ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
   ฉบับหลวง   บาลีอักษรไทย   PaliRoman 
อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๑๒ ภาษาบาลี อักษรไทย พระสุตตันตปิฎกเล่มที่ ๔ สุตฺต. ม. มูลปณฺณาสกํ
                                 มหายมกวคฺโค
                              จูฬโคสิงฺคสาลสุตฺตํ
     [๓๖๑]   เอวมฺเม   สุตํ   เอกํ   สมยํ  ภควา  นาทิเก  วิหรติ
คิญฺชกาวสเถ   ฯ   เตน   โข   ปน  สมเยน  อายสฺมา  จ  อนุรุทฺโธ
อายสฺมา   จ   นนฺทิโย  อายสฺมา  จ  กิมิโล  ๑-  โคสิงฺคสาลวนทาเย
วิหรนฺติ   ฯ   อถ   โข   ภควา   สายณฺหสมยํ   ปฏิสลฺลานา  วุฏฺฐิโต
เยน   โคสิงฺคสาลวนทาโย   เตนุปสงฺกมิ   ฯ  อทฺทสา  โข  ทายปาโล
ภควนฺตํ    ทูรโตว    คจฺฉนฺตํ    ทิสฺวาน   ภควนฺตํ   เอตทโวจ   มา
สมณ   เอตํ   ทายํ   ปาวิสิ   สนฺเตตฺถ  ตโย  กุลปุตฺตา  อตฺตกามรูปา
วิหรนฺติ มา เตสํ อผาสุมกาสีติ ฯ
     {๓๖๑.๑}   อสฺโสสิ  โข  อายสฺมา  อนุรุทฺโธ  ทายปาลสฺส ภควตา
สทฺธึ   มนฺตยมานสฺส   สุตฺวาน   ทายปาลํ   เอตทโวจ   มา   อาวุโส
ทายปาล   ภควนฺตํ   วาเรสิ   สตฺถา   โน   ภควา   อนุปฺปตฺโตติ  ฯ
อถ   โข   อายสฺมา   อนุรุทฺโธ   เยนายสฺมา   จ  นนฺทิโย  อายสฺมา
จ    กิมิโล    เตนุปสงฺกมิ    อุปสงฺกมิตฺวา    อายสฺมนฺตญฺจ    นนฺทิยํ
อายสฺมนฺตญฺจ        กิมิลํ        เอตทโวจ       อภิกฺกมถายสฺมนฺโต
อภิกฺกมถายสฺมนฺโต     สตฺถา     โน     ภควา    อนุปฺปตฺโตติ    ฯ
@เชิงอรรถ:  ยุ. กิมฺพิโลติ ทิสฺสติ ฯ
อถ   โข  อายสฺมา  จ  อนุรุทฺโธ  อายสฺมา  จ  นนฺทิโย  อายสฺมา  จ
กิมิโล   ภควนฺตํ   ปจฺจุคฺคนฺตฺวา   เอโก  ภควโต  ปตฺตจีวรํ  ปฏิคฺคเหสิ
เอโก   อาสนํ   ปญฺญาเปสิ   เอโก   ปาโททกํ   อุปฏฺฐเปสิ  ฯ  นิสีทิ
ภควา   ปญฺญตฺเต  อาสเน  นิสชฺช  [๑]-  ปาเท  ปกฺขาเลสิ  ฯ  เตปิ
โข อายสฺมนฺโต ภควนฺตํ อภิวาเทตฺวา เอกมนฺตํ นิสีทึสุ ฯ
     [๓๖๒]   เอกมนฺตํ   นิสินฺนํ   โข   อายสฺมนฺตํ   อนุรุทฺธํ  ภควา
เอตทโวจ    กจฺจิ   โว   อนุรุทฺธา   ขมนียํ   กจฺจิ   ยาปนียํ   กจฺจิ
ปิณฺฑเกน  ๒-  น  กิลมิตฺถาติ  ฯ  ขมนียํ  ภควา  ยาปนียํ  ภควา  น จ
มยํ   ภนฺเต   ปิณฺฑเกน  กิลมิมฺหาติ  ๓-  ฯ  กจฺจิ  ปน  โว  อนุรุทฺธา
