[99] Chahi bhikkhave aṅgehi sanannāgatena bhikkhunā na upasampādetabbaṃ
na nissayo dātabbo na sāmaṇero upaṭṭhāpetabbo na asekhena
sīlakkhandhena samannāgato hoti na asekhena samādhikkhandhena samannāgato
hoti na asekhena paññākkhandhena samannāgato hoti na asekhena
vimuttikkhandhena samannāgato hoti na asekhena
Vimuttiñāṇadassanakkhandhena samannāgato hoti ūnadasavasso 1- hoti
imehi kho bhikkhave chahaṅgehi samannāgatena bhikkhunā na upasampādetabbaṃ
na nissayo dātabbo na sāmaṇero upaṭṭhāpetabbo.
{99.1} Chahi bhikkhave aṅgehi samannāgatena bhikkhunā upasampādetabbaṃ
nissayo dātabbo sāmaṇero upaṭṭhāpetabbo asekhena sīlakkhandhena
samannāgato hoti asekhena samādhikkhandhena samānnāgato hoti
asekhena paññākkhandhena samannāgato hoti asekhena vimuttikkhandhena
samannāgato hoti asekhena vimuttiñāṇadassanakkhandhena samannāgato
hoti dasavasso vā hoti atirekadasavasso vā imehi kho bhikkhave
chahaṅgehi samannāgatena bhikkhunā upasampādetabbaṃ nissayo dātabbo
sāmaṇero upaṭṭhāpetabbo.
{99.2} Aparehipi bhikkhave chahaṅgehi samannāgatena bhikkhunā na
upasampādetabbaṃ na nissayo dātabbo na sāmaṇero upaṭṭhāpetabbo
attanā na asekhena sīlakkhandhena samannāgato hoti na paraṃ asekhe
sīlakkhandhe samādapetā attanā na asekhena samādhikkhandhena
samannāgato hoti na paraṃ asekhe samādhikkhandhe samādapetā
attanā na asekhena paññākkhandhena samannāgato hoti
na paraṃ asekhe paññākkhandhe samādapetā attanā na asekhena
vimuttikkhandhena samannāgato hoti na paraṃ asekhe vimuttikkhandhe
samādapetā attanā na asekhena vimuttiñāṇadassanakkhandhena
samannāgato hoti na paraṃ asekhe
@Footnote: 1 Po. onadasavasso. ito paraṃ īdisameva.
Vimuttiñāṇadassanakkhandhe samādapetā ūnadasavasso hoti imehi kho
bhikkhave chahaṅgehi samannāgatena bhikkhunā na upasampādetabbaṃ na
nissayo dātabbo na sāmaṇero upaṭṭhāpetabbo.
{99.3} Chahi bhikkhave aṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabbo
attanā asekhena sīlakkhandhena samannāgato hoti paraṃ asekhe
sīlakkhandhe samādapetā attanā asekhena samādhikkhandhena samannāgato
hoti paraṃ asekhe samādhikkhandhe samādapetā attanā asekhena
paññākkhandhena samannāgato hoti paraṃ asekhe paññākkhandhe
samādapetā attanā asekhena vimuttikkhandhena samannāgato hoti
paraṃ asekhe vimuttikkhandhe samādapetā attanā asekhena
vimuttiñāṇadassanakkhandhena samannāgato hoti paraṃ asekhe
vimuttiñāṇadassanakkhandhe samādapetā dasavasso vā hoti
atirekadasavasso vā imehi kho bhikkhave chahaṅgehi samannāgatena
bhikkhunā upasampādetabbaṃ nissayo dātabbo sāmaṇero
upaṭṭhāpetabbo.
{99.4} Aparehipi bhikkhave chahaṅgehi samannāgatena bhikkhunā
na upasampādetabbaṃ na nissayo dātabbo na sāmaṇero
upaṭṭhāpetabbo assaddho hoti ahiriko hoti anottāpī hoti kusīto
hoti muṭṭhassati hoti ūnadasavasso hoti imehi kho bhikkhave chahaṅgehi
samannāgatena bhikkhunā na upasampādetabbaṃ na nissayo dātabbo na
Sāmaṇero upaṭṭhāpetabbo.
