[165] Ekaṃ samayaṃ bhagavā pāvāyaṃ viharati cundassa kammāraputtassa
ambavane . athakho cundo kammāraputto yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi .
@Footnote: 1 Ma. byāpannacittassa. 2 Ma. Yu. ayaṃ dhammoti atthi.
Ekamantaṃ nisinnaṃ kho cundaṃ kammāraputtaṃ bhagavā etadavoca kassa
no tvaṃ cunda soceyyāni rocesīti. Brāhmaṇā bhante pacchābhūmakā 1-
kamaṇḍalukā sevālamālakā 2- aggiparicārikā udakorohakā
soceyyāni paññāpenti 3- tesāhaṃ [4]- rocemīti.
{165.1} Yathākathaṃ pana cunda brāhmaṇā pacchābhūmakā kamaṇḍalukā
sevālamālakā aggiparicārikā udakorohakā soceyyāni paññāpentīti.
Idha bhante brāhmaṇā pacchābhūmakā kamaṇḍalukā sevālamālakā
aggiparicārikā udakorohakā te sāvake 5- evaṃ samādapenti ehi tvaṃ
ambho purisa sakālasseva 6- uṭṭhahanto sayanamhā paṭhaviṃ āmaseyyāsi
no ce paṭhaviṃ āmaseyyāsi allagomayāni āmaseyyāsi no ce
allagomayāni āmaseyyāsi haritāni tiṇāni āmaseyyāsi no ce
haritāni tiṇāni āmaseyyāsi aggiṃ paricareyyāsi no ce aggiṃ
paricareyyāsi pañjaliko ādiccaṃ namasseyyāsi no ce pañjaliko
ādiccaṃ namasseyyāsi sāyatatiyakaṃ udakaṃ oroheyyāsīti evaṃ kho
bhante brāhmaṇā pacchābhūmakā kamaṇḍalukā sevālamālakā
aggiparicārikā udakorohakā soceyyāni paññāpenti tesāhaṃ
soceyyāni rocemīti.
{165.2} Aññathā kho cunda brāhmaṇā pacchābhūmakā kamaṇḍalukā
sevālamālakā aggiparicārikā udakorohakā soceyyāni paññāpenti
aññathā ca pana ariyassa vinaye soceyyaṃ hotīti. Yathākathaṃ pana bhante
ariyassa vinaye soceyyaṃ hoti sādhu me bhante bhagavā tathā dhammaṃ desetu
yathā ariyassa vinaye soceyyaṃ hotīti . tenahi cunda suṇāhi sādhukaṃ
@Footnote: 1 Po. pacchābhūmikā. 2 Ma. sevālamālikā. 3 paññapentipi pāṭho.
@4 Po. Ma. Yu. soceyyānīti atthi. 5 Ma. Yu. sāvakaṃ. 6 kālasseva itipi pāṭho.
Manasikarohi bhāsissāmīti . evaṃ bhanteti kho cundo kammāraputto
bhagavato paccassosi . bhagavā etadavoca tividhaṃ kho cunda kāyena
asoceyyaṃ hoti catubbidhaṃ vācāya asoceyyaṃ hoti tividhaṃ manasā
asoceyyaṃ hoti.
Kathañca cunda tividhaṃ kāyena asoceyyaṃ hoti idha cunda ekacco
pāṇātipātī hoti luddho 1- lohitapāṇī hatapahate niviṭṭho
adayāpanno pāṇabhūtesu adinnādāyī hoti yantaṃ parassa paravittūpakaraṇaṃ
gāmagataṃ vā araññagataṃ vā adinnaṃ theyyasaṅkhātaṃ ādātā
hoti kāmesu micchācārī hoti yā tā māturakkhitā piturakkhitā
bhāturakkhitā bhaginirakkhitā ñātirakkhitā [2]- dhammarakkhitā sasāmikā
saparidaṇḍā antamaso mālāguṇaparikkhitāpi 3- tathārūpāsu cārittaṃ
āpajjitā hoti evaṃ cunda tividhaṃ kāyena asoceyyaṃ hoti.
Kathañca cunda catubbidhaṃ vācāya asoceyyaṃ hoti idha cunda ekacco
musāvādī hoti sabhaggato 4- vā parisaggato vā ñātimajjhaggato
vā pūgamajjhaggato vā rājakulamajjhaggato vā abhinīto sakkhiṃ puṭṭho
ehi bho purisa yaṃ jānāsi taṃ vadehīti so ajānaṃ vā āha 5-
jānāmīti jānaṃ vā āha na jānāmīti apassaṃ vā āha passāmīti
passaṃ vā āha na passāmīti iti attahetu vā parahetu vā
āmisakiñcikkhahetu vā sampajānamusā bhāsitā hoti pisuṇavāco
hoti ito sutvā amutra akkhātā imesaṃ bhedāya amutra vā sutvā
@Footnote: 1 Ma. Yu. luddo. 2 Ma. gottarakkhitā. 3 Po. mālāgula ... Ma. Yu. mālāguḷa ....
@4 Yu. sabhāgato vā. 5 Po. Yu. sabbattha āhāti natthi.
Imesaṃ akkhātā amūsaṃ bhedāya iti samaggānaṃ vā bhettā bhinnānaṃ 1-
vā anuppadātā vaggārāmo vaggarato vagganandī vaggakaraṇiṃ vācaṃ
bhāsitā hoti pharusavāco hoti yā sā vācā aṇḍakā kakkasā
parakaṭukā parābhisajjanī kodhasāmantā asamādhisaṃvattanikā tathārūpiṃ vācaṃ
bhāsitā hoti samphappalāpī hoti akālavādī abhūtavādī anatthavādī
adhammavādī avinayavādī anidhānavatiṃ vācaṃ bhāsitā hoti akālena anapadesaṃ
apariyantavatiṃ anatthasañhitaṃ evaṃ kho cunda catubbidhaṃ vācāya asoceyyaṃ
hoti.
Kathañca cunda tividhaṃ manasā asoceyyaṃ hoti idha cunda ekacco abhijjhālu
hoti yantaṃ parassa paravittūpakaraṇaṃ taṃ abhijjhitā hoti aho vata yaṃ parassa
taṃ mama assāti byāpannacitto hoti paduṭṭhamanasaṅkappo ime sattā
haññantu vā bhijjantu vā ucchijjantu vā vinassantu vā mā vā
ahesunti 2- micchādiṭṭhiko hoti viparittadassano natthi dinnaṃ natthi
yiṭṭhaṃ natthi hutaṃ natthi sukatadukkatānaṃ kammānaṃ phalaṃ vipāko natthi
ayaṃ loko natthi paro loko natthi mātā natthi pitā natthi sattā
opapātikā natthi loke samaṇabrāhmaṇā sammaggatā
sammāpaṭipannā ye imañca lokaṃ parañca lokaṃ sayaṃ abhiññā
sacchikatvā pavedentīti evaṃ kho cunda tividhaṃ manasā asoceyyaṃ hoti.
{165.3} Ime kho cunda dasa akusalakammapathā imehi kho
cunda dasahi akusalehi kammapathehi samannāgato sakālasseva
@Footnote: 1 Po. bheditā. 2 Po. Yu. ahesuṃ iti vāti.
Uṭṭhahanto sayanamhā paṭhaviṃ cepi āmasati asuciyeva hoti no cepi
paṭhaviṃ āmasati asuciyeva hoti allāni cepi gomayāni āmasati
asuciyeva hoti no cepi allāni gomayāni āmasati asuciyeva hoti
haritāni cepi tiṇāni āmasati asuciyeva hoti no cepi haritāni
tiṇāni āmasati asuciyeva hoti aggiṃ cepi paricarati asuciyeva hoti
no cepi aggiṃ paricarati asuciyeva hoti pañjaliko cepi ādiccaṃ
namassati asuciyeva hoti no ce pañjaliko ādiccaṃ namassati asuciyeva
hoti sāyatatiyakaṃ cepi udakaṃ orohati asuciyeva hoti no cepi
sāyatatiyakaṃ udakaṃ orohati asuciyeva hoti taṃ kissa hetu ime cunda
dasa akusalakammapathā asuciceva 1- asucikaraṇā ca imesaṃ pana cunda
dasannaṃ akusalānaṃ kammapathānaṃ samannāgamanahetu nirayo paññāyati
tiracchānayoni paññāyati pittivisayo paññāyati yā vā panaññāpi
kāci duggati 2- hoti.
{165.4} Tividhaṃ kho cunda kāyena soceyyaṃ hoti catubbidhaṃ vācāya
soceyyaṃ hoti tividhaṃ manasā soceyyaṃ hoti . kathañca cunda tividhaṃ
kāyena soceyyaṃ hoti idha cunda ekacco pāṇātipātaṃ pahāya
pāṇātipātā paṭivirato hoti nihitadaṇḍo nihitasattho
lajjī byāpanno sabbapāṇabhūtahitānukampī viharati
adinnādānaṃ pahāya adinnādānā paṭivirato hoti yantaṃ parassa
paravittūpakaraṇaṃ gāmagataṃ vā araññagataṃ vā taṃ adinnaṃ theyyasaṅkhātaṃ
anādātā hoti kāmesu micchācāraṃ pahāya kāmesu micchācārā
@Footnote: 1 Ma. Yu. asuciyeva honti. 2 Ma. Yu. duggatiyo. hotīti pāṭho natthi.
Paṭivirato hoti yā tā māturakkhitā piturakkhitā bhāturakkhitā bhaginirakkhitā
ñātirakkhitā dhammarakkhitā sasāmikā saparidaṇḍā antamaso
mālāguṇaparikkhitāpi tathārūpāsu na cārittaṃ āpajjitā hoti evaṃ
kho cunda tividhaṃ kāyena soceyyaṃ hoti.
{165.5} Kathañca cunda catubbidhaṃ vācāya soceyyaṃ hoti idha cunda
ekacco musāvādaṃ pahāya musāvādā paṭivirato hoti sabhaggato vā
parisaggato vā ñātimajjhaggato vā pūgamajjhaggato vā rājakulamajjhaggato
vā abhinīto sakkhiṃ puṭṭho ehi bho purisa yaṃ jānāsi taṃ vadehīti so ajānaṃ
vā āha na jānāmīti jānaṃ vā āha jānāmīti apassaṃ vā āha na
passāmīti passaṃ vā āha passāmīti iti attahetu vā parahetu vā
āmisakiñcikkhahetu vā na sampajānamusā bhāsitā hoti pīsuṇaṃ vācaṃ
pahāya pisuṇāya vācāya paṭivirato hoti na ito sutvā amutra akkhātā
imesaṃ bhedāya amutra vā sutvā na imesaṃ akkhātā amūsaṃ bhedāya iti
bhinnānaṃ vā sandhātā sahitānaṃ vā anuppadātā samaggārāmo samaggarato
samagganandī samaggakaraṇī vācaṃ bhāsitā hoti pharusaṃ vācaṃ pahāya pharusāya
vācāya paṭivirato hoti yā sā vācā nelā kaṇṇasukhā pemaniyā
hadayaṅgamā porī bahujanakantā bahujanamanāpā tathārūpiṃ vācaṃ bhāsitā hoti
samphappalāpaṃ pahāya samphappalāpā paṭivirato hoti kālavādī
bhūtavādī atthavādī dhammavādī vinayaādī nidhānavatiṃ vācaṃ
bhāsitā hoti kālena sāpadesaṃ pariyantavatiṃ atthasañhitaṃ evaṃ kho
Cunda catubbidhaṃ vācāya soceyyaṃ hoti.
{165.6} Kathañca cunda tividhaṃ manasā soceyyaṃ hoti idha cunda
ekacco anabhijjhālu hoti yantaṃ parassa paravittūpakaraṇaṃ taṃ anabhijjhitā
hoti aho vata yaṃ parassa taṃ mama assāti abyāpannacitto hoti
appaduṭṭhamanasaṅkappo ime sattā averā 1- abyāpajjhā anīghā
sukhī attānaṃ pariharantūti sammādiṭṭhiko hoti aviparittadassano atthi
dinnaṃ atthi yiṭṭhaṃ atthi hutaṃ atthi sukatadukkatānaṃ kammānaṃ phalaṃ vipāko
atthi ayaṃ loko atthi paro loko atthi mātā atthi pitā atthi sattā
opapātikā atthi loke samaṇabrāhmaṇā sammaggatā sammāpaṭipannā
ye imañca lokaṃ parañca lokaṃ sayaṃ abhiññā sacchikatvā pavedentīti
evaṃ kho cunda tividhaṃ manasā soceyyaṃ hoti.
{165.7} Ime kho cunda dasa kusalakammapathā imehi kho cunda dasahi
kusalehi kammapathehi samannāgato kālasseva uṭṭhahanto sayanamhā
paṭhaviṃ cepi āmasati suciyeva hoti no cepi paṭhaviṃ āmasati suciyeva hoti
allāni cepi gomayāni āmasati suciyeva hoti no cepi allāni
gomayāni āmasati suciyeva hoti haritāni cepi tiṇāni āmasati suciyeva
hoti no cepi haritāni tiṇāni āmasati suciyeva hoti aggiṃ cepi paricarati
suciyeva hoti no cepi aggiṃ paricarati suciyeva hoti pañjaliko cepi
ādiccaṃ namassati suciyeva hoti no cepi pañjaliko ādiccaṃ
@Footnote: 1 Ma. averā hontu.
Namassati suciyeva hoti sāyatatiyakaṃ cepi udakaṃ orohati suciyeva
hoti no cepi sāyatatiyakaṃ udakaṃ orohati suciyeva hoti taṃ
kissa hetu ime cunda dasa kusalakammapathā suciceva honti sucikaraṇā
ca imesañca pana cunda dasannaṃ kusalānaṃ kammapathānaṃ samannāgamahetu
devā paññāyanti manussā paññāyanti yā vā panaññāpi
kāci sugati 1- hoti. Evaṃ vutte cundo kammāraputto bhagavantaṃ etadavoca
abhikkantaṃ bhante .pe. upāsakaṃ maṃ bhante bhagavā dhāretu ajjatagge
pāṇupetaṃ saraṇaṃ gatanti.
[166] Athakho jāṇussoṇi brāhmaṇo yena bhagavā tenupasaṅkami
upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi ekamantaṃ nisinno kho jāṇussoṇi
brāhmaṇo bhagavantaṃ etadavoca mayamassu bho gotama brāhmaṇā
nāma dānāni dema saddhāni karoma idaṃ dānaṃ petānaṃ ñātisālohitānaṃ
upakappatu idaṃ dānaṃ petā ñātisālohitā paribhuñjantūti
kacci taṃ bho gotama dānaṃ petānaṃ ñātisālohitānaṃ upakappati
kacci te petā ñātisālohitā taṃ dānaṃ paribhuñjantīti . ṭhāne
kho brāhmaṇa upakappati no aṭṭhāneti.
{166.1} Katamaṃ [2]- bho gotama ṭhānaṃ katamaṃ aṭṭhānanti .
Idha brāhmaṇa ekacco pāṇātipātī hoti adinnādāyī hoti
kāmesu micchācārī hoti musāvādī hoti pisuṇavāco hoti pharusavāco
hoti samphappalāpī hoti abhijjhālu hoti byāpannacitto hoti
@Footnote: 1 Ma. Yu. sugatiyoti. hotīti pāṭho natthi. 2 Ma. pana. Yu. katamañca pana.
Micchādiṭṭhiko hoti so kāyassa bhedā parammaraṇā nirayaṃ upapajjati
yo nerayikānaṃ sattānaṃ āhāro tena so tattha yāpeti tena so tattha
tiṭṭhati idaṃ 1- kho brāhmaṇa aṭṭhānaṃ yattha ṭhitassa taṃ dānaṃ na upakappati
{166.2} idha pana brāhmaṇa ekacco pāṇātipātī
hoti .pe. micchādiṭṭhiko hoti so kāyassa bhedā parammaraṇā
tiracchānayoniṃ upapajjati yo tiracchānayonikānaṃ sattānaṃ āhāro
tena so tattha yāpeti tena so tattha tiṭṭhati idampi kho brāhmaṇa
aṭṭhānaṃ yattha ṭhitassa taṃ dānaṃ na upakappati idha 2- brāhmaṇa
ekacco pāṇātipātā paṭivirato hoti adinnādānā paṭivirato
hoti kāmesu micchācārā paṭivirato hoti musāvādā paṭivirato hoti
pisuṇāya vācāya paṭivirato hoti pharusāya vācāya paṭivirato hoti
samphappalāpā paṭivirato hoti anabhijjhālu hoti abyāpannacitto
hoti sammādiṭṭhiko hoti so kāyassa bhedā parammaraṇā manussānaṃ
sahabyataṃ upapajjati yo manussānaṃ āhāro tena so tattha yāpeti
tena so tattha tiṭṭhati idampi kho brāhmaṇa aṭṭhānaṃ yattha ṭhitassa
taṃ dānaṃ na upakappati
{166.3} idha pana brāhmaṇa ekacco pāṇātipātā paṭivirato
hoti .pe. sammādiṭṭhiko hoti so kāyassa bhedā parammaraṇā devānaṃ
sahabyataṃ upapajjati yo devānaṃ āhāro tena so tattha yāpeti tena
so tattha tiṭṭhati idampi kho brāhmaṇa aṭṭhānaṃ yattha ṭhitassa
@Footnote: 1 Po. Ma. Yu. idampi kho. 2 Ma. Yu. idha pana.
Taṃ dānaṃ na upakappati
{166.4} idha brāhmaṇa ekacco pāṇātipātī hoti .pe.
Micchādiṭṭhiko hoti so kāyassa bhedā parammaraṇā pittivisayaṃ
upapajjati yo pittivisayikānaṃ 1- sattānaṃ āhāro tena so tattha
yāpeti tena so tattha tiṭṭhati yaṃ vā panassa ito anuppavecchanti
mittāmaccā 2- vā ñātisālohitā vā tena so tattha yāpeti
tena so tattha tiṭṭhati idampi kho brāhmaṇa ṭhānaṃ yattha ṭhitassa
taṃ dānaṃ upakappatīti.
{166.5} Sace pana bho gotama so peto ñātisālohito taṃ ṭhānaṃ
anupapanno hoti ko taṃ dānaṃ paribhuñjatīti . aññepissa brāhmaṇa
petā ñātisālohitā taṃ ṭhānaṃ upapannā honti te taṃ dānaṃ
paribhuñjantīti . sace pana bho gotama soceva peto ñātisālohito taṃ
ṭhānaṃ anupapanno hoti aññepissa petā ñātisālohitā 3- taṃ ṭhānaṃ
anupapannā honti ko taṃ dānaṃ paribhuñjatīti.
{166.6} Aṭṭhānaṃ kho etaṃ brāhmaṇa anavakāso yantaṃ ṭhānaṃ
vivittaṃ assa iminā dīghena addhunā yadidaṃ petehi ñātisālohitehi
apica brāhmaṇa dāyakopi anipphaloti . aṭṭhānepi bhavaṃ gotamo
parikappaṃ vadatīti . aṭṭhānepi kho ahaṃ brāhmaṇa parikappaṃ vadāmi
idha brāhmaṇa ekacco pāṇātipātī hoti adinnādāyī hoti kāmesu
micchācārī hoti musāvādī hoti pisuṇavāco hoti pharusavāco hoti
samphappalāpī hoti abhijjhālu hoti byāpannacitto hoti micchādiṭṭhiko
hoti so dātā hoti samaṇassa vā brāhmaṇassa vā annaṃ pānaṃ
@Footnote: 1 Ma. Yu. pettivisayikānaṃ. 2 Po. Yu. mittā vā amaccā vā. 3 Ma. ñāti
@sālohitā petā.
Vatthaṃ yānaṃ mālāgandhaṃ 1- vilepanaṃ seyyāvasathaṃ padīpeyyaṃ so kāyassa
bhedā parammaraṇā hatthīnaṃ sahabyataṃ upapajjati so tattha lābhī
hoti annassa pānassa mālānānālaṅkārassa
{166.7} yaṃ kho brāhmaṇa idha pāṇātipātī adinnādāyī kāmesu
micchācārī musāvādī pisuṇavāco pharusavāco samphappalāpī abhijjhālu
byāpannacitto micchādiṭṭhiko tena so kāyassa bhedā parammaraṇā
hatthīnaṃ sahabyataṃ upapajjati yañca kho so dātā hoti samaṇassa vā
brāhmaṇassa vā annaṃ pānaṃ vatthaṃ yānaṃ mālāgandhaṃ vilepanaṃ
seyyāvasathaṃ padīpeyyaṃ tena so tattha lābhī hoti annassa pānassa
mālānānālaṅkārassa
{166.8} idha pana brāhmaṇa ekacco pāṇātipātī hoti
adinnādāyī hoti kāmesu micchācārī hoti musāvādī hoti pisuṇavāco
hoti pharusavāco hoti samphappalāpī hoti abhijjhālu hoti byāpannacitto
hoti micchādiṭṭhiko hoti so dātā hoti samaṇassa vā brāhmaṇassa
vā annaṃ pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ
so kāyassa bhedā parammaraṇā assānaṃ sahabyataṃ upapajjati ... Gunnaṃ
sahabyataṃ upapajjati ... kukkurānaṃ sahabyataṃ upapajjati so tattha lābhī
hoti annassa pānassa mālānānālaṅkārassa
{166.9} yaṃ kho brāhmaṇa idha pāṇātipātī adinnādāyī
kāmesu micchācārī musāvādī pisuṇavāco pharusavāco samphappalāpī
abhijjhālu byāpannacitto micchādiṭṭhiko tena so kāyassa
bhedā parammaraṇā kukkurānaṃ sahabyataṃ upapajjati yañca
@Footnote: 1 Po. Ma. Yu. mālāgandhavilepanaṃ seyyāvasathapadīpeyyaṃ.
Kho so dātā hoti samaṇassa vā brāhmaṇassa vā annaṃ pānaṃ
vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ tena so
tattha lābhī hoti annassa pānassa mālānānālaṅkārassa
{166.10} idha brāhmaṇa ekacco pāṇātipātā paṭivirato
hoti adinnādānā paṭivirato hoti kāmesu micchācārā paṭivirato
hoti musāvādā paṭivirato hoti pisuṇāya vācāya paṭivirato hoti
pharusāya vācāya paṭivirato hoti samphappalāpā paṭivirato hoti
anabhijjhālu hoti abyāpannacitto hoti sammādiṭṭhiko hoti so
dātā hoti samaṇassa vā brāhmaṇassa vā annaṃ pānaṃ vatthaṃ yānaṃ
mālāgandhaṃ vilepanaṃ seyyāvasathaṃ padīpeyyaṃ so kāyassa bhedā
parammaraṇā manussānaṃ sahabyataṃ upapajjati so tattha lābhī hoti
mānusakānaṃ pañcannaṃ kāmaguṇānaṃ
{166.11} yaṃ kho brāhmaṇa idha pāṇātipātā paṭivirato
hoti adinnādānā paṭivirato hoti kāmesu micchācārā paṭivirato
hoti musāvādā paṭivirato hoti pisuṇāya vācāya paṭivirato hoti
pharusāya vācāya paṭivirato hoti samphappalāpā paṭivirato hoti
anabhijjhālu hoti abyāpannacitto hoti sammādiṭṭhiko hoti
tena so kāyassa bhedā parammaraṇā manussānaṃ sahabyataṃ upapajjati
yañca kho so dātā hoti samaṇassa vā brāhmaṇassa vā annaṃ
pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ tena
so tattha lābhī hoti mānusakānaṃ pañcannaṃ kāmaguṇānaṃ idha pana
Brāhmaṇa ekacco pāṇātipātā paṭivirato hoti .pe. sammādiṭṭhiko
hoti so dātā hoti samaṇassa vā brāhmaṇassa vā annaṃ
pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ so
kāyassa bhedā parammaraṇā devānaṃ sahabyataṃ upapajjati so tattha
lābhī hoti dibbānaṃ pañcannaṃ kāmaguṇānaṃ
{166.12} yaṃ kho brāhmaṇa idha pāṇātipātā paṭivirato hoti
.pe. sammādiṭṭhiko hoti tena so kāyassa bhedā parammaraṇā devānaṃ
sahabyataṃ upapajjati yañca kho so dātā hoti samaṇassa vā brāhmaṇassa
vā annaṃ pānaṃ vatthaṃ yānaṃ mālāgandhaṃ vilepanaṃ seyyāvasathaṃ padīpeyyaṃ
tena so tattha lābhī hoti dibbānaṃ pañcannaṃ kāmaguṇānaṃ apica
brāhmaṇa dāyakopi anipphaloti.
{166.13} Acchariyaṃ bho gotama abbhūtaṃ bho gotama yāvañcidaṃ bho
gotama alameva dānāni dātuṃ alaṃ saddhāni kātuṃ yatra hi nāma dāyakopi
anipphaloti . evametaṃ brāhmaṇa evametaṃ brāhmaṇa dāyakopi
brāhmaṇa anipphaloti . abhikkantaṃ bho gotama .pe. upāsakaṃ maṃ
bhavaṃ gotamo dhāretu ajjatagge pāṇupetaṃ saraṇaṃ gatanti.
Jāṇussoṇivaggo dutiyo.
-----------
Sundaravaggo tatiyo
[167] Sādhuñca vo bhikkhave desissāmi asādhuñca taṃ suṇātha
Sādhukaṃ manasikarotha bhāsissāmīti . evaṃ bhanteti kho te bhikkhū bhagavato
paccassosuṃ . bhagavā etadavoca katamañca bhikkhave asādhuṃ 1-
pāṇātipāto adinnanādānaṃ kāmesu micchācāro musāvādo pisuṇā
vācā pharusā vācā samphappalāpo abhijjhā byāpādo micchādiṭṭhi
idaṃ vuccati bhikkhave asādhuṃ 1-. Katamañca bhikkhave sādhuṃ 2- pāṇātipātā
veramaṇī adinnādānā veramaṇī kāmesu micchācārā veramaṇī
musāvādā veramaṇī pisuṇāya vācāya veramaṇī pharusāya vācāya
veramaṇī samphappalāpā veramaṇī anabhijjhā abyāpādo sammādiṭṭhi
idaṃ vuccati bhikkhave sādhunti 3-.
[168] Ariyadhammañca vo bhikkhave desissāmi anariyadhammañca taṃ
suṇātha sādhukaṃ manasikarotha bhāsissāmīti . evaṃ bhanteti kho te
bhikkhū bhagavato paccassosuṃ . bhagavā etadavoca katamo ca bhikkhave
anariyo dhammo pāṇātipāto .pe. micchādiṭṭhi ayaṃ vuccati
bhikkhave anariyo dhammo . katamo ca bhikkhave ariyo dhammo
pāṇātipātā veramaṇī .pe. sammādiṭṭhi ayaṃ vuccati bhikkhave
ariyo dhammoti.
[169] Kusalañca vo bhikkhave desissāmi akusalañca taṃ suṇātha
sādhukaṃ manasikarotha bhāsissāmīti . evaṃ bhanteti kho te bhikkhū
bhagavato paccassosuṃ . bhagavā etadavoca katamañca bhikkhave akusalaṃ
pāṇātipāto .pe. micchādiṭṭhi idaṃ vuccati bhikkhave akusalaṃ .
