พระไตรปิฎกเล่มที่ ๖ ภาษาบาลี อักษรไทย
พระวินัยปิฎกเล่มที่ ๖ วินย. จุลฺลวคฺโค (๑)

     [๔๓]   เตน    โข  ปน  สมเยน  อายสฺมา  เสยฺยสโก  พาโล
โหติ    อพฺยตฺโต    อาปตฺติพหุโล    อนปทาโน    คิหิสํสฏฺโฐ   วิหรติ
อนนุโลมิเกหิ   คิหิสํสคฺเคหิ   อปิสฺสุ   ภิกฺขู   ปกตตฺตา   ๑-   ปริวาสํ
เทนฺตา    มูลาย    ปฏิกสฺสนฺตา   มานตฺตํ   เทนฺตา   อพฺเภนฺตา   ฯ
เย   เต   ภิกฺขู  อปฺปิจฺฉา  ฯเปฯ  เต  อุชฺฌายนฺติ  ขียนฺติ  วิปาเจนฺติ
กถํ   หิ   นาม   อายสฺมา   เสยฺยสโก   พาโล   ภวิสฺสติ   อพฺยตฺโต
อาปตฺติพหุโล     อนปทาโน    คิหิสํสฏฺโฐ    วิหริสฺสติ    อนนุโลมิเกหิ
@เชิงอรรถ: ๑ ม. ยุ. ปกตา ฯ
คิหิสํสคฺเคหิ    อปิสฺสุ    ภิกฺขู   ปกตตฺตา   ปริวาสํ   เทนฺตา   มูลาย
ปฏิกสฺสนฺตา   มานตฺตํ   เทนฺตา   อพฺเภนฺตาติ   ฯ   อถโข  เต  ภิกฺขู
ภควโต เอตมตฺถํ อาโรเจสุํ ฯ
     [๔๔]   อถโข  ภควา  เอตสฺมึ  นิทาเน  เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา   ภิกฺขู   ปฏิปุจฺฉิ   สจฺจํ   กิร   ภิกฺขเว   เสยฺยสโก
ภิกฺขุ  พาโล  โหติ  ๑-  อพฺยตฺโต  อาปตฺติพหุโล  อนปทาโน  คิหิสํสฏฺโฐ
วิหรติ     อนนุโลมิเกหิ    คิหิสํสคฺเคหิ    อปิสฺสุ    ภิกฺขู    ปกตตฺตา
ปริวาสํ     เทนฺตา     มูลาย     ปฏิกสฺสนฺตา    มานตฺตํ    เทนฺตา
อพฺเภนฺตาติ   ฯ   สจฺจํ  ภควาติ  ฯ  วิครหิ  พุทฺโธ  ภควา  อนนุจฺฉวิกํ
ภิกฺขเว    ตสฺส    โมฆปุริสสฺส    อนนุโลมิกํ    อปฺปฏิรูปํ   อสฺสามณกํ
อกปฺปิยํ   อกรณียํ   กถํ   หิ   นาม   โส  ภิกฺขเว  โมฆปุริโส  พาโล
ภวิสฺสติ      อพฺยตฺโต     อาปตฺติพหุโล     อนปทาโน     คิหิสํสฏฺโฐ
วิหริสฺสติ    อนนุโลมิเกหิ     คิหิสํสคฺเคหิ    อปิสฺสุ   ภิกฺขู   ปกตตฺตา
ปริวาสํ   เทนฺตา   มูลาย   ปฏิกสฺสนฺตา   มานตฺตํ  เทนฺตา  อพฺเภนฺตา
เนตํ    ภิกฺขเว    อปฺปสนฺนานํ    วา    ปสาทาย    ปสนฺนานํ   วา
ภิยฺโยภาวาย   ฯเปฯ   วิครหิตฺวา  ธมฺมึ  กถํ  กตฺวา  ภิกฺขู  อามนฺเตสิ
เตนหิ   ภิกฺขเว   สงฺโฆ   เสยฺยสกสฺส   ภิกฺขุโน   นิยสฺสกมฺมํ   กโรตุ
นิสฺสาย   เต   วตฺถพฺพนฺติ   ฯ   เอวญฺจ   ปน   ภิกฺขเว  กาตพฺพํ  ฯ
ปฐมํ    เสยฺยสโก    ภิกฺขุ    โจเทตพฺโพ    โจเทตฺวา   สาเรตพฺโพ
สาเรตฺวา   อาปตฺติ   อาโรเปตพฺพา   อาปตฺตึ  อาโรเปตฺวา  พฺยตฺเตน
@เชิงอรรถ: ๑ ม. อยํ ปาโฐ น ทิสฺสติ ฯ
ภิกฺขุนา ปฏิพเลน สงฺโฆ ญาเปตพฺโพ
     {๔๔.๑}   สุณาตุ  เม  ภนฺเต  สงฺโฆ  อยํ  เสยฺยสโก ภิกฺขุ พาโล
โหติ    อพฺยตฺโต    อาปตฺติพหุโล    อนปทาโน    คิหิสํสฏฺโฐ   วิหรติ
อนนุโลมิเกหิ    คิหิสํสคฺเคหิ    อปิสฺสุ    ภิกฺขู    ปกตตฺตา    ปริวาสํ
เทนฺตา   มูลาย   ปฏิกสฺสนฺตา   มานตฺตํ   เทนฺตา  อพฺเภนฺตา  ฯ  ยทิ
