บาลีอรรถกถาเล่มที่ ๒

{๕๗๐} จตุตฺถสิกฺขาปเท ฯ อวรุทฺธา โหนฺตีติ ปฏิวิรุทฺธา โหนฺติ ฯ {๕๗๓} ปญฺจนฺนํ ปฏิสํวิทิตนฺติ ปญฺจสุ สหธมฺมิเกสุ ยงฺกิญฺจิ เปเสตฺวา ขาทนียํ วา โภชนียํ วา อาหริสฺสามาติ ปฏิสํวิทิตํ กตํปิ อปฏิสํวิทิตเมวาติ อตฺโถ ฯ อารามํ อารามูปจารํ ฐเปตฺวาติ อารญฺญกเสนาสนารามํ จ ตสฺส อุปจารํ จ ฐเปตฺวา อุปจารโต นิกฺขนฺตํ อนฺตรามคฺเค ภิกฺขุํ ทิสฺวา วา คามํ อาคตสฺส วา ปฏิสํวิทิตํ กตํปิ อปฏิสํวิทิตเมว โหตีติ เวทิตพฺพํ ฯ สเจ สาสงฺกํ โหติ

--------------------------------------------------------------------------------------------- หน้าที่ ๔๙๑.

สาสงฺกนฺติ อาจิกฺขิตพฺพนฺติ กสฺมา อาจิกฺขิตพฺพํ ฯ อาราเม โจเร วสนฺเต อมฺหากํ นาโรเจนฺตีติ วจนปริโมจนตฺถํ ฯ โจรา วตฺตพฺพา มนุสฺสา อิธูปจรนฺตีติ กสฺมา วตฺตพฺพา ฯ อตฺตโน อุปฏฺฐาเกหิ อมฺเห คณฺหาเปนฺตีติ วจนปริโมจนตฺถํ ฯ ยาคุยา ปฏิสํวิทิเต ตสฺสา ปริวาโร อาหรียตีติ ยาคุยา ปฏิสํวิทิตํ กตฺวา กึ สุทฺธยาคุยา ทินฺนาย ปูวภตฺตาทีนิปิ เอติสฺสา ยาคุยา ปริวารํ กตฺวา ทสฺสามาติ เอวํ ยงฺกิญฺจิ อาหรนฺติ สพฺพํ ปฏิสํวิทิตเมว โหติ ฯ ภตฺเตน ปฏิสํวิทิเตติอาทีสุปิ เอเสว นโย ฯ อสุกนฺนาม กุลํ ปฏิสํวิทิตํ กตฺวา ขาทนียาทีนิ คเหตฺวา คจฺฉตีติ สุตฺวา อญฺญานิปิ เตน สทฺธึ อตฺตโน เทยฺยธมฺมํ อาหรนฺติ วฏฺฏติ ฯ ยาคุยา ปฏิสํวิทิตํ กตฺวา ปูวํ วา ภตฺตํ วา อาหรนฺติ เอตํปิ วฏฺฏตีติ กุรุนฺทิยํ วุตฺตํ ฯ {๕๗๕} คิลานสฺสาติ อปฏิสํวิทิเตปิ คิลานสฺส อนาปตฺติ ฯ ปฏิสํวิทิเต วา คิลานสฺส วา เสสกนฺติ เอกสฺสตฺถาย ปฏิสํวิทิตํ กตฺวา อาหฏํ ตสฺส เสสกํ อญฺญสฺสาปิ ภุญฺชิตุํ วฏฺฏติ ฯ จตุนฺนํ วา ปญฺจนฺนํ วา ปฏิสํวิทิตํ กตฺวา พหุํ อาหฏํ โหติ อญฺเญสํปิ ทาตุํ อิจฺฉนฺติ ฯ เอตํปิ ปฏิสํวิทิตเสสกเมว สพฺเพสํปิ วฏฺฏติ ฯ อถ อธิกเมว โหติ สนฺนิธึ โมเจตฺวา ฐปิตํ ทุติยทิวเสปิ วฏฺฏติ ฯ คิลานสฺส อาหฏาวเสเสปิ เอเสว นโย ฯ ยํ ปน อปฏิสํวิทิตเมว กตฺวา อาหฏํ ตํ พหิอารามํ เปเสตฺวา ปฏิสํวิทิตํ กาเรตฺวา อาหราเปตพฺพํ ฯ ภิกฺขูหิ วา คนฺตฺวา อนฺตรามคฺเค คเหตพฺพํ ฯ ยํปิ วิหารมชฺเฌน คจฺฉนฺตา วา

--------------------------------------------------------------------------------------------- หน้าที่ ๔๙๒.

วนจรกาทโย วา วนโต อาหริตฺวา เทนฺติ ปุริมนเยเนว ปฏิสํวิทิตํ กาเรตพฺพํ ฯ ตตฺถ ชาตกนฺติ อาราเม ชาตกเมว มูลขาทนียาทึ อญฺเญน กปฺปิยํ กตฺวา ทินฺนํ ปริภุญฺชโต อนาปตฺติ ฯ สเจ ปน นํ คามํ หริตฺวา ปจิตฺวา อาหรนฺติ น วฏฺฏติ ปฏิสํวิทิตํ กาเรตพฺพํ ฯ เสสเมตฺถ อุตฺตานเมว ฯ กฐินสมุฏฺฐานํ กิริยากิริยํ โนสญฺญาวิโมกฺขํ อจิตฺตกํ ปณฺณตฺติวชฺชํ กายกมฺมํ วจีกมฺมํ ติจิตฺตํ ติเวทนนฺติ ฯ จตุตฺถปาฏิเทสนียํ สมตฺตํ วณฺณนากฺกเมนาติ ฯ สมนฺตปาสาทิกาย วินยสํวณฺณนาย ปาฏิเทสนียวณฺณนา นิฏฺฐิตา ฯ ---------------

อรรถกถาภาษาบาลีอักษรไทย เล่มที่ ๒ หน้า ๔๙๐-๔๙๒. http://84000.org/tipitaka/pitaka_item/read_th.php?B=2&A=10338&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=2&A=10338&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=2&i=794 เนื้อความพระไตรปิฎกฉบับหลวง :- http://84000.org/tipitaka/read/r.php?B=2&A=15053 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=2&A=9492 The Pali Tipitaka in Roman Character :- http://84000.org/tipitaka/read/roman_read.php?B=2&A=9492 สารบัญพระไตรปิฎกเล่มที่ ๑ http://84000.org/tipitaka/read/?index_2