บาลีพระไตรปิฎกเล่มที่ ๘ - พระวินัยปิฎกเล่มที่ ๘

กติปุจฺฉาวารํ [๘๔๑] กติ อาปตฺติโย ฯ กติ อาปตฺติกฺขนฺธา ฯ กติ วินีตวตฺถูนิ ฯ กติ อคารวา ฯ กติ คารวา ฯ กติ วินีตวตฺถูนิ ฯ กติ วิปตฺติโย ฯ กติ อาปตฺติสมุฏฺฐานา ฯ กติ วิวาทมูลานิ ฯ กติ อนุวาทมูลานิ ฯ กติ สาราณียา ธมฺมา ฯ กติ เภทกรวตฺถูนิ ฯ กติ อธิกรณานิ ฯ กติ สมถา ฯ [๘๔๒] ปญฺจ อาปตฺติโย ฯ ปญฺจ อาปตฺติกฺขนฺธา ฯ ปญฺจ วินีตวตฺถูนิ ฯ สตฺต อาปตฺติโย ฯ สตฺต อาปตฺติกฺขนฺธา ฯ สตฺต วินีตวตฺถูนิ ฯ ฉ อคารวา ฯ ฉ คารวา ฯ ฉ วินีตวตฺถูนิ ฯ จตสฺโส วิปตฺติโย ฯ ฉ อาปตฺติสมุฏฺฐานา ฯ ฉ วิวาทมูลานิ ฯ ฉ อนุวาทมูลานิ ฯ ฉ สาราณียา ธมฺมา ฯ อฏฺฐารส เภทกรวตฺถูนิ ฯ จตฺตาริ อธิกรณานิ ฯ สตฺต สมถา ฯ [๘๔๓] ตตฺถ กตมา ปญฺจ อาปตฺติโย ฯ ปาราชิกาปตฺติ สงฺฆาทิเสสาปตฺติ ปาจิตฺติยาปตฺติ ปาฏิเทสนียาปตฺติ ทุกฺกฏาปตฺติ ฯ อิมา ปญฺจ อาปตฺติโย ฯ [๘๔๔] ตตฺถ กตเม ปญฺจ อาปตฺติกฺขนฺธา ฯ ปาราชิกาปตฺติกฺขนฺโธ สงฺฆาทิเสสาปตฺติกฺขนฺโธ ปาจิตฺติยาปตฺติกฺขนฺโธ ปาฏิเทสนียาปตฺติกฺขนฺโธ ทุกฺกฏาปตฺติกฺขนฺโธ ฯ อิเม ปญฺจ อาปตฺติกฺขนฺธา ฯ [๘๔๕] ตตฺถ กตมานิ ปญฺจ วินีตวตฺถูนิ ฯ ปญฺจหิ อาปตฺติกฺขนฺเธหิ อารติ วิรติ ปฏิวิรติ เวรมณี อกิริยา อกรณํ อนชฺฌาปตฺติ เวลาอนติกฺกโม เสตุฆาโต ฯ อิมานิ ปญฺจ วินีตวตฺถูนิ ฯ [๘๔๖] ตตฺถ กตมา สตฺต อาปตฺติโย ฯ ปาราชิกาปตฺติ สงฺฆาทิเสสาปตฺติ ถุลฺลจฺจยาปตฺติ ปาจิตฺติยาปตฺติ ปาฏิเทสนียาปตฺติ ทุกฺกฏาปตฺติ ทุพฺภาสิตาปตฺติ ฯ อิมา สตฺต อาปตฺติโย ฯ [๘๔๗] ตตฺถ กตเม สตฺต อาปตฺติกฺขนฺธา ฯ ปาราชิกาปตฺติกฺขนฺโธ สงฺฆาทิเสสาปตฺติกฺขนฺโธ ถุลฺลจฺจยาปตฺติกฺขนฺโธ ปาจิตฺติยาปตฺติกฺขนฺโธ ปาฏิเทสนียาปตฺติกฺขนฺโธ ทุกฺกฏาปตฺติกฺขนฺโธ ทุพฺภาสิตาปตฺติกฺขนฺโธ ฯ อิเม สตฺต อาปตฺติกฺขนฺธา ฯ [๘๔๘] ตตฺถ กตมานิ สตฺต วินีตวตฺถูนิ ฯ สตฺตหิ อาปตฺติกฺขนฺเธหิ อารติ วิรติ ปฏิวิรติ เวรมณี อกิริยา อกรณํ อนชฺฌาปตฺติ เวลาอนติกฺกโม เสตุฆาโต ฯ อิมานิ สตฺต วินีตวตฺถูนิ ฯ [๘๔๙] ตตฺถ กตเม ฉ อคารวา ฯ พุทฺเธ อคารโว ธมฺเม อคารโว สงฺเฆ อคารโว สิกฺขาย อคารโว อปฺปมาเท อคารโว ปฏิสนฺถาเร อคารโว ฯ อิเม ฉ อคารวา ฯ [๘๕๐] ตตฺถ กตเม ฉ คารวา ฯ พุทฺเธ คารโว ธมฺเม คารโว สงฺเฆ คารโว สิกฺขาย คารโว อปฺปมาเท คารโว ปฏิสนฺถาเร คารโว ฯ อิเม ฉ คารวา ฯ [๘๕๑] ตตฺถ กตมานิ ฉ วินีตวตฺถูนิ ฯ ฉหิ อคารเวหิ อารติ วิรติ ปฏิวิรติ เวรมณี อกิริยา อกรณํ อนชฺฌาปตฺติ เวลาอนติกฺกโม เสตุฆาโต ฯ อิมานิ ฉ วินีตวตฺถูนิ ฯ [๘๕๒] ตตฺถ กตมา จตสฺโส วิปตฺติโย ฯ สีลวิปตฺติ อาจารวิปตฺติ ทิฏฺฐิวิปตฺติ อาชีววิปตฺติ ฯ อิมา จตสฺโส วิปตฺติโย ฯ [๘๕๓] ตตฺถ กตเม ฉ อาปตฺติสมุฏฺฐานา ฯ อตฺถาปตฺติ กายโต สมุฏฺฐาติ น วาจโต น จิตฺตโต อตฺถาปตฺติ วาจโต สมุฏฺฐาติ น กายโต น จิตฺตโต อตฺถาปตฺติ กายโต จ วาจโต จ สมุฏฺฐาติ น จิตฺตโต อตฺถาปตฺติ กายโต จ จิตฺตโต จ สมุฏฺฐาติ น วาจโต อตฺถาปตฺติ วาจโต จ จิตฺตโต จ สมุฏฺฐาติ น กายโต อตฺถาปตฺติ กายโต จ วาจโต จ จิตฺตโต จ สมุฏฺฐาติ ฯ อิเม ฉ อาปตฺติสมุฏฺฐานา ฯ

เนื้อความพระไตรปิฎกฉบับภาษาบาลีอักษรไทย เล่มที่ ๘ หน้าที่ ๒๓๒-๒๓๔. http://84000.org/tipitaka/pitaka_item/pali_item_s.php?book=8&item=841&items=13&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- http://84000.org/tipitaka/pitaka_item/pali_item_s.php?book=8&item=841&items=13&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- http://84000.org/tipitaka/read/roman_item_s.php?book=8&item=841&items=13&modeTY=2 อ่านเทียบพระไตรปิฎกภาษาไทยฉบับหลวง :- http://84000.org/tipitaka/read/byitem_s.php?book=8&item=841&items=13&modeTY=2 ศึกษาอรรถกถานี้ได้ที่ :- http://84000.org/tipitaka/attha/attha.php?b=8&i=841 The Pali Atthakatha in Thai :- http://84000.org/tipitaka/atthapali/read_th.php?B=3&A=9803 The Pali Atthakatha in Roman :- http://84000.org/tipitaka/atthapali/read_rm.php?B=3&A=9803 สารบัญพระไตรปิฎกเล่มที่ ๘ http://84000.org/tipitaka/read/?index_8