สงฺฆสฺส    ปตฺตกลฺลํ    สงฺโฆ    เสยฺยสกสฺส    ภิกฺขุโน    นิยสฺสกมฺมํ
กเรยฺย นิสฺสาย เต วตฺถพฺพนฺติ ฯ เอสา ญตฺติ ฯ
     {๔๔.๒}   สุณาตุ  เม  ภนฺเต  สงฺโฆ  อยํ  เสยฺยสโก ภิกฺขุ พาโล
โหติ    อพฺยตฺโต    อาปตฺติพหุโล    อนปทาโน    คิหิสํสฏฺโฐ   วิหรติ
อนนุโลมิเกหิ    คิหิสํสคฺเคหิ    อปิสฺสุ    ภิกฺขู    ปกตตฺตา    ปริวาสํ
เทนฺตา    มูลาย    ปฏิกสฺสนฺตา   มานตฺตํ   เทนฺตา   อพฺเภนฺตา   ฯ
สงฺโฆ    เสยฺยสกสฺส    ภิกฺขุโน   นิยสฺสกมฺมํ   กโรติ   นิสฺสาย   เต
วตฺถพฺพนฺติ     ฯ     ยสฺสายสฺมโต    ขมติ    เสยฺยสกสฺส    ภิกฺขุโน
นิยสฺสกมฺมสฺส    กรณํ    นิสฺสาย    เต    วตฺถพฺพนฺติ   โส   ตุณฺหสฺส
ยสฺส นกฺขมติ โส ภาเสยฺย ฯ
     {๔๔.๓}   ทุติยมฺปิ   เอตมตฺถํ   วทามิ   ฯ  สุณาตุ  เม  ภนฺเต
สงฺโฆ   อยํ   เสยฺยสโก   ภิกฺขุ  พาโล  โหติ  อพฺยตฺโต  อาปตฺติพหุโล
อนปทาโน     คิหิสํสฏฺโฐ     วิหรติ     อนนุโลมิเกหิ     คิหิสํสคฺเคหิ
อปิสฺสุ    ภิกฺขู    ปกตตฺตา   ปริวาสํ   เทนฺตา   มูลาย   ปฏิกสฺสนฺตา
มานตฺตํ    เทนฺตา    อพฺเภนฺตา   ฯ   สงฺโฆ   เสยฺยสกสฺส   ภิกฺขุโน
นิยสฺสกมฺมํ    กโรติ    นิสฺสาย   เต   วตฺถพฺพนฺติ   ฯ   ยสฺสายสฺมโต
ขมติ          เสยฺยสกสฺส          ภิกฺขุโน          นิยสฺสกมฺมสฺส
กรณํ    นิสฺสาย    เต   วตฺถพฺพนฺติ   โส   ตุณฺหสฺส   ยสฺส   นกฺขมติ
โส ภาเสยฺย ฯ
     {๔๔.๔}   ตติยมฺปิ   เอตมตฺถํ   วทามิ   ฯ  สุณาตุ  เม  ภนฺเต
สงฺโฆ ฯเปฯ โส ตุณฺหสฺส ยสฺส นกฺขมติ โส ภาเสยฺย ฯ
     {๔๔.๕}   กตํ  สงฺเฆน  เสยฺยสกสฺส  ภิกฺขุโน  นิยสฺสกมฺมํ  นิสฺสาย
เต    วตฺถพฺพนฺติ    ขมติ    สงฺฆสฺส   ตสฺมา   ตุณฺหี   ฯ   เอวเมตํ
ธารยามีติ ฯ
     [๔๕]   ตีหิ    ภิกฺขเว    องฺเคหิ    สมนฺนาคตํ    นิยสฺสกมฺมํ
อธมฺมกมฺมญฺเจว    โหติ   อวินยกมฺมญฺจ   ทุวูปสนฺตญฺจ   อสมฺมุขา   กตํ
โหติ    อปฺปฏิปุจฺฉา   กตํ   โหติ   อปฺปฏิญฺญาย   กตํ   โหติ   อิเมหิ
โข    ภิกฺขเว    ตีหงฺเคหิ   สมนฺนาคตํ   นิยสฺสกมฺมํ   อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๔๖]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อนาปตฺติยา
กตํ    โหติ    อเทสนาคามินิยา   อาปตฺติยา   กตํ   โหติ   เทสิตาย
อาปตฺติยา   กตํ   โหติ   อิเมหิ   โข   ภิกฺขเว  ตีหงฺเคหิ  สมนฺนาคตํ
นิยสฺสกมฺมํ อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๔๗]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อโจเทตฺวา
กตํ   โหติ   อสาเรตฺวา   กตํ   โหติ   อาปตฺตึ   อนาโรเปตฺวา  กตํ
โหติ    อิเมหิ    โข    ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๔๘]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว     โหติ     อวินยกมฺมญฺจ    ทุวูปสนฺตญฺจ    อสมฺมุขา
