Paṭhamakasagāthavaggo 1- paṭhamo
[359] Tisso imā bhikkhave vedanā . katamā tisso .
Sukhā vedanā dukkhā vedanā adukkhamasukhā vedanā . imā kho
bhikkhave tisso vedanā 2-.
[360] Samāhito sampajāno sato buddhassa sāvako
vedanā ca pajānāti vedanānañca sambhavaṃ.
Yattha cetā nirujjhanti maggañca khayagāminaṃ
vedanānaṃ khayā bhikkhu nicchāto parinibbutoti. Paṭhamaṃ.
[361] Tisso imā bhikkhave vedanā . katamā tisso .
Sukhā vedanā dukkhā vedanā adukkhamasukhā vedanā . imā kho
bhikkhave tisso vedanā 2-.
[362] Sukhaṃ vā yadi vā dukkhaṃ adukkhamasukhaṃ saha
ajjhattañca bahiddhā ca yaṅkiñci atthi veditaṃ.
Etaṃ dukkhanti ñatvāna mosadhammaṃ palokinaṃ
phussa phussa vayaṃ phussaṃ 3- evaṃ tattha virajjatīti. Dutiyaṃ.
[363] Tisso imā bhikkhave vedanā . katamā tisso. Sukhā
vedanā dukkhā vedanā adukkhamasukhā vedanā . sukhāya bhikkhave
vedanāya rāgānusayo pahātabbo dukkhāya vedanāya paṭighānusayo
pahātabbo adukkhamasukhāya vedanāya avijjānusayo pahātabbo .
@Footnote: 1 Ma. sagāthāvaggo . 2 Ma. itisaddo atthi . 3 Ma. Yu. passaṃ.
Yato kho bhikkhave bhikkhuno sukhāya vedanāya rāgānusayo pahīno
hoti dukkhāya vedanāya paṭighānusayo pahīno hoti adukkhamasukhāya
vedanāya avijjānusayo pahīno hoti . ayaṃ vuccati bhikkhave bhikkhu
nirāgānusayo 1- sammaddaso acchejji taṇhaṃ vivattayi saññojanaṃ
sammāmānābhisamayā antamakāsi dukkhassāti.
[364] Sukhaṃ vedayamānassa vedanaṃ appajānato
so rāgānusayo hoti anissaraṇadassino.
Dukkhaṃ vedayamānassa vedanaṃ appajānato
paṭighānusayo hoti anissaraṇadassino.
Adukkhamasukhaṃ santaṃ bhūripaññaṃ na desitaṃ
taṃ vāpi 2- abhinandati neva dukkhā pamuccati.
Yato ca bhikkhu ātāpī sampajaññaṃ na riñcati
tato so vedanā sabbā parijānāti paṇḍito.
So vedanā pariññāya diṭṭhe dhamme anāsavo
kāyassa bhedā dhammaṭṭho saṅkhyaṃ nūpeti 3- vedagūti. Tatiyaṃ.
[365] Assutavā bhikkhave puthujjano evaṃ 4- vācaṃ bhāsati atthi
mahāsamudde pātāloti . taṃ kho panetaṃ bhikkhave assutavā puthujjano
asantaṃ asaṃvijjamānaṃ evaṃ vācaṃ bhāsati atthi mahāsamudde pātāloti.
Sārīrikānaṃ kho etaṃ bhikkhave dukkhānaṃ vedanānaṃ adhivacanaṃ yadidaṃ
pātāloti . assutavā bhikkhave puthujjano sārīrikāya dukkhāya
@Footnote: 1 Ma. niranusayo . 2 Ma. Yu. tañcāpi . 3 Yu. saṅkhaṃ no peti. evamuparipi.
@4 Ma. Yu. yaṃ.
Vedanāya phuṭṭho samāno socati kilamati paridevati urattāḷī 1-
kandati sammohaṃ āpajjati . ayaṃ vuccati bhikkhave assutavā
puthujjano pātāle 2- na paccuṭṭhāsi gādhañca najjhagā 3-. Sutavā
ca kho bhikkhave ariyasāvako sārīrikāya dukkhāya vedanāya phuṭṭho
samāno na 4- socati na kilamati na paridevati na urattāḷī kandati
sammohaṃ nāpajjati . ayaṃ vuccati bhikkhave sutavā ariyasāvako
pātāle paccuṭṭhāsi gādhañca ajjhagāti.
[366] Yo etā nādhivāseti uppannā vedanā dukkhā
sārīrikā pāṇaharā yāhi phuṭṭho pavedhati.
Akkandati parodati dubbalo appathāmako
na so pātāle paccuṭṭhāsi atho gādhampi najjhagā 3-.
Yo cetā adhivāseti uppannā vedanā dukkhā
sārīrikā pāṇaharā yāhi phuṭṭho na vedhati
sace pātāle paccuṭṭhāsi atho gādhampi ajjhagāti. Catutthaṃ.
[367] Tisso imā bhikkhave vedanā . katamā tisso. Sukhā
vedanā dukkhā vedanā adukkhamasukhā vedanā . sukhā bhikkhave
vedanā dukkhato daṭṭhabbā dukkhā vedanā sallato daṭṭhabbā
adukkhamasukhā vedanā aniccato daṭṭhabbā . yato kho bhikkhave
bhikkhuno sukhā vedanā dukkhato diṭṭhā hoti dukkhā vedanā
sallato diṭṭhā hoti adukkhamasukhā vedanā aniccato diṭṭhā
@Footnote: 1 Ma. uttāḷiṃ. evamuparipi . 2 Yu. pātālena. evamuparipi . 3 Ma. nājjhagā.
