[402] Sātiyesu anassāvī atimāne ca no yuto
saṇho ca paṭibhāṇavā na saddho na virajjati.
[403] Sātiyesu anassāvīti sātiyā vuccanti pañca kāmaguṇā.
Kiṃkāraṇā sātiyā vuccanti pañca kāmaguṇā . yebhuyyena devamanussā
pañcakāmaguṇe icchanti sādiyanti patthayanti pihayanti abhijappanti
taṃkāraṇā sātiyā vuccanti pañca kāmaguṇā . yesaṃ esā sātiyā
taṇhā appahīnā tesaṃ cakkhuto rūpataṇhā savati pasavati sandati
pavattati . sotato saddataṇhā . ghānato gandhataṇhā .
Jivhāto rasataṇhā . kāyato phoṭṭhabbataṇhā . manato
dhammataṇhā savati pasavati 1- sandati pavattati . yesaṃ esā sātiyā
taṇhā pahīnā samucchinnā vūpasantā paṭippassaddhā abhabbuppattikā
ñāṇagginā daḍḍhā tesaṃ cakkhuto rūpataṇhā na savati na pasavati 2-
na sandati na pavattati . sotato saddataṇhā .pe. Manato dhammataṇhā
na savati na pasavati na sandati na pavattatīti sātiyesu anassāvī.
[404] Atimāne ca no yutoti katamo atimāno. Idhekacco
@Footnote: 1 Ma. āsavati . 2 Ma. nāsavati.
Paraṃ atimaññati jātiyā vā gottena vā .pe. aññataraññatarena
vā vatthunā . yo evarūpo māno maññanā maññitattaṃ uṇṇati
uṇṇamo dhajo sampaggāho ketukamyatā cittassa ayaṃ vuccati
atimāno . yasseso atimāno pahīno samucchinno vūpasanto
paṭippassaddho abhabbuppattiko ñāṇagginā daḍḍho so atimāne
no yutto nappayutto nāyutto na samāyuttoti atimāne ca no yuto.
[405] Saṇho ca paṭibhāṇavāti [1]- saṇhena kāyakammena
samannāgatoti saṇho . saṇhena vacīkammena . saṇhena manokammena
samannāgatoti saṇho . saṇhehi satipaṭṭhānehi samannāgatoti
saṇho . saṇhehi sammappadhānehi . saṇhehi iddhippādehi .
Saṇhehi indriyehi . saṇhehi balehi . saṇhehi bojjhaṅgehi
samannāgatoti saṇho . saṇhena ariyena aṭṭhaṅgikena maggena
samannāgatoti saṇho.
[406] Paṭibhāṇavāti tayo paṭibhāṇavanto pariyattipaṭibhāṇavā
paripucchāpaṭibhāṇavā adhigamapaṭibhāṇavā.
{406.1} Katamo pariyattipaṭibhāṇavā. Idhekaccassa pariyāpuṭaṃ hoti
suttaṃ geyyaṃ veyyākaraṇaṃ gāthā udānaṃ itivuttakaṃ jātakaṃ abbhūtadhammaṃ
vedallaṃ. Tassa pariyattiṃ nissāya paṭibhāyati. Ayaṃ pariyattipaṭibhāṇavā.
@Footnote: 1 Ma. Yu. saṇhoti.
{406.2} Katamo paripucchāpaṭibhāṇavā. Idhekacco paripucchako 1-
hoti attatthe ca ñāyatthe ca lakkhaṇe ca kāraṇe ca ṭhānāṭhāne ca.
Tassa taṃ paripucchaṃ nissāya paṭibhāyati. Ayaṃ paripucchāpaṭibhāṇavā.
{406.3} Katamo adhigamapaṭibhāṇavā . Idhekaccassa adhigatā honti
cattāro satipaṭṭhānā cattāro sammappadhānā cattāro iddhippādā
pañcindriyāni pañca balāni satta bojjhaṅgā ariyo
aṭṭhaṅgiko maggo cattāri sāmaññaphalāni catasso paṭisambhidā
cha abhiññā . tassa attho ñāto dhammo ñāto nirutti
ñātā . atthe ñāte attho paṭibhāyati . dhamme ñāte dhammo
paṭibhāyati . niruttiyā ñātāya nirutti paṭibhāyati . imesu
tīsu ñāṇaṃ paṭibhāṇapaṭisambhidā . imāya paṭibhāṇapaṭisambhidāya
upeto samupeto upagato samupagato upapanno samupapanno
samannāgato hoti so vuccati paṭibhāṇavā . yassa pariyatti
natthi paripucchā natthi adhigamo natthi kiṃ tassa paṭibhāyissatīti
saṇho ca paṭibhāṇavā.
[407] Na saddho na virajjatīti na saddhoti sāmaṃ sayamabhiññātaṃ
attapaccakkhaṃ dhammaṃ na kassaci saddahati 2- aññassa samaṇassa vā
brāhmaṇassa vā devassa vā mārassa vā [3]- brahmuno vā sabbe
saṅkhārā aniccāti sāmaṃ sayamabhiññātaṃ attapaccakkhaṃ dhammaṃ na
kassaci saddahati 4- aññassa samaṇassa vā brāhmaṇassa vā devassa
@Footnote: 1 Ma. paripucchitā. 2-4 Yu. saddhahati. 3 Yu. narassa vā.
Vā mārassa vā [1]- brahmuno vā . sabbe saṅkhārā dukkhāti.
Sabbe dhammā anattāti . avijjāpaccayā saṅkhārāti .pe.
