[143] 53 Ekaṃ samayaṃ bhagavā vesāliyaṃ viharati mahāvane
kūṭāgārasālāyaṃ . athakho mahāpajāpati gotamī yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ aṭṭhāsi ekamantaṃ
ṭhitā kho [2]- mahāpajāpati gotamī bhagavantaṃ etadavoca sādhu me bhante
bhagavā saṅkhittena dhammaṃ desetu yamahaṃ bhagavato dhammaṃ sutvā ekā
vūpakaṭṭhā appamattā ātāpinī pahitattā vihareyyanti . ye kho tvaṃ
gotami dhamme jāneyyāsi ime dhammā sarāgāya saṃvattanti no
virāgāya saṃyogāya saṃvattanti no visaṃyogāya ācayāya saṃvattanti no
apacayāya mahicchatāya saṃvattanti no appicchatāya asantuṭṭhiyā
saṃvattanti no santuṭṭhiyā saṅgaṇikāya saṃvattanti no pavivekāya kosajjāya
saṃvattanti no viriyārambhāya dubbharatāya saṃvattanti no subharatāyāti ekaṃsena
gotami dhāreyyāsi neso dhammo neso vinayo netaṃ satthusāsananti.
@Footnote: 1 Ma. suppavattīni . 2 Ma. sā.
{143.1} Ye ca kho tvaṃ gotami dhamme jāneyyāsi ime dhammā
virāgāya saṃvattanti no sarāgāya visaṃyogāya saṃvattanti no saṃyogāya
apacayāya saṃvattanti no ācayāya appicchatāya saṃvattanti no
mahicchatāya santuṭṭhiyā saṃvattanti no asantuṭṭhiyā pavivekāya
saṃvattanti no saṅgaṇikāya viriyārambhāya saṃvattanti no kosajjāya
subharatāya saṃvattanti no dubbharatāyāti ekaṃsena gotami dhāreyyāsi
eso dhammo eso vinayo etaṃ satthusāsananti.
[144] 54 Ekaṃ samayaṃ bhagavā koḷiyesu viharati kakkarapattaṃ
nāma koḷiyānaṃ nigamo . athakho dīghajāṇu koḷiyaputto yena
bhagavā tenupasaṅkami upasaṅkamatvā bhagavantaṃ abhivādetvā
ekamantaṃ nisīdi ekamantaṃ nisinno kho dīghajāṇu koḷiyaputto
bhagavantaṃ etadavoca mayaṃ bhante gihī kāmabhogī 1- puttasambādhasayanaṃ
ajjhāvasāma kāsikacandanaṃ paccanubhoma mālāgandhavilepanaṃ
dhārayāma jātarūparajataṃ sādiyāma tesaṃ no bhante bhagavā amhākaṃ
tathā dhammaṃ desetu ye amhākaṃ assu dhammā diṭṭhadhammahitāya
diṭṭhadhammasukhāya samparāyahitāya samparāyasukhāyāti.
{144.1} Cattārome byagghapajja dhammā kulaputtassa
diṭṭhadhammahitāya saṃvattanti diṭṭhadhammasukhāya . katame cattāro
uṭṭhānasampadā ārakkhasampadā kalyāṇamittatā samajīvitā.
@Footnote: 1 Ma. kāmabhogino.
{144.2} Katamā ca byagghapajja uṭṭhānasampadā idha byagghapajja
kulaputto yena kammuṭṭhānena 1- jīvikaṃ kappeti yadi kasiyā yadi vaṇijjāya
yadi gorakkhena yadi issatthena yadi rājaporisena yadi sippaññatarena
tattha dakkho hoti analaso tatrupāyāya vīmaṃsāya samannāgato
alaṃ kātuṃ alaṃ saṃvidhātuṃ ayaṃ vuccati byagghapajja uṭṭhānasampadā.
{144.3} Katamā ca byagghapajja ārakkhasampadā idha byagghapajja
kulaputtassa bhogā honti uṭṭhānaviriyādhigatā bāhābalaparicitā
sedāvakkhittā dhammikā dhammaladdhā te ārakkhena guttiyā sampādeti
kinti me ime bhoge neva rājāno hareyyuṃ na corā hareyyuṃ na aggi
ḍaheyya na udakaṃ vaheyya na appiyā dāyādā hareyyunti ayaṃ
vuccati byagghapajja ārakkhasampadā.
