paliTIPITAKA Volume 20 - Sutta Pitaka 12

Suttantapiṭake aṅguttaranikāyassa paṭhamo bhāgo ----- ekanipāto namo tassa bhagavato arahato sammāsambuddhassa ekadhammādipāli [1] Evamme sutaṃ . Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi bhikkhavoti. Bhadanteti te bhikkhū bhagavato paccassosuṃ. Bhagavā etadavoca. [2] Nāhaṃ bhikkhave aññaṃ ekarūpaṃpi samanupassāmi yaṃ evaṃ purisassa cittaṃ pariyādāya tiṭṭhati yathayidaṃ bhikkhave itthirūpaṃ itthirūpaṃ bhikkhave purisassa cittaṃ pariyādāya tiṭṭhatīti. [3] Nāhaṃ bhikkhave aññaṃ ekasaddaṃpi samanupassāmi yaṃ evaṃ purisassa cittaṃ pariyādāya tiṭṭhati yathayidaṃ bhikkhave itthisaddo itthisaddo bhikkhave purisassa cittaṃ pariyādāya tiṭṭhatīti. [4] Nāhaṃ bhikkhave aññaṃ ekagandhaṃpi samanupassāmi yaṃ evaṃ purisassa cittaṃ pariyādāya tiṭṭhati yathayidaṃ bhikkhave itthigandho itthigandho bhikkhave purisassa cittaṃ pariyādāya tiṭṭhatīti. [5] Nāhaṃ bhikkhave aññaṃ ekarasaṃpi samanupassāmi yaṃ evaṃ purisassa cittaṃ pariyādāya tiṭṭhati yathayidaṃ bhikkhave itthiraso itthiraso bhikkhave purisassa cittaṃ pariyādāya tiṭṭhatīti. [6] Nāhaṃ bhikkhave aññaṃ ekaphoṭṭhabbaṃpi samanupassāmi yaṃ evaṃ purisassa cittaṃ pariyādāya tiṭṭhati yathayidaṃ bhikkhave itthiphoṭṭhabbo itthiphoṭṭhabbo bhikkhave purisassa cittaṃ pariyādāya tiṭṭhatīti. [7] Nāhaṃ bhikkhave aññaṃ ekarūpaṃpi samanupassāmi yaṃ evaṃ itthiyā cittaṃ pariyādāya tiṭṭhati yathayidaṃ bhikkhave purisarūpaṃ purisarūpaṃ bhikkhave itthiyā cittaṃ pariyādāya tiṭṭhatīti. [8] Nāhaṃ bhikkhave aññaṃ ekasaddaṃpi samanupassāmi yaṃ evaṃ itthiyā cittaṃ pariyādāya tiṭṭhati yathayidaṃ bhikkhave purisasaddo purisasaddo bhikkhave itthiyā cittaṃ pariyādāya tiṭṭhatīti. [9] Nāhaṃ bhikkhave aññaṃ ekagandhaṃpi samanupassāmi yaṃ evaṃ itthiyā cittaṃ pariyādāya tiṭṭhati yathayidaṃ bhikkhave purisagandho purisagandho bhikkhave itthiyā cittaṃ pariyādāya tiṭṭhatīti. [10] Nāhaṃ bhikkhave aññaṃ ekarasaṃpi samanupassāmi yaṃ evaṃ itthiyā cittaṃ pariyādāya tiṭṭhati yathayidaṃ bhikkhave purisaraso purisaraso bhikkhave itthiyā cittaṃ pariyādāya tiṭṭhatīti. [11] Nāhaṃ bhikkhave aññaṃ ekaphoṭṭhabbaṃpi samanupassāmi yaṃ Evaṃ itthiyā cittaṃ pariyādāya tiṭṭhati yathayidaṃ bhikkhave purisaphoṭṭhabbo ^1- purisaphoṭṭhabbo ^2- bhikkhave itthiyā cittaṃ pariyādāya tiṭṭhatīti. Vaggo ^3- paṭhamo. [12] Nāhaṃ bhikkhave aññaṃ ekadhammaṃpi samanupassāmi yena anuppanno vā kāmacchando uppajjati uppanno vā kāmacchando bhiyyobhāvāya vepullāya saṃvattati yathayidaṃ bhikkhave subhanimittaṃ subhanimittaṃ bhikkhave ayoniso manasikaroto anuppanno ceva kāmacchando uppajjati uppanno ca kāmacchando bhiyyobhāvāya vepullāya saṃvattatīti. [13] Nāhaṃ bhikkhave aññaṃ ekadhammaṃpi samanupassāmi yena anuppanno vā byāpādo uppajjati uppanno vā byāpādo bhiyyobhāvāya vepullāya saṃvattati yathayidaṃ bhikkhave paṭighanimittaṃ paṭighanimittaṃ bhikkhave ayoniso manasikaroto anuppanno ceva byāpādo uppajjati uppanno ca byāpādo bhiyyobhāvāya vepullāya saṃvattatīti. [14] Nāhaṃ bhikkhave aññaṃ ekadhammaṃpi samanupassāmi yena anuppannaṃ vā thīnamiddhaṃ uppajjati uppannaṃ vā thīnamiddhaṃ bhiyyobhāvāya vepullāya saṃvattati yathayidaṃ bhikkhave arati tandi vijambhikā bhattasammado cetaso ca līnattaṃ līnacittassa bhikkhave anuppannañceva @Footnote: ^1-2 Yu. purisaphoṭṭhabbaṃ . ³ Ma. Yu. rūpādivaggo. Thīnamiddhaṃ uppajjati uppannañca thīnamiddhaṃ bhiyyobhāvāya vepullāya saṃvattatīti [15] Nāhaṃ bhikkhave aññaṃ ekadhammaṃpi samanupassāmi yena anuppannaṃ vā uddhaccakukkuccaṃ uppajjati uppannaṃ vā uddhaccakukkuccaṃ bhiyyobhāvāya vepullāya saṃvattati yathayidaṃ bhikkhave cetaso avūpasamo avūpasantacittassa bhikkhave anuppannañceva uddhaccakukkuccaṃ uppajjati uppannañca uddhaccakukkuccaṃ bhiyyobhāvāya vepullāya saṃvattatīti. [16] Nāhaṃ bhikkhave aññaṃ ekadhammaṃpi samanupassāmi yena anuppannā vā vicikicchā uppajjati uppannā vā vicikicchā bhiyyobhāvāya vepullāya saṃvattati yathayidaṃ bhikkhave ayoniso manasikāro ayoniso bhikkhave manasikaroto anuppannā ceva vicikicchā uppajjati uppannā ca vicikicchā bhiyyobhāvāya vepullāya saṃvattatīti. [17] Nāhaṃ bhikkhave aññaṃ ekadhammaṃpi samanupassāmi yena anuppanno vā kāmacchando nuppajjati uppanno vā kāmacchando pahīyati yathayidaṃ bhikkhave asubhanimittaṃ asubhanimittaṃ bhikkhave yoniso manasikaroto anuppanno ceva kāmacchando nuppajjati uppanno ca kāmacchando pahīyatīti. [18] Nāhaṃ bhikkhave aññaṃ ekadhammaṃpi samanupassāmi yena anuppanno vā byāpādo nuppajjati uppanno vā byāpādo Pahīyati yathayidaṃ bhikkhave mettā cetovimutti mettaṃ bhikkhave cetovimuttiṃ yoniso manasikaroto anuppanno ceva byāpādo nuppajjati uppanno ca byāpādo pahīyatīti. [19] Nāhaṃ bhikkhave aññaṃ ekadhammaṃpi samanupassāmi yena anuppannaṃ vā thīnamiddhaṃ nuppajjati uppannaṃ vā thīnamiddhaṃ pahīyati yathayidaṃ bhikkhave ārambhadhātu nikkamadhātu parakkamadhātu āraddhaviriyassa bhikkhave anuppannañceva thīnamiddhaṃ nuppajjati uppannañca thīnamiddhaṃ pahīyatīti. [20] Nāhaṃ bhikkhave aññaṃ ekadhammaṃpi samanupassāmi yena anuppannaṃ vā uddhaccakukkuccaṃ nuppajjati uppannaṃ vā uddhaccakukkuccaṃ pahīyati yathayidaṃ bhikkhave cetaso vūpasamo vūpasantacittassa bhikkhave anuppannañceva uddhaccakukkuccaṃ nuppajjati uppannañca uddhaccakukkuccaṃ pahīyatīti. [21] Nāhaṃ bhikkhave aññaṃ ekadhammaṃpi samanupassāmi yena anuppannā vā vicikicchā nuppajjati uppannā vā vicikicchā pahīyati yathayidaṃ bhikkhave yoniso manasikāro yoniso bhikkhave manasikaroto anuppannā ceva vicikicchā nuppajjati uppannā ca vicikicchā pahīyatīti. Vaggo ^1- dutiyo. [22] Nāhaṃ bhikkhave aññaṃ ekadhammaṃpi samanupassāmi yaṃ evaṃ @Footnote: ¹ Ma. Yu. nīvaraṇappahānavaggo. Abhāvitaṃ akammaniyaṃ hoti yathayidaṃ bhikkhave cittaṃ cittaṃ bhikkhave abhāvitaṃ akammaniyaṃ hotīti. [23] Nāhaṃ bhikkhave aññaṃ ekadhammaṃpi samanupassāmi yaṃ evaṃ bhāvitaṃ kammaniyaṃ hoti yathayidaṃ bhikkhave cittaṃ cittaṃ bhikkhave bhāvitaṃ kammaniyaṃ hotīti. [24] Nāhaṃ bhikkhave aññaṃ ekadhammaṃpi samanupassāmi yaṃ evaṃ abhāvitaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave abhāvitaṃ mahato anatthāya saṃvattatīti. [25] Nāhaṃ bhikkhave aññaṃ ekadhammaṃpi samanupassāmi yaṃ evaṃ bhāvitaṃ mahato atthāya saṃvattati yathayidaṃ bhikkhave cittaṃ cittaṃ bhikkhave bhāvitaṃ mahato atthāya saṃvattatīti. [26] Nāhaṃ bhikkhave aññaṃ ekadhammaṃpi samanupassāmi yaṃ evaṃ abhāvitaṃ apātubhūtaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave abhāvitaṃ apātubhūtaṃ mahato anatthāya saṃvattatīti. [27] Nāhaṃ bhikkhave aññaṃ ekadhammaṃpi samanupassāmi yaṃ evaṃ bhāvitaṃ pātubhūtaṃ mahato atthāya saṃvattati yathayidaṃ bhikkhave cittaṃ cittaṃ bhikkhave bhāvitaṃ pātubhūtaṃ mahato atthāya saṃvattatīti. [28] Nāhaṃ bhikkhave aññaṃ ekadhammaṃpi samanupassāmi yaṃ evaṃ abhāvitaṃ abahulīkataṃ mahato anatthāya saṃvattati yathayidaṃ bhikkhave cittaṃ cittaṃ bhikkhave abhāvitaṃ abahulīkataṃ mahato anatthāya saṃvattatīti. [29] Nāhaṃ bhikkhave aññaṃ ekadhammaṃpi samanupassāmi yaṃ evaṃ bhāvitaṃ bahulīkataṃ mahato atthāya saṃvattati yathayidaṃ bhikkhave cittaṃ cittaṃ bhikkhave bhāvitaṃ bahulīkataṃ mahato atthāya saṃvattatīti. [30] Nāhaṃ bhikkhave aññaṃ ekadhammaṃpi samanupassāmi yaṃ evaṃ abhāvitaṃ abahulīkataṃ dukkhādhivāhaṃ hoti yathayidaṃ bhikkhave cittaṃ cittaṃ bhikkhave abhāvitaṃ abahulīkataṃ dukkhādhivāhaṃ hotīti. [31] Nāhaṃ bhikkhave aññaṃ ekadhammaṃpi samanupassāmi yaṃ evaṃ bhāvitaṃ bahulīkataṃ sukhādhivāhaṃ hoti yathayidaṃ bhikkhave cittaṃ cittaṃ bhikkhave bhāvitaṃ bahulīkataṃ sukhādhivāhaṃ hotīti. Vaggo ^1- tatiyo. [32] Nāhaṃ bhikkhave aññaṃ ekadhammaṃpi samanupassāmi yaṃ evaṃ adantaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave adantaṃ mahato anatthāya saṃvattatīti. [33] Nāhaṃ bhikkhave aññaṃ ekadhammaṃpi samanupassāmi yaṃ evaṃ dantaṃ mahato atthāya saṃvattati yathayidaṃ bhikkhave cittaṃ cittaṃ bhikkhave dantaṃ mahato atthāya saṃvattatīti. [34] Nāhaṃ bhikkhave aññaṃ ekadhammaṃpi samanupassāmi yaṃ evaṃ aguttaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave aguttaṃ mahato anatthāya saṃvattatīti. [35] Nāhaṃ bhikkhave aññaṃ ekadhammaṃpi samanupassāmi yaṃ evaṃ @Footnote: ¹ Ma. Yu. akammanīyavaggo .... Guttaṃ mahato atthāya saṃvattati yathayidaṃ bhikkhave cittaṃ cittaṃ bhikkhave guttaṃ mahato atthāya saṃvattatīti. [36] Nāhaṃ bhikkhave aññaṃ ekadhammaṃpi samanupassāmi yaṃ evaṃ arakkhitaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave arakkhitaṃ mahato anatthāya saṃvattatīti. [37] Nāhaṃ bhikkhave aññaṃ ekadhammaṃpi samanupassāmi yaṃ evaṃ rakkhitaṃ mahato atthāya saṃvattati yathayidaṃ bhikkhave cittaṃ cittaṃ bhikkhave rakkhitaṃ mahato atthāya saṃvattatīti. [38] Nāhaṃ bhikkhave aññaṃ ekadhammaṃpi samanupassāmi yaṃ evaṃ asaṃvutaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave asaṃvutaṃ mahato anatthāya saṃvattatīti. [39] Nāhaṃ bhikkhave aññaṃ ekadhammaṃpi samanupassāmi yaṃ evaṃ saṃvutaṃ mahato atthāya saṃvattati yathayidaṃ bhikkhave cittaṃ cittaṃ bhikkhave saṃvutaṃ mahato atthāya saṃvattatīti. [40] Nāhaṃ bhikkhave aññaṃ ekadhammaṃpi samanupassāmi yaṃ evaṃ adantaṃ aguttaṃ arakkhitaṃ asaṃvutaṃ mahato anatthāya saṃvattati yathayidaṃ bhikkhave cittaṃ cittaṃ bhikkhave adantaṃ aguttaṃ arakkhitaṃ asaṃvutaṃ mahato anatthāya saṃvattatīti. [41] Nāhaṃ bhikkhave aññaṃ ekadhammaṃpi samanupassāmi yaṃ evaṃ dantaṃ guttaṃ rakkhitaṃ saṃvutaṃ mahato atthāya saṃvattati yathayidaṃ bhikkhave Cittaṃ cittaṃ bhikkhave dantaṃ guttaṃ rakkhitaṃ saṃvutaṃ mahato atthāya saṃvattatīti. Vaggo ^1- catuttho. [42] Seyyathāpi bhikkhave sālisūkaṃ vā yavasūkaṃ vā micchāpaṇihitaṃ hatthena vā pādena vā akkantaṃ hatthaṃ vā pādaṃ vā bhijjissati ^2- lohitaṃ vā uppādessatīti netaṃ ṭhānaṃ vijjati taṃ kissa hetu micchāpaṇihitattā bhikkhave sālisūkassa evameva kho bhikkhave so vata bhikkhu micchāpaṇihitena cittena avijjaṃ bhijjissati vijjaṃ uppādessati nibbānaṃ sacchikarissatīti netaṃ ṭhānaṃ vijjati taṃ kissa hetu micchāpaṇihitattā bhikkhave cittassāti. [43] Seyyathāpi bhikkhave sālisūkaṃ vā yavasūkaṃ vā sammāpaṇihitaṃ hatthena vā pādena vā akkantaṃ hatthaṃ vā pādaṃ vā bhijjissati lohitaṃ vā uppādessatīti ṭhānametaṃ vijjati taṃ kissa hetu sammāpaṇihitattā bhikkhave sālisūkassa evameva kho bhikkhave so vata bhikkhu sammāpaṇihitena cittena avijjaṃ bhijjissati vijjaṃ uppādessati nibbānaṃ sacchikarissatīti ṭhānametaṃ vijjati taṃ kissa hetu sammāpaṇihitattā bhikkhave cittassāti. [44] Idhāhaṃ bhikkhave ekaccaṃ puggalaṃ paduṭṭhacittaṃ evaṃ cetasā ceto paricca pajānāmi imamhi ce ayaṃ samaye puggalo kālaṃ kareyya yathābhataṃ nikkhitto evaṃ niraye taṃ kissa hetu cittaṃ @Footnote: ¹ Ma. Yu. adantavaggo. ² Ma. Yu. bhecchati, ito paraṃ īdisameva. Hissa bhikkhave paduṭṭhaṃ cetopadosahetu ca pana bhikkhave evamidhekacce sattā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjantīti. [45] Idhāhaṃ bhikkhave ekaccaṃ puggalaṃ pasannacittaṃ evaṃ cetasā ceto paricca pajānāmi imamhi ce ayaṃ samaye puggalo kālaṃ kareyya yathābhataṃ nikkhitto evaṃ sagge taṃ kissa hetu cittaṃ hissa bhikkhave pasannaṃ cetopasādahetu ca pana bhikkhave evamidhekacce sattā kāyassa bhedā parammaraṇā sugatiṃ saggaṃ lokaṃ upapajjantīti. [46] Seyyathāpi bhikkhave udakarahado āvilo lulito kalalībhūto tattha cakkhumā puriso tīre ṭhito na passeyya sippisambukampi sakkharakathalampi macchagumbampi carantampi tiṭṭhantampi taṃ kissa hetu āvilattā bhikkhave udakassa evameva kho bhikkhave so vata bhikkhu āvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti netaṃ ṭhānaṃ vijjati taṃ kissa hetu āvilattā bhikkhave cittassāti. [47] Seyyathāpi bhikkhave udakarahado accho vippasanno anāvilo tattha cakkhumā puriso tīre ṭhito passeyya sippisambukampi sakkharakathalampi macchagumbampi carantampi tiṭṭhantampi taṃ kissa hetu anāvilattā bhikkhave udakassa evameva kho bhikkhave so vata bhikkhu Anāvilena cittena attatthaṃ vā ñassati paratthaṃ vā ñassati ubhayatthaṃ vā ñassati uttariṃ vā manussadhammā alamariyañāṇadassanavisesaṃ sacchikarissatīti ṭhānametaṃ vijjati taṃ kissa hetu anāvilattā bhikkhave cittassāti. [48] Seyyathāpi bhikkhave yānikānici rukkhajātāni ^1- candano tesaṃ aggamakkhāyati yadidaṃ mudutāya ceva kammaññatāya ca evameva kho ahaṃ bhikkhave nāññaṃ ekadhammaṃpi samanupassāmi yaṃ evaṃ bhāvitaṃ bahulīkataṃ muduñca hoti kammaniyañca ^2- yathayidaṃ bhikkhave cittaṃ cittaṃ bhikkhave bhāvitaṃ bahulīkataṃ muduñca hoti kammaniyañcāti. [49] Nāhaṃ bhikkhave aññaṃ ekadhammaṃpi samanupassāmi yaṃ evaṃ lahuparivattaṃ yathayidaṃ bhikkhave cittaṃ yāvañcidaṃ bhikkhave upamāpi na sukarā yāva lahuparivattaṃ cittanti. [50] Pabhassaramidaṃ bhikkhave cittaṃ tañca kho āgantukehi upakkilesehi upakkiliṭṭhanti. [51] Pabhassaramidaṃ bhikkhave cittaṃ tañca kho āgantukehi upakkilesehi vippamuttanti. Vaggo ^3- pañcamo. [52] Pabhassaramidaṃ bhikkhave cittaṃ tañca kho āgantukehi upakkilesehi upakkiliṭṭhaṃ taṃ assutavā puthujjano yathābhūtaṃ nappajānāti tasmā assutavato puthujjanassa cittabhāvanā natthīti vadāmīti. @Footnote: ¹ Ma. rukkhajātānaṃ . ² Ma. kammaññañca hotīti . ³ Ma. paṇihitaacchavaggo @Yu. paṇihitaacchannavaggo. [53] Pabhassaramidaṃ bhikkhave cittaṃ tañca kho āgantukehi upakkilesehi vippamuttaṃ taṃ sutavā ariyasāvako yathābhūtaṃ pajānāti tasmā sutavato ariyasāvakassa cittabhāvanā atthīti vadāmīti. [54] Accharāsaṅghātamattaṃpi ce bhikkhave bhikkhu mettacittaṃ āsevati ayaṃ vuccati bhikkhave bhikkhu arittajjhāno viharati satthusāsanakaro ovādapaṭikaro amoghaṃ raṭṭhapiṇḍaṃ bhuñjati ko pana vādo ye naṃ bahulīkarontīti. [55] Accharāsaṅghātamattaṃpi ce bhikkhave bhikkhu mettacittaṃ bhāveti ayaṃ vuccati bhikkhave bhikkhu arittajjhāno viharati satthusāsanakaro ovādapaṭikaro amoghaṃ raṭṭhapiṇḍaṃ bhuñjati ko pana vādo ye naṃ bahulīkarontīti. [56] Accharāsaṅghātamattaṃpi ce bhikkhave bhikkhu mettacittaṃ manasikaroti ayaṃ vuccati bhikkhave bhikkhu arittajjhāno viharati satthusāsanakaro ovādapaṭikaro amoghaṃ raṭṭhapiṇḍaṃ bhuñjati ko pana vādo ye naṃ bahulīkarontīti. [57] Yekeci bhikkhave dhammā akusalā akusalabhāgiyā akusalapakkhikā sabbe te manopubbaṅgamā mano tesaṃ dhammānaṃ paṭhamaṃ uppajjati anvadeva kusalā dhammāti. [58] Yekeci bhikkhave dhammā kusalā kusalabhāgiyā kusalapakkhikā sabbe te manopubbaṅgamā mano tesaṃ dhammānaṃ paṭhamaṃ uppajjati Anvadeva kusalā dhammāti. [59] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave pamādo pamattassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. [60] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave appamādo appamattassa bhikkhave anuppannā ceva kusalā dhammā uppajjanti uppannā ca akusalā dhammā parihāyantīti. [61] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave kosajjaṃ kusītassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. Vaggo ^1- chaṭṭho. [62] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave viriyārambho āraddhaviriyassa bhikkhave anuppannā ceva kusalā dhammā uppajjanti uppannā ca @Footnote: ¹ Ma. Yu. accharāsaṅghāṭavaggo.... Akusalā dhammā parihāyantīti. [63] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave mahicchatā mahicchassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. [64] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave appicchatā appicchassa bhikkhave anuppannā ceva kusalā dhammā uppajjanti uppannā ca akusalā dhammā parihāyantīti. [65] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave asantuṭṭhitā asantuṭṭhassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. [66] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave santuṭṭhitā santuṭṭhassa bhikkhave anuppannā ceva kusalā dhammā uppajjanti uppannā ca akusalā Dhammā parihāyantīti. [67] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave ayoniso manasikāro ayoniso bhikkhave manasikaroto anuppannā ceva akusalā dhammā uppajjanti uppannā ca kusalā dhammā parihāyantīti. [68] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave yoniso manasikāro yoniso bhikkhave manasikaroto anuppannā ceva kusalā dhammā uppajjanti uppannā ca akusalā dhammā parihāyantīti. [69] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave asampajaññaṃ asampajānassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. [70] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave sampajaññaṃ sampajānassa bhikkhave anuppannā ceva kusalā dhammā uppajjanti uppannā ca Akusalā dhammā parihāyantīti. [71] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave pāpamittatā pāpamittassa bhikkhave anuppannā ceva akusalā dhammā uppajjanti uppannā ca kusalā dhammā parihāyantīti. Vaggo ^1- sattamo. [72] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā dhammā parihāyanti yathayidaṃ bhikkhave kalyāṇamittatā kalyāṇamittassa bhikkhave anuppannā ceva kusalā dhammā uppajjanti uppannā ca akusalā dhammā parihāyantīti. [73] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā kusalā dhammā parihāyanti yathayidaṃ bhikkhave anuyogo akusalānaṃ dhammānaṃ ananuyogo kusalānaṃ dhammānaṃ anuyogā bhikkhave akusalānaṃ dhammānaṃ ananuyogā kusalānaṃ dhammānaṃ anuppannā ceva akusalā dhammā uppajjanti uppannā ca kusalā dhammā parihāyantīti. [74] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā akusalā @Footnote: ¹ Ma. Yu. viriyārambhādivaggo .... Dhammā parihāyanti yathayidaṃ bhikkhave anuyogo kusalānaṃ dhammānaṃ ananuyogo akusalānaṃ dhammānaṃ anuyogā bhikkhave kusalānaṃ dhammānaṃ ananuyogā akusalānaṃ dhammānaṃ anuppannā ceva kusalā dhammā uppajjanti uppannā ca akusalā dhammā parihāyantīti. [75] Nāhaṃ bhikkhave aññaṃ ekadhammaṃpi