พระไตรปิฎกเล่มที่ ๓๔ ภาษาบาลี อักษรไทย
พระอภิธรรมปิฎกเล่มที่ ๑ อภิ. ธมฺมสงฺคณิ

     [๙๐๐]   กตเม  ธมฺมา  เหตู  ตโย  กุสลเหตู  ตโย  อกุสลเหตู
ตโย   อพฺยากตเหตู   อโลโภ   กุสลเหตุ   อโทโส   กุสลเหตุ   จตูสุ
ภูมีสุ    กุสเลสุ    อุปฺปชฺชนฺติ   อโมโห   กุสลเหตุ   กามาวจรกุสลโต
จตฺตาโร   ญาณวิปฺปยุตฺเต   จิตฺตุปฺปาเท  ฐเปตฺวา  จตูสุ  ภูมีสุ  กุสเลสุ
อุปฺปชฺชติ    โลโภ    อฏฺฐสุ   โลภสหคเตสุ   จิตฺตุปฺปาเทสุ   อุปฺปชฺชติ
โทโส    ทฺวีสุ    โทมนสฺสสหคเตสุ   จิตฺตุปฺปาเทสุ   อุปฺปชฺชติ   โมโห
สพฺพากุสเลสุ    อุปฺปชฺชติ   อโลโภ   วิปากเหตุ   อโทโส   วิปากเหตุ
กามาวจรสฺส   วิปากโต   อเหตุเก  จิตฺตุปฺปาเท  ฐเปตฺวา  จตูสุ  ภูมีสุ
วิปาเกสุ   อุปฺปชฺชนฺติ   อโมโห   วิปากเหตุ   กามาวจรสฺส   วิปากโต
อเหตุเก   จิตฺตุปฺปาเท  ฐเปตฺวา  จตฺตาโร  ญาณวิปฺปยุตฺเต  จิตฺตุปฺปาเท
ฐเปตฺวา    จตูสุ    ภูมีสุ   วิปาเกสุ   อุปฺปชฺชติ   อโลโภ   กิริยเหตุ
อโทโส   กิริยเหตุ   กามาวจรกิริยโต  อเหตุเก  จิตฺตุปฺปาเท  ฐเปตฺวา
ตีสุ   ภูมีสุ   กิริเยสุ   อุปฺปชฺชนฺติ  อโมโห  กิริยเหตุ  กามาวจรกิริยโต
อเหตุเก   จิตฺตุปฺปาเท  ฐเปตฺวา  จตฺตาโร  ญาณวิปฺปยุตฺเต  จิตฺตุปฺปาเท
ฐเปตฺวา   ตีสุ   ภูมีสุ   กิริเยสุ   อุปฺปชฺชติ   อิเม   ธมฺมา  เหตู  ฯ
กตเม   ธมฺมา   นเหตู   ฐเปตฺวา   เหตู   จตูสุ  ภูมีสุ  กุสลํ  อกุสลํ
จตูสุ   ภูมีสุ   วิปาโก   ตีสุ   ภูมีสุ   กิริยาพฺยากตํ  รูปญฺจ  นิพฺพานญฺจ
อิเม ธมฺมา นเหตู ฯ
     [๙๐๑]   กตเม   ธมฺมา  สเหตุกา  วิจิกิจฺฉาสหคตํ  อุทฺธจฺจสหคตํ
โมหํ     ฐเปตฺวา     อวเสสํ     อกุสลํ     จตูสุ    ภูมีสุ    กุสลํ
กามาวจรสฺส    วิปากโต    อเหตุเก   จิตฺตุปฺปาเท   ฐเปตฺวา   จตูสุ
ภูมีสุ   วิปาโก   กามาวจรกิริยโต   อเหตุเก   จิตฺตุปฺปาเท   ฐเปตฺวา
ตีสุ    ภูมีสุ    กิริยาพฺยากตํ   อิเม   ธมฺมา   สเหตุกา   ฯ   กตเม
ธมฺมา    อเหตุกา   วิจิกิจฺฉาสหคโต   โมโห   อุทฺธจฺจสหคโต   โมโห
เทฺว     ปญฺจวิญฺญาณานิ    ติสฺโส    จ    มโนธาตุโย    ปญฺจ    จ
อเหตุกา    มโนวิญฺญาณธาตุโย    รูปญฺจ    นิพฺพานญฺจ   อิเม   ธมฺมา
อเหตุกา ฯ
     [๙๐๒]   กตเม    ธมฺมา    เหตุสมฺปยุตฺตา    วิจิกิจฺฉาสหคตํ
อุทฺธจฺจสหคตํ   โมหํ   ฐเปตฺวา   อวเสสํ   อกุสลํ   จตูสุ  ภูมีสุ  กุสลํ
กามาวจรสฺส   วิปากโต   อเหตุเก  จิตฺตุปฺปาเท  ฐเปตฺวา  จตูสุ  ภูมีสุ
วิปาโก    กามาวจรกิริยโต   อเหตุเก   จิตฺตุปฺปาเท   ฐเปตฺวา   ตีสุ
ภูมีสุ   กิริยาพฺยากตํ   อิเม   ธมฺมา  เหตุสมฺปยุตฺตา  ฯ  กตเม  ธมฺมา
เหตุวิปฺปยุตฺตา    วิจิกิจฺฉาสหคโต    โมโห    อุทฺธจฺจสหคโต    โมโห
เทฺว   ปญฺจวิญฺญาณานิ   ติสฺโส   จ   มโนธาตุโย   ปญฺจ  จ  อเหตุกา
มโนวิญฺญาณธาตุโย รูปญฺจ นิพฺพานญฺจ อิเม ธมฺมา เหตุวิปฺปยุตฺตา ฯ
     [๙๐๓]   กตเม   ธมฺมา   เหตูเจวสเหตุกาจ  ยตฺถ  เทฺว  ตโย
เหตู    เอกโต   อุปฺปชฺชนฺติ   อิเม   ธมฺมา   เหตูเจวสเหตุกาจ   ฯ
กตเม    ธมฺมา    สเหตุกาเจวนจเหตู   จตูสุ   ภูมีสุ   กุสลํ   อกุสลํ