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว    ตีหงฺเคหิ   สมนฺนาคตํ   นิยสฺสกมฺมํ   อธมฺมกมฺมญฺเจว   โหติ
อวินยกมฺมญฺจ ทุวูปสนฺตญฺจ ฯ
     [๔๙]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อปฺปฏิปุจฺฉา
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว     ตีหงฺเคหิ     สมนฺนาคตํ     นิยสฺสกมฺมํ    อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๕๐]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อปฺปฏิญฺญาย
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว     ตีหงฺเคหิ     สมนฺนาคตํ     นิยสฺสกมฺมํ    อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๕๑]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อนาปตฺติยา
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว     ตีหงฺเคหิ     สมนฺนาคตํ     นิยสฺสกมฺมํ    อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๕๒]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว   โหติ   อวินยกมฺมญฺจ   ทุวูปสนฺตญฺจ   อเทสนาคามินิยา
อาปตฺติยา   กตํ   โหติ   อธมฺเมน   กตํ   โหติ   วคฺเคน  กตํ  โหติ
อิเมหิ     โข     ภิกฺขเว     ตีหงฺเคหิ     สมนฺนาคตํ    นิยสฺสกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๕๓]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว     โหติ     อวินยกมฺมญฺจ    ทุวูปสนฺตญฺจ    เทสิตาย
อาปตฺติยา   กตํ   โหติ   อธมฺเมน   กตํ   โหติ   วคฺเคน  กตํ  โหติ
อิเมหิ     โข     ภิกฺขเว     ตีหงฺเคหิ     สมนฺนาคตํ    นิยสฺสกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๕๔]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อโจเทตฺวา
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว     ตีหงฺเคหิ     สมนฺนาคตํ     นิยสฺสกมฺมํ    อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๕๕]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว    โหติ    อวินยกมฺมญฺจ    ทุวูปสนฺตญฺจ    อสาเรตฺวา
กตํ   โหติ   อธมฺเมน   กตํ   โหติ   วคฺเคน  กตํ  โหติ  อิเมหิ  โข
ภิกฺขเว     ตีหงฺเคหิ     สมนฺนาคตํ     นิยสฺสกมฺมํ    อธมฺมกมฺมญฺเจว
โหติ อวินยกมฺมญฺจ ทุวูปสนฺตญฺจ ฯ
     [๕๖]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว     โหติ     อวินยกมฺมญฺจ     ทุวูปสนฺตญฺจ    อาปตฺตึ
อนาโรเปตฺวา    กตํ   โหติ   อธมฺเมน   กตํ   โหติ   วคฺเคน   กตํ
โหติ    อิเมหิ    โข    ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
                          อธมฺมกมฺเม ทฺวาทสกํ นิฏฺฐิตํ ฯ
