AtthaPali Vol.26

page123.

Dukkhāhīti dukkhamāhi. Tibbāhīti bahalāhi tikhiṇāhi vā. Kharāhīti kakkhaḷāhi. Kaṭukāhīti ativiya aniṭṭhabhāvena dāruṇāhi. Āvaṭṭatīti ekasmiṃyeva ṭhāne anijjitvā attano sarīraṃ ito cito ākaḍḍhanto āvaṭṭati. Parivaṭṭatīti ekasmiṃ padese nipannopi aṅgapaccaṅgāni parito khipanto vaṭṭati, abhimukhaṃ vā vaṭṭanto āvaṭṭati, samantato vaṭṭanto parivaṭṭati. Etamatthaṃ viditvāti "sakiñācanassa appaṭisaṅkhāparibhogahetukā ayaṃ dukkhuppatti, akiñcanassa pana sabbaso ayaṃ natthī"ti etamatthaṃ sabbākārato jānitvā tadatthappakāsanaṃ imaṃ udānaṃ udānesi. Tattha sukhino vatāti sukhino vata sappurisā. Ke pana teti. Ye akiñcanā, ye rāgādikiñcanassa pariggahakiñcanassa ca abhāvena akiñcanā, tesaṃ panidaṃ kiñcanaṃ natthīti āha "vedaguno hi janā akiñcanā"ti, ye ariyamaggañāṇasaṅkhātaṃ vedaṃ gatā adhigatā. Tena vā vedena nibbānaṃ gatā adhigatāti vedaguno, ^1- te ariyajanā khīṇāsavapuggalā anavasesarāgādikiñcanānaṃ aggamaggena samucchinnattā akiñcanā nāma. Asati hi rāgādikiñcane kuto pariggahakiñcanassa sambhavo. Evaṃ gāthāya purābhāgena arahante pasaṃsitvā aparabhāgena andhaputhujjane garahanto "sakiñcanaṃ passā"tiādimāha. Taṃ purimasutte vuttatthameva. Evaṃ imāyapi gāthāya vaṭṭavivaṭṭaṃ kathitaṃ. Chaṭṭhasuttavaṇṇanā niṭṭhitā. -------------

The Pali Atthakatha in Roman Book 26 page 123. http://84000.org/tipitaka/pitaka_item/read_rm.php?B=26&A=2748&pagebreak=1 อรรถกถาบาลีอักษรไทย :- http://84000.org/tipitaka/pitaka_item/read_th.php?B=26&A=2748&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=25&i=56 เนื้อความพระไตรปิฎกฉบับหลวง :- http://84000.org/tipitaka/read/r.php?B=25&A=1818 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=25&A=1816 The Pali Tipitaka in Roman Character :- http://84000.org/tipitaka/read/roman_read.php?B=25&A=1816 Contents of The Tipitaka Volume 25 http://84000.org/tipitaka/read/?index_25