Suttantapiṭake khuddakanikāyassa
apadānaṃ
--------------
namo tassa bhagavato arahato sammāsambuddhassa.
Dvācattāḷīsamo bhaddālivaggo
paṭhamaṃ bhaddālittherāpadānaṃ (411)
[1] /apa./ |1.1| Sumedho nāma sambuddho aggo kāruṇiko muni
vivekakāmo lokaggo himavantaṃ upāgami.
|1.2| Ajjhogahetvā himavantaṃ 1- sumedho lokanāyako
pallaṅkaṃ ābhujitvāna nisīdi purisāsabho 2-.
|1.3| Samādhiṃ so samāpanno sumedho lokanāyako
sattarattindivaṃ buddho nisīdi purisuttamo.
|1.4| Khārikājaṃ 3- gahetvāna vanamajjhogahiṃ ahaṃ
tatthaddasāsiṃ sambuddhaṃ oghatiṇṇamanāsavaṃ.
|1.5| Sammajjaniṃ gahetvāna sammajjitvāna assamaṃ
catudaṇḍe ṭhapetvāna akāsiṃ maṇḍapaṃ tadā.
|1.6| Sālapupphaṃ gahetvāna maṇḍapaṃ chādayiṃ ahaṃ
pasannacitto sumano avandiṃ lokanāyakaṃ 4-.
@Footnote: 1 Ma. Yu. himavaṃ . 2 Ma. Yu. purisuttamo . 3 Ma. khāribhāraṃ. ito paraṃ
@īdisameva . 4 Ma. Yu. abhivandiṃ tathāgataṃ.
|1.7| Yaṃ vadanti sumedhoti bhūripaññaṃ sumedhasaṃ
bhikkhusaṅghe nisīditvā imā gāthā abhāsatha.
|1.8| Buddhassa giramaññāya sabbe devā samāgamuṃ
asaṃsayaṃ buddhaseṭṭho dhammaṃ deseti cakkhumā.
|1.9| Sumedho nāma sambuddho āhutīnaṃ paṭiggaho
devasaṅghe nisīditvā imā gāthā abhāsatha.
|1.10| Yo me sattāhaṃ maṇḍapaṃ dhārayi sālachādanaṃ 1-
tamahaṃ kittayissāmi suṇātha mama bhāsato.
|1.11| Devabhūto manusso vā hemavaṇṇo bhavissati
pahūtabhogo hutvāna kāmabhogī bhavissati.
|1.12| Saṭṭhī nāgasahassāni sabbālaṅkārabhūsitā
suvaṇṇakacchā mātaṅgā hemakappanivāsasā 2-.
|1.13| Āruḷhā gāmaṇīyebhi tomaraṅkusapāṇibhi
sāyaṃ pāto upaṭṭhānaṃ āgacchissantimaṃ naraṃ.
Tehi nāgehi parivuto ramissati ayaṃ naro
|1.14| saṭṭhī assasahassāni sabbālaṅkārabhūsitā.
Ājānīyā ca 3- jātiyā sindhavā sīghabāhanā
|1.15| āruḷhā gāmaṇīyebhi indiyācāpadhāribhi.
Parivāressantimaṃ niccaṃ buddhapūjāyidaṃ phalaṃ
|1.16| saṭṭhī rathasahassāni sabbālaṅkārabhūsitā.
@Footnote: 1 Ma. Yu. sālachāditaṃ . 2 Ma. hemakappanavāsasā. ito paraṃ īdisameva.
@3 Ma. Yu. va.
Dīpā athopi veyyagghā sannaddhā ussitaddhajā
|1.17| āruḷhā gāmaṇīyebhi cāpahatthehi cammibhi 1-.
Parivāressantimaṃ niccaṃ buddhapūjāyidaṃ phalaṃ
|1.18| saṭṭhī gāmasahassāni paripuṇṇāni sabbaso.