@4 Ma. neva.
Hoti . ayaṃ vuccati bhikkhave bhikkhu sammaddaso acchejji taṇhaṃ
vivattayi saññojanaṃ sammāmānābhisamayā antamakāsi dukkhassāti.
[368] Yo sukhaṃ dukkhato adda dukkhamadakkhi 1- sallato
adukkhamasukhaṃ santaṃ adakkhi naṃ aniccato.
Save sammaddaso bhikkhu parijānāti vedanā
so vedanā pariññāya diṭṭhe dhamme anāsavo
kāyassa bhedā dhammaṭṭho saṅkhyaṃ nūpeti vedagūti. Pañcamaṃ.
[369] Assutavā bhikkhave puthujjano sukhampi vedanaṃ vedayati 2-
dukkhampi vedanaṃ vedayati adukkhamasukhampi vedanaṃ vedayati . sutavā
bhikkhave ariyasāvako sukhampi vedanaṃ vedayati dukkhampi vedanaṃ
vedayati adukkhamasukhampi vedanaṃ vedayati . tatra bhikkhave ko
viseso ko adhippāyaso 3- kiṃ nānākaraṇaṃ sutavato ariyasāvakassa
assutavatā puthujjanenāti . bhagavaṃmūlakā no bhante dhammā .pe.
Assutavā bhikkhave puthujjano dukkhāya vedanāya phuṭṭho samāno
socati kilamati paridevati urattāḷa kandati sammohaṃ āpajjati
so dve vedanā vedayati kāyikañca cetasikañca.
[370] Seyyathāpi bhikkhave purisaṃ sallena vijjheyyuṃ 4- tamenaṃ
dutiyena sallena anuvedhaṃ vijjheyyuṃ 4- evaṃ hi so bhikkhave puriso
dve sallena 5- vedanā vedayati kāyikañca cetasikañca. Evameva kho
bhikkhave assutavā puthujjano dukkhāya vedanāya phuṭṭho samāno socati
@Footnote: 1 Ma. Yu. dukkhamaddakkhi . 2 Yu. vediyati. evamuparipi . 3 Ma. adhippayāso.
@Yu. adhippāyoso . 4 Ma. vijjheyya . 5 Ma. dvisallena vedanaṃ. Yu. dve
@salle vedanā.
Kilamati paridevati urattāḷī kandati sammohaṃ āpajjati so dve
vedanā vedayati kāyikañca cetasikañca . tassāyeva kho pana dukkhāya
vedanāya [1]- paṭighavā hoti tamenaṃ dukkhāya vedanāya paṭighavantaṃ yo
dukkhāya vedanāya paṭighānusayo so anuseti so dukkhāya vedanāya
phuṭṭho samāno kāmasukhaṃ abhinandati.
{370.1} Taṃ kissa hetu. Na hi [2]- bhikkhave pajānāti assutavā
puthujjano aññatra kāmasukhā dukkhāya vedanāya nissaraṇaṃ . tassa
kāmasukhaṃ abhinandato yo sukhāya vedanāya rāgānusayo so anuseti
so tāsaṃ vedanānaṃ samudayañca atthaṅgamañca assādañca ādīnavañca
nissaraṇañca yathābhūtaṃ nappajānāti . tassa tāsaṃ vedanānaṃ samudayañca
atthaṅgamañca assādañca ādīnavañca nissaraṇañca yathābhūtaṃ appajānato
yo adukkhamasukhāya vedanāya avijjānusayo so anuseti so sukhañce
vedanaṃ vedayati saññutto naṃ vedayati dukkhañce vedanaṃ vedayati
saññutto naṃ vedayati adukkhamasukhañce vedanaṃ vedayati saññutto
naṃ vedayati . ayaṃ vuccati bhikkhave assutavā puthujjano saññutto
jātiyā jarāya maraṇena sokehi paridevehi dukkhehi domanassehi
upāyāsehi saññutto dukkhasmāti vadāmi.
[371] Sutavā ca kho bhikkhave ariyasāvako dukkhāya vedanāya
phuṭṭho samāno na socati na kilamati na paridevati na urattāḷī kandati
na sammohaṃ āpajjati so ekaṃ vedanaṃ vedayati kāyikaṃ na cetasikaṃ.
@Footnote: 1 Ma. phuṭṭho samāno. evamuparipi. 2 Ma. so.
[372] Seyyathāpi bhikkhave purisaṃ sallena vijjheyyuṃ 1- na tamenaṃ
dutiyena sallena anuvedhaṃ vijjheyyuṃ . evaṃ hi so bhikkhave puriso
ekasallena vedanaṃ vedayati . evameva kho bhikkhave sutavā ariyasāvako
dukkhāya vedanāya phuṭṭho samāno na socati na kilamati na paridevati
na urattāḷī kandati na sammohaṃ āpajjati so ekaṃ vedanaṃ vedayati
kāyikaṃ na cetasikaṃ tassāyeva kho pana dukkhāya vedanāya [2]- paṭighavā
na hoti tamenaṃ dukkhāya vedanāya paṭighavantaṃ yo dukkhāya vedanāya
paṭighānusayo so nānuseti so dukkhāya vedanāya phuṭṭho samāno
kāmasukhaṃ nābhinandati.
