พระไตรปิฎกเล่มที่ ๓๓ ภาษาบาลี อักษรไทย
พระสุตตันตปิฎกเล่มที่ ๒๕ สุตฺต. ขุ. อปทานํ (๒) พุทฺธวํโส จริยาปิฏกํ

                                          นวโม นารทพุทฺธวํโส
     [๑๐]   |๑๐.๑| ปทุมสฺส อปเรน           สมฺพุทฺโธ ทิปทุตฺตโม
                    นารโท นาม นาเมน         อสโม อปฺปฏิปุคฺคโล ฯ
        |๑๐.๒| โส พุทฺโธ จกฺกวตฺติสฺส      เชฏฺโฐ ทยิตโอรโส
                    อามุตฺตมณฺยาภรโณ ๓-   อุยฺยานํ อุปสงฺกมิ ฯ
        |๑๐.๓| ตตฺถาสิ รุกฺโข ๔- วิปุโล     อภิรูโป พฺรหา ๕- สุจิ
                   ตมชฺฌปตฺวา นิสีทิ            มหาโสณสฺส เหฏฺฐโต ฯ
        |๑๐.๔| ตตฺถ ญาณวรุปฺปชฺชิ          อนนฺตํ วชิรูปมํ
                   เตน วิจินิ สงฺขาเร              อุกฺกุชฺชมวกุชฺชตํ ๖- ฯ
        |๑๐.๕| ตตฺถ สพฺพกิเลสานิ           อเสสมภิวาหยิ
                   ปาปุณิ เกวลํ โพธึ             พุทฺธญาเณ ๗- จ จุทฺทส ฯ
@เชิงอรรถ: ๑ ม. ยุ. เสสเก อนุสาสิตฺวา ฯ ๒ ม. วทฺธปตฺตํว ฯ ยุ. วุฑฺฒํ ปตฺตํว ฯ
@๓ ม. อามุกฺกมาลาภรโณ ฯ ยุ. อามุตฺตมลยาภรโณ ฯ ๔ ม. ยุ. ยสวิปุโล ฯ
@๕ ยุ. พฺรหฺมา ฯ ๖ ม. ยุ. ... กุชฺชกํ ฯ ๗ ยุ. พุทฺธญาณญฺจ ฯ
        |๑๐.๖| ปาปุณิตฺวาน สมฺโพธึ        ธมฺมจกฺกํ ปวตฺตยิ
                   โกฏิสตสหสฺสานํ              ปฐมาภิสมโย อหุ ฯ
        |๑๐.๗| มหาโทณํ นาคราชํ           วินยนฺโต มหามุนิ
                   ปาฏิเหรํ ตทากาสิ            ทสฺสยนฺโต สเทวเก ฯ
        |๑๐.๘| ตทา เทวมนุสฺสานํ            ตมฺหิ ธมฺมปฺปกาสเน
                   นวุติโกฏิสหสฺสานิ ๑-       ตรึสุ สพฺพสํสยํ ฯ
        |๑๐.๙| ยมฺหิ กาเล มหาวีโร          โอวทิ สกมตฺรชํ
                   อสีติโกฏิสหสฺสานํ            ตติยาภิสมโย อหุ ฯ
        |๑๐.๑๐| สนฺนิปาตา ตโย อาสุํ      นารทสฺส มเหสิโน
                     โกฏิสตสหสฺสานํ            ปฐโม อาสิ สมาคโม ฯ
        |๑๐.๑๑| ยทา พุทฺโธ พุทฺธคุณํ      สนิทานํ ปกาสยิ
                      นวุติโกฏิสหสฺสานิ         สมึสุ วิมลา ตทา ฯ
        |๑๐.๑๒| ยทา เวโรจโน นาโค       ทานํ ททาติ สตฺถุโน
                      ตทา สมึสุ ชินปุตฺตา       อสีติสตสหสฺสิโน ๒- ฯ
        |๑๐.๑๓| อหนฺเตน สมเยน           ชฏิโล อุคฺคตาปโน
                      อนฺตลิกฺขจโร อาสึ          ปญฺจาภิญฺญาสุ ปารคู ฯ
        |๑๐.๑๔| ตทาปาหํ อสมสมํ          สสงฺฆํ สปริชนํ
                      อนฺนปาเนน ตปฺเปตฺวา   จนฺทเนนาภิปูชยึ ฯ
        |๑๐.๑๕| โสปิ มํ ตทา พฺยากาสิ    นารโท โลกนายโก
@เชิงอรรถ: ๑ ยุ. ... สหสฺสานํ ฯ ๒ ม. ยุ. ... สิโย ฯ
                      อปริเมยฺเย อิโต กปฺเป     พุทฺโธ ๑- โลเก ภวิสฺสติ ฯ
        |๑๐.๑๖| อหุ กปิลวฺหยา รมฺมา     นิกฺขมิตฺวา ตถาคโต
                      ปธานํ ปทหิตฺวาน          กตฺวา ทุกฺกรการิกํ ฯ
        |๑๐.๑๗| อชปาลรุกฺขมูลสฺมึ          นิสีทิตฺวา ตถาคโต
                      ตตฺถ ปายาสํ ปคฺคยฺห     เนรญฺชรมุเปหิติ ฯ
        |๑๐.๑๘| เนรญฺชราย ตีรมฺหิ         ปายาสํ อทิ โส ชิโน
                      ปฏิยตฺต วรมคฺเคน         โพธิมูลมฺหิ เอหิติ ฯ
        |๑๐.๑๙| ตโต ปทกฺขิณํ กตฺวา       โพธิมณฺฑํ อนุตฺตรํ
                      อสฺสตฺถรุกฺขมูลมฺหิ         พุชฺฌิสฺสติ มหายโส ฯ
        |๑๐.๒๐| อิมสฺส ชนิกา มาตา        มายา นาม ภวิสฺสติ
                      ปิตา สุทฺโธทโน นาม      อยํ เหสฺสติ โคตโม ฯ
        |๑๐.๒๑| อนาสวา วีตราคา          สนฺตจิตฺตา สมาหิตา
                      โกลิโต อุปติสฺโส จ         อคฺคา เหสฺสนฺติ สาวกา
                      อานนฺโท นามุปฏฺฐาโก   อุปฏฺฐิสฺสติมํ ชินํ ฯ
        |๑๐.๒๒| เขมา อุปฺปลวณฺณา จ    อคฺคา เหสฺสนฺติ สาวิกา
                      อนาสวา วีตราคา          สนฺตจิตฺตา สมาหิตา ฯ
        |๑๐.๒๓| โพธิ ตสฺส ภควโต          อสฺสตฺโถติ ปวุจฺจติ
                      จิตฺโต จ หตฺถาฬวโก      อคฺคา เหสฺสนฺตุปฏฺฐกา ฯ
        |๑๐.๒๔| นนฺทมาตา จ อุตฺตรา     อคฺคา เหสฺสนฺตุปฏฺฐิกา
                       อายุ วสฺสสตํ ตสฺส         โคตมสฺส ยสสฺสิโน ฯ
@เชิงอรรถ: ๑ ม. ยุ. อยํ พุทฺโธ ภวิสฺสติ ฯ
        |๑๐.๒๕| อิทํ สุตฺวาน วจนํ           อสฺสมสฺส มเหสิโน
                      อาโมทิตา นรมรู           พุทฺธวีชงฺกุโร อยํ ฯ
        |๑๐.๒๖| อุกฺกุฏฺฐิสทฺทา วตฺตนฺติ   อปฺโผเฏนฺติ หสนฺติ จ
                      กตญฺชลี นมสฺสนฺติ        ทสสหสฺสี สเทวกา ฯ
        |๑๐.๒๗| ยทิมสฺส โลกนาถสฺส      วิรชฺฌิสฺสาม สาสนํ
                      อนาคตมฺหิ อทฺธาเน       เหสฺสาม สมฺมุขา อิมํ ฯ
        |๑๐.๒๘| ยถา มนุสฺสา นทึ ตรนฺตา  ปฏิติตฺถํ วิรชฺฌิย
                      เหฏฺฐา ติตฺถํ คเหตฺวาน   อุตฺตรนฺติ มหานทึ ฯ
        |๑๐.๒๙| เอวเมว มยํ สพฺเพ          ยทิ มุญฺจามิมํ ชินํ
                     อนาคตมฺหิ อทฺธาเน        เหสฺสาม สมฺมุขา อิมํ ฯ
        |๑๐.๓๐| ตสฺสาหํ วจนํ สุตฺวา        ภิยฺโย หาเสตฺวาน มานสํ
                      อธิฏฺฐหึ วตฺตํ อุคฺคํ         ทสปารมิปูริยา ฯ
        |๑๐.๓๑| นครํ ธญฺญวตี นาม        สุเทโว นาม ขตฺติโย
                      อโนมา นาม ชนิกา        นารทสฺส มเหสิโน ฯ
        |๑๐.๓๒| นววสฺสสหสฺสานิ           อคารํ อชฺฌาวสิ โส