{99.5} Chahi bhikkhave aṅgehi samannagātena bhikkhunā
upasampādetabbaṃ nissayo dātabbo sāmaṇero upaṭṭhāpetabbo
saddho hoti hirimā hoti ottāpī hoti āraddhaviriyo hoti
upaṭṭhitassati hoti dasavasso vā hoti atirekadasavasso vā imehi
kho bhikkhave chahaṅgehi samannāgatena bhikkhunā upasampādetabbaṃ
nissayo dātabbo sāmaṇero upaṭṭhāpetabbo.
{99.6} Aparehipi bhikkhave chahaṅgehi samannāgatena bhikkhunā
na upasampādetabbaṃ na nissayo dātabbo na sāmaṇero
upaṭṭhāpetabbo adhisīle sīlavipanno hoti ajjhācāre ācāravipanno
hoti atidiṭṭhiyā diṭṭhivipanno hoti appassuto hoti duppañño
hoti ūnadasavasso hoti imehi kho bhikkhave chahaṅgehi samannāgatena
bhikkhunā na upasampādetabbaṃ na nissayo dātabbo na sāmaṇero
upaṭṭhāpetabbo.
{99.7} Chahi bhikkhave aṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabbo
na adhisīle sīlavipanno hoti na ajjhācāre ācāravipanno hoti
na atidiṭṭhiyā diṭṭhivipanno hoti bahussuto hoti paññavā
hoti dasavasso vā hoti atirekadasavasso vā imehi kho bhikkhave
chahaṅgehi samannāgatena bhikkhunā upasampādetabbaṃ nissayo
dātabbo sāmaṇero upaṭṭhāpetabbo.
{99.8} Aparehipi bhikkhave chahaṅgehi
Samannāgatena bhikkhunā na upasampādetabbaṃ na nissayo dātabbo
na sāmaṇero upaṭṭhāpetabbo na paṭibalo hoti antevāsiṃ
vā saddhivihāriṃ vā gilānaṃ upaṭṭhātuṃ vā upaṭṭhāpetuṃ vā
anabhiratiṃ vūpakāsetuṃ vā vūpakāsāpetuṃ vā uppannaṃ kukkuccaṃ
dhammato vinodetuṃ vā vinodāpetuṃ vā āpattiṃ na jānāti
āpattiyā vuṭṭhānaṃ na jānāti ūnadasavasso hoti imehi kho
bhikkhave chahaṅgehi samannāgatena bhikkhunā na upasampādetabbaṃ na
nissayo dātabbo na sāmaṇero upaṭṭhāpetabbo.
{99.9} Chahi bhikkhave aṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabbo
paṭibalo hoti antevāsiṃ vā saddhivihāriṃ vā gilānaṃ upaṭṭhātuṃ vā
upaṭṭhāpetuṃ vā anabhiratiṃ vūpakāsetuṃ vā vūpakāsāpetuṃ vā uppannaṃ
kukkuccaṃ dhammato vinodetuṃ vā vinodāpetuṃ vā āpattiṃ jānāti
āpattiyā vuṭṭhānaṃ jānāti dasavasso vā hoti atirekadasavasso vā
imehi kho bhikkhave chahaṅgehi samannāgatena bhikkhunā upasampādetabbaṃ
nissayo dātabbo sāmaṇero upaṭṭhāpetabbo.
{99.10} Aparehipi bhikkhave chahaṅgehi samannāgatena bhikkhunā
na upasampādetabbaṃ na nissayo dātabbo na sāmaṇero upaṭṭhāpetabbo
na paṭibalo hoti antevāsiṃ vā saddhivihāriṃ vā abhisamācārikāya
sikkhāya sikkhāpetuṃ ādibrahmacariyakāya sikkhāya vinetuṃ abhidhamme
Vinetuṃ avivinaye vinetuṃ uppannaṃ diṭṭhigataṃ dhammato vivecetuṃ
ūnadasavasso hoti imehi kho bhikkhave chahaṅgehi samannāgatena
bhikkhunā na upasampādetabbaṃ na nissayo dātabbo na
sāmaṇero upaṭṭhāpetabbo.