Pahūtadhanadhaññāni susamiddhāni sabbaso
sadā pātubhavissanti buddhapūjāyidaṃ phalaṃ.
|1.19| Hatthī assā rathā pattī senā ca caturaṅginī
parivāressantimaṃ niccaṃ buddhapūjāyidaṃ phalaṃ.
|1.20| Aṭṭhārase kappasate devaloke ramissati
sahassakkhattuṃ rājā ca cakkavatti bhavissati.
|1.21| Satānaṃ tīṇikkhattuṃ ca devarajjaṃ karissati
padesarajjaṃ vipulaṃ gaṇanāto asaṅkhayaṃ 2-.
|1.22| Tiṃsakappasahassamhi okkākakulasambhavo
gotamo nāma nāmena satthā loke bhavissati.
|1.23| Tassa dhammesu dāyādo oraso dhammanimmito
sabbāsave pariññāya viharāmi anāsavo.
|1.24| Tiṃsakappasahassamhi addasaṃ lokanāyakaṃ
etthantaraṃ upādāya gavesiṃ amataṃpadaṃ.
|1.25| Lābhā mayhaṃ suladdhaṃ me yamahaṃ ñāmi 3- sāsanaṃ
tisso vijjā anuppattā kataṃ buddhassa sāsanaṃ.
@Footnote: 1 Ma. Yu. vammibhi. ito paraṃ īdisameva. 2 Ma. Yu. asaṅkhiyaṃ. ito paraṃ īdisameva.
@3 Ma. Yu. ñāsi.
|1.26| Namo te purisājañña namo te purisuttama
ñāṇaṃ paṭikittetvāna 1- pattomhi amataṃpadaṃ.
|1.27| Yaṃ yaṃ yonūpapajjāmi devattaṃ atha mānusaṃ
sabbattha sukhito homi phalamme ñāṇakittane.
|1.28| Idaṃ pacchimakaṃ mayhaṃ carimo vattatī bhavo
nāgova bandhanaṃ chetvā viharāmi anāsavo.
|1.29| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|1.30| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|1.31| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā bhaddāli thero imā gāthāyo abhāsitthāti.
Bhaddālittherassa apadānaṃ samattaṃ.
Dutiyaṃ ekachattiyattherāpadānaṃ (412)
[2] |2.32| Candabhāgānadītīre assamo sukato mama
susuddhapuḷinākiṇṇo paṇṇasālā sumāpitā.
|2.33| Uttānakūlā nadikā supatitthā manoramā
macchakacchapasampannā suṃsumāranisevitā.
@Footnote: 1 Ma. Yu. tava ṇāṇaṃ pakittetvā.
|2.34| Acchā mayuradīpī ca karavikā ca sālikā
kujjanti sabbadā ete sobhayantā mamassamaṃ.
|2.35| Kokilā mañjubhāṇī ca haṃsā ca madhurassarā
abhikujjanti te tattha sobhayantā mamassamaṃ.
|2.36| Sīhā byagghā varāhā ca bakā kokataracchayo 1-
giriduggamhi 2- nādenti sobhayantā mamassamaṃ.
|2.37| Eṇimigā ca sarabhā bheraṇḍā sūkarā bahū
giriduggamhi nādenti sobhayantā mamassamaṃ.
|2.38| Uddālakā ca campakā pāṭalī sinduvārikā
adhimuttā 3- asokā ca sobhayantā mamassamaṃ.
|2.39| Aṅkolā yūthikā ceva sattapaṇṇā 4- bimbijālikā
kaṇikā kaṇikārā ca pupphanti mama assame 5-.
|2.40| Nāgā sālā ca salaḷā puṇḍarīkettha pupphitā
dibbā gandhā sampavantā sobhanti mama assame.
|2.41| Asaṭṭhā 6- asanā cettha mahānāmā ca pupphitā
sālā ca kaṅgupupphā ca sobhanti mama assame.
|2.42| Ambā jambū ca tilakā nipā 7- ca sālakalyāṇī
dibbā gandhā sampavantā sobhayanti mamassamaṃ.
|2.43| Asokā ca kapiṭṭhā ca bhaginimālā 8- ca pupphitā
dibbā gandhā sampavantā sobhayanti mamassamaṃ.
@Footnote: 1 Ma. acchakokataracchakā . 2 Yu. giriduggaṃpi . 3 Ma. Yu. atimuttā. ito paraṃ
@īdisameva . 4 Ma. Yu. sattasī . 5 Ma. sobhayantā mamassamaṃ . 6 Ma. Yu. ajjunā.
