[89] Athakho kokāliko 3- bhikkhu yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi ekamantaṃ
nisinno kho kokāliko bhikkhu bhagavantaṃ etadavoca pāpicchā bhante
sārīputtamoggallānā pāpikānaṃ icchānaṃ vasaṅgatāti . mā hevaṃ
kokālika mā hevaṃ kokālika pasādehi kokālika sārīputtamoggallānesu
cittaṃ pesalā sārīputtamoggallānāti.
{89.1} Dutiyampi kho kokāliko bhikkhu bhagavantaṃ etadavoca
kiñcāpi me bhante bhagavā saddhāyiko paccayiko athakho pāpicchāva
sārīputtamoggallānā pāpikānaṃ icchānaṃ vasaṅgatāti . mā hevaṃ
kokālika mā hevaṃ kokālika pasādehi kokālika sārīputtamoggallānesu
@Footnote: 1 Ma. ṭhānametaṃ avakāso . 2 Ma. ... byasanānaṃ aññataraṃ bayasanaṃ nigaccheyya.
@Yu. aññataraṃ .... 3 Po. kokāliyo bhikkhu. sabbattha evaṃ ñātabbaṃ.
Cittaṃ pesalā sārīputtamoggallānāti.
{89.2} Tatiyampi kho kokāliko bhikkhu bhagavantaṃ etadavoca
kiñcāpi kho me bhante bhagavā saddhāyiko paccayiko athakho pāpicchāva
sārīputtamoggallānā pāpikānaṃ icchānaṃ vasaṅgatāti . mā hevaṃ
kokālika mā hevaṃ kokālika pasādehi kokālika sārīputtamoggallānesu
cittaṃ pesalā sārīputtamoggallānāti.
{89.3} Athakho kokāliko bhikkhu uṭṭhāyāsanā bhagavantaṃ abhivādetvā
padakkhiṇaṃ katvā pakkāmi acirapakkantassa ca kokālikassa bhikkhuno
sāsapamattīhi piḷakāhi sabbo kāyo phuṭṭho ahosi sāsapamattiyo
hutvā muggamattiyo ahesuṃ muggamattiyo hutvā kāḷāyamattiyo 1-
ahesuṃ kāḷāyamattiyo hutvā kolaṭṭhimattiyo ahesuṃ kolaṭṭhimattiyo
hutvā kolamattiyo ahesuṃ kolamattiyo hutvā āmalakamattiyo
ahesuṃ āmalakamattiyo hutvā [2]- veluvasalāṭukamattiyo 3- ahesuṃ
veluvasalāṭukamattiyo hutvā villamattiyo ahesuṃ villamattiyo hutvā
pabhijjiṃsu pubbañca lohitañca pagghariṃsu svāssudaṃ kaddalipattesu
seti macchova visakalikato 4-.
{89.4} Athakho tudipaccekabrahmā 5- yena kokāliko bhikkhu
tenupasaṅkami upasaṅkamitvā vehāse ṭhatvā kokālikaṃ bhikkhuṃ
etadavoca pasādehi kokālika sārīputtamoggallānesu cittaṃ
pesalā sārīputtamoggallānāti . kosi tvaṃ āvusoti . ahaṃ
tudipaccekabrahmāti . nanu tvaṃ āvuso bhagavatā anāgāmī byākato
atha kiñcarahi idhāgato passa yāvañca te idaṃ aparaddhanti . athakho
@Footnote: 1 Po. kaḷāyamattiyo. Ma. Yu. kalāyamattiyo. 2 Ma. tiṇḍukmattiyo ahesuṃ
@tiṇḍukamattiyo hutvā. 3 Ma. Yu. beḷuvasilāṭkamattiyo. 4 Po. visakalekato.
@Ma. Yu. visagilito. 5 Ma. tulūpaccekabrahmā. Yu. tudupaccekabrahmā.
Tudipaccekabrahmā kokālikaṃ bhikkhuṃ gāthāya 1- ajjhabhāsi
purisassa hi jātassa kudhārī jāyate mukhe
yāya chindati attānaṃ bālo dubbhāsitaṃ bhaṇaṃ.
Yo nindiyaṃ pasaṃsati taṃ vā nindati yo pasaṃsiyo
vicināti mukhena so kaliṃ kalinā tena sukhaṃ na vindati.
Appamatto ayaṃ kali
yo akkhesu dhanaparājayo
(sabbassāpi sahāpi attanā)
ayameva mahattaro 2- kali
yo sugatesu manaṃ padosaye 3-.
Sataṃ sahassānaṃ nirabbudānaṃ
chattiṃsati pañca ca abbudāni
yamariyagarahī nirayaṃ upeti
vācaṃ manañca 4- paṇidhāya pāpakanti.