     [๕๗]   ตีหิ    ภิกฺขเว    องฺเคหิ    สมนฺนาคตํ    นิยสฺสกมฺมํ
ธมฺมกมฺมญฺเจว   โหติ   วินยกมฺมญฺจ   สุวูปสนฺตญฺจ   สมฺมุขา  กตํ  โหติ
ปฏิปุจฺฉา   กตํ   โหติ   ปฏิญฺญาย   กตํ   โหติ   อิเมหิ  โข  ภิกฺขเว
ตีหงฺเคหิ   สมนฺนาคตํ   นิยสฺสกมฺมํ   ธมฺมกมฺมญฺเจว   โหติ  วินยกมฺมญฺจ
สุวูปสนฺตญฺจ ฯ
     [๕๘]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    อาปตฺติยา
กตํ    โหติ    เทสนาคามินิยา   อาปตฺติยา   กตํ   โหติ   อเทสิตาย
อาปตฺติยา   กตํ   โหติ   อิเมหิ   โข   ภิกฺขเว  ตีหงฺเคหิ  สมนฺนาคตํ
นิยสฺสกมฺมํ ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     [๕๙]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    โจเทตฺวา
กตํ    โหติ   สาเรตฺวา   กตํ   โหติ   อาปตฺตึ   อาโรเปตฺวา   กตํ
โหติ    อิเมหิ    โข    ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     [๖๐]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ    สมฺมุขา   กตํ
โหติ    ธมฺเมน   กตํ   โหติ   สมคฺเคน   กตํ   โหติ   อิเมหิ   โข
ภิกฺขเว    ตีหงฺเคหิ    สมนฺนาคตํ   นิยสฺสกมฺมํ   ธมฺมกมฺมญฺเจว   โหติ
วินยกมฺมญฺจ สุวูปสนฺตญฺจ ฯ
     [๖๑]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ   ปฏิปุจฺฉา   กตํ
โหติ   ธมฺเมน   กตํ  โหติ  สมคฺเคน  กตํ  โหติ  อิเมหิ  โข  ภิกฺขเว
ตีหงฺเคหิ   สมนฺนาคตํ   นิยสฺสกมฺมํ   ธมฺมกมฺมญฺเจว   โหติ  วินยกมฺมญฺจ
สุวูปสนฺตญฺจ ฯ
     [๖๒]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ     ปฏิญฺญาย
กตํ    โหติ   ธมฺเมน   กตํ   โหติ   สมคฺเคน   กตํ   โหติ   อิเมหิ
โข    ภิกฺขเว    ตีหงฺเคหิ    สมนฺนาคตํ   นิยสฺสกมฺมํ   ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๓]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    อาปตฺติยา
กตํ    โหติ   ธมฺเมน   กตํ   โหติ   สมคฺเคน   กตํ   โหติ   อิเมหิ
โข    ภิกฺขเว    ตีหงฺเคหิ    สมนฺนาคตํ   นิยสฺสกมฺมํ   ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๔]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ   เทสนาคามินิยา
อาปตฺติยา   กตํ   โหติ   ธมฺเมน   กตํ   โหติ   สมคฺเคน  กตํ  โหติ
อิเมหิ   โข   ภิกฺขเว  ตีหงฺเคหิ  สมนฺนาคตํ  นิยสฺสกมฺมํ  ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๕]   อปเรหิปิ    ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    อเทสิตาย
อาปตฺติยา   กตํ   โหติ   ธมฺเมน   กตํ   โหติ   สมคฺเคน  กตํ  โหติ
อิเมหิ   โข   ภิกฺขเว  ตีหงฺเคหิ  สมนฺนาคตํ  นิยสฺสกมฺมํ  ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๖]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    โจเทตฺวา
