[293] 13 Vuttaṃ hetaṃ bhagavatā vuttamarahatāti me sutaṃ loko
bhikkhave tathāgatena abhisambuddho lokasmā tathāgato visaṃyutto
lokasamudayo bhikkhave tathāgatena abhisambuddho lokasamudayo tathāgatassa
pahīno lokanirodho bhikkhave tathāgatena abhisambuddho lokanirodho
tathāgatassa sacchikato lokanirodhagāminī paṭipadā bhikkhave tathāgatena
abhisambuddhā lokanirodhagāminī paṭipadā tathāgatassa bhāvitā.
{293.1} Yaṃ bhikkhave sadevakassa lokassa samārakassa sabrahmakassa
sassamaṇabrāhmaṇiyā pajāya sadevamanussāya diṭṭhaṃ sutaṃ mutaṃ
viññātaṃ pattaṃ pariyesitaṃ anuvicaritaṃ manasā yasmā taṃ tathāgatena
abhisambuddhaṃ tasmā tathāgatoti vuccati . yañca bhikkhave rattiṃ
tathāgato anuttaraṃ sammāsambodhiṃ abhisambujjhati yañca rattiṃ
anupādisesāya nibbānadhātuyā parinibbāyati yametasmiṃ antare
bhāsati labhati niddisati sabbantaṃ tatheva hoti no aññathā tasmā
@Footnote: 1 Yu. va.
Tathāgatoti vuccati.
{293.2} Yathāvādī bhikkhave tathāgato tathākārī yathākārī 1-
tathāvādī iti yathāvādī tathākārī yathākārī tathāvādī
tasmā tathāgatoti vuccati . sadevake bhikkhave loke samārake
sabrahmake sassamaṇabrāhmaṇiyā pajāya sadevamanussāya tathāgato
abhibhū anabhibhūto aññadatthudaso vasavattī tasmā tathāgatoti
vuccatīti. Etamatthaṃ bhagavā avoca. Tatthetaṃ iti vuccati
sabbalokaṃ abhiññāya sabbaloke yathātathaṃ
sabbalokavisaṃyutto sabbaloke anūpamo 2-
sabbe 3- sabbābhibhū dhīro sabbaganthappamocano.
Phuṭṭhassa 4- paramā santi nibbānaṃ akutobhayaṃ.
Esa khīṇāsavo buddho anīgho chinnasaṃsayo
sabbakammakkhayaṃ patto vimutto upadhisaṅkhaye
esa so bhagavā buddho esa sīho anuttaro
sadevakassa lokassa brahmacakkaṃ pavattayi.
Iti devā manussā ca ye buddhaṃ saraṇaṃ gatā
saṅgamma taṃ namassanti mahantaṃ vītasāradaṃ.
Danto damayataṃ seṭṭho santo samayataṃ isī
mutto mocayataṃ aggo tiṇṇo tārayataṃ varo.
Iti hetaṃ namassanti mahantaṃ vītasāradaṃ.
@Footnote: 1 Yu. yathāvādī tathāgato tathāvādī . 2 aṭṭhakathāyaṃ sanūsayo. Ma. anūpayo.
@3 Ma. sa ve. 4 Ma. phuṭṭhāssa.
Sadevakasmiṃ lokasmiṃ natthi te paṭipuggaloti.
Ayampi attho vutto bhagavatā iti me sutanti. Terasamaṃ.
Catukkanipāto niṭṭhito.
Tassuddānaṃ
brāhmaṇā 1- cattāri jānaṃ samaṇasīlā taṇhā brahmā
bahukārā kuhanā 2- purisā caraṃ 3- sampannalokena terasāti.
Itivuttake dvādasādhikasatasuttanti
itivuttakaṃ niṭṭhitaṃ.
