paliTIPITAKA Volume 17 - Sutta Pitaka 9

Sārīputtasaṃyuttaṃ [508] Ekaṃ samayaṃ āyasmā sārīputto sāvatthiyaṃ viharati jetavane anāthapiṇḍikassa ārāme . atha kho āyasmā sārīputto pubbaṇhasamayaṃ nivāsetvā pattacīvaramādāya sāvatthiṃ ^1- piṇḍāya pāvisi sāvatthiyaṃ piṇḍāya caritvā pacchābhattaṃ piṇḍapātapaṭikkanto yena andhavanaṃ tenupasaṅkami divāvihārāya andhavanaṃ ajjhogāhetvā aññatarasmiṃ rukkhamūle divāvihāraṃ ^2- nisīdi. {508.1} Atha kho āyasmā sārīputto sāyaṇhasamayaṃ paṭisallānā vuṭṭhito yena jetavanaṃ anāthapiṇḍikassa ārāmo tenupasaṅkami . Addasā kho āyasmā ānando āyasmantaṃ sārīputtaṃ dūratova āgacchantaṃ disvāna āyasmantaṃ sārīputtaṃ etadavoca vippasannāni kho te āvuso sārīputta indriyāni parisuddho mukhavaṇṇo pariyodāto katamenāyasmā sārīputto ajja vihārena vihāsīti. {508.2} Idhāhaṃ āvuso vivicceva kāmehi vivicca akusalehi dhammehi savitakkaṃ savicāraṃ vivekajaṃ pītisukhaṃ paṭhamaṃ jhānaṃ upasampajja viharāmi. Tassa mayhaṃ āvuso na evaṃ hoti ahaṃ paṭhamaṃ jhānaṃ samāpajjāmīti vā ahaṃ paṭhamaṃ jhānaṃ samāpannoti vā ahaṃ paṭhamā jhānā vuṭṭhitoti vāti . Tathā hi panāyasmato sārīputtassa dīgharattaṃ ahaṅkāramamaṅkāramānānusayā susamūhatā tasmā āyasmato sārīputtassa na evaṃ hoti @Footnote: ¹ Po. sāvatthiyaṃ . ² Po. divāvihāratthāya. Ahaṃ paṭhamaṃ jhānaṃ samāpajjāmīti vā ahaṃ paṭhamaṃ jhānaṃ samāpannoti vā ahaṃ paṭhamā jhānā vuṭṭhitoti vāti. [509] Sāvatthī . addasā kho āyasmā ānando .pe. Āyasmantaṃ sārīputtaṃ etadavoca vippasannāni kho te āvuso sārīputta indriyāni parisuddho mukhavaṇṇo pariyodāto katamenāyasmā sārīputto ajja vihārena vihāsīti. {509.1} Idhāhaṃ āvuso vitakkavicārānaṃ vūpasamā ajjhattaṃ sampasādanaṃ cetaso ekodibhāvaṃ avitakkaṃ avicāraṃ samādhijaṃ pītisukhaṃ dutiyaṃ jhānaṃ upasampajja viharāmi . tassa mayhaṃ āvuso na evaṃ hoti ahaṃ dutiyaṃ jhānaṃ samāpajjāmīti vā ahaṃ dutiyaṃ jhānaṃ samāpannoti vā ahaṃ dutiyā ^1- jhānā vuṭṭhitoti vāti. Tathā hi panāyasmato sārīputtassa dīgharattaṃ ahaṅkāramamaṅkāramānānusayā susamūhatā tasmā āyasmato sārīputtassa na evaṃ hoti ahaṃ dutiyaṃ jhānaṃ samāpajjāmīti vā ahaṃ dutiyaṃ jhānaṃ samāpannoti vā ahaṃ dutiyā jhānā vuṭṭhitoti vāti. [510] Sāvatthī . addasā kho āyasmā ānando .pe. Vippasannāni kho te āvuso sārīputta indriyāni parisuddho mukhavaṇṇo pariyodāto katamenāyasmā sārīputto ajja vihārena vihāsīti . idhāhaṃ āvuso pītiyā ca virāgā upekkhako ca viharāmi sato ca sampajāno sukhañca kāyena paṭisaṃvedemi yantaṃ ariyā ācikkhanti upekkhako satimā sukhavihārīti tatiyaṃ jhānaṃ @Footnote: ¹ Po. Yu. dutiyajjhānā. Upasampajja viharāmi . tassa mayhaṃ āvuso na evaṃ hoti ahaṃ tatiyaṃ jhānaṃ samāpajjāmīti vā ahaṃ tatiyaṃ jhānaṃ samāpannoti vā ahaṃ tatiyā jhānā vuṭṭhitoti vāti . tathā hi panāyasmato sārīputtassa dīgharattaṃ ahaṅkāramamaṅkāramānānusayā susamūhatā tasmā āyasmato sārīputtassa na evaṃ hoti ahaṃ tatiyaṃ jhānaṃ samāpajjāmīti vā ahaṃ tatiyaṃ jhānaṃ samāpannoti vā ahaṃ tatiyā jhānā vuṭṭhitoti vāti. [511] Sāvatthī . addasā kho āyasmā ānando .pe. Vippasannāni kho te āvuso sārīputta indriyāni parisuddho mukhavaṇṇo pariyodāto katamenāyasmā sārīputto