Okkantasaṃyuttaṃ
[469] Sāvatthī . cakkhuṃ bhikkhave aniccaṃ vipariṇāmi aññathābhāvi
sotaṃ aniccaṃ vipariṇāmi aññathābhāvi ghānaṃ aniccaṃ vipariṇāmi
aññathābhāvi jivhā aniccā vipariṇāmī aññathābhāvī kāyo
anicco vipariṇāmī aññathābhāvī mano anicco vipariṇāmī
aññathābhāvī . yo bhikkhave ime dhamme evaṃ saddahati adhimuccati.
Ayaṃ vuccati saddhānusārī okkanto sammattaniyāmaṃ sappurisabhūmiṃ
okkanto vītivatto puthujjanabhūmiṃ abhabbo taṃ kammaṃ kātuṃ yaṃ
kammaṃ katvā nirayaṃ vā tiracchānayoniṃ vā pittivisayaṃ vā upapajjeyya
abhabbova 1- tāva kālaṃ kātuṃ yāva na sotāpattiphalaṃ sacchikaroti.
{469.1} Yassa kho bhikkhave ime dhammā evaṃ paññāya mattaso
nijjhānaṃ khamanti . ayaṃ vuccati dhammānusārī okkanto sammattaniyāmaṃ
sappurisabhūmiṃ okkanto vītivatto puthujjanabhūmiṃ abhabbo taṃ kammaṃ
kātuṃ yaṃ kammaṃ katvā nirayaṃ vā tiracchānayoniṃ vā pittivisayaṃ vā
upapajjeyya abhabbova 2- tāva kālaṃ kātuṃ yāva na sotāpattiphalaṃ
sacchikaroti . yo bhikkhave ime dhamme evaṃ jānāti evaṃ passati. Ayaṃ
vuccati sotāpanno avinipātadhammo niyato sambodhiparāyanoti.
[470] Sāvatthī . Rūpā bhikkhave aniccā vipariṇāmino aññathābhāvino
saddā aniccā vipariṇāmino aññathābhāvino gandhā
@Footnote: 1-2 Ma. Yu. ca. sabbattha evaṃ ñātabbaṃ.
Aniccā vipariṇāmino aññathābhāvino rasā aniccā vipariṇāmino
aññathābhāvino phoṭṭhabbā aniccā vipariṇāmino aññathābhāvino
dhammā aniccā vipariṇāmino aññathābhāvino . yo bhikkhave ime
dhamme evaṃ saddahati adhimuccati . ayaṃ vuccati saddhānusārī okkanto
sammattaniyāmaṃ sappurisabhūmiṃ okkanto vītivatto puthujjanabhūmiṃ abhabbo
taṃ kammaṃ kātuṃ yaṃ kammaṃ katvā nirayaṃ vā tiracchānayoniṃ vā pittivisayaṃ
vā upapajjeyya abhabbova tāva kālaṃ kātuṃ yāva na sotāpattiphalaṃ
sacchikaroti.
{470.1} Yassa kho bhikkhave ime dhammā evaṃ paññāya mattaso
nijjhānaṃ khamanti . ayaṃ vuccati dhammānusārī okkanto sammattaniyāmaṃ
sappurisabhūmiṃ okkanto vītivatto puthujjanabhūmiṃ abhabbo taṃ kammaṃ
kātuṃ yaṃ kammaṃ katvā nirayaṃ vā tiracchānayoniṃ vā pittivisayaṃ vā
upapajjeyya abhabbova tāva kālaṃ kātuṃ yāva na sotāpattiphalaṃ
sacchikaroti . yo bhikkhave ime dhamme evaṃ jānāti 1- evaṃ passati.
Ayaṃ vuccati sotāpanno avinipātadhammo niyato sambodhiparāyanoti.
[471] Sāvatthī . cakkhuviññāṇaṃ bhikkhave aniccaṃ vipariṇāmi
aññathābhāvi sotaviññāṇaṃ .pe. ghānaviññāṇaṃ . jivhāviññāṇaṃ .
Kāyaviññāṇaṃ . manoviññāṇaṃ aniccaṃ vipariṇāmi aññathābhāvi .
Yo bhikkhave .pe. sacchikaroti . Yassa kho bhikkhave .pe. Sacchikaroti.
Yo bhikkhave .pe. Sambodhiparāyanoti.
[472] Sāvatthī . cakkhusamphasso bhikkhave anicco vipariṇāmī
@Footnote: 1 Ma. pajānāti.
Aññathābhāvī sotasamphasso . ghānasamphasso . jivhāsamphasso .
Kāyasamphasso . manosamphasso anicco vipariṇāmī aññathābhāvī .
Yo bhikkhave ime dhamme evaṃ saddahati adhimuccati . ayaṃ vuccati
saddhānusārī .pe. Sambodhiparāyanoti.