@Footnote: 1-2 Po. Ma. asādhu ... sādhu. 3 Po. Ma. sādhūti.
Katamañca bhikkhave kusalaṃ pāṇātipātā veramaṇī .pe. sammādiṭṭhi
idaṃ vuccati bhikkhave kusalanti.
[170] Atthañca vo bhikkhave desissāmi anatthañca taṃ suṇātha
sādhukaṃ manasikarotha bhāsissāmīti . evaṃ bhanteti kho te bhikkhū
bhagavato paccassosuṃ . bhagavā etadavoca katamo ca bhikkhave anattho
pāṇātipāto .pe. micchādiṭṭhi ayaṃ vuccati bhikkhave anattho .
Katamo ca bhikkhave attho pāṇātipātā veramaṇī .pe. sammādiṭṭhi
ayaṃ vuccati bhikkhave atthoti.
[171] Dhammañca vo bhikkhave desissāmi adhammañca taṃ suṇātha
sādhukaṃ manasikarotha bhāsissāmīti . evaṃ bhanteti kho te bhikkhū
bhagavato paccassosuṃ . bhagavā etadavoca katamo ca bhikkhave adhammo
pāṇātipāto .pe. micchādiṭṭhi ayaṃ vuccati bhikkhave adhammo .
Katamo ca bhikkhave dhammo pāṇātipātā veramaṇī .pe. sammādiṭṭhi
ayaṃ vuccati bhikkhave dhammoti.
[172] Sāsavañca vo bhikkhave [1]- desissāmi anāsavañca taṃ
suṇātha sādhukaṃ manasikarotha bhāsissāmīti . evaṃ bhanteti kho te
bhikkhū bhagavato paccassosuṃ . bhagavā etadavoca katamo ca bhikkhave
sāsavo dhammo pāṇātipāto .pe. micchādiṭṭhi ayaṃ vuccati
bhikkhave sāsavo dhammo . katamo ca bhikkhave anāsavo dhammo
pāṇātipātā veramaṇī .pe. sammādiṭṭhi ayaṃ vuccati bhikkhave
@Footnote: 1 Ma. Yu. etthantare dhammanti atthi.
Anāsavo dhammoti.
[173] Sāvajjañca vo bhikkhave [1]- desissāmi anavajjañca taṃ
suṇātha sādhukaṃ manasikarotha bhāsissāmīti . evaṃ bhanteti kho te
bhikkhū bhagavato paccassosuṃ . bhagavā etadavoca katamo ca bhikkhave
sāvajjo dhammo pāṇātipāto .pe. micchādiṭṭhi ayaṃ vuccati
bhikkhave sāvajjo dhammo . katamo ca bhikkhave anavajjo dhammo
pāṇātipātā veramaṇī .pe. sammādiṭṭhi ayaṃ vuccati bhikkhave
anavajjo dhammoti.
[174] Tapaniyañca vo bhikkhave dhammaṃ desissāmi atapaniyañca taṃ
suṇātha .pe. katamo ca bhikkhave tapaniyo dhammo pāṇātipāto .pe.
Micchādiṭṭhi ayaṃ vuccati bhikkhave tapaniyo dhammo . katamo ca bhikkhave
atapaniyo dhammo pāṇātipātā veramaṇī .pe. sammādiṭṭhi
ayaṃ vuccati bhikkhave atapaniyo dhammoti.
[175] Ācayagāmiñca vo bhikkhave dhammaṃ desissāmi apacayagāmiñca
taṃ suṇātha sādhukaṃ manasikarotha bhāsissāmīti . Evaṃ bhanteti kho te bhikkhū
bhagavato paccassosuṃ . bhagavā etadavoca katamo ca bhikkhave ācayagāmī
dhammo pāṇātipāto .pe. micchādiṭṭhi ayaṃ vuccati bhikkhave ācayagāmī
dhammo . katamo ca bhikkhave apacayagāmī dhammo pāṇātipātā veramaṇī .pe.
Sammādiṭṭhi ayaṃ vuccati bhikkhave apacayagāmī dhammoti.
@Footnote: 1 Ma. Yu. etthantare dhammanti desessāmi.
[176] Dukkhudrayañca vo bhikkhave dhammaṃ desissāmi sukhudrayañca
taṃ suṇātha sādhukaṃ manasikarotha bhāsissāmīti . evaṃ bhanteti kho
te bhikkhū bhagavato paccassosuṃ . bhagavā etadavoca katamo ca
bhikkhave dukkhudrayo dhammo pāṇātipāto .pe. micchādiṭṭhi ayaṃ
vuccati bhikkhave dukkhudrayo dhammo . katamo ca bhikkhave sukhudrayo
dhammo pāṇātipātā veramaṇī .pe. sammādiṭṭhi ayaṃ vuccati
bhikkhave sukhudrayo dhammoti.
[177] Dukkhavipākañca vo bhikkhave dhammaṃ desissāmi sukhavipākañca
taṃ suṇātha sādhukaṃ manasikarotha bhāsissāmīti . Evaṃ bhanteti kho te bhikkhū
bhagavato paccassosuṃ . bhagavā etadavoca katamo ca bhikkhave dukkhavipāko
dhammo pāṇātipāto .pe. micchādiṭṭhi ayaṃ vuccati bhikkhave dukkhavipāko
dhammo . katamo ca bhikkhave sukhavipāko dhammo pāṇātipātā veramaṇī .pe.
Sammādiṭṭhi ayaṃ vuccati bhikkhave sukhavipāko dhammoti.
Sundaravaggo 1- tatiyo.
---------------
Seṭṭhavaggo catuttho
[178] Ariyamaggañca vo bhikkhave desissāmi anariyamaggañca
taṃ suṇātha .pe. katamo ca bhikkhave anariyo maggo pāṇātipāto .pe.
Micchādiṭṭhi ayaṃ vuccati bhikkhave anariyo maggo . katamo
@Footnote: 1 Ma. sādhuvaggo tatiyo. Yu. sādhuvaggo aṭṭhamo.
Ca bhikkhave ariyo maggo pāṇātipātā veramaṇī .pe.
Sammādiṭṭhi ayaṃ vuccati bhikkhave ariyo maggoti.
[179] Kaṇhamaggañca vo bhikkhave desissāmi sukkamaggañca taṃ
suṇātha .pe. katamo ca bhikkhave kaṇho maggo pāṇātipāto .pe.
Micchādiṭṭhi ayaṃ vuccati bhikkhave kaṇho maggo . katamo
ca bhikkhave sukko maggo pāṇātipātā veramaṇī .pe. sammādiṭṭhi
ayaṃ vuccati bhikkhave sukko maggoti.
[180] Saddhammañca vo bhikkhave desissāmi asaddhammañca taṃ
suṇātha .pe. katamo ca bhikkhave asaddhammo pāṇātipāto .pe.
Micchādiṭṭhi ayaṃ vuccati bhikkhave asaddhammo . katamo ca bhikkhave
saddhammo pāṇātipātā veramaṇī .pe. sammādiṭṭhi ayaṃ vuccati
bhikkhave saddhammoti.
[181] Sappurisadhammañca vo bhikkhave desissāmi asappurisadhammañca
taṃ suṇātha .pe. katamo ca bhikkhave asappurisadhammo pāṇātipāto .pe.
Micchādiṭṭhi ayaṃ vuccati bhikkhave asappurisadhammo . katamo ca bhikkhave
sappurisadhammo pāṇātipātā veramaṇī .pe. sammādiṭṭhi ayaṃ vuccati
bhikkhave sappurisadhammoti.
[182] Uppādetabbañca vo bhikkhave dhammaṃ desissāmi na
uppādetabbañca taṃ suṇātha .pe. katamo ca bhikkhave na
Uppādetabbo dhammo pāṇātipāto .pe. micchādiṭṭhi ayaṃ vuccati
bhikkhave na uppādetabbo dhammo . katamo ca bhikkhave uppādetabbo
dhammo pāṇātipātā veramaṇī .pe. sammādiṭṭhi ayaṃ vuccati
bhikkhave uppādetabbo dhammoti.
[183] Āsevitabbañca vo bhikkhave dhammaṃ desissāmi na
āsevitabbañca taṃ suṇātha .pe. katamo ca bhikkhave na āsevitabbo
dhammo pāṇātipāto .pe. micchādiṭṭhi ayaṃ vuccati bhikkhave
na āsevitabbo dhammo . katamo ca bhikkhave āsevitabbo dhammo
pāṇātipātā veramaṇī .pe. sammādiṭṭhi ayaṃ vuccati bhikkhave
āsevitabbo dhammoti.
[184] Bhāvetabbañca vo bhikkhave dhammaṃ desissāmi na
bhāvetabbañca taṃ suṇātha .pe. katamo ca bhikkhave na
bhāvetabbo dhammo pāṇātipāto .pe. micchādiṭṭhi ayaṃ vuccati
bhikkhave na bhāvetabbo dhammo . katamo ca bhikkhave bhāvetabbo dhammo
pāṇātipātā veramaṇī .pe. sammādiṭṭhi ayaṃ vuccati bhikkhave
bhāvetabbo dhammoti.
[185] Bahulīkātabbañca vo bhikkhave dhammaṃ desissāmi na
bahulīkātabbañca taṃ suṇātha .pe. katamo ca bhikkhave na bahulīkātabbo
dhammo pāṇātipāto .pe. micchādiṭṭhi ayaṃ vuccati bhikkhave na
bahulīkātabbo dhammo . katamo ca bhikkhave bahulīkātabbo dhammo
Pāṇātipātā veramaṇī .pe. sammādiṭṭhi ayaṃ vuccati bhikkhave
bahulīkātabbo dhammoti.
[186] Anussaritabbañca vo bhikkhave dhammaṃ desissāmi na 1-
anussaritabbañca taṃ suṇātha .pe. katamo ca bhikkhave na
anussaritabbo dhammo pāṇātipāto .pe. micchādiṭṭhi ayaṃ
vuccati bhikkhave na anussaritabbo dhammo . katamo ca bhikkhave
anussaritabbo dhammo pāṇātipātā veramaṇī .pe. sammādiṭṭhi
ayaṃ vuccati bhikkhave anussaritabbo dhammoti.
[187] Sacchikātabbañca vo bhikkhave dhammaṃ desissāmi na
sacchikātabbañca taṃ suṇātha .pe. katamo ca bhikkhave na
sacchikātabbo dhammo pāṇātipāto .pe. micchādiṭṭhi ayaṃ
vuccati bhikkhave na sacchikātabbo dhammo . katamo ca bhikkhave
sacchikātabbo dhammo pāṇātipātā veramaṇī .pe. sammādiṭṭhi
ayaṃ vuccati bhikkhave sacchikātabbo dhammoti.
Seṭṭhavaggo catuttho 2-.
-----------
Sevitabbāsevitabbavaggo pañcamo
[188] Dasahi bhikkhave dhammehi samannāgato puggalo na
sevitabbo katamehi dasahi pāṇātipātī hoti adinnādāyī
hoti kāmesu micchācārī hoti musāvādī hoti pisuṇavāco hoti
@Footnote: 1 Po. Ma. nānussaritabbaṃ. 2 Ma. Yu. ariyamaggavaggo navamo.
Pharusavāco 1- hoti samphappalāpī hoti abhijjhālu hoti
byāpannacitto hoti micchādiṭṭhiko hoti imehi kho bhikkhave
dasahi dhammehi samannāgato puggalo na sevitabbo.
{188.1} Dasahi bhikkhave dhammehi samannāgato puggalo sevitabbo
katamehi dasahi pāṇātipātā paṭivirato hoti adinnādānā paṭivirato
hoti kāmesu micchācārā paṭivirato hoti musāvādā paṭivirato hoti
pisuṇāya vācāya paṭivirato hoti pharusāya vācāya paṭivirato hoti
samphappalāpā paṭivirato hoti anabhijjhālu hoti abyāpannacitto
hoti sammādiṭṭhiko hoti imehi kho bhikkhave dasahi dhammehi samannāgato 2-
sevitabboti 3-.
{188.2} [idha dvisatādisuttaṃ peyyālavasena gaṇitabbaṃ] dasahi
bhikkhave dhammehi samannāgato puggalo na bhajitabbo ... Bhajitabbo ...
Na payirupāsitabbo ... payirupāsitabbo ... Na pujjo hoti ... Pujjo
hoti ... Na pāsaṃso hoti ... Pāsaṃso hoti ... Agāravo hoti ... Sagāravo 4-
hoti ... appatikkho hoti ... sappatikkho hoti ... Na ārādhako
hoti ... Ārādhako hoti ... Na visujjhati visujjhati mānaṃ nādhibhoti ... Mānaṃ
adhibhoti ... paññāya na vaḍḍhati ... paññāya vaḍḍhati ... Bahuṃ apuññaṃ
pasavati ... bahuṃ puññaṃ pasavati katamehi dasahi pāṇātipātā paṭivirato
hoti adinnādānā paṭivirato hoti kāmesu micchācārā paṭivirato
hoti musāvādā paṭivirato hoti pisuṇāya vācāya paṭivirato hoti
pharusāya vācāya paṭivirato hoti samphappalāpā paṭivirato hoti anabhijjhālu
@Footnote: 1 Yu. pharusāvāco. 2 Ma. Yu. etthantare puggaloti dissati. 3 Ma. Yu. itisaddo
@natthi. 4 Ma. gāravo.
Hoti abyāpannacitto hoti sammādiṭṭhiko hoti imehi kho bhikkhave
dasahi dhammehi samannāgato puggalo bahuṃ puññaṃ pasavatīti.
Sevitabbāsevitabbavaggo 1- pañcamo.
Catutthapaṇṇāsako catuttho.
-------------
@Footnote: 1 Yu. puggalavaggo dasamo.
Pañcamapaṇṇāsako
paṭhamavaggo paṭhamo
[189] Dasahi bhikkhave dhammehi samannāgato yathābhataṃ nikkhitto
evaṃ niraye katamehi dasahi idha bhikkhave ekacco pāṇātipātī hoti
luddho lohitapāṇī hatapahate niviṭṭho adayāpanno sabbapāṇabhūtesu
adinnādāyī hoti yantaṃ parassa paravittūpakaraṇaṃ gāmagataṃ vā
araññagataṃ vā adinnaṃ theyyasaṅkhātaṃ ādātā hoti kāmesu
micchācārī hoti yā tā māturakkhitā piturakkhitā bhāturakkhitā
bhaginirakkhitā ñātirakkhitā dhammarakkhitā sasāmikā saparidaṇḍā
antamaso mālāguṇaparikkhitāpi tathārūpāsu cārittaṃ āpajjitā hoti
{189.1} musāvādī hoti sabhaggato vā parisaggato vā ñāti
majjhaggato vā pūgamajjhaggato vā rājakulamajjhaggato vā abhinīto
sakkhiṃ puṭṭho ehi bho purisa yaṃ jānāsi taṃ vadehīti so ajānaṃ vā āha
jānāmīti jānaṃ vā āha na jānāmīti apassaṃ vā āha passāmīti passaṃ
vā āha na passāmīti iti attahetu vā parahetu vā āmisakiñcikkhahetu
vā sampajānamusā bhāsitā hoti pisuṇavāco hoti ito sutvā amutra
akkhātā imesaṃ bhedāya amutra vā sutvā imesaṃ akkhātā amūsaṃ
bhedāya iti samaggānaṃ vā bhettā bhinnānaṃ vā anuppadātā vaggārāmo
Vaggarato vagganandī vaggakaraṇiṃ vācaṃ bhāsitā hoti pharusavāco
hoti yā sā vācā aṇḍakā kakkasā parakaṭukā parābhisajjanī
kodhasāmantā asamādhisaṃvattanikā tathārūpiṃ vācaṃ bhāsitā hoti
samphappalāpī hoti akālavādī anatthavādī adhammavādī avinayavādī
anidhānavatiṃ vācaṃ bhāsitā hoti kālena anapadesaṃ apariyantavatiṃ
anatthasañhitaṃ abhijjhālu hoti yantaṃ parassa paravittūpakaraṇaṃ taṃ
{189.2} abhijjhitā hoti aho vata yaṃ parassa taṃ mama assāti
byāpannacitto hoti paduṭṭhamanasaṅkappo ime sattā haññantu vā
vajjhantu vā ucchijjantu vā vinassantu vā mā vā ahesunti 1-
micchādiṭṭhiko hoti viparittadassano natthi dinnaṃ natthi yiṭṭhaṃ natthi
hutaṃ natthi sukatadukkatānaṃ kammānaṃ phalaṃ vipāko natthi ayaṃ loko natthi
paro loko natthi mātā natthi pitā natthi sattā opapātikā natthi
loke samaṇabrāhmaṇā sammaggatā sammāpaṭipannā ye imañca
lokaṃ parañca lokaṃ sayaṃ abhiññā sacchikatvā pavedentīti imehi
kho bhikkhave dasahi dhammehi samannāgato yathābhataṃ nikkhitto evaṃ niraye.
{189.3} Dasahi bhikkhave dhammehi samannāgato yathābhataṃ nikkhitto
evaṃ sagge katamehi dasahi idha bhikkhave ekacco pāṇātipātaṃ pahāya
pāṇātipātā paṭivirato hoti nihitadaṇḍo nihitasattho lajjī dayāpanno
sabbapāṇabhūtahitānukampī viharati adinnādānaṃ pahāya adinnādānā
paṭivirato hoti yantaṃ parassa paravittūpakaraṇaṃ gāmagataṃ vā araññagataṃ vā
@Footnote: 1 Po. Yu. ahesuṃ iti vāti.
Adinnaṃ 1- theyyasaṅkhātaṃ na ādātā hoti kāmesu micchācāraṃ pahāya
kāmesu micchācārā paṭivirato hoti yā tā māturakkhitā piturakkhitā
bhāturakkhitā bhaginirakkhitā ñātirakkhitā dhammarakkhitā sasāmikā
saparidaṇḍā antamaso mālāguṇaparikkhitāpi tathārūpāsu na cārittaṃ
āpajjitā hoti
{189.4} musāvādaṃ pahāya musāvādā paṭivirato hoti sabhaggato
vā parisaggato vā ñātimajjhaggato vā pūgamajjhaggato vā
rājakulamajjhaggato vā abhinīto sakkhiṃ puṭṭho ehi bho purisa yaṃ
jānāsi taṃ vadehīti so ajānaṃ vā āha na jānāmīti jānaṃ vā āha
jānāmīti apassaṃ vā āha na passāmīti passaṃ vā āha passāmīti
iti attahetu vā parahetu vā āmisakiñcikkhahetu vā na sampajānamusā
bhāsitā hoti pisuṇavācaṃ pahāya pisuṇāya vācāya paṭivirato hoti na
ito sutvā amutra akkhātā imesaṃ bhedāya amutra vā sutvā na imesaṃ
akkhātā amūsaṃ bhedāya iti bhinnānaṃ vā sandhātā sahitānaṃ vā
anuppadātā samaggārāmo samaggarato samagganandī samaggakaraṇiṃ
vācaṃ bhāsitā hoti pharusaṃ vācaṃ pahāya pharusāya vācāya paṭivirato
hoti yā sā vācā nelā kaṇṇasukhā pemaniyā hadayaṅgamā
porī bahujanakantā bahujanamanāpā tathārūpiṃ vācaṃ bhāsitā hoti
samphappalāpaṃ pahāya samphappalāpā paṭivirato hoti kālavādī
bhūtavādī atthavādī dhammavādī vinayavādī nidhānavatiṃ vācaṃ bhāsitā
hoti kālena sāpadesaṃ pariyantavatiṃ atthasañhitaṃ anabhijjhālu
@Footnote: 1 Ma. Yu. na taṃ adinnaṃ theyyasaṅkhātaṃ ādātā hoti.
Hoti yantaṃ parassa paravittūpakaraṇaṃ taṃ
{189.5} anabhijjhitā hoti aho vata yaṃ parassa taṃ mama assāti
abyāpannacitto hoti appaduṭṭhamanasaṅkappo ime sattā averā
abyāpajjhā anīghā sukhī attānaṃ pariharantūti sammādiṭṭhiko hoti
aviparittadassano atthi dinnaṃ atthi yiṭṭhaṃ atthi hutaṃ atthi sukatadukkatānaṃ
kammānaṃ phalaṃ vipāko atthi ayaṃ loko atthi paro loko atthi mātā atthi
pitā atthi sattā opapātikā atthi loke samaṇabrāhmaṇā sammaggatā
sammāpaṭipannā ye imañca lokaṃ parañca lokaṃ sayaṃ abhiññā sacchikatvā
pavedentīti imehi kho bhikkhave dasahi dhammehi samannāgato yathābhataṃ
nikkhitto evaṃ saggeti.
[190] Dasahi bhikkhave dhammehi samannāgato mātugāmo yathābhataṃ
nikkhitto evaṃ niraye katamehi dasahi pāṇātipātī hoti .pe.
Micchādiṭṭhiko hoti imehi kho bhikkhave dasahi dhammehi samannāgato
mātugāmo yathābhataṃ nikkhitto evaṃ niraye . dasahi bhikkhave dhammehi
samannāgato mātugāmo yathābhataṃ nikkhitto evaṃ sagge katamehi dasahi
pāṇātipātā paṭivirato hoti .pe. sammādiṭṭhiko hoti imehi kho
bhikkhave dasahi dhammehi samannāgato mātugāmo yathābhataṃ nikkhitto
evaṃ saggeti.
[191] Dasahi bhikkhave dhammehi samannāgatā upāsikā yathābhataṃ
nikkhittā evaṃ niraye katamehi dasahi pāṇātipātinī hoti .pe.
Micchādiṭṭhikā hoti imehi kho bhikkhave dasahi dhammehi samannāgatā
upāsikā yathābhataṃ nikkhittā evaṃ niraye . dasahi bhikkhave dhammehi
samannāgatā upāsikā yathābhataṃ nikkhittā evaṃ sagge katamehi dasahi
pāṇātipātā paṭiviratā hoti .pe. sammādiṭṭhikā hoti imehi
kho bhikkhave dasahi dhammehi samannāgatā upāsikā yathābhataṃ nikkhittā
evaṃ saggeti.
[192] Dasahi bhikkhave dhammehi samannāgatā upāsikā avisāradā
agāraṃ ajjhāvasati katamehi dasahi pāṇātipātinī hoti .pe.
Micchādiṭṭhikā hoti imehi kho bhikkhave dasahi dhammehi samannāgatā
upāsikā avisāradā agāraṃ ajjhāvasati . dasahi bhikkhave dhammehi
samannāgatā upāsikā visāradā agāraṃ ajjhāvasati katamehi dasahi
pāṇātipātā paṭiviratā hoti .pe. sammādiṭṭhikā hoti imehi
kho bhikkhave dasahi dhammehi samannāgatā upāsikā visāradā agāraṃ
ajjhāvasatīti.
[193] Saṃsappatipariyāyaṃ 1- vo bhikkhave dhammapariyāyaṃ desissāmi taṃ
suṇātha sādhukaṃ manasikarotha bhāsissāmīti . evaṃ bhanteti kho te
bhikkhū bhagavato paccassosuṃ . bhagavā etadavoca katamo ca bhikkhave
saṃsappatipariyāyo dhammapariyāyo kammassakā bhikkhave sattā kammadāyādā
kammayonī kammabandhū kammapaṭisaraṇā yaṃ kammaṃ karonti kalyāṇaṃ
vā pāpakaṃ vā tassa dāyādā bhavanti . idha bhikkhave ekacco
@Footnote: 1 Po. saṃsappatiyapariyāyaṃ. Ma. Yu. sabbattha saṃsappaniyapariyāyaṃ.
Pāṇātipātī hoti luddho lohitapāṇī hatapahate niviṭṭho adayāpanno
sabbapāṇabhūtesu so saṃsappati kāyena saṃsappati vācāya saṃsappati
manasā tassa jimhaṃ kāyakammaṃ hoti jimhaṃ vacīkammaṃ jimhaṃ manokammaṃ
jimhā gati jimhā 1- upapatti jimhagatikassa kho
panāhaṃ bhikkhave jimhūpapattikassa dvinnaṃ gatīnaṃ aññataraṃ gatiṃ vadāmi
ye vā ekantadukkhā nirayā yā vā saṃsappajātikā tiracchānayoni
katamā ca sā bhikkhave saṃsappajātikā tiracchānayoni ahi vicchikā
satapadī nakulā biḷārā mūsikā ulūkā ye vā panaññepi keci
tiracchānayonikā sattā manusse disvā saṃsappanti iti kho bhikkhave
bhūtā bhūtassa upapatti hoti yaṃ karoti tena upapajjati upapannamenaṃ
phassā phusanti evamahaṃ bhikkhave kammadāyādā sattāti vadāmi.
{193.1} Idha pana bhikkhave ekacco adinnādāyī hoti ... Kāmesu
micchācārī hoti ... Musāvādī hoti ... Pisuṇavāco hoti ... Pharusavāco
hoti ... samphappalāpī hoti ... abhijjhālu hoti ... Byāpannacitto
hoti ... micchādiṭṭhiko hoti viparittadassano natthi dinnaṃ natthi yiṭṭhaṃ
natthi hutaṃ natthi sukatadukkatānaṃ kammānaṃ phalaṃ vipāko natthi ayaṃ loko
natthi paro loko natthi mātā natthi pitā natthi sattā opapātikā
natthi loke samaṇabrāhmaṇā sammaggatā sammāpaṭipannā ye
imañca lokaṃ parañca lokaṃ sayaṃ abhiññā sacchikatvā pavedentīti so
saṃsappati kāyena saṃsappati vācāya saṃsappati manasā tassa jimhaṃ
@Footnote: 1 Po. Yu. jimhupapati. Ma. jimhūpapati.
Kāyakammaṃ hoti jimhaṃ vacīkammaṃ jimhaṃ manokammaṃ jimhā gati
jimhūpapatti jimhagatikassa kho panāhaṃ bhikkhave jimhūpapattikassa
dvinnaṃ gatīnaṃ aññataraṃ gatiṃ vadāmi ye vā ekantadukkhā nirayā
yā vā saṃsappajātikā tiracchānayoni katamā ca sā bhikkhave
saṃsappajātikā tiracchānayoni ahi vicchikā satapadī nakulā biḷārā
mūsikā ulūkā ye vā panaññepi keci tiracchānayonikā sattā
manusse disvā saṃsappanti iti kho bhikkhave bhūtā bhūtassa upapatti
hoti yaṃ karoti tena upapajjati upapannamenaṃ phassā phusanti evamahaṃ
bhikkhave kammadāyādā sattāti vadāmi.