{372.1} Taṃ kissa hetu . pajānāti [3]- so bhikkhave sutavā
ariyasāvako aññatra kāmasukhā dukkhāya vedanāya nissaraṇaṃ . tassa
kāmasukhaṃ nābhinandato yo sukhāya vedanāya rāgānusayo so nānuseti
so tāsaṃ vedanānaṃ samudayañca atthaṅgamañca assādañca ādīnavañca
nissaraṇañca yathābhūtaṃ pajānāti . tassa tāsaṃ vedanānaṃ samudayañca
atthaṅgamañca assādañca ādīnavañca nissaraṇañca yathābhūtaṃ pajānato
yo adukkhamasukhāya vedanāya avijjānusayo so nānuseti so sukhañce
vedanaṃ vedayati visaññutto naṃ vedayati dukkhañce vedanaṃ vedayati
visaññutto naṃ vedayati adukkhamasukhañce vedanaṃ vedayati visaññutto
naṃ vedayati . ayaṃ vuccati bhikkhave sutavā ariyasāvako visaññutto
jātiyā jarāya maraṇena sokehi paridevehi dukkhehi domanassehi
@Footnote: 1 Ma. vijjheyya . 2 Ma. phuṭṭho samāno . 3 Ma. hi.
Upāyāsehi visaññutto dukkhasmāti vadāmi . ayaṃ kho bhikkhave
viseso ayaṃ adhippāyaso idaṃ nānākaraṇaṃ sutavato ariyasāvakassa
assutavatā puthujjanenāti.
[373] Na so 1- vedanaṃ vedayati sapañño sukhampi dukkhampi bahussutopi
ayaṃ ca dhīrassa puthujjanena ayaṃ viseso 2- kusalassa hoti.
Saṅkhātadhammassa bahussutassa vipassato 3- lokamimaṃ parañca
iṭṭhassa dhammā na mathenti cittaṃ aniṭṭhato no paṭighātameti.
Tassānurodhā atha vā virodhā vidhamikā 4- atthagatā na santi
padañca ñatvā virajaṃ asokaṃ sammā pajānāti bhavassa pāragūti. Chaṭṭhaṃ.
[374] Ekaṃ samayaṃ bhagavā vesāliyaṃ viharati mahāvane
kūṭāgārasālāyaṃ . atha kho bhagavā sāyaṇhasamayaṃ paṭisallānā vuṭṭhito
yena gilānasālā tenupasaṅkami upasaṅkamitvā paññatte āsane
nisīdi . nisajja kho bhagavā bhikkhū āmantesi sato bhikkhave bhikkhu
sampajāno kālaṃ āgameyya ayaṃ vo amhākaṃ anusāsanī.
[375] Kathañca bhikkhave bhikkhu sato hoti . idha bhikkhave bhikkhu
kāye kāyānupassī viharati ātāpī sampajāno satimā vineyya loke
abhijjhādomanassaṃ . vedanāsu .pe. citte . dhammesu dhammānupassī
viharati ātāpī sampajāno satimā vineyya loke abhijjhādomanassaṃ .
@Footnote: 1 Ma. Yu. ayaṃ pāṭho natthi . 2 Ma. Yu. mahāviseso . 3 Yu. sampassato.
@4 Ma. Yu. vidhūpitā.
Evaṃ kho bhikkhave bhikkhu sato hoti.
[376] Kathañca bhikkhave bhikkhu sampajāno hoti . idha bhikkhave
bhikkhu abhikkante paṭikkante sampajānakārī hoti ālokite vilokite
sampajānakārī hoti sammiñjite pasārite sampajānakārī hoti
saṅghāṭipattacīvaradhāraṇe sampajānakārī hoti asite pīte khāyite
sāyite sampajānakārī hoti uccārapassāvakamme sampajānakārī
hoti gate ṭhite nisinne sutte jāgarite bhāsite tuṇhībhāve
sampajānakārī hoti . evaṃ kho bhikkhave bhikkhu sampajānakārī
hoti . sato bhikkhave bhikkhu sampajāno kālaṃ āgameyya ayaṃ
vo amhākaṃ anusāsanī.
[377] Tassa ce bhikkhave bhikkhuno evaṃ satassa sampajānassa
appamattassa ātāpino pahitattassa viharato uppajjati sukhā
vedanā so evaṃ pajānāti uppannā kho me ayaṃ sukhā vedanā sā ca
kho paṭicca no appaṭicca kiṃ paṭicca imameva kāyaṃ paṭicca ayaṃ kho pana
kāyo anicco saṅkhato paṭiccasamuppanno aniccaṃ kho pana saṅkhataṃ
paṭiccasamuppannaṃ kāyaṃ paṭicca uppannā sukhā vedanā kuto niccā
bhavissatīti . so kāye ca sukhāya ca vedanāya aniccānupassī
viharati vayānupassī viharati virāgānupassī viharati nirodhānupassī
viharati paṭinissaggānupassī viharati . tassa kāye ca sukhāya ca
vedanāya aniccānupassino viharato vayānupassino viharato .pe.
@Footnote: 1 Yu. sampajāno.
Paṭinissaggānupassino viharato yo kāye ca sukhāya ca vedanāya
rāgānusayo so pahiyyati.
[378] Tassa ce bhikkhave bhikkhuno evaṃ satassa sampajānassa
appamattassa ātāpino pahitattassa viharato uppajjati dukkhā
vedanā so evaṃ pajānāti uppannā kho myāyaṃ dukkhā vedanā
sā ca kho paṭicca no appaṭicca kiṃ paṭicca imameva kāyaṃ paṭicca
ayaṃ kho pana kāyo anicco saṅkhato paṭiccasamuppanno aniccaṃ
kho pana saṅkhataṃ paṭiccasamuppannaṃ kāyaṃ paṭicca uppannā dukkhā
vedanā kuto niccā bhavissatīti . so kāye ca dukkhāya ca vedanāya
aniccānupassī viharati vayānupassī viharati virāgānupassī viharati
nirodhānupassī viharati paṭinissaggānupassī viharati . tassa kāye
ca dukkhāya ca vedanāya aniccānupassino viharato .pe.