กามาวจรสฺส    วิปากโต    อเหตุเก   จิตฺตุปฺปาเท   ฐเปตฺวา   จตูสุ
ภูมีสุ   วิปาโก   กามาวจรกิริยโต   อเหตุเก   จิตฺตุปฺปาเท   ฐเปตฺวา
ตีสุ    ภูมีสุ    กิริยาพฺยากตํ   เอตฺถุปฺปนฺเน   เหตู   ฐเปตฺวา   อิเม
ธมฺมา    สเหตุกาเจวนจเหตู   ฯ   อเหตุกา   ธมฺมา   น   วตฺตพฺพา
เหตูเจวสเหตุกาจาติปิ สเหตุกาเจวนจเหตูติปิ ฯ
     [๙๐๔]   กตเม   ธมฺมา   เหตูเจวเหตุสมฺปยุตฺตาจ   ยตฺถ  เทฺว
ตโย  เหตู  เอกโต  อุปฺปชฺชนฺติ  อิเม  ธมฺมา เหตูเจวเหตุสมฺปยุตฺตาจ ฯ
กตเม         ธมฺมา         เหตุสมฺปยุตฺตาเจวนจเหตู        จตูสุ
ภูมีสุ   กุสลํ   อกุสลํ   กามาวจรสฺส   วิปากโต  อเหตุเก  จิตฺตุปฺปาเท
ฐเปตฺวา    จตูสุ    ภูมีสุ    วิปาโก    กามาวจรกิริยโต    อเหตุเก
จิตฺตุปฺปาเท    ฐเปตฺวา    ตีสุ    ภูมีสุ   กิริยาพฺยากตํ   เอตฺถุปฺปนฺเน
เหตู  ฐเปตฺวา  อิเม  ธมฺมา  เหตุสมฺปยุตฺตาเจวนจเหตู ฯ เหตุวิปฺปยุตฺตา
ธมฺมา        น        วตฺตพฺพา        เหตูเจวเหตุสมฺปยุตฺตาจาติปิ
เหตุสมฺปยุตฺตาเจวนจเหตูติปิ ฯ
     [๙๐๕]   กตเม   ธมฺมา   นเหตู   สเหตุกา  จตูสุ  ภูมีสุ  กุสลํ
อกุสลํ    กามาวจรสฺส   วิปากโต   อเหตุเก   จิตฺตุปฺปาเท   ฐเปตฺวา
จตูสุ    ภูมีสุ    วิปาโก    กามาวจรกิริยโต   อเหตุเก   จิตฺตุปฺปาเท
ฐเปตฺวา   ตีสุ   ภูมีสุ   กิริยาพฺยากตํ   เอตฺถุปฺปนฺเน   เหตู  ฐเปตฺวา
อิเม  ธมฺมา  นเหตู  สเหตุกา  ฯ  กตเม  ธมฺมา  นเหตู อเหตุกา เทฺว
ปญฺจวิญฺญาณานิ    ติสฺโส    จ    มโนธาตุโย    ปญฺจ   จ   อเหตุกา
มโนวิญฺญาณธาตุโย   รูปญฺจ  นิพฺพานญฺจ  อิเม  ธมฺมา  นเหตูอเหตุกา  ฯ
เหตู    ธมฺมา    น    วตฺตพฺพา    นเหตู   สเหตุกาติปิ   น   เหตู
อเหตุกาติปิ ฯ
                                         -------------
     [๙๐๖]   กตเม   ธมฺมา   สปฺปจฺจยา  จตูสุ  ภูมีสุ  กุสลํ  อกุสลํ
จตูสุ    ภูมีสุ    วิปาโก   ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   สปฺปจฺจยา   ฯ   กตเม   ธมฺมา   อปฺปจฺจยา  นิพฺพานํ
อิเม ธมฺมา อปฺปจฺจยา ฯ
     [๙๐๗]   กตเม   ธมฺมา   สงฺขตา   จตูสุ   ภูมีสุ  กุสลํ  อกุสลํ
จตูสุ    ภูมีสุ    วิปาโก   ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   สงฺขตา   ฯ   กตเม  ธมฺมา  อสงฺขตา  นิพฺพานํ  อิเม
ธมฺมา อสงฺขตา ฯ
     [๙๐๘]   กตเม   ธมฺมา   สนิทสฺสนา   รูปายตนํ   อิเม  ธมฺมา
สนิทสฺสนา    ฯ    กตเม    ธมฺมา   อนิทสฺสนา   จกฺขายตนํ   ฯเปฯ
โผฏฺฐพฺพายตนํ   จตูสุ   ภูมีสุ   กุสลํ   อกุสลํ   จตูสุ   ภูมีสุ   วิปาโก
ตีสุ  ภูมีสุ  กิริยาพฺยากตํ  ยญฺจ  รูปํ อนิทสฺสนํ อปฺปฏิฆํ ธมฺมายตนปริยาปนฺนํ
นิพฺพานญฺจ อิเม ธมฺมา อนิทสฺสนา ฯ
     [๙๐๙]   กตเม  ธมฺมา  สปฺปฏิฆา  จกฺขายตนํ ฯเปฯ โผฏฺฐพฺพายตนํ
อิเม    ธมฺมา    สปฺปฏิฆา    ฯ   กตเม   ธมฺมา   อปฺปฏิฆา   จตูสุ
ภูมีสุ   กุสลํ   อกุสลํ   จตูสุ   ภูมีสุ  วิปาโก  ตีสุ  ภูมีสุ  กิริยาพฺยากตํ
ยญฺจ       รูปํ      อนิทสฺสนํ      อปฺปฏิฆํ      ธมฺมายตนปริยาปนฺนํ
นิพฺพานญฺจ อิเม ธมฺมา อปฺปฏิฆา ฯ
