TIPITAKA Volume 32 : PALI ROMAN
Sutta Pitaka Vol 24 : Sutta. Khu. Apa(1)

     [391] |391.49| Vipassino pāvacane     ekaṃ leṇaṃ mayā kataṃ
                        cātuddisassa saṅghassa      bandhumārājadhāniyā.
      |391.50| Dussehi bhūmiṃ leṇassa         santharitvā pariccajiṃ
                        udaggacitto sumano         akāsiṃ paṇidhiṃ tadā.
      |391.51| Ārādheyyaṃ sambuddhaṃ         pabbajjañca labheyyahaṃ
                        anuttarañca nibbānaṃ       phuseyyaṃ santimuttamaṃ.
      |391.52| Teneva sukkamūlena             kappe navuti saṃsariṃ
                        devabhūto manusso ca          katapuñño virocahaṃ.
---------------------------------------------------------------------------------------------
page470.
      |391.53| Tato kammāvasesena           idha pacchimake bhave
                        campāyaṃ aggaseṭṭhissa     jātomhi ekaputtako.
      |391.54| Jātamattassa me sutvā      pituchando ayaṃ ahu
                        dadāmahaṃ kumārassa          vīsakoṭī anūnakā.
      |391.55| Caturaṅgulā ca me lomā       jātā pādatale ubho
                        sukhumā mudusamphassā        tulāpicusamā subhā.
      |391.56| Atītā navuti kappā           ayaṃ eko ca uttariṃ
                        nābhijānāmi nikkhitte     pāde bhumme 1- asanthate.
      |391.57| Ārādhito me sambuddho     pabbajiṃ anagāriyaṃ
                        arahattañca me pattaṃ       sītibhūtomhi nibbuto.
      |391.58| Aggāraddhaviriyānaṃ             niddiṭṭho sabbadassinā
                        khīṇāsavo 2- ca arahā       chaḷabhiñño mahiddhiko.
      |391.59| Ekanavute ito kappe         yaṃ dānamadadiṃ tadā
                        duggatiṃ nābhijānāmi         leṇadānassidaṃ phalaṃ.
      |391.60| Svāgataṃ vata me āsi           mama buddhassa santike
                        tisso vijjā anuppattā  kataṃ buddhassa sāsanaṃ.
      |391.61| Kilesā jhāpitā mayhaṃ       bhavā sabbe samūhatā
                        nāgova bandhanaṃ chetvā      viharāmi anāsavo.
      |391.62| Paṭisambhidā catasso          vimokkhāpica aṭṭhime
                        chaḷabhiññā sacchikatā       kataṃ buddhassa sāsanaṃ.
@Footnote: 1 Ma. bhumyā. 2 Ma. khīṇāsavomhi arahā.
---------------------------------------------------------------------------------------------
page471.
      |391.63| Thero 1- koṭiviso soṇo     bhikkhusaṅghassa aggato
                        pañhaṃ puṭṭho viyākāsi      anotattamahāsareti.
        Itthaṃ sudaṃ āyasmā soṇo koṭiviso thero imā gāthāyo
abhāsitthāti.
              Soṇakoṭivisattherassa apadānaṃ samattaṃ.
           Dasamaṃ pubbakammapiloti nāma buddhāpadānaṃ (390)


             The Pali Tipitaka in Roman Character Volume 32 page 469-471.
http://84000.org/tipitaka/pali/roman_item_s.php?book=32&item=391&items=1&pagebreak=1&mode=bracket
             Classified by content :-
http://84000.org/tipitaka/pali/roman_item_s.php?book=32&item=391&items=1&pagebreak=1
             Compare with The Pali Tipitaka in Thai Character :-
http://84000.org/tipitaka/read/pali_item_s.php?book=32&item=391&items=1&pagebreak=1&mode=bracket
             Compare with The Royal Version of Thai Tipitaka :-
http://84000.org/tipitaka/read/byitem_s.php?book=32&item=391&items=1&pagebreak=1&mode=bracket
             Study Atthakatha :-
http://84000.org/tipitaka/attha/attha.php?b=32&i=391
             The Pali Atthakatha in Thai :-
http://84000.org/tipitaka/atthapali/read_th.php?B=50&A=5226
             The Pali Atthakatha in Roman :-
http://84000.org/tipitaka/atthapali/read_rm.php?B=50&A=5226
             Contents of The Tipitaka Volume 32
http://84000.org/tipitaka/read/?index_32