Paṭinissaggānupassino viharato yo kāye ca dukkhāya ca vedanāya
paṭighānusayo so pahiyyati.
[379] Tassa ce bhikkhave bhikkhuno evaṃ satassa sampajānassa
appamattassa ātāpino pahitattassa viharato uppajjati
adukkhamasukhā vedanā so evaṃ pajānāti uppannā kho myāyaṃ
adukkhamasukhā vedanā sā ca kho paṭicca no appaṭicca kiṃ paṭicca
imameva kāyaṃ paṭicca ayaṃ kho pana kāyo anicco saṅkhato paṭicca-
samuppanno aniccaṃ kho pana saṅkhataṃ paṭiccasamuppannaṃ kāyaṃ paṭicca
Uppannā adukkhamasukhā vedanā kuto niccā bhavissatīti . so
kāye ca adukkhamasukhāya ca vedanāya aniccānupassī viharati vayānupassī
viharati virāgānupassī viharati nirodhānupassī viharati paṭinissaggānupassī
viharati . tassa kāye ca adukkhamasukhāya ca vedanāya aniccānupassino
viharato .pe. paṭinissaggānupassino viharato yo kāye ca
adukkhamasukhāya ca vedanāya avijjānusayo so pahiyyati.
[380] So sukhañce vedanaṃ vedayati sā aniccāti pajānāti
anajjhositāti pajānāti anabhinanditāti pajānāti dukkhañce vedanaṃ
vedayati .pe. adukkhamasukhañce vedanaṃ vedayati sā aniccāti
pajānāti anajjhositāti pajānāti anabhinanditāti pajānāti .
So sukhañce vedanaṃ vedayati visaññutto naṃ vedayati dukkhañce
vedanaṃ vedayati visaññutto naṃ vedayati adukkhamasukhañce vedanaṃ
vedayati visaññutto naṃ vedayati . so kāyapariyantikaṃ vedanaṃ vedayamāno
kāyapariyantikaṃ vedanaṃ vedayāmīti pajānāti jīvitapariyantikaṃ
vedanaṃ vedayamāno jīvitapariyantikaṃ vedanaṃ vedayāmīti pajānāti
kāyassa bhedā uddhaṃ jīvitapariyādānā idheva sabbavedayitāni
anabhinanditāni sītibhavissantīti pajānāti.
[381] Seyyathāpi bhikkhave 1- telañca [2]- vaṭṭiñca paṭicca
telappadīpo jhāyeyya tasseva telassa ca vaṭṭiyā ca pariyādānā anāhāro
nibbāyeyya . evameva kho bhikkhave bhikkhu ce 3- kāyapariyantikaṃ vedanaṃ
@Footnote: 1 Yu. bhikkhu. 2 Ma. telañca paṭicca vaṭṭiṃ ca paṭicca. Yu. telañca paṭicca
@vaṭṭiñca. evamuparipi . 3 Ma. Yu. cesaddo natthi.
Vedayamāno kāyapariyantikaṃ vedanaṃ vedayāmīti pajānāti . Jīvitapariyantikaṃ
vedanaṃ vedayamāno jīvitapariyantikaṃ vedanaṃ vedayāmīti pajānāti .
Kāyassa bhedā uddhaṃ jīvitapariyādānā idheva sabbavedayitāni
anabhinanditāni sītibhavissantīti pajānātīti. Sattamaṃ.
[382] Ekaṃ samayaṃ bhagavā vesāliyaṃ viharati mahāvane
kūṭāgārasālāyaṃ . atha kho bhagavā sāyaṇhasamayaṃ paṭisallānā
vuṭṭhito yena gilānasālā tenupasaṅkami upasaṅkamitvā paññatte
āsane nisīdi . nisajja kho bhagavā bhikkhū āmantesi sato bhikkhave bhikkhu
sampajāno kālaṃ āgameyya ayaṃ vo amhākaṃ anusāsanī.
[383] Kathañca bhikkhave bhikkhu sato hoti . idha bhikkhave bhikkhu
kāye kāyānupassī viharati ātāpī sampajāno satimā vineyya
loke abhijjhādomanassaṃ . vedanāsu .pe. citte . dhammesu
dhammānupassī viharati ātāpī sampajāno satimā vineyya loke
abhijjhādomanassaṃ. Evaṃ kho bhikkhave bhikkhu sato hoti.
[384] Kathañca bhikkhave bhikkhu sampajāno hoti . idha bhikkhave
bhikkhu abhikkante paṭikkante sampajānakārī hoti .pe. bhāsite
tuṇhībhāve sampajānakārī hoti . evaṃ kho bhikkhave bhikkhu sampajāno
hoti . sato [1]- bhikkhave bhikkhu sampajāno kālaṃ āgameyya ayaṃ vo
amhākaṃ anusāsanī.
[385] Tassa ce bhikkhave bhikkhuno evaṃ satassa sampajānassa
@Footnote: 1 Yu. kho.