     [๙๑๐]   กตเม  ธมฺมา  รูปิโน  จตฺตาโร  จ  มหาภูตา  จตุนฺนญฺจ
มหาภูตานํ   อุปาทาย   รูปํ   อิเม   ธมฺมา  รูปิโน  ฯ  กตเม  ธมฺมา
อรูปิโน    จตูสุ    ภูมีสุ    กุสลํ    อกุสลํ    จตูสุ   ภูมีสุ   วิปาโก
ตีสุ ภูมีสุ กิริยาพฺยากตํ นิพฺพานญฺจ อิเม ธมฺมา อรูปิโน ฯ
     [๙๑๑]   กตเม   ธมฺมา   โลกิยา   ตีสุ   ภูมีสุ   กุสลํ  อกุสลํ
ตีสุ   ภูมีสุ   วิปาโก   ตีสุ   ภูมีสุ   กิริยาพฺยากตํ  สพฺพญฺจ  รูปํ  อิเม
ธมฺมา   โลกิยา   ฯ   กตเม   ธมฺมา   โลกุตฺตรา   จตฺตาโร  มคฺคา
อปริยาปนฺนา   จตฺตาริ   จ   สามญฺญผลานิ   นิพฺพานญฺจ   อิเม  ธมฺมา
โลกุตฺตรา ฯ
     [๙๑๒]   สพฺเพว ธมฺมา เกนจิวิญฺเญยฺยา เกนจินวิญฺเญยฺยา ฯ
                                       ----------------
     [๙๑๓]   กตเม   ธมฺมา  อาสวา  จตฺตาโร  อาสวา  กามาสโว
ภวาสโว   ทิฏฺฐาสโว   อวิชฺชาสโว   กามาสโว   อฏฺฐสุ  โลภสหคเตสุ
จิตฺตุปฺปาเทสุ   อุปฺปชฺชติ   ภวาสโว   จตูสุ  ทิฏฺฐิคตวิปฺปยุตฺตโลภสหคเตสุ
จิตฺตุปฺปาเทสุ     อุปฺปชฺชติ    ทิฏฺฐาสโว    จตูสุ    ทิฏฺฐิคตสมฺปยุตฺเตสุ
จิตฺตุปฺปาเทสุ        อุปฺปชฺชติ        อวิชฺชาสโว       สพฺพากุสเลสุ
อุปฺปชฺชติ   อิเม   ธมฺมา   อาสวา   ฯ   กตเม   ธมฺมา   โนอาสวา
ฐเปตฺวา    อาสเว    อวเสสํ   อกุสลํ   จตูสุ   ภูมีสุ   กุสลํ   จตูสุ
ภูมีสุ    วิปาโก    ตีสุ    ภูมีสุ    กิริยาพฺยากตํ   รูปญฺจ   นิพฺพานญฺจ
อิเม ธมฺมา โนอาสวา ฯ
     [๙๑๔]   กตเม   ธมฺมา   สาสวา   ตีสุ   ภูมีสุ   กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   สาสวา  ฯ  กตเม  ธมฺมา  อนาสวา  จตฺตาโร  มคฺคา
อปริยาปนฺนา   จตฺตาริ   จ   สามญฺญผลานิ   นิพฺพานญฺจ   อิเม  ธมฺมา
อนาสวา ฯ
     [๙๑๕]   กตเม   ธมฺมา  อาสวสมฺปยุตฺตา  เทฺว  โทมนสฺสสหคตา
จิตฺตุปฺปาทา    เอตฺถุปฺปนฺนํ    โมหํ   ฐเปตฺวา   วิจิกิจฺฉาสหคตํ   โมหํ
อุทฺธจฺจสหคตํ  โมหํ ฐเปตฺวา อวเสสํ อกุสลํ อิเม ธมฺมา อาสวสมฺปยุตฺตา ฯ
กตเม      ธมฺมา     อาสววิปฺปยุตฺตา     ทฺวีสุ     โทมนสฺสสหคเตสุ
จิตฺตุปฺปาเทสุ      อุปฺปนฺโน     โมโห     วิจิกิจฺฉาสหคโต     โมโห
อุทฺธจฺจสหคโต   โมโห   จตูสุ   ภูมีสุ   กุสลํ   จตูสุ   ภูมีสุ   วิปาโก
ตีสุ    ภูมีสุ    กิริยาพฺยากตํ    รูปญฺจ    นิพฺพานญฺจ    อิเม   ธมฺมา
อาสววิปฺปยุตฺตา ฯ
     [๙๑๖]   กตเม   ธมฺมา   อาสวาเจวสาสวาจ   เตว   อาสวา
อาสวาเจวสาสวาจ    ฯ    กตเม    ธมฺมา    สาสวาเจวโนจอาสวา
ฐเปตฺวา   อาสเว   อวเสสํ   อกุสลํ   ตีสุ   ภูมีสุ   กุสลํ  ตีสุ  ภูมีสุ
วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ   อิเม   ธมฺมา
สาสวาเจวโนจอาสวา   ฯ   อนาสวา   ธมฺมา  น  วตฺตพฺพา  อาสวา-
เจวสาสวาจาติปิ สาสวาเจวโนจอาสวาติปิ ฯ
     [๙๑๗]   กตเม    ธมฺมา   อาสวาเจวอาสวสมฺปยุตฺตาจ   ยตฺถ
เทฺว   ตโย   อาสวา   เอกโต   อุปฺปชฺชนฺติ   อิเม  ธมฺมา  อาสวา-
เจวอาสวสมฺปยุตฺตาจ    ฯ    กตเม    ธมฺมา   อาสวสมฺปยุตฺตาเจว-
โนจอาสวา    ฐเปตฺวา   อาสเว   อวเสสํ   อกุสลํ   อิเม   ธมฺมา
