[397] |397.1017| 3 Pisuṇena ca kodhanena maccharinā ca vibhūtinandinā
sakhitaṃ na kareyya paṇḍito pāpo kāpurisena saṅgamo.
|397.1018| Saddhena ca pesalena ca paññavatā bahussutena ca
sakhitaṃ hi kareyya paṇḍito bhaddo sappurisehi saṅgamo.
|397.1019| Passa cittakataṃ bimbaṃ arukāyaṃ samussitaṃ
āturaṃ bahusaṅkappaṃ yassa natthi dhuvaṃ ṭhiti.
|397.1020| Bahussuto cittakathī buddhassa paricārako
pannabhāro visaññutto seyyaṃ kappeti gotamo.
|397.1021| Khīṇāsavo visaññutto saṅgātīto sunibbuto
dhāreti antimaṃ dehaṃ jātimaraṇapāragū.
|397.1022| Yasmiṃ patiṭṭhitā dhammā buddhassādiccabandhuno
nibbānagamane magge soyaṃ tiṭṭhati gotamo.
@Footnote: 1 Po. Ma. mahāmati.
|397.1023| Dvāsīti buddhato gaṇhi 1- dvesahassāni bhikkhuto
caturāsītisahassāni ye me dhammā pavattino.
|397.1024| Appassutoyaṃ 2- puriso balivaddova jīrati
maṃsāni tassa vaḍḍhanti paññā tassa na vaḍḍhati.
|397.1025| Bahussuto appasutaṃ yo sutenātimaññati
andho padīpadhārova tatheva paṭibhāti maṃ.
|397.1026| Bahussutaṃ upāseyya sutañca na vināsaye
taṃ mūlaṃ brahmacariyassa tasmā dhammadharo siyā.
|397.1027| Pubbāparaññū atthaññū niruttipadakovido
suggahītañca gaṇhāti atthañcopaparikkhati.
|397.1028| Khantyā chandikato hoti ussahitvā tuleti taṃ
samaye so padahati ajjhattaṃ susamāhito.
|397.1029| Bahussutaṃ dhammadharaṃ sappaññaṃ buddhasāvakaṃ
dhammaviññāṇamākaṅkhaṃ taṃ bhajetha tathāvidhaṃ.
|397.1030| Bahussuto dhammadharo kosārakkho mahesino
cakkhu sabbassa lokassa pūjaneyyo bahussuto.
|397.1031| Dhammārāmo dhammarato dhammaṃ anuvicintayaṃ
dhammaṃ anussaraṃ bhikkhu saddhammā na parihāyati.
|397.1032| Kāyamaccheragaruno hiyyamāne anuṭṭhahe
sarīrasukhagiddhassa kuto samaṇaphāsutā.
@Footnote: 1 gaṇhintipi dissati . 2 Po. Ma. appassutāyaṃ puriso.
|397.1033| Na pakkhanti disā sabbā dhammā na paṭibhanti maṃ.
Gate kalyāṇamittamhi andhakāraṃva khāyati.
|397.1034| Abbhatītasahāyassa atītagatasatthuno
natthi etādisaṃ mittaṃ yathā kāyagatā sati.
|397.1035| Ye purāṇā atītā te navehi na sameti me
svajja ekova jhāyāmi vassupetova pakkhimā.
|397.1036| Dassanāya atikkante nānāverajjake bahū
mā vārayittha sotāro passantu samayo mamaṃ.
|397.1037| Dassanāya atikkante nānāverajjake puthū 2-
karoti satthā okāsaṃ na nivāreti cakkhumā.
|397.1038| Paṇṇavīsati vassāni sekhabhūtassa me sato
na kāmasaññā uppajji passa dhammasudhammataṃ.
|397.1039| Paṇṇavīsati vassāni sekhabhūtassa me sato
na dosasaññā uppajji passa dhammasudhammataṃ.
|397.1040| Paṇṇavīsati vassāni bhagavantaṃ upaṭṭhahiṃ
mettena kāyakammena chāyāva anupāyinī.
|397.1041| Paṇṇavīsati vassāni bhagavantaṃ upaṭṭhahiṃ
mettena vacīkammena chāyāva anupāyinī.
|397.1042| Paṇṇavīsati vassāni bhagavantaṃ upaṭṭhahiṃ
mettena manokammena chāyāva anupāyinī.