samanupassāmi yena anuppannā vā bojjhaṅgā nuppajjanti uppannā vā bojjhaṅgā na bhāvanāpāripūriṃ gacchanti yathayidaṃ bhikkhave ayoniso manasikāro ayoniso bhikkhave manasikaroto anuppannā ceva bojjhaṅgā nuppajjanti uppannā ca bojjhaṅgā na bhāvanāpāripūriṃ gacchantīti. [76] Nāhaṃ bhikkhave aññaṃ ekadhammaṃpi samanupassāmi yena anuppannā vā bojjhaṅgā uppajjanti uppannā vā bojjhaṅgā bhāvanāpāripūriṃ gacchanti yathayidaṃ bhikkhave yoniso manasikāro yoniso bhikkhave manasikaroto anuppannā ceva bojjhaṅgā uppajjanti uppannā ca bojjhaṅgā bhāvanāpāripūriṃ gacchantīti. [77] Appamattikā esā bhikkhave parihāni yadidaṃ ñāti parihāni etaṃ paṭikiṭṭhaṃ bhikkhave parihānīnaṃ yadidaṃ paññāparihānīti. [78] Appamattikā esā bhikkhave vuḍḍhi yadidaṃ ñātivuḍḍhi etadaggaṃ bhikkhave vuḍḍhīnaṃ yadidaṃ paññāvuḍḍhi tasmā tiha bhikkhave evaṃ sikkhitabbaṃ paññāvuḍḍhiyā vaḍḍhissāmāti evaṃ hi vo Bhikkhave sikkhitabbanti. [79] Appamattikā esā bhikkhave parihāni yadidaṃ bhogaparihāni etaṃ paṭikiṭṭhaṃ bhikkhave parihānīnaṃ yadidaṃ paññāparihānīti. [80] Appamattikā esā bhikkhave vuḍḍhi yadidaṃ bhogavuḍḍhi etadaggaṃ bhikkhave vuḍḍhīnaṃ yadidaṃ paññāvuḍḍhi tasmā tiha bhikkhave evaṃ sikkhitabbaṃ paññāvuḍḍhiyā vaḍḍhissāmāti evaṃ hi vo bhikkhave sikkhitabbanti. [81] Appamattikā esā bhikkhave parihāni yadidaṃ yasoparihāni etaṃ paṭikiṭṭhaṃ bhikkhave parihānīnaṃ yadidaṃ paññāparihānīti. Vaggo ^1- aṭṭhamo. [82] Appamattikā esā bhikkhave vuḍḍhi yadidaṃ yasovuḍḍhi etadaggaṃ bhikkhave vuḍḍhīnaṃ yadidaṃ paññāvuḍḍhi tasmā tiha bhikkhave evaṃ sikkhitabbaṃ paññāvuḍḍhiyā vaḍḍhissāmāti evaṃ hi vo bhikkhave sikkhitabbanti. [83] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave pamādo pamādo bhikkhave mahato anatthāya saṃvattatīti. [84] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave appamādo appamādo bhikkhave mahato atthāya saṃvattatīti. @Footnote: ¹ Ma. Yu. kalyāṇamittādivaggo. [85] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave kosajjaṃ kosajjaṃ bhikkhave mahato anatthāya saṃvattatīti. [86] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave viriyārambho viriyārambho bhikkhave mahato atthāya saṃvattatīti. [87] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave mahicchatā mahicchatā bhikkhave mahato anatthāya saṃvattatīti. [88] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave appicchatā appicchatā bhikkhave mahato atthāya saṃvattatīti. [89] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave asantuṭṭhitā asantuṭṭhitā bhikkhave mahato anatthāya saṃvattatīti. [90] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave santuṭṭhitā santuṭṭhitā bhikkhave mahato atthāya saṃvattatīti. [91] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave ayoniso manasikāro Ayoniso manasikāro bhikkhave mahato anatthāya saṃvattatīti. [92] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave yoniso manasikāro yoniso manasikāro bhikkhave mahato atthāya saṃvattatīti. [93] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave asampajaññaṃ asampajaññaṃ bhikkhave mahato anatthāya saṃvattatīti. [94] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave sampajaññaṃ sampajaññaṃ bhikkhave mahato atthāya saṃvattatīti. [95] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave pāpamittatā pāpamittatā bhikkhave mahato anatthāya saṃvattatīti. [96] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave kalyāṇamittatā kalyāṇamittatā bhikkhave mahato atthāya saṃvattatīti. [97] Nāhaṃ bhikkhave aññaṃ ekadhammaṃpi samanupassāmi yo evaṃ mahato anatthāya saṃvattati yathayidaṃ bhikkhave anuyogo akusalānaṃ dhammānaṃ ananuyogo kusalānaṃ dhammānaṃ anuyogo bhikkhave akusalānaṃ dhammānaṃ ananuyogo kusalānaṃ dhammānaṃ mahato anatthāya saṃvattatīti. [98] Nāhaṃ bhikkhave aññaṃ ekadhammaṃpi samanupassāmi yo evaṃ mahato atthāya saṃvattati yathayidaṃ bhikkhave anuyogo kusalānaṃ dhammānaṃ ananuyogo akusalānaṃ dhammānaṃ anuyogo bhikkhave kusalānaṃ dhammānaṃ ananuyogo akusalānaṃ dhammānaṃ mahato atthāya saṃvattatīti. Vaggo ^1- navamo. [99] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato anatthāya saṃvattati yathayidaṃ bhikkhave pamādo pamādo bhikkhave mahato anatthāya saṃvattatīti. [100] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato atthāya saṃvattati yathayidaṃ bhikkhave appamādo appamādo bhikkhave mahato atthāya saṃvattatīti. [101] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato anatthāya saṃvattati yathayidaṃ bhikkhave kosajjaṃ kosajjaṃ bhikkhave mahato anatthāya saṃvattatīti. [102] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato atthāya saṃvattati yathayidaṃ bhikkhave viriyārambho viriyārambho bhikkhave mahato atthāya saṃvattatīti. [103] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Mahicchatā bhikkhave mahato anatthāya saṃvattatīti. [104] Ajjhattikaṃ bhikkhave aṅganti karitvā nāññaṃ ekaṅgaṃpi @Footnote: ¹ Ma. Yu. pamādādivaggo. Samanupassāmi .pe. Appicchatā bhikkhave mahato atthāya saṃvattatīti. [105] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Asantuṭṭhitā bhikkhave mahato anatthāya saṃvattatīti. [106] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Santuṭṭhitā bhikkhave mahato atthāya saṃvattatīti. [107] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. ayoniso manasikāro bhikkhave mahato anatthāya saṃvattatīti. [108] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Yoniso manasikāro bhikkhave mahato atthāya saṃvattatīti. [109] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Asampajaññaṃ bhikkhave mahato anatthāya saṃvattatīti. [110] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi .pe. Sampajaññaṃ bhikkhave mahato atthāya saṃvattatīti. [111] Bāhiraṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato anatthāya saṃvattati yathayidaṃ bhikkhave pāpamittatā pāpamittatā bhikkhave mahato anatthāya saṃvattatīti. [112] Bāhiraṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato atthāya saṃvattati yathayidaṃ bhikkhave kalyāṇamittatā kalyāṇamittatā bhikkhave mahato atthāya saṃvattatīti. [113] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato anatthāya saṃvattati yathayidaṃ bhikkhave anuyogo akusalānaṃ dhammānaṃ ananuyogo kusalānaṃ dhammānaṃ anuyogo bhikkhave akusalānaṃ dhammānaṃ ananuyogo kusalānaṃ dhammānaṃ mahato anatthāya saṃvattatīti. [114] Ajjhattikaṃ bhikkhave aṅganti karitvā nāññaṃ ekaṅgaṃpi samanupassāmi yaṃ evaṃ mahato atthāya saṃvattati yathayidaṃ bhikkhave anuyogo kusalānaṃ dhammānaṃ ananuyogo akusalānaṃ dhammānaṃ anuyogo bhikkhave kusalānaṃ dhammānaṃ ananuyogo akusalānaṃ dhammānaṃ mahato atthāya saṃvattatīti. [115] Nāhaṃ bhikkhave aññaṃ ekadhammaṃpi samanupassāmi yo evaṃ saddhammassa sammosāya antaradhānāya saṃvattati yathayidaṃ bhikkhave pamādo pamādo bhikkhave saddhammassa sammosāya antaradhānāya saṃvattatīti. [116] Nāhaṃ bhikkhave aññaṃ ekadhammaṃpi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ bhikkhave appamādo appamādo bhikkhave saddhammassa ṭhitiyā asammosāya anantaradhānāya saṃvattatīti. [117] Nāhaṃ bhikkhave aññaṃ ekadhammaṃpi samanupassāmi yo evaṃ saddhammassa sammosāya antaradhānāya saṃvattati yathayidaṃ bhikkhave kosajjaṃ kosajjaṃ bhikkhave saddhammassa sammosāya antaradhānāya saṃvattatīti. [118] Nāhaṃ bhikkhave aññaṃ ekadhammaṃpi samanupassāmi yo Evaṃ saddhammassa ṭhitiyā asammosāya anantaradhānāya saṃvattati yathayidaṃ bhikkhave viriyārambho viriyārambho bhikkhave saddhammassa ṭhitiyā asammosāya anantaradhānāya saṃvattatīti. [119] Nāhaṃ bhikkhave aññaṃ ekadhammaṃpi samanupassāmi .pe. Mahicchatā bhikkhave saddhammassa sammosāya antaradhānāya saṃvattatīti. [120] Nāhaṃ bhikkhave aññaṃ ekadhammaṃpi samanupassāmi .pe. Appicchatā bhikkhave saddhammassa ṭhitiyā asammosāya anantaradhānāya saṃvattatīti. [121] Nāhaṃ bhikkhave aññaṃ ekadhammaṃpi samanupassāmi .pe. Asantuṭṭhitā bhikkhave saddhammassa sammosāya antaradhānāya saṃvattatīti. [122] Nāhaṃ bhikkhave aññaṃ ekadhammaṃpi samanupassāmi .pe. Santuṭṭhitā bhikkhave saddhammassa ṭhitiyā asammosāya anantaradhānāya saṃvattatīti. [123] Nāhaṃ bhikkhave aññaṃ ekadhammaṃpi samanupassāmi .pe. Ayoniso manasikāro bhikkhave saddhammassa sammosāya antaradhānāya saṃvattatīti. [124] Nāhaṃ bhikkhave aññaṃ ekadhammaṃpi samanupassāmi .pe. Yoniso manasikāro bhikkhave saddhammassa ṭhitiyā asammosāya anantaradhānāya saṃvattatīti. [125] Nāhaṃ bhikkhave aññaṃ ekadhammaṃpi samanupassāmi .pe. Asampajaññaṃ bhikkhave saddhammassa sammosāya antaradhānāya saṃvattatīti. [126] Nāhaṃ bhikkhave aññaṃ ekadhammaṃpi samanupassāmi .pe. Sampajaññaṃ bhikkhave saddhammassa ṭhitiyā asammosāya anantaradhānāya saṃvattatīti. [127] Nāhaṃ bhikkhave aññaṃ ekadhammaṃpi samanupassāmi .pe. Pāpamittatā bhikkhave saddhammassa sammosāya