺณญฺจ ฯ ทกวณฺณญฺจ ทธิวณฺณญฺจ ฯ ทกวณฺณญฺจ
สปฺปิวณฺณญฺจ ฯ ทกวณฺณญฺจ นีลญฺจ ฯ ทกวณฺณญฺจ
ปีตกญฺจ ฯ ทกวณฺณญฺจ โลหิตกญฺจ ฯ ทกวณฺณญฺจ
โอทาตญฺจ ฯ ทกวณฺณญฺจ ตกฺกวณฺณญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
{๓๒๒.๔} เตลวณฺณญฺจ ขีรวณฺณญฺจ ฯ เตลวณฺณญฺจ
ทวิวณฺณญฺจ ฯ เตลวณฺณญฺจ สปฺปิวณฺณญฺจ ฯ
เตลวณฺณญฺจ นีลญฺจ ฯ เตลวณฺณญฺจ ปีตกญฺจ ฯ เตลวณฺณญฺจ
โลหิตกญฺจ ฯ เตลวณฺณญฺจ โอทาตญฺจ ฯ เตลวณฺณญฺจ
ตกฺกวณฺณญฺจ ฯ เตลวณฺณญฺจ ทกวณฺณญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
{๓๒๒.๕} ขีรวณฺณญฺจ ทธิวณฺณญฺจ ฯ ขีรวณฺณญฺจ
สปฺปิวณฺณญฺจ ฯ ขีรวณฺณญฺจ นีลญฺจ ฯ ขีรวณฺณญฺจ
ปีตกญฺจ ฯ ขีรวณฺณญฺจ โลหิตกญฺจ ฯ ขีรวณฺณญฺจ
โอทาตญฺจ ฯ ขีรวณฺณญฺจ ตกฺกวณฺณญฺจ ฯ ขีรวณฺณญฺจ
ทกวณฺณญฺจ ฯ ขีรวณฺณญฺจ เตลวณฺณญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
{๓๒๒.๖} ทธิวณฺณญฺจ สปฺปิวณฺณญฺจ ฯ ทธิวณฺณญฺจ
นีลญฺจ ฯ ทธิวณฺณญฺจ ปีตกญฺจ ฯ ทธิวณฺณญฺจ โลหิตกญฺจ ฯ
ทธิวณฺณญฺจ โอทาตญฺจ ฯ ทธิวณฺณญฺจ ตกฺกวณฺณญฺจ ฯ
ทธิวณฺณญฺจ ทกวณฺณญฺจ ฯ ทธิวณฺณญฺจ เตลวณฺณญฺจ ฯ
ทธิวณฺณญฺจ ขีรวณฺณญฺจ เจเตติ อุปกฺกมติ มุจฺจติ อาปตฺติ
สงฺฆาทิเสสสฺส ฯ
{๓๒๒.๗} สปฺปิวณฺณญฺจ นีลญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ สปฺปิวณฺณญฺจ
ปีตกญฺจ ฯ สปฺปิวณฺณญฺจ โลหิตกญฺจ ฯ สปฺปิวณฺณญฺจ
โอทาตญฺจ ฯ สปฺปิวณฺณญฺจ ตกฺกวณฺณญฺจ ฯ สปฺปิวณฺณญฺจ
ทกวณฺณญฺจ ฯ สปฺปิวณฺณญฺจ เตลวณฺณญฺจ ฯ สปฺปิวณฺณญฺจ
ขีรวณฺณญฺจ ฯ สปฺปิวณฺณญฺจ ทธิวณฺณญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ
เอกมูลกํ ๑- พทฺธจกฺกํ นิฏฺฐิตํ ฯ
ทุมูลกาทิปิ เอวเมว เนตพฺพํ ฯ
[๓๒๓] นีลญฺจ ปีตกญฺจ โลหิตกญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ นีลญฺจ ปีตกญฺจ โอทาตญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯเปฯ นีลญฺจ ปีตกญฺจ
สปฺปิวณฺณญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
ทุมูลกํ ขณฺฑจกฺกํ นิฏฺฐิตํ ฯ
[๓๒๔] ปีตกญฺจ โลหิตกญฺจ โอทาตญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯเปฯ ปีตกญฺจ โลหิตกญฺจ
นีลญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯเปฯ
ทธิวณฺณญฺจ สปฺปิวณฺณญฺจ นีลญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯเปฯ ทธิวณฺณญฺจ สปฺปิวณฺณญฺจ
ขีรวณฺณญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
ทุมูลกํ พทฺธจกฺกํ นิฏฺฐิตํ ฯ
[๓๒๕] ติมูลกํ จตุมูลกํ ปญฺจมูลกํ ฉมูลกํ สตฺตมูลกํ อฏฺฐมูลกํ
นวมูลกํ เอวเมว กาตพฺพํ ฯ
อิทํ สพฺพมูลกํ ฯ
@เชิงอรรถ: ๑ ยุ. ม. เอกมูลกสฺส ฯ
[๓๒๖] นีลญฺจ ปีตกญฺจ โลหิตกญฺจ โอทาตญฺจ ตกฺกวณฺณญฺจ
ทกวณฺณญฺจ เตลวณฺณญฺจ ขีรวณฺณญฺจ ทธิวณฺณญฺจ สปฺปิวณฺณญฺจ
เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
สพฺพมูลกํ นิฏฺฐิตํ ฯ
[๓๒๗] อาโรคฺยตฺถญฺจ นีลญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ อาโรคฺยตฺถญฺจ สุขตฺถญฺจ นีลญฺจ ปีตกญฺจ
เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ อาโรคฺยตฺถญฺจ
สุขตฺถญฺจ เภสชฺชตฺถญฺจ นีลญฺจ ปีตกญฺจ โลหิตกญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ อาโรคฺยตฺถญฺจ
สุขตฺถญฺจ เภสชฺชตฺถญฺจ ทานตฺถญฺจ นีลญฺจ ปีตกญฺจ โลหิตกญฺจ
โอทาตญฺจ เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
อาโรคฺยตฺถญฺจ สุขตฺถญฺจ เภสชฺชตฺถญฺจ ทานตฺถญฺจ ปุญฺญตฺถญฺจ
นีลญฺจ ปีตกญฺจ โลหิตกญฺจ โอทาตญฺจ ตกฺกวณฺณญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ อาโรคฺยตฺถญฺจ
สุขตฺถญฺจ เภสชฺชตฺถญฺจ ทานตฺถญฺจ ปุญฺญตฺถญฺจ ยญฺญตฺถญฺจ
นีลญฺจ ปีตกญฺจ โลหิตกญฺจ โอทาตญฺจ ตกฺกวณฺณญฺจ ทกวณฺณญฺจ
เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
{๓๒๗.๑} อาโรคฺยตฺถญฺจ สุขตฺถญฺจ เภสชฺชตฺถญฺจ ทานตฺถญฺจ
ปุญฺญตฺถญฺจ ยญฺญตฺถญฺจ สคฺคตฺถญฺจ นีลญฺจ ปีตกญฺจ โลหิตกญฺจ
โอทาตญฺจ ตกฺกวณฺณญฺจ ทกวณฺณญฺจ เตลวณฺณญฺจ เจเตติ อุปกฺกมติ
มุจฺจติ อาปตฺติ สงฺฆาทิเสสสฺส ฯ อาโรคฺยตฺถญฺจ สุขตฺถญฺจ
เภสชฺชตฺถญฺจ ทานตฺถญฺจ ปุญฺญตฺถญฺจ ยญฺญตฺถญฺจ สคฺคตฺถญฺจ
วีชตฺถญฺจ นีลญฺจ ปีตกญฺจ โลหิตกญฺจ โอทาตญฺจ ตกฺกวณฺณญฺจ
ทกวณฺณญฺจ เตลวณฺณญฺจ ขีรวณฺณญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ อาโรคฺยตฺถญฺจ สุขตฺถญฺจ เภสชฺชตฺถญฺจ
ทานตฺถญฺจ ปุญฺญตฺถญฺจ ยญฺญตฺถญฺจ สคฺคตฺถญฺจ วีชตฺถญฺจ
วีมํสตฺถญฺจ นีลญฺจ ปีตกญฺจ โลหิตกญฺจ โอทาตญฺจ ตกฺกวณฺณญฺจ
ทกวณฺณญฺจ เตลวณฺณญฺจ ขีรวณฺณญฺจ ทธิวณฺณญฺจ เจเตติ
อุปกฺกมติ มุจฺจติ อาปตฺติ สงฺฆาทิเสสสฺส ฯ
{๓๒๗.๒} อาโรคฺยตฺถญฺจ สุขตฺถญฺจ เภสชฺชตฺถญฺจ ทานตฺถญฺจ ปุญฺญตฺถญฺจ
ยญฺญตฺถญฺจ สคฺคตฺถญฺจ วีชตฺถญฺจ วีมํสตฺถญฺจ ทวตฺถญฺจ นีลญฺจ ปีตกญฺจ
โลหิตกญฺจ โอทาตญฺจ ตกฺกวณฺณญฺจ ทกวณฺณญฺจ เตลวณฺณญฺจ
ขีรวณฺณญฺจ ทธิวณฺณญฺจ สปฺปิวณฺณญฺจ เจเตติ อุปกฺกมติ มุจฺจติ
อาปตฺติ สงฺฆาทิเสสสฺส ฯ
อุภโตพทฺธมิสฺสกจกฺกํ ๑- นิฏฺฐิตํ ฯ
[๓๒๘] นีลํ โมเจสฺสามีติ เจเตติ อุปกฺกมติ ปีตกํ มุจฺจติ
อาปตฺติ สงฺฆาทิเสสสฺส ฯ นีลํ โมเจสฺสามีติ เจเตติ อุปกฺกมติ
โลหิตกํ มุจฺจติ อาปตฺติ สงฺฆาทิเสสสฺส ฯ นีลํ โมเจสฺสามีติ เจเตติ
อุปกฺกมติ โอทาตํ มุจฺจติ อาปตฺติ สงฺฆาทิเสสสฺส ฯ นีลํ
@เชิงอรรถ: ๑ ยุ. ม. มิสฺสกจกฺกํ ฯ
โมเจสฺสามีติ เจเตติ อุปกฺกมติ ตกฺกวณฺณํ มุจฺจติ อาปตฺติ
สงฺฆาทิเสสสฺส ฯ นีลํ โมเจสฺสามีติ เจเตติ อุปกฺกมติ ทกวณฺณํ
มุจฺจติ อาปตฺติ สงฺฆาทิเสสสฺส ฯ นีลํ โมเจสฺสามีติ เจเตติ
อุปกฺกมติ เตลวณฺณํ มุจฺจติ อาปตฺติ สงฺฆาทิเสสสฺส ฯ นีลํ
โมเจสฺสามีติ เจเตติ อุปกฺกมติ ขีรวณฺณํ มุจฺจติ อาปตฺติ
สงฺฆาทิเสสสฺส ฯ นีลํ โมเจสฺสามีติ เจเตติ อุปกฺกมติ ทธิวณฺณํ
มุจฺจติ อาปตฺติ สงฺฆาทิเสสสฺส ฯ นีลํ โมเจสฺสามีติ เจเตติ
อุปกฺกมติ สปฺปิวณฺณํ มุจฺจติ อาปตฺติ สงฺฆาทิเสสสฺส ฯ
ขณฺฑจกฺกํ นิฏฺฐิตํ ฯ