ajja vihārena vihāsīti . idhāhaṃ āvuso sukhassa ca pahānā dukkhassa ca pahānā pubbeva somanassadomanassānaṃ atthaṅgamā adukkhamasukhaṃ upekkhāsatipārisuddhiṃ catutthaṃ jhānaṃ upasampajja viharāmi . tassa mayhaṃ āvuso na evaṃ hoti ahaṃ catutthaṃ jhānaṃ samāpajjāmīti vā ahaṃ catutthaṃ jhānaṃ samāpannoti vā ahaṃ catutthā jhānā vuṭṭhitoti vāti . tathā hi panāyasmato sārīputtassa dīgharattaṃ ahaṅkāra- mamaṅkāramānānusayā susamūhatā tasmā āyasmato sārīputtassa na evaṃ hoti ahaṃ catutthaṃ jhānaṃ samāpajjāmīti vā ahaṃ catutthaṃ jhānaṃ samāpannoti vā ahaṃ catutthā jhānā vuṭṭhitoti vāti. [512] Sāvatthī . addasā kho āyasmā ānando .pe. Idhāhaṃ āvuso sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja viharāmi .pe. Vuṭṭhitoti vāti. [513] Sāvatthī . addasā kho āyasmā ānando .pe. Idhāhaṃ āvuso sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharāmi .pe. Vuṭṭhitoti vāti. [514] Sāvatthī . atha kho āyasmā sārīputto .pe. Idhāhaṃ āvuso sabbaso viññāṇañcāyatanaṃ samatikkamma natthi kiñcīti ākiñcaññāyatanaṃ upasampajja viharāmi .pe. Vuṭṭhitoti vāti. [515] Sāvatthī . atha kho āyasmā sārīputto .pe. Idhāhaṃ āvuso ākiñcaññāyatanaṃ samatikkamma nevasaññānāsaññāyatanaṃ upasampajja viharāmi .pe. Vuṭṭhitoti vāti. [516] Ekaṃ samayaṃ āyasmā sārīputto sāvatthiyaṃ viharati jetavane anāthapiṇḍikassa ārāme . atha kho āyasmā sārīputto pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi sāvatthiyaṃ piṇḍāya caritvā pacchābhattaṃ piṇḍapātapaṭikkanto yena andhavanaṃ tenupasaṅkami divāvihārāya andhavanaṃ ajjhogāhetvā aññatarasmiṃ rukkhamūle divāvihāraṃ nisīdi . atha kho āyasmā Sārīputto sāyaṇhasamayaṃ paṭisallānā vuṭṭhito yena jetavanaṃ anāthapiṇḍikassa ārāmo tenupasaṅkami . addasā kho āyasmā ānando āyasmantaṃ sārīputtaṃ dūratova āgacchantaṃ disvāna āyasmantaṃ sārīputtaṃ etadavoca vippasannāni kho te āvuso sārīputta indriyāni parisuddho mukhavaṇṇo pariyodāto katamenāyasmā sārīputto ajja vihārena vihāsīti . idhāhaṃ āvuso sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharāmi . tassa mayhaṃ āvuso na evaṃ hoti ahaṃ saññāvedayitanirodhaṃ samāpajjāmīti vā ahaṃ saññāvedayitanirodhaṃ samāpannoti vā ahaṃ saññāvedayitanirodhā vuṭṭhitoti vāti . tathā hi panāyasmato sārīputtassa dīgharattaṃ ahaṅkāramamaṅkāramānānusayā susamūhatā tasmā āyasmato sārīputtassa na evaṃ hoti ahaṃ saññāvedayitanirodhaṃ samāpajjāmīti vā ahaṃ saññāvedayitanirodhaṃ samāpannoti vā ahaṃ saññāvedayitanirodhā vuṭṭhitoti vāti. [517] Ekaṃ samayaṃ āyasmā sārīputto rājagahe viharati veḷuvane kalandakanivāpe . atha kho āyasmā sārīputto pubbaṇhasamayaṃ nivāsetvā pattacīvaramādāya rājagahaṃ ^1- piṇḍāya pāvisi rājagahe sapadānaṃ piṇḍāya caritvā taṃ piṇḍapātaṃ aññataraṃ kuḍḍamūlaṃ ^2- nissāya bhuñjati ^3- . atha kho sūcimukhī ^4- paribbājikā yenāyasmā sārīputto tenupasaṅkami upasaṅkamitvā āyasmantaṃ sārīputtaṃ @Footnote: ¹ Ma. Yu. rājagahe . ² Po. kuṭamūlaṃ. Yu. kuḍḍaṃ . ³ Ma. Yu. paribhuñjati. @⁴ Po. Ma. Yu. sucimukhī. Etadavoca kiṃ nu kho samaṇa adhomukho bhuñjasīti . na khvāhaṃ bhagini adhomukho bhuñjāmīti . tenahi samaṇa ubbhamukho bhuñjasīti . Na