{99.11} Chahi bhikkhave aṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabbo
paṭibalo hoti antevāsiṃ vā saddhivihāriṃ vā abhisamācārikāya sikkhāya
sikkhāpetuṃ ādibrahmacariyakāya sikkhāya vinetuṃ abhidhamme vinetuṃ
abhivinaye vinetuṃ uppannaṃ diṭṭhigataṃ dhammato vivecetuṃ dasavasso vā hoti
atirekadasavasso vā imehi kho bhikkhave chahaṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabbo.
{99.12} Aparehipi bhikkhave chahaṅgehi samannāgatena bhikkhunā
na upasampādetabbaṃ na nissayo dātabbo na sāmaṇero upaṭṭhāpetabbo
āpattiṃ na jānāti anāpattiṃ na jānāti lahukaṃ āpattiṃ na jānāti
garukaṃ āpattiṃ na jānāti ubhayāni kho panassa pātimokkhāni
vitthārena na svāgatāni honti na suvibhattāni na suppavattīni na
suvinicchitāni suttaso anubbayañjanaso ūnadasavasso hoti imehi
kho bhikkhave chahaṅgehi samannāgatena bhikkhunā na upasampādetabbaṃ
na nissayo dātabbo na sāmaṇero upaṭṭhāpetabbo.
{99.13} Chahi bhikkhave aṅgehi samannāgatena bhikkhunā upasampādetabbaṃ nissayo
Dātabbo sāmaṇero upaṭṭhāpetabbo āpattiṃ jānāti anāpattiṃ
jānāti lahukaṃ āpattiṃ jānāti garukaṃ āpattiṃ jānāti ubhayāni kho
panassa pātimokkhāni vitthārena svāgatāni honti suvibhattāni
suppavattīni suvinicchitāni suttaso anubyañjanaso dasavasso vā hoti
atirekadasavasso vā imehi kho bhikkhave chahaṅgehi samannāgatena bhikkhunā
upasampādetabbaṃ nissayo dātabbo sāmaṇero upaṭṭhāpetabboti.
(upasampādetabbachakkasoḷasavāraṃ niṭṭhitaṃ .)
[100] Tena kho pana samayena yo so aññatitthiyapubbo
upajjhāyena sahadhammikaṃ vuccamāno upajjhāyassa vādaṃ āropetvā
taṃyeva titthāyatanaṃ saṅkami . so puna 1- paccāgantvā bhikkhū upasampadaṃ
yāci . bhagavato etamatthaṃ ārocesuṃ. Yo so bhikkhave aññatitthiyapubbo
upajjhāyena sahadhammikaṃ vuccamāno upajjhāyassa vādaṃ āropetvā
taṃyeva titthāyatanaṃ saṅkanto so āgato na upasampādetabbo .
Yo [2]- bhikkhave aññopi aññatitthiyapubbo imasmiṃ dhammavinaye
ākaṅkhati pabbajjaṃ ākaṅkhati upasampadaṃ tassa cattāro māse
parivāso dātabbo . evañca pana bhikkhave dātabbo . paṭhamaṃ
kesamassuṃ ohārāpetvā kāsāyāni vatthāni acchādāpetvā
ekaṃsaṃ uttarāsaṅgaṃ kārāpetvā bhikkhūnaṃ pāde
@Footnote: 1 Sī. ayaṃ pāṭho na hoti . 2 Po. Ma. so.
Vandāpetvā ukkuṭikaṃ nisīdāpetvā añjaliṃ paggaṇhāpetvā
evaṃ vadehīti vattabbo buddhaṃ saraṇaṃ gacchāmi dhammaṃ saraṇaṃ gacchāmi
saṅghaṃ saraṇaṃ gacchāmi dutiyampi buddhaṃ saraṇaṃ gacchāmi dutiyampi
dhammaṃ saraṇaṃ gacchāmi dutiyampi saṅghaṃ saraṇaṃ gacchāmi tatiyampi
buddhaṃ saraṇaṃ gacchāmi tatiyampi dhammaṃ saraṇaṃ gacchāmi tatiyampi
saṅghaṃ saraṇaṃ gacchāmīti . tena [1]- bhikkhave aññatitthiyapubbena
saṅghaṃ upasaṅkamitvā ekaṃsaṃ uttarāsaṅgaṃ karitvā bhikkhūnaṃ pāde
vanditvā ukkuṭikaṃ nisīditvā añjaliṃ paggahetvā evamassa vacanīyo
ahaṃ bhante itthannāmo aññatitthiyapubbo imasmiṃ dhammavinaye
ākaṅkhāmi upasampadaṃ sohaṃ bhante saṅghaṃ cattāro māse parivāsaṃ
yācāmīti . dutiyampi yācitabbo tatiyampi yācitabbo . byattena
bhikkhunā paṭibalena saṅgho ñāpetabbo
{100.1} suṇātu me bhante saṅgho ayaṃ itthannāmo
aññatitthiyapubbo imasmiṃ dhammavinaye ākaṅkhati upasampadaṃ
so saṅghaṃ cattāro māse parivāsaṃ yācati . yadi saṅghassa
pattakallaṃ saṅgho itthannāmassa aññatitthiyapubbassa
cattāro māse parivāsaṃ dadeyya. Esā ñatti.
