Catucattāḷīso ekavihārivaggo
paṭhamaṃ ekavihāriyattherāpadānaṃ (431)
[21] |21.1| Imamhi bhaddake kappe brahmabandhu mahāyaso
kassapo nāma gottena uppajji vadataṃ varo.
|21.2| Nippapañco nirālambo ākāsasamamānaso
suññatabahulo tādi animittarato vasi.
|21.3| Āsaṃkacitto 1- nillepo asaṃsaṭṭho kule gaṇe
mahākaruṇiko dhīro vinayopāyakovido.
|21.4| Uyyutto parakiccesu vinayanto sadevake
nibbānagamanaṃ maggaṃ gatipaṅkavisosanaṃ.
|21.5| Amataṃ paramassādaṃ jarāmaraṇanivāraṇaṃ
mahāparisamajjhe so nisinno lokatāraṇo.
|21.6| Karavikarudo nātho brahmaghoso tathāgato
uddharanto mahādukkhā 2- vippanaṭṭhe anāyake.
|21.7| Desento virajaṃ dhammaṃ diṭṭho me lokanāyako
tassa dhammaṃ suṇitvāna pabbajiṃ anagāriyaṃ.
|21.8| Pabbajitvā tadāvāhaṃ cintento jinasāsanaṃ
ekakova vane ramme vasiṃ saṃsaggapīḷito.
@Footnote: 1 Ma. Yu. asaṅgacitto nikleso. 2 Ma. Yu. mahāduggā.
|21.9| Sakkāyavūpakasso 1- me hetubhūto mamāgami
manaso vūpakāsassa 2- saṃsaggabhayadassino.
|21.10| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|21.11| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|21.12| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekavihāriyo thero imā gāthāyo abhāsitthāti.
Ekavihāriyattherassa apadānaṃ samattaṃ.
Dutiyaṃ ekasaṅkhiyattherāpadānaṃ (432)
[22] |22.13| Vipassino bhagavato mahābodhimaho ahu
mahājanā samāgamma pūjenti bodhimuttamaṃ.
|22.14| Mahāsokarahito 3- pañño buddhaseṭṭho bhavissati
yassāyaṃ īdiso bodhi pūjanīyova satthuno.
|22.15| Tato saṅkhaṃ gahetvāna bodhirukkhaṃ upaṭṭhahiṃ
dhamanto sabbadivasaṃ avandiṃ bodhimuttamaṃ.
|22.16| Āsannake kataṃ kammaṃ devalokaṃ apāpayi
kalevaraṃ me patitaṃ devaloke ramāmahaṃ.
@Footnote: 1 Ma. sakkāyavūpakāso me. Yu. savakāya vūpakaṭṭho me. 2 Yu. vūpakaṭṭhassa.
@3 Ma. Yu. na hi taṃ orakaṃ maññe.
|22.17| Saṭṭhī turiyasahassāni tuṭṭhahaṭṭhā pamoditā
sadā mayhaṃ upaṭṭhanti buddhapūjāyidaṃ phalaṃ.
|22.18| Ekasattatime kappe rājā āsi sudassano
cāturanto vijitāvī jambūdīpassa 1- issaro.
|22.19| Tato aṭṭhasatā 2- turiyā parivārenti maṃ sadā
anubhomi sakaṃ kammaṃ upaṭṭhānassidaṃ phalaṃ.
|22.20| Yaṃ yaṃ yonūpapajjāmi devattaṃ atha mānusaṃ
mātukucchigatassāpi vajjare bheriyo sadā.
|22.21| Upaṭṭhitvāna sambuddhaṃ anubhotvāna sampadā
sivaṃ amalaṃ 3- amaraṃ pattomhi acalaṃ padaṃ.
|22.22| Ekanavute ito kappe yaṃ kammamakariṃ tadā
duggatiṃ nābhijānāmi buddhapūjāyidaṃ phalaṃ.
|22.23| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|22.24| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|22.25| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekasaṅkhiyo thero imā gāthāyo abhāsitthāti.
Ekasaṅkhiyattherassa apadānaṃ samattaṃ.
@Footnote: 1 Ma. jambūmaṇḍassa. Yu. jambūsaṇḍassa. ito paraṃ īdisameva. 2 Ma. Yu. aṅgasatā.
@3 Ma. Yu. sukhemaṃ amataṃ.
