พระไตรปิฎกเล่มที่ ๒ ภาษาบาลี อักษรไทย
พระวินัยปิฎกเล่มที่ ๒ วินย. มหาวิภงฺโค (๒)

                             สตฺตมสิกฺขาปทํ
     [๖๑๐]   เตน  สมเยน  พุทฺโธ  ภควา  ราชคเห  วิหรติ เวฬุวเน
กลนฺทกนิวาเป  ฯ  เตน  โข  ปน  สมเยน  ภิกฺขู  ตโปเท  นฺหายนฺติ ฯ
อถโข   ๑-   ราชา   มาคโธ  เสนิโย  พิมฺพิสาโร  สีสํ  นฺหายิสฺสามีติ
ตโปทํ   คนฺตฺวา   ยาว   อยฺยา   นฺหายนฺตีติ  เอกมนฺตํ  ปฏิมาเนสิ  ฯ
ภิกฺขู   ยาว  สมนฺธการา  นฺหายึสุ  ฯ  อถโข  ราชา  มาคโธ  เสนิโย
พิมฺพิสาโร  วิกาเล  สีสํ  นฺหายิตฺวา  นครทฺวาเร  ถกฺกิเต  ๒- พหินคเร
วสิตฺวา   กาลสฺเสว  อสมฺภินฺเนน  วิเลปเนน  เยน  ภควา  เตนุปสงฺกมิ
อุปสงฺกมิตฺวา ภควนฺตํ อภิวาเทตฺวา เอกมนฺตํ นิสีทิ ฯ
     {๖๑๐.๑}   เอกมนฺตํ  นิสินฺนํ  โข  ราชานํ  มาคธํ เสนิยํ พิมฺพิสารํ
ภควา  เอตทโวจ  กิสฺส  ตฺวํ  มหาราช  กาลสฺเสว  อาคโต อสมฺภินฺเนน
วิเลปเนนาติ   ฯ  อถโข  ราชา  มาคโธ  เสนิโย  พิมฺพิสาโร  ภควโต
เอตมตฺถํ  อาโรเจสิ  ฯ  อถโข  ภควา  ราชานํ  มาคธํ เสนิยํ พิมฺพิสารํ
ธมฺมิยา   กถาย   สนฺทสฺเสสิ   สมาทเปสิ   สมุตฺเตเชสิ  สมฺปหํเสสิ  ฯ
อถโข   ราชา   มาคโธ  เสนิโย  พิมฺพิสาโร  ภควตา  ธมฺมิยา  กถาย
สนฺทสฺสิโต     สมาทปิโต    สมุตฺเตชิโต    สมฺปหํสิโต    อุฏฺฐายาสนา
ภควนฺตํ   อภิวาเทตฺวา   ปทกฺขิณํ   กตฺวา   ปกฺกามิ  ฯ  อถโข  ภควา
เอตสฺมึ    นิทาเน    เอตสฺมึ   ปกรเณ   ภิกฺขุสงฺฆํ   สนฺนิปาตาเปตฺวา
ภิกฺขู   ปฏิปุจฺฉิ   สจฺจํ   กิร   ภิกฺขเว   ภิกฺขู  ราชานํปิ  ปสฺสิตฺวา  น
@เชิงอรรถ: ๑ ม. ยุ. เตน โข ปน สมเยน ฯ  ๒ ม. ถกิเต ฯ
มตฺตํ   ชานิตฺวา   นฺหายนฺตีติ   ฯ   สจฺจํ   ภควาติ  ฯ  วิครหิ  พุทฺโธ
ภควา   กถํ   หิ   นาม  เต  ภิกฺขเว  โมฆปุริสา  ราชานํปิ  ปสฺสิตฺวา
น   มตฺตํ   ชานิตฺวา   นฺหายิสฺสนฺติ   เนตํ   ภิกฺขเว  อปฺปสนฺนานํ  วา
ปสาทาย    ปสนฺนานํ    วา    ภิยฺโยภาวาย   ฯเปฯ   เอวญฺจ   ปน
ภิกฺขเว อิมํ สิกฺขาปทํ อุทฺทิเสยฺยาถ
     {๖๑๐.๒}   โย   ปน   ภิกฺขุ   โอเรนฑฺฒมาสํ   ๑-  นฺหาเยยฺย
ปาจิตฺติยนฺติ ฯ
     {๖๑๐.๓}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๖๑๑]   เตน  โข  ปน  สมเยน  ภิกฺขู  อุณฺหสมเย  ปริฬาหสมเย