อาสวสมฺปยุตฺตาเจวโนจอาสวา    ฯ    อาสววิปฺปยุตฺตา    ธมฺมา    น
วตฺตพฺพา      อาสวาเจวอาสวสมฺปยุตฺตาจาติปิ     อาสวสมฺปยุตฺตาเจว-
โนจอาสวาติปิ ฯ
     [๙๑๘]   กตเม  ธมฺมา  อาสววิปฺปยุตฺตา  สาสวา  ทฺวีสุ โทมนสฺส-
สหคเตสุ   จิตฺตุปฺปาเทสุ   อุปฺปนฺโน   โมโห   วิจิกิจฺฉาสหคโต  โมโห
อุทฺธจฺจสหคโต   โมโห   ตีสุ   ภูมีสุ   กุสลํ   ตีสุ  ภูมีสุ  วิปาโก  ตีสุ
ภูมีสุ   กิริยาพฺยากตํ   สพฺพญฺจ   รูปํ   อิเม   ธมฺมา   อาสววิปฺปยุตฺตา
สาสวา  ฯ  กตเม  ธมฺมา  อาสววิปฺปยุตฺตา  อนาสวา  จตฺตาโร  มคฺคา
อปริยาปนฺนา   จตฺตาริ   จ   สามญฺญผลานิ   นิพฺพานญฺจ   อิเม  ธมฺมา
อาสววิปฺปยุตฺตา   อนาสวา   ฯ   อาสวสมฺปยุตฺตา  ธมฺมา  น  วตฺตพฺพา
อาสววิปฺปยุตฺตา สาสวาติปิ อาสววิปฺปยุตฺตา อนาสวาติปิ ฯ
                                         -------------
     [๙๑๙]   กตเม  ธมฺมา สญฺโญชนา ทส สญฺโญชนานิ กามราคสญฺโญชนํ
ปฏิฆสญฺโญชนํ      มานสญฺโญชนํ     ทิฏฺฐิสญฺโญชนํ     วิจิกิจฺฉาสญฺโญชนํ
สีลพฺพตปรามาสสญฺโญชนํ         ภวราคสญฺโญชนํ        อิสฺสาสญฺโญชนํ
มจฺฉริยสญฺโญชนํ           อวิชฺชาสญฺโญชนํ          กามราคสญฺโญชนํ
อฏฺฐสุ   โลภสหคเตสุ   จิตฺตุปฺปาเทสุ   อุปฺปชฺชติ   ปฏิฆสญฺโญชนํ   ทฺวีสุ
โทมนสฺสสหคเตสุ    จิตฺตุปฺปาเทสุ    อุปฺปชฺชติ    มานสญฺโญชนํ    จตูสุ
ทิฏฺฐิคตวิปฺปยุตฺตโลภสหคเตสุ    จิตฺตุปฺปาเทสุ    อุปฺปชฺชติ   ทิฏฺฐิสญฺโญชนํ
จตูสุ   ทิฏฺฐิคตสมฺปยุตฺเตสุ   จิตฺตุปฺปาเทสุ   อุปฺปชฺชติ   วิจิกิจฺฉาสญฺโญชนํ
วิจิกิจฺฉาสหคเตสุ    จิตฺตุปฺปาเทสุ    อุปฺปชฺชติ   สีลพฺพตปรามาสสญฺโญชนํ
จตูสุ        ทิฏฺฐิคตสมฺปยุตฺเตสุ        จิตฺตุปฺปาเทสุ        อุปฺปชฺชติ
ภวราคสญฺโญชนํ    จตูสุ    ทิฏฺฐิคตวิปฺปยุตฺตโลภสหคเตสุ    จิตฺตุปฺปาเทสุ
อุปฺปชฺชติ   อิสฺสาสญฺโญชนญฺจ  มจฺฉริยสญฺโญชนญฺจ  ทฺวีสุ  โทมนสฺสสหคเตสุ
จิตฺตุปฺปาเทสุ       อุปฺปชฺชนฺติ      อวิชฺชาสญฺโญชนํ      สพฺพากุสเลสุ
อุปฺปชฺชติ   อิเม   ธมฺมา   สญฺโญชนา  ฯ  กตเม  ธมฺมา  โนสญฺโญชนา
ฐเปตฺวา   สญฺโญชเน   อวเสสํ   อกุสลํ   จตูสุ   ภูมีสุ   กุสลํ   จตูสุ
ภูมีสุ    วิปาโก    ตีสุ    ภูมีสุ    กิริยาพฺยากตํ   รูปญฺจ   นิพฺพานญฺจ
อิเม ธมฺมา โนสญฺโญชนา ฯ
     [๙๒๐]   กตเม   ธมฺมา   สญฺโญชนิยา  ตีสุ  ภูมีสุ  กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   สญฺโญชนิยา  ฯ  กตเม  ธมฺมา  อสญฺโญชนิยา  จตฺตาโร
มคฺคา   อปริยาปนฺนา   จตฺตาริ   จ   สามญฺญผลานิ   นิพฺพานญฺจ  อิเม
ธมฺมา อสญฺโญชนิยา ฯ
     [๙๒๑]   กตเม    ธมฺมา    สญฺโญชนสมฺปยุตฺตา   อุทฺธจฺจสหคตํ
โมหํ   ฐเปตฺวา   อวเสสํ  อกุสลํ  อิเม  ธมฺมา  สญฺโญชนสมฺปยุตฺตา  ฯ
กตเม    ธมฺมา    สญฺโญชนวิปฺปยุตฺตา   อุทฺธจฺจสหคโต   โมโห   จตูสุ
ภูมีสุ    กุสลํ    จตูสุ    ภูมีสุ   วิปาโก   ตีสุ   ภูมีสุ   กิริยาพฺยากตํ
รูปญฺจ นิพฺพานญฺจ อิเม ธมฺมา สญฺโญชนวิปฺปยุตฺตา ฯ
     [๙๒๒]   กตเม   ธมฺมา   สญฺโญชนาเจวสญฺโญชนิยาจ   ตาเนว
สญฺโญชนานิ     สญฺโญชนาเจวสญฺโญชนิยาจ     ฯ     กตเม    ธมฺมา