{144.4} Katamā ca byagghapajja kalyāṇamittatā idha byagghapajja
kulaputto yasmiṃ gāme vā nigame vā paṭivasati tatra ye te honti gahapati
vā gahapatiputtā vā daharā vā vuḍḍhasīlino vuḍḍhā vā vuḍḍhasīlino
saddhāsampannā sīlasampannā cāgasampannā paññāsampannā
tehi saddhiṃ santiṭṭhati sallapati sākacchaṃ samāpajjati yathārūpānaṃ
saddhāsampannānaṃ saddhāsampadaṃ anusikkhati yathārūpānaṃ sīlasampannānaṃ
sīlasampadaṃ anusikkhati yathārūpānaṃ cāgasampannānaṃ cāgasampadaṃ
anusikkhati yathārūpānaṃ paññāsampannānaṃ paññāsampadaṃ anusikkhati
ayaṃ vuccati byagghapajja kalyāṇamittatā.
@Footnote: 1 Ma. ammaṭṭhānena. evamuparipi.
{144.5} Katamā ca byagghapajja samajīvitā idha byagghapajja kulaputto
āyañca bhogānaṃ viditvā vayañca bhogānaṃ viditvā samajīvikaṃ kappeti
nāccogāḷhaṃ nātihīnaṃ evaṃ me āyo vayaṃ pariyādāya ṭhassati na
ca me vayo āyaṃ pariyādāya ṭhassatīti seyyathāpi byagghapajja
tulādhāro vā tulādhārantevāsī vā tulaṃ paggahetvā jānāti
ettakena vā onataṃ ettakena vā unnatanti evameva kho byagghapajja
kulaputto āyañca bhogānaṃ viditvā vayañca bhogānaṃ viditvā
samajīvikaṃ kappeti nāccogāḷhaṃ nātihīnaṃ evaṃ me āyo vayaṃ
pariyādāya ṭhassati na ca me vayo āyaṃ pariyādāya ṭhassatīti sacāyaṃ
byagghapajja kulaputto appāyo samāno uḷāraṃ jīvikaṃ kappeti tassa
bhavanti vattāro udumbarakhādīvāyaṃ 1- kulaputto bhoge khādatīti
sace panāyaṃ byagghapajja kulaputto mahāyo samāno kasiraṃ jīvikaṃ kappeti
tassa bhavanti vattāro addhamārakañcāyaṃ 2- kulaputto marissatīti
yato ca khoyaṃ byagghapajja kulaputto āyañca bhogānaṃ viditvā
vayañca bhogānaṃ viditvā samajīvikaṃ kappeti nāccogāḷhaṃ nātihīnaṃ
evaṃ me āyo vayaṃ pariyādāya ṭhassati na ca me vayo āyaṃ pariyādāya
ṭhassatīti ayaṃ vuccati byagghapajja samajīvitā.
{144.6} Evaṃ samuppannānaṃ byagghapajja bhogānaṃ cattāri apāyamukhāni
honti itthīdhutto surādhutto akkhadhutto pāpamitto pāpasahāyo
pāpasampavaṅko seyyathāpi byagghapajja mahato taḷākassa cattāri
@Footnote: 1 Ma. udumbarakhādikañcāyantaṃpi pāṭho. evamuparipi . 2 Sī. Yu. ajaddhumārikaṃ
@vāyaṃ. Ma. ajeṭṭhamaraṇaṃvāyaṃ.
Ceva āyamukhāni cattāri ca apāyamukhāni tassa puriso yāni ceva
āyamukhāni tāni pidaheyya yāni ca apāyamukhāni tāni vivareyya
devo ca na sammā dhāraṃ anuppaveccheyya evañhi tassa byagghapajja
mahato taḷākassa parihāniyeva pāṭikaṅkhā no vuḍḍhi evameva kho
byagghapajja evaṃ samuppannānaṃ bhogānaṃ cattāri apāyamukhāni honti
itthīdhutto surādhutto akkhadhutto pāpamitto pāpasahāyo pāpasampavaṅko.
