บาลีพระไตรปิฎกเล่มที่ ๒๗ - พระสุตตันตปิฎกเล่มที่ ๑๙

๖ ยุธญฺชยชาตกํ ^๔- [๑๕๕๓] มิตฺตามจฺจปริพฺยุฬฺหํ อหํ วนฺเท รเถสภ ปพฺพชิสฺสามหํ ราช ^๕- ตํ เทโว อนุมญฺญตุ ฯ [๑๕๕๔] สเจ เต อูนํ กาเมหิ อหํ ปริปูรยามิ เต โย ตํ หึสติ วาเรมิ มา ปพฺพชฺช ยุธญฺชย ^๖- ฯ @เชิงอรรถ: ^๑ ม. ธิรตฺถุ สุพหู กาเม ฯ ^๒ ม. เนตฺตึ โสว ฯ ^๓ สี. ยุ. อุกฺกฏฺฐิตํ ฯ @^๔ ม. ยุธญฺจยชาตกํ ฯ ^๕ สี. ยุ. ปพฺพชิสฺสํ มหาราช ฯ ^๖ ม. ปพฺพช @ยุธญฺจย ฯ ยุ. ปพฺพชิ ยุวญฺชย ฯ เอวมุปริปิ ฯ [๑๕๕๕] น มตฺถิ อูนํ กาเมหิ หึสนฺโต เม น วิชฺชติ ^๑- ทีปญฺจ กตฺตุมิจฺฉามิ ยํ ชรา นาภิกีรติ ฯ [๑๕๕๖] ปุตฺโต วา ปิตรํ ยาเจ ปิตา วา ปุตฺตโมรสํ เนคโม ยาจเต ^๒- ตาต มา ปพฺพชฺช ยุธญฺชย ฯ [๑๕๕๗] มา มํ ตาต ^๓- นิวาเรสิ ปพฺพชนฺตํ รเถสภ มาหํ กาเมหิ สมฺมตฺโต ชราย วสมนฺวคู ฯ [๑๕๕๘] อหํ ตํ ตาต ยาจามิ อหํ ปุตฺต นิวารเย จิรํ ตํ ทฏฺฐุมิจฺฉามิ มา ปพฺพชฺช ยุธญฺชย ฯ [๑๕๕๙] อุสฺสาโวว ติณคฺคมฺหิ สุริยสฺสุคฺคมนํ ^๔- ปติ เอวมายุ มนุสฺสานํ มา มํ อมฺม นิวารเย ฯ [๑๕๖๐] ตรมาโน ^๕- อิมํ ยานํ อาโรเปตุ ^๖- รเถสภ มา เม มาตา ตรนฺตสฺส อนฺตรายกรา อหุ ฯ [๑๕๖๑] อภิธาวถ ภทฺทนฺเต สุญฺญํ เหสฺสติ รมฺมกํ ยุธญฺชโย อนุญฺญาโต สพฺพทตฺเตน ราชินา ฯ [๑๕๖๒] โยหุ เสฏฺโฐ มนุสฺสานํ ^๗- ยุวา กญฺจนสนฺนิโภ โสยํ กุมาโร ปพฺพชิโต กาสายวสโน พลี ฯ [๑๕๖๓] อุโภ กุมารา ปพฺพชิตา ยุธญฺชโย ยุธิฏฺฐิโล ปหาย มาตาปิตโร สงฺคํ เฉตฺวาน มจฺจุโนติ ฯ ยุธญฺชยชาตกํ ฉฏฺฐํ ฯ @เชิงอรรถ: ^๑ หึสิ กาเม น วิชฺชตีติปิ ปาโฐ ฯ ม. หึสิตา ฯ ^๒ ม. เนคโม ตํ ยาเจ ... ฯ @^๓ ม. เทว ฯ ^๔ ม. สูริยุคฺคมนํ ฯ ^๕ สี. ยุ. ตรมานา ฯ ^๖ สี. ยุ. อาโรเปนฺตุ ฯ @^๗ ม. สหสฺสสฺส ฯ

เนื้อความพระไตรปิฎกฉบับภาษาบาลีอักษรไทย เล่มที่ ๒๗ หน้าที่ ๓๑๕-๓๑๖. http://84000.org/tipitaka/pali/pali_item_s.php?book=27&item=1553&items=11&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pali/pali_item_s.php?book=27&item=1553&items=11&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=27&item=1553&items=11&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=27&item=1553&items=11&modeTY=2 ศึกษาอรรถกถาชาดกนี้ได้ที่ :- http://84000.org/tipitaka/attha/attha.php?b=27&i=1553 The Pali Atthakatha in Thai :- http://84000.org/tipitaka/atthapali/read_th.php?B=40&A=858 The Pali Atthakatha in Roman :- http://84000.org/tipitaka/atthapali/read_rm.php?B=40&A=858 สารบัญพระไตรปิฎกเล่มที่ ๒๗ http://84000.org/tipitaka/read/?index_27