{193.2} Kammassakā bhikkhave sattā kammadāyādā kammayonī
kammabandhū kammapaṭisaraṇā yaṃ kammaṃ karonti kalyāṇaṃ vā pāpakaṃ vā
tassa dāyādā bhavanti . idha bhikkhave ekacco pāṇātipātaṃ pahāya
pāṇātipātā paṭivirato hoti nihitadaṇḍo nihitasattho lajjī
dayāpanno sabbapāṇabhūtahitānukampī viharati so na saṃsappati
kāyena na saṃsappati vācāya na saṃsappati manasā tassa uju 1-
kāyakammaṃ hoti uju vacīkammaṃ uju manokammaṃ uju gati ujūpapatti
ujūgatikassa kho panāhaṃ bhikkhave ujūpapattikassa dvinnaṃ gatīnaṃ
aññataraṃ gatiṃ vadāmi ye ca ekantasukhā sattā 2- yāni
vā pana tāni uccākulāni khattiyamahāsālakulāni vā
brāhmaṇamahāsālakulāni vā gahapatimahāsālakulāni
vā aḍḍhāni mahaddhanāni mahābhogāni bahutajātarūparajatāni
bahutavittūpakaraṇāni bahutadhanadhaññāni iti kho bhikkhave bhūtā
@Footnote: 1 Ma. Yu. ujuṃ. 2 Ma. Yu. saggā.
Bhūtassa upapatti hoti yaṃ karoti tena upapajjati upapannamenaṃ
phassā phusanti evamahaṃ bhikkhave kammadāyādā sattāti vadāmi.
{193.3} Idha pana bhikkhave ekacco adinnādānaṃ pahāya adinnādānā
paṭivirato hoti ... Kāmesu micchācāraṃ pahāya kāmesu micchācārā paṭivirato
hoti ... Musāvādaṃ pahāya musāvādā paṭivirato hoti ... Pisuṇavācaṃ pahāya
pisuṇāya vācāya paṭivirato hoti ... pharusavācaṃ pahāya pharusāya vācāya
paṭivirato hoti ... Samphappalāpaṃ pahāya samphappalāpā paṭivirato hoti ...
Anabhijjhālu hoti ... abyāpannacitto hoti ... sammādiṭṭhiko hoti
aviparittadassano atthi dinnaṃ atthi yiṭṭhaṃ atthi hutaṃ atthi sukatadukkatānaṃ
kammānaṃ phalaṃ vipāko atthi ayaṃ loko atthi paro loko atthi
mātā atthi pitā atthi sattā opapātikā atthi samaṇabrāhmaṇā
sammaggatā sammāpaṭipannā ye imañca lokaṃ parañca lokaṃ sayaṃ abhiññā
sacchikatvā pavedentīti so na saṃsappati kāyena na saṃsappati vācāya
na saṃsappati manasā tassa uju kāyakammaṃ hoti uju vacīkammaṃ uju
manokammaṃ uju gati ujūpapatti ujūgatikassa kho panāhaṃ bhikkhave
ujūpapattikassa dvinnaṃ gatīnaṃ aññataraṃ gatiṃ vadāmi ye vā ekantasukhā
sattā yāni vā pana tāni uccākulāni khattiyamahāsālakulāni vā
brāhmaṇamahāsālakulāni vā gahapatimahāsālakulāni vā
aḍḍhāni mahaddhanāni mahābhogāni bahutajātarūparajatāni
bahutavittūpakaraṇāni bahutadhanadhaññāni iti kho bhikkhave bhūtā
Bhūtassa upapatti hoti yaṃ karoti tena upapajjati upapannamenaṃ
phassā phusanti evamahaṃ bhikkhave kammadāyādā sattāti vadāmi .
Kammassakā bhikkhave sattā kammadāyādā kammayonī kammabandhū
kammapaṭisaraṇā yaṃ kammaṃ karonti kalyāṇaṃ vā pāpakaṃ vā tassa
dāyādā bhavanti. Ayaṃ kho bhikkhave saṃsappatipariyāyo dhammapariyāyoti.
[194] Nāhaṃ bhikkhave sañcetanikānaṃ kammānaṃ katānaṃ upacitānaṃ
appaṭisaṃviditvā 1- byantibhāvaṃ vadāmi tañca kho diṭṭheva dhamme
upapajje 2- vā apare vā pariyāye na tvevāhaṃ bhikkhave sañcetanikānaṃ
kammānaṃ katānaṃ upacitānaṃ appaṭisaṃviditvā dukkhassantakiriyaṃ vadāmi
tatra bhikkhave tividhaṃ 3- kāyakammantasandosabyāpatti 4-
akusalasañcetanikā dukkhudrayā dukkhavipākā hoti catubbidhaṃ 5-
vacīkammantasandosabyāpatti akusalasañcetanikā dukkhudrayā
dukkhavipākā hoti tividhaṃ manokammantasandosabyāpatti
akusalasañcetanikā dukkhudrayā dukkhavipākā hoti.
Kathañca bhikkhave tividhaṃ kāyakammantasandosabyāpatti akusalasañcetanikā
dukkhudrayā dukkhavipākā hoti idha bhikkhave ekacco pāṇātipātī
hoti luddho lohitapāṇī hatapahate niviṭṭho adayāpanno
sabbapāṇabhūtesu adinnādāyī hoti yantaṃ parassa paravittūpakaraṇaṃ
gāmagataṃ vā araññagataṃ vā adinnaṃ theyyasaṅkhātaṃ ādātā hoti
kāmesu micchācārī hoti yā tā māturakkhatā piturakkhitā bhāturakkhitā
bhaginirakkhitā ñātirakkhitā dhammarakkhitā sasāmikā saparidaṇḍā antamaso
@Footnote: 1 Po. Ma. apaṭisaṃveditvā. 2 Po. Ma. Yu. apapajjaṃ. 3-5 Po. Ma. Yu. sabbattha
@tividhā catubbidhā. 4 Po. sabbattha ... sadosabyāpatti.
Mālāguṇaparikkhitāpi tathārūpāsu cārittaṃ āpajjitā hoti evaṃ kho
bhikkhave tividhaṃ kāyakammantasandosabyāpatti akusalasañcetanikā
dukkhudrayā dukkhavipākā hoti.
{194.1} Kathañca bhikkhave catubbidhaṃ vacīkammantasandosabyāpatti
akusalasañcetanikā dukkhudrayā dukkhavipākā hoti idha bhikkhave ekacco
musāvādī hoti sabhaggato vā parisaggato vā ñātimajjhaggato vā
pūgamajjhaggato vā rājakulamajjhaggato vā abhinīto sakkhiṃ puṭṭho
ehi bho purisa yaṃ jānāsi taṃ vadehīti so ajānaṃ vā āha jānāmīti
jānaṃ vā āha na jānāmīti apassaṃ vā āha passāmīti passaṃ vā āha
na passāmīti iti attahetu vā parahetu vā āmisakiñcikkhahetu vā
sampajānamusā bhāsitā hoti pisuṇavāco hoti ito sutvā amutra
akkhātā imesaṃ bhedāya amutra vā sutvā imesaṃ akkhātā amūsaṃ
bhedāya iti samaggānaṃ vā bhettā bhinnānaṃ vā anuppadātā
vaggārāmo vaggarato vagganandī vaggakaraṇiṃ vācaṃ bhāsitā hoti
pharusavāco hoti yā sā vācā aṇḍakā kakkasā parakaṭukā parābhisajjanī
kodhasāmantā asamādhisaṃvattanikā tathārūpiṃ vācaṃ bhāsitā hoti
samphappalāpī hoti akālavādī abhūtavādī anatthavādī adhammavādī
avinayavādī anidhānavatiṃ vācaṃ bhāsitā hoti kālena anapadesaṃ apariyantavatiṃ
anatthasañhitaṃ evaṃ kho bhikkhave catubbidhaṃ vacīkammantasandosabyāpatti
akusalasañcetanikā dukkhudrayā dukkhavipākā hoti.
{194.2} Kathañca bhikkhave tividhaṃ manokammantasandosabyāpatti
akusalasañcetanikā dukkhudrayā dukkhavipākā hoti idha bhikkhave ekacco
abhijjhālu hoti yantaṃ parassa paravittūpakaraṇaṃ taṃ abhijjhitā hoti
aho vata yaṃ parassa taṃ mama assāti byāpannacitto hoti
paduṭṭhamanasaṅkappo ime sattā haññantu vā vajjhantu vā
ucchijjantu vā vinassantu vā mā vā ahesunti micchādiṭṭhiko hoti
viparittadassano natthi dinnaṃ natthi yiṭṭhaṃ natthi hutaṃ natthi sukatadukkatānaṃ
kammānaṃ phalaṃ vipāko natthi ayaṃ loko natthi paro loko natthi
mātā natthi pitā natthi sattā opapātikā natthi loke
samaṇabrāhmaṇā sammaggatā sammāpaṭipannā ye imañca
lokaṃ parañca lokaṃ sayaṃ abhiññā sacchikatvā pavedentīti
{194.3} evaṃ kho bhikkhave tividhaṃ manokammantasandosabyāpatti
akusalasañcetanikā dukkhudrayā dukkhavipākā hoti tividhakāyakammanta-
sandosabyāpattiakusalasañcetanikāhetu vā bhikkhave sattā kāyassa
bhedā parammaraṇā apāyaṃ duggatiṃ vinipātaṃ nirayaṃ upapajjanti
catubbidhavacīkammantasandosabyāpattiakusalasañcetanikāhetu
vā bhikkhave sattā kāyassa bhedā parammaraṇā apāyaṃ duggatiṃ
vinipātaṃ nirayaṃ upapajjanti tividhamanokammantasandosabyāpatti-
akusalasañcetanikāhetu vā bhikkhave sattā kāyassa bhedā parammaraṇā
apāyaṃ duggatiṃ vinipātaṃ nirayaṃ upapajjanti seyyathāpi bhikkhave
apaṇṇako maṇi uddhaṃ khitto yena yeneva patiṭṭhāti supatiṭṭhitaṃyeva
Patiṭṭhāti
{194.4} evameva kho bhikkhave tividhakāyakammantasandosabyāpatti-
akusalasañcetanikāhetu vā sattā apāyaṃ duggatiṃ vinipātaṃ nirayaṃ
upapajjanti catubbidhavacīkammantasandosabyāpattiakusalasañcetanikāhetu
vā sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjanti tividhamanokammantasandosabyāpattiakusalasañcetanikāhetu
vā sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjanti.
{194.5} Nāhaṃ bhikkhave sañcetanikānaṃ kammānaṃ katānaṃ upacitānaṃ
appaṭisaṃviditvā byantibhāvaṃ vadāmi tañca kho diṭṭheva dhamme upapajje
vā apare vā pariyāye na tvevāhaṃ bhikkhave sañcetanikānaṃ kammānaṃ
katānaṃ upacitānaṃ appaṭisaṃviditvā dukkhassantakiriyaṃ vadāmi tatra bhikkhave
tividhaṃ kāyakammantasampatti kusalasañcetanikā sukhudrayā sukhavipākā hoti
catubbidhaṃ vacīkammantasampatti kusalasañcetanikā sukhudrayā sukhavipākā
hoti tividhaṃ manokammantasampatti kusalasañcetanikā sukhudrayā
sukhavipākā hoti.
Kathañca bhikkhave tividhaṃ kāyakammantasampatti kusalasañcetanikā
sukhudrayā sukhavipākā hoti idha bhikkhave ekacco pāṇātipātaṃ
pahāya pāṇātipātā paṭivirato hoti nihitadaṇḍo nihitasattho lajjī
dayāpanno sabbapāṇabhūtahitānukampī viharati adinnādānaṃ pahāya
adinnādānā paṭivirato hoti yantaṃ parassa paravittūpakaraṇaṃ gāmagataṃ
vā araññagataṃ vā adinnaṃ theyyasaṅkhātaṃ na ādātā hoti kāmesu
micchācāraṃ pahāya kāmesu micchācārā paṭivirato hoti yā tā
Māturakkhitā piturakkhitā bhāturakkhitā bhaginirakkhitā ñātirakkhitā
dhammarakkhitā sasāmikā saparidaṇḍā antamaso mālāguṇaparikkhitāpi
tathārūpāsu na cārittaṃ āpajjitā hoti evaṃ kho bhikkhave tividhaṃ
kāyakammantasampatti kusalasañcetanikā sukhudrayā sukhavipākā hoti.
Kathañca bhikkhave catubbidhaṃ vacīkammantasampatti kusalasañcetanikā
sukhudrayā sukhavipākā hoti idha bhikkhave ekacco musāvādaṃ pahāya
musāvādā paṭivirato hoti sabhaggato vā parisaggato vā ñātimajjhaggato
vā pūgamajjhaggato vā rājakulamajjhaggato vā abhinīto sakkhiṃ puṭṭho
ehi bho purisa yaṃ jānāsi taṃ vadehīti so ajānaṃ vā āha na jānāmīti
jānaṃ vā āha jānāmīti apassaṃ vā āha na passāmīti passaṃ vā āha
passāmīti iti attahetu vā parahetu vā āmisakiñcikkhahetu vā
na sampajānamusā bhāsitā hoti pisuṇavācaṃ pahāya pisuṇāya vācāya
paṭivirato hoti na ito sutvā amutra akkhātā imesaṃ bhedāya
amutra vā sutvā na imesaṃ akkhātā amūsaṃ bhedāya iti bhinnānaṃ vā
sandhātā sahitānaṃ vā anuppadātā samaggārāmo samaggarato
samagganandī samaggakaraṇiṃ vācaṃ bhāsitā hoti pharusaṃ vācaṃ pahāya
pharusāya vācāya paṭivirato hoti yā sā vācā nelā kaṇṇasukhā
pemaniyā hadayaṅgamā porī bahujanakantā bahujanamanāpā tathārūpiṃ
vācaṃ bhāsitā hoti samphappalāpaṃ pahāya samphappalāpā paṭivirato
hoti kālavādī bhūtavādī atthavādī dhammavādī vinayavādī
Nidhānavatiṃ vācaṃ bhāsitā hoti kālena sāpadesaṃ pariyantavatiṃ
atthasañhitaṃ evaṃ kho bhikkhave catubbidhaṃ vacīkammantasampatti
kusalasañcetanikā sukhudrayā sukhavipākā hoti.
Kathañca bhikkhave tividhaṃ manokammantasampatti kusalasañcetanikā
sukhudrayā sukhavipākā hoti idha bhikkhave ekacco anabhijjhālu
hoti yantaṃ parassa paravittūpakaraṇaṃ taṃ anabhijjhitā hoti aho vata
yaṃ parassa taṃ mama assāti abyāpannacitto hoti
appaduṭṭhamanasaṅkappo ime sattā averā abyāpajjhā anīghā
sukhī attānaṃ pariharantūti sammādiṭṭhiko hoti aviparittadassano
atthi dinnaṃ atthi yiṭṭhaṃ atthi hutaṃ .pe. ye imañca lokaṃ parañca
lokaṃ sayaṃ abhiññā sacchikatvā pavedentīti evaṃ kho bhikkhave tividhaṃ
manokammantasampatti kusalasañcetanikā sukhudrayā sukhavipākā hoti
tividhakāyakammantasampattikusalasañcetanikāhetu vā bhikkhave sattā
kāyassa bhedā parammaraṇā sugatiṃ saggaṃ lokaṃ upapajjanti catubbidha-
vacīkammantasampattikusalasañcetanikāhetu vā bhikkhave sattā kāyassa
bhedā parammaraṇā sugatiṃ saggaṃ lokaṃ upapajjanti tividhamanokammantasampatti-
kusalasañcetanikāhetu vā bhikkhave sattā kāyassa bhedā parammaraṇā
sugatiṃ saggaṃ lokaṃ upapajjanti seyyathāpi bhikkhave apaṇṇako
maṇi uddhaṃ khitto yena yeneva patiṭṭhāti supatiṭṭhitaṃyeva patiṭṭhāti
evameva kho bhikkhave tividhakāyakammantasampattikusalasañcetanikāhetu vā
Sattā kāyassa bhedā parammaraṇā sugatiṃ saggaṃ lokaṃ upapajjanti
catubbidhavacīkammantasampattikusalasañcetanikāhetu vā sattā kāyassa
bhedā parammaraṇā sugatiṃ saggaṃ lokaṃ upapajjanti tividhamanokammanta-
sampattikusalasañcetanikāhetu vā sattā kāyassa bhedā parammaraṇā
sugatiṃ saggaṃ lokaṃ upapajjanti.
[195] Nāhaṃ bhikkhave sañcetanikānaṃ kammānaṃ katānaṃ upacitānaṃ
appaṭisaṃviditvā byantibhāvaṃ vadāmi tañca kho diṭṭheva dhamme
upapajje vā apare vā pariyāye na tvevāhaṃ bhikkhave sañcetanikānaṃ
kammānaṃ katānaṃ upacitānaṃ appaṭisaṃviditvā dukkhassantakiriyaṃ vadāmi
tatra bhikkhave tividhaṃ kāyakammantasandosabyāpatti akusalasañcetanikā
dukkhudrayā dukkhavipākā hoti catubbidhaṃ vacīkammantasandosabyāpatti
akusalasañcetanikā dukkhudrayā dukkhavipākā hoti tividhaṃ manokammanta-
sandosabyāpatti akusalasañcetanikā dukkhudrayā dukkhavipākā hoti.
{195.1} Kathañca bhikkhave tividhaṃ kāyakammantasandosabyāpatti
akusalasañcetanikā dukkhudrayā dukkhavipākā hoti .pe. Evaṃ kho bhikkhave
tividhaṃ kāyakammantasandosabyāpatti akusalasañcetanikā dukkhudrayā
dukkhavipākā hoti.
{195.2} Kathañca bhikkhave catubbidhaṃ vacīkammantasandosabyāpatti
akusalasañcetanikā dukkhudrayā dukkhavipākā hoti .pe. Evaṃ kho bhikkhave
catubbidhaṃ vacīkammantasandosabyāpatti akusalasañcetanikā dukkhudrayā
Dukkhavipākā hoti.
{195.3} Kathañca bhikkhave tividhaṃ manokammantasandosabyāpatti
akusalasañcetanikā dukkhudrayā dukkhavipākā hoti .pe. Evaṃ kho bhikkhave
tividhaṃ manokammantasandosabyāpatti akusalasañcetanikā dukkhudrayā
dukkhavipākā hoti tividhakāyakammantasandosabyāpattiakusalasañcetanikāhetu
vā bhikkhave sattā kāyassa bhedā parammaraṇā apāyaṃ duggatiṃ vinipātaṃ
nirayaṃ upapajjanti catubbidhavacīkammantasandosabyāpattiakusalasañcetanikāhetu
vā .pe. tividhamanokammantasandosabyāpattiakusalasañcetanikāhetu
vā bhikkhave sattā kāyassa bhedā parammaraṇā apāyaṃ duggatiṃ vinipātaṃ
nirayaṃ upapajjanti . nāhaṃ bhikkhave sañcetanikānaṃ kammānaṃ katānaṃ
upacitānaṃ appaṭisaṃviditvā byantibhāvaṃ vadāmi tañca kho diṭṭheva dhamme
upapajje vā apare vā pariyāye na tvevāhaṃ bhikkhave sañcetanikānaṃ
kammānaṃ katānaṃ upacitānaṃ appaṭisaṃviditvā dukkhassantakiriyaṃ vadāmi
tatra bhikkhave tividhaṃ kāyakammantasampatti kusalasañcetanikā sukhudrayā
sukhavipākā hoti catubbidhaṃ vacīkammantasampatti kusalasañcetanikā
sukhudrayā sukhavipākā hoti tividhaṃ manokammantasampatti kusalasañcetanikā
sukhudrayā sukhavipākā hoti.
{195.4} Kathañca bhikkhave tividhaṃ kāyakammantasampatti kusalasañcetanikā
sukhudrayā sukhavipākā hoti .pe. Evaṃ kho bhikkhave tividhaṃ kāyakammantasampatti
kusalasañcetanikā sukhudrayā sukhavipākā hoti.
{195.5} Kathañca bhikkhave catubbidhaṃ vacīkammantasampatti
kusalasañcetanikā sukhudrayā sukhavipākā hoti .pe. evaṃ kho bhikkhave
catubbidhaṃ vacīkammantasampatti hoti.
{195.6} Kathañca bhikkhave tividhaṃ manokammantasampatti
kusalasañcetanikā sukhudrayā sukhavipākā hoti .pe. evaṃ kho
bhikkhave tividhaṃ manokammantasampatti kusalasañcetanikā sukhudrayā
sukhavipākā hoti tividhakāyakammantasampattikusalasañcetanikāhetu vā
bhikkhave sattā kāyassa bhedā parammaraṇā sugatiṃ saggaṃ lokaṃ upapajjanti
catubbidhavacīkammantasampattikusalasañcetanikāhetu vā .pe.
Tividhamanokammantasampattikusalasañcetanikāhetu vā bhikkhave
sattā kāyassa bhedā parammaraṇā sugatiṃ saggaṃ lokaṃ upapajjanti.
[196] Nāhaṃ bhikkhave sañcetanikānaṃ kammānaṃ katānaṃ upacitānaṃ
appaṭisaṃviditvā byantibhāvaṃ vadāmi tañca kho diṭṭheva dhamme upapajje
vā apare vā pariyāye na tvevāhaṃ bhikkhave sañcetanikānaṃ kammānaṃ
katānaṃ upacitānaṃ appaṭisaṃviditvā dukkhassantakiriyaṃ vadāmi sakho so
bhikkhave ariyasāvako evaṃvigatābhijjho vigatabyāpādo asammūḷho
sampajāno patissato mettāsahagatena cetasā ekaṃ disaṃ pharitvā
viharati tathā dutiyaṃ tathā tatiyaṃ tathā catutthaṃ iti uddhamadho tiriyaṃ sabbadhi
sabbattatāya 1- sabbāvantaṃ lokaṃ mettāsahagatena cetasā vipulena
@Footnote: 1 Yu. sabbatthatāya.
Mahaggatena appamāṇena averena abyāpajjhena pharitvā viharati so
evaṃ pajānāti pubbe kho me idaṃ cittaṃ parittaṃ hoti 1- abhāvitaṃ
etarahi pana me idaṃ cittaṃ appamāṇaṃ subhāvitaṃ yaṃ kho pana kiñci
pamāṇakataṃ kammaṃ na taṃ tatrāvasissati na taṃ tatrāvatiṭṭhati 2- taṃ
kiṃ maññatha bhikkhave daharatagge ce [3]- ayaṃ kumāro mettācetovimuttiṃ 4-
bhāveyya apinu kho pāpakammaṃ kareyyāti. No hetaṃ bhante. Akarontaṃ
kho pana pāpakammaṃ apinu kho dukkhaṃ phuseyyāti . no hetaṃ bhante
akarontañhi bhante pāpakammaṃ kuto dukkhaṃ phusissatīti.
{196.1} Bhāvetabbā kho panāyaṃ bhikkhave mettācetovimutti
itthiyā vā purisena vā itthiyā vā bhikkhave purisassa vā nāyaṃ kāyo
ādāya gamanīyo cittantaro ayaṃ bhikkhave macco so evaṃ pajānāti
yaṃ kho me idaṃ 5- kiñci pubbe iminā karajakāyena pāpakammaṃ kataṃ
sabbantaṃ idha vedaniyaṃ na taṃ [6]- anubhavissatīti evaṃ bhāvitā kho bhikkhave
mettācetovimutti anāgāmitāya saṃvattati idha paññassa bhikkhuno
uttariṃ vimuttiṃ appaṭivijjhatoti.
{196.2} Karuṇāsahagatena cetasā muditāsahagatena cetasā
upekkhāsahagatena cetasā ekaṃ disaṃ pharitvā viharati tathā dutiyaṃ tathā
tatiyaṃ tathā catutthaṃ iti uddhamadho tiriyaṃ sabbadhi sabbattatāya sabbāvantaṃ
lokaṃ upekkhāsahagatena cetasā vipulena mahaggatena appamāṇena
averena abyāpajjhena pharitvā viharati so evaṃ pajānāti pubbe
kho me idaṃ cittaṃ parittaṃ hoti abhāvitaṃ etarahi pana me idaṃ cittaṃ
@Footnote: 1 Po. Ma. Yu. ahosi. 2 Ma. tatrāvatiṭṭhatīti. 3 Po. Ma. Yu. so.
@4 Po. Ma. sabbavāresu mettaṃ cetovimuttinti dissati. 5 Yu. idha. 6 Po. Ma. Yu.
@etthantare anuganti dissati.
Appamāṇaṃ subhāvitaṃ yaṃ kho pana kiñci pamāṇakataṃ kammaṃ na taṃ
tatrāvasissati na taṃ tatrāvatiṭṭhati taṃ kiṃ maññatha bhikkhave
daharatagge ce ayaṃ kumāro upekkhācetovimuttiṃ bhāveyya apinu kho
pāpakammaṃ kareyyāti . no hetaṃ bhante. Akarontaṃ kho pana pāpakammaṃ
apinu kho dukkhaṃ phuseyyāti . no hetaṃ bhante akarontañhi bhante
pāpakammaṃ kuto dukkhaṃ phusissatīti.
{196.3} Bhāvetabbā kho panāyaṃ bhikkhave upekkhācetovimutti
itthiyā vā purisena vā itthiyā vā bhikkhave purisassa vā nāyaṃ kāyo
ādāya gamanīyo cittantaro ayaṃ bhikkhave macco so evaṃ pajānāti yaṃ kho
me idaṃ 1- kiñci pubbe iminā karajakāyena pāpakammaṃ kataṃ sabbantaṃ
idha vedaniyaṃ na taṃ anubhavissatīti evaṃ bhāvitā kho bhikkhave upekkhācetovimutti
anāgāmitāya saṃvattati idha paññassa bhikkhuno uttariṃ vimuttiṃ appaṭivijjhatoti.
[197] Athakho aññataro brāhmaṇo yena bhagavā tenupasaṅkami
upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi ekamantaṃ nisinno kho so brāhmaṇo
bhagavantaṃ etadavoca ko nu kho bho gotama hetu ko paccayo yenamidhekacce
sattā kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjantīti . adhammacariyavisamacariyāhetu kho brāhmaṇa
evamidhekacce sattā kāyassa bhedā parammaraṇā apāyaṃ duggatiṃ
vinipātaṃ nirayaṃ upapajjantīti . ko pana bho gotama hetu ko
@Footnote: 1 Yu. idha.
Paccayo yenamidhekacce sattā kāyassa bhedā parammaraṇā sugatiṃ saggaṃ
lokaṃ upapajjantīti . dhammacariyasamacariyāhetu kho brāhmaṇa evamidhekacce
sattā kāyassa bhedā paramamaraṇā sugatiṃ saggaṃ lokaṃ upapajjanti.
{197.1} Na kho ahaṃ imassa bhoto gotamassa saṅkhittena bhāsitassa
vitthārena atthaṃ ājānāmi sādhu me bhavaṃ gotamo tathā dhammaṃ desetu
yathāhaṃ imassa bhoto gotamassa saṅkhittena bhāsitassa vitthārena atthaṃ
ājāneyyanti . tenahi brāhmaṇa suṇāhi sādhukaṃ manasikarohi
bhāsissāmīti . evaṃ bhoti kho so brāhmaṇo bhagavato paccassosi.
Bhagavā etadavoca tividhaṃ kho brāhmaṇa kāyena adhammacariyavisamacariyā
hoti catubbidhaṃ vācāya adhammacariyavisamacariyā hoti tividhaṃ manasā
adhammacariyavisamacariyā hoti.
Kathañca brāhmaṇa tividhaṃ kāyena adhammacariyavisamacariyā 1- hoti
.pe. Evaṃ kho brāhmaṇa tividhaṃ kāyena adhammacariyavisamacariyā hoti.
Kathañca brāhmaṇa catubbidhaṃ vācāya adhammacariyavisamacariyā
hoti .pe. evaṃ kho brāhmaṇa catubbidhaṃ vācāya adhammacariyavisamacariyā
hoti.
Kathañca brāhmaṇa tividhaṃ manasā adhammacariyavisamacariyā hoti .pe.
Evaṃ kho brāhmaṇa tividhaṃ manasā adhammacariyavisamacariyā hoti
evaṃ adhammacariyavisamacariyāhetu kho brāhmaṇa evamidhekacce sattā
kāyassa bhedā parammaraṇā apāyaṃ duggatiṃ vinipātaṃ nirayaṃ upapajjanti.
@Footnote: 1 Ma. adhammacariyā visamacariyā.
Tividhaṃ kho brāhmaṇa kāyena dhammacariyasamacariyā 1- hoti catubbidhaṃ
vācāya dhammacariyasamacariyā hoti tividhaṃ manasā dhammacariyasamacariyā
hoti kathañca brāhmaṇa tividhaṃ kāyena dhammacariyasamacariyā hoti .pe.
Evaṃ kho brāhmaṇa tividhaṃ kāyena dhammacariyasamacariyā hoti
kathañca brāhmaṇa catubbidhaṃ vācāya dhammacariyasamacariyā hoti .pe.
Evaṃ kho brāhmaṇa catubbidhaṃ vācāya dhammacariyasamacariyā hoti
kathañca brāhmaṇa tividhaṃ manasā dhammacariyasamacariyā hoti .pe.
Evaṃ kho brāhmaṇa tividhaṃ manasā dhammacariyasamacariyā hoti evaṃ
dhammacariyasamacariyāhetu kho brāhmaṇa evamidhekacce sattā kāyassa
bhedā parammaraṇā sugatiṃ saggaṃ lokaṃ upapajjantīti . abhikkantaṃ bho
gotama .pe. upāsakaṃ maṃ bhavaṃ gotamo dhāretu ajjatagge pāṇupetaṃ
saraṇaṅgatanti.
Paṭhamavaggo 2- paṭhamo.
----------
Dutiyavaggo dutiyo
[198] Dasahi bhikkhave dhammehi samannāgato yathābhataṃ nikkhitto
evaṃ niraye katamehi dasahi pāṇātipātī hoti adinnādāyī hoti
kāmesu micchācārī hoti musāvādī hoti pisuṇavāco hoti pharusavāco
hoti samphappalāpī 3- hoti abhijjhālu hoti byāpannacitto hoti
micchādiṭṭhiko hoti imehi kho bhikkhave dasahi dhammehi
@Footnote: 1 dhammacariyāsamacariyātipi pāṭho. 2 Po. Ma. Yu. karajakāyavaggo. 3 Po. samphappalāpo.
Samannāgato yathābhataṃ nikkhitto evaṃ niraye . dasahi bhikkhave dhammehi
samannāgato yathābhataṃ nikkhitto evaṃ sagge katamehi dasahi pāṇātipātā
paṭivirato hoti adinnādānā paṭivirato hoti kāmesu micchācārā
paṭivirato hoti musāvādā paṭivirato hoti pisuṇāya vācāya paṭivirato hoti
pharusāya vācāya paṭivirato hoti samphappalāpā paṭivirato hoti anabhijjhālu
hoti abyāpannacitto hoti sammādiṭṭhiko hoti imehi kho bhikkhave
dhammehi samannāgato yathābhataṃ nikkhitto evaṃ saggeti.
[199] Vīsatiyā bhikkhave dhammehi samannāgato yathābhataṃ nikkhitto
evaṃ niraye katamehi vīsatiyā attanā ca pāṇātipātī hoti parañca
pāṇātipāte samādapeti attanā ca adinnādāyī hoti parañca
adinnādāne samādapeti attanā ca kāmesu micchācārī hoti parañca
kāmesu micchācāre samādapeti attanā ca musāvādī hoti parañca
musāvāde samādapeti attanā ca pisuṇavāco hoti parañca pisuṇāya
vācāya samādapeti attanā ca pharusavāco hoti parañca pharusāya
vācāya samādapeti attanā ca samphappalāpī hoti parañca
samphappalāpe samādapeti attanā ca abhijjhālu hoti parañca
abhijjhāya samādapeti attanā ca byāpannacitto hoti parañca
byāpāde samādapeti attanā ca micchādiṭṭhiko hoti parañca
micchādiṭṭhiyā samādapeti imehi kho bhikkhave vīsatiyā
Dhammehi samannāgato yathābhataṃ nikkhitto evaṃ niraye.
{199.1} Vīsatiyā bhikkhave dhammehi samannāgato yathābhataṃ nikkhitto
evaṃ sagge katamehi vīsatiyā attanā ca pāṇātipātā paṭivirato hoti
parañca pāṇātipātā veramaṇiyā samādapeti attanā ca adinnādānā
paṭivirato hoti parañca adinnādānā veramaṇiyā samādapeti attanā
ca kāmesu micchācārā paṭivirato hoti parañca kāmesu micchācārā
veramaṇiyā samādapeti attanā ca musāvādā paṭivirato hoti parañca
musāvādā veramaṇiyā samādapeti attanā ca pisuṇāya vācāya
paṭivirato hoti parañca pisuṇāya vācāya veramaṇiyā samādapeti
attanā ca pharusāya vācāya paṭivirato hoti parañca pharusāya
vācāya veramaṇiyā samādapeti attanā ca samphappalāpā paṭivirato
hoti parañca samphappalāpā veramaṇiyā samādapeti attanā ca
anabhijjhālu hoti parañca anabhijjhāya samādapeti attanā
ca abyāpannacitto hoti parañca abyāpāde samādapeti
attanā ca sammādiṭṭhiko hoti parañca sammādiṭṭhiyā samādapeti
imehi kho bhikkhave vīsatiyā dhammehi samannāgato yathābhataṃ nikkhitto
evaṃ saggeti.
[200] Tiṃsāya bhikkhave dhammehi samannāgato yathābhataṃ nikkhitto
evaṃ niraye katamehi tiṃsāya attanā ca pāṇātipātī hoti parañca
pāṇātipāte samādapeti pāṇātipāte ca samanuñño hoti
Attanā ca adinnādāyī hoti parañca adinnādāne samādapeti
adinnādāne ca samanuñño hoti attanā ca kāmesu micchācārī
hoti parañca kāmesu micchācāre samādapeti kāmesu micchācāre
ca samanuñño hoti attanā ca musāvādī hoti parañca musāvāde
samādapeti musāvāde ca samanuñño hoti attanā ca pisuṇavāco
hoti parañca pisuṇāya vācāya samādapeti pisuṇāya ca vācāya
samanuñño hoti attanā ca pharusavāco hoti parañca pharusāya
vācāya samādapeti pharusāya ca vācāya samanuñño hoti attanā
ca samphappalāpī hoti parañca samphappalāpe samādapeti samphappalāpe
ca samanuñño hoti attanā ca abhijjhālu hoti parañca abhijjhāya
samādapeti abhijjhāya ca samanuñño hoti attanā ca byāpannacitto
hoti parañca byāpāde samādapeti byāpāde ca samanuñño hoti
attanā ca micchādiṭṭhiko hoti parañca micchādiṭṭhiyā ca samādapeti
micchādiṭṭhiyā ca samanuñño hoti imehi kho bhikkhave tiṃsāya dhammehi
samannāgato yathābhataṃ nikkhitto evaṃ niraye.
{200.1} Tiṃsāya bhikkhave dhammehi samannāgato yathābhataṃ nikkhitto
evaṃ sagge katamehi tiṃsāya attanā ca pāṇātipātā paṭivirato
hoti parañca pāṇātipātā veramaṇiyā samādapeti pāṇātipātā
veramaṇiyā ca samanuñño hoti attanā ca adinnādānā paṭivirato
hoti parañca adinnādānā veramaṇiyā samādapeti adinnādānā
Veramaṇiyā ca samanuñño hoti attanā ca kāmesu micchācārā
paṭivirato hoti parañca kāmesu micchācārā veramaṇiyā samādapeti
kāmesu micchācārā veramaṇiyā ca samanuñño hoti attanā ca
musāvādā paṭivirato hoti parañca musāvādā veramaṇiyā ca samādapeti
musāvādā veramaṇiyā ca samanuñño hoti attanā ca pisuṇāya
vācāya paṭivirato hoti parañca pisuṇāya vācāya veramaṇiyā samādapeti
pisuṇāya vācāya veramaṇiyā ca samanuñño hoti attanā ca pharusāya
vācāya paṭivirato hoti parañca pharusāya vācāya veramaṇiyā samādapeti
pharusāya ca vācāya veramaṇiyā samanuñño hoti attanā ca samphappalāpā
paṭivirato hoti parañca samphappalāpā veramaṇiyā samādapeti
samphappalāpā veramaṇiyā ca samanuñño hoti attanā ca anabhijjhālu
hoti parañca anabhijjhāya samādapeti anabhijjhāya ca samanuñño
hoti attanā ca abyāpannacitto hoti parañca abyāpāde
samādapeti abyāpāde ca samanuñño hoti attanā ca sammādiṭṭhiko
hoti parañca sammādiṭṭhiyā samādapeti sammādiṭṭhiyā
ca samanuñño hoti imehi kho bhikkhave tiṃsāya dhammehi samannāgato
yathābhataṃ nikkhitto evaṃ saggeti.
[201] Cattāḷīsāya 1- bhikkhave dhammehi samannāgato yathābhataṃ
nikkhitto evaṃ niraye katamehi cattāḷīsāya attanā ca pāṇātipātī
hoti parañca pāṇātipāte samādapeti pāṇātipāte ca samanuñño
@Footnote: 1 Yu. cattālīsāya.
Hoti pāṇātipātassa ca vaṇṇaṃ bhāsati attanā ca adinnādāyī
hoti parañca adinnādāne samādapeti adinnādāne ca samanuñño
hoti adinnādānassa ca vaṇṇaṃ bhāsati attanā ca kāmesu
micchācārī hoti parañca kāmesu micchācāre samādapeti kāmesu
micchācāre ca samanuñño hoti kāmesu micchācārassa ca vaṇṇaṃ
bhāsati attanā ca musāvādī hoti parañca musāvāde samādapeti
musāvāde ca samanuñño hoti musāvādassa ca vaṇṇaṃ bhāsati
attanā ca pisuṇavāco hoti parañca pisuṇāya vācāya samādapeti
pisuṇāya ca vācāya samanuñño hoti pisuṇāya ca vācāya vaṇṇaṃ
bhāsati attanā ca pharusavāco hoti parañca pharusāya vācāya
samādapeti pharusāya ca vācāya samanuñño hoti pharusāya ca
vācāya vaṇṇaṃ bhāsati attanā ca samphappalāpī hoti parañca
samphappalāpe samādapeti samphappalāpe ca samanuñño hoti
samphappalāpassa ca vaṇṇaṃ bhāsati attanā ca abhijjhālu hoti
parañca abhijjhāya samādapeti abhijjhāya ca samanuñño hoti
abhijjhāya ca vaṇṇaṃ bhāsati attanā ca byāpannacitto hoti
parañca byāpāde samādapeti byāpāde ca samanuñño hoti
byāpādassa ca vaṇṇaṃ bhāsati attanā ca micchādiṭṭhi 1- hoti
parañca micchādiṭṭhiyā samādapeti micchādiṭṭhiyā ca samanuñño hoti
micchādiṭṭhiyā ca vaṇṇaṃ bhāsati imehi kho bhikkhave cattāḷīsāya dhammehi
@Footnote: 1 Ma. Yu. micchādiṭṭhiko hoti.
Samannāgato yathābhataṃ nikkhitto evaṃ niraye.
{201.1} Cattāḷīsāya bhikkhave dhammehi samannāgato yathābhataṃ
nikkhitto evaṃ sagge katamehi cattāḷīsāya attanā ca pāṇātipātā
veramaṇiyā paṭivirato hoti parañca pāṇātipātā veramaṇiyā samādapeti
pāṇātipātā veramaṇiyā ca samanuñño hoti pāṇātipātā veramaṇiyā
ca vaṇṇaṃ bhāsati attanā ca adinnādānā paṭivirato hoti parañca
adinnādānā veramaṇiyā samādapeti adinnādānā veramaṇiyā ca
samanuñño hoti adinnādānā veramaṇiyā ca vaṇṇaṃ bhāsati attanā
ca kāmesu micchācārā paṭivirato hoti parañca kāmesu micchācārā
veramaṇiyā samādapeti kāmesu micchācārā veramaṇiyā ca samanuñño
hoti kāmesu micchācārā veramaṇiyā ca vaṇṇaṃ bhāsati attanā ca
musāvādā paṭivirato hoti parañca musāvādā veramaṇiyā samādapeti
musāvādā veramaṇiyā ca samanuñño hoti musāvādā veramaṇiyā
ca vaṇṇaṃ bhāsati attanā ca pisuṇāya vācāya paṭivirato hoti
parañca pisuṇāya vācāya veramaṇiyā samādapeti pisuṇāya vācāya
veramaṇiyā ca samanuñño hoti pisuṇāya vācāya veramaṇiyā ca vaṇṇaṃ
bhāsati attanā ca pharusāya vācāya paṭivirato hoti parañca
pharusāya vācāya veramaṇiyā samādapeti pharusāya vācāya veramaṇiyā
ca samanuñño hoti pharusāya vācāya veramaṇiyā ca vaṇṇaṃ bhāsati
attanā ca samphappalāpā paṭivirato hoti parañca samphappalāpā
Veramaṇiyā ca samādapeti samphappalāpā veramaṇiyā ca samanuñño
hoti samphappalāpā veramaṇiyā ca vaṇṇaṃ bhāsati attanā ca
anabhijjhālu hoti parañca anabhijjhāya samādapeti anabhijjhāya
ca samanuñño hoti anabhijjhāya ca vaṇṇaṃ bhāsati attanā ca
abyāpannacitto hoti parañca abyāpāde samādapeti abyāpāde
ca samanuñño hoti abyāpādassa ca vaṇṇaṃ bhāsati attanā
ca sammādiṭṭhiko hoti parañca sammādiṭṭhiyā samādapeti sammādiṭṭhiyā
ca samanuñño hoti sammādiṭṭhiyā ca vaṇṇaṃ bhāsati imehi kho bhikkhave
cattāḷīsāya dhammehi samannāgato yathābhataṃ nikkhitto evaṃ saggeti.
[202] Dasahi bhikkhave dhammehi samannāgato khataṃ upahataṃ attānaṃ
pariharati ... akkhataṃ anupahataṃ attānaṃ pariharati ... Vīsatiyā bhikkhave ...
Tiṃsāya bhikkhave ... cattāḷīsāya bhikkhave dhammehi samannāgato khataṃ
upahataṃ attānaṃ pariharati ... akkhataṃ anupahataṃ attānaṃ pariharati .pe.
Imehi kho bhikkhave cattāḷīsāya dhammehi samannāgato akkhataṃ anupahataṃ
attānaṃ pariharatīti.
Dutiyavaggo dutiyo.
----------
Tatiyavaggo tatiyo
[203] Dasahi bhikkhave dhammehi samannāgato idhekacco kāyassa bhedā
parammaraṇā apāyaṃ duggatiṃ vinipātaṃ nirayaṃ upapajjati ... idhekacco
kāyassa bhedā parammaraṇā sugatiṃ saggaṃ lokaṃ upapajjati ... vīsatiyā
bhikkhave ... Tiṃsāya bhikkhave ... Cattāḷīsāya bhikkhave dhammehi samannāgato
idhekacco kāyassa bhedā parammaraṇā apāyaṃ duggatiṃ vinipātaṃ nirayaṃ
upapajjati ... idhekacco kāyassa bhedā parammaraṇā sugatiṃ saggaṃ lokaṃ
upapajjati .pe. dasahi bhikkhave dhammehi samannāgato bālo veditabbo
... paṇḍito veditabbo ... Vīsatiyā bhikkhave ... Tiṃsāya bhikkhave ...
Cattāḷīsāya bhikkhave dhammehi samannāgato bālo veditabbo ...
Paṇḍito veditabbo imehi kho bhikkhave cattāḷīsāya dhammehi
samannāgato paṇḍito veditabbo.
Tatiyavaggo tatiyo.
(imesu catutthapañcamesu vaggesu suttagaṇanā peyyālavasena veditabbā)
[204] Rāgassa bhikkhave abhiññāya dasa dhammā bhāvetabbā katame
dasa asubhasaññā maraṇasaññā āhāre paṭikkūlasaññā sabbaloke
anabhiratasaññā 1- aniccasaññā anicce dukkhasaññā dukkhe anattasaññā
pahānasaññā virāgasaññā nirodhasaññā rāgassa bhikkhave abhiññāya
ime dasa dhammā bhāvetabbāti.
[205] Rāgassa bhikkhave abhiññāya dasa dhammā bhāvetabbā katame
@Footnote: 1 Ma. anabhiratisaññā.
Dasa aniccasaññā anattasaññā āhāre paṭikkūlasaññā sabbaloke
anabhiratasaññā aṭṭhikasaññā puḷuvakasaññā vinīlakasaññā
vipubbakasaññā vicchiddakasaññā uddhūmātakasaññā rāgassa
bhikkhave abhiññāya ime dasa dhammā bhāvetabbāti.
[206] Rāgassa bhikkhave abhiññāya dasa dhammā bhāvetabbā
katame dasa sammādiṭṭhi sammāsaṅkappo sammāvācā sammākammanto
sammāājīvo sammāvāyāmo sammāsati sammāsamādhi sammāñāṇaṃ
sammāvimutti rāgassa bhikkhave abhiññāya ime dasa dhammā bhāvetabbāti.
[207] Rāgassa bhikkhave pariññāya parikkhayāya pahānāya khayāya vayāya
virāgāya nirodhāya upasamāya cāgāya paṭinissaggāya dasa dhammā bhāvetabbā
.pe. dosassa mohassa kodhassa upanāhassa makkhassa palāsassa
issāya macchariyassa māyāya sāṭheyyassa thambhassa sārambhassa mānassa
atimānassa madassa pamādassa abhiññāya pariññāya parikkhayāya pahānāya
khayāya vayāya virāgāya nirodhāya upasamāya cāgāya paṭinissaggāya
ime dasa dhammā bhāvetabbāti.
Pañcamapaṇṇāsako pañcamo.
Dasakanipāto niṭṭhito.
---------
Suttantapiṭake aṅguttaranikāyassa
ekādasakanipāto
---------
namo tassa bhagavato arahato sammāsambuddhassa
nissāyavaggo paṭhamo
[208] 1 Evamme 1- sutaṃ. Ekaṃ samayaṃ bhagavā sāvatthiyaṃ viharati
jetavane anāthapiṇḍikassa ārāme . athakho āyasmā ānando yena
bhagavā tenupasaṅkami upasaṅkamitvā bhagavantaṃ abhivādetvā ekamantaṃ
nisīdi ekamantaṃ nisinno kho āyasmā ānando bhagavantaṃ etadavoca
kimatthiyāni bhante kusalāni sīlāni kimānisaṃsānīti . avippaṭisāratthāni
kho ānanda kusalāni sīlāni avippaṭisārānisaṃsāni.
{208.1} Avippaṭisāro pana bhante kimatthiyo kimānisaṃsoti .
Avippaṭisāro kho ānanda pāmujjattho pāmujjānisaṃso . pāmujjaṃ
pana bhante kimatthiyaṃ kimānisaṃsanti . pāmujjaṃ kho ānanda pītatthaṃ
pītānisaṃsaṃ . pīti pana bhante kimatthiyā kimānisaṃsāti . pīti kho
ānanda passaddhatthā passaddhānisaṃsā . passaddhi pana bhante
kimatthiyā kimānisaṃsāti . passaddhi kho ānanda sukhatthā
sukhānisaṃsā . sukhaṃ pana bhante kimatthiyaṃ kimānisaṃsanti . sukhaṃ kho
ānanda samādhatthaṃ samādhānisaṃsaṃ . samādhi pana bhante kimatthiyo
kimānisaṃsoti . samādhi kho ānanda yathābhūtañāṇadassanattho
@Footnote: 1 Yu. evamme sutaṃ ... ārāmeti natthi.
Yathābhūtañāṇadassanānisaṃso . yathābhūtañāṇadassanaṃ pana bhante
kimatthiyaṃ kimānisaṃsanti . yathābhūtañāṇadassanaṃ kho ānanda
nibbidatthaṃ nibbidānisaṃsaṃ . nibbidā pana bhante kimatthiyā
kimānisaṃsāti . nibbidā kho ānanda virāgatthā virāgānisaṃsā .
Virāgo pana bhante kimatthiyo kimānisaṃsoti . virāgo kho ānanda
vimuttiñāṇadassanattho vimuttiñāṇadassanānisaṃsoti iti kho ānanda
kusalāni sīlāni avippaṭisāratthāni avippaṭisārānisaṃsāni
avippaṭisāro pāmujjattho pāmujjānisaṃso pāmujjaṃ pītatthaṃ
pītānisaṃsaṃ pīti passaddhatthā passaddhānisaṃsā passaddhi sukhatthā
sukhānisaṃsā sukhaṃ samādhatthaṃ samādhānisaṃsaṃ samādhi yathābhūtañāṇadassanattho
yathābhūtañāṇadassanānisaṃso yathābhūtañāṇadassanaṃ nibbidatthaṃ
nibbidānisaṃsaṃ nibbidā virāgatthā virāgānisaṃsā virāgo
vimuttiñāṇadassanattho vimuttiñāṇadassanānisaṃso iti kho
ānanda kusalāni sīlāni anupubbena arahattāya paripūrentīti.
[209] 2 Sīlavato bhikkhave sīlasampannassa na cetanāya karaṇīyaṃ
avippaṭisāro me uppajjatūti dhammatā esā bhikkhave yaṃ sīlavato
sīlasampannassa avippaṭisāro uppajjati avippaṭisārissa 1- bhikkhave
na cetasā karaṇīyaṃ pāmujjaṃ me uppajjatūti dhammatā esā bhikkhave
yaṃ avippaṭisārissa pāmujjaṃ uppajjati pamuditassa bhikkhave na cetanāya
karaṇīyaṃ pīti me uppajjatūti dhammatā esā bhikkhave yaṃ pamuditassa
pīti uppajjati pītimanassa bhikkhave na cetanāya karaṇīyaṃ kāyo
@Footnote: 1 Po. Ma. avippaṭisārassa.
Me passambhatūti dhammatā esā bhikkhave yaṃ pītimanassa kāyo
passambhati passaddhakāyassa 1- bhikkhave na cetanāya karaṇīyaṃ sukhaṃ
vediyāmīti dhammatā esā bhikkhave yaṃ passaddhakāyo sukhaṃ vediyati
sukhino bhikkhave na cetanāya karaṇīyaṃ cittaṃ me samādhiyatūti dhammatā
esā bhikkhave yaṃ sukhino cittaṃ samādhiyati samāhitassa bhikkhave
na cetanāya karaṇīyaṃ yathābhūtaṃ pajānāmi passāmīti dhammatā esā
bhikkhave yaṃ samāhito yathābhūtaṃ pajānāti passati yathābhūtaṃ bhikkhave
jānato 2- passato na cetanāya karaṇīyaṃ nibbindāmīti dhammatā esā
bhikkhave yaṃ yathābhūtaṃ jānaṃ passaṃ nibbindati nibbinnassa bhikkhave
na cetanāya karaṇīyaṃ virajjāmīti dhammatā esā bhikkhave yaṃ nibbinno
virajjati virattassa bhikkhave na cetanāya karaṇīyaṃ vimuttiñāṇadassanaṃ
sacchikaromīti dhammatā esā bhikkhave yaṃ viratto vimuttiñāṇadassanaṃ
sacchikaroti iti kho bhikkhave virāgo vimuttiñāṇadassanattho
vimuttiñāṇadassanānisaṃso nibbidā virāgatthā virāgānisaṃsā
yathābhūtañāṇadassanaṃ nibbidatthaṃ nibbidānisaṃsaṃ samādhi
yathābhūtañāṇadassanattho yathābhūtañāṇadassanānisaṃso sukhaṃ
samādhatthaṃ samādhānisaṃsaṃ passaddhi sukhatthā sukhānisaṃsā pīti
passaddhatthā 3- passaddhānisaṃsā pāmujjaṃ pītatthaṃ pītānisaṃsaṃ
avippaṭisāro pāmujjattho pāmujjānisaṃso kusalāni sīlāni
avippaṭisāratthāni avippaṭisārānisaṃsāni iti kho bhikkhave dhammā [4]-
@Footnote: 1 Po. passaddhikāyassa. 2 Po. jānatā passatā. 3 Po. passaddhitthā.
@4 Yu. casaddo atthi.
Dhamme abhisandenti 1- dhammā [2]- dhamme paripūrenti apārā
pāragamanāyāti.
[210] 3 Dussīlassa bhikkhave sīlavipannassa hatūpaniso hoti
avippaṭisāro avippaṭisāre asati avippaṭisāravipannassa hatūpanisaṃ
hoti pāmujjaṃ pāmujje asati pāmujjavipannassa hatūpanisā hoti
pīti pītiyā asati pītivipannassa hatūpanisā hoti passaddhi passaddhiyā
asati passaddhivipannassa hatūpanisaṃ hoti sukhaṃ sukhe asati sukhavipannassa
hatūpaniso hoti sammāsamādhi sammāsamādhimhi asati sammāsamādhivipannassa
hatūpanisaṃ hoti yathābhūtañāṇadassanaṃ yathābhūtañāṇadassane asati
yathābhūtañāṇadassanavipannassa hatūpanisā hoti nibbidā nibbidāya
asati nibbidāvipannassa hatūpaniso hoti virāgo virāge asati
virāgavipannassa hatūpanisaṃ hoti vimuttiñāṇadassanaṃ seyyathāpi bhikkhave
rukkho sākhāpalāsavipanno tassa pappaṭikāpi 3- na pāripūriṃ gacchati
tacopi pheggupi sāropi na pāripūriṃ gacchati evameva kho bhikkhave
dussīlassa sīlavipannassa hatūpaniso hoti avippaṭisāro avippaṭisāre
asati avippaṭisāravipannassa hatūpanisaṃ hoti .pe. vimuttiñāṇadassanaṃ 4-.
Sīlavato bhikkhave sīlasampannassa upanisasampanno hoti avippaṭisāro
avippaṭisāre sati avippaṭisārasampannassa upanisasampannaṃ hoti pāmujjaṃ
pāmujje sati pāmujjasampannassa upanisasampannā hoti pīti pītiyā
sati pītisampannassa upanisasampannā hoti passaddhi passaddhiyā sati
passaddhisampannassa upanisasampannaṃ hoti sukhaṃ sukhe sati sukhasampannassa
@Footnote: 1 Po. abhisaṅkhāpavādenti. 2 Yu. casaddo atthi. 3 Ma. Yu. sabbattha papaṭikāpīti
@dissati. 4 Po. vimuttiñāṇadassananti.