สมคฺคา     สมฺโมทมานา     อวิวทมานา     ขีโรทกีภูตา    อญฺญมญฺญํ
ปิยจกฺขูหิ   สมฺปสฺสนฺตา   วิหรถาติ  ฯ  ตคฺฆ  มยํ  ภนฺเต  ๔-  สมคฺคา
สมฺโมทมานา     อวิวทมานา     ขีโรทกีภูตา    อญฺญมญฺญํ    ปิยจกฺขูหิ
สมฺปสฺสนฺตา   วิหรามาติ   ฯ   ยถากถํ  ปน  ตุเมฺห  อนุรุทฺธา  สมคฺคา
สมฺโมทมานา     อวิวทมานา     ขีโรทกีภูตา    อญฺญมญฺญํ    ปิยจกฺขูหิ
สมฺปสฺสนฺตา วิหรถาติ ฯ
     [๓๖๓]   อิธ  มยฺหํ  ภนฺเต เอวํ โหติ ลาภา วต เม สุลทฺธํ วต เม
โยหํ   เอวรูเปหิ   สพฺรหฺมจารีหิ   สทฺธึ  วิหรามีติ  ตสฺส  มยฺหํ  ภนฺเต
อิเมสุ    อายสฺมนฺเตสุ   เมตฺตํ   กายกมฺมํ   ปจฺจุปฏฺฐิตํ   อาวี   เจว
รโห  จ  เมตฺตํ  วจีกมฺมํ  ...  เมตฺตํ  มโนกมฺมํ  ปจฺจุปฏฺฐิตํ อาวี เจว
รโห   จ   ตสฺส   มยฺหํ   ภนฺเต   เอวํ   โหติ  ยนฺนูนาหํ  สกํ  จิตฺตํ
@เชิงอรรถ:  ม. โข ภควา ฯ  โป. ปิณฺฑปาเตน ฯ  ม. กิลมามาติ ฯ  โป. ตโย
@มยํ ภนฺเต ภควา ฯ
นิกฺขิปิตฺวา   อิเมสํเยว   อายสฺมนฺตานํ   จิตฺตสฺส   วเสน   วตฺเตยฺยนฺติ
โส   โข  อหํ  ภนฺเต  สกํ  จิตฺตํ  นิกฺขิปิตฺวา  อิเมสํเยว  อายสฺมนฺตานํ
จิตฺตสฺส   วเสน  วตฺตามิ  นานา  หิ  โข  โน  ภนฺเต  กายา  เอกญฺจ
ปน มญฺเญ จิตฺตนฺติ ฯ
     {๓๖๓.๑}   อายสฺมาปิ  โข  นนฺทิโย  ฯเปฯ  อายสฺมาปิ โข กิมิโล
ภควนฺตํ  เอตทโวจ  อิธ  มยฺหมฺปิ  โข  ภนฺเต  เอวํ โหติ ลาภา วต เม
สุลทฺธํ  วต  เม  โยหํ  เอวรูเปหิ  สพฺรหฺมจารีหิ  สทฺธึ  วิหรามีติ  ตสฺส
มยฺหํ   ภนฺเต   อิเมสุ   อายสฺมนฺเตสุ   เมตฺตํ   กายกมฺมํ   ปจฺจุปฏฺฐิตํ
อาวี  เจว  รโห  จ  เมตฺตํ  วจีกมฺมํ  ...  เมตฺตํ มโนกมฺมํ ปจฺจุปฏฺฐิตํ
อาวี   เจว  รโห  จ  ตสฺส  มยฺหํ  ภนฺเต  เอวํ  โหติ  ยนฺนูนาหํ  สกํ
จิตฺตํ    นิกฺขิปิตฺวา    อิเมสํเยว    อายสฺมนฺตานํ    จิตฺตสฺส    วเสน
วตฺเตยฺยนฺติ   โส   โข  อหํ  ภนฺเต  สกํ  จิตฺตํ  นิกฺขิปิตฺวา  อิเมสํเยว
อายสฺมนฺตานํ   จิตฺตสฺส   วเสน   วตฺตามิ  นานา  หิ  โข  โน  ภนฺเต
กายา   เอกญฺจ   ปน   มญฺเญ   จิตฺตนฺติ   ฯ  เอวํ  โข  มยํ  ภนฺเต
สมคฺคา     สมฺโมทมานา     อวิวทมานา     ขีโรทกีภูตา    อญฺญมญฺญํ
ปิยจกฺขูหิ สมฺปสฺสนฺตา วิหรามาติ ฯ
