Suttanipāte uragavaggassa ekādasamaṃ vijayasuttaṃ
[312] |312.618| 11 Caraṃ vā yadi vā tiṭṭhaṃ nisinno uda vā sayaṃ
sammiñjeti 1- pasāreti esā kāyassa iñjanā.
|312.619| Aṭṭhinhārūhi 2- saṃyutto tacamaṃsāvalepano
chaviyā kāyo paṭicchanno yathābhūtaṃ na dissati
|312.620| antapūro udarapūro yakapeḷassa 3- vatthino
hadayassa papphāsassa vakkassa pihakassa ca
|312.621| siṅghāṇikāya khelassa sedassa ca medassa ca
lohitassa lasikāya pittassa ca vasāya ca.
|312.622| Athassa navahi sotehi asucī savati sabbadā
akkhimhā akkhigūthako kaṇṇamhā kaṇṇagūthako
|312.623| siṅghāṇikā ca nāsato mukhena vamatekadā
pittaṃ semhaṃ ca vamati kāyamhā sedajallikā.
|312.624| Athassa susiraṃ sīsaṃ matthaluṅgassa pūritaṃ
subhato naṃ maññati bālo avijjāya purakkhato.
|312.625| Yadā 4- ca so mato seti uddhumāto vinīlako
apaviṭṭho susānasmiṃ anapekkhā honti ñātayo.
|312.626| Khādanti naṃ suvāṇā ca 5- siṅgālā 6- ca vakā kimī
@Footnote: 1 Ma. samiñjeti . 2 Ma. Yu. aṭṭhinhārūsaññutto . 3 Ma. yakanapeḷassa.
@4 Po. yathā. 5 Yu. supāṇā ca. 6 Yu. sigālā.
Kākā gijjhā ca khādanti ye caññe santi pāṇino.
|312.627| Sutvāna buddhavacanaṃ bhikkhu paññāṇavā idha
so kho naṃ parijānāti yathābhūtañhi passati.
|312.628| Yathā idaṃ tathā etaṃ yathā etaṃ tathā idaṃ
ajjhattañca bahiddhā ca kāye chandaṃ virājaye.
|312.629| Chandarāgaviratto so bhikkhu paññāṇavā idha
ajjhagā amataṃ santiṃ nibbānapadamaccutaṃ 1-.
|312.630| Dipādakoyaṃ 2- asuci duggandho parihīrati 3-
nānākuṇapaparipūro vissavanto tato tato.
|312.631| Etādisena kāyena yo maññe uṇṇametave
paraṃ vā avajāneyya kimaññatra adassanāti.
Vijayasuttaṃ ekādasamaṃ.
-----------
Suttanipāte uragavaggassa dvādasamaṃ munisuttaṃ
[313] |313.632| 12 Santhavāto bhayaṃ jātaṃ kiketā jāyate rajo
aniketamasanthavaṃ etaṃ ve munidassanaṃ.
|313.633| Yo jātamucchijja na ropayeyya
jāyantamassa nānuppavecche
tamāhu ekaṃ muninaṃ carantaṃ
@Footnote: 1 Po. Ma. nibbānaṃ padamaccutaṃ. 2 Ma. dvipādakoyaṃ . 3 Ma. parihārati.
Addakkhi so santipadaṃ mahesi.
|313.634| Saṅkhāya vatthūni pamāya 1- bījaṃ
sinehamassa nānuppavecche
sa ve muni jātikhayantadassī
takkaṃ pahāya na upeti saṅkhaṃ.
|313.635| Aññāya sabbāni nivesanāni
anikāmayaṃ aññatarampi tesaṃ
sa ve muni vītagedho agiddho
nāyūhatī pāragato hi hoti.
|313.636| Sabbābhibhuṃ sabbaviduṃ sumedhaṃ
sabbesu dhammesu anūpalittaṃ
sabbañjahaṃ taṇhakkhaye vimuttaṃ
taṃ vāpi dhīrā muni 2- vedayanti.
|313.637| Paññābalaṃ sīvalatūpapannaṃ
samāhitaṃ jhānarataṃ satīmaṃ
saṅgā pamuttaṃ akhilaṃ anāsavaṃ
taṃ vāpi dhīrā muni 4- vedayanti.
|313.638| Ekaṃ carantaṃ muni 3- appamattaṃ
nindāpasaṃsāsu avedhamānaṃ
sīhaṃva saddesu asantasantaṃ
@Footnote: 1 Po. pahāya. 2-3-4 Yu. muniṃ.