[๓๒๙] ปีตกํ โมเจสฺสามีติ เจเตติ อุปกฺกมติ โลหิตกํ มุจฺจติ
อาปตฺติ สงฺฆาทิเสสสฺส ฯ ปีตกํ โมเจสฺสามีติ เจเตติ อุปกฺกมติ
โอทาตํ มุจฺจติ ฯเปฯ ตกฺกวณฺณํ มุจฺจติ ฯ ทกวณฺณํ มุจฺจติ ฯ
เตลวณฺณํ มุจฺจติ ฯ ขีรวณฺณํ มุจฺจติ ฯ ทธิวณฺณํ มุจฺจติ ฯ
สปฺปิวณฺณํ มุจฺจติ ฯ นีลํ มุจฺจติ อาปตฺติ สงฺฆาทิเสสสฺส ฯ
พทฺธจกฺกํ นิฏฺฐิตํ ฯ
[๓๓๐] โลหิตกํ โมเจสฺสามีติ เจเตติ อุปกฺกมติ โอทาตํ มุจฺจติ
อาปตฺติ สงฺฆาทิเสสสฺส ฯ โลหิตกํ โมเจสฺสามีติ เจเตติ อุปกฺกมติ
ตกฺกวณฺณํ มุจฺจติ ฯเปฯ ทกวณฺณํ มุจฺจติ ฯ เตลวณฺณํ มุจฺจติ ฯ
ขีรวณฺณํ มุจฺจติ ฯ ทธิวณฺณํ มุจฺจติ ฯ สปฺปิวณฺณํ มุจฺจติ ฯ นีลํ
มุจฺจติ ฯ ปีตกํ มุจฺจติ อาปตฺติ สงฺฆาทิเสสสฺส ฯ โอทาตํ โมเจสฺสามีติ
เจเตติ อุปกฺกมติ ตกฺกวณฺณํ มุจฺจติ อาปตฺติ สงฺฆาทิเสสสฺส
ฯเปฯ โลหิตกํ มุจฺจติ อาปตฺติ สงฺฆาทิเสสสฺส ฯ (เอวํ
จกฺกานิ เวทิตพฺพานิ ฯ) สปฺปิวณฺณํ โมเจสฺสามีติ เจเตติ อุปกฺกมติ
นีลํ มุจฺจติ อาปตฺติ สงฺฆาทิเสสสฺส ฯ สปฺปิวณฺณํ โมเจสฺสามีติ
เจเตติ อุปกฺกมติ ปีตกํ มุจฺจติ ฯเปฯ โลหิตกํ มุจฺจติ ฯ โอทาตํ
มุจฺจติ ฯ ตกฺกวณฺณํ มุจฺจติ ฯ ทกวณฺณํ มุจฺจติ ฯ เตลวณฺณํ มุจฺจติ ฯ
ขีรวณฺณํ มุจฺจติ ฯ ทธิวณฺณํ มุจฺจติ อาปตฺติ สงฺฆาทิเสสสฺส ฯ
กุจฺฉิจกฺกํ นิฏฺฐิตํ ฯ
[๓๓๑] ปีตกํ โมเจสฺสามีติ เจเตติ อุปกฺกมติ นีลํ มุจฺจติ
อาปตฺติ สงฺฆาทิเสสสฺส ฯ โลหิตกํ โมเจสฺสามีติ เจเตติ อุปกฺกมติ
นีลํ มุจฺจติ ฯ โอทาตํ โมเจสฺสามีติ เจเตติ อุปกฺกมติ นีลํ
มุจฺจติ ฯ ตกฺกวณฺณํ โมเจสฺสามีติ เจเตติ อุปกฺกมติ นีลํ มุจฺจติ ฯ
ทกวณฺณํ โมเจสฺสามีติ เจเตติ อุปกฺกมติ นีลํ มุจฺจติ ฯ เตลวณฺณํ
โมเจสฺสามีติ เจเตติ อุปกฺกมติ นีลํ มุจฺจติ ฯ ขีรวณฺณํ โมเจสฺสามีติ
เจเตติ อุปกฺกมติ นีลํ มุจฺจติ ฯ ทธิวณฺณํ โมเจสฺสามีติ เจเตติ
อุปกฺกมติ นีลํ มุจฺจติ ฯ สปฺปิวณฺณํ โมเจสฺสามีติ เจเตติ
อุปกฺกมติ นีลํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ปฐมํ คมนํ นิฏฺฐิตํ ฯ
[๓๓๒] โลหิตกํ โมเจสฺสามีติ เจเตติ อุปกฺกมติ ปีตกํ มุจฺจติ
อาปตฺติ สงฺฆาทิเสสสฺส ฯ โอทาตํ ตกฺกวณฺณํ ทกวณฺณํ เตลวณฺณํ
ขีรวณฺณํ ทธิวณฺณํ สปฺปิวณฺณํ ฯ นีลํ โมเจสฺสามีติ เจเตติ
อุปกฺกมติ ปีตกํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ทุติยํ คมนํ นิฏฺฐิตํ ฯ
[๓๓๓] โอทาตํ โมเจสฺสามีติ เจเตติ อุปกฺกมติ โลหิตกํ มุจฺจติ
อาปตฺติ สงฺฆาทิเสสสฺส ฯ ตกฺกวณฺณํ ทกวณฺณํ เตลวณฺณํ ขีรวณฺณํ
ทธิวณฺณํ สปฺปิวณฺณํ นีลํ ฯ ปีตกํ โมเจสฺสามีติ เจเตติ
อุปกฺกมติ โลหิตกํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ตติยํ คมนํ นิฏฺฐิตํ ฯ
[๓๓๔] ตกฺกวณฺณํ โมเจสฺสามีติ เจเตติ อุปกฺกมติ โอทาตํ
มุจฺจติ อาปตฺติ สงฺฆาทิเสสสฺส ฯ ทกวณฺณํ เตลวณฺณํ ขีรวณฺณํ
ทธิวณฺณํ สปฺปิวณฺณํ นีลํ ปีตกํ ฯ โลหิตกํ โมเจสฺสามีติ เจเตติ
อุปกฺกมติ โอทาตํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส จตุตฺถํ คมนํ นิฏฺฐิตํ ฯ