     [๓๖๔]   สาธุ   สาธุ   อนุรุทฺธา   กจฺจิ   ปน   โว  อนุรุทฺธา
อปฺปมตฺตา   อาตาปิโน   ปหิตตฺตา   วิหรถาติ   ฯ   ตคฺฆ  มยํ  ภนฺเต
อปฺปมตฺตา    อาตาปิโน    ปหิตตฺตา   วิหรามาติ   ฯ   ยถากถํ   ปน
ตุเมฺห   อนุรุทฺธา   อปฺปมตฺตา  อาตาปิโน  ปหิตตฺตา  วิหรถาติ  ฯ  อิธ
ปน   ๑-  ภนฺเต  อมฺหากํ  โย  ปฐมํ  คามโต  ปิณฺฑาย  ปฏิกฺกมติ  โส
@เชิงอรรถ:  โป. ม. ปนสทฺโท น ทิสฺสติ ฯ
อาสนานิ   ปญฺญาเปติ  ปานียํ  ปริโภชนียํ  อุปฏฺฐเปติ  ๑-  อวกฺการปาตึ
อุปฏฺฐเปติ    โย    ปจฺฉา    คามโต    ปิณฺฑาย    ปฏิกฺกมติ   สเจ
โหติ   ภุตฺตาวเสโส   สเจ   อากงฺขติ   ภุญฺชติ   โน   เจ  อากงฺขติ
อปฺปหริเต   วา   ฉฑฺเฑติ   อปฺปาณเก   วา  อุทเก  โอปิลาเปติ  โส
อาสนานิ   ปฏิสาเมติ   ปานียํ   ปริโภชนียํ   ปฏิสาเมติ   อวกฺการปาตึ
ปฏิสาเมติ    ภตฺตคฺคํ    สมฺมชฺชติ    โย    ปสฺสติ    ปานียฆฏํ   วา
ปริโภชนียฆฏํ   วา   วจฺจฆฏํ   วา   ริตฺตํ  ตุจฺฉํ  โส  อุปฏฺฐเปติ  ๑-
สจาสฺส  โหติ  อวิสยฺหํ  หตฺถวิกาเรน  ทุติยํ  อามนฺเตตฺวา หตฺถวิลงฺฆิเกน
อุปฏฺฐเปม    ๒-    น    เตฺวว    มยํ   ภนฺเต   ตปฺปจฺจยา   วาจํ
ภินฺทาม    ปญฺจาหิกํ   โข   ปน   มยํ   ภนฺเต   สพฺพรตฺติกํ   ธมฺมิยา
กถาย   สนฺนิสีทาม   เอวํ   โข   มยํ   ภนฺเต  อปฺปมตฺตา  อาตาปิโน
ปหิตตฺตา วิหรามาติ ฯ
     [๓๖๕]   สาธุ  สาธุ  อนุรุทฺธา  อตฺถิ  ปน  โว  อนุรุทฺธา  เอวํ
อปฺปมตฺตานํ    อาตาปีนํ    ปหิตตฺตานํ    วิหรตํ   อุตฺตริ   มนุสฺสธมฺมา
อลมริยญาณทสฺสนวิเสโส   อธิคโต   ผาสุวิหาโรติ  ฯ  กึ  หิ  โน  สิยา
ภนฺเต  อิธ  มยํ  ภนฺเต  ยาวเทว  อากงฺขาม  วิวิจฺเจว  กาเมหิ วิวิจฺจ
อกุสเลหิ   ธมฺเมหิ   สวิตกฺกํ   สวิจารํ   วิเวกชํ   ปีติสุขํ  ปฐมํ  ฌานํ
อุปสมฺปชฺช   วิหราม   อยํ   โข   โน   ภนฺเต   อมฺหากํ  อปฺปมตฺตานํ
อาตาปีนํ    ปหิตตฺตานํ    วิหรตํ   อุตฺตริ   มนุสฺสธมฺมา   อลมริยญาณ-
ทสฺสนวิเสโส   อธิคโต   ผาสุวิหาโรติ   ฯ   สาธุ   สาธุ   อนุรุทฺธา
@เชิงอรรถ:  ม. อุปฏฺฐาเปติ ฯ  ม. อุปฏฺฐาเปม ฯ
เอตสฺส   ปน  โว  อนุรุทฺธา  วิหารสฺส  สมติกฺกมาย  เอตสฺส  วิหารสฺส
ปฏิปฺปสฺสทฺธิยา     อตฺถญฺโญ     อุตฺตริ    มนุสฺสธมฺมา    อลมริยญาณ-
