อรรถกถาเล่มที่ ๑๖ ภาษาบาลีอักษรไทย
 องฺ.อ. (มโนรถ.๓)

                       ๗. โลกายติกสุตฺตวณฺณนา
     [๓๘] สตฺตเม โลกายติกาติ โลกายตปาฐกา. ๑- สตตนฺติ สทา. สมิตนฺติ
นิรนฺตรํ. ติฏฺฐเตตนฺติ ติฏฺฐตุ เอตํ, มา เอตํ ปฏฺฐเปถ, โก โว เอเตน อตฺโถ.
ธมฺมํ โว พฺราหฺมณา เทสิสฺสามีติ อหํ โว จตุสจฺจธมฺมํ เทเสสฺสามิ.
     ทฬฺหธมฺโมติ ทฬฺหธนุํ  คเหตฺวา ฐิโต. ธนุคฺคโหติ อิสฺสาโส. ทฬฺหธนุ
นาม ทฺวิสหสฺสถามํ วุจฺจติ. ทฺวิสหสฺสถามํ นาม ยสฺส อาโรปิตสฺส ชิยาพทฺโธ
โลหสีสาทีนํ ภาโร ทณฺเฑ คเหตฺวา ยาว กณฺฐปฺปมาณํ ๒- อุกฺขิตฺตสฺส ปฐวิโต
มุจฺจติ. สิกฺขิโตติ ทส ทฺวาทส วสฺสานิ อาจริยกุเล อุคฺคหิตสิปฺโป. กตหตฺโถติ
เอโก สิปฺปเมว อุคฺคณฺหาติ, กตหตฺโถ น โหติ อยํ ปน กตหตฺโถ จิณฺณวสีภาโว.
กตุปาสโนติ ราชกุลาทีสุ ทสฺสิตสิกฺโข. ๓- ลหุเกน อสเนนาติ อนฺโต สุสิรํ กตฺวา
ตุลาทีหิ ปูเรตฺวา กตลกฺขปริกมฺเมน สลฺลหุกกณฺเฑน. เอวํกตญฺหิ เอกอุสภคามี เทฺว
อุสภานิปิ คจฺฉติ ฯเปฯ อฏฺฐอุสภคามี โสฬส อุสภานิปิ คจฺฉติ. อปฺปกสิเรนาติ
นิทฺทุกฺเขน. อติปาเตยฺยาติ อติกฺกเมยฺย. อิทํ วุตฺตํ โหติ:- ยถา โส ธนุคฺคโห ตํ
วิทตฺถิจตุรงฺคุลํ ฉายํ สีฆเมวาติ อติกฺกเมติ, เอวํ สกลจกฺกวาฬํ สีฆํ ๔-
อติกฺกมนสมตฺเถน ปทชเวน สมนฺนาคโต. สนฺธาวนิกายาติ ปทสา ธาวเนน. เอวมาหํสูติ
เอวํ วทนฺติ.
@เชิงอรรถ: ๑ ฉ.ม. โลกายตวาทกา  ๒ ฉ.ม. กณฺฑปฺปมาณา
@๓ ฉ.ม. ทสฺสิตสิปฺโป  ๔ ฉ.ม. สีฆํ สีฆํ

             อรรถกถาภาษาบาลีอักษรไทย เล่มที่ ๑๖ หน้า ๓๑๒.
http://84000.org/tipitaka/pitaka_item/read_th.php?B=16&A=7032&modeTY=2&pagebreak=1
             The Pali Atthakatha in Roman :-
http://84000.org/tipitaka/atthapali/read_rm.php?B=16&A=7032&modeTY=2&pagebreak=1
             อ่านอรรถกถาแปลไทย :-
http://84000.org/tipitaka/attha/attha.php?b=23&i=242
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=23&A=9188
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=23&A=9414
             The Pali Tipitaka in Roman Character :-
http://84000.org/tipitaka/read/roman_read.php?B=23&A=9414
             สารบัญพระไตรปิฎกเล่มที่ ๒๒
http://84000.org/tipitaka/read/?index_23