                      ชิโต วิชิตาภิราโม           ตโย ปาสาทมุตฺตมา ฯ
        |๑๐.๓๓| ติจตฺตาริ สหสฺสานิ         นาริโย สมลงฺกตา
                      วิชิตเสนา นาม สา นารี   นนฺทุตฺตโร นาม อตฺรโช ฯ
        |๑๐.๓๔| นิมิตฺเต จตุโร ทิสฺวา        ปทสา คมเนน นิกฺขมิ
                      สตฺตาหํ ปธานจารํ         อจริ ปุริสุตฺตโม ๑- ฯ
@เชิงอรรถ: ๑ ยุ. โลกนายโก ฯ
        |๑๐.๓๕| พฺรหฺมุนา ยาจิโต สนฺโต  นารโท โลกนายโก
                      วตฺตจกฺโก มหาวีโร         ธนญฺชุยฺยานมุตฺตเม ฯ
        |๑๐.๓๖| ภทฺทสาโล ชิตมิตฺโต       อเหสุํ อคฺคสาวกา
                      วาเสฏฺโฐ นามุปฏฺฐาโก   นารทสฺส มเหสิโน ฯ
        |๑๐.๓๗| อุตฺตรา ผคฺคุนี เจว         อเหสุํ อคฺคสาวิกา
                      โพธิ ตสฺส ภควโต           มหาโสโณติ วุจฺจติ ฯ
        |๑๐.๓๘| อุคฺครินฺโท วสโภ จ         อเหสุํ อคฺคุปฏฺฐกา
                      อินฺทวรี ๑- จ คณฺฑี จ     อเหสุํ อคฺคุปฏฺฐิกา ฯ
        |๑๐.๓๙| อฏฺฐาสีติรตนานิ            อจฺจุคฺคโต มหามุนิ
                      กญฺจนคฺฆิกสงฺกาโส       ทสสหสฺสี วิโรจติ ๒- ฯ
        |๑๐.๔๐| ตสฺส พฺยามปฺปภากาโย ๓- นิทฺธาวติ ทิโสทิสํ
                      นิรนฺตรํ ทิวา รตฺตึ           โยชนํ ผรเต สทา ๔- ฯ
        |๑๐.๔๑| น เกจิ เตน สมเยน         สมนฺตา โยชเน ชนา
                      อุกฺกา ปทีเป อุชฺชเลนฺติ   พุทฺธรํสีหิ โอตฺถตา ฯ
        |๑๐.๔๒| นวุติวสฺสสหสฺสานิ         อายุ วิชฺชติ ตาวเท
                      ตาวตา ติฏฺฐมาโน โส     ตาเรสิ ชนตํ พหุํ ฯ
        |๑๐.๔๓| ยถา อุฬุภิ คคนํ             วิจิตฺตํ อุปโสภติ
                      ตเถว สาสนํ ตสฺส           อรหนฺเตหิ โสภติ ฯ
        |๑๐.๔๔| สํสารโสตํ ตารณาย        เสสเก ปฏิปนฺนเก
@เชิงอรรถ: ๑ ม. อินฺทาวรี จ วณฺฑี จ ฯ ยุ. อินฺทาวรี จ จณฺฑี จ ฯ ๒ ยุ. วิโรจถ ฯ
@๓ ม. ยุ. ... กายา ฯ ๔ ยุ. ทิสา ฯ
                     ธมฺมเสตุํ ทฬฺหํ กตฺวา      นิพฺพุโต โส นราสโภ ฯ
        |๑๐.๔๕| โสปิ พุทฺโธ อสมสโม      เตปิ ขีณาสวา อตุลเตชา
                      สพฺพํ สมนฺตรหิตํ            นนุ ริตฺตา สพฺพสงฺขาราติ ฯ
        |๑๐.๔๖| นารโท ชินวุสโภ             นิพฺพุโต สุทสฺสเน ปุเร
                      ตเถว ถูปวโร ๑-             จตุโยชนมุคฺคโตติ ฯ
                                          นารทพุทฺธวํโส นวโม ฯ
                                         ทสโม ปทุมุตฺตรพุทฺธวํโส
     [๑๑]   |๑๑.๑| นารทสฺส อปเรน          สมฺพุทฺโธ ทิปทุตฺตโม
                   ปทุมุตฺตโร นาม ชิโน         อกฺโขพฺโภ สาครูปโม ฯ