กุกฺกุจฺจายนฺตา   น   นฺหายนฺติ   เสทคเตน  คตฺเตน  สยนฺติ  ฯ  จีวรํปิ
เสนาสนํปิ   ทุสฺสติ   ฯ   ภควโต  เอตมตฺถํ  อาโรเจสุํ  ฯ  อนุชานามิ
ภิกฺขเว   อุณฺหสมเย   ปริฬาหสมเย   โอเรนฑฺฒมาสํ   นฺหายิตุํ  เอวญฺจ
ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๑๑.๑}   โย   ปน  ภิกฺขุ  โอเรนฑฺฒมาสํ  นฺหาเยยฺย  อญฺญตฺร
สมยา  ปาจิตฺติยํ  ฯ  ตตฺถายํ  สมโย  ทิยฑฺโฒ  มาโส  เสโส คิมฺหานนฺติ
วสฺสานสฺส    ปฐโม   มาโส   อิจฺเจเต   อฑฺฒเตยฺยมาสา   อุณฺหสมโย
ปริฬาหสมโย อยํ ตตฺถ สมโยติ ฯ
     {๖๑๑.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๖๑๒]   เตน   โข   ปน   สมเยน  ภิกฺขู  คิลานา  โหนฺติ  ฯ
คิลานปุจฺฉกา   ภิกฺขู   คิลาเน   ภิกฺขู   เอตทโวจุํ   กจฺจาวุโส  ขมนียํ
@เชิงอรรถ: ๑ โอเรนทฺธมาสนฺติปิ ปาฐา ฯ
กจฺจิ   ยาปนียนฺติ   ฯ   ปุพฺเพ  มยํ  อาวุโส  โอเรนฑฺฒมาสํ  นฺหายาม
เตน    โน    ผาสุ    โหติ    อิทานิ   ปน   ภควตา   ปฏิกฺขิตฺตนฺติ
กุกฺกุจฺจายนฺตา   น  นฺหายาม  เตน  โน  น  ผาสุ  โหตีติ  ฯ  ภควโต
เอตมตฺถํ   อาโรเจสุํ   ฯ   อนุชานามิ   ภิกฺขเว   คิลาเนน   ภิกฺขุนา
โอเรนฑฺฒมาสํ    นฺหายิตุํ    เอวญฺจ   ปน   ภิกฺขเว   อิมํ   สิกฺขาปทํ
อุทฺทิเสยฺยาถ
     {๖๑๒.๑}   โย   ปน  ภิกฺขุ  โอเรนฑฺฒมาสํ  นฺหาเยยฺย  อญฺญตฺร
สมยา    ปาจิตฺติยํ   ฯ   ตตฺถายํ   สมโย   ทิยฑฺโฒ   มาโส   เสโส
คิมฺหานนฺติ    วสฺสานสฺส   ปฐโม   มาโส   อิจฺเจเต   อฑฺฒเตยฺยมาสา
อุณฺหสมโย ปริฬาหสมโย คิลานสมโย อยํ ตตฺถ สมโยติ ฯ
     {๖๑๒.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๖๑๓]   เตน  โข  ปน สมเยน ภิกฺขู นวกมฺมํ กตฺวา กุกฺกุจฺจายนฺตา
น  นฺหายนฺติ  [๑]-  เสทคเตน  คตฺเตน  สยนฺติ  ฯ  จีวรํปิ  เสนาสนํปิ
ทุสฺสติ   ฯ   ภควโต   เอตมตฺถํ   อาโรเจสุํ   ฯ  อนุชานามิ  ภิกฺขเว
กมฺมสมเย    โอเรนฑฺฒมาสํ   นฺหายิตุํ   เอวญฺจ   ปน   ภิกฺขเว   อิมํ
สิกฺขาปทํ อุทฺทิเสยฺยาถ
     {๖๑๓.๑}   โย   ปน  ภิกฺขุ  โอเรนฑฺฒมาสํ  นฺหาเยยฺย  อญฺญตฺร
สมยา    ปาจิตฺติยํ   ฯ   ตตฺถายํ   สมโย   ทิยฑฺโฒ   มาโส   เสโส
คิมฺหานนฺติ    วสฺสานสฺส   ปฐโม   มาโส   อิจฺเจเต   อฑฺฒเตยฺยมาสา
อุณฺหสมโย    ปริฬาหสมโย    คิลานสมโย    กมฺมสมโย    อยํ   ตตฺถ
สมโยติ ฯ
