Atthakatha Book 32 : PALI ROMAN
Thera.A.1 (paramatthadī.1)

Vipariṇamantīti asassatā vipariṇāmadhammā. Tathā hi te "saṅkhārā"ti vuccanti.
Tenāha uppajjanti ca te khandhā, cavanti aparāparanti. Te bhavapariyāyena
saṅkhārapariyāyena 1- ca vuttā pañcakkhandhā yathāpaccayaṃ aparāparaṃ uppajjanti,
uppannā ca jarāya paripīḷitā hutvā cavanti paribhijjantīti attho. Etena "bhavo,
saṅkhārā"ti ca laddhavohārā pañcakkhandhā udayabbayasabhāvāti dasseti. Yasmā
tilakkhaṇaṃ āropetvā saṅkhāre sammasantassa tayopi bhavā ādittaṃ viya saṅkhate 2-
ādīnavaṃ dosaṃ pageva vipassanāpaññāya jānitvā aniccalakkhaṇehi diṭṭhā saṅkhārā
dukkhānattā vibhūtatarā upaṭṭhahanti, tenāha bhagavā "yadaniccaṃ taṃ dukkhaṃ, yaṃ dukkhaṃ
tadanattā"ti. 3-
      Yasmā tilakkhaṇaṃ āropetvā saṅkhāre sammasantassa tayopi bhavā ādittaṃ
viya agāraṃ sappaṭibhayā 4- upaṭṭhahanti, tasmā āha "bhavenamhi anatthiko"ti. Evaṃ
pana sabbaso bhavehi vinivattiyamānassa kāmesu apekkhāya 5- lesopi na sambhavatiyeva,
tenāha "nissaṭo sabbakāmehī"ti, amhīti yojanā. Mānusehi viya dibbehipi
kāmehi nivattitacittosmīti attho. Patto me āsavakkhayoti yasmā evaṃ
suparimajjitasaṅkhāro bhavesu suparidiṭṭhādīnavo kāmesu ca anāsattamānaso 6- tasmā
sūlamatthake nisinnenāpi me mayā patto adhigato āsavakkhayo nibbānaṃ arahattañcāti.
Aññehi ca sabrahmacārīhi appattamānasehi tadadhigamāya ussāho karaṇīyoti bhikkhūnaṃ
ovādamadāsi.
                    Uttarattheragāthāvaṇṇanā niṭṭhitā.
                          ------------
@Footnote: 1 Sī. ayaṃ pāṭho na dissati  2 Sī.,i. saṅkhataṃ   3 saṃ.khandha. 17/15/19 yadaniccasutta
@4 Sī.,i.,Ma. sappaṭibhayaṃ   5 i.,Ma. anapekkhāya   6 Sī.,i. anāvattamānaso


             The Pali Atthakatha in Roman Book 32 page 377.
http://84000.org/tipitaka/pitaka_item/read_rm.php?B=32&A=8392
             อรรถกถาบาลีอักษรไทย :-
http://84000.org/tipitaka/pitaka_item/read_th.php?B=32&A=8392
             อ่านอรรถกถาแปลไทย :-
http://84000.org/tipitaka/attha/attha.php?b=26&i=258
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=26&A=5673
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=26&A=5844
             The Pali Tipitaka in Roman Character :-
http://84000.org/tipitaka/read/roman_read.php?B=26&A=5844
             Contents of The Tipitaka Volume 26
http://84000.org/tipitaka/read/?index_26