        |๑๑.๒| มณฺฑกปฺโป จ ๒- โส อาสิ  ยมฺหิ พุทฺโธ อชายถ
                   อุสฺสนฺนกุสลา ชนตา         ตมฺหิ กปฺเป อชายถ ฯ
        |๑๑.๓| ปทุมุตฺตรสฺส ภควโต         ปฐเม ธมฺมเทสเน
                   โกฏิสตสหสฺสานํ               ธมฺมาภิสมโย อหุ ฯ
        |๑๑.๔| ตโต ปรํปิ วสฺสนฺเต            ตปฺปยนฺเต จ ปาณิเน
                   สตฺตตฺตึสสหสฺสานํ            ทุติยาภิสมโย อหุ ฯ
        |๑๑.๕| ยมฺหิ กาเล มหาวีโร           อานนฺทํ อุปสงฺกมิ
                   ปิตุ สนฺติกํ อุปคนฺตฺวา        อาหนิ อมตทุนฺทุภึ ฯ
        |๑๑.๖| อาหเต อมตเภริมฺหิ           วสฺสนฺเต ธมฺมวุฏฺฐิโย
                   ปญฺญาสสตสหสฺสานํ        ตติยาภิสมโย อหุ ฯ
@เชิงอรรถ: ๑ ชินถูปวโร ฯ ๒ ยุ. ว ฯ
        |๑๑.๗| โอวาทโก วิญฺญาปโก        ตารโก สพฺพปาณินํ
                   เทสนากุสโล พุทฺโธ           ตาเรสิ ชนตํ พหุํ ฯ
        |๑๑.๘| สนฺนิปาตา ตโย อาสุํ         ปทุมุตฺตรสฺส สตฺถุโน
                   โกฏิสตสหสฺสานํ               ปฐโม อาสิ สมาคโม ฯ
        |๑๑.๙| ยทา พุทฺโธ อสมสโม        วสิ ๑- เวภารปพฺพเต
                   นวุติโกฏิสหสฺสานํ             ทุติโย อาสิ สมาคโม ฯ
        |๑๑.๑๐| ปุน จาริกํ ปกฺกนฺเต         คามนิคมรฏฺฐโต
                      อสีติโกฏิสหสฺสานํ          ตติโย อาสิ สมาคโม ฯ
        |๑๑.๑๑| อหนฺเตน สมเยน            ชฏิโล นาม รฏฺฐิโก
                      สมฺพุทฺธปฺปมุขํ สงฺฆํ       สภตฺตํ ทุสฺสมทาสิหํ ฯ
        |๑๑.๑๒| โสปิ มํ พุทฺโธ พฺยากาสิ   สงฺฆมชฺเฌ นิสีทิย
                      สตสหสฺเส อิโต กปฺเป     อยํ พุทฺโธ ภวิสฺสติ ฯ
        |๑๑.๑๓| อหุ กปิลวฺหยา รมฺมา     นิกฺขมิตฺวา ตถาคโต
                      ปธานํ ปทหิตฺวาน          กตฺวา ทุกฺกรการิกํ ฯ
        |๑๑.๑๔| อชปาลรุกฺขมูลสฺมึ          นิสีทิตฺวา ตถาคโต
                      ตตฺถ ปายาสํ ปคฺคยฺห     เนรญฺชรมุเปหิติ ฯ
        |๑๑.๑๕| เนรญฺชราย ตีรมฺหิ          ปายาสํ อทิ โส ชิโน
                      ปฏิยตฺตวรมคฺเคน          โพธิมูลมฺหิ เอหิติ ฯ
        |๑๑.๑๖| ตโต ปทกฺขิณํ กตฺวา       โพธิมณฺฑํ อนุตฺตรํ
                      อสฺสตฺถรุกฺขมูลมฺหิ         พุชฺฌิสฺสติ มหายโส ฯ
@เชิงอรรถ: ๑ ยุ. วสติ ฯ
        |๑๑.๑๗| อิมสฺส ชนิกา มาตา        มายา นาม ภวิสฺสติ
                      ปิตา สุทฺโธทโน นาม      อยํ เหสฺสติ โคตโม ฯ
        |๑๑.๑๘| อนาสวา วีตราคา          สนฺตจิตฺตา สมาหิตา
                      โกลิโต อุปติสฺโส จ         อคฺคา เหสฺสนฺติ สาวกา