สญฺโญชนิยาเจวโนจสญฺโญชนา      ฐเปตฺวา     สญฺโญชเน     อวเสสํ
อกุสลํ   ตีสุ  ภูมีสุ  กุสลํ  ตีสุ  ภูมีสุ  วิปาโก  ตีสุ  ภูมีสุ  กิริยาพฺยากตํ
สพฺพญฺจ    รูปํ    อิเม    ธมฺมา    สญฺโญชนิยาเจวโนจสญฺโญชนา   ฯ
อสญฺโญชนิยา    ธมฺมา   น   วตฺตพฺพา   สญฺโญชนาเจวสญฺโญชนิยาจาติปิ
สญฺโญชนิยาเจวโนจสญฺโญชนาติปิ ฯ
     [๙๒๓]   กตเม    ธมฺมา    สญฺโญชนาเจวสญฺโญชนสมฺปยุตฺตาจ
ยตฺถ    เทฺว    ตีณิ    สญฺโญชนานิ    เอกโต    อุปฺปชฺชนฺติ    อิเม
ธมฺมา     สญฺโญชนาเจวสญฺโญชนสมฺปยุตฺตาจ     ฯ    กตเม    ธมฺมา
สญฺโญชนสมฺปยุตฺตาเจวโนจสญฺโญชนา        ฐเปตฺวา        สญฺโญชเน
อวเสสํ   อกุสลํ   อิเม  ธมฺมา  สญฺโญชนสมฺปยุตฺตาเจวโนจสญฺโญชนา  ฯ
สญฺโญชนวิปฺปยุตฺตา     ธมฺมา     น     วตฺตพฺพา     สญฺโญชนาเจว-
สญฺโญชนสมฺปยุตฺตาจาติปิ สญฺโญชนสมฺปยุตฺตาเจวโนจสญฺโญชนาติปิ ฯ
     [๙๒๔]   กตเม    ธมฺมา    สญฺโญชนวิปฺปยุตฺตา    สญฺโญชนิยา
อุทฺธจฺจสหคโต    โมโห    ตีสุ   ภูมีสุ   กุสลํ   ตีสุ   ภูมีสุ   วิปาโก
ตีสุ  ภูมีสุ  กิริยาพฺยากตํ  สพฺพญฺจ  รูปํ  อิเม  ธมฺมา  สญฺโญชนวิปฺปยุตฺตา
สญฺโญชนิยา       ฯ      กตเม      ธมฺมา      สญฺโญชนวิปฺปยุตฺตา
อสญฺโญชนิยา  จตฺตาโร  มคฺคา  อปริยาปนฺนา  จตฺตาริ  จ  สามญฺญผลานิ
นิพฺพานญฺจ    อิเม    ธมฺมา    สญฺโญชนวิปฺปยุตฺตา   อสญฺโญชนิยา   ฯ
สญฺโญชนสมฺปยุตฺตา     ธมฺมา     น    วตฺตพฺพา    สญฺโญชนวิปฺปยุตฺตา
สญฺโญชนิยาติปิ สญฺโญชนวิปฺปยุตฺตา อสญฺโญชนิยาติปิ ฯ
                                         -------------
     [๙๒๕]   กตเม   ธมฺมา   คนฺถา   จตฺตาโร   คนฺถา   อภิชฺฌา
กายคนฺโถ    พฺยาปาโท    กายคนฺโถ    สีลพฺพตปรามาโส   กายคนฺโถ
อิทํสจฺจาภินิเวโส   กายคนฺโถ  อภิชฺฌา  กายคนฺโถ  อฏฺฐสุ  โลภสหคเตสุ
จิตฺตุปฺปาเทสุ      อุปฺปชฺชติ      พฺยาปาโท      กายคนฺโถ     ทฺวีสุ
โทมนสฺสสหคเตสุ      จิตฺตุปฺปาเทสุ     อุปฺปชฺชติ     สีลพฺพตปรามาโส
กายคนฺโถ  จ  อิทํสจฺจาภินิเวโส  กายคนฺโถ  จ  จตูสุ ทิฏฺฐิคตสมฺปยุตฺเตสุ
จิตฺตุปฺปาเทสุ      อุปฺปชฺชนฺติ      อิเม     ธมฺมา     คนฺถา     ฯ
กตเม   ธมฺมา   โนคนฺถา   ฐเปตฺวา   คนฺเถ   อวเสสํ  อกุสลํ  จตูสุ
ภูมีสุ    กุสลํ    จตูสุ    ภูมีสุ   วิปาโก   ตีสุ   ภูมีสุ   กิริยาพฺยากตํ
รูปญฺจ นิพฺพานญฺจ อิเม ธมฺมา โนคนฺถา ฯ
     [๙๒๖]   กตเม   ธมฺมา   คนฺถนิยา   ตีสุ   ภูมีสุ  กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   คนฺถนิยา   ฯ   กตเม   ธมฺมา   อคนฺถนิยา  จตฺตาโร
มคฺคา   อปริยาปนฺนา   จตฺตาริ   จ   สามญฺญผลานิ   นิพฺพานญฺจ  อิเม
ธมฺมา อคนฺถนิยา ฯ
     [๙๒๗]   กตเม  ธมฺมา  คนฺถสมฺปยุตฺตา  จตฺตาโร ทิฏฺฐิคตสมฺปยุตฺตา
จิตฺตุปฺปาทา           จตฺตาโร           ทิฏฺฐิคตวิปฺปยุตฺตโลภสหคตา
จิตฺตุปฺปาทา    เอตฺถุปฺปนฺนํ   โลภํ   ฐเปตฺวา   เทฺว   โทมนสฺสสหคตา
จิตฺตุปฺปาทา  เอตฺถุปฺปนฺนํ  ปฏิฆํ  ฐเปตฺวา  อิเม  ธมฺมา คนฺถสมฺปยุตฺตา ฯ
กตเม    ธมฺมา    คนฺถวิปฺปยุตฺตา   จตูสุ   ทิฏฺฐิคตวิปฺปยุตฺตโลภสหคเตสุ
