AtthaPali Vol.39

Navakanipatajatakatthakatha --------- gijjhajatakam parisankupatho namati idam sattha jetavane viharanto ekam dubbacam bhikkhum arabbha kathesi. So kira eko kulaputto niyyanikasasane pabbajitvapi atthakamehi acariyupajjhayehi ceva sabrahmacarihi ca evante abhikkamitabbam evam patikkamitabbam evam aloketabbam evam viloketabbam evam samminjitabbam evam pasaretabbam evam nivasetabbam evam parupitabbam evam patto gahetabbo yapanamattam bhattam gahetva paccavekkhitvava paribhunjitabbam indriyesu guttadvarena bhojane mattannuna jagariyamanuyuttena bhavitabbam idam agantukavattam nama janitabbam idam gamikavattam nama imani cuddasa khandhakavattani asiti mahavattani tattha te samma vattitabbam ime terasa dhutangaguna nama ete samadaya vattitabbanti ovadiyamano dubbaco ahosi akkhamo appadakkhinaggahi anusasanim aham tumhe na vadami tumhe mam kasma vadetha ahameva attano attham va anattham va karissamiti attanam avacaniyam akasi. Athassa dubbacabhavam Natva bhikkhu dhammasabhayam agunakatham kathenta nisidimsu. Sattha agantva kaya nuttha bhikkhave etarahi kathaya sannisinnati pucchitva imaya namati vutte tam bhikkhum pakkosapetva saccam kira tvam dubbacositi pucchitva saccanti vutte kasma bhikkhu evarupe niyyanikasasane pabbajitva atthakamanam vacanam na karosi pubbepi tvam vacanam akatva verabbhavatamukhe cunnavicunno jatoti vatva atitam ahari atite gijjhakute pabbate bodhisatto gijjhayoniyam nibbatti. Putto panassa supatto nama gijjharaja anekasahassagijjhaparivaro thamasampanno ahosi. So matapitaro posesi. Thama sampannatta pana atidurampi uppati. Atha nam pita tata ettakam nama thanam atikkamitva na gantabbanti ovadati. So sadhuti sampaticchitvapi ekadivasam navavutthe deve gijjhehi saddhim uppatitva sese ohaya atibhumim gantva verabbhavatamukham patva cunnavicunnabhavam papuni. Sattha tamattham pakasento abhisambuddho hutva ima gatha abhasi parisankupatho nama gijjhapatho sanantano tatrasi matapitaro gijjho posesi jinnake. Tesam ajagaram medam accahasi bahuttato pita puttam avacasi janam uccam papatinam supattam pakkhasampannam tejasim duragaminam. Pariplavattam pathavim yada tata vijanahi sagarena parikkhittam cakkamva parimandalam tato tata nivattassu massu eto param gami. Uddham pattosi vegena bali pakkhi dijuttamo olokayanto vankango pabbatani vanani ca. Addasa pathavim gijjho yathassasi pitussutam sagarena parikkhittam cakkamva parimandalam. Tanca so samatikkamma parameva pavattatha tanca vatasikha tikkha accahasi balim dijam. Nasakkhatigato poso punareva nivattitum dijo byasanamapadi verabbhanam vasam gato. Tassa putta ca dara ca ye canne anujivino sabbe byasanamapadum anovadakare dije. Evampi idha vuddhanam yo vakyam navabujjhati atisimacaro ditto gijjho vatitasasano sabbe byasanam papponti akatva vuddhasasananti. Tattha parisankupathoti sankupatho. Manussa hirannasuvannatthaya gacchanta tasmim padese khanuke kotetva tesu rajjuyo bandhitva gacchanti tena so gijjhapabbate janghamaggo sankupathoti vuccati. Gijjhapathoti gijjhapabbatamatthake mahamaggo. Sanantanoti porano. Tatrasiti tasmim gijjhapabbatamatthake sankupathe eko gijjho ahosi So jinnake matapitaro posesi. Ajagaram medanti ajagaramedam. Accahasiti ativiya ahari. Bahuttatoti bahuttaso. Janam uccam papatinanti putto te atiuccam thanam langhatiti sutva uccam papati ayanti jananto. Tejasinti purisatejasampannam. Duragaminanti teneva tejena duragamim. Pariplavattanti uppalinipattam viya udake uppalavamanam. Vijanahiti vijanasi. Cakkamva parimandalanti tasmim te padese thitassa samuddena paricchinno jambudipo cakkamva pannayati tato thana nivattahiti ovadanto evamaha. Uddham pattositi pitu ovadam akatva ekadivasam gijjhehi saddhim uppatito te ohaya pitara kathitathanam agamasi. Olokayantoti tam thanam patva hettha olokento. Vankangoti vankagivo. Yathassasi pitussutanti yathassa pitu santika sutam asi tatheva addasa. Yathassasitipi patho. Parameva pavattathati pitara akkhatathanato param ativattantova. Tanca vatasikha tikkhati nam anovadakam balimpi samanam dijam tikhinaverabbhavatasikha accahasi atihari cunnavicunnam akasi. Nasakkhatigatoti nasakkhi atigato. Posoti satto. Anovadakareti tasmim dije panditanam ovadam akaronte sabbepi te mahadukkham papunimsu. Akatva vuddhasasananti vuddhanam hitakamanam vacanam akatva evameva byasanam mahadukkham papunati. Tasma tvam bhikkhu ma gijjhasadiso bhava atthakamanam vacanam Karohiti. So satthara evam ovadito tato patthaya subbaco ahosi. Sattha imam dhammadesanam aharitva jatakam samodhanesi tada dubbacagijjho etarahi dubbacabhikkhu ahosi gijjhapita pana ahamevati. Gijjhajatakam pathamam.

The Pali Atthakatha in Roman Book 39 page 339-343. http://84000.org/tipitaka/pitaka_item/read_rm.php?B=39&A=6830&modeTY=2 อรรถกถาบาลีอักษรไทย :- http://84000.org/tipitaka/pitaka_item/read_th.php?B=39&A=6830&modeTY=2 อ่านอรรถกถาแปลไทย :- http://84000.org/tipitaka/attha/attha.php?b=27&i=1207 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=5101 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=5144 The Pali Tipitaka in Roman Character :- http://84000.org/tipitaka/read/roman_read.php?B=27&A=5144 Contents of The Tipitaka Volume 27 http://84000.org/tipitaka/read/?index_27