[165] |165.166| Padumuttaro nāma jino sabbadhammāna pāragū
ito satasahassamhi kappe uppajji nāyako.
|165.167| Ovādako viññāpako tārako sabbapāṇinaṃ
desanākusalo buddho tāresi janataṃ bahuṃ.
@Footnote: 1 Yu. dibbacakkhukinaṃ
|165.168| Anukampako kāruṇiko hitesī sabbapāṇinaṃ
sampatte titthiye sabbe pañcasīle patiṭṭhahi 1-.
|165.169| Evaṃ nirākulaṃ āsi suññataṃ titthiyehi ca
vicittaṃ arahantehi vasībhūtehi tādibhi.
|165.170| Ratanānaṭṭhapaññāsaṃ uggato 2- so mahāmuni
kañcanagghiyasaṅkāso dvattiṃsavaralakkhaṇo.
|165.171| Vassasatasahassāni āyu vijjati 3- tāvade
tāvatā tiṭṭhamāno so tāresi janataṃ bahuṃ.
|165.172| Tadāhaṃ haṃsavatiyaṃ jātā seṭṭhikule ahu
nānāratanapajjote mahāsukhasamappitā.
|165.173| Upetvā taṃ mahāvīraṃ assosiṃ dhammadesanaṃ
amataṃ paramassādaṃ paramatthaṃ nivedakaṃ.
|165.174| Tadā nimantayitvāna sasaṅghaṃ lokanāyakaṃ 4-
datvā tassa mahādānaṃ pasannā sehi pāṇibhi.
|165.175| Jhāyinīnaṃ bhikkhunīnaṃ aggaṭṭhānaṃ apatthayiṃ
nipacca sirasā vīraṃ sasaṅghaṃ lokanāyakaṃ.
|165.176| Tadā adantadamako tilokasaraṇo pabhū
byākāsi narasundharo 5- lacchasetaṃ supatthitaṃ.
|165.177| Satasahasse ito kappe okkākakulasambhavo
gotamo nāma nāmena satthā loke bhavissati.
@Footnote: 1 Ma. Yu. patiṭṭhapi. ito paraṃ īdisameva. 2 Ma. uggato va mahāmuni.
@3 Yu. tiṭṭhati. 4 Yu. tibhavantagaṃ. 5 Ma. narasārathi. Yu. narasaddūlo.
|165.178| Tassa dhammesu dāyādā orasā dhammanimmitā
nandāti nāma nāmena hessati satthusāvikā.
|165.179| Taṃ sutvā muditā hutvā yāvajīvaṃ tadā jinaṃ
mettacittā paricariṃ paccayehi vināyakaṃ.
|165.180| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|165.181| Tato cutā yāmamagaṃ tatohaṃ tusitaṃ gatā 1-
tato ca nimmānaratiṃ vasavattipuraṃ gatā.
|165.182| Yattha yatthūpapajjāmi tassa kammassa vāhasā
tattha tattheva rājūnaṃ mahesittamakārayiṃ.
|165.183| Tato cutā manussatte rājūnaṃ cakkavattinaṃ
maṇḍalīnañca rājūnaṃ mahesittamakārayiṃ.
|165.184| Sampattiṃ anubhotvāna devesu manujesu ca
sabbattha sukhitā hutvā nekakappesu saṃsariṃ.
|165.185| Pacchime bhavasampatte purasmiṃ 2- kapilavhaye
rañño suddhodanassāhaṃ dhītā āsiṃ aninditā.
|165.186| Raṃsiriva 3- rūpiniṃ disvā nanditaṃ āsi taṃ kulaṃ
tena nandāti me nāmaṃ sundarā 4- pavarā ahaṃ.
|165.187| Yuvatīnañca sabbāsaṃ kalyāṇīti ca vissutā
tasmiṃpi nagare ramme ṭhapetvā taṃ yasodharaṃ.