ทสฺสนวิเสโส  อธิคโต  ผาสุวิหาโรติ  ฯ  กึ  หิ  โน  สิยา  ภนฺเต อิธ
มยํ   ภนฺเต   ยาวเทว   อากงฺขาม   วิตกฺกวิจารานํ  วูปสมา  อชฺฌตฺตํ
สมฺปสาทนํ   เจตโส   เอโกทิภาวํ   อวิตกฺกํ   อวิจารํ  สมาธิชํ  ปีติสุขํ
ทุติยํ    ฌานํ    อุปสมฺปชฺช    วิหราม    เอตสฺส   ภนฺเต   วิหารสฺส
สมติกฺกมาย    เอตสฺส   วิหารสฺส   ปฏิปฺปสฺสทฺธิยา   อยมญฺโญ   อุตฺตริ
มนุสฺสธมฺมา อลมริยญาณทสฺสนวิเสโส อธิคโต ผาสุวิหาโรติ ฯ
     {๓๖๕.๑}   สาธุ  สาธุ อนุรุทฺธา เอตสฺส ปน โว อนุรุทฺธา วิหารสฺส
สมติกฺกมาย    เอตสฺส   วิหารสฺส   ปฏิปฺปสฺสทฺธิยา   อตฺถญฺโญ   อุตฺตริ
มนุสฺสธมฺมา    อลมริยญาณทสฺสนวิเสโส    อธิคโต    ผาสุวิหาโรติ   ฯ
กึ  หิ  โน  สิยา  ภนฺเต  อิธ  มยํ  ภนฺเต ยาวเทว อากงฺขาม ปีติยา จ
วิราคา   อุเปกฺขกา  จ  วิหราม  สตา  จ  สมฺปชานา  สุขญฺจ  กาเยน
ปฏิสํเวเทม   ยนฺตํ   อริยา   อาจิกฺขนฺติ  อุเปกฺขโก  สติมา  สุขวิหารีติ
ตติยํ  ฌานํ  อุปสมฺปชฺช  วิหราม  เอตสฺส  ภนฺเต  วิหารสฺส  สมติกฺกมาย
เอตสฺส    วิหารสฺส   ปฏิปฺปสฺสทฺธิยา   อยมญฺโญ   อุตฺตริ   มนุสฺสธมฺมา
อลมริยญาณทสฺสนวิเสโส อธิคโต ผาสุวิหาโรติ ฯ
     {๓๖๕.๒}   สาธุ  สาธุ อนุรุทฺธา เอตสฺส ปน โว อนุรุทฺธา วิหารสฺส
สมติกฺกมาย    เอตสฺส   วิหารสฺส   ปฏิปฺปสฺสทฺธิยา   อตฺถญฺโญ   อุตฺตริ
มนุสฺสธมฺมา    อลมริยญาณทสฺสนวิเสโส    อธิคโต    ผาสุวิหาโรติ   ฯ
กึ  หิ  โน  สิยา  ภนฺเต  อิธ  มยํ  ภนฺเต ยาวเทว อากงฺขาม สุขสฺส จ
ปหานา    ทุกฺขสฺส    จ    ปหานา    ปุพฺเพว    โสมนสฺสโทมนสฺสานํ
อตฺถงฺคมา     อทุกฺขมสุขํ     อุเปกฺขาสติปาริสุทฺธึ     จตุตฺถํ     ฌานํ
อุปสมฺปชฺช   วิหราม   เอตสฺส   ภนฺเต  วิหารสฺส  สมติกฺกมาย  เอตสฺส
วิหารสฺส      ปฏิปฺปสฺสทฺธิยา     อยมญฺโญ     อุตฺตริ     มนุสฺสธมฺมา
อลมริยญาณทสฺสนวิเสโส อธิคโต ผาสุวิหาโรติ ฯ
     {๓๖๕.๓}   สาธุ  สาธุ อนุรุทฺธา เอตสฺส ปน โว อนุรุทฺธา วิหารสฺส
สมติกฺกมาย   เอตสฺส   วิหารสฺส   ปฏิปฺปสฺสทฺธิยา   อตฺถญฺโญ    อุตฺตริ
มนุสฺสธมฺมา    อลมริยญาณทสฺสนวิเสโส    อธิคโต    ผาสุวิหาโรติ   ฯ
กึ  หิ  โน  สิยา  ภนฺเต  อิธ  มยํ  ภนฺเต  ยาวเทว อากงฺขาม สพฺพโส