@Footnote: 1 Po. Ma. puthu.
|397.1043| Buddhassa caṅkamantassa piṭṭhito anucaṅkamiṃ
dhamme desiyamānamhi ñāṇaṃ me udapajjatha.
|397.1044| Ahaṃ sakaraṇīyomhi sekho appattamānaso
satthu ca parinibbānaṃ yo amhaṃ anukampako.
|397.1045| Tadāsi yaṃ bhiṃsanakaṃ tadāsi lomahaṃsanaṃ
sabbākāravarūpete sambuddhe parinibbute.
|397.1046| Bahussuto dhammadharo kosārakkho mahesino
cakkhu sabbassa lokassa ānando parinibbuto.
|397.1047| Bahussuto dhammadharo kosārakkho mahesino
cakkhu sabbassa lokassa andhakāre tamonudo.
|397.1048| Gatimanto satīmanto dhitimanto ca yo isi
saddhammādhārako thero ānando ratanākaro.
Pariciṇṇo mayā satthā .pe. bhavanetti samūhatāti.
Ānando thero.
Uddānaṃ
pusso upatisso ānando tayotime pakittitā
gāthāyo tattha saṅkhātā sataṃ pañca ca uttarīti.
Tiṃsanipāto niṭṭhito.
---------------
Theragāthāya cattāḷīsanipāto
[398] |398.1049| 1 Na gaṇena purakkhato care vimano hoti samādhi dullabho
nānājanasaṅgaho dukkho iti disvāna gaṇaṃ na rocaye.
|398.1050| Na kulāni upabbaje muni vimano hoti samādhi dullabho
so ussuko rasānugiddho atthaṃ riñcati yo sukhādhivāho 1-.
|398.1051| Paṅkoti hi naṃ avedayuṃ yāyaṃ vandanapūjanā kulesu
sukhumaṃ sallaṃ duraccayaṃ 2- sakkāro kāpurisena dujjaho.
|398.1052| Senāsanamhā oruyha nagaraṃ piṇḍāya pāvisiṃ.
Bhuñjantaṃ purisaṃ kuṭṭhiṃ sakkaccantaṃ upaṭṭhahiṃ.
|398.1053| So me 3- pakkena hatthena ālopaṃ upanāmayi
ālopaṃ pakkhipantassa aṅgulī cettha 4- chijjati 5-.
|398.1054| Kuḍḍamūlañca nissāya ālopantaṃ abhuñjisaṃ
bhuñjamāne ca bhutte vā jegucchaṃ me na vijjati.
|398.1055| Uttiṭṭhapiṇḍo āhāro pūtimuttañca osathaṃ 6-
senāsanaṃ rukkhamūlaṃ paṃsukūlañca cīvaraṃ
yassete abhisambhutvā sa ve cātuddiso naro.
|398.1056| Yattha eke vihaññanti āruhantā 7- siluccayaṃ
tattha 8- buddhassa dāyādo sampajāno patissato
@Footnote: 1 Ma. Yu. sukhāvaho . 2 Yu. durubbahaṃ . 3 Yu. taṃ . 4 Yu. pettha.
@5 Yu. chijjatha . 6 Yu. osadhaṃ . 7 Yu. āruhanto . 8 Yu. tassa.
Iddhibalenupatthaddho kassapo abhirūhati.
|398.1057| Piṇḍapātapaṭikkanto selamāruyha kassapo
jhāyati anupādāno pahīnabhayabheravo.
|398.1058| Piṇḍapātapaṭikkanto selamāruyha kassapo
jhāyati anupādāno ḍayhamānesu nibbuto.
|398.1059| Piṇḍapātapaṭikkanto selamāruyha kassapo
jhāyati anupādāno katakicco anāsavo.
|398.1060| Karerimālāvitatā bhūmibhāgā manoramā
kuñjarābhirudā rammā te selā ramayanti maṃ.
|398.1061| Nīlabbhavaṇṇā rucirā vārisītā sucindharā
indagopakasañchannā te selā ramayanti maṃ.
|398.1062| Nīlabbhakūṭasadisā kūṭāgāravarūpamā
vāraṇābhirudā rammā te selā ramayanti maṃ.
|398.1063| Abhivuṭṭhā rammatalā nagā isibhi 1- sevitā
abbhunnaditā sikhībhi 2- te selā ramayanti maṃ.
|398.1064| Alaṃ jhāyitukāmassa pahitattassa me sato
alaṃ me atthakāmassa pahitattassa bhikkhuno
|398.1065| alaṃ me phāsukāmassa pahitattassa sikkhato 3-
alaṃ me yogakāmassa pahitattassa tādino.
|398.786| Ummāpupphena samānā gaganāvabbhachāditā
@Footnote: 1 Ma. Yu. isībhi . 2 Ma. Yu. sikhīhi . 3 Ma. Yu. bhikkhato.
