Dutiyaṃ morahatthiyattherāpadānaṃ (452)
[42] |42.9| Morahatthaṃ gahetvāna upesi 1- lokanāyakaṃ
pasannacitto sumano morahatthaṃ adāsahaṃ.
|42.10| Iminā morahatthena cetanāpaṇidhīhi ca
nibbutā 2- me tayo aggī labhāmi vipulaṃ sukhaṃ.
|42.11| Aho buddhā aho dhammā aho no satthusampadā
datvānahaṃ morahatthaṃ labhāmi vipulaṃ sukhaṃ.
|42.12| Tidhaggī nibbutā mayhaṃ bhavā sabbe samūhatā
sabbāsavā parikkhīṇā natthi dāni punabbhavo.
|42.13| Ekatiṃse ito kappe yaṃ dānamadadintadā
duggatiṃ nābhijānāmi morahatthassidaṃ phalaṃ.
|42.14| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|42.15| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|42.16| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti
@Footnote: 1 Ma. Yu. upesiṃ. 2 Ma. nibbāyiṃsu tayo aggī. Yu. nibbantime tayo aggī.
Itthaṃ sudaṃ āyasmā morahatthiyo thero imā gāthāyo abhāsitthāti.
Morahatthiyattherassa apadānaṃ samattaṃ.
Tatiyaṃ sīhāsanabījiyattherāpadānaṃ (453)
[43] |43.17| Tissassāhaṃ bhagavato bodhirukkhaṃ avandihaṃ 1-
paggayha vījaniṃ tattha sīhāsanamavijjahaṃ.
|43.18| Dvenavute ito kappe sīhāsanamavijjahaṃ
duggatiṃ nābhijānāmi vījanāya idaṃ phalaṃ.
|43.19| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|43.20| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|43.21| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sīhāsanabījiyo thero imā gāthāyo abhāsitthāti.
Sīhāsanabījiyattherassa apadānaṃ samattaṃ.
Catutthaṃ tiṇukkadhāriyattherāpadānaṃ (454)
[44] |44.22| Pudumuttarassa buddhassa bodhiyā pādaputtame
pasannacitto sumano tayo ukke adhārayiṃ.
@Footnote: 1 Ma. avandiyaṃ.
|44.23| Satasahasse ito kappe yāhaṃ 1- ukkamadhārayiṃ
duggatiṃ nābhijānāmi ukkadānassidaṃ phalaṃ.
|44.24| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|44.25| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|44.26| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā tiṇukkadhāriyo thero imā gāthāyo abhāsitthāti.
Tiṇukkadhāriyattherassa apadānaṃ samattaṃ.
Pañcamaṃ akkamanadāyakattherāpadānaṃ (455)
[45] |45.27| Kakusandhassa munino brāhmaṇassa vusīmato
divāvihāraṃ vajato akkamanamadāsahaṃ.
|45.28| Imasmiṃyeva kappasmiṃ yaṃ dānamadadintadā
duggatiṃ nābhijānāmi akkamanassidaṃ phalaṃ.
|45.29| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|45.30| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. sohaṃ. Yu. yohaṃ.
|45.31| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā akkamanadāyako thero imā gāthāyo abhāsitthāti.
Akkamanadāyakattherassa apadānaṃ samattaṃ.
Chaṭṭhaṃ vanakoraṇḍiyattherāpadānaṃ (456)
[46] |46.32| Siddhatthassa bhagavato lokajeṭṭhassa tādino
vanakoraṇḍamādāya buddhassa abhiropayiṃ.
|46.33| Catunavute ito kappe yaṃ pupphamabhiropayiṃ
duggatiṃ nābhijānāmi buddhapūjāyidaṃ phalaṃ.
|46.34| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|46.35| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|46.36| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā vanakoraṇḍiyo thero imā gāthāyo abhāsitthāti.
Vanakoraṇḍiyattherassa apadānaṃ samattaṃ.
Vīsatimaṃ bhāṇavāraṃ.
Sattamaṃ ekachattiyattherāpadānaṃ (457)
[47] |47.37| Aṅgārajātā paṭhavī kukkuḷānugatā mahi
padumuttaro bhagavā abbhokāsamhi caṅkami.
|47.38| Paṇḍaraṃ chattamādāya addhānaṃ patipajjahaṃ
tattha disvāna sambuddhaṃ cittaṃ 1- me upapajjatha.
|47.39| Marīcimophunā 2- bhūmi aṅgārāva mahī ayaṃ
upaṭṭhanti 3- mahāvātā sarīrakāyukhepanā 4-.
|47.40| Sītaṃ uṇhaṃ vihanati 5- vātātapanivāraṇaṃ
paṭiggaṇha imaṃ chattaṃ phassayissāmi nibbutiṃ.
|47.41| Anukampako kāruṇiko padumuttaro mahāyaso
mama saṅkappamaññāya paṭiggaṇhi tadā jino.
|47.42| Tiṃsakappāni devindo devarajjamakārayiṃ
satānaṃ pañcakkhattuṃ ca cakkavatti ahosahaṃ.
|47.43| Padesarajjaṃ vipulaṃ gaṇanāto asaṅkhayaṃ
anubhomi sakaṃ kammaṃ pubbe sukatamattano.
|47.44| Ayaṃ me pacchimā jāti carimo vattate bhavo
ajjāpi setachattaṃ me sabbakālaṃ dharīyati.
|47.45| Satasahasse ito kappe yaṃ chattamadadiṃ tadā
duggatiṃ nābhijānāmi chattadānassidaṃ phalaṃ.