{144.7} Evaṃ samuppannānaṃ byagghapajja bhogānaṃ cattāri
āyamukhāni honti naitthīdhutto nasurādhutto naakkhadhutto kalyāṇamitto
kalyāṇasahāyo kalyāṇasampavaṅko seyyathāpi byagghapajja mahato
taḷākassa cattāri ceva āyamukhāni cattāri ca apāyamukhāni tassa puriso
yāni ceva āyamukhāni tāni vivareyya yāni ca apāyamukhāni tāni
pidaheyya devo ca sammā dhāraṃ anuppaveccheyya evañhi tassa
byagghapajja mahato taḷākassa vuḍḍhiyeva pāṭikaṅkhā no parihāni
evameva kho byagghapajja evaṃ samuppannānaṃ bhogānaṃ cattāri āyamukhāni
honti naitthīdhutto nasurādhutto naakkhadhutto kalyāṇamitto
kalyāṇasahāyo kalyāṇasampavaṅko . ime kho byagghapajja
cattāro dhammā kulaputtassa diṭṭhadhammahitāya saṃvattanti
diṭṭhadhammasukhāya.
{144.8} Cattārome byagghapajja dhammā kulaputtassa samparāyahitāya
saṃvattanti samparāyasukhāya . katame cattāro saddhāsampadā
Sīlasampadā cāgasampadā paññāsampadā.
{144.9} Katamā ca byagghapajja saddhāsampadā idha byagghapajja
kulaputto saddho hoti saddahati tathāgatassa bodhiṃ itipi so bhagavā .pe.
Satthā devamanussānaṃ buddho bhagavāti ayaṃ vuccati byagghapajja
saddhāsampadā.
{144.10} Katamā ca byagghapajja sīlasampadā idha byagghapajja
kulaputto pāṇātipātā paṭivirato hoti .pe. Surāmerayamajjapamādaṭṭhānā
paṭivirato hoti ayaṃ vuccati byagghapajja sīlasampadā.
{144.11} Katamā ca byagghapajja cāgasampadā idha byagghapajja
kulaputto vigatamalamaccherena cetasā agāraṃ ajjhāvasati muttacāgo
payatapāṇi vossaggarato yācayogo dānasaṃvibhāgarato ayaṃ vuccati
byagghapajja cāgasampadā.
{144.12} Katamā ca byagghapajja paññāsampadā idha byagghapajja
kulaputto paññavā hoti udayatthagāminiyā paññāya samannāgato
ariyāya nibbedhikāya sammādukkhakkhayagāminiyā ayaṃ vuccati byagghapajja
paññāsampadā . ime kho byagghapajja cattāro dhammā
kulaputtassa samparāyahitāya saṃvattanti samparāyasukhāyāti.
Uṭṭhātā kammadheyyesu appamatto vidhānavā
samaṃ kappeti jīvitaṃ 1- sambhataṃ anurakkhati
saddho sīlena sampanno vadaññū vītamaccharo
@Footnote: 1 Ma. jīvikaṃ.
Niccaṃ maggaṃ visodheti sotthānaṃ samparāyikaṃ
iccete aṭṭha dhammā ca saddhassa gharamesino
akkhātā saccanāmena ubhayattha sukhāvahā
diṭṭhadhammahitatthāya samparāyasukhāya ca
evametaṃ gahaṭṭhānaṃ cāgo puññaṃ pavaḍḍhatīti.
[145] 55 Athakho ujjayo brāhmaṇo yena bhagavā tenupasaṅkami
upasaṅkamitvā bhagavatā saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi ekamantaṃ nisinno kho ujjayo brāhmaṇo
bhagavantaṃ etadavoca mayaṃ bho gotama pavāsaṃ gantukāmā tesanno
bhavaṃ gotamo amhākaṃ tathā dhammaṃ desetu ye amhākaṃ assu dhammā
diṭṭhadhammahitāya diṭṭhadhammasukhāya samparāyahitāya samparāyasukhāyāti.
{145.1} Cattārome brāhmaṇa dhammā kulaputtassa diṭṭhadhammahitāya
saṃvattanti diṭṭhadhammasukhāya . katame cattāro uṭṭhānasampadā
ārakkhasampadā kalyāṇamittatā samajīvitā.
{145.2} Katamā ca brāhmaṇa uṭṭhānasampadā idha brāhmaṇa
kulaputto yena kammuṭṭhānena jīvikaṃ kappeti yadi kasiyā yadi vaṇijjāya
yadi gorakkhena yadi issatthena yadi rājaporisena yadi sippaññatarena
tattha dakkho hoti analaso tatrupāyāya vīmaṃsāya samannāgato alaṃ
kātuṃ alaṃ saṃvidhātuṃ ayaṃ vuccati brāhmaṇa uṭṭhānasampadā.