antaradhānāya saṃvattatīti. [128] Nāhaṃ bhikkhave aññaṃ ekadhammaṃpi samanupassāmi .pe. Kalyāṇamittatā bhikkhave saddhammassa ṭhitiyā asammosāya anantaradhānāya saṃvattatīti. [129] Nāhaṃ bhikkhave aññaṃ ekadhammaṃpi samanupassāmi .pe. Anuyogo bhikkhave akusalānaṃ dhammānaṃ ananuyogo kusalānaṃ dhammānaṃ saddhammassa sammosāya antaradhānāya saṃvattatīti. [130] Nāhaṃ bhikkhave aññaṃ ekadhammaṃpi samanupassāmi yo evaṃ saddhammassa ṭhitiyā asammosāya anantaradhānāya saṃvattati yathayidaṃ bhikkhave anuyogo kusalānaṃ dhammānaṃ ananuyogo akusalānaṃ dhammānaṃ anuyogo bhikkhave kusalānaṃ dhammānaṃ ananuyogo akusalānaṃ dhammānaṃ saddhammassa ṭhitiyā asammosāya anantaradhānāya saṃvattatīti. ^1- Vaggo dasamo. [131] Yepi ^2- te bhikkhave bhikkhū adhammaṃ dhammoti dīpenti te bhikkhave bhikkhū bahujanāhitāya paṭipannā bahujanāsukhāya bahuno janassa anatthāya ahitāya dukkhāya devamanussānaṃ bahuñca te bhikkhave bhikkhū apuññaṃ pasavanti tecimaṃ saddhammaṃ antaradhāpentīti. [132] Yepi te bhikkhave bhikkhū dhammaṃ adhammoti dīpenti .pe. @Footnote: ¹ Ma. bāttiṃsatimaṃ catukkoṭṭhikaṃ niṭṭhitaṃ. Yu. catukkoṭṭhikaṃ niṭṭhitaṃ. @² Ma. Yu. sabbattha ye te. Avinayaṃ vinayoti dīpenti .pe. vinayaṃ avinayoti dīpenti .pe. Abhāsitaṃ alapitaṃ tathāgatena bhāsitaṃ lapitaṃ tathāgatenāti dīpenti .pe. bhāsitaṃ lapitaṃ tathāgatena abhāsitaṃ alapitaṃ tathāgatenāti dīpenti .pe. anāciṇṇaṃ tathāgatena āciṇṇaṃ tathāgatenāti dīpenti .pe. āciṇṇaṃ tathāgatena anāciṇṇaṃ tathāgatenāti dīpenti .pe. appaññattaṃ tathāgatena paññattaṃ tathāgatenāti dīpenti .pe. paññattaṃ tathāgatena appaññattaṃ tathāgatenāti dīpenti te bhikkhave bhikkhū bahujanāhitāya paṭipannā bahujanāsukhāya bahuno janassa anatthāya ahitāya dukkhāya devamanussānaṃ bahuñca te bhikkhave bhikkhū apuññaṃ pasavanti tecimaṃ saddhammaṃ antaradhāpentīti. ^[1]- [133] Yepi te bhikkhave bhikkhū adhammaṃ adhammoti dīpenti te bhikkhave bhikkhū bahujanahitāya paṭipannā bahujanasukhāya bahuno janassa atthāya hitāya sukhāya devamanussānaṃ bahuñca te bhikkhave bhikkhū puññaṃ pasavanti tecimaṃ saddhammaṃ ṭhapentīti. [134] Yepi te bhikkhave bhikkhū dhammaṃ dhammoti dīpenti .pe. Avinayaṃ avinayoti dīpenti .pe. vinayaṃ vinayoti dīpenti .pe. Abhāsitaṃ alapitaṃ tathāgatena abhāsitaṃ alapitaṃ tathāgatenāti dīpenti .pe. bhāsitaṃ lapitaṃ tathāgatena bhāsitaṃ lapitaṃ tathāgatenāti dīpenti .pe. anāciṇṇaṃ tathāgatena anāciṇṇaṃ tathāgatenāti dīpenti .pe. āciṇṇaṃ tathāgatena āciṇṇaṃ tathāgatenāti dīpenti @Footnote: ¹ Ma. dutiyapamādādivaggo dasamo. Yu. adhammādivaggo dasamo. .pe. Appaññattaṃ tathāgatena appaññattaṃ tathāgatenāti dīpenti .pe. paññattaṃ tathāgatena paññattaṃ tathāgatenāti dīpenti te bhikkhave bhikkhū bahujanahitāya paṭipannā bahujanasukhāya bahuno janassa atthāya hitāya sukhāya devamanussānaṃ bahuñca te bhikkhave bhikkhū puññaṃ pasavanti tecimaṃ saddhammaṃ ṭhapentīti. Vaggo ^1- ekādasamo. [135] Yepi te bhikkhave bhikkhū anāpattiṃ āpattīti dīpenti .pe. āpattiṃ anāpattīti dīpenti .pe. lahukaṃ āpattiṃ garukā āpattīti dīpenti .pe. garukaṃ āpattiṃ lahukā āpattīti dīpenti .pe. duṭṭhullaṃ āpattiṃ aduṭṭhullā āpattīti dīpenti .pe. aduṭṭhullaṃ āpattiṃ duṭṭhullā āpattīti dīpenti .pe. Sāvasesaṃ āpattiṃ anavasesā āpattīti dīpenti .pe. anavasesaṃ āpattiṃ sāvasesā āpattīti dīpenti .pe. sappaṭikammaṃ āpattiṃ appaṭikammā āpattīti dīpenti .pe. appaṭikammaṃ āpattiṃ sappaṭikammā āpattīti dīpenti te bhikkhave bhikkhū bahujanāhitāya paṭipannā bahujanāsukhāya bahuno janassa anatthāya ahitāya dukkhāya devamanussānaṃ bahuñca te bhikkhave bhikkhū apuññaṃ pasavanti tecimaṃ saddhammaṃ antaradhāpentīti. [136] Yepi te bhikkhave bhikkhū anāpattiṃ anāpattīti dīpenti te bhikkhave bhikkhū bahujanahitāya paṭipannā bahujanasukhāya bahuno janassa @Footnote: ¹ Ma. adhammavaggo. Atthāya hitāya sukhāya devamanussānaṃ bahuñca te bhikkhave bhikkhū puññaṃ pasavanti tecimaṃ saddhammaṃ ṭhapentīti. [137] Yepi te bhikkhave bhikkhū āpattiṃ āpattīti dīpenti te bhikkhave bhikkhū bahujanahitāya paṭipannā bahujanasukhāya bahuno janassa atthāya hitāya sukhāya devamanussānaṃ bahuñca te bhikkhave bhikkhū puññaṃ pasavanti tecimaṃ saddhammaṃ ṭhapentīti. [138] Yepi te bhikkhave bhikkhū lahukaṃ āpattiṃ lahukā āpattīti dīpenti .pe. garukaṃ āpattiṃ garukā āpattīti dīpenti .pe. Duṭṭhullaṃ āpattiṃ duṭṭhullā āpattīti dīpenti .p. aduṭṭhullaṃ āpattiṃ aduṭṭhullā āpattīti dīpenti .pe. sāvasesaṃ āpattiṃ sāvasesā āpattīti dīpenti .pe. anavasesaṃ āpattiṃ anavasesā āpattīti dīpenti .pe. sappaṭikammaṃ āpattiṃ sappaṭikammā āpattīti dīpenti .pe. appaṭikammaṃ āpattiṃ appaṭikammā āpattīti dīpenti te bhikkhave bhikkhū bahujanahitāya paṭipannā bahujanasukhāya bahuno janassa atthāya hitāya sukhāya devamanussānaṃ bahuñca te bhikkhave bhikkhū puññaṃ pasavanti tecimaṃ saddhammaṃ ṭhapentīti. Vaggo ^1- dvādasamo. Ekapuggalapāli [139] Ekapuggalo bhikkhave loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya @Footnote: ¹ anāpattivaggo. Devamanussānaṃ katamo ekapuggalo tathāgato arahaṃ sammāsambuddho ayaṃ kho bhikkhave ekapuggalo loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānanti. [140] Ekapuggalassa bhikkhave pātubhāvo dullabho lokasmiṃ katamassa ekapuggalassa tathāgatassa arahato sammāsambuddhassa imassa kho bhikkhave ekapuggalassa pātubhāvo dullabho sokasminti. [141] Ekapuggalo bhikkhave loke uppajjamāno uppajjati acchariyamanusso katamo ekapuggalo tathāgato arahaṃ sammāsambuddho ayaṃ kho bhikkhave ekapuggalo loke uppajjamāno uppajjati acchariyamanussoti. [142] Ekapuggalassa bhikkhave kālakiriyā bahuno janassa anutappā hoti katamassa ekapuggalassa tathāgatassa arahato sammāsambuddhassa imassa kho bhikkhave ekapuggalassa kālakiriyā bahuno janassa anutappā hotīti. [143] Ekapuggalo bhikkhave loke uppajjamāno uppajjati adutiyo asahāyo appaṭimo appaṭisamo appaṭibhāgo ^1- appaṭipuggalo asamo asamasamo dipadānaṃ aggo katamo ekapuggalo tathāgato arahaṃ sammāsambuddho ayaṃ kho bhikkhave ekapuggalo loke uppajjamāno uppajjati adutiyo asahāyo appaṭimo appaṭisamo appaṭibhāgo appaṭipuggalo asamo asamasamo dipadānaṃ aggoti. @Footnote: ¹ Yu. ayaṃ pāṭho natthi. [144] Ekapuggalassa bhikkhave pātubhāvo ^1- mahato cakkhussa pātubhāvo hoti mahato ālokassa pātubhāvo hoti mahato obhāsassa pātubhāvo hoti channaṃ anuttariyānaṃ pātubhāvo hoti catunnaṃ paṭisambhidānaṃ sacchikiriyā hoti anekadhātupaṭivedho hoti nānādhātupaṭivedho hoti vijjāvimuttiphalasacchikiriyā hoti sotāpattiphalasacchikiriyā hoti sakadāgāmiphalasacchikiriyā hoti anāgāmiphalasacchikiriyā hoti arahattaphalasacchikiriyā hoti katamassa ekapuggalassa tathāgatassa arahato sammāsambuddhassa imassa kho bhikkhave ekapuggalassa pātubhāvo ^2- mahato cakkhussa pātubhāvo hoti mahato ālokassa pātubhāvo hoti mahato obhāsassa pātubhāvo hoti channaṃ anuttariyānaṃ pātubhāvo hoti catunnaṃ paṭisambhidānaṃ sacchikiriyā hoti anekadhātupaṭivedho hoti nānādhātupaṭivedho hoti vijjāvimuttiphalasacchikiriyā hoti sotāpattiphalasacchikiriyā hoti sakadāgāmiphalasacchikiriyā hoti anāgāmiphalasacchikiriyā hoti arahattaphalasacchikiriyā hotīti. [145] Nāhaṃ bhikkhave aññaṃ akapuggalampi samanupassāmi yo evaṃ tathāgatena anuttaraṃ dhammacakkaṃ pavattitaṃ sammadeva anuppavatteti yathayidaṃ bhikkhave sārīputto sārīputto bhikkhave tathāgatena anuttaraṃ dhammacakkaṃ pavattitaṃ sammadeva anuppavattetīti. Puggalavaggo ^3-. @Footnote: ^1-2 Ma. Yu. pātubhāvā. ³ Ma. Yu. ekapuggalavaggo terasamo. Etadaggapāli [146] Etadaggaṃ bhikkhave mama sāvakānaṃ bhikkhūnaṃ rattaññūnaṃ yadidaṃ aññākoṇḍañño ^1- . mahāpaññānaṃ yadidaṃ sārīputto . iddhimantānaṃ yadidaṃ mahāmoggallāno . dhūtavādānaṃ ^2- yadidaṃ mahākassapo . Dibbacakkhukānaṃ yadidaṃ anuruddho . uccākulikānaṃ yadidaṃ bhaddiyo kāḷigodhāyaputto . mañjussarānaṃ yadidaṃ lakuṇṭakabhaddiyo . Sīhanādikānaṃ yadidaṃ piṇḍolabhāradvājo . dhammakathikānaṃ yadidaṃ puṇṇo mantāniputto . saṅkhittena bhāsitassa vitthārena atthaṃ vibhajantānaṃ yadidaṃ mahākaccānoti. Vaggo paṭhamo. [147] Etadaggaṃ bhikkhave mama sāvakānaṃ bhikkhūnaṃ manomayaṃ kāyaṃ abhinimminantānaṃ yadidaṃ cullapanthako . cetovivaṭṭakusalānaṃ ^3- yadidaṃ cullapanthako . paññāvivaṭṭakusalānaṃ ^4- yadidaṃ mahāpanthako. Araṇavihārīnaṃ yadidaṃ subhūti . dakkhiṇeyyānaṃ yadidaṃ subhūti . āraññakānaṃ yadidaṃ revato khadiravaniyo . jhāyīnaṃ yadidaṃ kaṅkhārevato . āraddhaviriyānaṃ yadidaṃ soṇo koliviso . kalyāṇavākkaraṇānaṃ yadidaṃ soṇo kuṭikaṇṇo . lābhīnaṃ yadidaṃ sīvalī . saddhādhimuttānaṃ yadidaṃ vakkalīti. Vaggo dutiyo. [148] Etadaggaṃ bhikkhave mama sāvakānaṃ bhikkhūnaṃ sikkhākāmānaṃ @Footnote: ¹ Ma. aññāsikoṇḍañño . ² Ma. Yu. dhutavādānaṃ. ³ Yu. cetovivaddhakusalānaṃ. @⁴ Ma. saññāvivaṭṭakusalānaṃ. Yu. saññāvivaddhakusalānaṃ. Yadidaṃ rāhulo . saddhāpabbajitānaṃ yadidaṃ raṭṭhapālo . paṭhamaṃ salākaṃ gaṇhantānaṃ yadidaṃ kuṇḍadhāno . paṭibhāṇavantānaṃ yadidaṃ vaṅgīso . Samantapāsādikānaṃ yadidaṃ upaseno vaṅgantaputto . Senāsanapaññāpakānaṃ yadidaṃ dabbo mallaputto . devatānaṃ piyamanāpānaṃ yadidaṃ pilindavaccho . khippābhiññānaṃ yadidaṃ bāhiyo dārucīriyo . cittakathikānaṃ yadidaṃ kumārakassapo . paṭisambhidappattānaṃ yadidaṃ mahākoṭṭhitoti. Vaggo tatiyo. [149] Etadaggaṃ bhikkhave mama sāvakānaṃ bhikkhūnaṃ bahussutānaṃ yadidaṃ ānando . satimantānaṃ yadidaṃ ānando . gatimantānaṃ yadidaṃ ānando . dhitimantānaṃ yadidaṃ ānando . upaṭṭhākānaṃ yadidaṃ ānando . mahāparisānaṃ yadidaṃ uruvelakassapo . kulappasādakānaṃ yadidaṃ kāḷudāyi . appābādhānaṃ yadidaṃ bakkulo ^1- . pubbenivāsaṃ anussarantānaṃ yadidaṃ sobhito . vinayadharānaṃ yadidaṃ upāli . Bhikkhunovādakānaṃ yadidaṃ nandako . indriyesu guttadvārānaṃ yadidaṃ nando . bhikkhuovādakānaṃ yadidaṃ mahākappino . tejodhātukusalānaṃ yadidaṃ sāgato . paṭibhāṇeyyakānaṃ yadidaṃ rādho . lūkhacīvaradharānaṃ yadidaṃ mogharājāti. Vaggo catuttho. @Footnote: ¹ Ma. bākulo. [150] Etadaggaṃ bhikkhave mama sāvikānaṃ bhikkhunīnaṃ rattaññūnaṃ yadidaṃ mahāpajāpatī gotamī . mahāpaññānaṃ yadidaṃ khemā . Iddhimantānaṃ yadidaṃ uppalavaṇṇā . vinayadharānaṃ yadidaṃ paṭācārā . Dhammakathikānaṃ yadidaṃ dhammadinnā . jhāyīnaṃ yadidaṃ nandā. Āraddhaviriyānaṃ yadidaṃ soṇā . dibbacakkhukānaṃ yadidaṃ sakulā ^1- . Khippābhiññānaṃ yadidaṃ bhaddā kuṇḍalakesā . Pubbenivāsaṃ anussarantīnaṃ yadidaṃ bhaddā kapilānī ^2-. Mahābhiññappattānaṃ yadidaṃ bhaddā kaccānā ^3- . lūkhacīvaradharānaṃ yadidaṃ kisāgotamī. Saddhādhimuttānaṃ yadidaṃ sigālamātāti ^4-. Vaggo pañcamo. [151] Etadaggaṃ bhikkhave mama sāvakānaṃ upāsakānaṃ paṭhamaṃ saraṇaṃ gacchantānaṃ yadidaṃ tapussabhallikā vāṇijā . dāyakānaṃ yadidaṃ sudatto gahapati anāthapiṇḍiko . dhammakathikānaṃ yadidaṃ citto gahapati macchikasaṇḍiko ^5- . catūhi saṅgahavatthūhi parisaṃ saṃgaṇhantānaṃ yadidaṃ hatthako āḷavako . paṇītadāyakānaṃ yadidaṃ mahānāmo sakko . Manāpadāyakānaṃ yadidaṃ uggo gahapati vesāliko . saṅghupaṭṭhākānaṃ yadidaṃ ^6- uggato gahapati. Aveccappasannānaṃ yadidaṃ sūro ambaṭṭho ^7-. Puggalappasannānaṃ yadidaṃ jīvako komārabhacco . vissāsakānaṃ yadidaṃ nakulapitā gahapatīti. Vaggo chaṭṭho. @Footnote: ¹ Ma. bakulā. ² Ma. kāpilānī. ³ Ma. bhaddakaccānā. ⁴ siṅgālakamātā. @⁵ macchikāsaṇdiko . ⁶ Ma. hatthigāmako. ⁷ Ma. surabandho. [152] Etadaggaṃ bhikkhave mama sāvikānaṃ upāsikānaṃ paṭhamaṃ saraṇaṃ gacchantīnaṃ yadidaṃ sujātā senānidhītā ^1- . dāyikānaṃ yadidaṃ visākhā migāramātā . bahussutānaṃ yadidaṃ khujjuttarā . mettāvihārīnaṃ yadidaṃ sāmāvatī . jhāyīnaṃ yadidaṃ uttarā nandamātā . paṇītadāyikānaṃ yadidaṃ suppavāsā koliyadhītā . gilānupaṭṭhākīnaṃ yadidaṃ suppiyā upāsikā . aveccappasannānaṃ yadidaṃ kātiyānī . vissāsikānaṃ yadidaṃ nakulamātā gahapatānī . anussavappannānaṃ yadidaṃ kālī upāsikā kuraragharikāti ^2-. Vaggo sattamo. ^3- Aṭṭhānapāli [153] Aṭṭhānametaṃ bhikkhave anavakāso yaṃ diṭṭhisampanno puggalo kañci saṅkhāraṃ niccato upagaccheyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano kañci saṅkhāraṃ niccato upagaccheyya ṭhānametaṃ vijjatīti. [154] Aṭṭhānametaṃ bhikkhave anavakāso yaṃ diṭṭhisampanno puggalo kañci saṅkhāraṃ sukhato upagaccheyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano kañci saṅkhāraṃ sukhato upagaccheyya ṭhānametaṃ vijjatīti. [155] Aṭṭhānametaṃ bhikkhave anavakāso yaṃ diṭṭhisampanno @Footnote: ¹ Ma. seniyadhītā. ² Ma. kulagharikā. ³ Ma. etadaggavaggo niṭṭhito. Puggalo kañci dhammaṃ attato upagaccheyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano kañci dhammaṃ attato upagaccheyya ṭhānametaṃ vijjatīti. [156] Aṭṭhānametaṃ bhikkhave anavakāso yaṃ diṭṭhisampanno puggalo mātaraṃ jīvitā voropeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano mātaraṃ jīvitā voropeyya ṭhānametaṃ vijjatīti. [157] Aṭṭhānametaṃ bhikkhave anavakāso yaṃ diṭṭhisampanno puggalo pitaraṃ jīvitā voropeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano pitaraṃ jīvitā voropeyya ṭhānametaṃ vijjatīti. [158] Aṭṭhānametaṃ bhikkhave anavakāso yaṃ diṭṭhisampanno puggalo arahantaṃ jīvitā voropeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano arahantaṃ jīvitā voropeyya ṭhānametaṃ vijjatīti. [159] Aṭṭhānametaṃ bhikkhave anavakāso yaṃ diṭṭhisampanno puggalo tathāgatassa duṭṭhena cittena ^1- lohitaṃ uppādeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano tathāgatassa duṭṭhena cittena ^2- lohitaṃ uppādeyya ṭhānametaṃ vijjatīti. @Footnote: ^1-2 Ma. paduṭṭhacitto. [160] Aṭṭhānametaṃ bhikkhave anavakāso yaṃ diṭṭhisampanno puggalo saṅghaṃ bhindeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano saṅghaṃ bhindeyya ṭhānametaṃ vijjatīti. [161] Aṭṭhānametaṃ bhikkhave anavakāso yaṃ diṭṭhisampanno puggalo aññaṃ satthāraṃ uddiseyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puthujjano aññaṃ satthāraṃ uddiseyya ṭhānametaṃ vijjatīti. [162] Aṭṭhānametaṃ bhikkhave anavakāso yaṃ ekissā lokadhātuyā dve arahanto sammāsambuddhā apubbaṃ acarimaṃ uppajjeyyuṃ netaṃ ṭhānaṃ vijjati ṭhānañca kho etaṃ bhikkhave vijjati yaṃ ekissā lokadhātuyā eko ^1- arahaṃ sammāsambuddho uppajjeyya ṭhānametaṃ vijjatīti. Vaggo paṭhamo. [163] Aṭṭhānametaṃ bhikkhave anavakāso yaṃ ekissā lokadhātuyā dve rājāno cakkavattī apubbaṃ acarimaṃ uppajjeyyuṃ netaṃ ṭhānaṃ vijjati ṭhānañca kho etaṃ bhikkhave vijjati yaṃ ekissā lokadhātuyā eko rājā cakkavatti uppajjeyya ṭhānametaṃ vijjatīti. [164] Aṭṭhānametaṃ bhikkhave anavakāso yaṃ itthī arahaṃ assa sammāsambuddho netaṃ ṭhānaṃ vijjati ṭhānañca kho etaṃ bhikkhave vijjati yaṃ puriso arahaṃ assa sammāsambuddho ṭhānametaṃ vijjatīti. @Footnote: ¹ Ma. ekova. [165] Aṭṭhānametaṃ bhikkhave anavakāso yaṃ itthī rājā assa cakkavatti netaṃ ṭhānaṃ vijjati ṭhānañca kho etaṃ bhikkhave vijjati yaṃ puriso rājā assa cakkavatti ṭhānametaṃ vijjatīti. [166] Aṭṭhānametaṃ bhikkhave anavakāso yaṃ itthī sakkattaṃ kāreyya .pe. mārattaṃ kāreyya .pe. brahmattaṃ kāreyya netaṃ ṭhānaṃ vijjati ṭhānañca kho etaṃ bhikkhave vijjati yaṃ puriso sakkattaṃ kāreyya .pe. mārattaṃ kāreyya .pe. brahmattaṃ kāreyya ṭhānametaṃ vijjatīti. [167] Aṭṭhānametaṃ bhikkhave anavakāso yaṃ kāyaduccaritassa iṭṭho kanto manāpo vipāko nibbatteyya netaṃ ṭhānaṃ vijjati ṭhānañca kho etaṃ bhikkhave vijjati yaṃ kāyaduccaritassa aniṭṭho akanto amanāpo vipāko nibbatteyya ṭhānametaṃ vijjatīti. [168] Aṭṭhānametaṃ bhikkhave anavakāso yaṃ vacīduccaritassa .pe. [169] Aṭṭhānametaṃ bhikkhave anavakāso yaṃ manoduccaritassa iṭṭho kanto manāpo vipāko nibbatteyya netaṃ ṭhānaṃ vijjati ṭhānañca kho etaṃ bhikkhave vijjati yaṃ manoduccaritassa aniṭṭho akanto amanāpo vipāko nibbatteyya ṭhānametaṃ vijjatīti. Vaggo dutiyo. [170] Aṭṭhānametaṃ bhikkhave anavakāso yaṃ kāyasucaritassa aniṭṭho akanto amanāpo vipāko nibbatteyya netaṃ ṭhānaṃ vijjati Ṭhānañca kho etaṃ bhikkhave vijjati yaṃ kāyasucaritassa iṭṭho kanto manāpo vipāko nibbatteyya ṭhānametaṃ vijjatīti. [171] Aṭṭhānametaṃ bhikkhave anavakāso yaṃ vacīsucaritassa .pe. [172] Aṭṭhānametaṃ bhikkhave anavakāso yaṃ manosucaritassa aniṭṭho akanto amanāpo vipāko nibbatteyya netaṃ ṭhānaṃ vijjati ṭhānañca kho etaṃ bhikkhave vijjati yaṃ manosucaritassa iṭṭho kanto manāpo vipāko nibbatteyya ṭhānametaṃ vijjatīti. [173] Aṭṭhānametaṃ bhikkhave anavakāso yaṃ kāyaduccaritasamaṅgī tannidānā tappaccayā kāyassa bhedā parammaraṇā sugatiṃ saggaṃ lokaṃ upapajjeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ kāyaduccaritasamaṅgī tannidānā tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya ṭhānametaṃ vijjatīti. [174] Aṭṭhānametaṃ bhikkhave anavakāso yaṃ vacīduccaritasamaṅgī .pe. [175] Aṭṭhānametaṃ bhikkhave anavakāso yaṃ manoduccaritasamaṅgī tannidānā tappaccayā kāyassa bhedā parammaraṇā sugatiṃ saggaṃ lokaṃ upapajjeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ manoduccaritasamaṅgī tannidānā tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya ṭhānametaṃ Vijjatīti. [176] Aṭṭhānametaṃ bhikkhave anavakāso yaṃ kāyasucaritasamaṅgī tannidānā tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ kāyasucaritasamaṅgī tannidānā tappaccayā kāyassa bhedā parammaraṇā sugatiṃ saggaṃ lokaṃ upapajjeyya ṭhānametaṃ vijjatīti. [177] Aṭṭhānametaṃ bhikkhave anavakāso yaṃ vacīsucaritasamaṅgī .pe. [178] Aṭṭhānametaṃ bhikkhave anavakāso yaṃ manosucaritasamaṅgī tannidānā tappaccayā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjeyya netaṃ ṭhānaṃ vijjati ṭhānañca kho etaṃ bhikkhave vijjati yaṃ manosucaritasamaṅgī tannidānā tappaccayā kāyassa bhedā parammaraṇā sugatiṃ saggaṃ lokaṃ upapajjeyya ṭhānametaṃ vijjatīti. Vaggo tatiyo. ^1- Aparā ekadhammādipāli [179] Ekadhammo bhikkhave bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati katamo ekadhammo buddhānussati ayaṃ kho bhikkhave ekadhammo bhāvito bahulīkato ekantanibbidāya virāgāya nirodhāya upasamāya abhiññāya @Footnote: ¹ Ma. aṭṭhānapāli niṭṭhitā. Sambodhāya nibbānāya saṃvattatīti. [180] Ekadhammo bhikkhave bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattati katamo ekadhammo dhammānussati ... saṅghānussati ... Sīlānussati ... Cāgānussati ... devatānussati ... Ānāpānasati ^1- ... Maraṇasati ^2- kāyagatāsati ... upasamānussati ayaṃ kho bhikkhave ekadhammo bhāvito bahulīkato ekantanibbidāya virāgāya nirodhāya upasamāya abhiññāya sambodhāya nibbānāya saṃvattatīti. Vaggo paṭhamo. [181] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā uppajjanti uppannā vā akusalā dhammā bhiyyobhāvāya vepullāya saṃvattanti yathayidaṃ bhikkhave micchādiṭṭhi micchādiṭṭhikassa bhikkhave anuppannā ceva akusalā dhammā uppajjanti uppannā ca akusalā dhammā bhiyyobhāvāya vepullāya saṃvattantīti. [182] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā uppajjanti uppannā vā kusalā dhammā bhiyyobhāvāya vepullāya saṃvattanti yathayidaṃ bhikkhave sammādiṭṭhi sammādiṭṭhikassa bhikkhave anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantīti. @Footnote: ^1-2 Ma. ānāpānassati ... maraṇassati ... [183] Nāhaṃ bhikkhave aññaṃ ekadhammaṃpi samanupassāmi yena anuppannā vā kusalā dhammā nuppajjanti uppannā vā kusalā dhammā parihāyanti yathayidaṃ bhikkhave micchādiṭṭhi micchādiṭṭhikassa bhikkhave anuppannā ceva kusalā dhammā nuppajjanti uppannā ca kusalā dhammā parihāyantīti. [184] Nāhaṃ bhikkhave aññaṃ ekadhammaṃpi samanupassāmi yena anuppannā vā akusalā dhammā nuppajjanti uppannā vā akusalā dhammā parihāyanti yathayidaṃ bhikkhave sammādiṭṭhi sammādiṭṭhikassa bhikkhave anuppannā ceva akusalā dhammā nuppajjanti uppannā ca akusalā dhammā parihāyantīti. [185] Nāhaṃ bhikkhave aññaṃ ekadhammaṃpi samanupassāmi yena anuppannā vā micchādiṭṭhi uppajjati uppannā vā micchādiṭṭhi pavaḍḍhati yathayidaṃ bhikkhave ayoniso manasikāro ayoniso bhikkhave manasikaroto anuppannā ceva micchādiṭṭhi uppajjati uppannā ca micchādiṭṭhi pavaḍḍhatīti. [186] Nāhaṃ bhikkhave aññaṃ ekadhammaṃpi samanupassāmi yena anuppannā vā sammādiṭṭhi uppajjati uppannā vā sammādiṭṭhi pavaḍḍhati yathayidaṃ bhikkhave yoniso manasikāro yoniso bhikkhave manasikaroto anuppannā ceva sammādiṭṭhi uppajjati uppannā ca sammādiṭṭhi pavaḍḍhatīti. [187] Nāhaṃ bhikkhave aññaṃ ekadhammaṃpi samanupassāmi yenevaṃ ^1- sattā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjanti yathayidaṃ bhikkhave micchādiṭṭhi micchādiṭṭhiyā bhikkhave samannāgatā sattā kāyassa bhedā parammaraṇā apāyaṃ duggatiṃ vinipātaṃ nirayaṃ upapajjantīti. [188] Nāhaṃ bhikkhave aññaṃ ekadhammaṃpi samanupassāmi yenevaṃ ^2- sattā kāyassa bhedā parammaraṇā sugatiṃ saggaṃ lokaṃ upapajjanti yathayidaṃ bhikkhave sammādiṭṭhi sammādiṭṭhiyā bhikkhave samannāgatā sattā kāyassa bhedā parammaraṇā sugatiṃ saggaṃ lokaṃ upapajjantīti ^3-. [189] Micchādiṭṭhikassa bhikkhave purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti taṃ kissa hetu diṭṭhi hi ^4- bhikkhave pāpikā . seyyathāpi bhikkhave nimbabījaṃ vā kosātakībījaṃ vā tittakalābubījaṃ vā allāya paṭhaviyā nikkhittaṃ yañceva paṭhavīrasaṃ upādiyati yañca āporasaṃ upādiyati sabbantaṃ tittakattāya kaṭukattāya asātattāya saṃvattati taṃ kissa hetu bījaṃ hi ^5- bhikkhave pāpakaṃ evameva kho bhikkhave micchādiṭṭhikassa purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ @Footnote:1,2 Ma. evaṃsaddo natthi. ³ Ma. sabbattha uppajjantīti. 4-5 Ma. hissa. @ito paraṃ īdisameva. Samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā aniṭṭhāya akantāya amanāpāya ahitāya dukkhāya saṃvattanti taṃ kissa hetu diṭṭhi hi bhikkhave pāpikāti. [190] Sammādiṭṭhikassa bhikkhave purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti taṃ kissa hetu diṭṭhi hi bhikkhave bhaddikā . seyyathāpi bhikkhave ucchubījaṃ vā sālibījaṃ vā maddikābījaṃ vā allāya paṭhaviyā nikkhittaṃ yañceva paṭhavīrasaṃ upādiyati yañca āporasaṃ upādiyati sabbantaṃ madhurattāya sātattāya asecanakattāya saṃvattati taṃ kissa hetu bījaṃ hi bhikkhave bhaddakaṃ evameva kho bhikkhave sammādiṭṭhikassa purisapuggalassa yañceva kāyakammaṃ yathādiṭṭhisamattaṃ samādinnaṃ yañca vacīkammaṃ yathādiṭṭhisamattaṃ samādinnaṃ yañca manokammaṃ yathādiṭṭhisamattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā sabbe te dhammā iṭṭhāya kantāya manāpāya hitāya sukhāya saṃvattanti taṃ kissa hetu diṭṭhi hi bhikkhave bhaddikāti. Vaggo dutiyo. [191] Ekapuggalo bhikkhave loke uppajjamāno uppajjati bahujanāhitāya bahujanāsukhāya bahuno janassa anatthāya ahitāya dukkhāya devamanussānaṃ katamo ekapuggalo micchādiṭṭhiko hoti viparītadassano so bahujanaṃ saddhammā vuṭṭhāpetvā asaddhamme patiṭṭhāpeti ayaṃ kho bhikkhave ekapuggalo loke uppajjamāno uppajjati bahujanāhitāya bahujanāsukhāya bahuno janassa anatthāya ahitāya dukkhāya devamanussānanti. [192] Ekapuggalo bhikkhave loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānaṃ katamo ekapuggalo sammādiṭṭhiko hoti aviparītadassano so bahujanaṃ asaddhammā vuṭṭhāpetvā saddhamme patiṭṭhāpeti ayaṃ kho bhikkhave ekapuggalo loke uppajjamāno uppajjati bahujanahitāya bahujanasukhāya bahuno janassa atthāya hitāya sukhāya devamanussānanti. [193] Nāhaṃ bhikkhave aññaṃ ekadhammaṃpi samanupassāmi yaṃ evaṃ mahāsāvajjaṃ yathayidaṃ bhikkhave micchādiṭṭhi micchādiṭṭhiparamāni bhikkhave vajjānīti ^1-. [194] Nāhaṃ bhikkhave aññaṃ ekapuggalaṃpi samanupassāmi yo evaṃ bahujanāhitāya paṭipanno bahujanāsukhāya bahuno janassa anatthāya ahitāya dukkhāya devamanussānaṃ yathayidaṃ bhikkhave makkhali moghapuriso . seyyathāpi bhikkhave nadīmukhe khipaṃ uḍḍeyya bahunnaṃ macchānaṃ ahitāya dukkhāya anayāya byasanāya evameva kho bhikkhave makkhali moghapuriso @Footnote: ¹ Ma. mahāsāvajjānīti. Manussakhipammaññe loke uppanno bahunnaṃ sattānaṃ ahitāya dukkhāya anayāya byasanāyāti. [195] Durakkhāte bhikkhave dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ apuññaṃ pasavanti taṃ kissa hetu durakkhātattā bhikkhave dhammassāti. [196] Svākkhāte bhikkhave dhammavinaye yo ca samādapeti yañca samādapeti yo ca samādapito tathattāya paṭipajjati sabbe te bahuṃ puññaṃ pasavanti taṃ kissa hetu svākkhātattā bhikkhave dhammassāti. [197] Durakkhāte bhikkhave dhammavinaye dāyakena mattā jānitabbā no paṭiggāhakena taṃ kissa hetu durakkhātattā bhikkhave dhammassāti. [198] Svākkhāte bhikkhave dhammavinaye paṭiggāhakena mattā jānitabbā no dāyakena taṃ kissa hetu svākkhātattā bhikkhave dhammassāti. [199] Durakkhāte bhikkhave dhammavinaye yo āraddhaviriyo so dukkhaṃ viharati taṃ kissa hetu durakkhātattā bhikkhave dhammassāti. [200] Svākkhāte bhikkhave dhammavinaye yo kusīto so dukkhaṃ viharati taṃ kissa hetu svākkhātattā bhikkhave dhammassāti. [201] Durakkhāte bhikkhave dhammavinaye yo kusīto so sukhaṃ Viharati taṃ kissa hetu durakkhātattā bhikkhave dhammassāti. [202] Svākkhāte bhikkhave dhammavinaye yo āraddhaviviyo so sukhaṃ viharati taṃ kissa hetu svākkhātattā bhikkhave dhammassāti. [203] Seyyathāpi bhikkhave appamattakopi gūtho duggandho hoti evameva kho ahaṃ bhikkhave appamattakaṃpi bhavaṃ na vaṇṇemi antamaso accharāsaṃghātamattaṃpīti. [204] Seyyathāpi bhikkhave appamattakaṃpi muttaṃ duggandhaṃ hoti ... appamattakopi kheḷo duggandho hoti ... appamattakopi pubbo duggandho hoti ... appamattakaṃpi lohitaṃ duggandhaṃ hoti evameva kho ahaṃ bhikkhave appamattakaṃpi bhavaṃ na vaṇṇemi antamaso accharāsaṃghātamattaṃpīti. Vaggo tatiyo. [205] Seyyathāpi bhikkhave appamattakaṃ imasmiṃ jambūdīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyakaṃ athakho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ evameva kho bhikkhave appakā te sattā ye thalajā athakho eteva sattā bahutarā ye odakā . evameva kho bhikkhave appakā te sattā ye manussesu paccājāyanti athakho eteva sattā bahutarā ye aññatra manussehi paccājāyanti . evameva kho bhikkhave appakā te sattā ye majjhimesu janapadesu paccājāyanti Athakho eteva sattā bahutarā ye paccantimesu janapadesu paccājāyanti aviññātāresu milakkhesu . evameva kho bhikkhave appakā te sattā ye paññavanto ajaḷā aneḷamūgā paṭibalā subhāsitadubbhāsitassa atthamaññātuṃ athakho eteva sattā bahutarā ye duppaññā jaḷā eḷamūgā na paṭibalā subhāsitadubbhāsitassa atthamaññātuṃ . evameva kho bhikkhave appakā te sattā ye ariyena paññācakkhunā samannāgatā athakho eteva sattā bahutarā ye avijjāgatā sammūḷhā. Evameva kho bhikkhave appakā te sattā ye labhanti tathāgataṃ dassanāya athakho eteva sattā bahutarā ye na labhanti tathāgataṃ dassanāya evameva kho bhikkhave appakā te sattā ye labhanti tathāgatappaveditaṃ dhammavinayaṃ savanāya athakho eteva sattā