จิตฺตุปฺปาเทสุ           อุปฺปนฺโน           โลโภ           ทฺวีสุ
โทมนสฺสสหคเตสุ    จิตฺตุปฺปาเทสุ    อุปฺปนฺนํ    ปฏิฆํ   วิจิกิจฺฉาสหคโต
จิตฺตุปฺปาโท    อุทฺธจฺจสหคโต    จิตฺตุปฺปาโท    จตูสุ    ภูมีสุ    กุสลํ
จตูสุ   ภูมีสุ   วิปาโก   ตีสุ   ภูมีสุ   กิริยาพฺยากตํ  รูปญฺจ  นิพฺพานญฺจ
อิเม ธมฺมา คนฺถวิปฺปยุตฺตา ฯ
     [๙๒๘]   กตเม   ธมฺมา   คนฺถาเจวคนฺถนิยาจ   เตว   คนฺถา
คนฺถาเจวคนฺถนิยาจ    ฯ    กตเม    ธมฺมา    คนฺถนิยาเจวโนจคนฺถา
ฐเปตฺวา   คนฺเถ   อวเสสํ   อกุสลํ   ตีสุ   ภูมีสุ   กุสลํ   ตีสุ  ภูมีสุ
วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ   อิเม   ธมฺมา
คนฺถนิยาเจวโนจคนฺถา    ฯ    อคนฺถนิยา    ธมฺมา    น    วตฺตพฺพา
คนฺถาเจวคนฺถนิยาจาติปิ คนฺถนิยาเจวโนจคนฺถาติปิ ฯ
     [๙๒๙]   กตเม    ธมฺมา    คนฺถาเจวคนฺถสมฺปยุตฺตาจ    ยตฺถ
ทิฏฺฐิ    จ    โลโภ    จ    เอกโต    อุปฺปชฺชนฺติ    อิเม   ธมฺมา
คนฺถาเจวคนฺถสมฺปยุตฺตาจ  ฯ  กตเม  ธมฺมา  คนฺถสมฺปยุตฺตาเจวโนจคนฺถา
อฏฺฐ   โลภสหคตา   จิตฺตุปฺปาทา   เทฺว   โทมนสฺสสหคตา  จิตฺตุปฺปาทา
เอตฺถุปฺปนฺเน    คนฺเถ    ฐเปตฺวา    อิเม   ธมฺมา   คนฺถสมฺปยุตฺตา-
เจวโนจคนฺถา     ฯ     คนฺถวิปฺปยุตฺตา    ธมฺมา    น    วตฺตพฺพา
คนฺถาเจวคนฺถสมฺปยุตฺตาจาติปิ คนฺถสมฺปยุตฺตาเจวโนจคนฺถาติปิ ฯ
     [๙๓๐]   กตเม    ธมฺมา    คนฺถวิปฺปยุตฺตา   คนฺถนิยา   จตูสุ
ทิฏฺฐิคตวิปฺปยุตฺตโลภสหคเตสุ    จิตฺตุปฺปาเทสุ   อุปฺปนฺโน   โลโภ   ทฺวีสุ
โทมนสฺสสหคเตสุ    จิตฺตุปฺปาเทสุ    อุปฺปนฺนํ    ปฏิฆํ   วิจิกิจฺฉาสหคโต
จิตฺตุปฺปาโท     อุทฺธจฺจสหคโต    จิตฺตุปฺปาโท    ตีสุ    ภูมีสุ    กุสลํ
ตีสุ   ภูมีสุ   วิปาโก   ตีสุ   ภูมีสุ   กิริยาพฺยากตํ  สพฺพญฺจ  รูปํ  อิเม
ธมฺมา   คนฺถวิปฺปยุตฺตา   คนฺถนิยา   ฯ   กตเม  ธมฺมา  คนฺถวิปฺปยุตฺตา
อคนฺถนิยา   จตฺตาโร   มคฺคา  อปริยาปนฺนา  จตฺตาริ  จ  สามญฺญผลานิ
นิพฺพานญฺจ     อิเม     ธมฺมา     คนฺถวิปฺปยุตฺตา    อคนฺถนิยา    ฯ
คนฺถสมฺปยุตฺตา    ธมฺมา   น   วตฺตพฺพา   คนฺถวิปฺปยุตฺตา   คนฺถนิยาติปิ
คนฺถวิปฺปยุตฺตา อคนฺถนิยาติปิ ฯ
                                       ----------------
     [๙๓๑]   กตเม   ธมฺมา   โอฆา  ฯเปฯ  กตเม  ธมฺมา  โยคา
ฯเปฯ    กตเม    ธมฺมา   นีวรณา   ฉ   นีวรณานิ   กามจฺฉนฺทนีวรณํ
พฺยาปาทนีวรณํ    ถีนมิทฺธนีวรณํ    อุทฺธจฺจกุกฺกุจฺจนีวรณํ    วิจิกิจฺฉานีวรณํ
อวิชฺชานีวรณํ        กามจฺฉนฺทนีวรณํ       อฏฺฐสุ       โลภสหคเตสุ
จิตฺตุปฺปาเทสุ    อุปฺปชฺชติ    พฺยาปาทนีวรณํ    ทฺวีสุ   โทมนสฺสสหคเตสุ
จิตฺตุปฺปาเทสุ    อุปฺปชฺชติ    ถีนมิทฺธนีวรณํ    สสงฺขาริเกสุ    อกุสเลสุ
อุปฺปชฺชติ    อุทฺธจฺจนีวรณํ    อุทฺธจฺจสหคเตสุ   จิตฺตุปฺปาเทสุ   อุปฺปชฺชติ
กุกฺกุจฺจนีวรณํ    ทฺวีสุ    โทมนสฺสสหคเตสุ    จิตฺตุปฺปาเทสุ    อุปฺปชฺชติ
วิจิกิจฺฉานีวรณํ   วิจิกิจฺฉาสหคเตสุ  จิตฺตุปฺปาเทสุ  อุปฺปชฺชติ  อวิชฺชานีวรณํ