@Footnote: 1 Yu. agaṃ. 2 suramme. 3 Ma. Yu. siriyā .... 4 Ma. Yu. sundaraṃ pavaraṃ ahuṃ.
|165.188| Jeṭṭho bhātā tilokaggo pacchimo 1- arahā tathā
ekakinī 2- gahaṭṭhāhaṃ mātuyā paricoditā.
|165.189| Sākiyamhi kule jātā putte buddhānujā tuvaṃ
nandenapi vinā bhūtā agāre kiṃ nu lacchasi 3-.
|165.190| Jarāvasānaṃ yobbaññaṃ rūpaṃ asucisammataṃ
rogantamapicārogyaṃ jīvitaṃ maraṇantikaṃ.
|165.191| Idaṃpi te subhaṃ rūpaṃ sasikantaṃ 4- manoharaṃ
bhūsanānaṃ 5- alaṅkāraṃ sirisaṅketasannibhaṃ.
|165.192| Pūjitaṃ lokasāraṃva nayanānaṃ rasāyanaṃ
puññānaṃ kittijananaṃ okkākakulanandanaṃ.
|165.193| Na cireneva kālena jarā samabhibhossati 6-
pahāya 7- gehaṃ gārayhaṃ cara dhammamanindite.
|165.194| Sutvāhaṃ mātu vacanaṃ pabbajiṃ anagāriyaṃ
dehena na tu cittena rūpayobbanalolitā 8-.
|165.195| Mahatā ca payattena jhānajjhena saraṃ mamaṃ
kātuñca vadate mātā na cāhaṃ tattha ussukā.
|165.196| Tato mahākāruṇiko disvā maṃ kamalānanaṃ 9-
nibbindanatthaṃ rūpasmiṃ mama cakkhupathe jino.
|165.197| Sakena ānubhāvena itthiṃ māpesi sobhanaṃ 10-
dassanīyaṃ suruciraṃ mamatopi surūpiniṃ.
@Footnote: 1 Yu. majjhimo. 2 Ma. Yu. ekākinī. 3 Ma. ... nu acchasi. Yu. ... na
@acchasi. 4 Yu. passa kantaṃ .... 5 Yu. maṃ bhūsanaṃ alaṅkāraṃ. 6 Ma. samadhisessati.
@Yu. samadhihessati. 7 Ma. Yu. vihāya gehaṃ kāruññe. 8 Ma. Yu. ...lāḷitā.
@9 Ma. Yu. kāmalālasaṃ. 10 Ma. Yu. sobhiniṃ.
|165.198| Tamahaṃ vimhitā disvā ativimhitadehiniṃ 1-
cintayiṃ saphalaṃ meti nettalābhañca mānusaṃ.
|165.199| Tamahaṃ ehi subhaṇe 2- yenattho taṃ vadehi me
kulante nāmagottañca vada me yadi te piyaṃ.
|165.200| Na pañhakālo 3- subhaṇe ucchaṅge maṃ nivesaya 4-
sīdantiva mamaṅgāni pasuppaya 5- muhuttakaṃ.
|165.201| Tato sīsaṃ mamaṅke sā katvā sayi susobhaṇā 6-
tassā lalāte 7- patitā luddhā paramadāruṇā.
|165.202| Saha tassā nipātena pīḷakā upapajjatha
pagghariṃsu pabhinnā ca kuṇapā pubbalohitā.
|165.203| Sambhinnaṃ 8- vadanañcāpi kuṇapapūtigandhikaṃ 9-
uddhumātaṃ vinīlañca sabbañcāpi 10- sarīrakaṃ.
|165.204| Sā pavedhitasabbaṅgī nissasantī mahuṃ mahuṃ
vedayantī sakaṃ dukkhaṃ karuṇaṃ paridevayi.
|165.205| Dukkhena dukkhitā homi phusayantī ca vedanā
mahādukkhe nimuggamhi saraṇaṃ hohi me sakhī.
|165.206| Kuhiṃ vadanasobhante kuhinte tuṅganāsikā
tambabimbavaroṭṭhante vadanante kuhiṃ gataṃ.
|165.207| Kuhiṃ sasinibhaṃ vaṇṇaṃ kambugivā kuhiṃ gatā
dāmāmālañca te kaṇṇaṃ vevaṇṇaṃ samupāgataṃ.