[๓๓๕] ทกวณฺณํ โมเจสฺสามีติ เจเตติ อุปกฺกมติ ตกฺกวณฺณํ
มุจฺจติ อาปตฺติ สงฺฆาทิเสสสฺส ฯ เตลวณฺณํ ขีรวณฺณํ ทธิวณฺณํ
สปฺปิวณฺณํ นีลํ ปีตกํ โลหิตกํ ฯ โอทาตํ โมเจสฺสามีติ เจเตติ
อุปกฺกมติ ตกฺกวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ปญฺจมํ คมนํ นิฏฺฐิตํ ฯ
[๓๓๖] เตลวณฺณํ โมเจสฺสามีติ เจเตติ อุปกฺกมติ ทกวณฺณํ
มุจฺจติ อาปตฺติ สงฺฆาทิเสสสฺส ฯ ขีรวณฺณํ ทธิวณฺณํ สปฺปิวณฺณํ
นีลํ ปีตกํ โลหิตกํ โอทาตํ ฯ ตกฺกวณฺณํ โมเจสฺสามีติ เจเตติ
อุปกฺกมติ ทกวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ฉฏฺฐํ คมนํ นิฏฺฐิตํ ฯ
[๓๓๗] ขีรวณฺณํ โมเจสฺสามีติ เจเตติ อุปกฺกมติ เตลวณฺณํ
มุจฺจติ อาปตฺติ สงฺฆาทิเสสสฺส ฯ ทธิวณฺณํ สปฺปิวณฺณํ นีลํ
ปีตกํ โลหิตกํ โอทาตํ ตกฺกวณฺณํ ฯ ทกวณฺณํ โมเจสฺสามีติ
เจเตติ อุปกฺกมติ เตลวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส สตฺตมํ คมนํ นิฏฺฐิตํ ฯ
[๓๓๘] ทธิวณฺณํ โมเจสฺสามีติ เจเตติ อุปกฺกมติ ขีรวณฺณํ
มุจฺจติ อาปตฺติ สงฺฆาทิเสสสฺส ฯ สปฺปิวณฺณํ นีลํ ปีตกํ โลหิตกํ
โอทาตํ ตกฺกวณฺณํ ทกวณฺณํ ฯ เตลวณฺณํ โมเจสฺสามีติ เจเตติ
อุปกฺกมติ ขีรวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส อฏฺฐมํ คมนํ นิฏฺฐิตํ ฯ
[๓๓๙] สปฺปิวณฺณํ โมเจสฺสามีติ เจเตติ อุปกฺกมติ ทธิวณฺณํ
มุจฺจติ อาปตฺติ สงฺฆาทิเสสสฺส ฯ นีลํ ปีตกํ โลหิตกํ โอทาตํ
ตกฺกวณฺณํ ทกวณฺณํ เตลวณฺณํ ฯ ขีรวณฺณํ โมเจสฺสามีติ เจเตติ
อุปกฺกมติ ทธิวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส นวมํ คมนํ นิฏฺฐิตํ ฯ
[๓๔๐] นีลํ โมเจสฺสามีติ เจเตติ อุปกฺกมติ สปฺปิวณฺณํ มุจฺจติ
อาปตฺติ สงฺฆาทิเสสสฺส ฯ ปีตกํ โลหิตกํ โอทาตํ ตกฺกวณฺณํ
ทกวณฺณํ เตลวณฺณํ ขีรวณฺณํ ฯ ทธิวณฺณํ โมเจสฺสามีติ เจเตติ
อุปกฺกมติ สปฺปิวณฺณํ มุจฺจติ อาปตฺติ สงฺฆาทิเสสสฺส ฯ
ปิฏฺฐิจกฺกสฺส ทสมํ คมนํ นิฏฺฐิตํ ฯ
ปิฏฺฐิจกฺกํ นิฏฺฐิตํ ๑- ฯ
[๓๔๓] *- เจเตติ อุปกฺกมติ มุจฺจติ อาปตฺติ สงฺฆาทิเสสสฺส ฯ
เจเตติ อุปกฺกมติ น มุจฺจติ อาปตฺติ ถุลฺลจฺจยสฺส ฯ เจเตติ น
อุปกฺกมติ มุจฺจติ อนาปตฺติ ฯ เจเตติ น อุปกฺกมติ น มุจฺจติ
อนาปตฺติ ฯ น เจเตติ อุปกฺกมติ มุจฺจติ อนาปตฺติ ฯ น เจเตติ
อุปกฺกมติ น มุจฺจติ อนาปตฺติ ฯ น เจเตติ น อุปกฺกมติ มุจฺจติ
อนาปตฺติ ฯ น เจเตติ น อุปกฺกมติ น มุจฺจติ อนาปตฺติ ฯ
[๓๔๔] อนาปตฺติ สุปินนฺเตน นโมจนาธิปฺปายสฺส อุมฺมตฺต
กสฺส ขิตฺตจิตฺตสฺส เวทนฏฺฏสฺส อาทิกมฺมิกสฺสาติ ฯ
[๓๔๕] สุปิโนจฺจารปสฺสาโว วิตกฺกุโณฺหทเกน จ
เภสชฺชํ กณฺฑุวํ มคฺโค วตฺถิ ชนฺตาฆรํ อูรุ ๒-
สามเณโร จ สุตฺโต จ อูรุ มุฏฺฐินา ปีฬยิ
อากาเส ถมฺภํ นิชฺฌายิ ฉิทฺทํ กฏฺเฐน ฆฏฺฏยิ
@เชิงอรรถ: ๑ ยุ. ม. ปิฏฺฐิจกฺกเปยฺยาโล นิฏฺฐิโต ฯ เตสุ เตสุ โปตฺถเกสุ
@อาคโต เปยฺยาลวิธิ เยภุยฺเยน วิสทิโส โหติ กตฺถจิ สงฺขิตฺโต กตฺถจิ