@Footnote: 1 Ma. Yu. vitti. 2 Ma. marīciyotthaṭā. Yu. marīcivophuṭā. 3 Ma. upahanti.
@Yu. upavāyanti. 4 Ma. sarīrassāsukhepanā. Yu. sarīrassānukhepanā. 5 Ma. vihanantaṃ.
@Yu. viharanti.
|47.46| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|47.47| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|47.48| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekachattiyo thero imā gāthāyo abhāsitthāti.
Ekachattiyattherassa apadānaṃ samattaṃ.
Aṭṭhamaṃ jātipupphiyattherāpadānaṃ (458)
[48] |48.49| Parinibbute bhagavati padumuttare mahāyase
pupphacaṅkoṭake 1- gahetvā sarīraṃ abhiropayiṃ.
|48.50| Tattha cittaṃ pasādetvā nimmānaṃ agamāsahaṃ
devalokaṃ gato santo puññakammaṃ carāmahaṃ.
|48.51| Ambarā pupphavasso me sabbakālaṃ pavassati
sambhavāmi 2- manusse ve rājā homi mahāyaso.
|48.52| Tahiṃ kusumavasso me abhivassati sabbadā
kāyesu 3- pupphapūjāya vāhasā sabbadassino.
|48.53| Ayaṃ pacchimako mayhaṃ carimo vattate bhavo
ajjāpi pupphavasso me abhivassati sabbadā.
@Footnote: 1 Ma. pupphavaṭaṃ sake katvā. 2 Ma. Yu. saṃsarāmi manusse ce. 3 Ma. tasseva.
@Yu. tāyeva.
|48.54| Satasahasse ito kappe yaṃ pupphaṃ abhiropayiṃ
duggatiṃ nābhijānāmi dehapūjāyidaṃ phalaṃ.
|48.55| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|48.56| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|48.57| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā jātipupphiyo thero imā gāthāyo abhāsitthāti.
Jātipupphiyattherassa apadānaṃ samattaṃ.
Navamaṃ sattipaṇṇiyattherāpadānaṃ 1- (459)
[49] |49.58| Nīharante sarīramhi vijjamānāsu 2- bherisu
pasannacitto sumano sattipupphaṃ apūjayiṃ.
|49.59| Satasahasse ito kappe yaṃ pupphaṃ abhipūjayiṃ
duggatiṃ nābhijānāmi dehapūjāyidaṃ phalaṃ.
|49.60| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|49.61| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. paṭṭipupphiyattherāpadānaṃ. 2 Ma. Yu. vajjamānāsu.
|49.62| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sattipaṇṇiyo thero imā gāthāyo abhāsitthāti.
Sattipaṇṇiyattherassa apadānaṃ samattaṃ.
Dasamaṃ gandhapūjakattherāpadānaṃ (460)
[50] |50.63| Citakesu kurumānesu nānāgandhe samāhaṭe
pasannacitto sumano gandhamuṭṭhiṃ apūjayiṃ.
|50.64| Satasahasse ito kappe citakaṃ yaṃ apūjayiṃ
duggatiṃ nābhijānāmi citapūjāyidaṃ phalaṃ.
|50.65| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|50.66| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|50.67| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā gandhapūjako thero imā gāthāyo abhāsitthāti.
Gandhapūjakattherassa apadānaṃ samattaṃ.
Uddānaṃ
jagatī morahattho ca āsani ukkadhārako
akkami vanakoraṇḍi chattado jātipūjako.
Sattipaṇṇiyo thero ca dasamo gandhapūjako
sattasaṭṭhī ca gāthāyo gaṇitāyo vibhāvihi.
Jagatidāyakavaggo chacattāḷīso.
----------------------
The Pali Tipitaka in Roman Character Volume 33 page 68-76.
http://84000.org/tipitaka/pali/roman_item_s.php?book=33&item=42&items=9
Classified by [Item Number] :-
http://84000.org/tipitaka/pali/roman_item_s.php?book=33&item=42&items=9&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=42&items=9
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=42&items=9
Study Atthakatha :-
http://84000.org/tipitaka/attha/attha.php?b=33&i=42
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