@Footnote: 1 Yu. avinicchitadehiniṃ. 2 Ma. Yu. subhage. ito paraṃ īdisameva. 3 Ma. vañcakālo.
@4 Ma. nivāsaya. 5 Yu. passayissaṃ. 6 Ma. Yu. sulocanā. 7 Ma. Yu.
@nalāte. 8 Ma. pabhinnaṃ. 9 Ma. ...gandhanaṃ. 10 Ma. pubbañcāpi.
|165.208| Makulapadumākārā 1- kalasāva 2- payodharā
pabhinnā pūtikuṇapā duṭṭhagandhajamāgatā 3-.
|165.209| Vedimajjhā 4- puthussoṇi suṇāva nītakibbisā
jātā amajjhabharitā aho rūpaṃ asassataṃ.
|165.210| Sabbaṃ sarīrasañjātaṃ pūtigandhaṃ bhayānakaṃ
susānamiva jegucchaṃ 5- ramante yattha bāliyā 6-.
|165.211| Tadā mahākāruṇiko bhātā me lokanāyako
disvā saṃviggacittaṃ maṃ imā gāthā abhāsatha.
|165.212| Āturaṃ kuṇapaṃ pūtiṃ passa nande samussayaṃ
asubhāya cittaṃ bhāvehi ekaggaṃ susamāhitaṃ.
|165.213| Yathā idaṃ tathā etaṃ yathā etaṃ tathā idaṃ
duggandhaṃ pūtikaṃ vāti bālānaṃ abhinanditaṃ.
|165.214| Evametaṃ avekkhanti rattindivamatanditā
tato sakāya paññāya abhinibbijja dakkhasi.
|165.215| Tatohaṃ āsi 7- saṃviggā sutvā gāthā subhāsitā
tatraṭṭhitāvahaṃ santī arahattaṃ apāpuṇiṃ.
|165.216| Yattha yattha nisinnāhaṃ tadā jhānaparāyanā
jino tasmiṃ guṇe tuṭṭho etadagge ṭhapesi maṃ.
|165.217| Kilesā jhāpitā mayhaṃ bhavā sabbe samūhatā
nāgīva bandhanaṃ chetvā viharāmi anāsavā.
@Footnote: 1 Ma. Yu. makuḷakhārakākārā. 2 Ma. kalikāva. 3 Ma. duṭṭhagandhittamāgatā.
@Yu. ...gandhitavamāgatā. 4 Ma. vedimajjhāva susussoṇī. 5 Ma. bībhacchaṃ.
@6 Ma. Yu. bālisā. 7 Ma. atisaṃviggā.
|165.218| Svāgataṃ vata me āsi buddhaseṭṭhassa santike
tisso vijjā anuppattā kataṃ buddhassa sāsanaṃ.
|165.219| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ nandā bhikkhunī janapadakalyāṇī imā gāthāyo
abhāsitthāti.
Nandātheriyā apadānaṃ samattaṃ.
Chaṭṭhaṃ soṇātheriyāpadānaṃ (26)
The Pali Tipitaka in Roman Character Volume 33 page 342-348.
http://84000.org/tipitaka/pali/roman_item_s.php?book=33&item=165&items=1&mode=bracket
Classified by content :-
http://84000.org/tipitaka/pali/roman_item_s.php?book=33&item=165&items=1
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=165&items=1&mode=bracket
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=165&items=1&mode=bracket
Study Atthakatha :-
http://84000.org/tipitaka/attha/attha.php?b=33&i=165
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