Upanisasampanno hoti sammāsamādhi sammāsamādhimhi sati sammāsamādhisampannassa
upanisasampannaṃ hoti yathābhūtañāṇadassanaṃ yathābhūtañāṇadassane sati
yathābhūtañāṇadassanasampannassa upanisasampannā hoti nibbidā nibbidāya
sati nibbidāsampannassa upanisasampanno hoti virāgo virāge sati
virāgasampannassa upanisasampannaṃ hoti vimuttiñāṇadassanaṃ seyyathāpi
bhikkhave rukkho sākhāpalāsasampanno tassa pappaṭikāpi pāripūriṃ gacchati
tacopi pheggupi sāropi pāripūriṃ gacchati evameva kho bhikkhave sīlavato
sīlasampannassa upanisasampanno hoti avippaṭisāro avippaṭisāre sati
avippaṭisārasampannassa upanisasampannaṃ hoti .pe. Vimuttiñāṇadassananti.
[211] 4 Tatra kho āyasmā sārīputto bhikkhū āmantesi
āvuso bhikkhavoti . āvusoti kho te bhikkhū āyasmato sārīputtassa
paccassosuṃ . āyasmā sārīputto etadavoca dussīlassa āvuso
sīlavipannassa hatūpaniso hoti avippaṭisāro avippaṭisāre asati
avippaṭisāravipannassa hatūpanisaṃ hoti pāmujjaṃ pāmujje asati
pāmujjavipannassa hatūpanisā hoti pīti pītiyā asati pītivipannassa
hatūpanisā hoti passaddhi passaddhiyā asati passaddhivipannassa
hatūpanisaṃ hoti sukhaṃ sukhe asati sukhavipannassa hatūpaniso hoti
sammāsamādhi sammāsamādhimhi asati sammāsamādhivipannassa
hatūpanisaṃ hoti yathābhūtañāṇadassanaṃ yathābhūtañāṇadassane
asati yathābhūtañāṇadassanavipannassa hatūpanisā hoti
Nibbidā nibbidāya asati nibbidāvipannassa hatūpaniso hoti virāgo
virāge asati virāgavipannassa hatūpanisaṃ hoti vimuttiñāṇadassanaṃ
seyyathāpi āvuso rukkho sākhāpalāsavipanno tassa pappaṭikāpi na
pāripūriṃ gacchati tacopi pheggupi sāropi na pāripūriṃ gacchati evameva
kho āvuso dussīlassa sīlavipannassa hatūpaniso hoti avippaṭisāro
avippaṭisāre asati avippaṭisāravipannassa hatūpanisaṃ hoti .pe.
Vimuttiñāṇadassanaṃ . sīlavato āvuso sīlasampannassa upanisasampanno
hoti avippaṭisāro avippaṭisāre sati avippaṭisārasampannassa
upanisasampannaṃ hoti pāmujjaṃ pāmujje sati pamujjasampannassa
upanisasampanno hoti pīti pītiyā sati pītisampannassa upanisasampannā
hoti passaddhi passaddhiyā sati passaddhisampannassa upanisasampannaṃ
hoti sukhaṃ sukhe sati sukhasampannassa upanisasampanno hoti sammāsamādhi
sammāsamādhimhi sati sammāsamādhisampannassa upanisasampannaṃ hoti
yathābhūtañāṇadassanaṃ yathābhūtañāṇadassane sati yathābhūtañāṇadassanasampannassa
upanisasampannā hoti nibbidā nibbidāya sati nibbidāsampannassa
upanisasampanno hoti virāgo virāge sati virāgasampannassa
upanisasampannaṃ hoti vimuttiñāṇadassanaṃ seyyathāpi āvuso
rukkho sākhāpalāsasampanno tassa pappaṭikāpi pāripūriṃ gacchati
tacopi pheggupi sāropi pāripūriṃ gacchati evameva kho āvuso
sīlavato sīlasampannassa upanisasampanno hoti avippaṭisāro
Avippaṭisāre sati avippaṭisārasampannassa upanisasampannaṃ
hoti .pe. Vimuttiñāṇadassananti.
[212] 5 Tatra kho āyasmā ānando bhikkhū āmantesi .pe. Dussīlassa
āvuso sīlavipannassa hatūpaniso hoti avippaṭisāro avippaṭisāre
asati avippaṭisāravipannassa hatūpanisaṃ hoti pāmujjaṃ pāmujje asati
pāmujjavipannassa hatūpanisā hoti pīti pītiyā asati pītivipannassa
hatūpanisā hoti passaddhi passaddhiyā asati passaddhivipannassa hatūpanisaṃ
hoti sukhaṃ sukhe asati sukhavipannassa hatūpaniso hoti sammāsamādhi
sammāsamādhimhi asati sammāsamādhivipannassa hatūpanisaṃ hoti yathābhūta-
ñāṇadassanaṃ yathābhūtañāṇadassane asati yathābhūtañāṇadassanavipannassa
hatūpanisā hoti nibbidā nibbidāya asati nibbidāvipannassa hatūpaniso
hoti virāgo virāge asati virāgavipannassa hatūpanisaṃ hoti vimuttiñāṇadassanaṃ
seyyathāpi āvuso rukkho sākhāpalāsavipanno tassa pappaṭikāpi na
pāripūriṃ gacchati tacopi pheggupi sāropi na pāripūriṃ gacchati evameva
kho āvuso dussīlassa sīlavipannassa hatūpaniso hoti avippaṭisāro
avippaṭisāre asati avippaṭisāravipannassa hatūpanisaṃ hoti .pe.
Vimuttiñāṇadassanaṃ.
{212.1} Sīlavato āvuso sīlasampannassa upanisasampanno
hoti avippaṭisāro avippaṭisāre sati avippaṭisārasampannassa
upanisasampannaṃ hoti pāmujjaṃ pāmujje sati pāmujjasampannassa
upanisasampannā hoti pīti pītiyā sati pītisampannassa
Upanisasampannā hoti passaddhi passaddhiyā sati passaddhisampannassa
upanisasampannaṃ hoti sukhaṃ sukhe sati sukhasampannassa upanisasampanno
hoti sammāsamādhi sammāsamādhimhi sati sammāsamādhisampannassa
upanisasampannaṃ hoti yabhābhūtañāṇadassanaṃ yathābhūtañāṇadassane sati
yathābhūtañāṇadassanasampannassa upanisasampannā hoti nibbidā
nibbidāya sati nibbidāsampannassa upanisasampanno hoti virāgo
virāge sati virāgasampannassa upanisasampannaṃ hoti vimuttiñāṇadassanaṃ
seyyathāpi [1]- rukkho sākhāpalāsasampanno tassa pappaṭikāpi
pāripūriṃ gacchati tacopi pheggupi sāropi pāripūriṃ gacchati evameva kho
āvuso sīlavato sīlasampannassa upanisasampanno hoti avippaṭisāro
avippaṭisāre sati avippaṭisārasampannassa upanisasampannaṃ hoti .pe.
Vimuttiñāṇadassananti.
[213] 6 Yo so bhikkhave bhikkhu akkosakaparibhāsako ariyūpavādī
sabrahmacārīnaṃ aṭṭhānametaṃ anavakāso yaṃ so ekādasannaṃ byasanānaṃ
aññataraṃ byasanaṃ na nigaccheyya katamesaṃ ekādasannaṃ anadhigataṃ
nādhigacchati adhigatā parihāyati saddhammassa na vodāyati saddhammesu
vā adhimāniko hoti anabhirato vā brahmacariyaṃ carati aññataraṃ
vā saṅkiliṭṭhaṃ āpattiṃ āpajjati sikkhaṃ vā paccakkhāya hīnāyāvattati
gāḷhaṃ vā rogātaṅgaṃ phusati ummādaṃ vā pāpuṇāti cittakkhepaṃ
sammūḷho kālaṃ karoti kāyassa bhedā parammaraṇā apāyaṃ duggatiṃ
@Footnote: 1 Po. Ma. āvuso.
Vinipātaṃ nirayaṃ upapajjati yo so bhikkhave bhikkhu akkosakaparibhāsako
ariyūpavādī sabrahmacārīnaṃ aṭṭhānametaṃ anavakāso yaṃ so imesaṃ
ekādasannaṃ byasanānaṃ aññataraṃ byasanaṃ na nigaccheyyāti.
[214] 7 Athakho āyasmā ānando yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi ekamantaṃ nisinno
kho āyasmā ānando bhagavantaṃ etadavoca siyā nu kho bhante bhikkhuno
tathārūpo samādhipaṭilābho yathā neva paṭhaviyaṃ paṭhavīsaññī assa na
āpasmiṃ āposaññī assa na tejasmiṃ tejosaññī assa na vāyasmiṃ
vāyosaññī assa na ākāsānañcāyatane ākāsānañcāyatanasaññī
assa na viññāṇañcāyatane viññāṇañcāyatanasaññī assa na
ākiñcaññāyatane ākiñcaññāyatanasaññī assa na
nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī assa
yamidaṃ 1- diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā
tatrāpi na saññī assa saññī ca pana assāti.
{214.1} Siyā ānanda bhikkhuno tathārūpo samādhipaṭilābho yathā
neva paṭhaviyaṃ paṭhavīsaññī assa na āpasmiṃ āposaññī assa na tejasmiṃ
tejosaññī assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane viññāṇañcāyatana-
saññī assa na ākiñcaññāyatane ākiñcaññāyatanasaññī
@Footnote: 1 Ma. Yu. yampidaṃ. ito paraṃ īdisameva.
Assa na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī assa
yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi
na saññī assa saññī ca pana assāti.
{214.2} Yathākathaṃ pana bhante siyā bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa na āpasmiṃ āposaññī assa na tejasmiṃ
tejosaññī assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane viññāṇañcāyatana-
saññī assa na ākiñcaññāyatane ākiñcaññāyatanasaññī assa na
nevasaññānāsaññāyatane nevasaññānāsaññāyatanasaññī assa na
idhaloke idhalokasaññī assa na paraloke paralokasaññī assa yamidaṃ diṭṭhaṃ
sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi na saññī
assa saññī ca pana assāti . idhānanda bhikkhu evaṃsaññī hoti etaṃ
santaṃ etaṃ paṇītaṃ yadidaṃ sabbasaṃkhārasamatho sabbūpadhipaṭinissaggo
taṇhakkhayo virāgo nirodho nibbānanti evaṃ kho ānanda siyā
bhikkhuno tathārūpo samādhipaṭilābho yathā neva paṭhaviyaṃ paṭhavīsaññī assa
na āpasmiṃ āposaññī assa na tejasmiṃ tejosaññī assa na vāyasmiṃ
vāyosaññī assa na ākāsānañcāyatane ākāsānañcāyatanasaññī
assa na viññāṇañcāyatane viññāṇañcāyatanasaññī
Assa na ākiñcaññāyatane ākiñcaññāyatanasaññī assa
na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī
assa yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā
tatrāpi na saññī assa saññī ca pana assāti.
{214.3} Athakho āyasmā ānando bhagavato bhāsitaṃ abhinanditvā
anumoditvā uṭṭhāyāsanā bhagavantaṃ abhivādetvā padakkhiṇaṃ katvā
yenāyasmā sārīputto tenupasaṅkami upasaṅkamitvā āyasmatā
sārīputtena saddhiṃ sammodi sammodanīyaṃ kathaṃ sārāṇīyaṃ vītisāretvā
ekamantaṃ nisīdi ekamantaṃ nisinno kho āyasmā ānando āyasmantaṃ
sārīputtaṃ etadavoca siyā nu kho āvuso sārīputta bhikkhuno tathārūpo
samādhipaṭilābho yathā neva paṭhaviyaṃ paṭhavīsaññī assa .pe. yamidaṃ
diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi
na saññī assa saññī ca pana assāti . siyā āvuso ānanda
bhikkhuno tathārūpo samādhipaṭilābho yathā neva paṭhaviyaṃ paṭhavīsaññī
assa .pe. yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ
manasā tatrāpi na saññī assa saññī ca pana assāti .
Yathākathaṃ panāvuso sārīputta siyā bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ
viññātaṃ pattaṃ pariyesitaṃ anuvicaritaṃ manasā tatrāpi na saññī
Assa saññī ca pana assāti.
{214.4} Idhāvuso ānanda bhikkhu evaṃsaññī hoti etaṃ santaṃ
etaṃ paṇītaṃ yadidaṃ sabbasaṅkhārasamatho sabbūpadhipaṭinissaggo taṇhakkhayo
virāgo nirodho nibbānanti evaṃ kho āvuso ānanda siyā bhikkhuno
tathārūpo samādhipaṭilābho yathā neva paṭhaviyaṃ paṭhavīsaññī assa .pe.
Yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi
na saññī assa saññī ca pana assāti . acchariyaṃ āvuso abbhūtaṃ
āvuso yatra hi nāma satthu ca 1- sāvakassa ca atthena atthaṃ byañjanena
byañjanaṃ saṃsandissati samessati na vigayhissati 2- yadidaṃ aggapadasmiṃ
idānāhaṃ āvuso bhagavantaṃ upasaṅkamitvā etamatthaṃ apucchiṃ bhagavāpi
me [3]- etehi padehi etehi byañjanehi etamatthaṃ byākāsi
seyyathāpi āyasmā sārīputto acchariyaṃ āvuso abbhūtaṃ āvuso
yatra hi nāma satthu ca sāvakassa ca atthena atthaṃ byañjanena byañjanaṃ
saṃsandissati samessati na vigayhissati yadidaṃ aggapadasminti.
[215] 8 Athakho āyasmā ānando yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi ekamantaṃ
nisinno kho āyasmā ānando bhagavantaṃ etadavoca siyā nu kho
bhante bhikkhuno tathārūpo samādhipaṭilābho yathā na cakkhuṃ manasikareyya
na rūpaṃ manasikareyya na sotaṃ manasikareyya na saddaṃ manasikareyya
@Footnote: 1 Ma. ceva. 2 Po. vigaṇhissati. Yu. viggahissati. 3 Ma. etehi akkharehi.
Na ghānaṃ manasikareyya na gandhaṃ manasikareyya na jivhaṃ manasikareyya
na rasaṃ manasikareyya na kāyaṃ manasikareyya na phoṭṭhabbaṃ manasikareyya
na paṭhaviṃ manasikareyya na āpaṃ manasikareyya na tejaṃ manasikareyya
na vāyaṃ manasikareyya na ākāsānañcāyatanaṃ manasikareyya na
viññāṇañcāyatanaṃ manasikareyya na ākiñcaññāyatanaṃ manasikareyya
na nevasaññānāsaññāyatanaṃ manasikareyya na idhalokaṃ manasikareyya
na paralokaṃ manasikareyya yamidaṃ diṭṭhaṃ sutaṃ mutaṃ viññātaṃ pattaṃ
pariyesitaṃ anuvicaritaṃ manasā tampi na manasikareyya manasi ca pana
kareyyāti.
{215.1} Siyā ānanda bhikkhuno tathārūpo samādhipaṭilābho
yathā na cakkhuṃ manasikareyya na rūpaṃ manasikareyya na sotaṃ manasikareyya
na saddaṃ manasikareyya na ghānaṃ manasikareyya na gandhaṃ manasikareyya
na jivhaṃ manasikareyya na rasaṃ manasikareyya na kāyaṃ manasikareyya
na phoṭṭhabbaṃ manasikareyya na paṭhaviṃ manasikareyya na āpaṃ manasikareyya
na tejaṃ manasikareyya na vāyaṃ manasikareyya na ākāsānañcāyatanaṃ
manasikareyya na viññāṇañcāyatanaṃ manasikareyya na
ākiñcaññāyatanaṃ manasikareyya na nevasaññānāsaññāyatanaṃ
manasikareyya na idhalokaṃ manasikareyya na paralokaṃ manasikareyya yamidaṃ
diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tampi na
manasikareyya manasi ca pana kareyyāti . yathākathaṃ pana bhante siyā
bhikkhuno tathārūpo samādhipaṭilābho yathā na cakkhuṃ manasikareyya
na rūpaṃ manasikareyya .pe. yamidaṃ diṭṭhaṃ sutaṃ mutaṃ viññātaṃ pattaṃ
Pariyesitaṃ anuvicaritaṃ manasā tampi na manasikareyya manasi ca pana
kareyyāti . idhānanda bhikkhu evaṃ manasikaroti etaṃ santaṃ etaṃ
paṇītaṃ yadidaṃ sabbasaṅkhārasamatho sabbūpadhipaṭinissaggo taṇhakkhayo
virāgo nirodho nibbānanti evaṃ kho ānanda siyā bhikkhuno tathārūpo
samādhipaṭilābho yathā na cakkhuṃ manasikareyya na rūpaṃ manasikareyya
na sotaṃ manasikareyya na saddaṃ manasikareyya na ghānaṃ manasikareyya
na gandhaṃ manasikareyya na jivhaṃ manasikareyya na rasaṃ manasikareyya
na kāyaṃ manasikareyya na phoṭṭhabbaṃ manasikareyya na paṭhaviṃ manasikareyya
na āpaṃ manasikareyya na tejaṃ manasikareyya na vāyaṃ manasikareyya
na ākāsānañcāyatanaṃ manasikareyya na viññāṇañcāyatanaṃ
manasikareyya na ākiñcaññāyatanaṃ manasikareyya na
nevasaññānāsaññāyatanaṃ manasikareyya na idhalokaṃ manasikareyya
na paralokaṃ manasikareyya yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ
anuvicaritaṃ manasā tampi na manasikareyya manasi ca pana kareyyāti.
[216] 9 Ekaṃ samayaṃ bhagavā nādike 1- viharati iñjakāvasathe 2-.
Athakho āyasmā sandho 3- yena bhagavā tenupasaṅkami upasaṅkamitvā
bhagavantaṃ abhivādetvā ekamantaṃ nisīdi . ekamantaṃ nisinnaṃ kho
āyasmantaṃ sandhaṃ bhagavā etadavoca ājānīyajhāyitaṃ kho sandha jhāya 4-
mā khaḷuṅgajhāyitaṃ 5- kathañca sandha 6- khaḷuṅgajhāyitaṃ hoti assakhaḷuṅgo
@Footnote: 1 Ma. Yu. nātike. 2 Ma. Yu. giñjakāvasathe. 3 Po. Ma. saddho. ito
@paraṃ evameva ñātabbaṃ. 4 Po. jhāyitaṃ. Yu. jhāyatha. 5 Ma. Yu. khaḷuṅkajhāyitaṃ.
@6 Ma. ayaṃ pāṭho natthi.
Hi sandha doṇiyā bandho 1- yavasassaṃ yavasassanti 2- jhāyati taṃ kissa
hetu na hi sandha assakhaḷuṅgassa doṇiyā bandhassa evaṃ hoti kiṃ
nu kho maṃ ajja assadammasārathi kāraṇaṃ kāressati kimassāhaṃ 3- paṭikaromīti
so doṇiyā bandho yavasassaṃ yavasassanti 2- jhāyati evameva kho sandha
idhekacco purisakhaḷuṅgo araññagatopi rukkhamūlagatopi suññāgāragatopi
kāmarāgapariyuṭṭhitena cetasā viharati kāmarāgaparetena uppannassa ca
kāmarāgassa nissaraṇaṃ yathābhūtaṃ nappajānāti so kāmarāgaṃ yeva anantaraṃ 4-
karitvā jhāyati pajjhāyati nijjhāyati avajjhāyati byāpādapariyuṭṭhitena
cetasā viharati .. thīnamiddhapariyuṭṭhitena cetasā viharati ...
Uddhaccakukkuccapariyuṭṭhitena cetasā viharati ... vicikicchāpariyuṭṭhitena
cetasā viharati vicikicchāparetena uppannāya ca vicikicchāya nissaraṇaṃ
yathābhūtaṃ nappajānāti so vicikicchaṃyeva anantaraṃ karitvā jhāyati pajjhāyati
nijjhāyati avajjhāyati so paṭhavimpi nissāya jhāyati āpampi nissāya
jhāyati tejampi nissāya jhāyati vāyampi nissāya jhāyati
ākāsānañcāyatanampi nissāya jhāyati viññāṇañcāyatanampi
nissāya jhāyati ākiñcaññāyatanampi nissāya jhāyati
nevasaññānāsaññāyatanampi nissāya jhāyati idhalokampi
nissāya jhāyati paralokampi nissāya jhāyati yamidaṃ diṭṭhaṃ sutaṃ
mutaṃ viññātaṃ pattaṃ pariyesitaṃ anuvicaritaṃ manasā tampi nissāya
jhāyati evaṃ kho sandha purisakhaḷuṅgajhāyitaṃ hoti . kathañca
@Footnote: 1 Po. Ma. Yu. baddho. sabbattha eseva nayo. 2 Po. yavasassaṃ varasassanti ...
@Ma. Yu. yavasaṃ yavasanti. 3 Po. katamasasāhaṃ. 4 Ma. Yu. antaraṃ karitvā.
Sandha ājānīyajhāyitaṃ hoti bhadro hi sandha assājānīyo doṇiyā
bandho na yavasassaṃ yavasassanti jhāyati taṃ kissa hetu bhadrassa
hi sandha assājānīyassa doṇiyā bandhassa evaṃ hoti kiṃ nu kho
maṃ ajja assadammasārathi kāraṇaṃ kāressati kimassāhaṃ paṭikaromīti
so doṇiyā bandho na yavasassaṃ yavasassanti jhāyati bhadro hi
sandha assājānīyo yathā iṇaṃ yathābandhaṃ yathā jāni yathā kalī 1- evaṃ
patodassa ajjhoharaṇaṃ samanupassati evameva kho sandha bhadro
purisājānīyo araññagatopi rukkhamūlagatopi suññāgāragatopi na
kāmarāgapariyuṭṭhitena cetasā viharati kāmarāgaparetena uppannassa ca
kāmarāgassa nissaraṇaṃ yathābhūtaṃ pajānāti na byāpādapariyuṭṭhitena
cetasā viharati ... na thīnamiddhapariyuṭṭhitena cetasā viharati ... na
uddhaccakukkuccapariyuṭṭhitena cetasā viharati ... na vicikicchāpariyuṭṭhitena
cetasā viharati na vicikicchāparetena uppannāya ca vicikicchāya
nissaraṇaṃ yathābhūtaṃ pajānāti so neva paṭhaviṃ nissāya jhāyati na āpaṃ
nissāya jhāyati na tejaṃ nissāya jhāyati na vāyaṃ nissāya jhāyati na
ākāsānañcāyatanaṃ nissāya jhāyati na viññāṇañcāyatanaṃ
nissāya jhāyati na ākiñcaññāyatanaṃ nissāya jhāyati na
nevasaññānāsaññāyatanaṃ nissāya jhāyati na idhalokaṃ nissāya jhāyati
na paralokaṃ nissāya jhāyati yamidaṃ diṭṭhaṃ sutaṃ mutaṃ viññātaṃ pattaṃ
pariyesitaṃ anuvicaritaṃ manasā tampi nissāya na jhāyati jhāyati capana
@Footnote: 1 Ma. Yu. yathā jāniṃ yathā thaliṃ.
Evaṃjhāyiñcapana sandha bhadraṃ purisājānīyaṃ saindā devā sabrahmakā
sapajāpatikā ārakāva namassanti
namo te purisājañña namo te purisuttama
yassa tenābhijānāma yampi nissāya jhāyatīti 1-.
[2]- Evaṃ vutte āyasmā sandho bhagavantaṃ etadavoca kathaṃ jhāyī
pana bhante bhadro purisājānīyo jhāyati so neva paṭhaviṃ nissāya
jhāyati na āpaṃ nissāya jhāyati na tejaṃ nissāya jhāyati
na vāyaṃ nissāya jhāyati na ākāsānañcāyatanaṃ nissāya jhāyati
na viññāṇañcāyatanaṃ nissāya jhāyati na ākiñcaññāyatanaṃ
nissāya jhāyati na nevasaññānāsaññāyatanaṃ nissāya jhāyati
na idhalokaṃ nissāya jhāyati na paralokaṃ nissāya jhāyati yamidaṃ
diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tampi
nissāya na jhāyati jhāyati capana kathaṃ jhāyiñcapana bhante bhadraṃ
purisājānīyaṃ saindā devā sabrahmakā sapajāpatikā ārakāva
namassanti
namo te purisājañña namo te purisuttama
yassa tenābhijānāma yampi nissāya jhāyatīti 3-.
Idha sandha bhadrassa purisājānīyassa paṭhaviyā paṭhavīsaññā vibhūtā
hoti āpasmiṃ āposaññā vibhūtā hoti tejasmiṃ tejosaññā
vibhūtā hoti vāyasmiṃ vāyosaññā vibhūtā hoti ākāsānañcāyatane
@Footnote: 1-3 Ma. Yu. jhāyasīti. 2 Po. evaṃ kho saddha ājānīyajhāyitaṃ hoti.
Ākāsānañcāyatanasaññā vibhūtā hoti viññāṇañcāyatane
viññāṇañcāyatanasaññā vibhūtā hoti ākiñcaññāyatane
ākiñcañāyatanasaññā vibhūtā hoti nevasaññānāsaññāyatane
nevasaññānāsaññāyatanasaññā vibhūtā hoti idhaloke idhalokasaññā
vibhūtā hoti paraloke paralokasaññā vibhūtā hoti yamidaṃ diṭṭhaṃ sutaṃ mutaṃ
viññātaṃ pattaṃ pariyesitaṃ anuvicaritaṃ manasā tatrāpi saññā vibhūtā
hoti evaṃjhāyī kho sandha bhadro purisājānīyo neva paṭhaviṃ nissāya
jhāyati na āpaṃ nissāya jhāyati na tejaṃ nissāya jhāyati na vāyaṃ
nissāya jhāyati na ākāsānañcāyatanaṃ nissāya jhāyati na
viññāṇañcāyatanaṃ nissāya jhāyati na ākiñcaññāyatanaṃ nissāya
jhāyati na nevasaññānāsaññāyatanaṃ nissāya jhāyati na idhalokaṃ
nissāya jhāyati na paralokaṃ nissāya jhāyati yamidaṃ diṭṭhaṃ sutaṃ
mutaṃ viññātaṃ pattaṃ pariyesitaṃ anuvicaritaṃ manasā tampi nissāya na
jhāyati jhāyati capana evaṃjhāyiñcapana sandha bhadraṃ purisājānīyaṃ
saindā devā sabrahmakā sapajāpatikā ārakāva namassanti
namo te purisājañña namo te purisuttama
yassa tenābhijānāma yampi nissāya jhāyatīti 1-.
[217] 10 Ekaṃ samayaṃ bhagavā rājagahe viharati moranivāpe
paribbājakārāme . tatra kho bhagavā bhikkhū āmantesi bhikkhavoti .
@Footnote: 1 Ma. Yu. jhāyasiti.
Bhadanteti te bhikkhū bhagavato paccassosuṃ . bhagavā etadavoca tīhi
bhikkhave dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṃ
katamehi tīhi asekkhena 1- sīlakkhandhena asekkhena samādhikkhandhena
asekkhena paññākkhandhena imehi kho bhikkhave tīhi dhammehi samannāgato
bhikkhu accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṃ.