กตํ    โหติ   ธมฺเมน   กตํ   โหติ   สมคฺเคน   กตํ   โหติ   อิเมหิ
โข    ภิกฺขเว    ตีหงฺเคหิ    สมนฺนาคตํ   นิยสฺสกมฺมํ   ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๗]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว     โหติ     วินยกมฺมญฺจ     สุวูปสนฺตญฺจ    สาเรตฺวา
กตํ    โหติ   ธมฺเมน   กตํ   โหติ   สมคฺเคน   กตํ   โหติ   อิเมหิ
โข    ภิกฺขเว    ตีหงฺเคหิ    สมนฺนาคตํ   นิยสฺสกมฺมํ   ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๖๘]   อปเรหิปิ   ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว      โหติ     วินยกมฺมญฺจ     สุวูปสนฺตญฺจ     อาปตฺตึ
อาโรเปตฺวา    กตํ    โหติ   ธมฺเมน   กตํ   โหติ   สมคฺเคน   กตํ
โหติ    อิเมหิ    โข    ภิกฺขเว   ตีหงฺเคหิ   สมนฺนาคตํ   นิยสฺสกมฺมํ
ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
                           ธมฺมกมฺเม ทฺวาทสกํ นิฏฺฐิตํ
     [๖๙]   ตีหิ  ภิกฺขเว  องฺเคหิ  สมนฺนาคตสฺส  ภิกฺขุโน อากงฺขมาโน
สงฺโฆ    นิยสฺสกมฺมํ    กเรยฺย    ภณฺฑนการโก    โหติ   กลหการโก
วิวาทการโก    ภสฺสการโก    สงฺเฆ   อธิกรณการโก   พาโล   โหติ
อพฺยตฺโต   อาปตฺติพหุโล   อนปทาโน   คิหิสํสฏฺโฐ  วิหรติ  อนนุโลมิเกหิ
คิหิสํสคฺเคหิ     อิเมหิ    โข    ภิกฺขเว    ตีหงฺเคหิ    สมนฺนาคตสฺส
ภิกฺขุโน อากงฺขมาโน สงฺโฆ นิยสฺสกมฺมํ กเรยฺย ฯ
     [๗๐]   อปเรหิปิ   ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน    สงฺโฆ    นิยสฺสกมฺมํ    กเรยฺย   อธิสีเล   สีลวิปนฺโน
โหติ    อชฺฌาจาเร   อาจารวิปนฺโน   โหติ   อติทิฏฺฐิยา   ทิฏฺฐิวิปนฺโน
โหติ    อิเมหิ    โข    ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน สงฺโฆ นิยสฺสกมฺมํ กเรยฺย ฯ
     [๗๑]   อปเรหิปิ   ภิกฺขเว   ตีหงฺเคหิ   สมนฺนาคตสฺส   ภิกฺขุโน
อากงฺขมาโน   สงฺโฆ   นิยสฺสกมฺมํ   กเรยฺย   พุทฺธสฺส   อวณฺณํ  ภาสติ
ธมฺมสฺส    อวณฺณํ    ภาสติ   สงฺฆสฺส   อวณฺณํ   ภาสติ   อิเมหิ   โข
ภิกฺขเว    ตีหงฺเคหิ    สมนฺนาคตสฺส   ภิกฺขุโน   อากงฺขมาโน   สงฺโฆ
นิยสฺสกมฺมํ กเรยฺย ฯ
     [๗๒]   ติณฺณํ   ภิกฺขเว  ภิกฺขูนํ  อากงฺขมาโน  สงฺโฆ  นิยสฺสกมฺมํ
กเรยฺย    เอโก    ภณฺฑนการโก   โหติ   กลหการโก   วิวาทการโก
ภสฺสการโก   สงฺเฆ   อธิกรณการโก   เอโก   พาโล  โหติ  อพฺยตฺโต
อาปตฺติพหุโล   อนปทาโน   เอโก   คิหิสํสฏฺโฐ   วิหรติ   อนนุโลมิเกหิ
คิหิสํสคฺเคหิ    อิเมสํ    โข   ภิกฺขเว   ติณฺณํ   ภิกฺขูนํ   อากงฺขมาโน
สงฺโฆ นิยสฺสกมฺมํ กเรยฺย ฯ