สพฺพากุสเลสุ    อุปฺปชฺชติ    อิเม    ธมฺมา    นีวรณา    ฯ   กตเม
ธมฺมา    โนนีวรณา    ฐเปตฺวา    นีวรเณ   อวเสสํ   อกุสลํ   จตูสุ
ภูมีสุ    กุสลํ    จตูสุ    ภูมีสุ   วิปาโก   ตีสุ   ภูมีสุ   กิริยาพฺยากตํ
รูปญฺจ นิพฺพานญฺจ อิเม ธมฺมา โนนีวรณา ฯ
     [๙๓๒]   กตเม   ธมฺมา   นีวรณิยา   ตีสุ   ภูมีสุ  กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   นีวรณิยา   ฯ   กตเม   ธมฺมา   อนีวรณิยา  จตฺตาโร
มคฺคา   อปริยาปนฺนา   จตฺตาริ   จ   สามญฺญผลานิ   นิพฺพานญฺจ  อิเม
ธมฺมา อนีวรณิยา ฯ
     [๙๓๓]   กตเม  ธมฺมา  นีวรณสมฺปยุตฺตา  ทฺวาทส อกุสลจิตฺตุปฺปาทา
อิเม      ธมฺมา      นีวรณสมฺปยุตฺตา      ฯ     กตเม     ธมฺมา
นีวรณวิปฺปยุตฺตา    จตูสุ    ภูมีสุ    กุสลํ    จตูสุ    ภูมีสุ    วิปาโก
ตีสุ    ภูมีสุ    กิริยาพฺยากตํ    รูปญฺจ    นิพฺพานญฺจ    อิเม   ธมฺมา
นีวรณวิปฺปยุตฺตา ฯ
     [๙๓๔]   กตเม    ธมฺมา    นีวรณาเจวนีวรณิยาจ    ตาเนว
นีวรณานิ    นีวรณาเจวนีวรณิยาจ    ฯ    กตเม   ธมฺมา   นีวรณิยา-
เจวโนจนีวรณา     ฐเปตฺวา    นีวรเณ    อวเสสํ    อกุสลํ    ตีสุ
ภูมีสุ    กุสลํ    ตีสุ    ภูมีสุ    วิปาโก   ตีสุ   ภูมีสุ   กิริยาพฺยากตํ
สพฺพญฺจ   รูปํ   อิเม   ธมฺมา   นีวรณิยาเจวโนจนีวรณา  ฯ  อนีวรณิยา
ธมฺมา น วตฺตพฺพา นีวรณาเจวนีวรณิยาจาติปิ นีวรณิยาเจวโนจนีวรณาติปิ ฯ
     [๙๓๕]   กตเม    ธมฺมา   นีวรณาเจวนีวรณสมฺปยุตฺตาจ   ยตฺถ
เทฺว   ตีณิ   นีวรณานิ  เอกโต  อุปฺปชฺชนฺติ  อิเม  ธมฺมา  นีวรณาเจว-
นีวรณสมฺปยุตฺตาจ   ฯ   กตเม   ธมฺมา  นีวรณสมฺปยุตฺตาเจวโนจนีวรณา
ฐเปตฺวา      นีวรเณ      อวเสสํ      อกุสลํ     อิเม     ธมฺมา
นีวรณสมฺปยุตฺตาเจวโนจ    นีวรณา   ฯ   นีวรณวิปฺปยุตฺตา   ธมฺมา   น
วตฺตพฺพา       นีวรณาเจวนีวรณสมฺปยุตฺตาจาติปิ       นีวรณสมฺปยุตฺตา-
เจวโนจนีวรณาติปิ ฯ
     [๙๓๖]   กตเม   ธมฺมา   นีวรณวิปฺปยุตฺตา  นีวรณิยา  ตีสุ  ภูมีสุ
กุสลํ    ตีสุ    ภูมีสุ   วิปาโก   ตีสุ   ภูมีสุ   กิริยาพฺยากตํ   สพฺพญฺจ
รูปํ   อิเม   ธมฺมา   นีวรณวิปฺปยุตฺตา   นีวรณิยา   ฯ   กตเม  ธมฺมา
นีวรณวิปฺปยุตฺตา     อนีวรณิยา     จตฺตาโร    มคฺคา    อปริยาปนฺนา
จตฺตาริ   จ   สามญฺญผลานิ   นิพฺพานญฺจ  อิเม  ธมฺมา  นีวรณวิปฺปยุตฺตา
อนีวรณิยา     ฯ     นีวรณสมฺปยุตฺตา     ธมฺมา     น     วตฺตพฺพา
นีวรณวิปฺปยุตฺตา นีวรณิยาติปิ นีวรณวิปฺปยุตฺตา อนีวรณิยาติปิ ฯ
                                        ---------------
     [๙๓๗]   กตเม  ธมฺมา  ปรามาสา  ทิฏฺฐิปรามาโส  จตูสุ ทิฏฺฐิคต-
สมฺปยุตฺเตสุ   จิตฺตุปฺปาเทสุ   อุปฺปชฺชติ   อิเม   ธมฺมา  ปรามาสา  ฯ
กตเม   ธมฺมา   โนปรามาสา   ฐเปตฺวา   ปรามาสํ   อวเสสํ  อกุสลํ
จตูสุ   ภูมีสุ   กุสลํ   จตูสุ   ภูมีสุ   วิปาโก  ตีสุ  ภูมีสุ  กิริยาพฺยากตํ
รูปญฺจ นิพฺพานญฺจ อิเม ธมฺมา โนปรามาสา ฯ
     [๙๓๘]   กตเม   ธมฺมา   ปรามฏฺฐา   ตีสุ  ภูมีสุ  กุสลํ  อกุสลํ
ตีสุ    ภูมีสุ    วิปาโก    ตีสุ   ภูมีสุ   กิริยาพฺยากตํ   สพฺพญฺจ   รูปํ