Appamattassa ātāpino pahitattassa viharato uppajjati sukhā
vedanā so evaṃ pajānāti uppannā kho myāyaṃ sukhā vedanā
sā ca kho paṭicca no appaṭicca kiṃ paṭicca imameva phassaṃ
paṭicca ayaṃ kho pana phasso anicco saṅkhato paṭiccasamuppanno
aniccaṃ kho pana saṅkhataṃ paṭiccasamuppannaṃ phassaṃ paṭicca uppannā
sukhā vedanā kuto niccā bhavissatīti . so phasse ca sukhāya ca
vedanāya aniccānupassī viharati vayānupassī virāgānupassī
nirodhānupassī paṭinissaggānupassī viharati . tassa phasse
ca sukhāya ca vedanāya aniccānupassino viharato vayānupassino
virāgānupassino nirodhānupassino paṭinissaggānupassino
viharato yo phasse ca sukhāya ca vedanāya rāgānusayo so pahiyyati.
[386] Tassa ce bhikkhave bhikkhuno evaṃ satassa .pe. Viharato
uppajjati dukkhā vedanā .pe. uppajjati adukkhamasukhā vedanā
so evaṃ pajānāti uppannā kho myāyaṃ adukkhamasukhā vedanā sā
ca kho paṭicca no appaṭicca kiṃ paṭicca imameva phassaṃ paṭicca
ayaṃ kho pana phasso anicco saṅkhato paṭiccasamuppanno .pe.
(yathā purimasutte vitthāro tathā vitthāretabbo) kāyassa
bhedā uddhaṃ jīvitapariyādānā idheva sabbavedayitāni anabhinanditāni
sītibhavissantīti pajānāti.
[387] Seyyathāpi bhikkhave telañca vaṭṭiñca paṭicca telappadīpo
Jhāyeyya tasseva telassa ca vaṭṭiyā ca pariyādānā anāhāro
nibbāyeyya . evameva kho bhikkhave bhikkhu kāyapariyantikaṃ vedanaṃ
vedayamāno kāyapariyantikaṃ vedanaṃ vedayāmīti pajānāti . Jīvitapariyantikaṃ
vedanaṃ vedayamāno jīvitapariyantikaṃ vedanaṃ vedayāmīti
pajānāti . kāyassa bhedā uddhaṃ jīvitapariyādānā idheva sabbavedayitāni
anabhinanditāni sītibhavissantīti pajānātīti. Aṭṭhamaṃ.
[388] Tisso imā bhikkhave vedanā aniccā saṅkhatā
paṭiccasamuppannā khayadhammā vayadhammā virāgadhammā nirodhadhammā .
Katamā tisso . sukhā vedanā dukkhā vedanā adukkhamasukhā vedanā.
Imā kho bhikkhave tisso vedanā aniccā saṅkhatā paṭiccasamuppannā
khayadhammā vayadhammā virāgadhammā nirodhadhammāti. Navamaṃ.
[389] Tisso imā bhikkhave vedanā phassajā phassamūlakā phassanidānā
phassapaccayā . katamā tisso . sukhā vedanā dukkhā
vedanā adukkhamasukhā vedanā . sukhavedaniyaṃ bhikkhave phassaṃ paṭicca
uppajjati sukhā vedanā tasseva sukhavedaniyassa phassassa nirodhā
yaṃ tajjaṃ vedayitaṃ sukhavedaniyaṃ phassaṃ paṭicca uppannā sukhā vedanā
sā nirujjhati sā vūpasamati 1- . dukkhavedaniyaṃ bhikkhave phassaṃ paṭicca
uppajjati dukkhā vedanā tasseva dukkhavedaniyassa phassassa nirodhā
yaṃ tajjaṃ vedayitaṃ dukkhavedaniyaṃ phassaṃ paṭicca uppannā dukkhā vedanā
sā nirujjhati sā vūpasamati . adukkhamasukhavedaniyaṃ bhikkhave phassaṃ
@Footnote: 1 Ma. Yu. vūpasammati. evamuparipi.
Paṭicca uppajjati adukkhamasukhā vedanā tasseva adukkhamasukhavedaniyassa
phassassa nirodhā yaṃ tajjaṃ vedayitaṃ adukkhamasukhavedaniyaṃ phassaṃ paṭicca
uppannā adukkhamasukhā vedanā sā nirujjhati sā vūpasamati.
[390] Seyyathāpi bhikkhave dvinnaṃ kaṭṭhānaṃ saṅghaṭṭā 1- tassa
samodhānā usmā jāyati tejo abhinibbattati tesaṃyeva dvinnaṃ kaṭṭhānaṃ
nānābhāvā vinikkhepā yā tajjā usmā sā nirujjhati sā
vūpasamati . evameva kho bhikkhave imā tisso vedanā phassajā
phassamūlakā phassanidānā phassapaccayā tajjaṃ phassaṃ paṭicca tajjā 2-
vedanā uppajjati tajjassa 3- phassassa nirodhā tajjā 2- vedanā
nirujjhatīti. Dasamaṃ.
Vedanāsaṃyuttassa paṭhamakasagāthavaggo.
Tassuddānaṃ
samādhisukhāya 4- pahānena pātālaṃ daṭṭhabbena ca 5-
sallatthena [6]- gelaññaṃ 7- aniccaphassamūlakāti.
------------
@Footnote: 1 Ma. Yu. saṅghaṭṭanasamodhānā. 2-3 Yu. āmeṇḍitaṃ . 4 Ma. samādhisukhaṃ.
@5 Yu. casaddo natthi. 6 Yu. ca . 7 Ma. sallena ceva gelaññā.
