บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
TIPITAKA Volume 17 : PALI ROMAN Sutta Pitaka Vol 9 : Sutta. Saṃ. Kha.
Khandhasaṃyuttassa cullapaṇṇāsake avijjāvaggo tatiyo [320] Sāvatthī . atha kho aññataro bhikkhu yena bhagavā tenupasaṅkami upasaṅkamitvā .pe. ekamantaṃ nisinno kho so bhikkhu bhagavantaṃ etadavoca avijjā avijjāti bhante vuccati katamā nu kho bhante avijjā kittāvatā ca avijjāgato hotīti. {320.1} Idha bhikkhu assutavā puthujjano samudayadhammaṃ rūpaṃ samudayadhammaṃ rūpanti yathābhūtaṃ nappajānāti vayadhammaṃ rūpaṃ vayadhammaṃ rūpanti yathābhūtaṃ nappajānāti samudayavayadhammaṃ rūpaṃ samudayavayadhammaṃ rūpanti yathābhūtaṃ nappajānāti samudayadhammaṃ vedanaṃ samudayadhammā vedanāti yathābhūtaṃ nappajānāti vayadhammaṃ vedanaṃ vayadhammā vedanāti yathābhūtaṃ nappajānāti .pe. nappajānāti samudayadhammaṃ saññaṃ .pe. nappajānāti samudayadhamme saṅkhāre samudayadhammā saṅkhārāti yathābhūtaṃ nappajānāti vayadhamme saṅkhāre vayadhammā saṅkhārāti yathābhūtaṃ nappajānāti samudayavayadhamme saṅkhāre samudayavayadhammā saṅkhārāti yathābhūtaṃ nappajānāti samudayadhammaṃ viññāṇaṃ samudayadhammaṃ viññāṇanti yathābhūtaṃ nappajānāti vayadhammaṃ viññāṇaṃ vayadhammaṃ viññāṇanti yathābhūtaṃ nappajānāti samudayavayadhammaṃ viññāṇaṃ samudayavayadhammaṃ viññāṇanti yathābhūtaṃ nappajānāti . ayaṃ vuccati bhikkhu avijjā ettāvatā ca avijjāgato hotīti. [321] Evaṃ vutte so bhikkhu bhagavantaṃ etadavoca vijjā vijjāti bhante vuccati katamā nu kho bhante vijjā kittāvatā ca vijjāgato hotīti. {321.1} Idha bhikkhu sutavā ariyasāvako samudayadhammaṃ rūpaṃ samudayadhammaṃ rūpanti yathābhūtaṃ pajānāti vayadhammaṃ rūpaṃ vayadhammaṃ rūpanti yathābhūtaṃ pajānāti samudayavayadhammaṃ rūpaṃ samudayavayadhammaṃ rūpanti yathābhūtaṃ pajānāti samudayadhammaṃ vedanaṃ samudayadhammā vedanāti yathābhūtaṃ pajānāti vayadhammaṃ vedanaṃ vayadhammā vedanāti yathābhūtaṃ pajānāti samudayavayadhammaṃ vedanaṃ samudayavayadhammā vedanāti yathābhūtaṃ pajānāti samudayadhammaṃ saññaṃ .pe. pajānāti samudayadhamme saṅkhāre samudayadhammā saṅkhārāti yathābhūtaṃ pajānāti vayadhamme saṅkhāre vayadhammā saṅkhārāti yathābhūtaṃ pajānāti samudayavayadhamme saṅkhāre samudayavayadhammā saṅkhārāti yathābhūtaṃ pajānāti samudayadhammaṃ viññāṇaṃ samudayadhammaṃ viññāṇanti yathābhūtaṃ pajānāti vayadhammaṃ viññāṇaṃ vayadhammaṃ viññāṇanti yathābhūtaṃ pajānāti samudayavayadhammaṃ viññāṇaṃ samudayavayadhammaṃ viññāṇanti yathābhūtaṃ pajānāti . ayaṃ vuccati bhikkhu vijjā ettāvatā ca vijjāgato hotīti. [322] Ekaṃ samayaṃ āyasmā ca sārīputto āyasmā ca mahākoṭṭhito bārāṇasiyaṃ viharanti isipatane migadāye . atha kho āyasmā mahākoṭṭhito sāyaṇhasamayaṃ paṭisallānā vuṭṭhito .pe. Ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca avijjā avijjāti āvuso sārīputta vuccati katamā nu kho āvuso avijjā kittāvatā ca avijjāgato hotīti. {322.1} Idhāvuso assutavā puthujjano samudayadhammaṃ rūpaṃ samudayadhammaṃ rūpanti yathābhūtaṃ nappajānāti vayadhammaṃ rūpaṃ vayadhammaṃ rūpanti yathābhūtaṃ nappajānāti samudayavayadhammaṃ rūpaṃ samudayavayadhammaṃ rūpanti yathābhūtaṃ nappajānāti samudayadhammaṃ vedanaṃ .pe. vayadhammaṃ vedanaṃ .pe. samudayavayadhammaṃ vedanaṃ .pe. samudayadhammaṃ saññaṃ .pe. samudayadhamme saṅkhāre .pe. vayadhamme saṅkhāre . Samudayavayadhamme saṅkhāre samudayavayadhammā saṅkhārāti yathābhūtaṃ nappajānāti samudayadhammaṃ viññāṇaṃ .pe. vayadhammaṃ viññāṇaṃ . Samudayavayadhammaṃ viññāṇaṃ samudayavayadhammaṃ viññāṇanti yathābhūtaṃ nappajānāti . ayaṃ vuccatāvuso 1- avijjā ettāvatā ca avijjāgato hotīti. [323] Ekaṃ samayaṃ āyasmā ca sārīputto āyasmā ca mahākoṭṭhito bārāṇasiyaṃ viharanti isipatane migadāye . ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca vijjā vijjāti āvuso sārīputta vuccati katamā nu kho āvuso vijjā kittāvatā ca vijjāgato hotīti . idhāvuso sutavā ariyasāvako samudayadhammaṃ rūpaṃ samudayadhammaṃ rūpanti yathābhūtaṃ pajānāti vayadhammaṃ rūpaṃ .pe. samudayavayadhammaṃ rūpaṃ samudayavayadhammaṃ rūpanti @Footnote: 1 Ma. Yu. vuccati āvuso. Yathābhūtaṃ pajānāti samudayadhammaṃ vedanaṃ .pe. samudayadhammaṃ saññaṃ .pe. samudayadhamme saṅkhāre . vayadhamme saṅkhāre . Samudayavayadhamme saṅkhāre samudayavayadhammā saṅkhārāti yathābhūtaṃ pajānāti samudayadhammaṃ viññāṇaṃ . vayadhammaṃ viññāṇaṃ . samudayavayadhammaṃ viññāṇaṃ samudayavayadhammaṃ viññāṇanti yathābhūtaṃ pajānāti . Ayaṃ vuccatāvuso vijjā ettāvatā ca vijjāgato hotīti. [324] Taññeva nidānaṃ . ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca avijjā avijjāti āvuso sārīputta vuccati katamā nu kho āvuso avijjā kittāvatā ca avijjāgato hotīti . idhāvuso assutavā puthujjano rūpassa assādañca ādīnavañca nissaraṇañca yathābhūtaṃ nappajānāti vedanāya .pe. saññāya . saṅkhārānaṃ . viññāṇassa assādañca ādīnavañca nissaraṇañca yathābhūtaṃ nappajānāti . ayaṃ vuccatāvuso avijjā ettāvatā ca avijjāgato hotīti. [325] Taññeva nidānaṃ . ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca vijjā vijjāti āvuso sārīputta vuccati katamā nu kho āvuso vijjā kittāvatā ca vijjāgato hotīti . idhāvuso sutavā ariyasāvako rūpassa assādañca ādīnavañca nissaraṇañca yathābhūtaṃ pajānāti vedanāya .pe. saññāya . saṅkhārānaṃ . viññāṇassa assādañca Ādīnavañca nissaraṇañca yathābhūtaṃ pajānāti . ayaṃ vuccatāvuso vijjā ettāvatā ca vijjāgato hotīti. [326] Taññeva nidānaṃ . ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca avijjā avijjāti āvuso sārīputta vuccati katamā nu kho āvuso avijjā kittāvatā ca avijjāgato hotīti . idhāvuso assutavā puthujjano rūpassa samudayañca atthaṅgamañca assādañca ādīnavañca nissaraṇañca yathābhūtaṃ nappajānāti vedanāya .pe. saññāya . saṅkhārānaṃ . Viññāṇassa samudayañca atthaṅgamañca assādañca ādīnavañca nissaraṇañca yathābhūtaṃ nappajānāti . ayaṃ vuccatāvuso avijjā ettāvatā ca avijjāgato hotīti. [327] Taññeva nidānaṃ . ekamantaṃ nisinno kho āyasmā mahākoṭṭhito āyasmantaṃ sārīputtaṃ etadavoca vijjā vijjāti āvuso sārīputta vuccati katamā nu kho āvuso vijjā kittāvatā ca vijjāgato hotīti . idhāvuso sutavā ariyasāvako rūpassa samudayañca atthaṅgamañca assādañca ādīnavañca nissaraṇañca yathābhūtaṃ pajānāti vedanāya .pe. saññāya . saṅkhārānaṃ . viññāṇassa samudayañca atthaṅgamañca assādañca ādīnavañca nissaraṇañca yathābhūtaṃ pajānāti . ayaṃ vuccatāvuso vijjā ettāvatā ca vijjāgato hotīti. [328] Ekaṃ samayaṃ āyasmā ca sārīputto āyasmā ca mahākoṭṭhito bārāṇasiyaṃ viharanti isipatane migadāye . atha kho āyasmā sārīputto .pe. ekamantaṃ nisinno kho āyasmā sārīputto āyasmantaṃ mahākoṭṭhitaṃ etadavoca avijjā avijjāti āvuso koṭṭhita vuccati katamā nu kho āvuso avijjā kittāvatā ca avijjāgato hotīti . idhāvuso assutavā puthujjano rūpassa assādañca ādīnavañca nissaraṇañca yathābhūtaṃ nappajānāti vedanāya .pe. saññāya . saṅkhārānaṃ . viññāṇassa assādañca ādīnavañca nissaraṇañca yathābhūtaṃ nappajānāti . ayaṃ vuccatāvuso avijjā ettāvatā ca avijjāgato hotīti. [329] Evaṃ vutte āyasmā sārīputto āyasmantaṃ mahākoṭṭhitaṃ etadavoca vijjā vijjāti āvuso koṭṭhita vuccati katamā nu kho āvuso vijjā kittāvatā ca vijjāgato hotīti . idhāvuso sutavā ariyasāvako rūpassa assādañca ādīnavañca nissaraṇañca yathābhūtaṃ pajānāti vedanāya .pe. saññāya . saṅkhārānaṃ . viññāṇassa assādañca ādīnavañca nissaraṇañca yathābhūtaṃ pajānāti . ayaṃ vuccatāvuso vijjā ettāvatā ca vijjāgato hotīti. [330] Taññeva nidānaṃ . ekamantaṃ nisinno kho āyasmā sārīputto āyasmantaṃ mahākoṭṭhitaṃ etadavoca avijjā avijjāti Āvuso koṭṭhita vuccati katamā nu kho āvuso avijjā kittāvatā ca avijjāgato hotīti . idhāvuso assutavā puthujjano rūpassa samudayañca atthaṅgamañca assādañca ādīnavañca nissaraṇañca yathābhūtaṃ nappajānāti vedanāya .pe. saññāya . saṅkhārānaṃ . Viññāṇassa samudayañca atthaṅgamañca assādañca ādīnavañca nissaraṇañca