     [๗๓]   อปเรสํปิ   ภิกฺขเว   ติณฺณํ  ภิกฺขูนํ  อากงฺขมาโน  สงฺโฆ
นิยสฺสกมฺมํ    กเรยฺย    เอโก   อธิสีเล   สีลวิปนฺโน   โหติ   เอโก
อชฺฌาจาเร   อาจารวิปนฺโน   โหติ   เอโก   อติทิฏฺฐิยา   ทิฏฺฐิวิปนฺโน
โหติ   อิเมสํ   โข   ภิกฺขเว   ติณฺณํ   ภิกฺขูนํ   อากงฺขมาโน   สงฺโฆ
นิยสฺสกมฺมํ กเรยฺย ฯ
     [๗๔]   อปเรสํปิ   ภิกฺขเว   ติณฺณํ  ภิกฺขูนํ  อากงฺขมาโน  สงฺโฆ
นิยสฺสกมฺมํ    กเรยฺย    เอโก     พุทฺธสฺส   อวณฺณํ   ภาสติ   เอโก
ธมฺมสฺส   อวณฺณํ   ภาสติ   เอโก   สงฺฆสฺส   อวณฺณํ   ภาสติ   อิเมสํ
โข ภิกฺขเว ติณฺณํ ภิกฺขูนํ อากงฺขมาโน สงฺโฆ นิยสฺสกมฺมํ กเรยฺย ฯ
                           อากงฺขมานจฺฉกฺกํ นิฏฺฐิตํ ฯ
     [๗๕]   นิยสฺสกมฺมกเตน   ภิกฺขเว  ภิกฺขุนา  สมฺมา  วตฺติตพฺพํ  ฯ
ตตฺรายํ   สมฺมาวตฺตนา   น   อุปสมฺปาเทตพฺพํ   น   นิสฺสโย  ทาตพฺโพ
น   สามเณโร   อุปฏฺฐาเปตพฺโพ   น   ภิกฺขุโนวาทกสมฺมติ   สาทิตพฺพา
สมฺมเตนปิ   ภิกฺขุนิโย   น   โอวทิตพฺพา   ยาย   อาปตฺติยา   สงฺเฆน
นิยสฺสกมฺมํ    กตํ   โหติ   สา   อาปตฺติ   น   อาปชฺชิตพฺพา   อญฺญา
วา    ตาทิสิกา    ตโต    วา   ปาปิฏฺฐตรา   กมฺมํ   น   ครหิตพฺพํ
กมฺมิกา   น   ครหิตพฺพา  น  ปกตตฺตสฺส  ภิกฺขุโน  อุโปสโถ  ฐเปตพฺโพ
น    ปวารณา    ฐเปตพฺพา   น   สวจนียํ   กาตพฺพํ   น   อนุวาโท
ปฏฺฐเปตพฺโพ    น    โอกาโส    กาเรตพฺโพ   น   โจเทตพฺโพ   น
สาเรตพฺโพ น ภิกฺขู ๑- ภิกฺขูหิ สมฺปโยเชตพฺพนฺติ ฯ
                        นิยสฺสกมฺเม อฏฺฐารสวตฺตํ นิฏฺฐิตํ ฯ
     [๗๖]   อถโข   สงฺโฆ  เสยฺยสกสฺส  ภิกฺขุโน  นิยสฺสกมฺมํ  อกาสิ
นิสฺสาย  เต  วตฺถพฺพนฺติ  ฯ  โส  สงฺเฆน  นิยสฺสกมฺมกโต  กลฺยาณมิตฺเต
เสวมาโน    ภชมาโน    ปยิรุปาสมาโน   อุทฺทิสาเปนฺโต   ปริปุจฺฉนฺโต
พหุสฺสุโต   อโหสิ   ๒-   อาคตาคโม  ธมฺมธโร  วินยธโร  มาติกาธโร
ปณฺฑิโต     วิยตฺโต     เมธาวี    ลชฺชี    กุกฺกุจฺจโก    สิกฺขากาโม
โส  ๓-  สมฺมา  วตฺตติ  โลมํ ปาเตติ เนตฺถารํ วตฺตติ ภิกฺขู อุปสงฺกมิตฺวา
เอวํ   วทติ   อหํ   อาวุโส   สงฺเฆน  นิยสฺสกมฺมกโต  สมฺมา  วตฺตามิ
โลมํ  ปาเตมิ  เนตฺถารํ  วตฺตามิ  กถํ  นุ  โข  มยา  ปฏิปชฺชิตพฺพนฺติ ฯ
ภิกฺขู ๔- ภควโต เอตมตฺถํ อาโรเจสุํ ฯ
@เชิงอรรถ: ๑-๔ ม. ยุ. ภิกฺขูติ ปาโฐ น ทิสฺสติ ฯ     ๒ ม. ยุ. โหติ ฯ
@๓ ม. ยุ. อยํ ปาโฐ น ทิสฺสติ ฯ
     [๗๗]   เตนหิ  ภิกฺขเว  สงฺโฆ  เสยฺยสกสฺส  ภิกฺขุโน  นิยสฺสกมฺมํ
ปฏิปฺปสฺสมฺเภตุ   ฯ   ปญฺจหิ   ภิกฺขเว   องฺเคหิ  สมนฺนาคตสฺส  ภิกฺขุโน
นิยสฺสกมฺมํ    น    ปฏิปฺปสฺสมฺเภตพฺพํ    อุปสมฺปาเทติ    นิสฺสยํ   เทติ
สามเณรํ     อุปฏฺฐาเปติ    ภิกฺขุโนวาทกสมฺมตึ    สาทิยติ    สมฺมโตปิ