@วิตฺถาโร ฯ ตทตฺถิเกน ตโต ตโต ปริเยสิตพฺพํ ฯ ๒ ยุ. ม. วตฺถึ ชนฺตาฆรุปกฺกโม ฯ
@* เนื่องจากเลขข้อ [๓๔๑]-[๓๔๒] ในฉบับสยามรัฐขาดหายไป
โสเต อุทญฺชลํ ธาวํ ปุปฺผาวฬิย โปกฺขรํ
วาลิกา กทฺทมุสฺเสโก ๑- สยนงฺคุฏฺฐเกน จาติ ฯ
[๓๔๖] เตน โข ปน สมเยน อญฺญตรสฺส ภิกฺขุโน สุปินนฺเตน
อสุจิ มุจฺจิ ฯ ตสฺส กุกฺกุจฺจํ อโหสิ กจฺจิ นุ โข อหํ สงฺฆาทิเสสํ
อาปตฺตึ อาปนฺโนติ ฯ อถโข โส ภิกฺขุ ภควโต เอตมตฺถํ
อาโรเจสิ ฯ อนาปตฺติ ภิกฺขุ สุปินนฺเตนาติ ฯ
[๓๔๗] เตน โข ปน สมเยน อญฺญตรสฺส ภิกฺขุโน อุจฺจารํ
กโรนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ กจฺจิ นุ โข อหํ
สงฺฆาทิเสสํ อาปตฺตึ อาปนฺโนติ ฯ ภควโต เอตมตฺถํ อาโรเจสิ ฯ
กึจิตฺโต ตฺวํ ภิกฺขูติ ฯ นาหํ ภควา โมจนาธิปฺปาโยติ ฯ อนาปตฺติ
ภิกฺขุ นโมจนาธิปฺปายสฺสาติ ฯ
[๓๔๘] เตน โข ปน สมเยน อญฺญตรสฺส ภิกฺขุโน ปสฺสาวํ
กโรนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
[๓๔๙] เตน โข ปน สมเยน อญฺญตรสฺส ภิกฺขุโน กามวิตกฺกํ
วิตกฺเกนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ กามวิตกฺกํ ๒- วิตกฺเกนฺตสฺสาติ ฯ
[๓๕๐] เตน โข ปน สมเยน อญฺญตรสฺส ภิกฺขุโน อุโณฺหทเกน
นหายนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ
@เชิงอรรถ: ๑ ยุ. กทฺทมุทโก ฯ ๒ ยุ. ม. โปตฺถเกสุ อยํ ปาโฐ น โหติ ฯ
กึจิตฺโต ตฺวํ ภิกฺขูติ ฯ นาหํ ภควา โมจนาธิปฺปาโยติ ฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๕๐.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อุโณฺหทเกน นหายนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ
อาปตฺตึ ตฺวํ ภิกฺขุ อาปนฺโน สงฺฆาทิเสสนฺติ ฯ
{๓๕๐.๒} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อุโณฺหทเกน นหายนฺตสฺส อสุจิ น มุจฺจิ ฯ ตสฺส กุกฺกุจฺจํ อโหสิ ฯเปฯ
อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๕๑] เตน โข ปน สมเยน อญฺญตรสฺส ภิกฺขุโน องฺคชาเต
วโณ โหติ ฯ เภสชฺเชน อาลิมฺปนฺตสฺส อสุจิ มุจฺจิ ฯ ตสฺส กุกฺกุจฺจํ
อโหสิ กจฺจิ นุ โข อหํ สงฺฆาทิเสสํ อาปตฺตึ อาปนฺโนติ ฯ ภควโต
เอตมตฺถํ อาโรเจสิ ฯ กึจิตฺโต ตฺวํ ภิกฺขูติ ฯ นาหํ ภควา โมจนาธิปฺปาโยติ ฯ
อนาปตฺติ ภิกฺขุ นโมจนาธิปฺปายสฺสาติ ฯ
{๓๕๑.๑} เตน โข ปน สมเยน อญฺญตรสฺส ภิกฺขุโน องฺคชาเต
วโณ โหติ ฯ ตสฺส โมจนาธิปฺปายสฺส เภสชฺเชน อาลิมฺปนฺตสฺส
อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๕๒] เตน โข ปน สมเยน อญฺญตรสฺส ภิกฺขุโน อณฺฑํ
กณฺฑุวนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ
อนาปตฺติ ภิกฺขุ นโมจนาธิปฺปายสฺสาติ ฯ
{๓๕๒.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อณฺฑํ กณฺฑุวนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ
ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๕๓] เตน โข ปน สมเยน อญฺญตรสฺส ภิกฺขุโน มคฺคํ
คจฺฉนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๕๓.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
มคฺคํ คจฺฉนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ
ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๕๔] เตน โข ปน สมเยน อญฺญตรสฺส ภิกฺขุโน วตฺถึ คเหตฺวา
ปสฺสาวํ กโรนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๕๔.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
วตฺถึ คเหตฺวา ปสฺสาวํ กโรนฺตสฺส อสุจิ มุจฺจิ ฯเปฯ อสุจิ น มุจฺจิ ฯ
ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ
ถุลฺลจฺจยสฺสาติ ฯ
[๓๕๕] เตน โข ปน สมเยน อญฺญตรสฺส ภิกฺขุโน ชนฺตาฆเร
อุทรวฏฺฏึ ตาเปนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ
ฯเปฯ อนาปตฺติ ภิกฺขุ นโมจนาธิปฺปายสฺสาติ ฯ เตน โข
ปน สมเยน อญฺญตรสฺส ภิกฺขุโน โมจนาธิปฺปายสฺส ชนฺตาฆเร
อุทรวฏฺฏึ ตาเปนฺตสฺส อสุจิ มุจฺจิ ฯเปฯ อสุจิ น มุจฺจิ ฯ
ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส
อาปตฺติ ถุลฺลจฺจยสฺสาติ ฯ
[๓๕๖] เตน โข ปน สมเยน อญฺญตรสฺส ภิกฺขุโน ชนฺตาฆเร
อุปชฺฌายสฺส ปิฏฺฐิปริกมฺมํ กโรนฺตสฺส อสุจิ มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ นโมจนาธิปฺปายสฺสาติ ฯ
{๓๕๖.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
ชนฺตาฆเร อุปชฺฌายสฺส ปิฏฺฐิปริกมฺมํ กโรนฺตสฺส อสุจิ มุจฺจิ ฯเปฯ อสุจิ
น มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส
อาปตฺติ ถุลฺลจฺจยสฺสาติ ฯ
[๓๕๗] เตน โข ปน สมเยน อญฺญตรสฺส ภิกฺขุโน อูรุํ ฆฏฺฏาเปนฺตสฺส
อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ
นโมจนาธิปฺปายสฺสาติ ฯ
{๓๕๗.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อูรุํ ฆฏฺฏาเปนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๕๘] เตน โข ปน สมเยน อญฺญตโร ภิกฺขุ โมจนาธิปฺปาโย
อญฺญตรํ สามเณรํ เอตทโวจ เอหิ เม ตฺวํ อาวุโส สามเณร
องฺคชาตํ คณฺหาหีติ ฯ โส ตสฺส องฺคชาตํ อคฺคเหสิ ฯ ตสฺส
อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อาปตฺตึ ตฺวํ ภิกฺขุ
อาปนฺโน สงฺฆาทิเสสนฺติ ฯ
[๓๕๙] เตน โข ปน สมเยน อญฺญตโร ภิกฺขุ สุตฺตสฺส
สามเณรสฺส องฺคชาตํ อคฺคเหสิ ฯ ตสฺส อสุจิ มุจฺจิ ฯ ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ
ทุกฺกฏสฺสาติ ฯ
[๓๖๐] เตน โข ปน สมเยน อญฺญตรสฺส ภิกฺขุโน อูรูหิ องฺคชาตํ
ปีเฬนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ
นโมจนาธิปฺปายสฺสาติ ฯ
{๓๖๐.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อูรูหิ องฺคชาตํ ปีเฬนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๑] เตน โข ปน สมเยน อญฺญตรสฺส ภิกฺขุโน มุฏฺฐินา องฺคชาตํ
ปีเฬนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ
นโมจนาธิปฺปายสฺสาติ ฯ
{๓๖๑.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