Katamā ca brāhmaṇa ārakkhasampadā idha brāhmaṇa
Kulaputtassa bhogā honti uṭṭhānaviriyādhigatā bāhābalaparicitā
sedāvakkhittā dhammikā dhammaladdhā te ārakkhena guttiyā sampādeti
kinti me ime bhoge neva rājāno hareyyuṃ na corā hareyyuṃ
na aggi ḍaheyya na udakaṃ vaheyya na appiyā dāyādā hareyyunti
ayaṃ vuccati brāhmaṇa ārakkhasampadā.
{145.3} Katamā ca brāhmaṇa kalyāṇamittatā idha brāhmaṇa
kulaputto yasmiṃ gāme vā nigame vā paṭivasati tatra ye te honti gahapati
vā gahapatiputtā vā daharā vā vuḍḍhasīlino vuḍḍhā vā vuḍḍhasīlino
saddhāsampannā sīlasampannā cāgasampannā paññāsampannā tehi
saddhiṃ santiṭṭhati sallapati sākacchaṃ samāpajjati yathārūpānaṃ saddhāsampannānaṃ
saddhāsampadaṃ anusikkhati yathārūpānaṃ sīlasampannānaṃ sīlasampadaṃ
anusikkhati yathārūpānaṃ cāgasampannānaṃ cāgasampadaṃ anusikkhati
yathārūpānaṃ paññāsampannānaṃ paññāsampadaṃ anusikkhati ayaṃ vuccati
brāhmaṇa kalyāṇamittatā.
{145.4} Katamā ca brāhmaṇa samajīvitā idha brāhmaṇa kulaputto
āyañca bhogānaṃ viditvā vayañca bhogānaṃ viditvā samajīvikaṃ kappeti
nāccogāḷhaṃ nātihīnaṃ evaṃ me āyo vayaṃ pariyādāya ṭhassati na
ca me vayo āyaṃ pariyādāya ṭhassatīti seyyathāpi brāhmaṇa tulādhāro
vā tulādhārantevāsī vā tulaṃ paggahetvā jānāti ettakena vā
onataṃ ettakena vā unnatanti evameva kho brāhmaṇa kulaputto
Āyañca bhogānaṃ viditvā vayañca bhogānaṃ viditvā samajīvikaṃ kappeti
nāccogāḷhaṃ nātihīnaṃ evaṃ me āyo vayaṃ pariyādāya ṭhassati na
ca me vayo āyaṃ pariyādāya ṭhassatīti sacāyaṃ brāhmaṇa kulaputto
appāyo samāno uḷāraṃ jīvikaṃ kappeti tassa bhavanti vattāro
udumbarakhādīvāyaṃ kulaputto bhoge khādatīti sace panāyaṃ brāhmaṇa
kulaputto mahāyo samāno kasiraṃ jīvikaṃ kappeti tassa bhavanti vattāro
addhamārakañcāyaṃ kulaputto marissatīti yato ca khoyaṃ brāhmaṇa
kulaputto āyañca bhogānaṃ viditvā vayañca bhogānaṃ viditvā samajīvikaṃ
kappeti nāccogāḷhaṃ nātihīnaṃ evaṃ me āyo vayaṃ pariyādāya
ṭhassati na ca me vayo āyaṃ pariyādāya ṭhassatīti ayaṃ vuccati
brāhmaṇa samajīvitā.
{145.5} Evaṃ samuppannānaṃ brāhmaṇa bhogānaṃ cattāri apāyamukhāni
honti itthīdhutto surādhutto akkhadhutto pāpamitto pāpasahāyo
pāpasampavaṅko seyyathāpi brāhmaṇa mahato taḷākassa cattāri
ceva āyamukhāni cattāri ca apāyamukhāni tassa puriso yāni ceva āyamukhāni
tāni pidaheyya yāni ca apāyamukhāni tāni vivareyya devo ca na sammā
dhāraṃ anuppaveccheyya evañhi tassa brāhmaṇa mahato taḷākassa
parihāniyeva pāṭikaṅkhā no vuḍḍhi evameva kho brāhmaṇa evaṃ
samuppannānaṃ bhogānaṃ cattāri apāyamukhāni honti itthīdhutto
surādhutto akkhadhutto pāpamitto pāpasahāyo pāpasampavaṅko.