     {๖๑๓.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
@เชิงอรรถ: ๑ ม. เต ฯ
     [๖๑๔]   เตน   โข   ปน  สมเยน  ภิกฺขู  อทฺธานมคฺคํ  คนฺตฺวา
กุกฺกุจฺจายนฺตา  น  นฺหายนฺติ  [๑]-  เสทคเตน  คตฺเตน สยนฺติ ฯ จีวรํปิ
เสนาสนํปิ   ทุสฺสติ   ฯ   ภควโต  เอตมตฺถํ  อาโรเจสุํ  ฯ  อนุชานามิ
ภิกฺขเว    อทฺธานคมนสมเย   โอเรนฑฺฒมาสํ   นฺหายิตุํ   เอวญฺจ   ปน
ภิกฺขเว อิมํ สิกฺขาปทํ อุทฺทิเสยฺยาถ
     {๖๑๔.๑}   โย   ปน  ภิกฺขุ  โอเรนฑฺฒมาสํ  นฺหาเยยฺย  อญฺญตฺร
สมยา    ปาจิตฺติยํ   ฯ   ตตฺถายํ   สมโย   ทิยฑฺโฒ   มาโส   เสโส
คิมฺหานนฺติ    วสฺสานสฺส   ปฐโม   มาโส   อิจฺเจเต   อฑฺฒเตยฺยมาสา
อุณฺหสมโย        ปริฬาหสมโย        คิลานสมโย        กมฺมสมโย
อทฺธานคมนสมโย อยํ ตตฺถ สมโยติ ฯ
     {๖๑๔.๒}   เอวญฺจิทํ ภควตา ภิกฺขูนํ สิกฺขาปทํ ปญฺญตฺตํ โหติ ฯ
     [๖๑๕]   เตน   โข  ปน  สมเยน  สมฺพหุลา  ภิกฺขู  อชฺโฌกาเส
จีวรกมฺมํ   กโรนฺตา   สรเชน   วาเตน   โอกิณฺณา  โหนฺติ  เทโว  จ
โถกํ  โถกํ  ผุสฺสิ  ๒-  ฯ  ภิกฺขู  กุกฺกุจฺจายนฺตา  น  นฺหายนฺติ กิลินฺเนน
คตฺเตน   สยนฺติ   ฯ  จีวรํปิ  เสนาสนํปิ  ทุสฺสติ  ฯ  ภควโต  เอตมตฺถํ
อาโรเจสุํ   ฯ   อนุชานามิ   ภิกฺขเว   วาตวุฏฺฐิสมเย   โอเรนฑฺฒมาสํ
นฺหายิตุํ เอวญฺจ ปน ภิกฺขเว อิมํ สิกฺขาปทํ อุทฺทิเสยฺยาถ
     {๖๑๕.๑}   โย   ปน  ภิกฺขุ  โอเรนฑฺฒมาสํ  นฺหาเยยฺย  อญฺญตฺร
สมยา    ปาจิตฺติยํ   ฯ   ตตฺถายํ   สมโย   ทิยฑฺโฒ   มาโส   เสโส
คิมฺหานนฺติ    วสฺสานสฺส   ปฐโม   มาโส   อิจฺเจเต   อฑฺฒเตยฺยมาสา
อุณฺหสมโย   ปริฬาหสมโย   คิลานสมโย   กมฺมสมโย   อทฺธานคมนสมโย
@เชิงอรรถ: ๑ ม. เต ฯ  ๒ ม. ผุสายติ ฯ
วาตวุฏฺฐิสมโย อยํ ตตฺถ สมโยติ ฯ
     [๖๑๖]   โย  ปนาติ  โย  ยาทิโส  ฯเปฯ ภิกฺขูติ ฯเปฯ อยํ อิมสฺมึ
อตฺเถ   อธิปฺเปโต   ภิกฺขูติ   ฯ   โอเรนฑฺฒมาสนฺติ   อูนกฑฺฒมาสํ   ฯ
นฺหาเยยฺยาติ   จุณฺเณน   วา   มตฺติกาย   วา   นฺหายติ   ฯ  ปโยเค
ทุกฺกฏํ ฯ นฺหานปริโยสาเน อาปตฺติ ปาจิตฺติยสฺส ฯ
     {๖๑๖.๑}   อญฺญตฺร   สมยาติ   ฐเปตฺวา   สมยํ  ฯ  อุณฺหสมโย
นาม   ทิยฑฺโฒ   มาโส   เสโส   คิมฺหานํ   ฯ   ปริฬาหสมโย   นาม
วสฺสานสฺส   ปฐโม   มาโส   ฯ  อิจฺเจเต  อฑฺฒเตยฺยมาสา  อุณฺหสมโย
ปริฬาหสมโยติ    นฺหายิตพฺพํ    ฯ   คิลานสมโย   นาม   ยสฺส   วินา
นฺหาเนน   น  ผาสุ  โหติ  ฯ  คิลานสมโยติ  นฺหายิตพฺพํ  ฯ  กมฺมสมโย
นาม อนฺตมโส ปริเวณํปิ สมฺมฏฺฐํ โหติ ฯ กมฺมสมโยติ นฺหายิตพฺพํ ฯ
     {๖๑๖.๒}   อทฺธานคมนสมโย    นาม   อฑฺฒโยชนํ   คมิสฺสามีติ
นฺหายิตพฺพํ     คจฺฉนฺเตน     นฺหายิตพฺพํ    คเตน    นฺหายิตพฺพํ    ฯ
วาตวุฏฺฐิสมโย   นาม   ภิกฺขู  สรเชน  วาเตน  โอกิณฺณา  โหนฺติ  เทฺว
วา  ตีณิ  วา  อุทกผุสิตานิ  กาเย  ปติตานิ  โหนฺติ  ฯ  วาตวุฏฺฐิสมโยติ
นฺหายิตพฺพํ ฯ
     [๖๑๗]   อูนกฑฺฒมาเส   อูนกสญฺญี   อญฺญตฺร   สมยา   นฺหายติ
อาปตฺติ   ปาจิตฺติยสฺส   ฯ   อูนกฑฺฒมาเส   เวมติโก   อญฺญตฺร  สมยา
นฺหายติ    อาปตฺติ    ปาจิตฺติยสฺส    ฯ    อูนกฑฺฒมาเส   อติเรกสญฺญี
อญฺญตฺร   สมยา   นฺหายติ   อาปตฺติ   ปาจิตฺติยสฺส  ฯ  อติเรกฑฺฒมาเส
อูนกสญฺญี       อาปตฺติ       ทุกฺกฏสฺส      ฯ      อติเรกฑฺฒมาเส
เวมติโก    อาปตฺติ    ทุกฺกฏสฺส    ฯ   อติเรกฑฺฒมาเส   อติเรกสญฺญี
อนาปตฺติ ฯ
     [๖๑๘]   อนาปตฺติ   สมเย   อฑฺฒมาสํ   นฺหายติ  อติเรกฑฺฒมาสํ
นฺหายติ    ปารํ    คจฺฉนฺโต    นฺหายติ    สพฺพปจฺจนฺติเมสุ   ชนปเทสุ
อาปทาสุ อุมฺมตฺตกสฺส อาทิกมฺมิกสฺสาติ ฯ
                        สตฺตมสิกฺขาปทํ นิฏฺฐิตํ ฯ
                                   ---------
                               อฏฺฐมสิกฺขาปทํ


             เนื้อความพระไตรปิฎกฉบับภาษาบาลีอักษรไทย เล่มที่ ๒ หน้าที่ ๓๙๘-๔๐๔.
http://84000.org/tipitaka/pitaka_item/pali_item_s.php?book=2&item=610&items=9&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=2&item=610&items=9&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=2&item=610&items=9&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=2&item=610&items=9&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=2&i=610
             The Pali Atthakatha in Thai :-
http://84000.org/tipitaka/atthapali/read_th.php?B=2&A=9599
             The Pali Atthakatha in Roman :-
http://84000.org/tipitaka/atthapali/read_rm.php?B=2&A=9599
             สารบัญพระไตรปิฎกเล่มที่ ๒
http://84000.org/tipitaka/read/?index_2