Tatiyaṃ pāṭihirasaññakattherāpadānaṃ (433)
[23] |23.26| Padumuttaro nāma jino āhutīnaṃ paṭiggaho
vasīsatasahassehi nagaraṃ pāvisī tadā.
|23.27| Nagaraṃ pavisantassa upasantassa tādino
rathiyā 1- paccuggamanādīsu nigghoso āsi tāvade.
|23.28| Buddhassa ānubhāvena avajjitaaghaṭṭitā 2-
sayaṃ vīṇā pavajjanti buddhassa pavisato puraṃ.
|23.29| Buddhaseṭṭhaṃ namassāmi padumuttaraṃ mahāmuniṃ
pāṭihirañca passitvā tattha cittaṃ pasādayiṃ.
|23.30| Aho buddho aho dhammo aho no satthusampadā
acetanāpi turiyā sayameva pavajjare.
|23.31| Satasahasse ito kappe yaṃ saññamalabhiṃ tadā
duggatiṃ nābhijānāmi buddhasaññāyidaṃ phalaṃ.
|23.32| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|23.33| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|23.34| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. ratanāni pajjotiṃsu. Yu. ratanāni panādiṃsu. 2 Ma. bherivajjumaghaṭṭitā.
@Yu. bherivajjanaghaṭṭitā.
Itthaṃ sudaṃ āyasmā pāṭihirasaññako thero imā gāthāyo abhāsitthāti.
Pāṭihirasaññakattherassa apadānaṃ samattaṃ.
Catutthaṃ ñāṇatthavikattherāpadānaṃ (434)
[24] |24.35| Kaṇikāraṃva jalitaṃ dīparukkhaṃva jotitaṃ
kañcanaṃva virocantaṃ addasaṃ dipaduttamaṃ.
|24.36| Kamaṇḍaluṃ ṭhapetvāna vākacīrañca kuṇḍikaṃ
ekaṃsaṃ ajinaṃ katvā buddhaseṭṭhaṃ thaviṃ ahaṃ.
|24.37| Tamandhakāraṃ vidhamaṃ mohajālasamākulaṃ
ñāṇālokaṃ dassayitvā tiṇṇo 1- asi tuvaṃ muni.
|24.38| Samuddharasimaṃ lokaṃ sabbāvantaṃ anuttaraṃ
ñāṇena te upamā natthi yāvatā jagato 2- gati.
|24.39| Tena ñāṇena sabbaññū sabbaññūti pavuccati
vandāmi taṃ mahāvīraṃ sabbaññutaṃ anāsavaṃ.
|24.40| Satasahasse ito kappe buddhaseṭṭhaṃ thaviṃ ahaṃ
duggatiṃ nābhijānāmi ñāṇatthumanāyidaṃ phalaṃ.
|24.41| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|24.42| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. Yu. nittiṇṇosi mahāmuni. 2 Yu. ca gato gati.
|24.43| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ñāṇatthaviko thero imā gāthāyo abhāsitthāti.
Ñāṇatthavikattherassa apadānaṃ samattaṃ.
Pañcamaṃ ucchukhaṇḍikattherāpadānaṃ (435)
[25] |25.44| Nagare bandhumatiyā dvārapālo ahosahaṃ
addasaṃ virajaṃ buddhaṃ sabbadhammāna pāraguṃ.
|25.45| Ucchukkhaṇḍikamādāya buddhaseṭṭhassadāsahaṃ
pasannacitto sumano vipassissa mahesino.
|25.46| Ekanavute ito kappe yaṃ ucchumadadiṃ tadā
duggatiṃ nābhijānāmi ucchukhaṇḍassidaṃ phalaṃ.
|25.47| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|25.48| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|25.49| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ucchukhaṇḍiko thero imā gāthāyo abhāsitthāti.
Ucchukhaṇḍikattherassa apadānaṃ samattaṃ.
Chaṭṭhaṃ kalambadāyakattherāpadānaṃ (436)
[26] |26.50| Romaso nāma sambuddho vasati pabbatantare
kalambaṃ tassa pādāsiṃ pasanno sehi pāṇibhi.
|26.51| Catunavute ito kappe yaṃ dānamadadiṃ tadā
duggatiṃ nābhijānāmi kalambassa idaṃ phalaṃ.
|26.52| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|26.53| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|26.54| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā kalambadāyako thero imā gāthāyo abhāsitthāti.
Kalambadāyakattherassa apadānaṃ samattaṃ.
Sattamaṃ ambāṭakadāyakattherāpadānaṃ (437)
[27] |27.55| Pavane buddhaṃ disvāna sayambhuṃ aparājitaṃ
ambāṭakaṃ gahetvāna sayambhussa adāsahaṃ.
|27.56| Ekattiṃse ito kappe yaṃ phalaṃ adadiṃ tadā
duggatiṃ nābhijānāmi phaladānassidaṃ phalaṃ.
|27.57| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|27.58| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|27.59| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ambāṭakadāyako thero imā gāthāyo abhāsitthāti.
Ambāṭakadāyakattherassa apadānaṃ samattaṃ.