{145.6} Evaṃ samuppannānaṃ brāhmaṇa bhogānaṃ cattāri āyamukhāni honti
naitthīdhutto nasurādhutto naakkhadhutto kalyāṇamitto kalyāṇasahāyo
kalyāṇasampavaṅko seyyathāpi brāhmaṇa mahato taḷākassa cattāri ceva
āyamukhāni cattāri ca apāyamukhāni tassa puriso yāni ceva āyamukhāni
tāni vivareyya yāni ca apāyamukhāni tāni pidaheyya devo ca sammā
dhāraṃ anuppaveccheyya evañhi tassa brāhmaṇa mahato taḷākassa
vuḍḍhiyeva pāṭikaṅkhā no parihāni evameva kho brāhmaṇa
evaṃ samuppannānaṃ bhogānaṃ cattāri āyamukhāni honti naitthīdhutto
.pe. kalyāṇasampavaṅko . ime kho brāhmaṇa cattāro dhammā
kulaputtassa diṭṭhadhammahitāya saṃvattanti diṭṭhadhammasukhāya.
{145.7} Cattārome brāhmaṇa dhammā kulaputtassa samparāyahitāya
saṃvattanti samparāyasukhāya . katame cattāro saddhāsampadā sīlasampadā
cāgasampadā paññāsampadā.
{145.8} Katamā ca brāhmaṇa saddhāsampadā idha brāhmaṇa
kulaputto saddho hoti saddahati tathāgatassa bodhiṃ itipi so bhagavā
.pe. satthā devamanussānaṃ buddho bhagavāti ayaṃ vuccati brāhmaṇa
saddhāsampadā.
{145.9} Katamā ca brāhmaṇa sīlasampadā idha brāhmaṇa kulaputto
pāṇātipātā paṭivirato hoti .pe. surāmerayamajjapamādaṭṭhānā
paṭivirato hoti ayaṃ vuccati brāhmaṇa sīlasampadā.
{145.10} Katamā ca brāhmaṇa cāgasampadā idha brāhmaṇa kulaputto
vigatamalamaccherena cetasā agāraṃ ajjhāvasati muttacāgo payatapāṇi
vossaggarato yācayogo dānasaṃvibhāgarato ayaṃ vuccati brāhmaṇa cāgasampadā.
{145.11} Katamā ca brāhmaṇa paññāsampadā idha brāhmaṇa kulaputto
paññavā hoti .pe. sammādukkhakkhayagāminiyā ayaṃ vuccati brāhmaṇa
paññāsampadā . ime kho brāhmaṇa cattāro dhammā kulaputtassa
samparāyahitāya saṃvattanti samparāyasukhāyāti.
Uṭṭhātā kammadheyyesu appamatto vidhānavā
samaṃ kappeti jīvitaṃ sambhataṃ anurakkhati
saddho sīlena sampanno vadaññū vītamaccharo
niccaṃ maggaṃ visodheti sotthānaṃ samparāyikaṃ
iccete aṭṭha dhammā ca saddhassa gharamesino
akkhātā saccanāmena ubhayattha sukhāvahā
diṭṭhadhammahitatthāya samparāyasukhāya ca
evametaṃ gahaṭṭhānaṃ cāgo puññaṃ pavaḍḍhatīti.
[146] 56 Bhayanti bhikkhave kāmānametaṃ adhivacanaṃ dukkhanti bhikkhave
kāmānametaṃ adhivacanaṃ rogoti bhikkhave kāmānametaṃ adhivacanaṃ gaṇḍoti
bhikkhave kāmānametaṃ adhivacanaṃ sallanti bhikkhave kāmānametaṃ adhivacanaṃ
saṅgoti bhikkhave kāmānametaṃ adhivacanaṃ paṅkoti bhikkhave kāmānametaṃ
Adhivacanaṃ gabbhoti bhikkhave kāmānametaṃ adhivacanaṃ.
{146.1} Kasmā ca bhikkhave bhayanti kāmānametaṃ adhivacanaṃ yasmā ca
kāmarāgarattāyaṃ bhikkhave chandarāgavinibaddho diṭṭhadhammikāpi bhayā na
parimuccati samparāyikāpi bhayā na parimuccati tasmā bhayanti kāmānametaṃ
adhivacanaṃ kasmā ca bhikkhave dukkhanti .pe. rogoti gaṇḍoti sallanti
saṅgoti paṅkoti.
