paliTIPITAKA Volume 25 - Sutta Pitaka 17

Itivuttake catukkanipāto [280] 1 Vuttaṃ hetaṃ bhagavatā vuttamarahatāti me sutaṃ ahamasmi bhikkhave brāhmaṇo yācayogo sadā payatapāṇī antimadehadharo anuttaro bhisako sallakatto tassa me tumhe puttā orasā mukhato jātā dhammajā dhammanimmitā dhammadāyādā no āmisadāyādā . dvemāni bhikkhave dānāni āmisadānañca dhammadānañca etadaggaṃ bhikkhave imesaṃ dvinnaṃ dānānaṃ yadidaṃ dhammadānaṃ . dveme bhikkhave saṃvibhāgā āmisasaṃvibhāgo ca dhammasaṃvibhāgo ca etadaggaṃ bhikkhave imesaṃ dvinnaṃ saṃvibhāgānaṃ yadidaṃ dhammasaṃvibhāgo . dveme bhikkhave anuggahā āmisānuggaho ca dhammānuggaho ca etadaggaṃ bhikkhave imesaṃ dvinnaṃ anuggahānaṃ yadidaṃ dhammānuggaho . dveme bhikkhave yāgā āmisayāgo ca dhammayāgo ca etadaggaṃ bhikkhave imesaṃ dvinnaṃ yāgānaṃ yadidaṃ dhammayāgoti. Etamatthaṃ bhagavā avoca. Tatthetaṃ iti vuccati Yo dhammayāgaṃ ayajī ^1- amaccharī tathāgato sabbasattānukampī ^2- taṃ tādisaṃ devamanussaseṭṭhaṃ sattā namassanti bhavassa pāragunti. Ayampi attho vutto bhagavatā iti me sutanti. Paṭhamaṃ. [281] ² Cattārimāni bhikkhave appāni ceva sulabhāni ca tāni ca anavajjāni katamāni cattāri paṃsukūlaṃ bhikkhave cīvarānaṃ appañca sulabhañca tañca anavajjaṃ . piṇḍiyālopo bhikkhave bhojanānaṃ appañca sulabhañca tañca anavajjaṃ . rukkhamūlaṃ bhikkhave senāsanānaṃ appañca sulabhañca tañca anavajjaṃ . pūtimuttaṃ bhikkhave bhesajjānaṃ appañca sulabhañca tañca anavajjaṃ . imāni kho bhikkhave cattāri appāni ceva sulabhāni ca tāni ca anavajjāni. Yato kho bhikkhave bhikkhu appena ca tuṭṭho hoti sulabhena ca anavajjena ca imassāhaṃ aññataraṃ sāmaññaṅganti vadāmīti. Anavajjena tuṭṭhassa appena sulabhena ca na senāsanamārabbha cīvaraṃ pānabhojanaṃ vighāto hoti cittassa disā nappaṭihaññati. Yepassa ^3- dhammā akkhātā sāmaññassānulomikā adhiggahitā tuṭṭhassa appamattassa bhikkhunoti. Dutiyaṃ.

The Pali Tipitaka in Roman Character Volume 25 page 308-309. http://84000.org/tipitaka/pitaka_item/roman_item_s.php?book=25&item=280&items=2 Classified by [Item Number] :- http://84000.org/tipitaka/pitaka_item/roman_item_s.php?book=25&item=280&items=2&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=25&item=280&items=2 Compare with The Royal Version of Thai Tipitaka :- http://84000.org/tipitaka/read/byitem_s.php?book=25&item=280&items=2 Study Atthakatha :- http://84000.org/tipitaka/attha/attha.php?b=25&i=280 The Pali Atthakatha in Thai :- http://84000.org/tipitaka/atthapali/read_th.php?B=27&A=7998 The Pali Atthakatha in Roman :- http://84000.org/tipitaka/atthapali/read_rm.php?B=27&A=7998 Contents of The Tipitaka Volume 25 http://84000.org/tipitaka/read/?index_25