bahutarā ye na labhanti tathāgatappaveditaṃ dhammavinayaṃ savanāya . evameva kho bhikkhave appakā te sattā ye sutvā dhammaṃ dhārenti athakho eteva sattā bahutarā ye sutvā dhammaṃ na dhārenti. {205.1} Evameva kho bhikkhave appakā te sattā ye dhatānaṃ dhammānaṃ atthaṃ upaparikkhanti athakho eteva sattā bahutarā ye dhatānaṃ dhammānaṃ atthaṃ na upaparikkhanti . evameva kho bhikkhave appakā te sattā ye atthamaññāya dhammamaññāya dhammānudhammaṃ paṭipajjanti athakho eteva sattā bahutarā ye atthamaññāya dhammamaññāya dhammānudhammaṃ na paṭipajjanti . evameva kho bhikkhave appakā te sattā ye saṃvejanīyesu ṭhānesu saṃvijanti athakho eteva Sattā bahutarā ye saṃvejanīyesu ṭhānesu na saṃvijanti . Evameva kho bhikkhave appakā te sattā ye saṃviggā yoniso padahanti athakho eteva sattā bahutarā ye saṃviggā yoniso na padahanti. Evameva kho bhikkhave appakā te sattā ye vavassaggārammaṇaṃ karitvā labhanti samādhiṃ labhanti cittassekaggataṃ athakho eteva sattā bahutarā ye vavassaggārammaṇaṃ karitvā na labhanti samādhiṃ na labhanti cittassekaggataṃ. {205.2} Evameva kho bhikkhave appakā te sattā ye annaggarasaggānaṃ lābhino athakho eteva sattā bahutarā ye annaggarasaggānaṃ na lābhino uñchena kapālabhattena yāpenti . Evameva kho bhikkhave appakā te sattā ye attharasassa dhammarasassa vimuttirasassa lābhino athakho eteva sattā bahutarā ye attharasassa dhammarasassa vimuttirasassa na lābhino . tasmā tiha bhikkhave evaṃ sikkhitabbaṃ attharasassa dhammarasassa vimuttirasassa lābhino bhavissāmāti evaṃ hi vo bhikkhave sikkhitabbanti. [206] Seyyathāpi bhikkhave appamattakaṃ imasmiṃ jambūdīpe ārāmarāmaṇeyyakaṃ vanarāmaṇeyyakaṃ bhūmirāmaṇeyyakaṃ pokkharaṇīrāmaṇeyyakaṃ athakho etadeva bahutaraṃ yadidaṃ ukkūlavikūlaṃ nadīviduggaṃ khāṇukaṇṭakaṭṭhānaṃ pabbatavisamaṃ evameva kho bhikkhave appakā te sattā ye manussā cutā manussesu paccājāyanti athakho eteva sattā bahutarā ye manussā cutā niraye paccājāyanti tiracchānayoniyā paccājāyanti pittivisaye ^1- paccājāyanti . Evameva kho bhikkhave appakā te sattā @Footnote: ¹ Ma. pettivisaye. sabbattha īdisameva. Ye manussā cutā devesu paccājāyanti athakho eteva sattā bahutarā ye manussā cutā niraye paccājāyanti tiracchānayoniyā paccājāyanti pittivisaye paccājāyanti . evameva kho bhikkhave appakā te sattā ye devā cutā devesu paccājāyanti athakho eteva sattā bahutarā ye devā cutā niraye paccājāyanti tiracchānayoniyā paccājāyanti pittivisaye paccājāyanti . evameva kho bhikkhave appakā te sattā ye devā cutā manussesu paccājāyanti athakho eteva sattā bahutarā ye devā cutā niraye paccājāyanti tiracchānayoniyā paccājāyanti pittivisaye paccājāyanti . Evameva kho bhikkhave appakā te sattā ye nirayā cutā manussesu paccājāyanti athakho eteva sattā bahutarā ye nirayā cutā niraye paccājāyanti tiracchānayoniyā paccājāyanti pittivisaye paccājāyanti. {206.1} Evameva kho bhikkhave appakā te sattā ye nirayā cutā devesu paccājāyanti athakho eteva sattā bahutarā ye nirayā cutā niraye paccājāyanti tiracchānayoniyā paccājāyanti pittivisaye paccājāyanti . evameva kho bhikkhave appakā te sattā ye tiracchānayoniyā cutā manussesu paccājāyanti athakho eteva sattā bahutarā ye tiracchānayoniyā cutā niraye paccājāyanti tiracchānayoniyā paccājāyanti pittivisaye paccājāyanti . evameva kho bhikkhave appakā te sattā ye tiracchānayoniyā cutā devesu Paccājāyanti athakho eteva sattā bahutarā ye tiracchānayoniyā cutā niraye paccājāyanti tiracchānayoniyā paccāyanti pittivisaye paccājāyanti . evameva kho bhikkhave appakā te sattā ye pittivisayā cutā manussesu paccājāyanti athakho eteva sattā bahutarā ye pittivisayā cutā niraye paccājāyanti tiracchānayoniyā paccājāyanti pittivisaye paccājāyanti . evameva kho bhikkhave appakā te sattā ye pittivisayā cutā devesu paccājāyanti athakho eteva sattā bahutarā ye pittivisayā cutā niraye paccājāyanti tiracchānayoniyā paccājāyanti pittivisaye paccājāyanti. Vaggo catuttho. ^[1]- Pasādakaradhammādipāli [207] Addhamidaṃ bhikkhave lābhānaṃ yadidaṃ āraññakattaṃ ^2- piṇḍapātikattaṃ paṃsukūlikattaṃ tecīvarikattaṃ dhammakathikattaṃ vinayadharakattaṃ bāhusaccaṃ thāvareyyaṃ ākappasampadā parivārasampadā mahāparivāratā kulaputti ^3- vaṇṇapokkharatā kalyāṇavākkaraṇatā appicchatā appābādhatāti. [208] Accharāsaṅghātamattaṃpi ce bhikkhave bhikkhu paṭhamaṃ jhānaṃ bhāveti ayaṃ vuccati bhikkhave bhikkhu arittajjhāno viharati satthusāsanakaro ovādapaṭikaro amoghaṃ raṭṭhapiṇḍaṃ bhuñjati ko pana vādo ye naṃ bahulīkarontīti. [209] Accharāsaṅghātamattaṃpi ce bhikkhave bhikkhu dutiyaṃ jhānaṃ bhāveti @Footnote: ¹ Ma. jambudīpapeyyālo niṭṭhito. ² Ma. araññikattaṃ. ³ Ma. Yu. kolaputti. ... Tatiyaṃ jhānaṃ bhāveti ... catutthaṃ jhānaṃ bhāveti ... mettaṃ cetovimuttiṃ bhāveti ... karuṇaṃ cetovimuttiṃ bhāveti ... muditaṃ cetovimuttiṃ bhāveti ... upekkhaṃ cetovimuttiṃ bhāveti ... kāye kāyānupassī viharati ātāpī sampajāno satimā vineyya loke abhijjhādomanassaṃ ... vedanāsu vedanānupassī viharati .pe. citte cittānupassī viharati .pe. dhammesu dhammānupassī viharati ātāpī sampajāno satimā vineyya loke abhijjhādomanassaṃ ... anuppannānaṃ pāpakānaṃ akusalānaṃ dhammānaṃ anuppādāya chandaṃ janeti vāyamati viriyaṃ ārabhati cittaṃ paggaṇhāti padahati ... uppannānaṃ pāpakānaṃ akusalānaṃ dhammānaṃ pahānāya chandaṃ janeti vāyamati viriyaṃ ārabhati cittaṃ paggaṇhāti padahati ... anuppannānaṃ kusalānaṃ dhammānaṃ uppādāya chandaṃ janeti vāyamati viriyaṃ ārabhati cittaṃ paggaṇhāti padahati ... uppannānaṃ kusalānaṃ dhammānaṃ ṭhitiyā asammosāya bhiyyobhāvāya vepullāya bhāvanāya pāripūriyā chandaṃ janeti vāyamati viriyaṃ ārabhati cittaṃ paggaṇhāti padahati {209.1} ... chandasamādhipadhānasaṅkhārasamannāgataṃ iddhipādaṃ bhāveti ... viriyasamādhipadhānasaṅkhārasamannāgataṃ iddhipādaṃ bhāveti ... Cittasamādhipadhānasaṅkhārasamannāgataṃ iddhipādaṃ bhāveti ... Vīmaṃsāsamādhipadhānasaṅkhārasamannāgataṃ iddhipādaṃ bhāveti ... saddhindriyaṃ bhāveti ... viriyindriyaṃ bhāveti ... Satindriyaṃ bhāveti ... Samādhindriyaṃ bhāveti ... Paññindriyaṃ bhāveti ... Saddhābalaṃ bhāveti ... Viriyabalaṃ bhāveti ... Satibalaṃ bhāveti ... samādhibalaṃ bhāveti ... paññābalaṃ bhāveti ... satisambojjhaṅgaṃ bhāveti ... dhammavicayasambojjhaṅgaṃ bhāveti ... Viriyasambojjhaṅgaṃ bhāveti ... pītisambojjhaṅgaṃ bhāveti ... passaddhi- sambojjhaṅgaṃ bhāveti ... samādhisambojjhaṅgaṃ bhāveti ... Upekkhā- sambojjhaṅgaṃ bhāveti ... sammādiṭṭhiṃ bhāveti ... sammāsaṅkappaṃ bhāveti ... sammāvācaṃ bhāveti ... sammākammantaṃ bhāveti ... Sammāājīvaṃ bhāveti ... sammāvāyāmaṃ bhāveti ... Sammāsatiṃ bhāveti ... Sammāsamādhiṃ bhāveti ... [210] Ajjhattaṃ rūpasaññī bahiddhā rūpāni passati parittāni suvaṇṇadubbaṇṇāni tāni abhibhuyya jānāmi passāmīti evaṃ saññī hoti ... [211] Ajjhattaṃ rūpasaññī bahiddhā rūpāni passati appamāṇāni suvaṇṇadubbaṇṇāni tāni abhibhuyya jānāmi passāmīti evaṃ saññī hoti ... [212] Ajjhattaṃ arūpasaññī bahiddhā rūpāni passati parittāni suvaṇṇadubbaṇṇāni tāni abhibhuyya jānāmi passāmīti evaṃ saññī hoti ... [213] Ajjhattaṃ arūpasaññī bahiddhā rūpāni passati appamāṇāni suvaṇṇadubbaṇṇāni tāni abhibhuyya jānāmi passāmīti evaṃ saññī hoti ... [214] Ajjhattaṃ arūpasaññī bahiddhā rūpāni passati nīlāni nīlavaṇṇāni nīlanidassanāni nīlanibhāsāni tāni abhibhuyya jānāmi passāmīti evaṃ saññī hoti ... [215] Ajjhattaṃ arūpasaññī bahiddhā rūpāni passati pītāni pītavaṇṇāni pītanidassanāni pītanibhāsāni tāni abhibhuyya jānāmi passāmīti evaṃ saññī hoti ... [216] Ajjhattaṃ arūpasaññī bahiddhā rūpāni passati lohitakāni lohitakavaṇṇāni lohitakanidassanāni lohitakanibhāsāni tāni abhibhuyya jānāmi passāmīti evaṃ saññī hoti ... [217] Ajjhattaṃ arūpasaññī bahiddhā rūpāni passati odātāni odātavaṇṇāni odātanidassanāni odātanibhāsāni tāni abhibhuyya jānāmi passāmīti evaṃ saññī hoti ... Rūpī rūpāni passati ... [218] Ajjhattaṃ arūpasaññī bahiddhā rūpāni passati ... Subhanteva adhimutto hoti ... [219] Sabbaso rūpasaññānaṃ samatikkamā paṭighasaññānaṃ atthaṅgamā nānattasaññānaṃ amanasikārā ananto ākāsoti ākāsānañcāyatanaṃ upasampajja viharati ... [220] Sabbaso ākāsānañcāyatanaṃ samatikkamma anantaṃ viññāṇanti viññāṇañcāyatanaṃ upasampajja viharati ... [221] Sabbaso viññāṇañcāyatanaṃ samatikkamma natthi kiñcīti Ākiñcaññāyatanaṃ upasampajja viharati ... [222] Sabbaso ākiñcaññāyatanaṃ samatikkamma nevasaññā- nāsaññāyatanaṃ upasampajja viharati ... [223] Sabbaso nevasaññānāsaññāyatanaṃ samatikkamma saññāvedayitanirodhaṃ upasampajja viharati ... [224] Paṭhavīkasiṇaṃ bhāveti ... āpokasiṇaṃ bhāveti ... Tejokasiṇaṃ bhāveti ... vāyokasiṇaṃ bhāveti ... nīlakasiṇaṃ bhāveti ... pītakasiṇaṃ bhāveti ... lohitakasiṇaṃ bhāveti ... odātakasiṇaṃ bhāveti ... ākāsakasiṇaṃ bhāveti ... viññāṇakasiṇaṃ bhāveti ... asubhasaññaṃ bhāveti ... maraṇasaññaṃ bhāveti ... āhāre paṭikkūlasaññaṃ bhāveti ... sabbaloke anabhiratasaññaṃ bhāveti ... Aniccasaññaṃ bhāveti ... anicce dukkhasaññaṃ bhāveti ... dukkhe anattasaññaṃ bhāveti ... pahānasaññaṃ bhāveti ... virāgasaññaṃ bhāveti ... nirodhasaññaṃ bhāveti ... aniccasaññaṃ bhāveti ... Anattasaññaṃ bhāveti ... maraṇasaññaṃ bhāveti ... Āhāre paṭikkūlasaññaṃ bhāveti ... sabbaloke anabhiratasaññaṃ bhāveti ... aṭṭhikasaññaṃ bhāveti ... puḷavakasaññaṃ bhāveti ... vinīlakasaññaṃ bhāveti ... Vicchiddakasaññaṃ bhāveti ... Uddhumātakasaññaṃ bhāveti ... {224.1} Buddhānussatiṃ bhāveti ... dhammānussatiṃ bhāveti ... Saṅghānussatiṃ bhāveti ... Sīlānussatiṃ bhāveti ... Cāgānussatiṃ bhāveti ... Devatānussatiṃ bhāveti ... ānāpānasati bhāveti ... maraṇasatiṃ bhāveti ... kāyagatāsatiṃ bhāveti ... upasamānussatiṃ bhāveti ... Paṭhamajjhānasahagataṃ saddhindriyaṃ bhāveti ... viriyindriyaṃ bhāveti ... Satindriyaṃ bhāveti ... samādhindriyaṃ bhāveti ... paññindriyaṃ bhāveti ... saddhābalaṃ bhāveti ... viriyabalaṃ bhāveti ... satibalaṃ bhāveti ... samādhibalaṃ bhāveti ... Paññābalaṃ bhāveti ... Dutiyajjhānasahagataṃ .pe. Tatiyajjhānasahagataṃ .pe. catutthajjhānasahagataṃ .pe. mettāsahagataṃ .pe. karuṇāsahagataṃ .pe. muditāsahagataṃ .pe. upekkhāsahagataṃ saddhindriyaṃ bhāveti ... viriyindriyaṃ bhāveti ... satindriyaṃ bhāveti ... samādhindriyaṃ bhāveti ... paññindriyaṃ bhāveti ... Saddhābalaṃ bhāveti ... viriyabalaṃ bhāveti ... satibalaṃ bhāveti ... Samādhibalaṃ bhāveti ... paññābalaṃ bhāveti ayaṃ vuccati bhikkhave bhikkhu arittajjhāno viharati satthusāsanakaro ovādapaṭikaro amoghaṃ raṭṭhapiṇḍaṃ bhuñjati ko pana vādo ye naṃ bahulīkarontīti. [225] Yassa kassaci bhikkhave mahāsamuddo cetasā phuṭo antogadhā tassa kunnadiyo yākāci samuddaṅgamā evameva kho ^1- bhikkhave yassa kassaci kāyagatāsati bhāvitā bahulīkatā antogadhā tassa kusalā dhammā yekeci vijjābhāgiyāti. [226] Ekadhammo bhikkhave bhāvito bahulīkato mahato saṃvegāya saṃvattati mahato atthāya saṃvattati mahato yogakkhemāya saṃvattati @Footnote: ¹ Ma. ayaṃ saddo natthi. Satisampajaññāya saṃvattati ñāṇadassanapaṭilābhāya saṃvattati diṭṭhadhammasukhavihārāya saṃvattati vijjāvimuttiphalasacchikiriyāya saṃvattati katamo ekadhammo kāyagatāsati ayaṃ kho bhikkhave ekadhammo bhāvito bahulīkato mahato saṃvegāya saṃvattati mahato atthāya saṃvattati mahato yogakkhemāya saṃvattati satisampajaññāya saṃvattati ñāṇadassanapaṭilābhāya saṃvattati diṭṭhadhammasukhavihārāya saṃvattati vijjāvimuttiphalasacchikiriyāya saṃvattatīti. [227] Ekadhamme bhikkhave bhāvite bahulīkate kāyopi passambhati cittaṃpi passambhati vitakkavicārāpi vūpasammanti kevalāpi vijjābhāgiyā dhammā bhāvanāpāripūriṃ gacchanti katamasmiṃ ekadhamme kāyagatāsatiyā ^1- imasmiṃ kho bhikkhave ekadhamme bhāvite bahulīkate kāyopi passambhati cittaṃpi passambhati vitakkavicārāpi vūpasammanti kevalāpi vijjābhāgiyā dhammā bhāvanāpāripūriṃ gacchantīti. [228] Ekadhamme bhikkhave bhāvite bahulīkate anuppannā ceva akusalā dhammā nuppajjanti uppannā ca akusalā dhammā pahīyanti katamasmiṃ ekadhamme kāyagatāsatiyā ^2- imasmiṃ kho bhikkhave ekadhamme bhāvite bahulīkate anuppannā ceva akusalā dhammā nuppajjanti uppannā ca akusalā dhammā pahīyantīti. [229] Ekadhamme bhikkhave bhāvite bahulīkate anuppannā ceva kusalā dhammā uppajjanti uppannā ca kusalā dhammā bhiyyobhāvāya @Footnote: ^1-2 Ma. kāyagatāya satiyā. ito paraṃ īdisameva. Vepullāya saṃvattati katamasmiṃ ekadhamme kāyagatāsatiyā imasmiṃ kho bhikkhave ekadhamme bhāvite bahulīkate anuppannā ceva kusalā dhammā uppajjanti uppannā ca kusalā dhammā bhiyyobhāvāya vepullāya saṃvattantīti. [230] Ekadhamma bhikkhave bhāvite bahulīkate avijjā pahīyati vijjā uppajjati asmimāno pahīyati anusayā samugghātaṃ gacchanti saññojanā pahīyanti katamasmiṃ ekadhamme kāyagatāsatiyā imasmiṃ kho bhikkhave ekadhamme bhāvite bahulīkate avijjā pahīyati vijjā uppajjati asmimāno pahīyati anusayā samugghātaṃ gacchanti saññojanā pahīyantīti. [231] Ekadhammo bhikkhave bhāvito bahulīkato paññāppabhedāya saṃvattati anupādāparinibbānāya saṃvattati katamo ekadhammo kāyagatāsati ayaṃ kho bhikkhave ekadhammo bhāvito bahulīkato paññāppabhedāya saṃvattati anupādāparinibbānāya saṃvattatīti. [232] Ekadhamme bhikkhave bhāvite bahulīkate anekadhātupaṭivedho hoti nānādhātupaṭivedho hoti anekadhātupaṭisambhidā hoti katamasmiṃ ekadhamme kāyagatāsatiyā imasmiṃ kho bhikkhave ekadhamme bhāvite bahulīkate anekadhātupaṭivedho hoti nānādhātupaṭivedho hoti anekadhātupaṭisambhidā hotīti. [233] Ekadhammo bhikkhave bhāvito bahulīkato sotāpattiphalasacchikiriyāya Saṃvattati sakadāgāmiphalasacchikiriyāya saṃvattati anāgāmiphalasacchikiriyāya saṃvattati arahattaphalasacchikiriyāya saṃvattati katamo ekadhammo kāyagatāsati ayaṃ kho bhikkhave ekadhammo bhāvito bahulīkato sotāpattiphalasacchikiriyāya saṃvattati sakadāgāmiphalasacchikiriyāya saṃvattati anāgāmiphalasacchikiriyāya saṃvattati arahattaphalasacchikiriyāya saṃvattatīti. [234] Ekadhammo bhikkhave bhāvito bahulīkato paññāpaṭilābhāya saṃvattati paññāvuḍḍhiyā saṃvattati paññāvepullāya saṃvattati mahāpaññatāya saṃvattati puthupaññatāya saṃvattati vipulapaññatāya saṃvattati gambhīrapaññatāya saṃvattati asamatthapaññatāya ^1- saṃvattati bhūripaññatāya saṃvattati paññābāhullāya saṃvattati sīghapaññatāya saṃvattati lahupaññatāya saṃvattati hāsapaññatāya saṃvattati javanapaññatāya saṃvattati tikkhapaññatāya saṃvattati nibbedhikapaññatāya saṃvattati katamo ekadhammo kāyagatāsati ayaṃ kho bhikkhave ekadhammo bhāvito bahulīkato paññāpaṭilābhāya saṃvattati paññāvuḍḍhiyā saṃvattati paññāvepullāya saṃvattati mahāpaññatāya saṃvattati puthupaññatāya saṃvattati vipulapaññatāya saṃvattati gambhīrapaññatāya saṃvattati asamatthapaññatāya ^2- saṃvattati bhūripaññatāya saṃvattati paññābāhullāya saṃvattati sīghapaññatāya saṃvattati lahupaññatāya saṃvattati hāsapaññatāya saṃvattati javanapaññatāya saṃvattati tikkhapaññatāya saṃvattati nibbedhikapaññatāya saṃvattatīti. @Footnote: ^1-2 Ma. asamantapaññatāya. Yu. asāmanuta ...... [235] Amatante bhikkhave na paribhuñjanti ye kāyagatāsatiṃ na paribhuñjanti . amatante bhikkhave paribhuñjanti ye kāyagatāsatiṃ paribhuñjantīti. [236] Amatantesaṃ bhikkhave aparibhuttaṃ yesaṃ kāyagatāsati aparibhuttā . amatantesaṃ bhikkhave paribhuttaṃ yesaṃ kāyagatāsati paribhuttāti. [237] Amatantesaṃ bhikkhave parihīnaṃ yesaṃ kāyagatāsati parihīnā. Amatantesaṃ bhikkhave aparihīnaṃ yesaṃ kāyagatāsati aparihīnāti. [238] Amatantesaṃ bhikkhave viraddhaṃ yesaṃ kāyagatāsati viraddhā. Amatantesaṃ bhikkhave āraddhaṃ yesaṃ kāyagatāsati āraddhāti. [239] Amatante bhikkhave pamādiṃsu ye kāyagatāsatiṃ pamādiṃsu. Amatante bhikkhave na pamādiṃsu ye kāyagatāsatiṃ na pamādiṃsūti. [240] Amatantesaṃ bhikkhave pamuṭṭhaṃ yesaṃ kāyagatāsati pamuṭṭhā. Amatantesaṃ bhikkhave appamuṭṭhaṃ yesaṃ kāyagatāsati appamuṭṭhāti. [241] Amatantesaṃ bhikkhave anāsevitaṃ yesaṃ kāyagatāsati anāsevitā . amatantesaṃ bhikkhave āsevitaṃ yesaṃ kāyagatāsati āsevitāti. [242] Amatantesaṃ bhikkhave abhāvitaṃ yesaṃ kāyagatāsati abhāvitā. Amatantesaṃ bhikkhave bhāvitaṃ yesaṃ kāyagatāsati bhāvitāti. [243] Amatantesaṃ bhikkhave abahulīkataṃ yesaṃ kāyagatāsati Abahulīkatā . amatantesaṃ bhikkhave bahulīkataṃ yesaṃ kāyagatāsati bahulīkatāti. [244] Amatantesaṃ bhikkhave anabhiññātaṃ yesaṃ kāyagatāsati anabhiññātā . amatantesaṃ bhikkhave abhiññātaṃ yesaṃ kāyagatāsati abhiññātāti. [245] Amatantesaṃ bhikkhave apariññātaṃ yesaṃ kāyagatāsati apariññātā . amatantesaṃ bhikkhave pariññātaṃ yesaṃ kāyagatāsati pariññātāti. [246] Amatantesaṃ bhikkhave asacchikataṃ yesaṃ kāyagatāsati asacchikatā . amatantesaṃ bhikkhave sacchikataṃ yesaṃ kāyagatāsati sacchikatāti. ^[1]- ^[2]- -------------- Ekanipātassa suttasahassaṃ samattaṃ ^3-. @Footnote: ¹ Ma. idamavo ca bhagavā attamanā te bhikkhū bhagavato bhāsitaṃ abhinandunti. @² Ma. amatavaggo. ³ Ma. ekakanipātapāli niṭṭhitā.

The Pali Tipitaka in Roman Character Volume 20 page 1-60. http://84000.org/tipitaka/pitaka_item/roman_item_s.php?book=20&item=1&items=246 Classified by [Item Number] :- http://84000.org/tipitaka/pitaka_item/roman_item_s.php?book=20&item=1&items=246&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=20&item=1&items=246 Compare with The Royal Version of Thai Tipitaka :- http://84000.org/tipitaka/read/byitem_s.php?book=20&item=1&items=246 Study Atthakatha :- http://84000.org/tipitaka/attha/attha.php?b=20&i=1 The Pali Atthakatha in Thai :- http://84000.org/tipitaka/atthapali/read_th.php?B=14&A=1 The Pali Atthakatha in Roman :- http://84000.org/tipitaka/atthapali/read_rm.php?B=14&A=1 Contents of The Tipitaka Volume 20 http://84000.org/tipitaka/read/?index_20