Rahogatavaggo dutiyo
[391] Atha kho aññataro bhikkhu yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinno kho so bhikkhu bhagavantaṃ etadavoca idha mayhaṃ bhante
rahogatassa paṭisallīnassa evaṃ cetaso parivitakko udapādi tisso
vedanā vuttā bhagavatā sukhā vedanā dukkhā vedanā adukkhamasukhā
vedanā imā tisso vedanā vuttā bhagavatā . vuttaṃ kho panetaṃ
bhagavatā yaṅkiñci vedayitaṃ taṃ dukkhasminti kiṃ nu kho etaṃ bhagavatā
sandhāya bhāsitaṃ yaṅkiñci vedayitaṃ taṃ dukkhasminti.
{391.1} Sādhu sādhu bhikkhu tisso imā bhikkhu vedanā vuttā
mayā sukhā vedanā dukkhā vedanā adukkhamasukhā vedanā imā tisso
vedanā vuttā mayā . vuttaṃ kho panetaṃ bhikkhu mayā yaṅkiñci vedayitaṃ taṃ
dukkhasminti taṃ kho panetaṃ bhikkhu mayā saṅkhārānaṃyeva aniccataṃ sandhāya
bhāsitaṃ yaṅkiñci vedayitaṃ taṃ dukkhasminti . taṃ kho panetaṃ bhikkhu mayā
saṅkhārānaṃyeva khayadhammataṃ vayadhammataṃ virāgadhammataṃ nirodhadhammataṃ
vipariṇāmadhammataṃ sandhāya bhāsitaṃ yaṅkiñci vedayitaṃ taṃ dukkhasminti.
[392] Atha kho pana bhikkhu mayā anupubbasaṅkhārānaṃ nirodho
akkhāto paṭhamajjhānaṃ samāpannassa vācā niruddhā hoti dutiyajjhānaṃ
Samāpannassa vitakkavicārā niruddhā honti tatiyajjhānaṃ samāpannassa
pīti niruddhā hoti catutthajjhānaṃ samāpannassa assāsapassāsā niruddhā
honti ākāsānañcāyatanaṃ samāpannassa rūpasaññā niruddhā hoti
viññāṇañcāyatanaṃ samāpannassa ākāsānañcāyatanasaññā niruddhā
hoti ākiñcaññāyatanaṃ samāpannassa viññāṇañcāyatanasaññā niruddhā
hoti nevasaññānāsaññāyatanaṃ samāpannassa ākiñcaññāyatanasaññā
niruddhā hoti saññāvedayitanirodhaṃ samāpannassa saññā ca vedanā ca niruddhā
honti. Khīṇāsavassa bhikkhuno rāgo niruddho hoti doso niruddho hoti moho
niruddho hoti.
[393] Atha kho bhikkhu mayā anupubbasaṅkhārānaṃ vūpasamo akkhāto
paṭhamajjhānaṃ samāpannassa vācā vūpasantā hoti dutiyajjhānaṃ samāpannassa
vitakkavicārā vūpasantā honti .pe. saññāvedayitanirodhaṃ samāpannassa
saññā ca vedanā ca vūpasantā honti. Khīṇāsavassa bhikkhu rāgo vūpasanto
hoti doso vūpasanto hoti moho vūpasanto hoti.
[394] Chayimā bhikkhu passaddhiyo paṭhamajjhānaṃ samāpannassa
vācā paṭippassaddhā hoti dutiyajjhānaṃ samāpannassa vitakkavicārā
paṭippassaddhā honti tatiyajjhānaṃ samāpannassa pīti
paṭippassaddhā hoti catutthajjhānaṃ samāpannassa assāsapassāsā
Paṭippassaddhā honti saññāvedayitanirodhaṃ samāpannassa saññā
ca vedanā ca paṭippassaddhā honti . khīṇāsavassa bhikkhuno
rāgo paṭippassaddho hoti doso paṭippassaddho hoti moho
paṭippassaddho hotīti. Paṭhamaṃ.
[395] Seyyathāpi bhikkhave ākāsepi 1- vividhā vātā vāyanti
puratthimāpi vātā vāyanti pacchimāpi vātā vāyanti uttarāpi
vātā vāyanti dakkhiṇāpi vātā vāyanti sarajāpi vātā
vāyanti arajāpi vātā vāyanti sītāpi vātā vāyanti uṇhāpi
vātā vāyanti parittāpi vātā vāyanti adhimattāpi vātā
vāyanti . evameva kho bhikkhave imasmiṃ kāyasmiṃ vividhā vedanā
uppajjanti sukhāpi vedanā uppajjati dukkhāpi vedanā uppajjati
adukkhamasukhāpi vedanā uppajjatīti.
[396] Yathāpi vātā ākāse vāyanti vividhā puthū 2-
puratthimā pacchimā cāpi uttarā atha dakkhiṇā.
Sarajā arajā cāpi 3- sītā uṇhā ca ekadā
adhimattā parittā ca puthū 2- vāyanti mālutā.
Tathevimasmiṃ 4- kāyasmiṃ samuppajjanti vedanā
sukhadukkhasamuppatti adukkhamasukhā ca yā.
Yatova 5- bhikkhu ātāpī sampajāno nirujjhati 6-
tato so vedanā sabbā parijānāti paṇḍito.
@Footnote: 1 Ma. Yu. ākāse . 2 Yu. puthu . 3 Ma. capi. Yu. vāpi. 4 Yu. tathevimasmiṃpi.
@5 Ma. Yu. yato ca . 6 Ma. sampajaññaṃ na riñcati. Yu. sampajāno nirūpadhi.