รูปสญฺญานํ     สมติกฺกมา     ปฏิฆสญฺญานํ     อมนสิการา     อนนฺโต
อากาโสติ   อากาสานญฺจายตนํ   อุปสมฺปชฺช   วิหราม   เอตสฺส  ภนฺเต
วิหารสฺส   สมติกฺกมาย   เอตสฺส   วิหารสฺส   ปฏิปฺปสฺสทฺธิยา  อยมญฺโญ
อุตฺตริ มนุสฺสธมฺมา อลมริยญาณทสฺสนวิเสโส อธิคโต ผาสุวิหาโรติ ฯ
     {๓๖๕.๔}   สาธุ  สาธุ อนุรุทฺธา เอตสฺส ปน โว อนุรุทฺธา วิหารสฺส
สมติกฺกมาย    เอตสฺส   วิหารสฺส   ปฏิปฺปสฺสทฺธิยา   อตฺถญฺโญ   อุตฺตริ
มนุสฺสธมฺมา    อลมริยญาณทสฺสนวิเสโส    อธิคโต    ผาสุวิหาโรติ   ฯ
กึ  หิ  โน  สิยา  ภนฺเต  อิธ  มยํ  ภนฺเต  ยาวเทว อากงฺขาม สพฺพโส
อากาสานญฺจายตนํ        สมติกฺกมฺม        อนนฺตํ        วิญฺญาณนฺติ
วิญฺญาณญฺจายตนํ      อุปสมฺปชฺช      วิหราม      ฯเปฯ     สพฺพโส
วิญฺญาณญฺจายตนํ     สมติกฺกมฺม     นตฺถิ     กิญฺจีติ    อากิญฺจญฺญายตนํ
อุปสมฺปชฺช    วิหราม   ฯเปฯ   สพฺพโส   อากิญฺจญฺญายตนํ   สมติกฺกมฺม
เนวสญฺญานาสญฺญายตนํ     อุปสมฺปชฺช     วิหราม    เอตสฺส    ภนฺเต
วิหารสฺส     สมติกฺกมาย     เอตสฺส     วิหารสฺส     ปฏิปฺปสฺสทฺธิยา
อยมญฺโญ    อุตฺตริ    มนุสฺสธมฺมา    อลมริยญาณทสฺสนวิเสโส   อธิคโต
ผาสุวิหาโรติ ฯ
     {๓๖๕.๕}   สาธุ   สาธุ  อนุรุทฺธา  เอตสฺส  ปน  โว  อนุรุทฺธา
วิหารสฺส   สมติกฺกมาย   เอตสฺส   วิหารสฺส   ปฏิปฺปสฺสทฺธิยา  อตฺถญฺโญ
อุตฺตริ   มนุสฺสธมฺมา  อลมริยญาณทสฺสนวิเสโส  อธิคโต  ผาสุวิหาโรติ  ฯ
กึ  หิ  โน  สิยา  ภนฺเต  อิธ  มยํ  ภนฺเต  ยาวเทว อากงฺขาม สพฺพโส
เนวสญฺญานาสญฺญายตนํ          สมติกฺกมฺม         สญฺญาเวทยิตนิโรธํ
อุปสมฺปชฺช   วิหราม   ปญฺญายปสฺส   ๑-   ทิสฺวา   อาสวา   ปริกฺขีณา
โหนฺติ   เอตสฺส   ภนฺเต   วิหารสฺส   สมติกฺกมาย   เอตสฺส  วิหารสฺส
ปฏิปฺปสฺสทฺธิยา     อยมญฺโญ     อุตฺตริ    มนุสฺสธมฺมา    อลมริยญาณ-
ทสฺสนวิเสโส   อธิคโต   ผาสุวิหาโรติ   ฯ   อิมสฺมา  จ  มยํ  ภนฺเต
ผาสุวิหารา   อญฺญํ   ผาสุวิหารํ   อุตฺตริตรํ   วา   ปณีตตรํ   วา   น
สมนุปสฺสามาติ    ฯ    สาธุ   สาธุ   อนุรุทฺธา   เอตสฺมา   อนุรุทฺธา
ผาสุวิหารา   อญฺโญ   ผาสุวิหาโร   อุตฺตริตโร   วา   ปณีตตโร   วา
นตฺถีติ ฯ