{100.2} Suṇātu me bhante saṅgho ayaṃ itthannāmo
aññatitthiyapubbo imasmiṃ dhammavinaye ākaṅkhati upasampadaṃ . so saṅghaṃ
cattāro māse parivāsaṃ yācati. Saṅgho itthannāmassa aññatitthiyapubbassa
cattāro māse parivāsaṃ deti . yassāyasmato khamati itthannāmassa
@Footnote: 1 Yu. kho.
Aññatitthiyapubbassa cattāro māse parivāsassa dānaṃ so
tuṇhassa yassa nakkhamati so bhāseyya.
{100.3} Dinno saṅghena itthannāmassa aññatitthiyapubbassa
cattāro māse parivāso . khamati saṅghassa tasmā tuṇhī. Evametaṃ
dhārayāmīti . evaṃ kho bhikkhave aññatitthiyapubbo ārādhako hoti.
Evaṃ anārādhako.
{100.4} Kathañca bhikkhave aññatitthiyapubbo anārādhako hoti.
Idha bhikkhave aññatitthiyapubbo atikālena gāmaṃ pavisati atidivā
paṭikkamati. Evaṃpi bhikkhave aññatitthiyapubbo anārādhako hoti.
{100.5} Puna caparaṃ bhikkhave aññatitthiyapubbo vesiyagocaro vā
hoti vidhavagocaro vā hoti thullakumārikagocaro vā hoti paṇḍakagocaro
vā hoti bhikkhunīgocaro vā hoti . evaṃpi bhikkhave aññatitthiyapubbo
anārādhako hoti.
{100.6} Puna caparaṃ bhikkhave aññatitthiyapubbo yāni tāni
sabrahmacārīnaṃ uccāvacāni kiṃkaraṇīyāni 1- tattha na dakkho hoti
na analaso na tatrupāyāya vīmaṃsāya samannāgato na alaṃ kātuṃ
na alaṃ saṃvidhātuṃ . evaṃ bhikkhave aññatitthiyapubbo anārādhako
hoti.
{100.7} Puna caparaṃ bhikkhave aññatitthiyapubbo na tibbacchando
hoti uddese paripucchāya adhisīle adhicitte adhipaññāya .
Evaṃpi bhikkhave aññatitthiyapubbo anārādhako hoti.
{100.8} Puna caparaṃ bhikkhave aññatitthiyapubbo yassa titthāyatanā
saṅkanto hoti tassa satthuno tassa diṭṭhiyā tassa khantiyā tassa ruciyā tassa
@Footnote: 1 Ma. Yu. karaṇīyāni. ito paraṃ īdisameva.
Ādāyassa avaṇṇe bhaññamāne kupito hoti anattamano anabhiraddho
buddhassa vā dhammassa vā saṅghassa vā avaṇṇe bhaññamāne
attamano hoti udaggo abhiraddho yassa vā pana titthāyatanā
saṅkanto hoti tassa satthuno tassa diṭṭhiyā tassa khantiyā tassa
ruciyā tassa ādāyassa vaṇṇe bhaññamāne attamano hoti
udaggo abhiraddho buddhassa vā dhammassa vā saṅghassa vā vaṇṇe
bhaññamāne kupito hoti anattamano anabhiraddho . idaṃ bhikkhave
saṅghātanikaṃ aññatitthiyapubbassa anārādhanīyasmiṃ . evaṃ kho
bhikkhave aññatitthiyapubbo anārādhako hoti . evaṃ anārādhako
kho bhikkhave aññatitthiyapubbo āgato na upasampādetabbo.