{89.5} Athakho kokāliko bhikkhu tenevābādhena kālamakāsi kālakato
ca kokāliko bhikkhu padumanirayaṃ upapajjati sārīputtamoggallānesu
cittaṃ āghāṭetvā . athakho brahmā sahampati abhikkantāya rattiyā
abhikkantavaṇṇo kevalakappaṃ jetavanaṃ obhāsetvā yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ aṭṭhāsi ekamantaṃ
ṭhito kho brahmā sahampati bhagavantaṃ etadavoca kokāliko
@Footnote: 1 Ma. gāthāhi. 2 Po. mahantataro. 3 Po. Ma. padūsaye. 4 Po. vācāmanañca.
Bhante bhikkhu kālakato kālakato ca bhante kokāliko bhikkhu padumanirayaṃ
upapanno sārīputtamoggallānesu cittaṃ āghāṭetvāti idamavoca
brahmā sahampati idaṃ vatvā bhagavantaṃ abhivādetvā padakkhiṇaṃ katvā
tatthevantaradhāyi.
{89.6} Athakho bhagavā tassā rattiyā accayena bhikkhū āmantesi
imaṃ bhikkhave rattiṃ brahmā sahampati abhikkantāya rattiyā abhikkantavaṇṇo
kevalakappaṃ jetavanaṃ obhāsetvā yenāhaṃ tenupasaṅkami upasaṅkamitvā maṃ
abhivādetvā ekamantaṃ aṭṭhāsi ekamantaṃ ṭhito kho bhikkhave brahmā
sahampati maṃ etadavoca kokāliko bhante bhikkhu kālakato kālakato ca
bhante kokāliko bhikkhu padumanirayaṃ upapanno sārīputtamoggallānesu
cittaṃ āghāṭetvāti idamavoca bhikkhave brahmā sahampati idaṃ vatvā
maṃ abhivādetvā padakkhiṇaṃ katvā tatthevantaradhāyīti.
Evaṃ vutte aññataro bhikkhu bhagavantaṃ etadavoca kīvadīghaṃ nu kho bhante
padumaniraye āyuppamāṇanti . dīghaṃ kho bhikkhu padumaniraye āyuppamāṇaṃ
taṃ na sukaraṃ saṅkhātuṃ ettakāni vassānīti vā ettakāni vassasatānīti vā
ettakāni vassasahassānīti vā ettakāni vassasatasahassānīti vāti.
{89.7} Sakkā pana bhante upamā 1- kātunti. Sakkā bhikkhūti
bhagavā avoca seyyathāpi bhikkhave vīsatikhāriko kosalako tilavāho tato
puriso vassasatasahassassa accayena ekamekaṃ tilaṃ uddhareyya
khippataraṃ kho so bhikkhu vīsatikhāriko kosalako tilavāho
@Footnote: 1 Ma. .. upamaṃ.
Iminā upakkamena parikkhayaṃ pariyādānaṃ gaccheyya na tveva eko
abbudo nirayo seyyathāpi bhikkhu vīsati abbudā nirayā evameko
nirabbudo nirayo seyyathāpi bhikkhu vīsati nirabbudā nirayā evameko
ababbo 1- nirayo seyyathāpi bhikkhu vīsati ababbā nirayā evameko
ahaho nirayo seyyathāpi bhikkhu vīsati ahahā nirayā evameko
aṭaṭo nirayo seyyathāpi bhikkhu vīsati aṭaṭā nirayā evameko
kumudo nirayo seyyathāpi bhikkhu vīsati kumudā nirayā evameko
sogandhiko nirayo seyyathāpi bhikkhu vīsati sogandhikā nirayā evameko
uppalo 2- nirayo seyyathāpi bhikkhu uppalā nirayā evameko puṇḍarīko
nirayo seyyathāpi bhikkhu vīsati puṇḍarīkā nirayā evameko padumo
nirayo padumaṃ kho pana bhikkhu nirayaṃ kokāliko bhikkhu upapanno
sārīputtamoggallānesu cittaṃ āghāṭetvāti idamavoca bhagavā idaṃ
vatvāna sugato athāparaṃ etadavoca satthā
purisassa hi jātassa kudhārī jāyate mukhe
yāya chindati attānaṃ bālo dubbhāsitaṃ bhaṇaṃ.
Yo nindiyaṃ pasaṃsati taṃ vā nindati yo pasaṃsiyo
vicināti mukhena so kaliṃ kalinā tena sukhaṃ na vindati.
Appamatto ayaṃ kali yo akkhesu dhanaparājayo
(sabbassāpi sahāpi attanā)
ayameva mahattaro kali
@Footnote: 1 Ma. Yu. abubo. 2 Ma. Yu. uppalako.
Yo sugatesu manaṃ padosaye.
Sataṃ sahassānaṃ nirabbudānaṃ
chattiṃsati pañca ca abbudāni
yamariyagarahī nirayaṃ upeti
vācaṃ manañca paṇidhāya pāpakanti.
[90] Athakho āyasmā sārīputto yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinnaṃ kho āyasmantaṃ sārīputtaṃ bhagavā etadavoca kati nu kho
sārīputta khīṇāsavassa bhikkhuno balāni yehi balehi samannāgato
khīṇāsavo bhikkhu āsavānaṃ khayaṃ paṭijānāti khīṇā me āsavāti.