     [๓๖๖]   อถ   โข  ภควา  อายสฺมนฺตญฺจ  อนุรุทฺธํ  อายสฺมนฺตญฺจ
นนฺทิยํ     อายสฺมนฺตญฺจ    กิมิลํ    ธมฺมิยา    กถาย    สนฺทสฺเสตฺวา
@เชิงอรรถ:  ม. ปญฺญาย จ โน ฯ
สมาทเปตฺวา   สมุตฺเตเชตฺวา   สมฺปหํเสตฺวา  อุฏฺฐายาสนา  ปกฺกามิ  ฯ
อถ   โข  อายสฺมา  จ  อนุรุทฺโธ  อายสฺมา  จ  นนฺทิโย  อายสฺมา  จ
กิมิโล   ภควนฺตํ   อนุสํยายิตฺวา  ๑-  ตโต  ปฏินิวตฺติตฺวา  อายสฺมา  จ
นนฺทิโย    อายสฺมา    จ   กิมิโล   อายสฺมนฺตํ   อนุรุทฺธํ   เอตทโวจุํ
กินฺนุ   โข   มยํ   อายสฺมโต   อนุรุทฺธสฺส   เอวมาโรจิมฺหา  อิมาสญฺจ
อิมาสญฺจ    วิหารสมาปตฺตีนํ    มยํ    ลาภิโนติ   ยํ   โน   อายสฺมา
อนุรุทฺโธ   ภควโต   สมฺมุขา   ยาว   อาสวานํ   ขยา  ปกาเสตีติ  ฯ
น    โข    เม   อายสฺมนฺโต   เอวมาโรเจสุํ   อิมาสญฺจ   อิมาสญฺจ
วิหารสมาปตฺตีนํ   มยํ  ลาภิโนติ  อปิจ  โข  ๒-  อายสฺมนฺตานํ  เจตสา
เจโต    ปริจฺจ    วิทิโต    อิมาสญฺจ    อิมาสญฺจ    วิหารสมาปตฺตีนํ
อิเม   อายสฺมนฺโต   ลาภิโนติ   เทวตาปิ   เม   เอตมตฺถํ  อาโรเจสุํ
อิมาสญฺจ   อิมาสญฺจ   วิหารสมาปตฺตีนํ   อิเม   อายสฺมนฺโต   ลาภิโนติ
ตํ เม ๓- ภควตา ปญฺหาภิปุฏฺเฐน พฺยากตนฺติ ฯ
     [๓๖๗]   อถ  โข  ทีโฆ  ปรชโน  ยกฺโข  เยน ภควา เตนุปสงฺกมิ
อุปสงฺกมิตฺวา   ภควนฺตํ   อภิวาเทตฺวา  เอกมนฺตํ  อฏฺฐาสิ  ฯ  เอกมนฺตํ
ฐิโต  โข  ทีโฆ  ปรชโน  ยกฺโข  ภควนฺตํ เอตทโวจ ลาภา [๔]- ภนฺเต
วชฺชีนํ   สุลทฺธลาภา   ภนฺเต   วชฺชีนํ   ปชาย  ยตฺถ  ตถาคโต  วิหรติ
อรหํ    สมฺมาสมฺพุทฺโธ   อิเม   จ   ตโย   กุลปุตฺตา   อายสฺมา   จ
อนุรุทฺโธ   อายสฺมา   จ   นนฺทิโย   อายสฺมา  จ  กิมิโลติ  ฯ  ทีฆสฺส
ปรชนสฺส   ยกฺขสฺส   สทฺทํ   สุตฺวา   ภุมฺมา   เทวา   สทฺทมนุสฺสาเวสุํ
@เชิงอรรถ:  โป. อนุสาเวตฺวา ฯ  ม. อปิ จ เม ฯ  ม. ตเมนํ ฯ  ม. วต ฯ
ลาภา   วต   โภ   วชฺชีนํ   สุลทฺธลาภา   วต   โภ   วชฺชีนํ  ปชาย
ยตฺถ    ตถาคโต   วิหรติ   อรหํ   สมฺมาสมฺพุทฺโธ   อิเม   จ   ตโย
กุลปุตฺตา   อายสฺมา  จ  อนุรุทฺโธ  อายสฺมา  จ  นนฺทิโย  อายสฺมา  จ
กิมิโลติ    ฯ    ภุมฺมานํ   เทวานํ   สทฺทํ   สุตฺวา   จาตุมฺมหาราชิกา
เทวา  ...  ตาวตึสา  เทวา ... ยามา เทวา ... ตุสิตา เทวา ...
