[834] Ye bhikkhave anukampeyyātha ye ca sotabbaṃ maññeyyuṃ
mittā vā amaccā vā ñātī vā sālohitā vā te vo
bhikkhave catunnaṃ satipaṭṭhānānaṃ bhāvanāya samādapetabbā nivesetabbā
patiṭṭhāpetabbāti . katamesaṃ catunnaṃ . idha bhikkhave bhikkhu kāye
kāyānupassī viharati ātāpī sampajāno satimā vineyya loke
abhijjhādomanassaṃ . vedanāsu citte dhammesu dhammānupassī viharati
ātāpī sampajāno satimā vineyya loke abhijjhādomanassaṃ .
Ye bhikkhave anukampeyyātha ye ca sotabbaṃ maññeyyuṃ mittā
Vā amaccā vā ñātī vā sālohitā vā te vo bhikkhave imesaṃ
catunnaṃ satipaṭṭhānānaṃ bhāvanāya samādapetabbā nivesetabbā
patiṭṭhāpetabbāti.
[835] Tisso imā bhikkhave vedanā . katamā tisso .
Sukhā vedanā dukkhā vedanā adukkhamasukhā vedanā . imā
kho bhikkhave tisso vedanā.
[836] Imāsaṃ kho bhikkhave tissannaṃ vedanānaṃ pariññāya
cattāro satipaṭṭhānā bhāvetabbā . katame cattāro . idha
bhikkhave bhikkhu kāye kāyānupassī viharati ātāpī sampajāno satimā
vineyya loke abhijjhādomanassaṃ . vedanāsu citte dhammesu
dhammānupassī viharati ātāpī sampajāno satimā vineyya loke
abhijjhādomanassaṃ . imāsaṃ kho bhikkhave tissannaṃ vedanānaṃ pariññāya
ime cattāro satipaṭṭhānā bhāvetabbāti.
[837] Tayome bhikkhave āsavā . katame tayo. Kāmāsavo
bhavāsavo avijjāsavo. Ime kho bhikkhave tayo āsavā.
[838] Imesaṃ kho bhikkhave tiṇṇannaṃ āsavānaṃ pahānāya
cattāro satipaṭṭhānā bhāvetabbā . katame cattāro . idha
bhikkhave bhikkhu kāye kāyānupassī viharati ātāpī sampajāno
satimā vineyya loke abhijjhādomanassaṃ . vedanāsu citte
dhammesu dhammānupassī viharati ātāpī sampajāno satimā vineyya
Loke abhijjhādomanassaṃ . imesaṃ kho bhikkhave tiṇṇannaṃ āsavānaṃ
pahānāya ime cattāro satipaṭṭhānā bhāvetabbāti.
Amatavaggo pañcamo.
Tassuddānaṃ
amataṃ samudayo maggo sato 1- kusalarāsi ca
pāṭimokkhaṃ duccaritaṃ mittā 2- vedanā āsavena cāti.
----------
@Footnote: 1 Ma. sati. 2 Ma. mittavedanā.
Satipaṭṭhānasaṃyuttassa gaṅgādipeyyālo chaṭṭho
[839] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā . evameva kho bhikkhave bhikkhu cattāro satipaṭṭhāne
bhāvento cattāro satipaṭṭhāne bahulīkaronto nibbānaninno hoti
nibbānapoṇo nibbānapabbhāro.
[840] Kathañca bhikkhave bhikkhu cattāro satipaṭṭhāne bhāvento
cattāro satipaṭṭhāne bahulīkaronto nibbānaninno hoti nibbānapoṇo
nibbānapabbhāro . idha bhikkhave bhikkhu kāye kāyānupassī viharati
ātāpī sampajāno satimā vineyya loke abhijjhādomanassaṃ .
Vedanāsu citte dhammesu dhammānupassī viharati ātāpī sampajāno
satimā vineyya loke abhijjhādomanassaṃ . evaṃ kho bhikkhave bhikkhu
cattāro satipaṭṭhāne bhāvento cattāro satipaṭṭhāne bahulīkaronto
nibbānaninno hoti nibbānapoṇo nibbānapabbhāroti .pe.
[841] Pañcimāni bhikkhave uddhambhāgiyāni saññojanāni .
Katamāni pañca . rūparāgo arūparāgo māno uddhaccaṃ avijjā .
Imāni kho bhikkhave pañcuddhambhāgiyāni saññojanāni.
[842] Imesaṃ kho bhikkhave pañcannaṃ uddhambhāgiyānaṃ
saññojanānaṃ abhiññāya pariññāya parikkhayāya pahānāya cattāro
satipaṭṭhānā bhāvetabbā . katame cattāro . idha bhikkhave bhikkhu
Kāye kāyānupassī viharati ātāpī sampajāno satimā vineyya
loke abhijjhādomanassaṃ . vedanāsu citte dhammesu dhammānupassī
viharati ātāpī sampajāno satimā vineyya loke abhijjhādomanassaṃ .
Imesaṃ kho bhikkhave pañcannaṃ uddhambhāgiyānaṃ saññojanānaṃ abhiññāya
pariññāya parikkhayāya pahānāya ime cattāro satipaṭṭhānā
bhāvetabbāti.
(yathā maggasaṃyuttaṃ vitthāritaṃ evaṃ satipaṭṭhānasaṃyuttaṃ vitthāretabbaṃ).
Cha pācīnato ninnā cha ninnā ca samuddato
ete dve cha dvādasa honti vaggo tena pavuccati 1-.
Satipaṭṭhānasaṃyuttaṃ niṭṭhitaṃ.
--------
@Footnote: 1 Ma. itisaddo atthi.
The Pali Tipitaka in Roman Character Volume 19 page 251-255.
http://84000.org/tipitaka/pitaka_item/roman_item_s.php?book=19&item=834&items=9
Classified by [Item Number] :-
http://84000.org/tipitaka/pitaka_item/roman_item_s.php?book=19&item=834&items=9&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=19&item=834&items=9
Compare with The Royal Version of Thai Tipitaka :-
http://84000.org/tipitaka/read/byitem_s.php?book=19&item=834&items=9
Study Atthakatha :-
http://84000.org/tipitaka/attha/attha.php?b=19&i=834
Contents of The Tipitaka Volume 19
http://84000.org/tipitaka/read/?index_19
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