{217.1} Aparehipi bhikkhave tīhi dhammehi samannāgato bhikkhu
accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṃ katamehi tīhi
iddhipāṭihāriyena ādesanāpāṭihāriyena anusāsanīpāṭihāriyena
imehi kho bhikkhave tīhi dhammehi samannāgato bhikkhu accantaniṭṭho
hoti accantayogakkhemī accantabrahmacārī accantapariyosāno
seṭṭho devamanussānaṃ.
{217.2} Aparehipi bhikkhave tīhi dhammehi samannāgato bhikkhu
accantaniṭṭho hoti accantayogakkhemī accantabrahmacārī
accantapariyosāno seṭṭho devamanussānaṃ katamehi tīhi sammādiṭṭhiyā
sammāñāṇena sammāvimuttiyā imehi kho bhikkhave tīhi dhammehi
samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṃ.
@Footnote: 1 Ma. Yu. sabbattha vāresu asekhena.
{217.3} Dvīhi bhikkhave dhammehi samannāgato bhikkhu accantaniṭṭho
hoti accantayogakkhemī accantabrahmacārī accantapariyosāno seṭṭho
devamanussānaṃ katamehi dvīhi vijjāya caraṇena imehi kho bhikkhave dvīhi
dhammehi samannāgato bhikkhu accantaniṭṭho hoti accantayogakkhemī
accantabrahmacārī accantapariyosāno seṭṭho devamanussānaṃ
brahmunāpesā bhikkhave sanaṅkumārena gāthā bhāsitā
khattiyo seṭṭho janetasmiṃ ye gottapaṭisārino
vijjācaraṇasampanno so seṭṭho devamānuseti.
{217.4} Sā kho panesā bhikkhave [1]- sanaṅkumārena gāthā sugītā no duggītā
[2]- Subhāsitā no dubbhāsitā atthasañhitā no anatthasañhitā anumatā
mayā ahaṃ bhikkhave evaṃ vadāmi
khattiyo seṭṭho janetasmiṃ ye gottapaṭisārino
vijjācaraṇasampanno so seṭṭho devamānuseti.
Nissāyavaggo 3- paṭhamo.
Tassuddānaṃ 4-
kimatthiyā 5- cetanā tayo upanisā byasanena 6- ca
saññāmanasikāro sekkho moranivāpanena ca 7-.
@Footnote: 1 Yu. brahmunā. 2 Ma. gāthā bhāsitā .... 3 nissayavaggotipi pāṭho.
@4 tatruddānantipi pāṭho. 5 Po. kimatthi. 6 Po. byasane. 7 Ma. dve saññā
@manasikāro saddho moranivāpakanti. Yu. saññāmanasikārā sekho moranivāpanena cāti.
Dutiyavaggo dutiyo
[218] 11 Ekaṃ samayaṃ bhagavā sakkesu viharati kapilavatthusmiṃ
nigrodhārāme . tena kho pana samayena sambahulā bhikkhū bhagavato
cīvarakammaṃ karonti niṭṭhitacīvaro bhagavā temāsaccayena cārikaṃ
pakkamissatīti . assosi kho mahānāmo sakko sambahulā kira bhikkhū
bhagavato cīvarakammaṃ karonti niṭṭhitacīvaro bhagavā temāsaccayena cārikaṃ
pakkamissatīti athakho mahānāmo sakko yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi ekamantaṃ
nisinno kho mahānāmo sakko bhagavantaṃ etadavoca sutametaṃ bhante
sambahulā kira bhikkhū bhagavato cīvarakammaṃ karonti niṭṭhitacīvaro bhagavā
temāsaccayena cārikaṃ pakkamissatīti tesaṃ no bhante nānāvihārehi
viharataṃ kena vihārena vihātabbanti.
{218.1} Sādhu sādhu mahānāma etaṃ kho mahānāma tumhākaṃ
paṭirūpaṃ kulaputtānaṃ yaṃ tumhe tathāgataṃ upasaṅkamitvā puccheyyātha
tesaṃ no bhante nānāvihārehi viharataṃ kena vihārena vihātabbanti
saddho kho mahānāma ārādhako hoti no asaddho āraddhaviriyo ārādhako
hoti no kusīto upaṭṭhitasati ārādhako hoti no muṭṭhassati samāhito
ārādhako hoti no asamāhito paññavā ārādhako hoti no
duppañño imesu kho tvaṃ mahānāma pañcasu dhammesu patiṭṭhāya cha dhamme
uttariṃ bhāveyyāsi idha tvaṃ mahānāma tathāgataṃ anussareyyāsi itipi so
Bhagavā arahaṃ sammāsambuddho vijjācaraṇasampanno sugato lokavidū
anuttaro purisadammasārathi satthā devamanussānaṃ buddho bhagavāti yasmiṃ
mahānāma samaye ariyasāvako tathāgataṃ anussarati nevassa tasmiṃ
samaye rāgapariyuṭṭhitaṃ cittaṃ hoti na dosapariyuṭṭhitaṃ cittaṃ hoti
na mohapariyuṭṭhitaṃ cittaṃ hoti ujugatamevassa tasmiṃ samaye cittaṃ
hoti tathāgataṃ ārabbha ujugatacitto kho pana mahānāma ariyasāvako
labhati atthavedaṃ labhati dhammavedaṃ labhati dhammūpasañhitaṃ pāmujjaṃ
pamuditassa pīti jāyati pītimanassa kāyo passambhati passaddhakāyo
sukhaṃ vediyati sukhino cittaṃ samādhiyati ayaṃ vuccati mahānāma
ariyasāvako visamagatāya pajāya samappatto viharati sabyāpajjhāya
pajāya abyāpajjho viharati dhammasotasamāpanno buddhānussatiṃ bhāveti.
Puna caparaṃ tvaṃ mahānāma dhammaṃ anussareyyāsi svākkhāto
bhagavatā dhammo sandiṭṭhiko akāliko ehipassiko opanayiko 1-
paccattaṃ veditabbo viññūhīti yasmiṃ mahānāma samaye ariyasāvako
dhammaṃ anussarati nevassa tasmiṃ samaye rāgapariyuṭṭhitaṃ cittaṃ hoti na
dosapariyuṭṭhitaṃ cittaṃ hoti na mohapariyuṭṭhitaṃ cittaṃ hoti ujugatamevassa
tasmiṃ samaye cittaṃ hoti dhammaṃ ārabbha ujugatacitto kho pana mahānāma
ariyasāvako labhati atthavedaṃ labhati dhammavedaṃ labhati dhammūpasañhitaṃ
pāmujjaṃ pamuditassa pīti jāyati pītimanassa kāyo passambhati
passaddhakāyo sukhaṃ vediyati sukhino cittaṃ samādhiyati
@Footnote: 1 Ma. opaneyyiko.
Ayaṃ vuccati mahānāma ariyasāvako visamagatāya pajāya samappatto
viharati sabyāpajjhāya pajāya abyāpajjho viharati dhammasotasamāpanno
dhammānussatiṃ bhāveti.
{218.2} Puna caparaṃ tvaṃ mahānāma saṅghaṃ anussareyyāsi supaṭipanno
bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno
bhagavato sāvakasaṅgho sāmīcipaṭipanno bhagavato sāvakasaṅgho yadidaṃ cattāri
purisayugāni aṭṭha purisapuggalā esa bhagavato sāvakasaṅgho āhuneyyo
pāhuneyyo dakkhiṇeyyo añjalikaraṇīyo anuttaraṃ puññakkhettaṃ
lokassāti yasmiṃ mahānāma samaye ariyasāvako saṅghaṃ anussarati nevassa
tasmiṃ samaye rāgapariyuṭṭhitaṃ cittaṃ hoti na dosapariyuṭṭhitaṃ cittaṃ hoti
na mohapariyuṭṭhitaṃ cittaṃ hoti ujugatamevassa tasmiṃ samaye cittaṃ hoti
saṅghaṃ ārabbha ujugatacitto kho pana mahānāma ariyasāvako labhati
atthavedaṃ labhati dhammavedaṃ labhati dhammūpasañhitaṃ pāmujjaṃ pamuditassa
pīti jāyati pītimanassa kāyo passambhati passaddhakāyo sukhaṃ vediyati
sukhino cittaṃ samādhiyati ayaṃ vuccati mahānāma ariyasāvako visamagatāya
pajāya samappatto viharati sabyāpajjhāya pajāya abyāpajjho
viharati dhammasotasamāpanno saṅghānussatiṃ bhāveti.
{218.3} Puna caparaṃ tvaṃ mahānāma attano sīlāni anussareyyāsi akhaṇḍāni
acchiddāni asabalāni akammāsāni bhujissāni viññūpasaṭṭhāni aparāmaṭṭhāni
samādhisaṃvattanikānīti 1- yasmiṃ mahānāma samaye ariyasāvako sīlaṃ anussarati
@Footnote: 1 Ma. itisaddo natthi.
Nevassa tasmiṃ samaye rāgapariyuṭṭhitaṃ cittaṃ hoti na dosapariyuṭṭhitaṃ
cittaṃ hoti na mohapariyuṭṭhitaṃ cittaṃ hoti ujugatamevassa tasmiṃ
samaye cittaṃ hoti sīlaṃ ārabbha ujugatacitto kho pana mahānāma
ariyasāvako labhati atthavedaṃ labhati dhammavedaṃ labhati dhammūpasañhitaṃ
pāmujjaṃ pamuditassa pīti jāyati pītimanassa kāyo passambhati
passaddhakāyo sukhaṃ vediyati sukhino cittaṃ samādhiyati ayaṃ vuccati mahānāma
ariyasāvako visamagatāya pajāya samappatto viharati sabyāpajjhāya
pajāya abyāpajjho viharati dhammasotasamāpanno sīlānussatiṃ bhāveti.
{218.4} Puna caparaṃ tvaṃ mahānāma attano cāgaṃ anussareyyāsi
lābhā vata me suladdhaṃ vata me yohaṃ maccheramalapariyuṭṭhitāya pajāya
vigatamalamaccherena cetasā agāraṃ ajjhāvasāmi muttacāgo payatapāṇī 1-
vossaggarato yācayogo dānasaṃvibhāgaratoti yasmiṃ mahānāma samaye
ariyasāvako cāgaṃ anussarati nevassa tasmiṃ samaye rāgapariyuṭṭhitaṃ cittaṃ
hoti na dosapariyuṭṭhitaṃ cittaṃ hoti na mohapariyuṭṭhitaṃ cittaṃ hoti
ujugatamevassa tasmiṃ samaye cittaṃ hoti cāgaṃ ārabbha ujugatacitto kho
pana mahānāma ariyasāvako labhati atthavedaṃ labhati dhammavedaṃ labhati
dhammūpasañhitaṃ pāmujjaṃ pamuditassa pīti jāyati pītimanassa kāyo
passambhati passaddhakāyo sukhaṃ vediyati sukhino cittaṃ samādhiyati ayaṃ
vuccati mahānāma ariyasāvako visamagatāya pajāya samappatto viharati
sabyāpajjhāya pajāya abyāpajjho viharati dhammasotasamāpanno
@Footnote: 1 Po. Ma. payatapāṇi.
Cāgānussatiṃ bhāveti.
{218.5} Puna caparaṃ tvaṃ mahānāma devatā anussareyyāsi santi
devā cātummahārājikā santi devā tāvatiṃsā santi devā yāmā santi
devā tusitā santi devā nimmānaratino santi devā paranimmitavasavattino
santi devā brahmakāyikā santi devā taduttari 1- yathārūpāya saddhāya
samannāgatā tā devatā ito cutā tattha uppannā 2- mayhampi tathārūpā
saddhā saṃvijjati yathārūpena sīlena samannāgatā tā devatā ito cutā tattha
uppannā mayhampi tathārūpaṃ sīlaṃ saṃvijjati yathārūpena sutena samannāgatā
tā devatā ito cutā tattha uppannā mayhampi tathārūpaṃ sutaṃ
saṃvijjati yathārūpena cāgena samannāgatā tā devatā ito cutā
tattha uppannā mayhampi tathārūpo cāgo saṃvijjati yathārūpāya
paññāya samannāgatā tā devatā ito cutā tattha uppannā
mayhampi tathārūpā paññā saṃvijjatīti yasmiṃ mahānāma samaye
ariyasāvako attano ca tāsañca devatānaṃ saddhañca sīlañca sutañca
cāgañca paññañca anussarati nevassa tasmiṃ samaye rāgapariyuṭṭhitaṃ cittaṃ
hoti na dosapariyuṭṭhitaṃ cittaṃ hoti na mohapariyuṭṭhitaṃ cittaṃ hoti
ujugatamevassa tasmiṃ samaye cittaṃ hoti devatā ārabbha ujugatacitto
kho pana mahānāma ariyasāvako labhati atthavedaṃ labhati dhammavedaṃ
labhati dhammūpasañhitaṃ pāmujjaṃ pamuditassa pīti jāyati pītimanassa
kāyo passambhati passaddhakāyo sukhaṃ vediyati sukhino cittaṃ samādhiyati
@Footnote: 1 Po. Ma. Yu. tatuttari. 2 Po. Yu. upapannā. Ma. tatthūpapannā. sabbattha
@evaṃ ñātabbaṃ.
Ayaṃ vuccati mahānāma ariyasāvako visamagatāya pajāya samappatto
viharati sabyāpajjhāya pajāya abyāpajjho viharati dhammasotasamāpanno
devatānussatiṃ bhāvetīti.
[219] 12 Ekaṃ samayaṃ bhagavā sakkesu viharati kapilavatthusmiṃ
nigrodhārāme . tena kho pana samayena mahānāmo sakko gilānā vuṭṭhito
hoti aciravuṭṭhito gelaññā . tena kho pana samayena sambahulā
bhikkhū bhagavato cīvarakammaṃ karonti niṭṭhitacīvaro bhagavā temāsaccayena
cārikaṃ pakkamissatīti . assosi kho mahānāmo sakko sambahulā
kira bhikkhū bhagavato cīvarakammaṃ karonti niṭṭhitacīvaro bhagavā
temāsaccayena cārikaṃ pakkamissatīti athakho mahānāmo sakko yena
bhagavā tenupasaṅkami upasaṅkamitvā bhagavantaṃ abhivādetvā ekamantaṃ
nisīdi ekamantaṃ nisinno kho mahānāmo sakko bhagavantaṃ etadavoca
sutametaṃ bhante sambahulā kira bhikkhū bhagavato cīvarakammaṃ karonti
niṭṭhitacīvaro bhagavā temāsaccayena cārikaṃ pakkamissatīti tesaṃ no
bhante nānāvihārehi viharataṃ kena vihārena vihātabbanti.
{219.1} Sādhu sādhu mahānāma etaṃ kho mahānāma tumhākaṃ paṭirūpaṃ
kulaputtānaṃ yaṃ tumhe tathāgataṃ upasaṅkamitvā puccheyyātha tesaṃ no
bhante nānāvihārehi viharataṃ kena vihārena vihātabbanti saddho kho
mahānāma ārādhako hoti no asaddho āraddhaviriyo ārādhako hoti
no kusīto upaṭṭhitasati ārādhako hoti no muṭṭhassati samāhito ārādhako
Hoti no asamāhito paññavā ārādhako hoti no duppañño
imesu kho tvaṃ mahānāma pañcasu dhammesu patiṭṭhāya cha dhamme uttariṃ
bhāveyyāsi idha tvaṃ mahānāma tathāgataṃ anussareyyāsi itipi so
bhagavā .pe. satthā devamanussānaṃ buddho bhagavāti yasmiṃ mahānāma
samaye ariyasāvako tathāgataṃ anussarati nevassa tasmiṃ samaye
rāgapariyuṭṭhitaṃ cittaṃ hoti na dosapariyuṭṭhitaṃ cittaṃ hoti na
mohapariyuṭṭhitaṃ cittaṃ hoti ujugatamevassa tasmiṃ samaye cittaṃ hoti
tathāgataṃ ārabbha ujugatacitto kho pana mahānāma ariyasāvako labhati
atthavedaṃ labhati dhammavedaṃ labhati dhammūpasañhitaṃ pāmujjaṃ pamuditassa
pīti jāyati pītimanassa kāyo passambhati passaddhakāyo sukhaṃ
vediyati sukhino cittaṃ samādhiyati imaṃ kho tvaṃ mahānāma buddhānussatiṃ
gacchantopi bhāveyyāsi ṭhitopi bhāveyyāsi nisinnopi bhāveyyāsi
sayānopi bhāveyyāsi kammantaṃ adhiṭṭhahantopi bhāveyyāsi
puttasambādhasayanaṃ ajjhāvasantopi bhāveyyāsi.
{219.2} Puna caparaṃ tvaṃ mahānāma dhammaṃ anussareyyāsi ... Saṅghaṃ
anussareyyāsi ... attano sīlāni anussareyyāsi ... Attano cāgaṃ
anussareyyāsi ... devatā anussareyyāsi santi devā cātummahārājikā
santi devā ... Taduttari yathārūpāya saddhāya samannāgatā tā devatā ito
cutā tattha uppannā mayhampi tathārūpā saddhā saṃvijjati yathārūpena sīlena ...
Sutena ... Cāgena ... Paññāya samannāgatā tā devatā ito cutā tattha
Uppannā mayhampi tathārūpā paññā saṃvijjatīti yasmiṃ mahānāma
samaye ariyasāvako attano ca tāsañca devatānaṃ saddhañca sīlañca
sutañca cāgañca paññañca anussarati nevassa tasmiṃ samaye
rāgapariyuṭṭhitaṃ cittaṃ hoti na dosapariyuṭṭhitaṃ cittaṃ hoti na
mohapariyuṭṭhitaṃ cittaṃ hoti ujugatamevassa tasmiṃ samaye cittaṃ hoti
devatā ārabbha ujugatacitto kho pana mahānāma ariyasāvako labhati
atthavedaṃ labhati dhammavedaṃ labhati dhammūpasañhitaṃ pāmujjaṃ pamuditassa
pīti jāyati pītimanassa kāyo passambhati passaddhakāyo sukhaṃ vediyati
sukhino cittaṃ samādhiyati imaṃ kho tvaṃ mahānāma devatānussatiṃ
gacchantopi bhāveyyāsi ṭhitopi bhāveyyāsi nisinnopi bhāveyyāsi
sayānopi bhāveyyāsi kammantaṃ adhiṭṭhahantopi bhāveyyāsi
puttasambādhasayanaṃ ajjhāvasantopi bhāveyyāsīti.
[220] 13 Ekaṃ samayaṃ bhagavā sakkesu viharati kapilavatthusmiṃ
nigrodhārāme . tena kho pana samayena bhagavā sāvatthiyaṃ vassāvāsaṃ
upagantukāmo hoti . assosi kho nandiyo sakko bhagavā kira
sāvatthiyaṃ vassāvāsaṃ upagantukāmoti athakho nandiyassa sakkassa
etadahosi yannūnāhaṃpi sāvatthiyaṃ vassāvāsaṃ upagaccheyyaṃ tattha
kammantañceva adhiṭṭhahissāmi bhagavantañca lacchāmi kālena kālaṃ
dassanāyāti . athakho bhagavā sāvatthiyaṃ vassāvāsaṃ upagacchi 1- .
Nandiyopi kho sakko sāvatthiyaṃ vassāvāsaṃ upagacchi tattha kammantañceva
@Footnote: 1 Po. Yu. upagañchi.
Adhiṭṭhāya 1- bhagavantañca lacchati 2- kālena kālaṃ dassanāya. Tena kho
pana samayena sambahulā bhikkhū bhagavato cīvarakammaṃ karonti niṭṭhitacīvaro
bhagavā temāsaccayena cārikaṃ pakkamissatīti . assosi kho nandiyo
sakko sambahulā kira bhikkhū bhagavato cīvarakammaṃ karonti niṭṭhitacīvaro
bhagavā temāsaccayena cārikaṃ pakkamissatīti athakho nandiyo sakko
yena bhagavā tenupasaṅkami upasaṅkamitvā bhagavantaṃ abhivādetvā
ekamantaṃ nisīdi ekamantaṃ nisinno kho nandiyo sakko bhagavantaṃ
etadavoca sutametaṃ bhante sambahulā kira bhikkhū bhagavato cīvarakammaṃ
karonti niṭṭhitacīvaro bhagavā temāsaccayena cārikaṃ pakkamissatīti
tesaṃ no bhante nānāvihārehi viharataṃ kena vihārena vihātabbanti.
{220.1} Sādhu sādhu nandiya etaṃ kho nandiya tumhākaṃ
paṭirūpaṃ kulaputtānaṃ yaṃ tumhe tathāgataṃ upasaṅkamitvā puccheyyātha
tesaṃ no bhante nānāvihārehi viharataṃ kena vihārena vihātabbanti
saddho kho nandiya ārādhako hoti no asaddho sīlavā ārādhako
hoti no dussīlo āraddhaviriyo ārādhako hoti no kusīto upaṭṭhitasati
ārādhako hoti no muṭṭhassati samāhito ārādhako hoti no
asamāhito paññavā ārādhako hoti no duppañño imesu kho te
nandiya chasu dhammesu patiṭṭhāya pañcasu dhammesu ajjhattaṃ sati
upaṭṭhapetabbā 3- idha tvaṃ nandiya tathāgataṃ anussareyyāsi
itipi so bhagavā arahaṃ sammāsambuddho vijjācaraṇasampanno sugato
@Footnote: 1 Ma. Yu. adhiṭṭhāsi. 2 Ma. Yu. labhi. 3 Ma. sabbattha vāresu upaṭṭhāpetabbā.
Lokavidū anuttaro purisadammasārathi satthā devamanussānaṃ buddho bhagavāti
iti kho te nandiya tathāgataṃ ārabbha ajjhattaṃ sati upaṭṭhapetabbā.
{220.2} Puna caparaṃ tvaṃ nandiya dhammaṃ anussareyyāsi svākkhāto
bhagavatā dhammo sandiṭṭhiko akāliko ehipassiko opanayiko paccattaṃ
veditabbo viññūhīti iti kho te nandiya dhammaṃ ārabbha ajjhattaṃ sati
upaṭṭhapetabbā.
{220.3} Puna caparaṃ tvaṃ nandiya kalyāṇamitte anussareyyāsi
lābhā vata me suladdhaṃ vata me yassa [1]- kalyāṇamittā anukampakā
atthakāmā ovādakā anusāsakāti iti kho te nandiya kalyāṇamitte
ārabbha ajjhattaṃ sati upaṭṭhapetabbā.
{220.4} Puna caparaṃ tvaṃ nandiya attano cāgaṃ anussareyyāsi
lābhā vata me suladdhaṃ vata me yohaṃ maccheramalapariyuṭṭhitāya pajāya
vigatamalamaccherena cetasā agāraṃ ajjhāvasāmi muttacāgo payatapāṇī
vossaggarato yācayogo dānasaṃvibhāgaratoti iti kho te nandiya cāgaṃ
ārabbha ajjhattaṃ sati upaṭṭhapetabbā.
{220.5} Puna caparaṃ tvaṃ nandiya devatā anussareyyāsi yā tā 2-
devatā atikkammeva kabaḷīkārabhakkhānaṃ 3- devatānaṃ sahabyataṃ aññataraṃ
manomayaṃ kāyaṃ upapannā tā karaṇīyaṃ attano na samanupassanti katassa vā
paṭiccayaṃ seyyathāpi nandiya bhikkhu asamayavimutto akaraṇīyaṃ attano
na samanupassati katassa vā paṭiccayaṃ evameva kho nandiya yā tā
@Footnote: 1 Ma. Yu. mesaddo dissati. 2 Ma. ayaṃ pāṭho natthi. 3 Ma. kabaḷīkārāhārabhakkhānaṃ.
Devatā atikkammeva kabaḷīkārabhakkhānaṃ devānaṃ sahabyataṃ aññataraṃ
manomayaṃ kāyaṃ upapannā tā karaṇīyaṃ attano na samanupassanti katassa vā
paṭiccayanti iti kho te nandiya devatā ārabbha ajjhattaṃ sati upaṭṭhapetabbā
imehi kho nandiya ekādasahi dhammehi samannāgato ariyasāvako pajahateva
pāpake akusale dhamme na upādiyati seyyathāpi nandiya kumbho nikkujjo
no vantaṃ paccāmasati 1- seyyathāpi nandiya tiṇā aggi mutto ḍahaññeva
gacchati no daḍḍhaṃ paccudāvattati evameva kho nandiya imehi ekādasahi
dhammehi samannāgato ariyasāvako pajahateva pāpake akusale dhamme na
upādiyatīti.
[221] 14 Athakho āyasmā subhūti saddhena bhikkhunā saddhiṃ yena
bhagavā tenupasaṅkami upasaṅkamitvā bhagavantaṃ abhivādetvā ekamantaṃ
nisīdi . ekamantaṃ nisinnaṃ kho āyasmantaṃ subhūtiṃ bhagavā etadavoca
ko nāma ayaṃ subhūti bhikkhūti . saddho nāmāyaṃ bhante bhikkhu saddhassa 2-
upāsakassa putto saddhā agārasmā anagāriyaṃ pabbajitoti .
Kacci panāyaṃ subhūti saddho bhikkhu saddhassa upāsakassa putto saddhā
agārasmā anagāriyaṃ pabbajito sandissati saddhāpadānesūti .
Etassa bhagavā kālo etassa sugata kālo bhagavā saddhassa
saddhāpadānāni bhāseyya idānāhaṃ jānissāmi yadi vā ayaṃ bhikkhu
sandissati saddhāpadānesu yadi vā noti . tenahi subhūti suṇāhi sādhukaṃ
manasikarohi bhāsissāmīti . evaṃ bhanteti kho āyasmā subhūti bhagavato
@Footnote: 1 Ma. Yu. paccāvamati. 2 Ma. sudattassa. ito paraṃ evaṃ ñātabbaṃ.
Paccassosi . bhagavā etadavoca idha subhūti bhikkhu sīlavā hoti
pātimokkhasaṃvarasaṃvuto viharati ācāragocarasampanno aṇumattesu
vajjesu bhayadassāvī samādāya sikkhati sikkhāpadesu yampi subhūti bhikkhu
sīlavā hoti .pe. samādāya sikkhati sikkhāpadesu idampi subhūti
saddhassa saddhāpadānaṃ hoti.
{221.1} Puna caparaṃ subhūti bhikkhu bahussuto hoti sutadharo sutasannicayo
ye te dhammā ādikalyāṇā majjhekalyāṇā pariyosānakalyāṇā sātthaṃ
sabyañjanaṃ kevalaparipuṇṇaṃ parisuddhaṃ brahmacariyaṃ abhivadanti tathārūpāssa
dhammā bahussutā honti dhatā vacasā paricitā manasānupekkhitā diṭṭhiyā
suppaṭividdhā yampi subhūti bhikkhu bahussuto hoti .pe. diṭṭhiyā
suppaṭividdhā idampi subhūti saddhassa saddhāpadānaṃ hoti.
{221.2} Puna caparaṃ subhūti bhikkhu kalyāṇamitto hoti kalyāṇasahāyo
kalyāṇasampavaṅko yampi subhūti bhikkhu kalyāṇamitto hoti kalyāṇasahāyo
kalyāṇasampavaṅko idampi 1- saddhassa saddhāpadānaṃ hoti.