อิเม   ธมฺมา   ปรามฏฺฐา   ฯ   กตเม  ธมฺมา  อปรามฏฺฐา  จตฺตาโร
มคฺคา   อปริยาปนฺนา   จตฺตาริ   จ   สามญฺญผลานิ   นิพฺพานญฺจ  อิเม
ธมฺมา อปรามฏฺฐา ฯ
     [๙๓๙]   กตเม     ธมฺมา    ปรามาสสมฺปยุตฺตา    จตฺตาโร
ทิฏฺฐิคตสมฺปยุตฺตา   จิตฺตุปฺปาทา   เอตฺถุปฺปนฺนํ  ปรามาสํ  ฐเปตฺวา  อิเม
ธมฺมา    ปรามาสสมฺปยุตฺตา   ฯ   กตเม   ธมฺมา   ปรามาสวิปฺปยุตฺตา
จตฺตาโร  ทิฏฺฐิคตวิปฺปยุตฺตโลภสหคตา  จิตฺตุปฺปาทา  เทฺว  โทมนสฺสสหคตา
จิตฺตุปฺปาทา      วิจิกิจฺฉาสหคโต      จิตฺตุปฺปาโท      อุทฺธจฺจสหคโต
จิตฺตุปฺปาโท     จตูสุ     ภูมีสุ     กุสลํ    จตูสุ    ภูมีสุ    วิปาโก
ตีสุ    ภูมีสุ    กิริยาพฺยากตํ    รูปญฺจ    นิพฺพานญฺจ    อิเม   ธมฺมา
ปรามาสวิปฺปยุตฺตา   ฯ   ปรามาโส  น  วตฺตพฺโพ  ปรามาสสมฺปยุตฺโตติปิ
ปรามาสวิปฺปยุตฺโตติปิ ฯ
     [๙๔๐]   กตเม    ธมฺมา   ปรามาสาเจวปรามฏฺฐาจ   โสเอว
ปรามาโส      ปรามาโสเจวปรามฏฺโฐจ     ฯ     กตเม     ธมฺมา
ปรามฏฺฐาเจวโนจปรามาสา    ฐเปตฺวา    ปรามาสํ   อวเสสํ   อกุสลํ
ตีสุ   ภูมีสุ   กุสลํ   ตีสุ   ภูมีสุ   วิปาโก   ตีสุ   ภูมีสุ  กิริยาพฺยากตํ
สพฺพญฺจ    รูปํ    อิเม    ธมฺมา    ปรามฏฺฐาเจวโนจปรามาสา    ฯ
อปรามฏฺฐา    ธมฺมา    น    วตฺตพฺพา   ปรามาสาเจวปรามฏฺฐาจาติปิ
ปรามฏฺฐาเจวโนจปรามาสาติปิ ฯ
     [๙๔๑]   กตเม  ธมฺมา  ปรามาสวิปฺปยุตฺตา  ปรามฏฺฐา  จตฺตาโร
ทิฏฺฐิคตวิปฺปยุตฺตโลภสหคตา     จิตฺตุปฺปาทา     เทฺว    โทมนสฺสสหคตา
จิตฺตุปฺปาทา      วิจิกิจฺฉาสหคโต      จิตฺตุปฺปาโท      อุทฺธจฺจสหคโต
จิตฺตุปฺปาโท   ตีสุ   ภูมีสุ   กุสลํ   ตีสุ   ภูมีสุ   วิปาโก   ตีสุ   ภูมีสุ
กิริยาพฺยากตํ    สพฺพญฺจ    รูปํ    อิเม    ธมฺมา   ปรามาสวิปฺปยุตฺตา
ปรามฏฺฐา  ฯ  กตเม  ธมฺมา  ปรามาสวิปฺปยุตฺตา  อปรามฏฺฐา  จตฺตาโร
มคฺคา    อปริยาปนฺนา    จตฺตาริ    จ    สามญฺญผลานิ    นิพฺพานญฺจ
อิเม   ธมฺมา   ปรามาสวิปฺปยุตฺตา   อปรามฏฺฐา   ฯ   ปรามาสา   จ
ปรามาสสมฺปยุตฺตา  จ  ธมฺมา น วตฺตพฺพา ปรามาสวิปฺปยุตฺตา ปรามฏฺฐาติปิ
ปรามาสวิปฺปยุตฺตา อปรามฏฺฐาติปิ ฯ
                                        --------------


             เนื้อความพระไตรปิฎกฉบับภาษาบาลีอักษรไทย เล่มที่ ๓๔ หน้าที่ ๓๕๑-๓๖๖.
http://84000.org/tipitaka/pali/pali_item_s.php?book=34&item=900&items=42&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=34&item=900&items=42&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=34&item=900&items=42&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=34&item=900&items=42&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=34&i=900
             The Pali Atthakatha in Thai :-
http://84000.org/tipitaka/atthapali/read_th.php?B=53&A=11965
             The Pali Atthakatha in Roman :-
http://84000.org/tipitaka/atthapali/read_rm.php?B=53&A=11965
             สารบัญพระไตรปิฎกเล่มที่ ๓๔
http://84000.org/tipitaka/read/?index_34