บาลีอรรถกถาเล่มที่ ๓๓

หน้าที่ ๗๗.

ตุฏฺเฐน จิตฺเตนาติ อิตฺถมฺภูตลกฺขเณ กรณวจนํ, อตฺตมโน ปมุทิโต หุตฺวาติ อตฺโถ. เขเปตฺวาติ สมุจฺฉินฺทิตฺวา. อกุปฺปตนฺติ อรหตฺตํ. ปปฺปุยฺยาติ ปาปุณิตฺวา. ปรมํ สนฺตินฺติ อนุปาทิเสสํ นิพฺพานํ. ตทธิคโม ^๑- จสฺส เกวลํ กาลาคมนเมว, ^๒- น โกจิวิโธติ ^๓- ตํ ทสฺเสตุํ วุตฺตํ "ปรินิพฺพาตินาสโว"ติ. เอวํ สตฺถารา โอวทิโต สํเวคชาโต ปพฺพชิตฺวา วิปสฺสนํ ปฏฺฐเปตฺวา น จิรสฺเสว อรหตฺตํ ปาปุณิ. เตน วุตฺตํ อปทาเน ๔-:- "กณิการํว ชลิตํ ทีปรุกฺขํว โชติตํ กญฺจนํว วิโรจนฺตํ อทฺทสํ ทฺวิปทุตฺตมํ. กมณฺฑลุํ ฐเปตฺวาน วากจีรญฺจ กุณฺฑิกํ เอกํสํ อชินํ กตฺวา พุทฺธเสฏฺฐํ ถวึ อหํ. ตมนฺธการํ วิธมํ โมหชาลสมากุลํ ญาณาโลกํ ทสฺเสตฺวาน นิตฺติณฺโณสิ มหามุนิ. สมุทฺธรสิมํ โลกํ สพฺพาวนฺตมนุตฺตรํ ญาเณ เต อุปมา นตฺถิ ยาวตา ชคโต คติ. เตน ญาเณน สพฺพญฺญู อิติ พุทฺโธ ^๕- ปวุจฺจติ วนฺทามิ ตํ มหาวีรํ สพฺพญฺญุตมนาวรํ. สตสหสฺสิโต กปฺเป พุทฺธเสฏฺฐํ ถวึ อหํ ทุคฺคตึ นาภิชานามิ ญาณตฺถวายิทํ ผลํ. กิเลสา ฌาปิตา มยฺหํ ฯเปฯ กตํ พุทฺธสฺส สาสนนฺ"ติ อรหตฺตํ ปน ปตฺวา อญฺญํ พฺยากโรนฺโตปิ เถโร อิมาเอว คาถา อภาสิ. ยสทตฺตตฺเถรคาถาวณฺณนา นิฏฺฐิตา. @เชิงอรรถ: ^๑ สี. ตทธิคเม ^๒ สี. วูปสมนเมว ^๓ ม. วิสุทฺโธติ @^๔ ขุ.อป. ๓๓/๒๔/๔๘ ญาณตฺถวิกตฺเถราปทาน (สฺยา) ^๕ ปาลิ. สพฺพญฺญูติ

อรรถกถาภาษาบาลีอักษรไทย เล่มที่ ๓๓ หน้า ๗๗. http://84000.org/tipitaka/pitaka_item/read_th.php?B=33&A=1754&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=33&A=1754&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=26&i=344 เนื้อความพระไตรปิฎกฉบับหลวง :- http://84000.org/tipitaka/read/r.php?B=26&A=6445 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=26&A=6573 The Pali Tipitaka in Roman Character :- http://84000.org/tipitaka/read/roman_read.php?B=26&A=6573 สารบัญพระไตรปิฎกเล่มที่ ๒๖ http://84000.org/tipitaka/read/?index_26