So vedanā pariññāya diṭṭhe dhamme anāsavo
kāyassa bhedā dhammaṭṭho saṅkhaṃ nūpeti 1- vedagūti. Dutiyaṃ.
[397] Seyyathāpi bhikkhave ākāse vividhā vātā vāyanti
puratthimāpi vātā vāyanti .pe. adhimattāpi vātā vāyanti .
Evameva kho bhikkhave imasmiṃ kāyasmiṃ vividhā vedanā uppajjanti
sukhāpi vedanā uppajjati dukkhāpi vedanā uppajjati adukkhamasukhāpi
vedanā uppajjatīti. Tatiyaṃ.
[398] Seyyathāpi bhikkhave āgantukāgāraṃ tattha puratthimāyapi
disāya āgantvā vāsaṃ kappenti pacchimāyapi disāya āgantvā
vāsaṃ kappenti uttarāyapi disāya āgantvā vāsaṃ kappenti
dakkhiṇāyapi disāya āgantvā vāsaṃ kappenti khattiyāpi āgantvā
vāsaṃ kappenti brāhmaṇāpi āgantvā vāsaṃ kappenti vessāpi
āgantvā vāsaṃ kappenti suddāpi āgantvā vāsaṃ kappenti .
Evameva kho bhikkhave imasmiṃ kāyasmiṃ vividhā vedanā uppajjanti
sukhāpi vedanā uppajjati dukkhāpi vedanā uppajjati adukkhamasukhāpi
vedanā uppajjati sāmisāpi sukhā vedanā uppajjati sāmisāpi
dukkhā vedanā uppajjati sāmisāpi adukkhamasukhā vedanā uppajjati
nirāmisāpi sukhā vedanā uppajjati nirāmisāpi dukkhā vedanā
uppajjati nirāmisāpi adukkhamasukhā vedanā uppajjatīti. Catutthaṃ.
@Footnote: 1 Ma. Yu. saṅkhyaṃ nopeti.
[399] Atha kho āyasmā ānando yena bhagavā tenupasaṅkami
upasaṅkamitvā .pe. ekamantaṃ nisinno kho āyasmā ānando
bhagavantaṃ etadavoca katamā nu kho bhante vedanā katamo vedanāsamudayo
katamo vedanānirodho katamā vedanānirodhagāminī paṭipadā
ko vedanāya assādo ko vedanāya 1- ādīnavo kiṃ vedanāya 1-
nissaraṇanti . tisso imā ānanda vedanā sukhā vedanā dukkhā
vedanā adukkhamasukhā vedanā . imā vuccati ānanda vedanā
phassasamudayā vedanāsamudayo phassanirodhā vedanānirodho ayameva
ariyo aṭṭhaṅgiko maggo vedanānirodhagāminī paṭipadā . seyyathīdaṃ .
Sammādiṭṭhi .pe. sammāsamādhi . yaṃ vedanaṃ paṭicca uppajjati
sukhaṃ somanassaṃ ayaṃ vedanāya assādo . yā vedanā aniccā
dukkhā vipariṇāmadhammā ayaṃ vedanāya ādīnavo . yo vedanāya
chandarāgavinayo chandarāgappahānaṃ idaṃ vedanāya nissaraṇaṃ.
[400] Atha kho panānanda mayā anupubbasaṅkhārānaṃ nirodho
akkhāto paṭhamajjhānaṃ samāpannassa vācā niruddhā hoti .pe.
Saññāvedayitanirodhaṃ samāpannassa saññā ca vedanā ca niruddhā
honti . khīṇāsavassa bhikkhuno rāgo niruddho hoti doso
niruddho hoti moho niruddho hoti.
[401] Atha kho panānanda mayā anupubbasaṅkhārānaṃ vūpasamo
akkhāto paṭhamajjhānaṃ samāpannassa vācā vūpasantā hoti .pe.
@Footnote: 1 Ma. Yu. ime pāṭhā na dissanti. evamuparipi.
Saññāvedayitanirodhaṃ samāpannassa saññā ca vedanā ca vūpasantā
honti . khīṇāsavassa bhikkhuno rāgo vūpasanto hoti doso
vūpasanto hoti moho vūpasanto hoti.
[402] Atha kho panānanda mayā anupubbasaṅkhārānaṃ paṭippassaddhi 1-
akkhātā paṭhamajjhānaṃ samāpannassa vācā paṭippassaddhā hoti
.pe. ākāsānañcāyatanaṃ samāpannassa rūpasaññā paṭippassaddhā
hoti viññāṇañcāyatanaṃ samāpannassa ākāsānañcāyatanasaññā
paṭippassaddhā hoti ākiñcaññāyatanaṃ samāpannassa
viññāṇañcāyatanasaññā paṭippassaddhā hoti
nevasaññānāsaññāyatanaṃ samāpannassa ākiñcaññāyatanasaññā
paṭippassaddhā hoti saññāvedayitanirodhaṃ samāpannassa saññā ca
vedanā ca paṭippassaddhā honti . khīṇāsavassa bhikkhuno rāgo
paṭippassaddho hoti doso paṭippassaddho hoti moho paṭippassaddho
hotīti. Pañcamaṃ.