{146.2} Kasmā ca bhikkhave gabbhoti kāmānametaṃ adhivacanaṃ yasmā ca
kāmarāgarattāyaṃ bhikkhave chandarāgavinibaddho diṭṭhadhammikāpi gabbhā na
parimuccati samparāyikāpi gabbhā na parimuccati tasmā gabbhoti
kāmānametaṃ adhivacananti 1-.
Bhayaṃ dukkhañca rogo ca gaṇḍo sallañca saṅgo ca
paṅko gabbho ca ubhayaṃ
ete kāmā pavuccanti yattha satto puthujjano
otiṇṇo sātarūpena puna gabbhāya gacchati
yato ca bhikkhu ātāpī sampajaññaṃ na riñcati
so imaṃ palipathaṃ duggaṃ atikkamma tathāvidho
pajaṃ jātijarūpetaṃ phandamānaṃ avekkhatīti.
[147] 57 Aṭṭhahi bhikkhave dhammehi samannāgato bhikkhu
āhuneyyo hoti pāhuneyyo dakkhiṇeyyo añjalikaraṇīyo anuttaraṃ
puññakkhettaṃ lokassa . katamehi aṭṭhahi idha bhikkhave bhikkhu sīlavā
@Footnote: 1 Ma. itisaddo natthi.
Hoti .pe. samādāya sikkhati sikkhāpadesu bahussuto hoti .pe. Diṭṭhiyā
suppaṭividdhā kalyāṇamitto hoti kalyāṇasahāyo kalyāṇasampavaṅko
sammādiṭṭhiko hoti sammādassanena samannāgato catunnaṃ jhānānaṃ
ābhicetasikānaṃ diṭṭhadhammasukhavihārānaṃ nikāmalābhī hoti akicchalābhī
akasiralābhī anekavihitaṃ pubbenivāsaṃ anussarati seyyathīdaṃ ekampi
jātiṃ dvepi jātiyo .pe. iti sākāraṃ sauddesaṃ anekavihitaṃ
pubbenivāsaṃ anussarati dibbena cakkhunā visuddhena atikkantamānusakena
.pe. yathākammūpage satte pajānāti āsavānaṃ khayā .pe.
Sacchikatvā upasampajja viharati . imehi kho bhikkhave aṭṭhahi dhammehi
samannāgato bhikkhu āhuneyyo hoti .pe. anuttaraṃ puññakkhettaṃ
lokassāti.
[148] 58 Aṭṭhahi bhikkhave dhammehi samannāgato bhikkhu
āhuneyyo hoti .pe. anuttaraṃ puññakkhettaṃ lokassa . katamehi
aṭṭhahi idha bhikkhave bhikkhu sīlavā hoti .pe. samādāya sikkhati
sikkhāpadesu bahussuto hoti .pe. diṭṭhiyā suppaṭividdhā āraddhaviriyo
hoti thāmavā daḷhaparakkamo anikkhittadhuro kusalesu dhammesu
āraññako hoti pantasenāsano aratiratisaho hoti uppannaṃ
aratiṃ abhibhuyya 1- viharati bhayabheravasaho hoti uppannaṃ bhayabheravaṃ
abhibhuyya viharati catunnaṃ jhānānaṃ ābhicetasikānaṃ diṭṭhadhammasukhavihārānaṃ
nikāmalābhī hoti akicchalābhī akasiralābhī āsavānaṃ khayā .pe.
@Footnote: 1 Ma. āmeṇḍitaṃ.
Sacchikatvā upasampajja viharati . imehi kho bhikkhave aṭṭhahi dhammehi
samannāgato bhikkhu āhuneyyo hoti .pe. anuttaraṃ puññakkhettaṃ
lokassāti.
[149] 59 Aṭṭhime bhikkhave puggalā āhuneyyā pāhuneyyā
dakkhiṇeyyā añjalikaraṇīyā anuttaraṃ puññakkhettaṃ lokassa . katame
aṭṭha sotāpanno sotāpattiphalasacchikiriyāya paṭipanno sakadāgāmī
sakadāgāmiphalasacchikiriyāya paṭipanno anāgāmī anāgāmiphalasacchikiriyāya
paṭipanno arahā arahattāya paṭipanno . ime kho bhikkhave aṭṭha
puggalā āhuneyyā .pe. Anuttaraṃ puññakkhettaṃ lokassāti.