{221.3} Puna caparaṃ subhūti bhikkhu suvaco hoti sovacassakaraṇehi
dhammehi samannāgato khamo padakkhiṇaggāhī anusāsaniṃ yampi subhūti
bhikkhu suvaco hoti sovacassakaraṇehi dhammehi samannāgato khamo
padakkhiṇaggāhī anusāsaniṃ idampi subhūti saddhassa saddhāpadānaṃ hoti.
{221.4} Puna caparaṃ subhūti bhikkhu yāni tāni sabrahmacārīnaṃ uccāvacāni
kiṃkaraṇīyāni tattha dakkho hoti analaso tatrupāyāya vīmaṃsāya
@Footnote: 1 Ma. etthantare subhūtīti dissati.
Samannāgato alaṃ kātuṃ alaṃ saṃvidhātuṃ yampi subhūti bhikkhu yāni tāni
sabrahmacārīnaṃ .pe. alaṃ kātuṃ alaṃ saṃvidhātuṃ idampi subhūti saddhassa
saddhāpadānaṃ hoti.
{221.5} Puna caparaṃ subhūti bhikkhu dhammakāmo hoti piyasamudāhāro
abhidhamme abhivinaye uḷārapāmujjo yampi subhūti bhikkhu dhammakāmo hoti
piyasamudāhāro abhidhamme abhivinaye uḷārapāmujjo idampi subhūti
saddhassa saddhāpadānaṃ hoti.
{221.6} Puna caparaṃ subhūti bhikkhu āraddhaviriyo viharati akusalānaṃ
dhammānaṃ pahānāya kusalānaṃ dhammānaṃ upasampadāya thāmavā daḷhaparakkamo
anikkhittadhuro kusalesu dhammesu yampi subhūti bhikkhu āraddhaviriyo viharati .pe.
Idampi subhūti saddhassa saddhāpadānaṃ hoti.
{221.7} Puna caparaṃ subhūti bhikkhu catunnaṃ jhānānaṃ ābhicetasikānaṃ
diṭṭhadhammasukhavihārānaṃ nikāmalābhī hoti akicchalābhī akasiralābhī
yampi subhūti bhikkhu catunnaṃ jhānānaṃ ābhicetasikānaṃ diṭṭhadhammasuvihārānaṃ
nikāmalābhī hoti akicchalābhī akasiralābhī idampi subhūti saddhassa
saddhāpadānaṃ hoti.
{221.8} Puna caparaṃ subhūti bhikkhu anekavihitaṃ pubbenivāsaṃ anussarati
seyyathīdaṃ ekampi jātiṃ dvepi jātiyo tissopi jātiyo catassopi
jātiyo pañcapi jātiyo dasapi jātiyo vīsampi jātiyo tiṃsampi jātiyo
cattāḷīsampi jātiyo paññāsampi jātiyo jātisatampi jātisahassampi
jātisatasahassampi anekepi saṃvaṭṭakappe anekepi vivaṭṭakappe
Anekepi saṃvaṭṭavivaṭṭakappe amutrāsiṃ evaṃnāmo evaṃgotto
evaṃvaṇṇo evamāhāro evaṃsukhadukkhapaṭisaṃvedī evamāyupariyanto so
tatocuto amutra udapādiṃ tatrāpāsiṃ evaṃnāmo evaṃgotto evaṃvaṇṇo
evamāhāro evaṃsukhadukkhapaṭisaṃvedī evamāyupariyanto so tato cuto
idhuppannoti iti sākāraṃ sauddesaṃ anekavihitaṃ pubbenivāsaṃ anussarati
yampi subhūti bhikkhu anekavihitaṃ pubbenivāsaṃ anussarati seyyathīdaṃ
ekampi jātiṃ dvepi jātiyo .pe. iti sākāraṃ sauddesaṃ anekavihitaṃ
pubbenivāsaṃ anussarati idampi subhūti saddhassa saddhāpadānaṃ hoti.
{221.9} Puna caparaṃ subhūti bhikkhu dibbena cakkhunā visuddhena
atikkantamānusakena satte passati cavamāne upapajjamāne hīne
paṇīte suvaṇṇe dubbaṇṇe sugate duggate yathākammūpage satte
pajānāti ime vata bhonto sattā kāyaduccaritena samannāgatā
vacīduccaritena samannāgatā manoduccaritena samannāgatā ariyānaṃ
upavādakā micchādiṭṭhikā micchādiṭṭhikammasamādānā te kāyassa
bhedā parammaraṇā apāyaṃ duggatiṃ vinipātaṃ nirayaṃ upapannā ime vā pana
bhonto sattā kāyasucaritena samannāgatā vacīsucaritena samannāgatā
manosucaritena samannāgatā ariyānaṃ anupavādakā sammādiṭṭhikā
sammādiṭṭhikammasamādānā te kāyassa bhedā parammaraṇā
sugatiṃ saggaṃ lokaṃ upapannāti iti dibbena cakkhunā visuddhena
atikkantamānusakena satte passati cavamāne upapajjamāne
hīne paṇīte suvaṇṇe dubbaṇṇe sugate duggate yathākammūpage
Satte pajānāti yampi subhūti bhikkhu dibbena cakkhunā visuddhena .pe.
Yathākammūpage satte pajānāti idampi subhūti saddhassa saddhāpadānaṃ hoti.
{221.10} Puna caparaṃ subhūti bhikkhu āsavānaṃ khayā anāsavaṃ cetovimuttiṃ
paññāvimuttiṃ diṭṭheva dhamme sayaṃ abhiññā sacchikatvā upasampajja
viharati yampi subhūti bhikkhu āsavānaṃ khayā .pe. sacchikatvā upasampajja
viharati idampi subhūti saddhassa saddhāpadānaṃ hotīti.
Evaṃ vutte āyasmā subhūti bhagavantaṃ etadavoca yānimāni bhante
bhagavatā saddhassa saddhāpadānāni bhāsitāni saṃvijjanti tāni imassa
bhikkhuno ayañca bhikkhu etesu sandissati ayaṃ bhante bhikkhu sīlavā hoti
pātimokkhasaṃvarasaṃvuto viharati ācāragocarasampanno aṇumattesu vajjesu
bhayadassāvī samādāya sikkhati sikkhāpadesu ayaṃ bhante bhikkhu bahussuto
hoti sutadharo sutasannicayo ye te dhammā ādikalyāṇā majjhekalyāṇā
pariyosānakalyāṇā sātthaṃ sabyañjanaṃ kevalaparipuṇṇaṃ parisuddhaṃ
brahmacariyaṃ abhivadanti tathārūpāssa dhammā bahussutā honti dhatā
vacasā paricitā manasānupekkhitā diṭṭhiyā suppaṭividdhā ayaṃ bhante
bhikkhu kalyāṇamitto [1]- kalyāṇasahāyo kalyāṇasampavaṅko
ayaṃ bhante bhikkhu suvaco [2]- sovacassakaraṇehi dhammehi samannāgato
khamo padakkhiṇaggāhī anusāsaniṃ ayaṃ bhante bhikkhu yāni
@Footnote: 1-2 Ma. Yu. hoti.
Tāni sabrahmacārīnaṃ uccāvacāni kiṃkaraṇīyāni tattha dakkho hoti
analaso tatrupāyāya vīmaṃsāya samannāgato alaṃ kātuṃ alaṃ saṃvidhātuṃ
ayaṃ bhante bhikkhu dhammakāmo hoti piyasamudāhāro abhidhamme abhivinaye
uḷārapāmujjo ayaṃ bhante bhikkhu āraddhaviriyo viharati thāmavā
daḷhaparakkamo anikkhittadhuro kusalesu dhammesu ayaṃ bhante bhikkhu
catunnaṃ jhānānaṃ ābhicetasikānaṃ diṭṭhadhammasukhavihārānaṃ nikāmalābhī
hoti akicchalābhī akasiralābhī ayaṃ bhante bhikkhu anekavihitaṃ
pubbenivāsaṃ anussarati seyyathīdaṃ ekampi jātiṃ dvepi jātiyo .pe.
Iti sākāraṃ sauddesaṃ anekavihitaṃ pubbenivāsaṃ anussarati ayaṃ bhante
bhikkhu dibbena cakkhunā visuddhena atikkantamānusakena .pe. Yathākammūpage
satte pajānāti ayaṃ bhante bhikkhu āsavānaṃ khayā .pe. sacchikatvā
upasampajja viharati yānimāni bhante bhagavatā saddhassa saddhāpadānāni
bhāsitāni saṃvijjanti tāni imassa bhikkhuno ayañca bhikkhu etesu
sandissatīti . sādhu sādhu subhūti tenahi tvaṃ subhūti iminā saddhena
bhikkhunā saddhiṃ vihareyyāsi yadā ca tvaṃ subhūti ākaṅkheyyāsi tathāgataṃ
dassanāya iminā ca saddhena bhikkhunā saddhiṃ upasaṅkameyyāsi tathāgataṃ
dassanāyāti.
[222] 15 Mettāya bhikkhave cetovimuttiyā āsevitāya bhāvitāya
bahulīkatāya yānīkatāya vatthukatāya anuṭṭhitāya paricitāya susamāraddhāya
ekādasānisaṃsā pāṭikaṅkhā katame ekādasa sukhaṃ supati sukhaṃ
Paṭibujjhati na pāpakaṃ supinaṃ passati manussānaṃ piyo hoti amanussānaṃ
piyo hoti devatā rakkhanti nāssa aggi vā visaṃ vā satthaṃ vā kamati tuvaṭṭaṃ
cittaṃ samādhiyati mukhavaṇṇo vippasīdati asammūḷho kālaṃ karoti uttariṃ
appaṭivijjhanto brahmalokūpago hoti mettāya bhikkhave cetovimuttiyā
āsevitāya bhāvitāya bahulīkatāya yānīkatāya vatthukatāya anuṭṭhitāya
paricitāya susamāraddhāya ime ekādasānisaṃsā pāṭikaṅkhāti.
[223] 16 Ekaṃ samayaṃ āyasmā ānando vesāliyaṃ viharati
veḷuvagāmake . tena kho pana samayena dasamo 1- gahapati aṭṭhakanāgaro
pātaliputtaṃ anuppatto hoti kenacideva karaṇīyena athakho dasamo
gahapati aṭṭhakanāgaro yena kukkuṭārāmo yena aññataro bhikkhu
tenupasaṅkami upasaṅkamitvā taṃ bhikkhuṃ etadavoca kahaṃ nu kho bhante
āyasmā ānando etarahi viharati dassanakāmā hi mayaṃ bhante
āyasmantaṃ ānandanti . eso gahapati āyasmā ānando vesāliyaṃ
viharati veḷuvagāmaketi.
{223.1} Athakho dasamo gahapati aṭṭhakanāgaro pātaliputte
taṃ karaṇīyaṃ tīretvā yena vesāliveḷuvagāmako yenāyasmā ānando
tenupasaṅkami upasaṅkamitvā āyasmantaṃ ānandaṃ abhivādetvā ekamantaṃ
nisīdi ekamantaṃ nisinno kho dasamo gahapati aṭṭhakanāgaro āyasmantaṃ
ānandaṃ etadavoca atthi nu kho bhante ānanda tena bhagavatā jānatā
passatā arahatā sammāsambuddhena ekadhammo sammadakkhāto yattha
@Footnote: 1 Po. asamo. sabbattha īdisameva.
Bhikkhuno appamattassa ātāpino pahitattassa viharato avimuttaṃ vā
cittaṃ vimuccati aparikkhīṇā vā āsavā parikkhayaṃ gacchanti ananuppattaṃ
vā anuttaraṃ yogakkhemaṃ anupāpuṇātīti . atthi [1]- gahapati tena
bhagavatā jānatā passatā arahatā sammāsambuddhena ekadhammo
sammadakkhāto yattha bhikkhuno appamattassa ātāpino pahitattassa
viharato avimuttaṃ vā cittaṃ vimuccati aparikkhīṇā vā āsavā parikkhayaṃ
gacchanti ananuppattaṃ vā anuttaraṃ yogakkhemaṃ anupāpuṇātīti.
{223.2} Katamo pana bhante ānanda tena bhagavatā jānatā passatā
arahatā sammāsambuddhena ekadhammo sammadakkhāto yattha bhikkhuno
appamattassa ātāpino pahitattassa viharato avimuttaṃ vā cittaṃ vimuccati
aparikkhīṇā vā āsavā parikkhayaṃ gacchanti ananuppattaṃ vā anuttaraṃ
yogakkhemaṃ anupāpuṇātīti . idha gahapati bhikkhu vivicceva kāmehi
vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ
jhānaṃ upasampajja viharati so iti paṭisañcikkhati idaṃ 2- kho paṭhamaṃ
jhānaṃ abhisaṅkhataṃ abhisañcetayitaṃ yaṃ kho pana kiñci abhisaṅkhataṃ
abhisañcetayitaṃ tadaniccaṃ nirodhadhammanti pajānāti so tattha ṭhito
āsavānaṃ khayaṃ pāpuṇāti no ce āsavānaṃ khayaṃ pāpuṇāti teneva
dhammarāgena tāya dhammanandiyā pañcannaṃ orambhāgiyānaṃ saṃyojanānaṃ
parikkhayā opapātiko hoti tattha parinibbāyī anāvattidhammo tasmā lokā
ayaṃ 3- kho gahapati tena bhagavatā jānatā passatā arahatā sammāsambuddhena
@Footnote: 1 Ma. khosaddo dissati. 2 Ma. Yu. idampi. 3 Ma. Yu. ayampi.
Ekadhammo sammadakkhāto yattha bhikkhuno appamattassa ātāpino
pahitattassa viharato avimuttaṃ vā cittaṃ vimuccati aparikkhīṇā vā
āsavā parikkhayaṃ gacchanti ananuppattaṃ vā anuttaraṃ yogakkhemaṃ
anupāpuṇāti.
Puna caparaṃ gahapati bhikkhu vitakkavicārānaṃ vūpasamā ajjhattaṃ
sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ
dutiyaṃ jhānaṃ ... tatiyaṃ jhānaṃ ... catutthaṃ jhānaṃ upasampajja viharati
so iti paṭisañcikkhati idampi kho catutthaṃ jhānaṃ abhisaṅkhataṃ
abhisañcetayitaṃ yaṃ kho pana kiñci abhisaṅkhataṃ abhisañcetayitaṃ tadaniccaṃ
nirodhadhammanti pajānāti so tattha ṭhito āsavānaṃ khayaṃ pāpuṇāti
no ce āsavānaṃ khayaṃ pāpuṇāti teneva dhammarāgena tāya
dhammanandiyā pañcannaṃ orambhāgiyānaṃ saṃyojanānaṃ parikkhayā
opapātiko hoti tattha parinibbāyī anāvattidhammo tasmā lokā
ayampi kho gahapati tena bhagavatā jānatā passatā arahatā
sammāsambuddhena ekadhammo sammadakkhāto yattha bhikkhuno
appamattassa ātāpino pahitattassa viharato avimuttaṃ vā cittaṃ
vimuccati aparikkhīṇā vā āsavā parikkhayaṃ gacchanti ananuppattaṃ vā
anuttaraṃ yogakkhemaṃ anupāpuṇāti.
{223.3} Puna caparaṃ gahapati bhikkhu mettāsahagatena cetasā
ekaṃ disaṃ pharitvā viharati tathā dutiyaṃ tathā tatiyaṃ tathā catutthaṃ iti
Uddhamadho tiriyaṃ sabbadhi sabbattatāya sabbāvantaṃ lokaṃ mettāsahagatena
cetasā vipulena mahaggatena appamāṇena averena abyāpajjhena
pharitvā viharati so iti paṭisañcikkhati ayampi kho mettācetovimutti
abhisaṅkhatā abhisañcetayitā yaṃ [1]- pana kiñci abhisaṅkhataṃ abhisañcetayitaṃ
tadaniccaṃ nirodhadhammanti pajānāti so tattha ṭhito āsavānaṃ khayaṃ
pāpuṇāti no ce āsavānaṃ khayaṃ pāpuṇāti teneva dhammarāgena
tāya dhammanandiyā pañcannaṃ orambhāgiyānaṃ saṃyojanānaṃ parikkhayā
opapātiko hoti tattha parinibbāyī anāvattidhammo tasmā lokā
ayampi kho gahapati tena bhagavatā jānatā passatā arahatā
sammāsambuddhena ekadhammo sammadakkhāto yattha bhikkhuno
appamattassa ātāpino pahitattassa viharato avimuttaṃ vā cittaṃ
vimuccati aparikkhīṇā vā āsavā parikkhayaṃ gacchanti ananuppattaṃ vā
anuttaraṃ yogakkhemaṃ anupāpuṇāti.
{223.4} Puna ca paraṃ gahapati bhikkhu karuṇāsahagatena cetasā ...
Muditāsahagatena cetasā ... upekkhāsahagatena cetasā ekaṃ disaṃ
pharitvā viharati tathā dutiyaṃ tathā tatiyaṃ tathā catutthaṃ iti uddhamadho
tiriyaṃ sabbadhi sabbattatāya sabbāvantaṃ lokaṃ upekkhāsahagatena cetasā
vipulena mahaggatena appamāṇena averena abyāpajjhena pharitvā
viharati so iti paṭisañcikkhati ayampi kho upekkhācetovimutti abhisaṅkhatā
abhisañcetayitā yaṃ kho pana kiñci abhisaṅkhataṃ abhisañcetayitaṃ tadaniccaṃ
@Footnote: 1 sabbavāresu khosaddo dissati.
Nirodhadhammanti pajānāti so tattha ṭhito āsavānaṃ khayaṃ pāpuṇāti
no ce āsavānaṃ khayaṃ pāpuṇāti teneva dhammarāgena tāya dhammanandiyā
pañcannaṃ orambhāgiyānaṃ saṃyojanānaṃ parikkhayā opapātiko hoti tattha
parinibbāyī anāvattidhammo tasmā lokā ayampi kho gahapati tena
bhagavatā jānatā passatā arahatā sammāsambuddhena ekadhammo
sammadakkhāto yattha bhikkhuno appamattassa ātāpino pahitattassa
viharato avimuttaṃ vā cittaṃ vimuccati aparikkhīṇā vā āsavā parikkhayaṃ
gacchanti ananuppattaṃ vā anuttaraṃ yogakkhemaṃ anupāpuṇāti.
{223.5} Puna caparaṃ gahapati bhikkhu sabbaso rūpasaññānaṃ samatikkamā
paṭighasaññānaṃ atthaṅgamā nānattasaññānaṃ amanasikārā ananto
ākāsoti ākāsānañcāyatanaṃ upasampajja viharati so iti
paṭisañcikkhati ayampi kho ākāsānañcāyatanasamāpatti abhisaṅkhatā
abhisañcetayitā yaṃ kho pana kiñci abhisaṅkhataṃ abhisañcetayitaṃ tadaniccaṃ
nirodhadhammanti pajānāti so tattha ṭhito āsavānaṃ khayaṃ pāpuṇāti
no ce āsavānaṃ khayaṃ pāpuṇāti teneva dhammarāgena tāya dhammanandiyā
pañcannaṃ orambhāgiyānaṃ saṃyojanānaṃ parikkhayā opapātiko hoti
tattha parinibbāyī anāvattidhammo tasmā lokā ayampi kho gahapati
tena bhagavatā jānatā passatā arahatā sammāsambuddhena ekadhammo
sammadakkhāto yattha bhikkhuno appamattassa ātāpino pahitattassa
viharato avimuttaṃ vā cittaṃ vimuccati aparikkhīṇā vā āsavā parikkhayaṃ gacchanti
Ananuppattaṃ vā anuttaraṃ yogakkhemaṃ anupāpuṇāti.
{223.6} Puna caparaṃ gahapati bhikkhu sabbaso ākāsānañcāyatanaṃ
samatikkamma anantaṃ viññāṇanti viññāṇañcāyatanaṃ upasampajja
viharati sabbaso viññāṇañcāyatanaṃ samatikkamma natthi kiñcīti
ākiñcaññāyatanaṃ upasampajja viharati so iti paṭisañcikkhati
ayampi kho ākiñcaññāyatanasamāpatti abhisaṅkhatā abhisañcetayitā
yaṃ kho pana kiñci abhisaṅkhataṃ abhisañcetayitaṃ tadaniccaṃ nirodhadhammanti
pajānāti so tattha ṭhito āsavānaṃ khayaṃ pāpuṇāti no ce āsavānaṃ
khayaṃ pāpuṇāti teneva dhammarāgena tāya dhammanandiyā pañcannaṃ
orambhāgiyānaṃ saṃyojanānaṃ parikkhayā opapātiko hoti tattha
parinibbāyī anāvattidhammo tasmā lokā ayampi kho gahapati
tena bhagavatā jānatā passatā arahatā sammāsambuddhena ekadhammo
sammadakkhāto yattha bhikkhuno appamattassa ātāpino pahitattassa
viharato avimuttaṃ vā cittaṃ vimuccati aparikkhīṇā vā āsavā parikkhayaṃ
gacchanti ananuppattaṃ vā anuttaraṃ yogakkhemaṃ anupāpuṇātīti.
{223.7} Evaṃ vutte dasamo gahapati aṭṭhakanāgaro āyasmantaṃ
ānandaṃ etadavoca seyyathāpi bhante ānanda puriso ekaṃ nidhimukhaṃ
gavesanto sakideva ekādasa nidhimukhāni adhigaccheyya evameva kho ahaṃ bhante
ekaṃ amatadvāraṃ gavesanto sakideva ekādasannaṃ amatadvārānaṃ alatthaṃ
savanāya seyyathāpi bhante purisassa agāraṃ ekādasadvāraṃ so tasmiṃ
Agāre āditte ekamekena 1- dvārena sakkuṇeyya attānaṃ sotthiṃ
kātuṃ evameva kho ahaṃ bhante imesaṃ ekādasannaṃ amatadvārānaṃ
ekamekena 1- amatadvārena sakkuṇissāmi attānaṃ sotthiṃ kātuṃ
ime hi nāma bhante aññatitthiyā ācariyassa ācariyadhanaṃ pariyesissanti
kiṃ panāhaṃ āyasmato ānandassa pūjaṃ karissāmīti athakho dasamo gahapati
aṭṭhakanāgaro vesālikañca pātaliputtakañca bhikkhusaṅghaṃ sannipātāpetvā
paṇītena khādanīyena bhojanīyena sahatthā santappesi sampavāresi
ekamekañca bhikkhuṃ paccekadussayugena acchādesi āyasmantañca
ānandaṃ ticīvarena āyasmato ca ānandassa pañcasataṃ vihāraṃ kārāpesīti.
[224] 17 Ekādasahi bhikkhave aṅgehi samannāgato gopālako
abhabbo gogaṇaṃ pariharituṃ phātikātuṃ 2- katamehi ekādasahi idha bhikkhave
gopālako na rūpaññū hoti na lakkhaṇakusalo hoti na āsāṭikaṃ
sāṭetā 3- hoti na vaṇaṃ paṭicchādetā hoti na dhūmaṃ kattā hoti
na titthaṃ jānāti na pītaṃ jānāti na vīthiṃ jānāti na gocarakusalo
hoti anavasesadohī [4]- hoti ye te usabhā gopitaro goparināyakā
te na atirekapūjāya pūjetā hoti imehi kho bhikkhave ekādasahi
aṅgehi samannāgato gopālako abhabbo gogaṇaṃ pariharituṃ phātikātuṃ
evameva kho bhikkhave ekādasahi dhammehi samannāgato bhikkhu abhabbo
imasmiṃ dhammavinaye vuḍḍhiṃ virūḷhiṃ vepullaṃ āpajjituṃ katamehi ekādasahi
idha bhikkhave bhikkhu na rūpaññū hoti na lakkhaṇakusalo hoti na
@Footnote: 1 Ma. ekamekenapi. 2 Ma. sabbavāresu phātiṃ kātuṃ. 3 Po. sabbavāresu
@sādetā. Ma. hāretā. 4 Ma. casaddo atthi. sabbattha īdisameva.
Āsāṭikaṃ sāṭetā hoti na vaṇaṃ paṭicchādetā hoti na dhūmaṃ kattā hoti
na titthaṃ jānāti na pītaṃ jānāti na vīthiṃ jānāti na gocarakusalo hoti
anavasesadohī hoti ye te bhikkhū therā rattaññū cirapabbajitā
saṅghapitaro saṅghaparināyakā te na atirekapūjāya pūjetā hoti.
{224.1} Kathañca bhikkhave bhikkhu na rūpaññū hoti idha bhikkhave
bhikkhu yaṅkiñci rūpaṃ [1]- cattāri ca 2- mahābhūtāni catunnañca
mahābhūtānaṃ upādāyarūpanti yathābhūtaṃ nappajānāti evaṃ kho bhikkhave
bhikkhu na rūpaññū hoti.
{224.2} Kathañca bhikkhave bhikkhu na lakkhaṇakusalo hoti idha bhikkhave
bhikkhu kammalakkhaṇo bālo kammalakkhaṇo paṇḍitoti yathābhūtaṃ
nappajānāti evaṃ kho bhikkhave bhikkhu na lakkhaṇakusalo hoti.
{224.3} Kathañca bhikkhave bhikkhu na āsāṭikaṃ sāṭetā hoti idha
bhikkhave bhikkhu uppannaṃ kāmavitakkaṃ adhivāseti na pajahati na vinodeti
na byantīkaroti na anabhāvaṃ gameti uppannaṃ byāpādavitakkaṃ ... Uppannaṃ
vihiṃsāvitakkaṃ ... uppannuppanne pāpake akusale dhamme adhivāseti
na pajahati na vinodeti na byantīkaroti na anabhāvaṃ gameti evaṃ kho
bhikkhave bhikkhu na āsāṭikaṃ sāṭetā hoti.
{224.4} Kathañca bhikkhave bhikkhu na vaṇaṃ paṭicchādetā hoti idha
bhikkhave bhikkhu cakkhunā rūpaṃ disvā nimittaggāhī hoti anubyañjanaggāhī
yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā
@Footnote: 1 Ma. sabbaṃ taṃ rūpaṃ . 2 Po. Ma. casaddo natthi.
Akusalā dhammā anvāssaveyyuṃ tassa saṃvarāya na paṭipajjati na
rakkhati cakkhundriyaṃ cakkhundriye na saṃvaraṃ āpajjati 1- sotena saddaṃ
sutvā ... Ghānena gandhaṃ ghāyitvā ... Jivhāya rasaṃ sāyitvā ... Kāyena
phoṭṭhabbaṃ phusitvā ... manasā dhammaṃ viññāya nimittaggāhī hoti
anubyañjanaggāhī yatvādhikaraṇamenaṃ manindriyaṃ asaṃvutaṃ viharantaṃ
abhijjhādomanassā pāpakā akusalā dhammā anvāssaveyyuṃ tassa
saṃvarāya na paṭipajjati na rakkhati manindriyaṃ manindriye na saṃvaraṃ
āpajjati evaṃ kho bhikkhave bhikkhu na vaṇaṃ paṭicchādetā hoti.
{224.5} Kathañca bhikkhave bhikkhu na dhūmaṃ kattā hoti idha bhikkhave
bhikkhu na yathāsutaṃ yathāpariyattaṃ dhammaṃ vitthārena paresaṃ desetā
hoti evaṃ kho bhikkhave bhikkhu na dhūmaṃ kattā hoti.