Vātaṃva jālamhi asajjamānaṃ
padumaṃva 1- toyena alimpamānaṃ 2-
netāramaññesamanaññaneyyaṃ
taṃ vāpi dhīrā muni vedayanti.
|313.639| Yo ogahaṇe thambhorivābhijāyati
yasmiṃ pare vācāpariyantaṃ vadanti
taṃ vītarāgaṃ susamāhitindriyaṃ
taṃ vāpi dhīrā muni vedayanti.
|313.640| Yo ve ṭhitatto tasaraṃva ujjuṃ 3-
jigucchati kammehi pāpakehi
vīmaṃsamāno visamaṃ samañca
taṃ vāpi dhīrā muni vedayanti.
|313.641| Yo saññatatto na karoti pāpaṃ
daharo ca majjho ca munī yatatto
arosaneyyo na 4- roseti kañci
taṃ vāpi dhīrā muni vedayanti.
|313.642| Yadaggato majjhato sesato vā
piṇḍaṃ labhetha paradattūpajīvī
nālaṃ thutuṃ nāpi 5- nipaccavādī
taṃ vāpi dhīrā muni vedayanti.
@Footnote: 1 Ma. padmaṃva. 2 Po. Ma. Yu. alippamānaṃ. 3 Po. Ma. ujjū. 4 Ma.
@na so roseti. Yu. so na roseti . 5 Ma. Yu. nopi.
|313.643| Muniṃ carantaṃ virataṃ methunasmā
yo yobbane na 1- upanibhajjhate kvaci
madappamādā virataṃ vippayuttaṃ
taṃ vāpi dhīrā muni vedayanti.
|313.644| Aññāya lokaṃ paramatthadassiṃ
oghaṃ samuddaṃ atitariya tādiṃ
taṃ chinnaganthaṃ asitaṃ anāsavaṃ
taṃ vāpi dhīrā muni vedayanti.
|313.645| Asmā ubho dūravihāravuttino
gihī 2- dāraposī amamo ca subbato
parapāṇarodhāya gihī asaññato
niccaṃ munī rakkhati pāṇine yato.
|313.646| Sikhī yathā nīlagivo 3- vihaṅgamo
haṃsassa nopeti javaṃ kudācanaṃ
evaṃ gihī nānukaroti bhikkhuno
munino vivittassa vanamhi jhāyatoti.
Munisuttaṃ dvādasamaṃ.
Uragavaggo paṭhamo
tassuddānaṃ
urago dhaniyo khagga 4- visāṇo kasi 5- cunda ca
@Footnote: 1 Ma. no. 2 Yu. gihi . 3 Yu. nīlagīvo . 4 Ma. Yu. ceva. 5 Ma. Yu.
@visāṇañca tathā kasi.
Parābhavo vasalo metta hemavatāḷavako atha
vijayaṃ muni uraga vaggaṃ vadanti bārasa.
------------
The Pali Tipitaka in Roman Character Volume 25 page 362-367.
http://84000.org/tipitaka/pali/roman_item_s.php?book=25&item=312&items=2
Classified by [Item Number] :-
http://84000.org/tipitaka/pali/roman_item_s.php?book=25&item=312&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=25&item=312&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=25&item=312&items=2
Study Atthakatha :-
http://84000.org/tipitaka/attha/attha.php?b=25&i=312
The Pali Atthakatha in Thai :-
http://84000.org/tipitaka/atthapali/read_th.php?B=28&A=6424
The Pali Atthakatha in Roman :-
http://84000.org/tipitaka/atthapali/read_rm.php?B=28&A=6424
Contents of The Tipitaka Volume 25
http://84000.org/tipitaka/read/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