Cattāro ca paṭipannā cattāro ca phale ṭhitā
esa saṅgho ujubhūto paññāsīlasamāhito
yajamānānaṃ manussānaṃ puññapekkhānapāṇinaṃ
karotaṃ opadhikaṃ puññaṃ saṅghe dinnaṃ mahapphalanti.
[150] 60 Aṭṭhime bhikkhave puggalā āhuneyyā .pe. Anuttaraṃ
puññakkhettaṃ lokassa . katame aṭṭha sotāpanno sotāpattiphalasacchikiriyāya
paṭipanno sakadāgāmī sakadāgāmiphalasacchikiriyāya
paṭipanno anāgāmī anāgāmiphalasacchikiriyāya paṭipanno arahā
arahattāya paṭipanno . Ime kho bhikkhave aṭṭha puggalā āhuneyyā .pe.
Anuttaraṃ puññakkhettaṃ lokassāti.
Cattāro ca paṭipannā cattāro ca phale ṭhitā
Esa saṅgho samukkaṭṭho sattānaṃ aṭṭha puggalā
yajamānānaṃ manussānaṃ puññapekkhānapāṇinaṃ
karotaṃ opadhikaṃ puññaṃ ettha dinnaṃ mahapphalanti.
Sandhānavaggo paṭhamo.
Tassuddānaṃ
gotamī ovādaṃ saṅkhittaṃ dīghajāṇuñca 1- ujjayo
bhayā dve āhuneyyā [ca] dve ca aṭṭhapuggalāti.
-----------
Cālavaggo dutiyo
[151] 61 Aṭṭhime bhikkhave puggalā santo saṃvijjamānā lokasmiṃ.
Katame aṭṭha idha bhikkhave bhikkhuno pavivittassa viharato nirāyattavuttino
icchā uppajjati lābhāya so uṭṭhahati ghaṭati vāyamati lābhāya tassa
uṭṭhahato ghaṭato vāyamato lābhāya lābho nuppajjati so tena alābhena
socati kilamati paridevati urattāḷī 2- kandati sammohaṃ āpajjati
ayaṃ vuccati bhikkhave bhikkhu iccho viharati lābhāya uṭṭhahati ghaṭati
vāyamati lābhāya na ca lābhī soci ca paridevi 3- ca cuto ca saddhammā.
{151.1} Idha pana bhikkhave bhikkhuno pavivittassa viharato
nirāyattavuttino icchā uppajjati lābhāya so uṭṭhahati ghaṭati
vāyamati lābhāya tassa uṭṭhahato ghaṭato vāyamato lābhāya lābho
uppajjati so tena lābhena majjati pamajjati pamādamāpajjati
@Footnote: 1 Ma. ḍīghajāṇu . 2 Ma. urattāḷiṃ. evamuparipi . 3 Ma. socī ca paridevī ca.
@evamuparipi.
Ayaṃ vuccati bhikkhave bhikkhu iccho viharati lābhāya uṭṭhahati ghaṭati
vāyamati lābhāya lābhī ca madī pamādī ca cuto ca saddhammā.
{151.2} Idha pana bhikkhave bhikkhuno pavivittassa viharato nirāyatta-
vuttino icchā uppajjati lābhāya so na uṭṭhahati na ghaṭati na vāyamati
lābhāya tassa anuṭṭhahato aghaṭato avāyamato lābhāya lābho nuppajjati
so tena alābhena socati kilamati paridevati urattāḷī kandati sammohaṃ
āpajjati ayaṃ vuccati bhikkhave bhikkhu iccho viharati lābhāya na uṭṭhahati
na ghaṭati na vāyamati lābhāya na ca lābhī soci ca paridevi ca cuto ca
saddhammā.
{151.3} Idha pana bhikkhave bhikkhuno pavivittassa viharato
nirāyattavuttino icchā uppajjati lābhāya so na uṭṭhahati na
ghaṭati na vāyamati lābhāya tassa anuṭṭhahato aghaṭato avāyamato
lābhāya lābho uppajjati so tena lābhena majjati pamajjati
pamādamāpajjati ayaṃ vuccati bhikkhave bhikkhu iccho viharati lābhāya
na uṭṭhahati na ghaṭati na vāyamati lābhāya lābhī ca madī ca pamādī
ca cuto ca saddhammā.