นิมฺมานรตี  เทวา  ... ปรนิมฺมิตวสวตฺตี เทวา  ... พฺรหฺมกายิกา เทวา
สทฺทมนุสฺสาเวสุํ   ลาภา   วต   โภ   วชฺชีนํ   สุลทฺธลาภา   วต  โภ
วชฺชีนํ    ปชาย    ยตฺถ    ตถาคโต   วิหรติ   อรหํ   สมฺมาสมฺพุทฺโธ
อิเม   จ   ตโย   กุลปุตฺตา   อายสฺมา   จ   อนุรุทฺโธ  อายสฺมา  จ
นนฺทิโย อายสฺมา จ กิมิโลติ ฯ
     [๓๖๘]   อิติห  เตน  ขเณน  เตน  มุหุตฺเตน  ยาว  พฺรหฺมโลกา
สทฺทา  วิทิตา  อเหสุํ  เอวเมตํ  ทีฆ  เอวเมตํ  ทีฆ  ยสฺมาปิ  ทีฆ กุลา
เอเต   ตโย   กุลปุตฺตา  อคารสฺมา  อนคาริยํ  ปพฺพชิตา  ตญฺเจปิ  กุลํ
เอเต   ตโย  กุลปุตฺเต  ปสนฺนจิตฺตํ  อนุสฺสเรยฺย  ตสฺสปสฺส  ๑-  กุลสฺส
ทีฆรตฺตํ   หิตาย   สุขาย   ยสฺมาปิ   ทีฆ   กุลปริวฏฺฏา   เอเต  ตโย
กุลปุตฺตา   อคารสฺมา   อนคาริยํ   ปพฺพชิตา   โส   เจปิ  กุลปริวฏฺโฏ
เอเต    ตโย    กุลปุตฺเต    ปสนฺนจิตฺโต    อนุสฺสเรยฺย    ตสฺสปสฺส
กุลปริวฏฺฏสฺส    ทีฆรตฺตํ    หิตาย    สุขาย    ยสฺมาปิ   ทีฆ   คามา
เอเต   ตโย   กุลปุตฺตา   อคารสฺมา   อนคาริยํ  ปพฺพชิตา  โส  เจปิ
คาโม   เอเต   ตโย   กุลปุตฺเต   ปสนฺนจิตฺโต  อนุสฺสเรยฺย  ตสฺสปสฺส
@เชิงอรรถ:  ม. ตสฺสปาสฺส ฯ สพฺพตฺถ เอวํ ญาตพฺพํ ฯ
คามสฺส   ทีฆรตฺตํ   หิตาย   สุขาย  ยสฺมาปิ  ทีฆ  นิคมา  เอเต  ตโย
กุลปุตฺตา   อคารสฺมา   อนคาริยํ   ปพฺพชิตา  โส  เจปิ  นิคโม  เอเต
ตโย    กุลปุตฺเต    ปสนฺนจิตฺโต    อนุสฺสเรยฺย    ตสฺสปสฺส   นิคมสฺส
ทีฆรตฺตํ   หิตาย   สุขาย  ยสฺมาปิ  ทีฆ  นครา  เอเต  ตโย  กุลปุตฺตา
อคารสฺมา    อนคาริยํ    ปพฺพชิตา    ตญฺเจปิ   นครํ   เอเต   ตโย
กุลปุตฺเต    ปสนฺนจิตฺตํ    อนุสฺสเรยฺย    ตสฺสปสฺส   นครสฺส   ทีฆรตฺตํ
หิตาย    สุขาย   ยสฺมาปิ   ทีฆ   ชนปทา   เอเต   ตโย   กุลปุตฺตา
อคารสฺมา   อนคาริยํ   ปพฺพชิตา   โส   เจปิ   ชนปโท  เอเต  ตโย
กุลปุตฺเต    ปสนฺนจิตฺโต   อนุสฺสเรยฺย   ตสฺสปสฺส   ชนปทสฺส   ทีฆรตฺตํ
หิตาย   สุขาย   สพฺเพ   เจปิ   ทีฆ  ขตฺติยา  เอเต  ตโย  กุลปุตฺเต
ปสนฺนจิตฺตา    อนุสฺสเรยฺยุํ   สพฺเพสํปสฺส   ขตฺติยานํ   ทีฆรตฺตํ   หิตาย
สุขาย  สพฺเพ  เจปิ  ทีฆ  พฺราหฺมณา ฯเปฯ สพฺเพ เจปิ ทีฆ เวสฺสา ...