@7 Ma. nimbā . 8 Ma. girimālettha pupphitā. Yu. bhaginimālettha.
|2.44| Kadambā kadalī ceva isimuggā ca ropitā
dhuvaṃ phalāni dhārenti sobhayanti mamassamaṃ.
|2.45| Harītakā āmalakā ambā jambū vibhedakā 1-
kolā bhallātakā bellā 2- phalino mama assame.
|2.46| Avidūre pokkharaṇī supatitthā manoramā
mandālakehi sañchannā padumuppalakehi ca.
|2.47| Gabbhaṃ gaṇhanti padumā aññe pupphanti kesari
opattakaṇṇikā ceva pupphanti mama assame.
|2.48| Pāṭhīnā pāvusā macchā valajā 3- muñjarohitā
acchodakamhi vicaraṃ sobhayanti mamassamaṃ.
|2.49| Nayitā ambagandhi ca anukule ca ketakā
dibbā gandhā sampavantā sobhayanti mamassamaṃ.
|2.50| Madhubhiṃsehi savanti 4- khīrasappimuḷālibhi
dibbā gandhā sampavantā sobhayanti mamassamaṃ.
|2.51| Puḷinā sobhanā tattha ākiṇṇā jalasevitā
opupphā 5- pupphitā setā sobhayanti mamassamaṃ.
|2.52| Jaṭābhārabharitā ca ajinuttaravāsino
vākacīradharā sabbe sobhayanti mamassamaṃ.
|2.53| Yugamattamapekkhantā nipakā santavuttino
kāmagedhe 6- anapekkhā vasanti mama assame.
@Footnote: 1 Ma. Yu. vibhītakā. sabbattha īdisameva . 2 Ma. billā. sabbattha īdisameva.
@3 Ma. balajā. yu jalajā. sabbattha īdisameva. 4 Ma. Yu. madhubhisamhā savati.
@5 Ma. opupphā--santi. Yu. ovaṭṭā--santi. 6 Ma. kāmabhoge.
|2.54| Parūḷhakacchanakhalomā paṅkadantā rajassirā
rajojalladharā sabbe vasanti mama assame.
|2.55| Abhiññāpāramippattā antalikkhe carāva te
uggacchantā nabhaṃ ete sobhayanti mamassamaṃ.
|2.56| Tehi sissehi parivuto vasāmi pavane 1- tadā
rattindivaṃ na jānāmi jhānaratisamappito 2-.
|2.57| Bhagavā tamhi samaye atthadassī mahāmuni
tamandhakāraṃ nāsento uppajji lokanāyako.
|2.58| Atha aññataro sisso āgañchi mama santike
mante ajjhetukāmo so chaḷaṅgaṃ nāma lakkhaṇaṃ.
|2.59| Buddho loke samuppanno atthadassī mahāmuni
catusaccaṃ pakāsento desesi amataṃpadaṃ.
|2.60| Tuṭṭhahaṭṭho pamudito dhammantaragaṇāsayo 3-
assamā abhinikkhamma idaṃ vacanamabraviṃ.
|2.61| Buddho loke samuppanno dvattiṃsavaralakkhaṇo
etha sabbe gamissāma sammāsambuddhasantike.
|2.62| Ovādapaṭikārā te saddhamme pāramiṃ gatā
sādhūti sampaṭicchiṃsu uttamatthaṃ gavesakā.
|2.63| Jaṭābhārabharitā te ajinuttaravāsino
uttamatthaṃ gavesantā nikkhamiṃsu vanā tadā.
@Footnote: 1 Ma. vipine. sabbattha īdisameva . 2 Ma. Yu. sadā jhānasamappito.
@3 Ma. Yu. dhammantaragatāsayo.
|2.64| Bhagavā tamhi samaye atthadassī mahāyaso
catusaccaṃ pakāsento desesi amataṃpadaṃ.
|2.65| Setacchattaṃ gahetvāna buddhaseṭṭhassa dhārayiṃ
ekāhaṃ dhārayitvāna buddhaseṭṭhaṃ avandihaṃ.
|2.66| Atthadassī tu bhagavā lokajeṭṭho narāsabho
bhikkhusaṅghe nisīditvā imā gāthā abhāsatha.
|2.67| Yo me chattamadhāresi pasanno sehi pāṇibhi
tamahaṃ kittayissāmi suṇātha mama bhāsato.
|2.68| Imassa jāyamānassa devatte atha mānuse
dhārissanti sadā chattaṃ chattadānassidaṃ phalaṃ.