Jātipaccayā jarāmaraṇanti . avijjānirodhā saṅkhāranirodhoti
.pe. jātinirodhā jarāmaraṇanirodhoti . idaṃ dukkhanti .pe.
Ayaṃ dukkhanirodhagāminī paṭipadāti . ime āsavāti .pe. ayaṃ
āsavanirodhagāminī paṭipadāti . ime dhammā abhiññeyyāti .pe.
Ime dhammā sacchikātabbāti . [2]- channaṃ phassāyatanānaṃ samudayañca
atthaṅgamañca assādañca ādīnavañca nissaraṇañca pañcannaṃ
upādānakkhandhānaṃ samudayañca atthaṅgamañca assādañca ādīnavañca
nissaraṇañca catunnaṃ mahābhūtānaṃ samudayañca atthaṅgamañca assādañca
ādīnavañca nissaraṇañca 3- . yaṅkiñci samudayadhammaṃ sabbantaṃ
nirodhadhammanti sāmaṃ sayamabhiññātaṃ attapaccakkhaṃ dhammaṃ na kassaci
saddahati aññassa samaṇassa vā brāhmaṇassa vā devassa vā
mārassa vā brahmuno vā.
{407.1} Vuttaṃ hetaṃ bhagavatā saddahasi tvaṃ sārīputta saddhindriyaṃ bhāvitaṃ
bahulīkataṃ amatogadhaṃ hoti amataparāyanaṃ amatapariyosānaṃ viriyindriyaṃ satindriyaṃ
samādhindriyaṃ paññindriyaṃ bhāvitaṃ bahulīkataṃ amatogadhaṃ hoti amataparāyanaṃ
amatapariyosānanti . na khvāhaṃ ettha bhante bhagavato saddhāya gacchāmi
saddhindriyaṃ viriyindriyaṃ satindriyaṃ samādhindriyaṃ paññindriyaṃ bhāvitaṃ
bahulīkataṃ amatogadhaṃ hoti amataparāyanaṃ amatapariyosānaṃ yesaṃ nūnetaṃ
@Footnote: 1 Yu. narassa vā. 2 Ma. sāmaṃ sayaṃ abhiññātaṃ ... 3 Yu. nissaraṇañcāti.
@Ma. nissaraṇañca sāmaṃ sayaṃ abhiññātaṃ.
Bhante añātaṃ assa adiṭṭhaṃ aviditaṃ asacchikataṃ aphusitaṃ paññāya
te tattha paresaṃ saddhāya gaccheyyuṃ saddhindriyaṃ .pe. paññindriyaṃ
bhāvitaṃ bahulīkataṃ amatogadhaṃ hoti amataparāyanaṃ amatapariyosānanti
yesañca kho etaṃ bhante ñātaṃ diṭṭhaṃ viditaṃ sacchikataṃ phusitaṃ paññāya
nikkaṅkhā te tattha nibbicikicchā saddhindriyaṃ viriyindriyaṃ satindriyaṃ
samādhindriyaṃ paññindriyaṃ bhāvitaṃ bahulīkataṃ amatogadhaṃ hoti amataparāyanaṃ
amatapariyosānanti mayhañca kho etaṃ bhante ñātaṃ diṭṭhaṃ viditaṃ sacchikataṃ
phusitaṃ paññāya nikkaṅkhohaṃ tattha nibbicikiccho saddhindriyaṃ viriyindriyaṃ
satindriyaṃ samādhindriyaṃ paññindriyaṃ bhāvitaṃ bahulīkataṃ amatogadhaṃ hoti
amataparāyanaṃ amatapariyosānanti.
{407.2} Sādhu sādhu sārīputta yesañhetaṃ sārīputta añātaṃ
assa adiṭṭhaṃ aviditaṃ asacchikataṃ aphusitaṃ paññāya te tattha paresaṃ
saddhāya gaccheyyuṃ saddhindriyaṃ .pe. paññindriyaṃ bhāvitaṃ bahulīkataṃ
amatogadhaṃ hoti amataparāyanaṃ amatapariyosānanti.
Assaddho akataññū ca sandhicchedo ca yo naro
hatāvakāso vantāso sa ve uttamaporisoti.
{407.3} Na virajjatīti sabbe bālaputhujjanā rajjanti kalyāṇaputhujjanaṃ
upādāya satta sekhā virajjanti arahā neva rajjati no virajjati.
Virato so khayā rāgassa vītarāgattā khayā dosassa vītadosattā
khayā mohassa vītamohattā . so vuṭṭhavāso ciṇṇacaraṇo .pe.
Natthi tassa punabbhavoti na saddho na virajjati. Tenāha bhagavā
sātiyesu anassāvī atimāne ca no yuto
saṇho ca paṭibhāṇavā na saddho na virajjatīti.
The Pali Tipitaka in Roman Character Volume 29 page 279-284.
http://84000.org/tipitaka/pali/roman_item_s.php?book=29&item=402&items=6
Classified by [Item Number] :-
http://84000.org/tipitaka/pali/roman_item_s.php?book=29&item=402&items=6&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=29&item=402&items=6
Compare with The Royal Version of Thai Tipitaka :-
http://84000.org/tipitaka/read/byitem_s.php?book=29&item=402&items=6
Study Atthakatha :-
http://84000.org/tipitaka/attha/attha.php?b=29&i=402
The Pali Atthakatha in Thai :-
http://84000.org/tipitaka/atthapali/read_th.php?B=45&A=7251
The Pali Atthakatha in Roman :-
http://84000.org/tipitaka/atthapali/read_rm.php?B=45&A=7251
Contents of The Tipitaka Volume 29
http://84000.org/tipitaka/read/?index_29
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