Nānādijagaṇākiṇṇā te selā ramayanti maṃ.
|398.1067| Anākiṇṇā gahaṭṭhehi migasaṅghanisevitā
nānādijagaṇākiṇṇā te selā ramayanti maṃ.
|398.1068| Acchodikā puthusilā gonaṅgulamigāyutā
ambusevālasañchannā te selā ramayanti maṃ.
|398.1069| Na pañcaṅgikena turiyena rati me hoti tādisī
yathā ekaggacittassa sammā dhammaṃ vipassato.
|398.1070| Kammaṃ bahukaṃ na kāraye parivajjeyya janaṃ na uyyame
so ussuko rasānugiddho atthaṃ riñcati yo sukhādhivāho 1-.
|398.1071| Kammaṃ bahukaṃ na kāraye parivajjeyya anatthametaṃ 2-
kicchati kāyo kilamati dukkhito so samathaṃ na vindati.
|398.1072| Oṭṭhapahatamattena attānaṃpi na passati
patthaddhati 3- carati ahaṃ seyyoti maññati.
|398.1073| Aseyyo seyyasamānaṃ bālo maññati attānaṃ
na taṃ viññū pasaṃsanti patthaddhamanasaṃ naraṃ.
|398.1074| Yo ca seyyohamasmīti nāhaṃ seyyoti vā puna 4-
hīnohaṃ sadiso vāti vidhāsu na vikampati.
|398.1075| Paññavantaṃ tathāvādiṃ sīlesu susamāhitaṃ
cetosamathamanuyuttaṃ taṃ ve 5- viññū pasaṃsare.
@Footnote: 1 Ma. sukhāvaho . 2 Ma. Yu. anatthaneyyametaṃ . 3 Ma. Yu. patthaddhagīvo.
@4 Ma. pana . 5 Ma. Yu. tañce.
|398.1076| Yassa sabrahmacārīsu gāravo nūpalabbhati
ārakā hoti saddhammā nabhaso puthuvī 1- yathā.
|398.1077| Yesañca hiriottappaṃ sadā sammā upaṭṭhitaṃ
virūḷhabrahmacariyā [2]- tesaṃ khīṇā punabbhavā.
|398.1078| Uddhato capalo bhikkhu paṃsukūlena pāruto
kapiva sīhacammena na so tenupasobhati.
|398.1079| Anuddhato acapalo nipako saṃvutindriyo
sobhati paṃsukūlena sīhova girigabbhare.
|398.1080| Ete sambahulā devā iddhimanto yasassino
dasa devasahassāni sabbe te brahmakāyikā
|398.1081| dhammasenāpatiṃ dhīraṃ 3- mahājhāyiṃ samāhitaṃ
sārīputtaṃ namassantā tiṭṭhanti 4- pañjalīkatā
|398.1082| namo te parisājañña namo te purisuttama
yassa te nābhijānāma yaṃpi nissāya jhāyati.
|398.1083| Accheraṃ vata buddhānaṃ gambhīro gocaro sako
ye mayaṃ nābhijānāma bālavedhī 5- samāgatā.
|398.1084| Taṃ tathā devakāyehi pūjitaṃ pūjanārahaṃ
sārīputtaṃ tadā disvā kappinassa sitaṃ ahū 6-.
|398.1085| Yāvatā buddhakhettamhi ṭhapayitvā mahāmuniṃ
dhutaguṇe visiṭṭhohaṃ sadiso me na vijjati.
@Footnote: 1 Ma. Yu. puthavī . 2 Ma. te . 3 Ma. vīraṃ . 4 Yu. tiṭṭhantī . 5 Ma. vālavedhi.
@6 Ma. ahu.
|398.1086| Pariciṇṇo mayā satthā kataṃ buddhassa sāsanaṃ
ohito garuko bhāro bhavanetti samūhatā 1-.
|398.1087| Na cīvare na sayane bhojane nupalippati
gotamo anappameyyo muḷālipupphaṃ 2- vimalaṃva
ambunā nikkhammaninno tibhavābhinissaṭo.
|398.1088| Satipaṭṭhānagīvo so saddhāhattho mahāmuni
paññāsīso mahāñāṇī sadā carati nibbutoti.
Mahākassapo thero.
Uddānaṃ
cattāḷīsanipātamhi mahākassapasavhayo
ekova thero gāthāyo cattāḷīsa duvepi cāti.
Cattāḷīsanipāto samatto.
---------------
The Pali Tipitaka in Roman Character Volume 26 page 405-413.
http://84000.org/tipitaka/pali/roman_item_s.php?book=26&item=397&items=2
Classified by [Item Number] :-
http://84000.org/tipitaka/pali/roman_item_s.php?book=26&item=397&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=26&item=397&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=26&item=397&items=2
Study Atthakatha :-
http://84000.org/tipitaka/attha/attha.php?b=26&i=397
The Pali Atthakatha in Thai :-
http://84000.org/tipitaka/atthapali/read_th.php?B=33&A=10494
The Pali Atthakatha in Roman :-
http://84000.org/tipitaka/atthapali/read_rm.php?B=33&A=10494
Contents of The Tipitaka Volume 26
http://84000.org/tipitaka/read/?index_26
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