ภิกฺขุนิโย   โอวทติ   อิเมหิ   โข   ภิกฺขเว  ปญฺจหงฺเคหิ  สมนฺนาคตสฺส
ภิกฺขุโน นิยสฺสกมฺมํ น ปฏิปฺปสฺสมฺเภตพฺพํ ฯ
     [๗๘]   อปเรหิปิ   ภิกฺขเว   ปญฺจหงฺเคหิ  สมนฺนาคตสฺส  ภิกฺขุโน
นิยสฺสกมฺมํ    น    ปฏิปฺปสฺสมฺเภตพฺพํ    ยาย    อาปตฺติยา    สงฺเฆน
นิยสฺสกมฺมํ   กตํ   โหติ   ตํ   อาปตฺตึ   อาปชฺชติ  อญฺญํ  วา  ตาทิสิกํ
ตโต    วา    ปาปิฏฺฐตรํ   กมฺมํ   ครหติ   กมฺมิเก   ครหติ   อิเมหิ
โข   ภิกฺขเว   ปญฺจหงฺเคหิ   สมนฺนาคตสฺส   ภิกฺขุโน   นิยสฺสกมฺมํ   น
ปฏิปฺปสฺสมฺเภตพฺพํ ฯ
     [๗๙]   อฏฺฐหิ  ภิกฺขเว  องฺเคหิ  สมนฺนาคตสฺส  ภิกฺขุโน นิยสฺสกมฺมํ
น     ปฏิปฺปสฺสมฺเภตพฺพํ    ปกตตฺตสฺส    ภิกฺขุโน    อุโปสถํ    ฐเปติ
ปวารณํ    ฐเปติ    สวจนียํ    กโรติ   อนุวาทํ   ปฏฺฐเปติ   โอกาสํ
กาเรติ    โจเทติ    สาเรติ    ภิกฺขู   ภิกฺขูหิ   สมฺปโยเชติ   อิเมหิ
โข   ภิกฺขเว   อฏฺฐหงฺเคหิ   สมนฺนาคตสฺส   ภิกฺขุโน   นิยสฺสกมฺมํ   น
ปฏิปฺปสฺสมฺเภตพฺพํ ฯ
                   นปฏิปฺปสฺสมฺเภตพฺพอฏฺฐารสกํ นิฏฺฐิตํ ฯ
     [๘๐]   ปญฺจหิ  ภิกฺขเว  องฺเคหิ  สมนฺนาคตสฺส  ภิกฺขุโน นิยสฺสกมฺมํ
ปฏิปฺปสฺสมฺเภตพฺพํ น อุปสมฺปาเทติ ฯเปฯ
     [๘๑]   อปเรหิปิ   ภิกฺขเว   ปญฺจหงฺเคหิ  สมนฺนาคตสฺส  ภิกฺขุโน
นิยสฺสกมฺมํ   ปฏิปฺปสฺสมฺเภตพฺพํ   ยาย   อาปตฺติยา   สงฺเฆน  นิยสฺสกมฺมํ
กตํ    โหติ   ตํ   อาปตฺตึ   นาปชฺชติ   อญฺญํ   วา   ตาทิสิกํ   ตโต
วา   ปาปิฏฺฐตรํ   กมฺมํ   น   ครหติ   กมฺมิเก   น   ครหติ   อิเมหิ
โข    ภิกฺขเว    ปญฺจหงฺเคหิ    สมนฺนาคตสฺส    ภิกฺขุโน   นิยสฺสกมฺมํ
ปฏิปฺปสฺสมฺเภตพฺพํ ฯ
     [๘๒]   อฏฺฐหิ  ภิกฺขเว  องฺเคหิ  สมนฺนาคตสฺส  ภิกฺขุโน นิยสฺสกมฺมํ
ปฏิปฺปสฺสมฺเภตพฺพํ    น    ปกตตฺตสฺส   ภิกฺขุโน   อุโปสถํ   ฐเปติ   น
ปวารณํ   ฐเปติ   น   สวจนียํ   กโรติ   น   อนุวาทํ   ปฏฺฐเปติ  น
โอกาสํ    กาเรติ   น   โจเทติ   น   สาเรติ   น   ภิกฺขู   ภิกฺขูหิ
สมฺปโยเชติ    อิเมหิ    โข    ภิกฺขเว    อฏฺฐหงฺเคหิ   สมนฺนาคตสฺส
ภิกฺขุโน นิยสฺสกมฺมํ ปฏิปฺปสฺสมฺเภตพฺพํ ฯ
                   ปฏิปฺปสฺสมฺเภตพฺพอฏฺฐารสกํ นิฏฺฐิตํ ฯ
     [๘๓]   เอวญฺจ  ปน  ภิกฺขเว  ปฏิปฺปสฺสมฺเภตพฺพํ  ฯ  เตน ภิกฺขเว
เสยฺยสเกน   ภิกฺขุนา  สงฺฆํ  อุปสงฺกมิตฺวา  เอกํสํ  อุตฺตราสงฺคํ  กริตฺวา
วุฑฺฒานํ    ภิกฺขูนํ    ปาเท    วนฺทิตฺวา   อุกฺกุฏิกํ   นิสีทิตฺวา   อญฺชลึ
ปคฺคเหตฺวา   เอวมสฺส   วจนีโย   อหํ  ภนฺเต  สงฺเฆน  นิยสฺสกมฺมกโต
สมฺมา   วตฺตามิ   โลมํ   ปาเตมิ   เนตฺถารํ   วตฺตามิ   นิยสฺสกมฺมสฺส
ปฏิปฺปสฺสทฺธึ    ยาจามีติ    ฯ    ทุติยมฺปิ    ยาจิตพฺพา   ฯ   ตติยมฺปิ
ยาจิตพฺพา ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ ฯ
