บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
TIPITAKA Volume 18 : PALI ROMAN Sutta Pitaka Vol 10 : Sutta. Saṃ. Saḷa.
[219] Yaṃ bhikkhave na tumhākaṃ taṃ pajahatha taṃ vo pahīnaṃ hitāya sukhāya bhavissati . kiñca bhikkhave na tumhākaṃ . cakkhuṃ bhikkhave na tumhākaṃ taṃ pajahatha taṃ vo pahīnaṃ hitāya sukhāya @Footnote: 1 Ma. bhavarāgānusārībhi . 2 Ma. susambudho . 3 Ma. sambuddhumarahati. Bhavissati .pe. jivhā na tumhākaṃ taṃ pajahatha . sā vo pahīnā hitāya sukhāya bhavissati .pe. mano na tumhākaṃ taṃ pajahatha so vo pahīno hitāya sukhāya bhavissati . seyyathāpi bhikkhave yaṃ imasmiṃ jetavane tiṇakaṭṭhasākhāpalāsaṃ taṃ jano hareyya vā ḍaheyya vā yathāpaccayaṃ vā kareyya api nu tumhākaṃ evamassa amhe jano harati vā ḍahati vā yathāpaccayaṃ vā karotīti . no hetaṃ bhante . taṃ kissa hetu . na hi no etaṃ bhante attā vā attaniyaṃ vāti . evameva kho bhikkhave cakkhuṃ na tumhākaṃ taṃ pajahatha taṃ vo pahīnaṃ hitāya sukhāya bhavissati .pe. jivhā na tumhākaṃ taṃ pajahatha sā vo pahīnā hitāya sukhāya bhavissati .pe. mano na tumhākaṃ taṃ pajahatha so vo pahīno hitāya sukhāya bhavissatīti. Pañcamaṃ. [220] Yaṃ bhikkhave na tumhākaṃ taṃ pajahatha taṃ vo pahīnaṃ hitāya sukhāya bhavissati . kiñca bhikkhave na tumhākaṃ . rūpā bhikkhave na tumhākaṃ te pajahatha te vo pahīnā hitāya sukhāya bhavissanti . saddā gandhā rasā phoṭṭhabbā dhammā na tumhākaṃ te pahajatha te vo pahīnā hitāya sukhāya bhavissanti . Seyyathāpi bhikkhave yaṃ imasmiṃ jetavane tiṇakaṭṭhasākhāpalāsaṃ .pe. Evameva kho bhikkhave rūpā na tumhākaṃ te pajahatha te vo pahīnā hitāya sukhāya bhavissanti . saddā gandhā rasā phoṭṭhabbā Dhammā na tumhākaṃ te pajahatha te vo pahīnā hitāya sukhāya bhavissantīti. Chaṭṭhaṃ. [221] Cakkhuṃ bhikkhave aniccaṃ yopi hetu yopi paccayo cakkhussa uppādāya sopi anicco aniccasambhūtaṃ bhikkhave cakkhu kuto niccaṃ bhavissati .pe. jivhā aniccā yopi hetu yopi paccayo jivhāya uppādāya sopi anicco aniccasambhūtā bhikkhave jivhā kuto niccā bhavissati .pe. mano anicco yopi bhikkhave hetu yopi paccayo manassa uppādāya sopi anicco aniccasambhūto bhikkhave mano kuto nicco bhavissatīti . evaṃ passaṃ bhikkhave sutavā ariyasāvako cakkhusmiṃpi nibbindati .pe. jivhāyapi nibbindati .pe. manasmiṃpi nibbindati nibbindaṃ virajjati virāgā vimuccati . Vimuttasmiṃ vimuttamiti ñāṇaṃ hoti . khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānātīti. Sattamaṃ. [222] Cakkhuṃ bhikkhave dukkhaṃ yopi hetu yopi paccayo cakkhussa uppādāya sopi dukkho dukkhasambhūtaṃ bhikkhave cakkhuṃ kuto sukhaṃ bhavissati .pe. jivhā dukkhā yopi hetu yopi paccayo jivhāya uppādāya sopi dukkho dukkhasambhūtā bhikkhave jivhā kuto sukhā bhavissati .pe. mano dukkho yopi hetu yopi paccayo manassa uppādāya sopi dukkho dukkhasambhūto