[137] 47 Ekaṃ samayaṃ bhagavā sāvatthiyaṃ viharati pubbārāme
migāramātupāsāde . athakho visākhā migāramātā .pe. Ekamantaṃ nisīdi.
Ekamantaṃ nisinnaṃ kho visākhaṃ migāramātaraṃ bhagavā etadavoca aṭṭhahi
kho visākhe dhammehi samannāgato mātugāmo kāyassa bhedā parammaraṇā
manāpakāyikānaṃ devānaṃ sahabyataṃ upapajjati . katamehi aṭṭhahi idha
visākhe mātugāmo yassa mātāpitaro bhattuno denti atthakāmā
hitesino anukampakā anukampaṃ upādāya tassa hoti pubbuṭṭhāyinī
pacchānipātinī kiṃkārapaṭissāvinī manāpacārinī piyavādinī .pe. cāgavatī
@Footnote: 1 Ma. issācārenātipi.
Kho pana hoti vigatamalamaccherena cetasā agāraṃ ajjhāvasati muttacāgī
payatapāṇī vossaggaratā yācayogā dānasaṃvibhāgaratā. Imehi kho visākhe
aṭṭhahi dhammehi samannāgato mātugāmo kāyassa bhedā parammaraṇā
manāpakāyikānaṃ devānaṃ sahabyataṃ upapajjatīti.
Yo naṃ bharati sabbadā niccaṃ ātāpi ussuko
taṃ sabbakāmaharaṃ posaṃ bhattāraṃ nātimaññati
na cāpi sotthi bhattāraṃ issāvādena rosaye
bhattu ca garuno sabbe paṭipūjeti paṇḍitā
uṭṭhāhikā analasā saṅgahitaparijjanā
bhattu manāpañcarati sambhataṃ anurakkhati
yā evaṃ vattati nārī bhattu chandavasānugā
manāpā nāma te devā yattha sā upapajjatīti.
[138] 48 Ekaṃ samayaṃ bhagavā bhaggesu viharati suṃsumāragire bhesakaḷāvane
migadāye . athakho nakulamātā gahapatānī yena bhagavā tenupasaṅkami
upasaṅkamitvā .pe. nisīdi . ekamantaṃ nisinnaṃ kho nakulamātaraṃ
gahapatāniṃ bhagavā etadavoca aṭṭhahi kho nakulamāte dhammehi
samannāgato mātugāmo kāyassa bhedā parammaraṇā manāpakāyikānaṃ
devānaṃ sahabyataṃ upapajjati . katamehi aṭṭhahi idha nakulamāte
mātugāmo yassa mātāpitaro bhattuno denti atthakāmā hitesino
anukampakā anukampaṃ upādāya tassa hoti pubbuṭṭhāyinī pacchānipātinī
Kiṃkārapaṭissāvinī manāpacārinī piyavādinī .pe. cāgavatī kho pana
hoti vigatamalamaccherena cetasā agāraṃ ajjhāvasati muttacāgī payatapāṇī
vossaggaratā yācayogā dānasaṃvibhāgaratā . imehi kho nakulamāte
aṭṭhahi dhammehi samannāgato mātugāmo kāyassa bhedā parammaraṇā
manāpakāyikānaṃ devānaṃ sahabyataṃ upapajjatīti.
Yo naṃ bharati sabbadā niccaṃ ātāpi ussuko
taṃ sabbakāmaharaṃ posaṃ bhattāraṃ nātimaññati
na cāpi sotthi bhattāraṃ issāvādena rosaye
bhattu ca garuno sabbe paṭipūjeti paṇḍitā
uṭṭhāhikā analasā saṅgahitaparijjanā
bhattu manāpañcarati sambhataṃ anurakkhati
yā evaṃ vattati nārī bhattu chandavasānugā
manāpā nāma te devā yattha sā upapajjatīti.
The Pali Tipitaka in Roman Character Volume 23 page 273-275.
http://84000.org/tipitaka/pali/roman_item_s.php?book=23&item=137&items=2
Classified by [Item Number] :-
http://84000.org/tipitaka/pali/roman_item_s.php?book=23&item=137&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=23&item=137&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=23&item=137&items=2
Study Atthakatha :-
http://84000.org/tipitaka/attha/attha.php?b=23&i=137
Contents of The Tipitaka Volume 23
http://84000.org/tipitaka/read/?index_23
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