-----------
Sattavisekanipātaṃ
dukkaṃ bāvīsasuttasaṅgahitaṃ
samapaññāsamatha tikaṃ
terasa catukkañca iti yamidaṃ
dvidasuttarasuttasate
saṃgāyitvā samādahaṃsu purā
arahanto ciraṭṭhitiyā
tamāhu nāmena itivuttanti.
Itivuttakapāḷi niṭṭhitā.
Idaṃ marammapotthake āgataṃ.
---------
@Footnote: 1 Ma. brāhmaṇasulabhā . 2 Ma. kuhapurisā . 3 Ma. carasampanna ....
Suttantapiṭake khuddakanikāyassa
suttanipāto
--------
namo tassa bhagavato arahato sammāsambuddhassa.
Paṭhamo uragavaggo
paṭhamaṃ uragasuttaṃ
[294] /khu.su./ |294.424| 1 Yo ve 1- uppatitaṃ vineti kodhaṃ
visaṭaṃ sappavisaṃva osathehi 2-
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.425| Yo rāgamudacchidā asesaṃ
bhiṃsapupphaṃva 3- saroruhaṃ vigayha
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.426| Yo taṇhamudacchidā asesaṃ
saritaṃ sīghasaraṃ visosayitvā
@Footnote: 1 Ma. Yu. vesaddo natthi . 2 Ma. osadhehi . 3 Ma. Yu. bhisapupphaṃva.
So bhikkhu jahāti orapāraṃ
urago jiṇṇamiva tacaṃ purāṇaṃ.
|294.427| Yo mānamudabbadhī asesaṃ
naḷasetuṃva sudubbalaṃ mahogho
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.428| Yo nājjhagamā bhavesu sāraṃ
vicinaṃ pupphamiva udumbaresu
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.429| Yassantarato na santi kopā
iti bhavābhavatañca vītivatto
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.430| Yassa vitakkā vidhūpitā
ajjhattaṃ suvikappitā asesā
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.431| Yo nāccasārī na paccasārī
sabbaṃ accugamā 1- imaṃ papañcaṃ
@Footnote: 1 Ma. Yu. accagamā.
So bhikkhu jahāti orapāraṃ
urago jiṇṇamiva tacaṃ purāṇaṃ.
|294.432| Yo nāccasārī na paccasārī
sabbaṃ vitathamidanti ñatvā 1- loke
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.433| Yo nāccasārī na paccasārī
sabbaṃ vitathamidanti vītalobho
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.434| Yo nāccasārī na paccasārī
sabbaṃ vitathamidanti vītarāgo
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.435| Yo nāccasārī na paccasārī
sabbaṃ vitathamidanti vītadoso
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.436| Yo nāccasārī na paccasārī
sabbaṃ vitathamidanti vītamoho
@Footnote: 1 Ma. ñatva.
So bhikkhu jahāti orapāraṃ
urago jiṇṇamiva tacaṃ purāṇaṃ.
|294.437| Yassānusayā na santi keci
mūlā [1]- akusalā samūhatāse
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.438| Yassa darathajā na santi keci
oraṃ āgamanāya paccayāse
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.439| Yassa vanathajā na santi keci
vinibandhāya bhavāya hetukappā
so bhikkhu jahāti orapāraṃ
urago jiṇṇamiva tacaṃ purāṇaṃ.
|294.440| Yo nīvaraṇe pahāya pañca
anīgho tiṇṇakathaṅkatho visallo
so bhikkhu jahāti orapāraṃ
urago jiṇṇamiva tacaṃ purāṇanti.
Uragasuttaṃ paṭhamaṃ.
-----------
@Footnote: 1 Ma. casaddo dissati.