|2.69| Sattasattatikappāni devaloke ramissati
sahassakkhattuṃ rājā ca cakkavatti bhavissati.
|2.70| Sattasattatikkhattuñca devarajjaṃ karissati
padesarajjaṃ vipulaṃ gaṇanāto asaṅkhayaṃ
|2.71| aṭṭhārase kappasate gotamo sakyapuṅgavo
tamandhakāraṃ nāsento upajjissati cakkhumā.
|2.72| Tassa dhammesu dāyādo oraso dhammanimmito
sabbāsave pariññāya nibbāyissatināsavo.
|2.73| Yato ahaṃ kammamakaṃ 1- chattaṃ buddhassa dhārayiṃ
etthantare na jānāmi setacchattaṃ adhāritaṃ.
@Footnote: 1 Yu. kammakaṃ taṃ.
|2.74| Idaṃ pacchimakaṃ mayhaṃ carimo vattate bhavo
chattadhāraṇamajjāsi matthake 1- niccakālikaṃ.
|2.75| Aho me sukataṃ kammaṃ atthadassissa tādino
sabbāsavaparikkhīṇo natthi dāni punabbhavo.
|2.76| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|2.77| Svāgataṃ 2- vata me āsi mama buddhassa santike
tisso vijjā anuppattā kataṃ buddhassa sāsanaṃ.
|2.78| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekachattiyo thero imā gāthāyo abhāsitthāti.
Ekachattiyattherassa apadānaṃ samattaṃ.
Tatiyaṃ tiṇasūlakachādaniyattherāpadānaṃ (413)
[3] |3.79| Jātijarañca maraṇaṃ paccavekkhiṃ ahaṃ tadā
ekako abhinikkhamma pabbajiṃ anagāriyaṃ.
|3.80| Caramāno anupubbena gaṅgātīraṃ upāgamiṃ
tatthaddasāsiṃ paṭhaviṃ gaṅgātīre sapuṇṇakaṃ 3-.
|3.81| Assamaṃ tattha māpetvā vasāmi mama assame 4-
sukkato caṅkamo mayhaṃ nānādijagaṇāyuto.
@Footnote: 1 Ma. Yu. chattadhāraṇamajjāpi vattate. 2 Yu. sāgataṃ. sabbattha īdisameva.
@3 Ma. Yu. supuṇṇataṃ . 4 Ma. Yu. vasāmi assame ahaṃ.
|3.82| Mamaṃ upenti ca sattā 1- kujjanti ca manoharaṃ
rammamāno saha tehi vasāmi assame ahaṃ.
|3.83| Mama assamasāmantā migarājā catukkamo
āsayā abhinikkhamma gajji so asanī 2- viya.
|3.84| Nadite migarāje ca hāso me upapajjatha
migarājaṃ gavesanto addasaṃ lokanāyakaṃ.
|3.85| Disvānāhaṃ devadevaṃ tissaṃ lokagganāyakaṃ
haṭṭho haṭṭhena cittena pūjayiṃ nāgakesaraṃ.
|3.86| Uggacchantaṃva suriyaṃ sālarājaṃva pupphitaṃ
osadhīva virocantaṃ santhaviṃ lokanāyakaṃ.
|3.87| Tava ñāṇena sabbaññu jotesi maṃ sadevakaṃ
tuvaṃ [3]- ārādhayitvāna jātiyā parimuccare.
|3.88| Adassanena sabbaññū buddhānaṃ sabbadassinaṃ
patantivīcinirayaṃ rāgadosehi otthaṭā 4-.
|3.89| Tava dassanamāgamma sabbaññulokanāyakaṃ
pamuccanti bhavā sabbe phusanti amataṃpadaṃ.
|3.90| Yadā buddhā cakkhumanto uppajjanti pabhaṅkarā
kilese jhāpayitvāna ālokaṃ dassayanti te.
|3.91| Kittayitvāna sambuddhaṃ tissaṃ lokagganāyakaṃ
haṭṭho haṭṭhena cittena tiṇasūlaṃ apūjayiṃ.