                      อานนฺโท นามุปฏฺฐาโก   อุปฏฺฐิสฺสติมํ ชินํ ฯ
        |๑๑.๑๙| เขมา อุปฺปลวณฺณา จ    อคฺคา เหสฺสนฺติ สาวิกา
                      อนาสวา วีตราคา          สนฺตจิตฺตา สมาหิตา ฯ
        |๑๑.๒๐| โพธิ ตสฺส ภควโต          อสฺสตฺโถติ ปวุจฺจติ
                      จิตฺโต จ หตฺถาฬวโก      อคฺคา เหสฺสนฺตุปฏฺฐกา ฯ
        |๑๑.๒๑| นนฺทมาตา จ อุตฺตรา     อคฺคา เหสฺสนฺตุปฏฺฐิกา
                      อายุ วสฺสสตํ ตสฺส          โคตมสฺส ยสสฺสิโน ฯ
        |๑๑.๒๒| อิทํ สุตฺวาน วจนํ            อสมสฺส มเหสิโน
                      อาโมทิตา นรมรู            พุทฺธวีชงฺกุโร อยํ ฯ
        |๑๑.๒๓| อุกฺกุฏฺฐิสทฺทา วตฺตนฺติ   อปฺโผเฏนฺติ หสนฺติ จ
                      กตญฺชลี นมสฺสนฺติ        ทสสหสฺสี สเทวกา ฯ
        |๑๑.๒๔| ยทิมสฺส โลกนาถสฺส      วิรชฺฌิสฺสาม สาสนํ
                      อนาคตมฺหิ อทฺธาเน       เหสฺสาม สมฺมุขา อิมํ ฯ
        |๑๑.๒๕| ยถา มนุสฺสา นทึ ตรนฺตา   ปฏิติตฺถํ วิรชฺฌิย
                      เหฏฺฐา ติตฺถํ คเหตฺวาน   อุตฺตรนฺติ มหานทึ ฯ
        |๑๑.๒๖| เอวเมว มยํ สพฺเพ          ยทิ มุญฺจามิมํ ชินํ
                      อนาคตมฺหิ อทฺธาเน       เหสฺสาม สมฺมุขา อิมํ ฯ
        |๑๑.๒๗| ตสฺสาปิ วจนํ สุตฺวา        อุตฺตรึ วตฺตมธิฏฺฐหึ
                     อกาสึ ๑- อุคฺคํ ทฬฺหํ ธิตึ  ทสปารมิปูริยา ฯ
        |๑๑.๒๘| พฺยาหตา ติตฺถิยา สพฺเพ  วิมนา ทุมฺมนา ตทา
                      น เตสํ เกจิ ปริจรนฺติ        รฏฺฐโต นิจฺฉุภนฺติ เต ฯ
        |๑๑.๒๙| สพฺเพ ตตฺถ สมาคนฺตฺวา  อุปคจฺฉุํ พุทฺธสนฺติเก
                      ตุวํ นาโถ มหาวีร            สรณํ โหหิ จกฺขุมา ฯ
        |๑๑.๓๐| อนุกมฺปโก การุณิโก       หิเตสี สพฺพปาณินํ
                      สมฺปตฺเต ติตฺถิเย สพฺเพ   ปญฺจสีเล ปติฏฺฐหิ ๒- ฯ
        |๑๑.๓๑| เอวํ นิรากุลํ อาสิ            สุญฺญตํ ติตฺถิเยหิ ตํ
                      วิจิตฺตํ อรหนฺเตหิ            วสีภูเตหิ ตาทิหิ ฯ
        |๑๑.๓๒| นครํ หํสวตี นาม             อานนฺโท นาม ขตฺติโย
                      สุชาตา นาม ชนิกา         ปทุมุตฺตรสตฺถุโน ๓- ฯ
        |๑๑.๓๓| นววสฺส ๔- สหสฺสานิ      อคารํ อชฺฌาวสิ โส
                      นารี ๕- พาหโน ยสวตี    ตโย ปาสาท มุตฺตมา ฯ
        |๑๑.๓๔| ติจตฺตาริ สหสฺสานิ          นาริโย สมลงฺกตา
                     วสุลทตฺตา ๖- นาม นารี   อุตฺตโร ๗- นาม อตฺรโช ฯ
        |๑๑.๓๕| นิมิตฺเต จตุโร ทิสฺวา        ปาสาเทนาภินิกฺขมิ
                      สตฺตาหํ ปธานจารํ          อจริ ปุริสุตฺตโม ฯ