Suttanipāte uragavaggassa dutiyaṃ dhaniyasuttaṃ
[295] |295.441| 2 Pakkodano dukkhakhīrohamasmi (iti dhaniyo gopo)
anutīre mahiyā samānavāso
channā kuṭi āhito gini
atha ce patthayasī pavassa deva.
|295.442| Akkodhano vigatakhilohamasmi (iti bhagavā)
anutīre mahiyekarattivāso
vivaṭā kuṭi nibbuto gini
atha ce patthayasī pavassa deva.
|295.443| Andhakamakasā na vijjare (iti dhaniyo gopo)
kacche rūḷhatiṇe caranti gāvo
vuṭṭhimpi saheyyumāgataṃ
atha ce patthayasī pavassa deva.
|295.444| Bhaddhā hi 1- bhisī susaṅkhatā (iti bhagavā)
tiṇṇo pāragato vineyya oghaṃ
attho bhisiyā na vijjati
atha ce patthayasī pavassa deva.
|295.445| Gopī mama assavā alolā (iti dhaniyo gopo)
dīgharattaṃ saṃvāsiyā manāpā
@Footnote: 1 Ma. bhaddhāsi.
Tassā na suṇāmi kiñci pāpaṃ
atha ce patthayasī pavassa deva.
|295.446| Cittaṃ mama assavaṃ vimuttaṃ (iti bhagavā)
dīgharattaṃ paribhāvitaṃ sudantaṃ
pāpaṃ pana me na vijjati
atha ce patthayasī pavassa deva.
|295.447| Attavettanabhatohamasmi (iti dhaniyo gopo)
puttā ca me samāniyā arogā
tesaṃ na suṇāmi kiñci pāpaṃ
atha ce patthayasī pavassa deva.
|295.448| Nāhaṃ bhatakosmi kassaci (iti bhagavā)
nibbiṭṭhena carāmi sabbaloke
attho bhatiyā na vijjati
atha ce patthayasī pavassa deva.
|295.449| Atthi vasā atthi dhenupā (iti dhaniyo gopo)
godharaṇiyo paveniyopi atthi
usabhopi gavampatī 1- ca atthi
atha ce patthayasī pavassa deva.
|295.450| Natthi vasā natthi dhenupā (iti bhagavā)
godharaṇiyo paveniyopi natthi
@Footnote: 1 Ma. Yu. sabbattha gavampatīdhāti dissati.
Usabhopi gavampatī ca natthi
atha ce patthayasī pavassa deva.
|295.451| Khīlā nikhātā asampavedī (iti dhaniyo gopo)
dāmā muñjamayā navā susaṇṭhānā
na hi sakkhinti dhenupāpi chettuṃ
atha ce patthayasī pavassa deva.
|295.452| Usabhoriva chetvā 1- bandhanāni (iti bhagavā)
nāgo pūtilataṃva dālayitvā
nāhaṃ puna 2- upessaṃ gabbhaseyyaṃ
atha ce patthayasī pavassa deva.
|295.453| Ninnañca thalañca pūrayanto
mahāmegho pāvassi tāvadeva
sutvā devassa vassato
imamatthaṃ dhaniyo abhāsatha
|295.454| lābhā vata no anappakā
ye mayaṃ bhagavantaṃ addasāma
saraṇaṃ taṃ upema cakkhuma
satthā no hohi 3- mahāmuni.
|295.455| Gopī ca ahañca assavā
brahmacariyaṃ sugate carāmase
@Footnote: 1 Ma. Yu. chetva. 2 Ma. punupessaṃ. Po. upeyyaṃ. 3 Po. Ma. Yu. tuvaṃ.
Jātimaraṇassa pāragā 1-
dukkhassantakarā bhavāmase.
|295.456| Nandati puttehi puttimā (iti māro pāpimā)
gopiko 2- gohi tatheva nandati
upadhīhi narassa nandanā
na hi so nandati yo nirūpadhi.
|295.457| Socati puttehi puttimā (iti bhagavā)
gopiko gohi tatheva socati
upadhīhi narassa socanā
na hi so socati yo nirūpadhīti.
Dhaniyasuttaṃ dutiyaṃ.