@Footnote: 1 Ma. Yu. mamupenti ca vissatthā . 2 Yu. medanī . 3 Yu. hi . 4 Ma. Yu. ophuṭā.
|3.92| Mama saṅkappamaññāya tisso lokagganāyako
sakāsane nisīditvā imā gāthā abhāsatha.
|3.93| Yo maṃ pupphehi chādesi pasanno sehi pāṇibhi
tamahaṃ kittayissāmi suṇātha mama bhāsato.
|3.94| Pañcavīsatikkhattuñca 1- devarajjaṃ karissati
pañcasattatikkhattuñca cakkavatti bhavissati.
|3.95| Padesarajjaṃ vipulaṃ gaṇanāto asaṅkhayaṃ
tassa 2- kammassa nissando pupphānaṃ pūjanāya so 3-.
|3.96| Sāyaṃ 4- pāto ca yaṃ poso pupphehi 5- maṃ achādayi
puññakammena saṃyutto 6- purato pātubhavissati.
|3.97| Yaṃ yaṃ icchati kāmehi taṃ taṃ pātubhavissati
saṅkappaṃ paripūretvā nibbāyissatināsavo.
|3.98| Kilese jhāpayitvāna sampajāno paṭissato
ekāsane nisīditvā arahattaṃ apāpuṇi 7-.
|3.99| Caṅkamanto nipajjanto nisinno athavā ṭhito
buddhaseṭṭhaṃ saritvāna viharāmi ahaṃ tadā.
|3.100| Cīvare piṇḍapāte ca paccaye sayanāsane
tattha me ūnatā natthi buddhapūjāyidaṃ phalaṃ.
|3.101| So dāni patto amataṃ santaṃ padamanuttaraṃ
sabbāsave pariññāya viharāmi anāsavo.
@Footnote: 1 Ma. Yu. pañcavīsatikkhattuṃ so . 2 Ma. tassa kammanissandena. 3 Ma. ... ca.
@4 Ma. Yu. sīsaṃ nhāto ca yaṃ poso . 5 Ma. pupphamākaṅkhate yadi. Yu. ... cayaṃ.
@6 Ma. -- saṃyuttaṃ. 7 Ma. Yu. apāpuṇiṃ.
|3.102| Dvenavute ito kappe yaṃ buddhamabhipūjayiṃ
duggatiṃ nābhijānāmi buddhapūjāyidaṃ phalaṃ.
|3.103| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|3.104| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|3.105| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā tiṇasūlakachādaniyo thero imā gāthāyo abhāsitthāti.
Tiṇasūlakachādaniyattherassa apadānaṃ samattaṃ.
Catutthaṃ madhumaṃsadāyakattherāpadānaṃ (414)
[4] |4.106| Nagare bandhumatiyā sūkariko ahosahaṃ
ukkoṭakaṃ randhayitvā madhumaṃsamhi 1- okiriṃ.
|4.107| Sannipātaṃ ahaṃ gantvā ekapattaṃ ahaṃ 2- gahiṃ
pūrayitvāna taṃ pattaṃ bhikkhusaṅghassadāsahaṃ.
|4.108| Yo 3- vuḍḍhatherataro bhikkhu niyyādemi ahaṃ tadā
iminā pattapūrena labhissaṃ 4- vipulaṃ sukhaṃ.
|4.109| Duve sampattiyo bhutvā sukkamūlena codito
pacchime vattamānamhi kilese jhāpayissati.
@Footnote: 1 Yu. madhusappimhi ākiriṃ. 2 Ma. Yu. gahe sahaṃ. 3 Ma. Yu. yottha -- niyyādesi
@mamaṃ tadā. 4 Ma. Yu. labhassu.
|4.110| Tattha cittaṃ pasādetvā tāvatiṃsaṃ agañchihaṃ
tattha bhutvā pivitvā ca labhāmi vipulaṃ sukhaṃ.
|4.111| Maṇḍape rukkhamūle vā pubbakammaṃ anussariṃ
annapānābhivasso me ativassati tāvade.
|4.112| Idaṃ pacchimakaṃ mayhaṃ carimo vattate bhavo
idhāpi annapānaṃ me vassate sabbakālikaṃ.
|4.113| Teneva madhudānena 1- sandhāvitvā bhave ahaṃ
sabbāsave pariññāya viharāmi anāsavo.
|4.114| Ekanavute ito kappe yaṃ dānamadadiṃ tadā
duggatiṃ nābhijānāmi madhudānassidaṃ phalaṃ.
|4.115| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|4.116| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|4.117| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā madhumaṃsadāyako thero imā gāthāyo abhāsitthāti.
