พระไตรปิฎกเล่มที่ ๘ ภาษาบาลี อักษรไทย
พระวินัยปิฎกเล่มที่ ๘ วินย. ปริวาโร

     [๑๑๙๓]   กติ  นุ  โข  ภนฺเต  มุสาวาทาติ  ฯ  ปญฺจิเม  อุปาลิ
มุสาวาทา   ฯ   กตเม   ปญฺจ   ฯ   อตฺถิ   มุสาวาโท  ปาราชิกคามี
อตฺถิ   มุสาวาโท   สงฺฆาทิเสสคามี   อตฺถิ   มุสาวาโท   ถุลฺลจฺจยคามี
อตฺถิ   มุสาวาโท   ปาจิตฺติยคามี   อตฺถิ   มุสาวาโท   ทุกฺกฏคามีติ  ฯ
อิเม โข อุปาลิ ปญฺจ มุสาวาทาติ ฯ
     [๑๑๙๔]   กตีหิ  นุ  โข  ภนฺเต  องฺเคหิ  สมนฺนาคตสฺส  ภิกฺขุโน
สงฺฆมชฺเฌ    อุโปสถํ   วา   ปวารณํ   วา   ฐเปนฺตสฺส   อลํ   ภิกฺขุ
@เชิงอรรถ: ๑ โป. ม. ยุ. วณฺณิตํ ฯ
มา   ภณฺฑนํ   มา   กลหํ   มา   วิคฺคหํ   มา  วิวาทนฺติ  โอมทฺทิตฺวา
สงฺเฆน   อุโปสโถ   วา   ปวารณา   วา   กาตพฺพาติ  ฯ  ปญฺจหุปาลิ
องฺเคหิ   สมนฺนาคตสฺส   ภิกฺขุโน   สงฺฆมชฺเฌ   อุโปสถํ   วา  ปวารณํ
วา   ฐเปนฺตสฺส   อลํ   ภิกฺขุ   มา   ภณฺฑนํ   มา  กลหํ  มา  วิคฺคหํ
มา    วิวาทนฺติ    โอมทฺทิตฺวา   สงฺเฆน   อุโปสโถ   วา   ปวารณา
วา   กาตพฺพา   ฯ   กตเมหิ   ปญฺจหิ   ฯ   อลชฺชี  จ  โหติ  พาโล
จ     อปกตตฺโต     จ    จาวนาธิปฺปาโย    วตฺตา    โหติ    โน
วุฏฺฐานาธิปฺปาโย   ฯ   อิเมหิ   โข  อุปาลิ  ปญฺจหงฺเคหิ  สมนฺนาคตสฺส
ภิกฺขุโน   สงฺฆมชฺเฌ   อุโปสถํ   วา   ปวารณํ   วา   ฐเปนฺตสฺส  อลํ
ภิกฺขุ   มา  ภณฺฑนํ  มา  กลหํ  มา  วิคฺคหํ  มา  วิวาทนฺติ  โอมทฺทิตฺวา
สงฺเฆน อุโปสโถ วา ปวารณา วา กาตพฺพา ฯ
     {๑๑๙๔.๑}   อปเรหิปิ  อุปาลิ  ปญฺจหงฺเคหิ  สมนฺนาคตสฺส  ภิกฺขุโน
สงฺฆมชฺเฌ  อุโปสถํ  วา  ปวารณํ  วา ฐเปนฺตสฺส อลํ ภิกฺขุ มา ภณฺฑนํ มา
กลหํ  มา  วิคฺคหํ มา วิวาทนฺติ โอมทฺทิตฺวา สงฺเฆน อุโปสโถ วา ปวารณา
วา   กาตพฺพา   ฯ   กตเมหิ  ปญฺจหิ  ฯ  อปริสุทฺธกายสมาจาโร  โหติ
อปริสุทฺธวจีสมาจาโร  โหติ  อปริสุทฺธาชีโว  โหติ  พาโล  โหติ อพฺยตฺโต
ภณฺฑนการโก   โหติ   กลหการโก  ฯ  อิเมหิ  โข  อุปาลิ  ปญฺจหงฺเคหิ
สมนฺนาคตสฺส  ภิกฺขุโน  สงฺฆมชฺเฌ  อุโปสถํ  วา  ปวารณํ  วา ฐเปนฺตสฺส
อลํ  ภิกฺขุ มา ภณฺฑนํ มา กลหํ มา วิคฺคหํ มา วิวาทนฺติ โอมทฺทิตฺวา สงฺเฆน
อุโปสโถ วา ปวารณา วา กาตพฺพาติ ฯ
     [๑๑๙๕]   กตีหิ  นุ  โข  ภนฺเต  องฺเคหิ  สมนฺนาคตสฺส  ภิกฺขุโน
อนุโยโค    น   ทาตพฺโพติ   ฯ   ปญฺจหุปาลิ   องฺเคหิ   สมนฺนาคตสฺส
ภิกฺขุโน  อนุโยโค  น  ทาตพฺโพ  ฯ  กตเมหิ  ปญฺจหิ  ฯ อาปตฺตานาปตฺตึ
น    ชานาติ    ลหุกครุกํ   อาปตฺตึ   น   ชานาติ   สาวเสสานวเสสํ
อาปตฺตึ    น    ชานาติ    ทุฏฺฐุลฺลาทุฏฺฐุลฺลํ    อาปตฺตึ   น   ชานาติ
สปฺปฏิกมฺมอปฺปฏิกมฺมํ   อาปตฺตึ   น   ชานาติ   ฯ   อิเมหิ  โข  อุปาลิ
ปญฺจหงฺเคหิ    สมนฺนาคตสฺส   ภิกฺขุโน   อนุโยโค   น   ทาตพฺโพ   ฯ
ปญฺจหุปาลิ   องฺเคหิ   สมนฺนาคตสฺส   ภิกฺขุโน   อนุโยโค  ทาตพฺโพ  ฯ
กตเมหิ   ปญฺจหิ   ฯ   อาปตฺตานาปตฺตึ   ชานาติ   ลหุกครุกํ   อาปตฺตึ