@เชิงอรรถ: ๑ ยุ. อกาสิ มคฺคํ ฯ ๒ ม. ปติฏฺฐติ ฯ ๓ ยุ. ปทมุตฺตรมเหสิโน ฯ
@๔ ม. ยุ. ทส ... ฯ ๕ ม. นรวาหโน ยโสวสวตฺตี ฯ ยุ. นารวาหโน ยโสวสวตฺตี ฯ
@๖ ม. ยุ. วสุทตฺตา ฯ ๗ ม. อุตฺตโม ฯ
        |๑๑.๓๖| พฺรหฺมุนา ยาจิโต สนฺโต  ปทุมุตฺตโร วินายโก
                      วตฺตจกฺโก มหาวีโร         มิถิลุยฺยานมุตฺตเม ฯ
        |๑๑.๓๗| เทวิโล ๑- จ สุชาโต จ     อเหสุํ อคฺคสาวกา
                      สุมโน นามุปฏฺฐาโก       ปทุมุตฺตรสฺส สตฺถุโน ๒- ฯ
        |๑๑.๓๘| อมิตา อสมา เจว           อเหสุํ อคฺคสาวิกา
                      โพธิ ตสฺส ภควโต           สลโฬติ ปวุจฺจติ ฯ
        |๑๑.๓๙| อมิโต ๓- เจว ติสฺโส จ    อเหสุํ อคฺคุปฏฺฐกา
                    หตฺถา เจว สุจิตฺตา ๔- จ    อเหสุํ อคฺคุปฏฺฐิกา ฯ
        |๑๑.๔๐| อฏฺฐปญฺญาสรตนํ          อจฺจุคฺคโต มหามุนิ
                      กญฺจนคฺฆิกสงฺกาโส       ทฺวตฺตึสวรลกฺขโณ ฯ
        |๑๑.๔๑| กุฑฺฑา กวาฏา ภิตฺติ จ    รุกฺขา นคสิลุจฺจโย ๕-
                      น ตสฺสาวรณํ อตฺถิ         สมนฺตา ทฺวาทสโยชเน ฯ
        |๑๑.๔๒| วสฺสสตสหสฺสานิ           อายุ วิชฺชติ ตาวเท
                      ตาวตา ติฏฺฐมาโน โส     ตาเรสิ ชนตํ พหุํ ฯ
        |๑๑.๔๓| สนฺตาเรตฺวา พหุชญฺญํ ๖-  ฉินฺทิตฺวา สพฺพสํสยํ
                      ชลิตฺวา อคฺคิกฺขนฺโธว      นิพฺพุโต โส สสาวโก ฯ
        |๑๑.๔๔| ปทุมุตฺตโร ชิโน พุทฺโธ    นนฺทารามมฺหิ นิพฺพุโต
                      ตตฺเถว ตสฺส ถูปวโร       ทฺวาทสมุพฺเพธโยชโนติ ฯ
                                       ปทุมุตฺตรพุทฺธวํโส ทสโม ฯ
@เชิงอรรถ: ๑ ม. ยุ. เทวโล ฯ ๒ ม. ยุ. มเหสิโน ฯ ๓ ม. ยุ. วิติณฺโณ ฯ ๔ ม. ยุ. วิจิตฺตา ฯ
@๕ ม. ยุ. นคสิลุจฺจยา ฯ ๖ ม. ยุ. พหุชนํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๓๓ หน้าที่ ๔๗๑-๔๘๐.
http://84000.org/tipitaka/pitaka_item/pali_item_s.php?book=33&item=190&items=2&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=33&item=190&items=2&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=33&item=190&items=2&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=33&item=190&items=2&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=33&i=190
             The Pali Atthakatha in Thai :-
http://84000.org/tipitaka/atthapali/read_th.php?B=51&A=5908
             The Pali Atthakatha in Roman :-
http://84000.org/tipitaka/atthapali/read_rm.php?B=51&A=5908
             สารบัญพระไตรปิฎกเล่มที่ ๓๓
http://84000.org/tipitaka/read/?index_33