[403] Atha kho āyasmā ānando yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinnaṃ kho āyasmantaṃ ānandaṃ bhagavā etadavoca katamā nu kho
ānanda vedanā katamo vedanāsamudayo katamo vedanānirodho katamā
vedanānirodhagāminī paṭipadā ko vedanāya assādo ko vedanāya
ādīnavo kiṃ vedanāya nissaraṇanti . bhagavaṃmūlakā no bhante dhammā
bhagavaṃnettikā bhagavaṃpaṭisaraṇā sādhu bhante bhagavantaññeva paṭibhātu
@Footnote: 1 Yu. passaddhi.
Etassa bhāsitassa attho bhagavato sutvā bhikkhū dhāressantīti .
Tenahi ānanda suṇohi sādhukaṃ manasikarohi bhāsissāmīti .
Evaṃ bhanteti kho āyasmā ānando bhagavato paccassosi .
Bhagavā etadavoca tisso imā ānanda vedanā sukhā vedanā
dukkhā vedanā adukkhamasukhā vedanā . imā vuccanti ānanda
vedanā .pe. phassasamudayā .pe. khīṇāsavassa bhikkhuno rāgo
paṭippassaddho hoti doso paṭippassaddho hoti moho
paṭippassaddho hotīti. Chaṭṭhaṃ.
[404] Atha kho sabbahulā bhikkhū yena bhagavā tenupasaṅkamiṃsu
upasaṅkamitvā bhagavantaṃ abhivādetvā ekamantaṃ nisīdiṃsu . ekamantaṃ
nisinnā kho te bhikkhū bhagavantaṃ etadavocuṃ katamā nu kho bhante vedanā
katamo vedanāsamudayo katamo vedanānirodho katamā vedanānirodhagāminī
paṭipadā ko vedanāya assādo ko vedanāya ādīnavo kiṃ
vedanāya nissaraṇanti . tisso imā bhikkhave vedanā sukhā vedanā
dukkhā vedanā adukkhamasukhā vedanā . imā vuccanti bhikkhave
vedanā . phassasamudayā vedanāsamudayo phassanirodhā vedanānirodho
ayameva ariyo aṭṭhaṅgiko maggo vedanānirodhagāminī paṭipadā .
Seyyathīdaṃ . sammādiṭṭhi .pe. sammāsamādhi . yaṃ vedanaṃ paṭicca
uppajjati sukhaṃ somanassaṃ ayaṃ vedanāya assādo . yā vedanā
aniccā dukkhā vipariṇāmadhammā ayaṃ vedanāya ādīnavo . yo
Vedanāya chandarāgavinayo chandarāgappahānaṃ idaṃ vedanāya nissaraṇaṃ.
[405] Atha kho pana bhikkhave mayā anupubbasaṅkhārānaṃ nirodho
akkhāto paṭhamajjhānaṃ samāpannassa vācā niruddhā hoti .pe.
Khīṇāsavassa bhikkhuno rāgo niruddho hoti doso niruddho hoti
moho niruddho hoti.
[406] Atha kho pana bhikkhave mayā anupubbasaṅkhārānaṃ vūpasamo
akkhāto paṭhamajjhānaṃ samāpannassa vācā vūpasantā hoti .pe.
Khīṇāsavassa bhikkhuno rāgo vūpasanto hoti doso vūpasanto hoti
moho vūpasanto hoti.
[407] Chayimā bhikkhave passaddhiyo . paṭhamajjhānaṃ samāpannassa
vācā paṭippassaddhā hoti dutiyajjhānaṃ samāpannassa vitakkavicārā
paṭippassaddhā honti tatiyajjhānaṃ samāpannassa pīti paṭippassaddhā
hoti catutthajjhānaṃ samāpannassa assāsapassāsā paṭippassaddhā
honti saññāvedayitanirodhaṃ samāpannassa saññā ca vedanā ca
paṭippassaddhā honti . khīṇāsavassa bhikkhuno rāgo paṭippassaddho
hoti doso paṭippassaddho hoti moho paṭippassaddho hotīti .
Sattamaṃ.
[408] Atha kho sambahulā bhikkhū yena bhagavā tenupasaṅkamiṃsu
upasaṅkamitvā .pe. ekamantaṃ nisinne kho te bhikkhū bhagavā
etadavoca katamā nu kho bhakkhave vedanā katamo vedanāsamudayo
Katamo vedanānirodho katamā vedanānirodhagāminī paṭipadā ko
vedanāya assādo ko vedanāya ādīnavo kiṃ vedanāya nissaraṇanti.
Bhagavaṃmūlakā no bhante dhammā .pe. tisso imā bhikkhave vedanā
sukhā vedanā dukkhā vedanā adukkhamasukhā vedanā . imā vuccanti
bhikkhave vedanā . phassasamudayā (yathā purimasuttanto vitthārito
tathā vitthāretabbo 1-). Aṭṭhamaṃ.
The Pali Tipitaka in Roman Character Volume 18 page 254-276.
http://84000.org/tipitaka/pali/roman_item_s.php?book=18&item=359&items=50
Classified by [Item Number] :-
http://84000.org/tipitaka/pali/roman_item_s.php?book=18&item=359&items=50&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=18&item=359&items=50
Compare with The Royal Version of Thai Tipitaka :-
http://84000.org/tipitaka/read/byitem_s.php?book=18&item=359&items=50
Study Atthakatha :-
http://84000.org/tipitaka/attha/attha.php?b=18&i=359
The Pali Atthakatha in Thai :-
http://84000.org/tipitaka/atthapali/read_th.php?B=13&A=2962
The Pali Atthakatha in Roman :-
http://84000.org/tipitaka/atthapali/read_rm.php?B=13&A=2962
Contents of The Tipitaka Volume 18
http://84000.org/tipitaka/read/?index_18
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