{151.4} Idha pana bhikkhave bhikkhuno pavivittassa viharato
nirāyattavuttino icchā uppajjati lābhāya so uṭṭhahati
ghaṭati vāyamati lābhāya tassa uṭṭhahato ghaṭato vāyamato lābhāya
lābho nuppajjati so tena alābhena na socati na kilamati na
paridevati na urattāḷī kandati na sammohaṃ āpajjati ayaṃ vuccati
bhikkhave bhikkhu iccho viharati lābhāya uṭṭhahati ghaṭati vāyamati lābhāya
Na ca lābhī na ca soci na ca paridevi accuto ca saddhammā.
{151.5} Idha pana bhikkhave bhikkhuno pavivittassa viharato nirāyatta-
vuttino icchā uppajjati lābhāya so uṭṭhahati ghaṭati vāyamati
lābhāya tassa uṭṭhahato ghaṭato vāyamato lābhāya lābho uppajjati
so tena lābhena na majjati na pamajjati na pamādamāpajjati ayaṃ vuccati
bhikkhave bhikkhu iccho viharati lābhāya uṭṭhahati ghaṭati vāyati lābhāya
lābhī ca na ca madī na ca pamādī accuto ca saddhammā.
{151.6} Idha pana bhikkhave bhikkhuno pavivittassa viharato
nirāyattavuttino icchā uppajjati lābhāya so na uṭṭhahati na
ghaṭati na vāyamati lābhāya tassa anuṭṭhahato aghaṭato avāyamato
lābhāya lābho nuppajjati so tena alābhena na socati na kilamati
na paridevati na urattāḷī kandati na sammohaṃ āpajjati ayaṃ vuccati
bhikkhave bhikkhu iccho viharati lābhāya na uṭṭhahati na ghaṭati na vāyamati
lābhāya na ca lābhī na ca soci na ca paridevi accuto ca saddhammā.
{151.7} Idha pana bhikkhave bhikkhuno pavivittassa viharato
nirāyattavuttino icchā uppajjati lābhāya so na uṭṭhahati na ghaṭati
na vāyamati lābhāya tassa anuṭṭhahato aghaṭato avāyamato lābhāya
lābho uppajjati so tena lābhena na majjati na pamajjati na pamādamāpajjati
ayaṃ vuccati bhikkhave bhikkhu iccho viharati lābhāya na uṭṭhahati na ghaṭati na
vāyamati lābhāya lābhī ca na ca madī na ca pamādī accuto ca
Saddhammā . ime kho bhikkhave aṭṭha puggalā santo saṃvijjamānā
lokasminti.
[152] 62 Chahi bhikkhave dhammehi samannāgato bhikkhu alaṃ
attano alaṃ paresaṃ . katamehi chahi idha bhikkhave bhikkhu khippanisanti
ca hoti kusalesu dhammesu sutānañca dhammānaṃ dhārakajātiko 1- hoti
dhatānañca dhammānaṃ atthupaparikkhī hoti atthamaññāya dhammamaññāya
dhammānudhammapaṭipanno ca hoti kalyāṇavāco ca hoti kalyāṇavākkaraṇo
poriyā vācāya samannāgato vissaṭṭhāya anelagaḷāya atthassa
viññāpaniyā sandassako ca hoti samādapako samuttejako sampahaṃsako
sabrahmacārīnaṃ . imehi kho bhikkhave chahi dhammehi samannāgato bhikkhu alaṃ
attano alaṃ paresaṃ.
The Pali Tipitaka in Roman Character Volume 23 page 288-305.
https://84000.org/tipitaka/pitaka_item/roman_item.php?book=23&item=143&items=10
Classified by [Item Number] :-
http://84000.org/tipitaka/pitaka_item/roman_item.php?book=23&item=143&items=10&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=23&item=143&items=10
Compare with The Royal Version of Thai Tipitaka :-
https://84000.org/tipitaka/read/byitem.php?book=23&item=143&items=10
Study Atthakatha :-
https://84000.org/tipitaka/attha/attha.php?b=23&i=143
Contents of The Tipitaka Volume 23
https://84000.org/tipitaka/read/?index_23
https://84000.org/tipitaka/english/?index_23
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