{90.1} Dasa bhante khīṇāsavassa bhikkhuno balāni yehi balehi
samannāgato khīṇāsavo bhikkhu āsavānaṃ khayaṃ paṭijānāti khīṇā me
āsavāti . katamāni dasa idha bhante khīṇāsavassa bhikkhuno aniccato
sabbe saṅkhārā yathābhūtaṃ sammappaññāya sudiṭṭhā honti yampi bhante
khīṇāsavassa bhikkhuno aniccato sabbe saṅkhārā yathābhūtaṃ sammappaññāya
sudiṭṭhā honti idampi bhante khīṇāsavassa bhikkhuno balaṃ hoti yaṃ balaṃ
āgamma khīṇāsavo bhikkhu āsavānaṃ khayaṃ paṭijānāti khīṇā me āsavāti.
{90.2} Puna caparaṃ bhante khīṇāsavassa bhikkhuno aṅgārakāsūpamā
kāmā yathābhūtaṃ sammappaññāya sudiṭṭhā honti yampi bhante
khīṇāsavassa bhikkhuno aṅgārakāsūpamā kāmā yathābhūtaṃ sammappaññāya
Sudiṭṭhā honti idampi bhante khīṇāsavassa bhikkhuno balaṃ hoti yaṃ
balaṃ āgamma khīṇāsavo bhikkhu āsavānaṃ khayaṃ paṭijānāti khīṇā me
āsavāti.
{90.3} Puna caparaṃ bhante khīṇāsavassa bhikkhuno vivekaninnaṃ cittaṃ
hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ byantībhūtaṃ
sabbaso āsavaṭṭhāniyehi dhammehi yampi bhante khīṇāsavassa bhikkhuno
vivekaninnaṃ cittaṃ hoti vivekapoṇaṃ vivekapabbhāraṃ vivekaṭṭhaṃ nekkhammābhirataṃ
byantībhūtaṃ sabbaso āsavaṭṭhāniyehi dhammehi idampi bhante
khīṇāsavassa bhikkhuno balaṃ hoti yaṃ balaṃ āgamma khīṇāsavo bhikkhu
āsavānaṃ khayaṃ paṭijānāti khīṇā me āsavāti.
{90.4} Puna caparaṃ bhante khīṇāsavassa bhikkhuno cattāro satipaṭṭhānā
bhāvitā honti subhāvitā yampi bhante khīṇāsavassa bhikkhuno cattāro
satipaṭṭhānā bhāvitā honti subhāvitā idampi bhante khīṇāsavassa
bhikkhuno balaṃ hoti yaṃ balaṃ āgamma khīṇāsavo bhikkhu āsavānaṃ khayaṃ
paṭijānāti khīṇā me āsavāti.
{90.5} Puna caparaṃ bhante khīṇāsavassa bhikkhuno cattāro sammappadhānā
bhāvitā honti subhāvitā ... cattāro iddhippādā bhāvitā
honti subhāvitā ... pañcindriyāni pañca balāni bhāvitāni honti
subhāvitāni ... satta bojjhaṅgā bhāvitā honti subhāvitā ... Ariyo
aṭṭhaṅgiko maggo bhāvito hoti subhāvito yampi bhante khīṇāsavassa
bhikkhuno ariyo aṭṭhaṅgiko maggo bhāvito hoti subhāvito idampi
bhante khīṇāsavassa bhikkhuno balaṃ hoti yaṃ balaṃ āgamma khīṇāsavo
Bhikkhu āsavānaṃ khayaṃ paṭijānāti khīṇā me āsavāti . imāni
kho bhante dasa khīṇāsavassa bhikkhuno balāni yehi balehi samannāgato
khīṇāsavo bhikkhu āsavānaṃ khayaṃ paṭijānāti khīṇā me āsavāti.
Theravaggo catuttho.
Tassuddānaṃ
vāhuno cānando ca 1- puṇṇiyo ca byākaraṇaṃ
katthī aññādhikaraṇaṃ kokāliko ca balāni ca 2-.
------------
The Pali Tipitaka in Roman Character Volume 24 page 181-188.
http://84000.org/tipitaka/pitaka_item/roman_item_s.php?book=24&item=89&items=2
Classified by [Item Number] :-
http://84000.org/tipitaka/pitaka_item/roman_item_s.php?book=24&item=89&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=24&item=89&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=24&item=89&items=2
Study Atthakatha :-
http://84000.org/tipitaka/attha/attha.php?b=24&i=89
The Pali Atthakatha in Thai :-
http://84000.org/tipitaka/atthapali/read_th.php?B=16&A=8157
The Pali Atthakatha in Roman :-
http://84000.org/tipitaka/atthapali/read_rm.php?B=16&A=8157
Contents of The Tipitaka Volume 24
http://84000.org/tipitaka/read/?index_24
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