สพฺเพ  เจปิ  ทีฆ  สุทฺทา  เอเต  ตโย กุลปุตฺเต ปสนฺนจิตฺตา อนุสฺสเรยฺยุํ
สพฺเพสํปสฺส   สุทฺทานํ   ทีฆรตฺตํ   หิตาย   สุขาย  สเทวโก  เจปิ  ทีฆ
โลโก   สมารโก   สพฺรหฺมโก   สสฺสมณพฺราหฺมณี   ปชา   สเทวมนุสฺสา
เอเต    ตโย   กุลปุตฺเต   ปสนฺนจิตฺตา   อนุสฺสเรยฺย   สเทวกสฺสปสฺส
โลกสฺส     สมารกสฺส     สพฺรหฺมกสฺส    สสฺสมณพฺราหฺมณิยา    ปชาย
สเทวมนุสฺสาย   ทีฆรตฺตํ   หิตาย  สุขาย  ปสฺส  ทีฆ  ยาวญฺเจเต  ตโย
กุลปุตฺตา     พหุชนหิตาย    ปฏิปนฺนา    พหุชนสุขาย    โลกานุกมฺปาย
อตฺถาย หิตาย สุขาย เทวมนุสฺสานนฺติ ฯ
     อิทมโวจ   ภควา   อตฺตมโน   ทีโฆ   ปรชโน   ยกฺโข  ภควโต
ภาสิตํ อภินนฺทีติ ฯ
                     จูฬโคสิงฺคสาลสุตฺตํ นิฏฺฐิตํ ปฐมํ ฯ
                                  ------------



             เนื้อความพระไตรปิฎกฉบับภาษาบาลีอักษรไทย เล่มที่ ๑๒ หน้าที่ ๓๘๖-๓๙๖. http://84000.org/tipitaka/pitaka_item/pali_item_s.php?book=12&item=361&items=8&modeTY=2              อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=12&item=361&items=8&modeTY=2&mode=bracket              อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=12&item=361&items=8&modeTY=2              อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=12&item=361&items=8&modeTY=2              ศึกษาอรรถกถานี้ได้ที่ :- http://84000.org/tipitaka/attha/attha.php?b=12&i=361              The Pali Atthakatha in Thai :- http://84000.org/tipitaka/atthapali/read_th.php?B=8&A=3643              The Pali Atthakatha in Roman :- http://84000.org/tipitaka/atthapali/read_rm.php?B=8&A=3643              สารบัญพระไตรปิฎกเล่มที่ ๑๒ http://84000.org/tipitaka/read/?index_12

อ่านหัวข้อแรกอ่านหัวข้อที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหัวข้อถัดไปอ่านหัวข้อสุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๑๒ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]

สีพื้นหลัง :