bhikkhave mano kuto sukho bhavissati. Evaṃ passaṃ .pe. Nāparaṃ itthattāyāti pajānātīti. [223] Cakkhuṃ bhikkhave anattā yopi hetu yopi paccayo cakkhussa uppādāya sopi anattā anattasambhūtaṃ bhikkhave cakkhu 1- kuto attā bhavissati .pe. jivhā anattā yopi hetu yopi paccayo jivhāya uppādāya sopi anattā anattasambhūtā bhikkhave jivhā kuto attā bhavissati .pe. mano anattā yopi hetu yopi paccayo manassa uppādāya sopi anattā anattasambhūto bhikkhave mano kuto attā bhavissati . evaṃ passaṃ .pe. Nāparaṃ itthattāyāti pajānātīti. Aṭṭhamaṃ. [224] Rūpā bhikkhave aniccā yopi hetu yopi paccayo rūpānaṃ uppādāya .pe. sopi anicco aniccasambhūtā bhikkhave rūpā kuto niccā bhavissanti . saddā gandhā rasā phoṭṭhabbā dhammā aniccā yopi hetu yopi paccayo dhammānaṃ uppādāya sopi anicco aniccasambhūtā bhikkhave dhammā kuto niccā bhavissanti . Evaṃ passaṃ .pe. Nāparaṃ itthattāyāti pajānātīti. [225] Rūpā bhikkhave dukkhā yopi hetu yopi paccayo rūpānaṃ uppādāya sopi dukkho dukkhasambhūtā bhikkhave rūpā kuto sukhā bhavissanti . saddā gandhā rasā phoṭṭhabbā dhammā dukkhā yopi hetu yopi paccayo dhammānaṃ uppādāya sopi dukkho dukkhasambhūtā bhikkhave dhammā kuto sukhā bhavissanti . Evaṃ passaṃ .pe. Nāparaṃ itthattāyāti pajānātīti. Navamaṃ. @Footnote: 1 Yu. sabbattha cakkhuṃ. [226] Rūpā bhikkhave anattā yopi hetu yopi paccayo rūpānaṃ uppādāya so anattā anattasambhūtā bhikkhave rūpā kuto attā bhavissanti . saddā gandhā rasā phoṭṭhabbā dhammā anattā yopi hetu yopi paccayo dhammānaṃ uppādāya sopi anattā anattasambhūtā bhikkhave dhammā kuto attā bhavissanti . Evaṃ passaṃ bhikkhave sutavā ariyasāvako rūpesu nibbindati saddesu gandhesu rasesu phoṭṭhabbesu dhammesu nibbindati nibbindaṃ virajjati virāgā vimuccati . vimuttasmiṃ vimuttamiti ñāṇaṃ hoti . Khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti pajānātīti. Dasamaṃ. Devadahavaggo catuttho. Tassuddānaṃ devadahakhaṇopaggayha 1- aggayha dve honti manasinā 2- hetunāpi tayo vuttā duve ajjhattabāhirāti. -------- @Footnote: 1 Ma. devadaho khaṇo rūpā dve na tumhākameva ca. Yu. devadahakhaṇo saṅgayha. @2 Yu. palāsinā.The Pali Tipitaka in Roman Character Volume 18 page 161-165. http://84000.org/tipitaka/pitaka_item/roman_item_s.php?book=18&item=219&items=8 Classified by [Item Number] :- http://84000.org/tipitaka/pitaka_item/roman_item_s.php?book=18&item=219&items=8&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=18&item=219&items=8 Compare with The Royal Version of Thai Tipitaka :- http://84000.org/tipitaka/read/byitem_s.php?book=18&item=219&items=8 Study Atthakatha :- http://84000.org/tipitaka/attha/attha.php?b=18&i=219 Contents of The Tipitaka Volume 18 http://84000.org/tipitaka/read/?index_18
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]