-----------
Suttanipāte uragavaggassa tatiyaṃ khaggavisāṇasuttaṃ
[296] |296.458| 3 Sabbesu bhūtesu nidhāya daṇḍaṃ
aviheṭhayaṃ aññatarampi tesaṃ
na puttamiccheyya kuto sahāyaṃ
eko care khaggavisāṇakappo.
|296.459| Saṃsaggajātassa bhavanti snehā
@Footnote: 1 Ma. pāragū. 2 Po. gopiko. Ma. gomā.. Yu. Sī. gomiko.
Snehanvayaṃ dukkhamidaṃ pahoti
ādīnavaṃ snehajaṃ pekkhamāno
eko care khaggavisāṇakappo.
|296.460| Mitte suhajje anukampamāno
hāpeti atthaṃ paṭibaddhacitto
etaṃ bhayaṃ santhavapekkhamāno 1-
eko care khaggavisāṇakappo.
|296.461| Vaṃso visālo va yathā visatto
puttesu dāresu ca yā apekkhā
vaṃsākaḷīro 2- va asajjamāno
eko care khaggavisāṇakappo.
|296.462| Migo araññamhi yathā abandho 3-
yenicchakaṃ gacchati gocarāya
viññū naro seritaṃ pekkhamāno
eko care khaggavisāṇakappo.
|296.463| Āmantanā hoti sahāyamajjhe
vāse ṭhāne gamane cārikāya
anabhijjhitaṃ seritaṃ pekkhamāno
eko care khaggavisāṇakappo.
@Footnote: 1 Ma. Yu. santhave pekkhamānotipi. 2 Po. vaṃsakaḷirova. Ma. vaṃsakkaḷīrova.
@3 Ma. Yu. abaddho.
|296.464| Khiḍḍā ratī hoti sahāyamajjhe
puttesu ca vipūlaṃ hoti pemaṃ
piyavippayogaṃ vijigucchamāno
eko care khaggavisāṇakappo.
|296.465| Cātuddiso appaṭigho ca hoti
santussamāno itarītarena
parissayānaṃ sahitā achambhī
eko care khaggavisāṇakappo.
|296.466| Dussaṅgahā pabbajitāpi eke
atho gahaṭṭhā gharamāvasantā
appossuko paraputtesu hutvā
eko care khaggavisāṇakappo.
|296.467| Oropayitvā gihibyañjanāni
sañchinnapatto 1- yathā koviḷāro
chetvāna dhīro gihibandhanāni
eko care khaggavisāṇakappo.
|296.468| Sace labhetha nipakaṃ sahāyaṃ
saddhiṃcaraṃ sādhuvihāridhīraṃ
abhibhuyya sabbāni parissayāni
careyya tenattamano satimā.
@Footnote: 1 Yu. saṃsīnanapatto.
|296.469| No ce labhetha nipakaṃ sahāyaṃ
saddhiṃcaraṃ sādhuvihāridhīraṃ
rājāva raṭṭhaṃ vijitaṃ pahāya
eko care mātaṅgaraññeva nāgo.
|296.470| Addhā pasaṃsāma sahāyasampadaṃ
seṭṭhā samā sevitabbā sahāyā
ete aladdhā anavajjabhojī
eko care khaggavisāṇakappo.
|296.471| Disvā suvaṇṇassa pabhassarāni
kammāraputtena suniṭṭhitāni
saṅghaṭṭamānāni duve bhujasmiṃ
eko care khaggavisāṇakappo.
|296.472| Evaṃ dutiyena sahāmamassa
vācābhilāpo abhisajjanā vā
etaṃ bhayaṃ āyati pekkhamāno
eko care khaggavisāṇakappo.
|296.473| Kāmā hi citrā madhurā manoramā
virūparūpena mathenti cittaṃ
ādīnavaṃ kāmaguṇesu disvā
eko care khaggavisāṇakappo.
|296.474| Ītī ca gaṇḍo ca upaddavo ca
rogo ca sallañca bhayañca metaṃ
etaṃ bhayaṃ kāmaguṇesu disvā
eko care khaggavisāṇakappo.
