Pattavaggassa dutiyasikkhāpadaṃ
[102] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena sambahulā
bhikkhuniyo gāmakāvāse vassaṃ vutthā sāvatthiṃ agamaṃsu vattasampannā
iriyāpathasampannā duccolā 1- lūkhacīvarā . upāsakā tā bhikkhuniyo
passitvā imā bhikkhuniyo vattasampannā iriyāpathasampannā
duccolā lūkhacīvarā imā bhikkhuniyo acchinnā bhavissantīti bhikkhunīsaṅghassa
akālacīvaraṃ adaṃsu.
{102.1} Thullanandā bhikkhunī amhākaṃ kaṭhinaṃ atthataṃ kālacīvaranti
adhiṭṭhahitvā bhājāpesi . upāsakā tā bhikkhuniyo passitvā
etadavocuṃ apayyāhi cīvaraṃ laddhanti . na mayaṃ āvuso cīvaraṃ labhāma
ayyā thullanandā amhākaṃ kaṭhinaṃ atthataṃ kālacīvaranti adhiṭṭhahitvā
bhājāpesīti . upāsakā ujjhāyanti khīyanti vipācenti kathaṃ hi nāma
ayyā thullanandā akālacīvaraṃ kālacīvaranti adhiṭṭhahitvā
bhājāpessatīti . assosuṃ kho bhikkhuniyo tesaṃ upāsakānaṃ
ujjhāyantānaṃ khīyantānaṃ vipācentānaṃ . yā tā bhikkhuniyo
appicchā .pe. tā ujjhāyanti khīyanti vipācenti kathaṃ hi
nāma ayyā thullanandā akālacīvaraṃ kālacīvaranti adhiṭṭhahitvā
bhājāpessatīti . athakho tā bhikkhuniyo bhikkhūnaṃ etamatthaṃ
ārocesuṃ . bhikkhū bhagavato etamatthaṃ ārocesuṃ .pe. saccaṃ kira
@Footnote: 1 Ma. duccoḷā evaṃ. sabbattha ñātabbaṃ.
Bhikkhave thullanandā bhikkhunī akālacīvaraṃ kālacīvaranti adhiṭṭhahitvā
bhājāpetīti 1- . saccaṃ bhagavāti . vigarahi buddho bhagavā kathaṃ hi nāma
bhikkhave thullanandā bhikkhunī akālacīvaraṃ kālacīvaranti adhiṭṭhahitvā
bhājāpessati netaṃ bhikkhave appasannānaṃ vā pasādāya .pe.
Evañca pana bhikkhave bhikkhuniyo imaṃ sikkhāpadaṃ uddisantu
{102.2} yā pana bhikkhunī akālacīvaraṃ kālacīvaranti adhiṭṭhahitvā
bhājāpeyya nissaggiyaṃ pācittiyanti.
[103] Yā panāti yā yādisā .pe. bhikkhunīti .pe. ayaṃ
imasmiṃ atthe adhippetā bhikkhunīti . akālacīvaraṃ nāma anatthate
kaṭhine ekādasamāse uppannaṃ atthate kaṭhine sattamāse
uppannaṃ kālepi ādissa dinnaṃ etaṃ akālacīvaraṃ nāma .
Kālacīvaranti 2- adhiṭṭhahitvā bhājāpeti payoge dukkaṭaṃ paṭilābhena
nissaggiyaṃ hoti nissajjitabbaṃ saṅghassa vā gaṇassa vā
ekabhikkhuniyā vā . evañca pana bhikkhave nissajjitabbaṃ .pe.
Idaṃ me ayye akālacīvaraṃ kālacīvaranti adhiṭṭhahitvā bhājāpitaṃ
nissaggiyaṃ imāhaṃ saṅghassa nissajjāmīti .pe. dadeyyāti .pe.
Dadeyyunti .pe. Ayyāya dammīti.
[104] Akālacīvare akālacīvarasaññā kālacīvaranti adhiṭṭhahitvā
bhājāpeti nissaggiyaṃ pācittiyaṃ . akālacīvare vematikā
@Footnote: 1 Ma. Yu. bhājāpesīti. 2 Po. Ma. akālacīvaraṃ kālacīvarantīti ime pāṭhā dissanti.
Kālacīvaranti adhiṭṭhahitvā bhājāpeti nissaggiyaṃ pācittiyaṃ . [1]-
akālacīvare kālacīvarasaññā kālacīvaranti adhiṭṭhahitvā bhājāpeti
nissaggiyaṃ pācittiyaṃ . [2]- kālacīvare akālacīvarasaññā āpatti
dukkaṭassa . kālacīvare vematikā āpatti dukkaṭassa .
Kālacīvare kālacīvarasaññā anāpatti.
[105] Anāpatti akālacīvaraṃ akālacīvarasaññā bhājāpeti
kālacīvaraṃ kālacīvarasaññā bhājāpeti ummattikāya ādikammikāyāti.
--------
The Pali Tipitaka in Roman Character Volume 3 page 68-70.
http://84000.org/tipitaka/pitaka_item/roman_item_s.php?book=3&item=102&items=4
Classified by [Item Number] :-
http://84000.org/tipitaka/pitaka_item/roman_item_s.php?book=3&item=102&items=4&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=3&item=102&items=4
Compare with The Royal Version of Thai Tipitaka :-
http://84000.org/tipitaka/read/byitem_s.php?book=3&item=102&items=4
Study Atthakatha :-
http://84000.org/tipitaka/attha/attha.php?b=3&i=102
The Pali Atthakatha in Thai :-
http://84000.org/tipitaka/atthapali/read_th.php?B=2&A=11138
The Pali Atthakatha in Roman :-
http://84000.org/tipitaka/atthapali/read_rm.php?B=2&A=11138
Contents of The Tipitaka Volume 3
http://84000.org/tipitaka/read/?index_3
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