khvāhaṃ bhagini ubbhamukho bhuñjāmīti . tenahi samaṇa disāmukho bhuñjasīti . na khvāhaṃ bhagini disāmukho bhuñjāmīti . tenahi samaṇa vidisāmukho bhuñjasīti . na khvāhaṃ bhagini vidisāmukho bhuñjāmīti. {517.1} Kiṃ nu samaṇa adhomukho bhuñjasīti iti puṭṭho samāno na khvāhaṃ bhagini adhomukho bhuñjāmīti vadesi tenahi samaṇa ubbhamukho bhuñjasīti iti puṭṭho samāno na khvāhaṃ bhagini ubbhamukho bhuñjāmīti vadesi tenahi samaṇa disāmukho bhuñjasīti iti puṭṭho samāno na khvāhaṃ bhagini disāmukho bhuñjāmīti vadesi tenahi samaṇa vidisāmukho bhuñjasīti iti puṭṭho samāno na khvāhaṃ bhagini vidisāmukho bhuñjāmīti vadesi {517.2} kathañcarahi ^1- samaṇa bhuñjasīti . ye hi keci bhagini samaṇabrāhmaṇā vatthuvijjātiracchānavijjāya micchājīvena jīvikaṃ ^2- kappenti ime vuccanti bhagini samaṇabrāhmaṇā adhomukhā bhuñjanti ^3-. Ye hi keci bhagini samaṇabrāhmaṇā nakkhattavijjātiracchānavijjāya micchājīvena jīvikaṃ kappenti ime vuccanti bhagini samaṇabrāhmaṇā ubbhamukhā bhuñjanti . ye hi keci bhagini samaṇabrāhmaṇā dūteyyapahiṇagamanānuyogā ^4- micchājīvena jīvikaṃ kappenti ime vuccanti bhagini samaṇabrāhmaṇā disāmukhā bhuñjanti . ye hi keci bhagini samaṇabrāhmaṇā aṅgavijjātiracchānavijjāya @Footnote: ¹ Po. kathañcarasi . ² Po. jīvitaṃ . ³ Ma. Yu. bhuñjantīti . ⁴ Ma. ...nuyogāya. Micchājīvena jīvikaṃ kappenti ime vuccanti bhagini samaṇabrāhmaṇā vidisāmukhā bhuñjanti. {517.3} So khvāhaṃ bhagini na vatthuvijjātiracchānavijjāya micchājīvena jīvikaṃ kappemi na nakkhattavijjātiracchānavijjāya micchājīvena jīvikaṃ kappemi na dūteyyapahiṇagamanānuyogā micchājīvena jīvikaṃ kappemi na aṅgavijjātiracchānavijjāya micchājīvena jīvikaṃ kappemi dhammena bhikkhaṃ pariyesāmi dhammena bhikkhaṃ pariyesitvā bhuñjāmīti . atha kho sūcimukhī paribbājikā rājagahe rathiyāya rathiyaṃ siṅghāṭakena siṅghāṭakaṃ upasaṅkamitvā evamārocesi dhammikaṃ samaṇā sakyaputtiyā āhāraṃ āhārenti anavajjaṃ samaṇā sakyaputtiyā āhāraṃ āhārenti detha samaṇānaṃ sakyaputtiyānaṃ piṇḍanti. Sārīputtasaṃyuttaṃ. Tassuddānaṃ vivekaṃ avitakkaṃ ^1- ca pīti upekkhācatutthakaṃ ākāsañceva viññāṇaṃ ākiñcanevasaññinā ^2- nirodho ^3- navamo vutto dasamaṃ sūcimukhi cāti. ---------- @Footnote: ¹ Ma. vivekajaṃ avitakkaṃ . ² Yu. ākiñcaññeva. Ma. ākiñcamevasaññinā. @³ Po. nirodhaṃ. Yu. nirodhenagahe vutto.

The Pali Tipitaka in Roman Character Volume 17 page 291-297. http://84000.org/tipitaka/pitaka_item/roman_item_s.php?book=17&item=508&items=10 Classified by [Item Number] :- http://84000.org/tipitaka/pitaka_item/roman_item_s.php?book=17&item=508&items=10&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=17&item=508&items=10 Compare with The Royal Version of Thai Tipitaka :- http://84000.org/tipitaka/read/byitem_s.php?book=17&item=508&items=10 Study Atthakatha :- http://84000.org/tipitaka/attha/attha.php?b=17&i=508 The Pali Atthakatha in Thai :- http://84000.org/tipitaka/atthapali/read_th.php?B=12&A=8341 The Pali Atthakatha in Roman :- http://84000.org/tipitaka/atthapali/read_rm.php?B=12&A=8341 Contents of The Tipitaka Volume 17 http://84000.org/tipitaka/read/?index_17