|296.475| Sītañca uṇhañca khudaṃ pipāsaṃ
vātātape ḍaṃsasiriṃsape 1- ca
sabbānipetāni abhisambhavitvā
eko care khaggavisāṇakappo.
|296.476| Nāgova yūthāni vivajjayitvā
sañjātakkhandho padumī uḷāro
yathābhirantaṃ viharaṃ 2- araññe
eko care khaggavisāṇakappo.
|296.477| Aṭṭhāna taṃ saṅgaṇikāratassa
yaṃ phussaye 3- sāmayikaṃ vimuttaṃ
ādiccabandhussa vaco nisamma
eko care khaggavisāṇakappo.
|296.478| Diṭṭhīvisūkāni upātivatto
patto niyāmaṃ paṭiladdhamaggo
uppannañāṇomhi anaññaneyyo
eko care khaggavisāṇakappo.
@Footnote: 1 Po. Ma. ḍaṃsasarīsape. 2 Yu. vihare. 3 Ma. Yu. phassaye.
|296.479| Nillolupo nikkuho nippipāso
nimmakkho niddhantakasāvamoho
nirāsayo sabbaloke bhavitvā
eko care khaggavisāṇakappo.
|296.480| Pāpaṃ sahāyaṃ parivajjayetha
anatthadassiṃ visame niviṭṭhaṃ
sayaṃ na seve pasutaṃ pamattaṃ
eko care khaggavisāṇakappo.
|296.481| Bahussutaṃ dhammadharaṃ bhajetha
mittaṃ uḷāraṃ paṭibhāṇavantaṃ
aññāya atthāni vineyya kaṅkhaṃ
eko care khaggavisāṇakappo.
|296.482| Khiḍḍaṃ ratiṃ kāmasukhañca loke
analaṅkaritvā anapekkhamāno
vibhūsanaṭṭhānā virato saccavādī
eko care khaggavisāṇakappo.
|296.483| Puttañca dāraṃ pitarañca mātaraṃ
dhanāni dhaññāni ca bandhavāni 1-
hitvāna kāmāni yathodhikāni
eko care khaggavisāṇakappo.
@Footnote: 1 Yu. bandhanāni ca.
|296.484| Saṅgo eso parittamettha sokhyaṃ
appassādo dukkhamettha bhiyyo
gaṇḍo 1- eso iti ñatvā matimā 2-
eko care khaggavisāṇakappo.
|296.485| Sandālayitvāna saṃyojanāni
jālaṃ va chetvā 3- salilambucārī
aggīva daḍḍhaṃ anivattamāno
eko care khaggavisāṇakappo.
|296.486| Okkhittacakkhu 4- na ca pādalolo
guttindriyo rakkhitamānasāno
anavassuto apariḍayhamāno
eko care khaggavisāṇakappo.
|296.487| Ohārayitvā gihibyañjanāni
sañchinnapatto 5- yathā pārichatto
kāsāyavattho abhinikkhamitvā
eko care khaggavisāṇakappo.
|296.488| Rasesu gedhaṃ akaraṃ alolo
anaññaposī sapadānacārī
kule kule appaṭibaddhacitto
eko care khaggavisāṇakappo.
@Footnote: 1 Ma. Yu. gaḷo . 2 Ma. Yu. mutīmā . 3 Po. bhitvā . 4 Po. Ma. Yu.