ชานาติ     สาวเสสานวเสสํ    อาปตฺตึ    ชานาติ    ทุฏฺฐุลฺลาทุฏฺฐุลฺลํ
อาปตฺตึ    ชานาติ    สปฺปฏิกมฺมอปฺปฏิกมฺมํ    อาปตฺตึ    ชานาติ    ฯ
อิเมหิ   โข   อุปาลิ   ปญฺจหงฺเคหิ   สมนฺนาคตสฺส   ภิกฺขุโน  อนุโยโค
ทาตพฺโพติ ฯ
     [๑๑๙๖]   กตีหิ   นุ   โข   ภนฺเต   อากาเรหิ  ภิกฺขุ  อาปตฺตึ
อาปชฺชตีติ   ฯ   ปญฺจหุปาลิ   อากาเรหิ   ภิกฺขุ  อาปตฺตึ  อาปชฺชติ  ฯ
กตเมหิ     ปญฺจหิ     ฯ    อลชฺชิตา    อญฺญาณตา    กุกฺกุจฺจปกตตา
อกปฺปิเย    กปฺปิยสญฺญิตา    กปฺปิเย    อกปฺปิยสญฺญิตา    ฯ    อิเมหิ
โข   อุปาลิ   ปญฺจหากาเรหิ   ภิกฺขุ   อาปตฺตึ  อาปชฺชติ  ฯ  อปเรหิปิ
อุปาลิ    ปญฺจหากาเรหิ    ภิกฺขุ    อาปตฺตึ   อาปชฺชติ   ฯ   กตเมหิ
ปญฺจหิ    ฯ    อทสฺสเนน    อสฺสวเนน    ปสุตฺตตา   ๑-   ตถาสญฺญี
สติสมฺโมสา   ฯ   อิเมหิ   โข   อุปาลิ  ปญฺจหากาเรหิ  ภิกฺขุ  อาปตฺตึ
อาปชฺชตีติ ฯ
     [๑๑๙๗]   กติ   นุ   โข   ภนฺเต  เวราติ  ฯ  ปญฺจิเม  อุปาลิ
เวรา   ฯ   กตเม   ปญฺจ   ฯ   ปาณาติปาโต   อทินฺนาทานํ  กาเมสุ
มิจฺฉาจาโร   มุสาวาโท   สุราเมรยมชฺชปมาทฏฺฐานํ   ฯ   อิเมหิ   โข
อุปาลิ ปญฺจ เวราติ ฯ
     [๑๑๙๘]   กติ  นุ  โข  ภนฺเต  เวรมณิโยติ  ฯ  ปญฺจิมา  อุปาลิ
เวรมณิโย   ฯ   กตมา  ปญฺจ  ฯ  ปาณาติปาตา  เวรมณี  อทินฺนาทานา
เวรมณี    กาเมสุ    มิจฺฉาจารา    เวรมณี    มุสาวาทา    เวรมณี
สุราเมรยมชฺชปมาทฏฺฐานา   เวรมณี   ฯ   อิมา   โข   อุปาลิ   ปญฺจ
เวรมณิโยติ ฯ
     [๑๑๙๙]   กติ  นุ  โข  ภนฺเต  พฺยสนานีติ  ฯ  ปญฺจิมานิ  อุปาลิ
พฺยสนานิ   ฯ   กตมานิ   ปญฺจ   ฯ  ญาติพฺยสนํ  โภคพฺยสนํ  โรคพฺยสนํ
สีลพฺยสนํ ทิฏฺฐิพฺยสนํ ฯ อิมานิ โข อุปาลิ ปญฺจ พฺยสนานีติ ฯ
     [๑๒๐๐]   กติ   นุ   โข  ภนฺเต  สมฺปทาติ  ฯ  ปญฺจิมา  อุปาลิ
สมฺปทา  ฯ  กตมา  ปญฺจ  ฯ  ญาติสมฺปทา  โภคสมฺปทา  อาโรคฺยสมฺปทา
สีลสมฺปทา     ทิฏฺฐิสมฺปทา     ฯ     อิมา    โข    อุปาลิ    ปญฺจ
สมฺปทาติ ฯ
                          มุสาวาทวคฺโค สตฺตโม ฯ
@เชิงอรรถ: ๑ ม. ยุ. ปสุตฺตกตา ฯ
                                   ตสฺสุทฺทานํ
     [๑๒๐๑]   มุสาวาโท จ โอมทฺทิ    อปเรหิ อนุโยโค จ
           อาปตฺติญฺจ อปเรหิ             เวรา เวรมณีปิ จ
           พฺยสนํ สมฺปทา เจว            สตฺตโม วคฺคสงฺคโหติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๔๗๖-๔๘๐.
http://84000.org/tipitaka/pitaka_item/pali_item_s.php?book=8&item=1193&items=9&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pitaka_item/pali_item_s.php?book=8&item=1193&items=9&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=8&item=1193&items=9&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=8&item=1193&items=9&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=8&i=1193
             สารบัญพระไตรปิฎกเล่มที่ ๘
http://84000.org/tipitaka/read/?index_8