มุฏฺฐินา องฺคชาตํ ปีเฬนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๒] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อากาเส กฏึ กมฺเปนฺตสฺส อสุจิ มุจฺจิ ฯเปฯ อสุจิ
น มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ สงฺฆาทิเสสสฺส
อาปตฺติ ถุลฺลจฺจยสฺสาติ ฯ
[๓๖๓] เตน โข ปน สมเยน อญฺญตรสฺส ภิกฺขุโน กายํ
ถมฺเภนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๖๓.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
กายํ ถมฺเภนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ
ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๔] เตน โข ปน สมเยน อญฺญตโร ภิกฺขุ สารตฺโต
มาตุคามสฺส องฺคชาตํ อุปนิชฺฌายิ ฯ ตสฺส อสุจิ มุจฺจิ ฯ ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส น จ
ภิกฺขเว สารตฺเตน มาตุคามสฺส องฺคชาตํ อุปนิชฺฌายิตพฺพํ โย
อุปนิชฺฌาเยยฺย อาปตฺติ ทุกฺกฏสฺสาติ ฯ
[๓๖๕] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
ตาลจฺฉิทฺทํ องฺคชาตํ ปเวเสนฺตสฺส อสุจิ มุจฺจิ ฯเปฯ อสุจิ น มุจฺจิ ฯ
ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ
ถุลฺลจฺจยสฺสาติ ฯ
[๓๖๖] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
กฏฺเฐน องฺคชาตํ ฆฏฺเฏนฺตสฺส อสุจิ มุจฺจิ ฯเปฯ อสุจิ น
มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ
สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๗] เตน โข ปน สมเยน อญฺญตรสฺส ภิกฺขุโน ปฏิโสเต
นหายนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๖๗.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส ปฏิโสเต
นหายนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ ฯเปฯ
อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๘] เตน โข ปน สมเยน อญฺญตรสฺส ภิกฺขุโน อุทญฺชเล
กีฬนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๖๘.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อุทญฺชเล กีฬนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๖๙] เตน โข ปน สมเยน อญฺญตรสฺส ภิกฺขุโน อุทเก
ธาวนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๖๙.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อุทเก ธาวนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ อโหสิ
ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๗๐] เตน โข ปน สมเยน อญฺญตรสฺส ภิกฺขุโน ปุปฺผาวฬิยํ
กีฬนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๗๐.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
ปุปฺผาวฬิยํ กีฬนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๗๑] เตน โข ปน สมเยน อญฺญตรสฺส ภิกฺขุโน โปกฺขรวเน
ธาวนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ
ภิกฺขุ นโมจนาธิปฺปายสฺสาติ ฯ
{๓๗๑.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