@okkhittacakkhū . 5 Ma. sañchannapatto.
|296.489| Pahāya pañcāvaraṇāni cetaso
upakkilese byapanujja sabbe
anissito chetvā sinehadosaṃ
eko care khaggavisāṇakappo.
|296.490| Vipiṭṭhikatvāna sukhaṃ dukkhañca
pubbeva ca somanassadomanassaṃ
laddhānupekkhaṃ samathaṃ visuddhaṃ
eko care khaggavisāṇakappo.
|296.491| Āraddhaviriyo paramatthapattiyā
alīnacitto akusītavuttī
daḷhanikkamo thāmabalūpapanno
eko care khaggavisāṇakappo.
|296.492| Paṭisallānaṃ jhānamariñcamāno
dhammesu niccaṃ anudhammacārī
ādīnavaṃ sammasitā bhavesu
eko care khaggavisāṇakappo.
|296.493| Taṇhakkhayaṃ patthayaṃ appamatto
anelamūgo sutavā satimā
saṅkhātadhammo niyato padhānavā
eko care khaggavisāṇakappo.
|296.494| Sīhova saddesu asantasanto
vātova jālamhi asajjamāno
padumaṃva toyena alimpamāno 1-
eko care khaggavisāṇakappo.
|296.495| Sīho yathā dāṭhabalī pasayha
rājā migānaṃ abhibhuyyacārī
sevetha pantāni senāsanāni
eko care khaggavisāṇakappo.
|296.496| Mettaṃ upekkhaṃ karuṇaṃ vimuttaṃ 2-
āsevamāno muditañca kāle
sabbena lokena avirujjhamāno
eko care khaggavisāṇakappo.
|296.497| Rāgañca dosañca pahāya mohaṃ
sandālayitvāna saṃyojanāni
asantasaṃ jīvitasaṅkhayamhi
eko care khaggavisāṇakappo.
|296.498| Bhajanti sevanti ca kāraṇatthā
nikkāraṇā dullabhā ajja mittā
attatthapaññā asucī manussā
eko care khaggavisāṇakappo.
Khaggavisāṇasuttaṃ tatiyaṃ.
@Footnote: 1 Ma. Yu. alippamāno. 2 Ma. Yu. vimuttiṃ.
Suttanipāte uragavaggassa catutthaṃ kasibhāradvājasuttaṃ
[297] 4 Evamme sutaṃ . ekaṃ samayaṃ bhagavā magadhesu
viharati dakkhiṇāgirismiṃ ekanāḷāyaṃ brāhmaṇagāme . tena kho pana
samayena kasibhāradvājassa brāhmaṇassa pañcamattāni naṅgalasatāni
payuttāni honti vappakāle . atha kho bhagavā pubbaṇhasamayaṃ
nivāsetvā pattacīvaramādāya yena kasibhāradvājassa brāhmaṇassa
kammanto tenupasaṅkami . tena kho pana samayena kasibhāradvājassa
brāhmaṇassa parivesanā vattati.
{297.1} Atha kho bhagavā yena parivesanā tenupasaṅkami upasaṅkamitvā
ekamantaṃ aṭṭhāsi . addasā kho kasibhāradvājo brāhmaṇo bhagavantaṃ
piṇḍāya ṭhitaṃ disvāna bhagavantaṃ etadavoca ahaṃ kho samaṇa kasāmi ca
vappāmi ca kasitvā ca vappitvā ca bhuñjāmi . tvampi samaṇa kasassu
ca vappassu ca kasitvā ca vappitvā ca bhuñjāhīti 1- . ahampi
kho brāhmaṇa kasāmi ca vappāmi ca kasitvā ca vappitvā
ca bhuñjāmīti . na kho pana 2- samaṇa passāma bhoto gotamassa
yugaṃ vā naṅgalaṃ vā phālaṃ vā pācanaṃ vā balibaddhe 3- vā atha
ca pana bhavaṃ gotamo evamāha ahampi kho brāhmaṇa kasāmi ca
@Footnote: 1 Ma. Yu. bhuñjassati. 2 Po. Ma. Yu. pana mayaṃ . 3 Ma. Yu. balibadde.