     {๘๓.๑}   สุณาตุ  เม  ภนฺเต  สงฺโฆ  อยํ เสยฺยสโก ภิกฺขุ สงฺเฆน
นิยสฺสกมฺมกโต    สมฺมา   วตฺตติ   โลมํ   ปาเตติ   เนตฺถารํ   วตฺตติ
นิยสฺสกมฺมสฺส   ปฏิปฺปสฺสทฺธึ   ยาจติ  ฯ  ยทิ  สงฺฆสฺส  ปตฺตกลฺลํ  สงฺโฆ
เสยฺยสกสฺส ภิกฺขุโน นิยสฺสกมฺมํ ปฏิปฺปสฺสมฺเภยฺย ฯ เอสา ญตฺติ ฯ
     {๘๓.๒}   สุณาตุ  เม  ภนฺเต  สงฺโฆ  อยํ เสยฺยสโก ภิกฺขุ สงฺเฆน
นิยสฺสกมฺมกโต    สมฺมา   วตฺตติ   โลมํ   ปาเตติ   เนตฺถารํ   วตฺตติ
นิยสฺสกมฺมสฺส   ปฏิปฺปสฺสทฺธึ   ยาจติ   ฯ   สงฺโฆ  เสยฺยสกสฺส  ภิกฺขุโน
นิยสฺสกมฺมํ    ปฏิปฺปสฺสมฺเภติ    ฯ   ยสฺสายสฺมโต   ขมติ   เสยฺยสกสฺส
ภิกฺขุโน     นิยสฺสกมฺมสฺส     ปฏิปฺปสฺสทฺธิ     โส    ตุณฺหสฺส    ยสฺส
นกฺขมติ โส ภาเสยฺย ฯ
     {๘๓.๓}   ทุติยมฺปิ   เอตมตฺถํ   วทามิ   ฯ  สุณาตุ  เม  ภนฺเต
สงฺโฆ    อยํ    เสยฺยสโก   ภิกฺขุ   สงฺเฆน   นิยสฺสกมฺมกโต   สมฺมา
วตฺตติ   โลมํ   ปาเตติ   เนตฺถารํ   วตฺตติ  นิยสฺสกมฺมสฺส  ปฏิปฺปสฺสทฺธึ
ยาจติ   ฯ  สงฺโฆ  เสยฺยสกสฺส  ภิกฺขุโน  นิยสฺสกมฺมํ  ปฏิปฺปสฺสมฺเภติ  ฯ
ยสฺสายสฺมโต      ขมติ     เสยฺยสกสฺส     ภิกฺขุโน     นิยสฺสกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๘๓.๔}   ตติยมฺปิ  เอตมตฺถํ  วทามิ  ฯ  สุณาตุ  เม ภนฺเต สงฺโฆ
อยํ   เสยฺยสโก   ภิกฺขุ   สงฺเฆน  นิยสฺสกมฺมกโต  สมฺมา  วตฺตติ  โลมํ
ปาเตติ   เนตฺถารํ   วตฺตติ   นิยสฺสกมฺมสฺส   ปฏิปฺปสฺสทฺธึ   ยาจติ   ฯ
สงฺโฆ    เสยฺยสกสฺส    ภิกฺขุโน    นิยสฺสกมฺมํ    ปฏิปฺปสฺสมฺเภติ    ฯ
ยสฺสายสฺมโต   ขมติ   เสยฺยสกสฺส   ภิกฺขุโน  นิยสฺสกมฺมสฺส  ปฏิปฺปสฺสทฺธิ
โส ตุณฺหสฺส ยสฺส นกฺขมติ โส ภาเสยฺย ฯ
     {๘๓.๕}   ปฏิปฺปสฺสทฺธํ     สงฺเฆน    เสยฺยสกสฺส    ภิกฺขุโน
นิยสฺสกมฺมํ ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
                           นิยสฺสกมฺมํ ทุติยํ นิฏฺฐิตํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๖ หน้าที่ ๑๘-๓๓.
http://84000.org/tipitaka/pali/pali_item_s.php?book=6&item=43&items=41&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=6&item=43&items=41&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=6&item=43&items=41&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=6&item=43&items=41&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=6&i=43
             The Pali Atthakatha in Thai :-
http://84000.org/tipitaka/atthapali/read_th.php?B=3&A=5710
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=5710
             สารบัญพระไตรปิฎกเล่มที่ ๖
http://84000.org/tipitaka/read/?index_6