Aṭṭhamaṃ harītakidāyakattherāpadānaṃ (438)
[28] |28.60| Harītakiṃ āmalakaṃ ambajambuvibhedakaṃ
kolaṃ bhallātakaṃ bellaṃ sayamevāharāmahaṃ.
|28.61| Disvāna pabbhāragataṃ jhāyiṃ jhānarataṃ muniṃ
ābādhena āpīḷitaṃ addhaniyaṃ 1- mahāmuniṃ.
|28.62| Harītakiṃ gahetvāna sayambhussa adāsahaṃ
katamattamhi bhesajjaṃ byādhi passambhi tāvade.
|28.63| Pahīnadaratho buddho anumodaniyaṃ 2- akā
bhesajjadāneniminā byādhivūpasamena ca.
|28.64| Devabhūto manusso vā jāto vā aññajātiyā
sabbattha sukhito hohi 3- mā ca te byādhimāgamā.
@Footnote: 1 Ma. Yu. adutiyaṃ. 2 Ma. anumodamakāsi me. 3 Ma. hotu.
|28.65| Idaṃ vatvāna sambuddho sayambhū aparājito
nabhaṃ abbhuggami dhīro haṃsarājāva ambare.
|28.66| Yato harītakimadaṃ 1- sayambhussa mahesino
imaṃ jātiṃ upādāya byādhi me nūpapajjatha.
|28.67| Ayaṃ pacchimako mayhaṃ carimo vattate bhavo
tisso vijjā anuppattā 2- kataṃ buddhassa sāsanaṃ.
|28.68| Catunavute ito kappe bhesajjamadadiṃ tadā
duggatiṃ nābhijānāmi bhesajjassa idaṃ phalaṃ.
|28.69| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|28.70| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|28.71| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā harītakidāyako thero imā gāthāyo abhāsitthāti.
Harītakidāyakattherassa apadānaṃ samattaṃ.
Navamaṃ ambapiṇḍiyattherāpadānaṃ (439)
[29] |29.72| Hatthīrājā tadā āsiṃ īsādanto uruḷhavo
vicaranto brahāraññe addasaṃ lokanāyakaṃ.
@Footnote: 1 Ma. harītakaṃ dinnaṃ. 2 Ma. Yu. sacchikatā.
|29.73| Ambapiṇḍiṃ 1- gahetvāna adāsiṃ satthuno ahaṃ
paṭiggaṇhi mahāvīro siddhattho lokanāyako.
|29.74| Mama nijjhāyamānassa paribhuñji tadā jino
tattha cittaṃ pasādetvā tusitaṃ upapajjahaṃ.
|29.75| Tato ahaṃ cavitvāna cakkavatti ahosahaṃ
eteneva upāyena anubhotvāna sampadā.
|29.76| Padhānaṃ pahitattohaṃ upasanto nirūpadhi
sabbāsave pariññāya viharāmi anāsavo.
|29.77| Catunavute ito kappe yaṃ dānamadadiṃ tadā
duggatiṃ nābhijānāmi phaladānassidaṃ phalaṃ.
|29.78| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|29.79| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|29.80| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ambapiṇḍiyo thero imā gāthāyo abhāsitthāti.
Ambapiṇḍiyattherassa apadānaṃ samattaṃ.
@Footnote: 1 Ma. ambapiṇḍaṃ.
Dasamaṃ jambūphaliyattherāpadānaṃ 1- (440)
[30] |30.81| Padumuttarabuddhassa lokajeṭṭhassa tādino
piṇḍāya vicarantassa dhārato uttamaṃ yasaṃ.
|30.82| Aggaphalaṃ gahetvāna vippasannena cetasā
dakkhiṇeyyassa dhīrassa adāsiṃ satthuno ahaṃ.
|30.83| Tena kammena dipadinda lokajeṭṭha narāsabha
pattomhi acalaṃ ṭhānaṃ hitvā jayaparājayaṃ.
|30.84| Satasahasse ito kappe yaṃ dānamadadiṃ tadā
duggatiṃ nābhijānāmi aggadānassidaṃ phalaṃ.
|30.85| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|30.86| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|30.87| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā jambūphaliyo thero imā gāthāyo abhāsitthāti.
Jambūphaliyattherassa apadānaṃ samattaṃ.
@Footnote: 1 Ma. ambaphaliyatthera....
Uddānaṃ
thero ekavihārī ca saṅkhiko pāṭihīrako
thaviko ucchukhaṇḍī ca kalambambāṭakappadā.
Harītakambapiṇḍī ca jambūdo dasamo yati
chaḷāsīti ca gāthāyo gaṇitāyo vibhāvihi.
Ekavihārivaggo catucattāḷīso.
--------------------
The Pali Tipitaka in Roman Character Volume 33 page 44-55.
http://84000.org/tipitaka/pali/roman_item_s.php?book=33&item=21&items=10
Classified by [Item Number] :-
http://84000.org/tipitaka/pali/roman_item_s.php?book=33&item=21&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=21&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=21&items=10
Study Atthakatha :-
http://84000.org/tipitaka/attha/attha.php?b=33&i=21
The Pali Atthakatha in Thai :-
http://84000.org/tipitaka/atthapali/read_th.php?B=50&A=5496
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5496
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