Vappāmi ca kasitvā ca vappitvā ca bhuñjāmīti . atha kho
kasibhāradvājo brāhmaṇo bhagavantaṃ gāthāya ajjhabhāsi
[298] |298.499| Kassako paṭijānāsi na ca passāma te kasiṃ
kasiṃ no pucchito brūhi yathā jānemu te kasiṃ.
|298.500| Saddhā bījaṃ tapo vuṭṭhi paññā me yuganaṅgalaṃ
hirī īsā mano yottaṃ sati me phālapācanaṃ.
|298.501| Kāyagutto vacīgutto āhāre udare yato
saccaṃ karomi niddhānaṃ soraccamme pamocanaṃ.
|298.502| Viriyaṃ me dhuradhorayhaṃ yogakkhemādhivāhanaṃ
gacchati anivattantaṃ yattha gantvā na socati.
|298.503| Evaṃ me sā kasi kaṭṭhā sā hoti amatapphalā
etaṃ kasiṃ kasitvāna sabbadukkhā pamuccatīti.
[299] Atha kho kasibhāradvājo brāhmaṇo mahatiyā
kaṃsapātiyā pāyāsaṃ vaḍḍhetvā bhagavato upanāmesi bhuñjatu bhavaṃ
gotamo pāyāsaṃ kassako bhavaṃ yañhi bhavaṃ gotamo amatapphalaṃ
kasiṃ kasatīti.
|299.504| Gāthābhigītamme abhojaneyyaṃ
sampassataṃ brāhmaṇa nesa dhammo
gāthābhigītaṃ panudanti buddhā
dhamme satī brāhmaṇa 1- vuttiresā.
@Footnote: 1 Po. brāhmaṇassa.
|299.505| Aññena ca kevalinaṃ mahesiṃ
khīṇāsavaṃ kukkuccavūpasantaṃ
annena pānena upaṭṭhahassu
khettañhi taṃ puññapekkhassa hotīti.
[300] Atha kassa cāhaṃ bho gotama imaṃ pāyāsaṃ dammīti .
Na khvāhaṃ taṃ brāhmaṇa passāmi sadevake loke samārake sabrahmake
sassamaṇabrāhmaṇiyā pajāya sadevamanussāya yena 1- so
pāyāso bhutto sammā pariṇāmaṃ gaccheyya aññatra tathāgatassa
vā tathāgatasāvakassa vā tena hi tvaṃ brāhmaṇa taṃ pāyāsaṃ
appaharite vā chaḍḍehi appāṇake vā udake opilāpehīti .
Atha kho kasibhāradvājo brāhmaṇo taṃ pāyāsaṃ appāṇake udake
opilāpesi . atha kho so pāyāso udake pakkhitto cicciṭāyati
ciṭiciṭāyati saṃdhūmāyati 2- sampadhūmāyati . seyyathāpi nāma
ayogulo divasasantatto 3- udake pakkhitto cicciṭāyati ciṭiciṭāyati
saṃdhūmāyati sampadhūmāyati evameva so pāyāso udake pakkhitto
cicciṭāyati ciṭiciṭāyati saṃdhūmāyati sampadhūmāyati.
The Pali Tipitaka in Roman Character Volume 25 page 321-342.
http://84000.org/tipitaka/pitaka_item/roman_item_s.php?book=25&item=293&items=8
Classified by [Item Number] :-
http://84000.org/tipitaka/pitaka_item/roman_item_s.php?book=25&item=293&items=8&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=25&item=293&items=8
Compare with The Royal Version of Thai Tipitaka :-
http://84000.org/tipitaka/read/byitem_s.php?book=25&item=293&items=8
Study Atthakatha :-
http://84000.org/tipitaka/attha/attha.php?b=25&i=293
The Pali Atthakatha in Thai :-
http://84000.org/tipitaka/atthapali/read_th.php?B=27&A=9118
The Pali Atthakatha in Roman :-
http://84000.org/tipitaka/atthapali/read_rm.php?B=27&A=9118
Contents of The Tipitaka Volume 25
http://84000.org/tipitaka/read/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