{224.6} Kathañca bhikkhave bhikkhu na titthaṃ jānāti idha bhikkhave
bhikkhu ye te bhikkhū bahussutā āgatāgamā dhammadharā vinayadharā
mātikādharā te kālena kālaṃ upasaṅkamitvā na paripucchati na
paripañhati idaṃ bhante kathaṃ imassa ko atthoti tassa te āyasmanto
avivaṭañceva na vivaranti anuttānīkatañca na uttānīkaronti
anekavihitesu [2]- kaṅkhaṭṭhāniyesu dhammesu kaṅkhaṃ na paṭivinodenti
evaṃ kho bhikkhave bhikkhu na titthaṃ jānāti.
{224.7} Kathañca bhikkhave bhikkhu na pītaṃ jānāti idha bhikkhave bhikkhu
tathāgatappavedite dhammavinaye desiyamāne na labhati atthavedaṃ na labhati
@Footnote: 1 Ma. ... saṃvaraṃ nāpajjati. aparaṃpi evaṃ ñātabbaṃ. 2 Ma. Yu. casaddo dissati.
Dhammavedaṃ na labhati dhammūpasañhitaṃ pāmujjaṃ evaṃ kho bhikkhave bhikkhu
pītaṃ na jānāti 1-.
{224.8} Kathañca bhikkhave bhikkhu na vīthiṃ jānāti idha bhikkhave
bhikkhu ariyaṃ aṭṭhaṅgikaṃ maggaṃ yathābhūtaṃ nappajānāti evaṃ kho bhikkhave
bhikkhu na vīthiṃ jānāti.
{224.9} Kathañca bhikkhave bhikkhu na gocarakusalo hoti idha bhikkhave
bhikkhu cattāro satipaṭṭhāne yathābhūtaṃ nappajānāti evaṃ kho bhikkhave
bhikkhu na gocarakusalo hoti.
{224.10} Kathañca bhikkhave bhikkhu anavasesadohī hoti idha bhikkhave
bhikkhu saddhā gahapatikā abhihaṭṭhuṃ pavārenti cīvarapiṇḍapātasenāsana-
gilānapaccayabhesajjaparikkhārena 2- tatra bhikkhave 3- bhikkhu mattaṃ
na jānāti paṭiggahaṇāya evaṃ kho bhikkhave bhikkhu anavasesadohī hoti.
{224.11} Kathañca bhikkhave bhikkhu ye te bhikkhū therā rattaññū
cirapabbajitā saṅghapitaro saṅghaparināyakā te na atirekapūjāya pūjetā
hoti idha bhikkhave bhikkhu ye te bhikkhū therā rattaññū cirapabbajitā
saṅghapitaro saṅghaparināyakā tesu na mettaṃ kāyakammaṃ paccupaṭṭhāpeti
āvīceva 4- raho ca na mettaṃ vacīkammaṃ ... na mettaṃ manokammaṃ
paccupaṭṭhāpeti āvīceva raho ca evaṃ kho bhikkhave bhikkhu ye te bhikkhū therā
rattaññū cirapabbajitā saṅghapitaro saṅghaparināyakā te na 5- atirekapūjāya
pūjetā hoti imehi kho bhikkhave ekādasahi dhammehi samannāgato
@Footnote: 1 Ma. Yu. na pītaṃ jānāti . 2 Ma. cīvara ... parikkhārehi. sabbattha īdisameva.
@3 Ma. Yu. ālapanamidaṃ natthi. 4 Po. Ma. sabbavāresu āviceva. 5 Ma. na te.
Bhikkhu abhabbo imasmiṃ dhammavinaye vuḍḍhiṃ virūḷhiṃ vepullaṃ āpajjituṃ.
{224.12} Ekādasahi bhikkhave aṅgehi samannāgato gopālako
bhabbo gogaṇaṃ pariharituṃ phātikātuṃ katamehi ekādasahi idha bhikkhave
gopālako rūpaññū hoti lakkhaṇakusalo hoti āsāṭikaṃ sāṭetā hoti
vaṇaṃ paṭicchādetā hoti dhūmaṃ kattā hoti titthaṃ jānāti pītaṃ jānāti
vīthiṃ jānāti gocarakusalo hoti sāvasesadohī hoti ye te usabhā
gopitaro goparināyakā te atirekapūjāya pūjetā hoti imehi kho
bhikkhave ekādasahi aṅgehi samannāgato gopālako bhabbo gogaṇaṃ
pariharituṃ phātikātuṃ evameva kho bhikkhave ekādasahi dhammehi samannāgato
bhikkhu bhabbo imasmiṃ dhammavinaye vuḍḍhiṃ virūḷhiṃ vepullaṃ āpajjituṃ
katamehi ekādasahi idha [1]- bhikkhu rūpaññū hoti lakkhaṇakusalo hoti
āsāṭikaṃ sāṭetā hoti vaṇaṃ paṭicchādetā hoti dhūmaṃ kattā
hoti titthaṃ jānāti pītaṃ jānāti vīthiṃ jānāti gocarakusalo
hoti sāvasesadohī hoti ye te bhikkhū therā rattaññū cirapabbajitā
saṅghapitaro saṅghaparināyakā te atirekapūjāya pūjetā hoti kathañca
bhikkhave bhikkhu rūpaññū hoti idha bhikkhave bhikkhu yaṅkañci rūpaṃ
cattāri ca mahābhūtāni catunnañca mahābhūtānaṃ upādāyarūpanti
yathābhūtaṃ pajānāti evaṃ kho bhikkhave bhikkhu rūpaññū hoti.
{224.13} Kathañca bhikkhave bhikkhu lakkhaṇakusalo
hoti idha bhikkhave bhikkhu kammalakkhaṇo bālo kammalakkhaṇo
paṇḍitoti yathābhūtaṃ pajānāti evaṃ kho bhikkhave bhikkhu
@Footnote: 1 Ma. Yu. bhikkhave.
Lakkhaṇakusalo hoti . kathañca bhikkhave bhikkhu āsāṭikaṃ sāṭetā hoti
idha bhikkhave bhikkhu uppannaṃ kāmavitakkaṃ nādhivāseti pajahati vinodeti
byantīkaroti anabhāvaṃ gameti uppannaṃ byāpādavitakkaṃ ... uppannaṃ
vihiṃsāvitakkaṃ ... uppannuppanne pāpake akusale dhamme nādhivāseti
pajahati vinodeti byantīkaroti anabhāvaṃ gameti evaṃ kho bhikkhave
bhikkhu āsāṭikaṃ sāṭetā hoti.
{224.14} Kathañca bhikkhave bhikkhu vaṇaṃ paṭicchādetā hoti idha bhikkhave
bhikkhu cakkhunā rūpaṃ disvā na nimittaggāhī hoti nānubyañjanaggāhī
yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā
pāpakā akusalā dhammā anvāssaveyyuṃ tassa saṃvarāya paṭipajjati
rakkhati cakkhundriyaṃ cakkhundriye saṃvaraṃ āpajjati sotena saddaṃ sutvā ...
Ghānena gandhaṃ ghāyitvā ... Jivhāya rasaṃ sāyitvā ... Kāyena phoṭṭhabbaṃ
phusitvā ... manasā dhammaṃ viññāya na nimittaggāhī hoti nānubyañjanaggāhī
yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā
akusalā dhammā anvāssaveyyuṃ tassa saṃvarāya paṭipajjati rakkhati manindriyaṃ
manindriye saṃvaraṃ āpajjati evaṃ kho bhikkhave bhikkhu vaṇaṃ paṭicchādetā hoti.
{224.15} Kathañca bhikkhave bhikkhu dhūmaṃ kattā hoti idha bhikkhave bhikkhu
yathāsutaṃ yathāpariyattaṃ dhammaṃ vitthārena paresaṃ desetā hoti evaṃ kho bhikkhave
bhikkhu dhūmaṃ kattā hoti . Kathañca bhikkhave bhikkhu titthaṃ jānāti idha bhikkhave
bhikkhu ye te bhikkhū bahussutā āgatāgamā dhammadharā vinayadharā mātikādharā
Te kālena kālaṃ upasaṅkamitvā paripucchati [1]- idaṃ bhante kathaṃ imassa
ko atthoti tassa te āyasmanto avivaṭañceva vivaranti anuttānīkatañca
uttānīkaronti anekavihitesu [2]- kaṅkhaṭṭhāniyesu dhammesu kaṅkhaṃ
vinodenti 3- paṭivinodenti evaṃ kho bhikkhave bhikkhu titthaṃ jānāti.
{224.16} Kathañca bhikkhave bhikkhu pītaṃ jānāti idha bhikkhave bhikkhu
tathāgatappavedite dhammavinaye desiyamāne labhati atthavedaṃ labhati
dhammavedaṃ labhati dhammūpasañhitaṃ pāmujjaṃ evaṃ kho bhikkhave bhikkhu pītaṃ jānāti.
Kathañca bhikkhave bhikkhu vīthiṃ jānāti idha bhikkhave bhikkhu ariyaṃ aṭṭhaṅgikaṃ
maggaṃ yathābhūtaṃ pajānāti evaṃ kho bhikkhave bhikkhu vīthiṃ pajānāti .
Kathañca bhikkhave bhikkhu gocarakusalo hoti idha bhikkhave bhikkhu cattāro
satipaṭṭhāne yathābhūtaṃ pajānāti evaṃ kho bhikkhave bhikkhu gocarakusalo
hoti.
{224.17} Kathañca bhikkhave bhikkhu sāvasesadohī hoti idha bhikkhave
bhikkhu saddhā gahapatikā abhihaṭṭhuṃ pavārenti cīvarapiṇḍapātasenāsana-
gilānapaccayabhesajjaparikkhārena tatra bhikkhu mattaṃ jānāti
paṭiggahaṇāya evaṃ kho bhikkhave bhikkhu sāvasesadohī hoti.
{224.18} Kathañca bhikkhave bhikkhu ye te bhikkhū therā rattaññū
cirapabbajitā saṅghapitaro saṅghaparināyakā te atirekapūjāya pūjetā
hoti idha bhikkhave bhikkhu ye te bhikkhū 4- therā rattaññū cirapabbajitā
saṅghapitaro saṅghaparināyakā tesu mettaṃ kāyakammaṃ paccupaṭṭhāpeti
āvīceva raho ca mettaṃ vacīkammaṃ ... Mettaṃ manokammaṃ paccupaṭṭhāpeti
āvīceva raho ca evaṃ
@Footnote: 1 Po. Ma. paripañhati. 2 Ma. casaddo. 3 Ma. Yu. ayaṃ pāṭho natthi.
@4 Ma. ayaṃ pāṭho natthi.
Kho bhikkhave bhikkhu ye te bhikkhū therā rattaññū cirapabbajitā saṅghapitaro
saṅghaparināyakā te atirekapūjāya pūjetā hoti imehi kho bhikkhave
ekādasahi dhammehi samannāgato bhikkhu bhabbo imasmiṃ dhammavinaye vuḍḍhiṃ
virūḷhiṃ vepullaṃ āpajjitunti.
[225] 18 Athakho sambahulā bhikkhū yena bhagavā tenupasaṅkamiṃsu
upasaṅkamitvā bhagavantaṃ abhivādetvā ekamantaṃ nisīdiṃsu ekamantaṃ
nisinnā kho te bhikkhū bhagavantaṃ etadavocuṃ siyā nu kho bhante
bhikkhuno tathārūpo samādhipaṭilābho yathā neva paṭhaviyaṃ paṭhavīsaññī
assa na āpasmiṃ āposaññī assa na tejasmiṃ tejosaññī
assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī
assa na paraloke paralokasaññī assa yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī
ca pana assāti.
{225.1} Siyā bhikkhave bhikkhuno tathārūpo samādhipaṭilābho yathā
neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī
ca pana assāti . yathākathaṃ pana bhante siyā bhikkhuno tathārūpo
Samādhipaṭilābho yathā neva paṭhaviyaṃ paṭhavīsaññī assa .pe. yamidaṃ
diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā tatrāpi
na saññī assa saññī ca pana assāti.
{225.2} Idha bhikkhave bhikkhu evaṃsaññī hoti etaṃ santaṃ etaṃ
paṇītaṃ yadidaṃ sabbasaṅkhārasamatho sabbūpadhipaṭinissaggo taṇhakkhayo 1-
virāgo nirodho nibbānanti evaṃ kho siyā bhikkhave 2- bhikkhuno tathārūpo
samādhipaṭilābho yathā neva paṭhaviyaṃ paṭhavīsaññī assa na āpasmiṃ
āposaññī assa na tejasmiṃ tejosaññī assa na vāyasmiṃ vāyosaññī
assa na ākāsānañcāyatane ākāsānañcāyatanasaññī assa na
viññāṇañcāyatane viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī assa
na paraloke paralokasaññī assa yamidaṃ diṭṭhaṃ sutaṃ mutaṃ viññātaṃ pattaṃ
pariyesitaṃ anuvicaritaṃ manasā tatrāpi na saññī assa saññī ca pana assāti.
[226] 19 Tatra kho bhagavā bhikkhū āmantesi bhikkhavoti .
Bhadanteti te bhikkhū bhagavato paccassosuṃ . bhagavā etadavoca siyā
nu kho bhikkhave bhikkhuno tathārūpo samādhipaṭilābho yathā neva paṭhaviyaṃ
paṭhavīsaññī assa na āpasmiṃ āposaññī assa na tejasmiṃ
@Footnote: 1 Ma. sabbavāresu taṇhākkhayo. 2 Ma. Yu. bhikkhave siyā.
Tejosaññī assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī
assa na paraloke paralokasaññī assa yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī ca pana
assāti . bhagavaṃmūlakā no bhante dhammā bhagavaṃnettikā bhagavaṃpaṭisaraṇā
sādhu vata bhante bhagavantaṃyeva paṭibhātu etassa bhāsitassa attho
bhagavato sutvā bhikkhū dhāressantīti . tenahi bhikkhave suṇātha sādhukaṃ
manasikarotha bhāsissāmīti. Evaṃ bhanteti kho te bhikkhū bhagavato paccassosuṃ.
Bhagavā etadavoca siyā bhikkhave bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī ca pana assāti.
{226.1} Yathākathaṃ pana bhante siyā bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī ca pana
assāti.
{226.2} Idha bhikkhave bhikkhu evaṃsaññī hoti etaṃ santaṃ etaṃ paṇītaṃ
yadidaṃ sabbasaṅkhārasamatho sabbūpadhipaṭinissaggo taṇhakkhayo virāgo nirodho
Nibbānanti evaṃ kho bhikkhave siyā bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa na āpasmiṃ āposaññī assa na
tejasmiṃ tejosaññī assa na vāyasmiṃ vāyosaññī assa
na ākāsānañcāyatane ākāsānañcāyatanasaññī assa
na viññāṇañcāyatane viññāṇañcāyatanasaññī assa
na ākiñcaññāyatane ākiñcaññāyatanasaññī assa
na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī
assa yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ
manasā tatrāpi na saññī assa saññī ca pana assāti.
[227] 20 Athakho sambahulā bhikkhū yenāyasmā sārīputto tenupasaṅkamiṃsu
upasaṅkamitvā āyasmatā sārīputtena saddhiṃ sammodiṃsu sammodanīyaṃ
kathaṃ sārāṇīyaṃ vītisāretvā ekamantaṃ nisīdiṃsu ekamantaṃ nisinnā kho
te bhikkhū āyasmantaṃ sārīputtaṃ etadavocuṃ siyā nu kho āvuso
sārīputta bhikkhuno tathārūpo samādhipaṭilābho yathā neva paṭhaviyaṃ
paṭhavīsaññī assa na āpasmiṃ āposaññī assa na tejasmiṃ tejosaññī
assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī assa
Na paraloke paralokasaññī assa yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī
ca pana assāti.
{227.1} Siyā āvuso bhikkhuno tathārūpo samādhipaṭilābho
yathā neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ
viññātaṃ pattaṃ pariyesitaṃ anuvicaritaṃ manasā tatrāpi na saññī
assa saññī ca pana assāti . yathākathaṃ panāvuso sārīputta siyā
bhikkhuno tathārūpo samādhipaṭilābho yathā neva paṭhaviyaṃ paṭhavīsaññī
assa .pe. yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ
manasā tatrāpi na saññī assa saññī ca pana assāti.
{227.2} Idha āvuso bhikkhu evaṃ saññī hoti etaṃ santaṃ
etaṃ paṇītaṃ yadidaṃ sabbasaṅkhārasamatho sabbūpadhipaṭinissaggo
taṇhakkhayo virāgo nirodho nibbānanti evaṃ kho āvuso siyā
bhikkhuno tathārūpo samādhipaṭilābho yathā neva paṭhaviyaṃ paṭhavīsaññī
assa na āpasmiṃ āposaññī assa na tejasmiṃ tejosaññī
assa na vāyasmiṃ vāyosaññī assa na ākāsānañcāyatane
ākāsānañcāyatanasaññī assa na viññāṇañcāyatane
viññāṇañcāyatanasaññī assa na ākiñcaññāyatane
ākiñcaññāyatanasaññī assa na nevasaññānāsaññāyatane
nevasaññānāsaññāyatanasaññī assa na idhaloke idhalokasaññī
assa na paraloke paralokasaññī assa yamidaṃ diṭṭhaṃ sutaṃ mutaṃ viññātaṃ
pattaṃ pariyesitaṃ anuvicaritaṃ manasā tatrāpi na saññī assa saññī
ca pana assāti.
[228] 21 Tatra kho āyasmā sārīputto bhikkhū āmantesi
siyā nu kho āvuso bhikkhuno tathārūpo samādhipaṭilābho yathā
neva paṭhaviyaṃ paṭhavīsaññī assa na āpasmiṃ āposaññī
assa na tejasmiṃ tejosaññī assa na vāyasmiṃ vāyosaññī
assa na ākāsānañcāyatane ākāsānañcāyatanasaññī
assa na viññāṇañcāyatane viññāṇañcāyatanasaññī
assa na ākiñcaññāyatane ākiñcaññāyatanasaññī
assa na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī
assa yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ
anuvicaritaṃ manasā tatrāpi na saññī assa saññī ca pana
assāti . dūratopi kho mayaṃ āvuso āgaccheyyāma āyasmato
sārīputtassa santike etassa bhāsitassa atthamaññātuṃ
sādhu vatāyasmantaṃyeva sārīputtaṃ paṭibhātu etassa bhāsitassa
attho āyasmato sārīputtassa sutvā bhikkhū dhāressantīti .
Tenahāvuso taṃ 1- suṇātha sādhukaṃ manasikarotha bhāsissāmīti .
Evamāvusoti kho te bhikkhū āyasmato sārīputtassa paccassosuṃ .
Āyasmā sārīputto etadavoca siyā āvuso bhikkhuno tathārūpo
samādhipaṭilābho yathā neva paṭhaviyaṃ paṭhavīsaññī assa .pe. yamidaṃ
diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ manasā
tatrāpi na saññī assa saññī ca pana assāti . yathākathaṃ
panāvuso sārīputta siyā bhikkhuno tathārūpo samādhipaṭilābho
@Footnote: 1 Po. Ma. Yu. ayaṃ pāṭho natthi.
Yathā neva paṭhaviyaṃ paṭhavīsaññī assa .pe. yamidaṃ diṭṭhaṃ sutaṃ mutaṃ
viññātaṃ pattaṃ pariyesitaṃ anuvicaritaṃ manasā tatrāpi na saññī
assa saññī ca pana assāti.
{228.1} Idha āvuso bhikkhu evaṃsaññī hoti etaṃ santaṃ
etaṃ paṇītaṃ yadidaṃ sabbasaṅkhārasamatho sabbūpadhipaṭinissaggo
taṇhakkhayo virāgo nirodho nibbānanti evampi 1- kho āvuso
siyā bhikkhuno tathārūpo samādhipaṭilābho yathā neva paṭhaviyaṃ
paṭhavīsaññī assa na āpasmiṃ āposaññī assa na
tejasmiṃ tejosaññī assa na vāyasmiṃ vāyosaññī assa
na ākāsānañcāyatane ākāsānañcāyatanasaññī
assa na viññāṇañcāyatane viññāṇañcāyatanasaññī
assa na ākiñcaññāyatane ākiñcaññāyatanasaññī assa
na nevasaññānāsaññāyatane nevasaññānāsaññāyatanasaññī
assa na idhaloke idhalokasaññī assa na paraloke paralokasaññī
assa yamidaṃ diṭṭhaṃ sutaṃ mutaṃ viññātaṃ pattaṃ pariyesitaṃ anuvicaritaṃ
manasā tatrāpi na saññī assa saññī ca pana assāti.
Dutiyavaggo dutiyo.
Tassuddānaṃ
dve mahānāmā ca nandiyena subhūtinā ca mettā
dasamo gopālako cattāro ca samādhinoti 2-
@Footnote: 1 Ma. evaṃ kho. 2 Ma. dve vuttā mahānāmena nandiyena subhūtinā
@ mettā aṭṭhako gopālo cattāro ca samādhināti
@ Yu. dve mahānāmā nandiyena subhūtinā ca mettā
@ dasamo ceva gopālo cattāro ca samādhinoti.
Paṇṇāsakāsaṅgahitā suttantā
[229] 22 Ekādasahi bhikkhave aṅgehi samannāgato gopālako
abhabbo gogaṇaṃ pariharituṃ phātikātuṃ katamehi ekādasahi idha bhikkhave
gopālako na rūpaññū hoti na lakkhaṇakusalo hoti na āsāṭikaṃ
sāṭetā hoti na vaṇaṃ paṭicchādetā hoti na dhūmaṃ kattā hoti
na titthaṃ jānāti na pītaṃ jānāti na vithiṃ jānāti na gocarakusalo
hoti anavasesadohī hoti ye te usabhā gopitaro goparināyakā
te na atirekapūjāya pūjetā hoti imehi kho bhikkhave ekādasahi
aṅgehi samannāgato gopālako abhabbo gogaṇaṃ pariharituṃ phātikātuṃ
evameva kho bhikkhave ekādasahi dhammehi samannāgato bhikkhu
abhabbo cakkhusmiṃ aniccānupassī viharituṃ .pe. abhabbo cakkhusmiṃ
dukkhānupassī viharituṃ abhabbo cakkhusmiṃ anattānupassī viharituṃ
abhabbo cakkhusmiṃ khayānupassī viharituṃ abhabbo cakkhusmiṃ vayānupassī
viharituṃ abhabbo cakkhusmiṃ virāgānupassī viharituṃ abhabbo cakkhusmiṃ
nirodhānupassī viharituṃ abhabbo cakkhusmiṃ paṭinissaggānupassī
viharituṃ abhabbo sotasmiṃ ghānasmiṃ jivhāya kāyasmiṃ manasmiṃ rūpesu
saddesu gandhesu rasesu phoṭṭhabbesu dhammesu cakkhuviññāṇe
sotaviññāṇe ghānaviññāṇe jivhāviññāṇe kāyaviññāṇe
manoviññāṇe cakkhusamphasse sotasamphasse ghānasamphasse
Jivhāsamphasse kāyasamphasse manosamphasse cakkhusamphassajāya
vedanāya sotasamphassajāya vedanāya ghānasamphassajāya vedanāya
jivhāsamphassajāya vedanāya kāyasamphassajāya vedanāya
manosamphassajāya vedanāya rūpasaññāya saddasaññāya
gandhasaññāya rasasaññāya phoṭṭhabbasaññāya dhammasaññāya
rūpasañcetanāya saddasañcetanāya gandhasañcetanāya rasasañcetanāya
phoṭṭhabbasañcetanāya dhammasañcetanāya rūpataṇhāya saddataṇhāya
gandhataṇhāya rasataṇhāya phoṭṭhabbataṇhāya dhammataṇhāya
rūpavitakke saddavitakke gandhavitakke rasavitakke phoṭṭhabbavitakke
dhammavitakke rūpavicāre saddavicāre gandhavicāre rasavicāre
phoṭṭhabbavicāre dhammavicāre aniccānupassī viharituṃ dukkhānupassī
viharituṃ anattānupassī viharituṃ khayānupassī viharituṃ vayānupassī
viharituṃ virāgānupassī viharituṃ nirodhānupassī viharituṃ paṭinissaggānupassī
viharitunti.
[230] 23 Ekādasahi bhikkhave aṅgehi samannāgato gopālako
bhabbo gogaṇaṃ pariharituṃ phātikātuṃ katamehi ekādasahi idha bhikkhave
gopālako rūpaññū hoti .pe. evameva kho bhikkhave ekādasahi dhammehi
samannāgato bhikkhu bhabbova cakkhusmiṃ aniccānupassī viharituṃ .pe.
Paṭinissaggānupassī viharitunti . rāgassa bhikkhave abhiññāya ekādasa
dhammā bhāvetabbā katame ekādasa paṭhamajjhānaṃ dutiyajjhānaṃ
Tatiyajjhānaṃ catutthajjhānaṃ mettācetovimutti karuṇācetovimutti
muditācetovimutti upekkhācetovimutti ākāsānañcāyatanaṃ
viññāṇañcāyatanaṃ ākiñcaññāyatanaṃ rāgassa bhikkhave abhiññāya
ime ekādasa dhammā bhāvetabbāti 1-.
[231] 24 Rāgassa bhikkhave abhiññāya 2- pariññāya
parikkhayāya pahānāya khayāya vayāya virāgāya nirodhāya cāgāya
paṭinissaggāya ime ekādasa dhammā bhāvetabbā dosassa
mohassa kodhassa upanāhassa makkhassa paḷāsassa issāya
macchariyassa māyāya sāṭheyyassa thambhassa sārambhassa mānassa
madassa pamādassa abhiññāya pariññāya parikkhayāya pahānāya
khayāya vayāya virāgāya nirodhāya cāgāya paṭinissaggāya ime
ekādasa dhammā bhāvetabbāti idamavoca bhagavā . attamanā
te bhikkhū bhagavato bhāsitaṃ abhinandunti.
Navasuttasahassāni bhiyyo pañcasatāni ca
sattapaññāsasuttantā aṅguttarasamāyutāti.
Ekādasakanipāto niṭṭhito.
-----------
@Footnote: 1 Ma. itisaddo natthi . 2 Ma. ayaṃ pāṭho natthi.
The Pali Tipitaka in Roman Character Volume 24 page 283-393.
http://84000.org/tipitaka/pali/roman_item_s.php?book=24&item=165&items=67
Classified by [Item Number] :-
http://84000.org/tipitaka/pali/roman_item_s.php?book=24&item=165&items=67&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=24&item=165&items=67
Compare with The Royal Version of Thai Tipitaka :-
http://84000.org/tipitaka/read/byitem_s.php?book=24&item=165&items=67
Study Atthakatha :-
http://84000.org/tipitaka/attha/attha.php?b=24&i=165
The Pali Atthakatha in Thai :-
http://84000.org/tipitaka/atthapali/read_th.php?B=16&A=8477
The Pali Atthakatha in Roman :-
http://84000.org/tipitaka/atthapali/read_rm.php?B=16&A=8477
Contents of The Tipitaka Volume 24
http://84000.org/tipitaka/read/?index_24
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