[473] Sāvatthī . cakkhusamphassajā bhikkhave vedanā aniccā
vipariṇāmī aññathābhāvī sotasamphassajā vedanā . ghānasamphassajā
vedanā . jivhāsamphassajā vedanā . kāyasamphassajā vedanā .
Manosamphassajā vedanā aniccā vipariṇāmī aññathābhāvī . yo
bhikkhave ime dhamme evaṃ saddahati adhimuccati . ayaṃ vuccati
saddhānusārī .pe. Sambodhiparāyanoti.
[474] Sāvatthī . rūpasaññā bhikkhave aniccā vipariṇāmī
aññathābhāvī saddasaññā . gandhasaññā . rasasaññā .
Phoṭṭhabbasaññā . dhammasaññā aniccā vipariṇāmī aññathābhāvī .
Yo bhikkhave ime dhamme evaṃ saddahati adhimuccati . ayaṃ vuccati
saddhānusārī .pe. Sambodhiparāyanoti.
[475] Sāvatthī . rūpasañcetanā bhikkhave aniccā vipariṇāmī
aññathābhāvī saddasañcetanā . gandhasañcetanā . rasasañcetanā .
Phoṭṭhabbasañcetanā . dhammasañcetanā aniccā vipariṇāmī
aññathābhāvī . yo bhikkhave ime dhamme evaṃ saddahati adhimuccati.
Ayaṃ vuccati saddhānusārī .pe. Sambodhiparāyanoti.
[476] Sāvatthī . rūpataṇhā bhikkhave aniccā vipariṇāmī
aññathābhāvī saddataṇhā . gandhataṇhā . rasataṇhā .
Phoṭṭhabbataṇhā . dhammataṇhā aniccā vipariṇāmī aññathābhāvī .
Yo bhikkhave ime dhamme evaṃ saddahati adhimuccati . ayaṃ vuccati
saddhānusārī .pe. Sambodhiparāyanoti.
[477] Sāvatthī . paṭhavīdhātu bhikkhave aniccā vipariṇāmī
aññathābhāvī . āpodhātu . tejodhātu . vāyodhātu .
Ākāsadhātu . viññāṇadhātu aniccā vipariṇāmī aññathābhāvī .
Yo bhikkhave ime dhamme evaṃ saddahati adhimuccati . ayaṃ vuccati
saddhānusārī .pe. Sambodhiparāyanoti.
[478] Sāvatthī . rūpaṃ bhikkhave aniccaṃ vipariṇāmi aññathābhāvi
vedanā aniccā vipariṇāmī aññathābhāvī saññā . saṅkhārā
aniccā vipariṇāmino aññathābhāvino viññāṇaṃ aniccaṃ vipariṇāmi
aññathābhāvi . yo bhikkhave ime dhamme evaṃ saddahati adhimuccati.
Ayaṃ vuccati saddhānusārī okkanto sammattaniyāmaṃ sappurisabhūmiṃ
okkanto vītivatto puthujjanabhūmiṃ abhabbo taṃ kammaṃ kātuṃ yaṃ
kammaṃ katvā nirayaṃ vā tiracchānayoniṃ vā pittivisayaṃ vā upapajjeyya
abhabbova tāva kālaṃ kātuṃ yāva na sotāpattiphalaṃ sacchikaroti.
{478.1} Yassa kho bhikkhave ime dhammā evaṃ paññāya mattaso nijjhānaṃ
khamanti . ayaṃ vuccati dhammānusārī okkanto sammattaniyāmaṃ sappurisabhūmiṃ
Okkanto vītivatto puthujjanabhūmiṃ abhabbo taṃ kammaṃ kātuṃ yaṃ
kammaṃ katvā nirayaṃ vā tiracchānayoniṃ vā pittivisayaṃ vā upapajjeyya
abhabbova tāva kālaṃ kātuṃ yāva na sotāpattiphalaṃ sacchikaroti .
Yo bhikkhave ime dhamme evaṃ pajānāti evaṃ passati . Ayaṃ vuccati
sotāpanno avinipātadhammo niyato sambodhiparāyanoti.
Okkantasaṃyuttaṃ.
Tassuddānaṃ
cakkhu rūpañca viññāṇaṃ phasso ca vedanāya ca
saññā ca cetanā taṇhā dhātu khandhena te dasāti.
---------
The Pali Tipitaka in Roman Character Volume 17 page 278-282.
http://84000.org/tipitaka/pali/roman_item_s.php?book=17&item=469&items=10
Classified by [Item Number] :-
http://84000.org/tipitaka/pali/roman_item_s.php?book=17&item=469&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=17&item=469&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=17&item=469&items=10
Study Atthakatha :-
http://84000.org/tipitaka/attha/attha.php?b=17&i=469
The Pali Atthakatha in Thai :-
http://84000.org/tipitaka/atthapali/read_th.php?B=12&A=8314
The Pali Atthakatha in Roman :-
http://84000.org/tipitaka/atthapali/read_rm.php?B=12&A=8314
Contents of The Tipitaka Volume 17
http://84000.org/tipitaka/read/?index_17
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