โปกฺขรวเน ธาวนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส กุกฺกุจฺจํ
อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๗๒] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
วาลิกํ องฺคชาตํ ปเวเสนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ
ถุลฺลจฺจยสฺสาติ ฯ
[๓๗๓] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
กทฺทมํ องฺคชาตํ ปเวเสนฺตสฺส อสุจิ มุจฺจิ ฯเปฯ อสุจิ น มุจฺจิ ฯ
ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส
อาปตฺติ ถุลฺลจฺจยสฺสาติ ฯ
[๓๗๔] เตน โข ปน สมเยน อญฺญตรสฺส ภิกฺขุโน อุทเกน องฺคชาตํ
โอสิญฺจนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ ฯเปฯ อนาปตฺติ ภิกฺขุ
นโมจนาธิปฺปายสฺสาติ ฯ
{๓๗๔.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
อุทเกน องฺคชาตํ โอสิญฺจนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
[๓๗๕] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
สยเน องฺคชาตํ ฆฏฺเฏนฺตสฺส อสุจิ มุจฺจิ ฯเปฯ อสุจิ น มุจฺจิ ฯ ตสฺส
กุกฺกุจฺจํ อโหสิ ฯเปฯ อนาปตฺติ ภิกฺขุ สงฺฆาทิเสสสฺส อาปตฺติ
ถุลฺลจฺจยสฺสาติ ฯ
[๓๗๖] เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
องฺคุฏฺเฐน องฺคชาตํ ฆฏฺเฏนฺตสฺส อสุจิ มุจฺจิ ฯ ตสฺส กุกฺกุจฺจํ อโหสิ
กจฺจิ นุ โข อหํ สงฺฆาทิเสสํ อาปตฺตึ อาปนฺโนติ ฯ ภควโต เอตมตฺถํ
อาโรเจสิ ฯ อาปตฺตึ ตฺวํ ภิกฺขุ อาปนฺโน สงฺฆาทิเสสนฺติ ฯ
{๓๗๖.๑} เตน โข ปน สมเยน อญฺญตรสฺส ภิกฺขุโน โมจนาธิปฺปายสฺส
องฺคุฏฺเฐน องฺคชาตํ ฆฏฺเฏนฺตสฺส อสุจิ น มุจฺจิ ฯ ตสฺส กุกฺกุจฺจํ อโหสิ กจฺจิ
นุ โข อหํ สงฺฆาทิเสสํ อาปตฺตึ อาปนฺโนติ ฯ ภควโต เอตมตฺถํ อาโรเจสิ ฯ
อนาปตฺติ ภิกฺขุ สงฺฆาทิเสสสฺส อาปตฺติ ถุลฺลจฺจยสฺสาติ ฯ
ปฐมสงฺฆาทิเสสํ นิฏฺฐิตํ ฯ
-----------
เนื้อความพระไตรปิฎกฉบับภาษาบาลีอักษรไทย เล่มที่ ๑ หน้าที่ ๒๒๑-๒๕๐.
http://84000.org/tipitaka/pali/pali_item_s.php?book=1&item=301&items=76&modeTY=2
อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=1&item=301&items=76&modeTY=2&mode=bracket
อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=1&item=301&items=74&modeTY=2
อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=1&item=301&items=74&modeTY=2
ศึกษาอรรถกถานี้ได้ที่ :-
http://84000.org/tipitaka/attha/attha.php?b=1&i=301
The Pali Atthakatha in Thai :-
http://84000.org/tipitaka/atthapali/read_th.php?B=2&A=1
The Pali Atthakatha in Roman :-
http://84000.org/tipitaka/atthapali/read_rm.php?B=2&A=1
สารบัญพระไตรปิฎกเล่มที่ ๑
http://84000.org/tipitaka/read/?index_1
บันทึก ๑๒ ธันวาคม พ.ศ. ๒๕๕๙.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย.
หากพบข้อผิดพลาด กรุณาแจ้งได้ที่ [email protected]