{100.9} Kathañca bhikkhave aññatitthiyapubbo ārādhako hoti .
Idha bhikkhave aññatitthiyapubbo nātikālena gāmaṃ pavisati nātidivā
paṭikkamati. Evaṃpi bhikkhave aññatitthiyapubbo ārādhako hoti.
{100.10} Puna caparaṃ bhikkhave aññatitthiyapubbo na vesiyagocaro
hoti na vidhavagocaro hoti na thullakumārikagocaro hoti na paṇḍakagocaro
hoti na bhikkhunīgocaro hoti . evaṃpi bhikkhave aññatitthiyapubbo
ārādhako hoti.
{100.11} Puna caparaṃ bhikkhave aññatitthiyapubbo yāni tāni
sabrahmacārīnaṃ uccāvacāni kiṃkaraṇīyāni tattha dakkho hoti analaso
tatrupāyāya vīmaṃsāya samannāgato alaṃ kātuṃ alaṃ saṃvidhātuṃ . evaṃpi
bhikkhave aññatitthiyapubbo ārādhako hoti.
{100.12} Puna caparaṃ bhikkhave aññatitthiyapubbo tibbacchando hoti
uddese paripucchāya adhisīle adhicitte adhipaññāya . evaṃpi bhikkhave
aññatitthiyapubbo ārādhako hoti.
{100.13} Puna caparaṃ bhikkhave aññatitthiyapubbo yassa
titthāyatanā saṅkanto hoti tassa satthuno tassa diṭṭhiyā
tassa khantiyā tassa ruciyā tassa ādāyassa avaṇṇe bhaññamāne
attamano hoti udaggo abhiraddho buddhassa vā dhammassa vā
saṅghassa vā avaṇṇe bhaññamāne kupito hoti anattamano
anabhiraddho yassa vā pana titthāyatanā saṅkanto hoti tassa
satthuno tassa diṭṭhiyā tassa khantiyā tassa ruciyā tassa ādāyassa
vaṇṇe bhaññamāne kupito hoti anattamano anabhiraddho buddhassa
vā dhammassa vā saṅghassa vā vaṇṇe bhaññamāne attamano hoti
udaggo abhiraddho . idaṃ bhikkhave saṅghātanikaṃ aññatitthiyapubbassa
ārādhanīyasmiṃ . evaṃ kho bhikkhave aññatitthiyapubbo ārādhako
hoti . evaṃ ārādhako kho bhikkhave aññatitthiyapubbo āgato
upasampādetabbo.
{100.14} Sace bhikkhave aññatitthiyapubbo naggo āgacchati
upajjhāyamūlakaṃ cīvaraṃ pariyesitabbaṃ sace acchinnakeso āgacchati
saṅgho apaloketabbo bhaṇḍukammāya . ye te bhikkhave aggikā
jaṭilakā te āgatā upasampādetabbā na tesaṃ parivāso dātabbo.
Taṃ kissa hetu . kammavādino ete bhikkhave kiriyavādino .
Sace bhikkhave jātiyā sākiyo aññatitthiyapubbako 1-
@Footnote: 1 Ma. Yu. -pubbo.
Āgacchati so āgato upasampādetabbo na tassa parivāso
dātabbo. Imāhaṃ bhikkhave ñātīnaṃ āveṇikaṃ parihāraṃ dammīti.
Aññatitthiyapubbakathā.
Sattamaṃ bhāṇavāraṃ.
The Pali Tipitaka in Roman Character Volume 4 page 137-148.
http://84000.org/tipitaka/pali/roman_item_s.php?book=4&item=99&items=2
Classified by [Item Number] :-
http://84000.org/tipitaka/pali/roman_item_s.php?book=4&item=99&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=4&item=99&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=4&item=99&items=2
Study Atthakatha :-
http://84000.org/tipitaka/attha/attha.php?b=4&i=99
Contents of The Tipitaka Volume 4
http://84000.org/tipitaka/read/?index_4
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