yathābhūtaṃ nappajānāti . ayaṃ vuccatāvuso avijjā ettāvatā ca avijjāgato hotīti. [331] Evaṃ vutte āyasmā sārīputto āyasmantaṃ mahākoṭṭhitaṃ etadavoca vijjā vijjāti āvuso koṭṭhita vuccati katamā nu kho āvuso vijjā kittāvatā ca vijjāgato hotīti . idhāvuso sutavā ariyasāvako rūpassa samudayañca atthaṅgamañca assādañca ādīnavañca nissaraṇañca yathābhūtaṃ pajānāti vedanāya .pe. saññāya . Saṅkhārānaṃ . viññāṇassa samudayañca atthaṅgamañca assādañca ādīnavañca nissaraṇañca yathābhūtaṃ pajānāti . ayaṃ vuccatāvuso vijjā ettāvatā ca vijjāgato hotīti. [332] Taññeva nidānaṃ . ekamantaṃ nisinno kho āyasmā sārīputto āyasmantaṃ mahākoṭṭhitaṃ etadavoca avijjā avijjāti āvuso koṭṭhita vuccati katamā nu kho āvuso avijjā kittāvatā ca avijjāgato hotīti . idhāvuso assutavā puthujjano rūpaṃ nappajānāti rūpasamudayaṃ nappajānāti rūpanirodhaṃ nappajānāti rūpanirodhagāminīpaṭipadaṃ Nappajānāti vedanaṃ .pe. saññaṃ . saṅkhāre . viññāṇaṃ nappajānāti viññāṇasamudayaṃ nappajānāti viññāṇanirodhaṃ nappajānāti viññāṇanirodhagāminīpaṭipadaṃ nappajānāti . Ayaṃ vuccatāvuso avijjā ettāvatā ca avijjāgato hotīti. [333] Evaṃ vutte āyasmā sārīputto āyasmantaṃ mahākoṭṭhitaṃ etadavoca vijjā vijjāti āvuso koṭṭhita vuccati katamā nu kho āvuso vijjā kittāvatā ca vijjāgato hotīti . Idhāvuso sutavā ariyasāvako rūpaṃ pajānāti rūpasamudayaṃ pajānāti rūpanirodhaṃ pajānāti rūpanirodhagāminīpaṭipadaṃ pajānāti vedanaṃ . Saññaṃ . saṅkhāre . viññāṇaṃ pajānāti viññāṇasamudayaṃ pajānāti viññāṇanirodhaṃ pajānāti viññāṇanirodhagāminīpaṭipadaṃ pajānāti . Ayaṃ vuccatāvuso vijjā ettāvatā ca vijjāgato hotīti. Avijjāvaggo samatto. Tassuddānaṃ samudayadhammena tīṇi assāde ca apare duve samudaye ca dve vuttā koṭṭhite apare tayoti. -----------------The Pali Tipitaka in Roman Character Volume 17 page 209-216. http://84000.org/tipitaka/pali/roman_item_s.php?book=17&item=320&items=14 Classified by [Item Number] :- http://84000.org/tipitaka/pali/roman_item_s.php?book=17&item=320&items=14&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=17&item=320&items=14 Compare with The Royal Version of Thai Tipitaka :- http://84000.org/tipitaka/read/byitem_s.php?book=17&item=320&items=14 Study Atthakatha :- http://84000.org/tipitaka/attha/attha.php?b=17&i=320 The Pali Atthakatha in Thai :- http://84000.org/tipitaka/atthapali/read_th.php?B=12&A=8047 The Pali Atthakatha in Roman :- http://84000.org/tipitaka/atthapali/read_rm.php?B=12&A=8047 Contents of The Tipitaka Volume 17 http://84000.org/tipitaka/read/?index_17
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]