Madhumaṃsadāyakattherassa apadānaṃ samattaṃ.
@Footnote: 1 Yu. maṃsadānena.
Pañcamaṃ nāgapallavakattherāpadānaṃ (415)
[5] |5.118| Nagare bandhumatiyā rājuyyāne vasāmahaṃ
mama assamasāmantā nisīdi lokanāyako.
|5.119| Nāgapallavamādāya buddhassa abhiropayiṃ
pasannacitto sumano sugataṃ abhivādayiṃ.
|5.120| Ekanavute ito kappe yaṃ pallavamabhipūjayiṃ
duggatiṃ nābhijānāmi buddhapūjāyidaṃ phalaṃ.
|5.121| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|5.122| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|5.123| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā nāgapallavako thero imā gāthāyo abhāsitthāti.
Nāgapallavakattherassa apadānaṃ samattaṃ.
Chaṭṭhaṃ ekadīpiyattherāpadānaṃ (416)
[6] |6.124| Parinibbutamhi sugate siddhatthe lokanāyake
sadevamānusā sabbe pūjenti dipaduttamaṃ.
|6.125| Āropite ca citake siddhatthe lokanāyake
yathāsakena thāmena citaṃ pūjenti satthuno.
|6.126| Avidūre citakassa dīpaṃ ujjālayiṃ ahaṃ
yāva udeti suriyo dīpaṃ me tāva pajjali.
|6.127| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|6.128| Tattha me sukataṃ byamhaṃ ekadīpanti ñāyati
dīpasatasahassāni byamhe pajjalare mama.
|6.129| Udayantova suriyo deho me jalate 1- sadā
sappabhāhi sarīrassa āloko hoti me sadā.
|6.130| Tirokuḍḍaṃ tiroselaṃ samatiggayha pabbataṃ
samantā yojanasataṃ passāmi cakkhunā ahaṃ.
|6.131| Sattasattatikkhattuṃ ca devaloke ramiṃ ahaṃ
ekatiṃsatikkhattuṃ ca devarajjaṃ akārayiṃ.
|6.132| Aṭṭhavīsatikkhattuṃ ca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|6.133| Devalokā cavitvāna nibbatti mātukucchiyaṃ
mātukucchigatassāpi akkhi me na 2- vinassati.
|6.134| Jātiyā catuvassohaṃ pabbajiṃ anagāriyaṃ
aḍḍhamāse asampatte arahattaṃ apāpuṇiṃ.
@Footnote: 1 Ma. jotate. Yu. rājate. 2 Ma. Yu. na nimīlati.
|6.135| Dibbacakkhuṃ visodhesiṃ bhavā sabbe samūhatā
sabbe kilesā sañchinnā ekadīpassidaṃ phalaṃ.
|6.136| Tirokuḍḍaṃ tiroselaṃ pabbatañcāpi kevalaṃ
samatikkamma passāmi ekadīpassidaṃ phalaṃ.
|6.137| Visamā me samā honti andhakāro na vijjati
nāhaṃ passāmi timiraṃ ekadīpassidaṃ phalaṃ.
|6.138| Catunavute ito kappe yaṃ dīpamadadiṃ tadā
duggatiṃ nābhijānāmi ekadīpassidaṃ phalaṃ.
|6.139| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|6.140| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|6.141| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekadīpiyo thero imā gāthāyo abhāsitthāti.
Ekadīpiyattherassa apadānaṃ samattaṃ.
Sattamaṃ ucchaṅgapupphiyattherāpadānaṃ (417)
[7] |7.142| Nagare bandhumatiyā ahosiṃ māliko tadā
ucchaṅgaṃ pūrayitvāna agamaṃ antarāpaṇaṃ.
|7.143| Bhagavā tamhi samaye bhikkhusaṅghapurakkhato
mahatā ānubhāvena niyyāti lokanāyako.
|7.144| Disvāna lokapajjotaṃ vipassiṃ lokatāraṇaṃ
pupphaṃ paggayha ucchaṅgā buddhaseṭṭhaṃ apūjayiṃ.
|7.145| Ekanavute ito kappe buddhaseṭṭhaṃ 1- apūjayiṃ
duggatiṃ nābhijānāmi buddhapūjāyidaṃ phalaṃ.
|7.146| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|7.147| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|7.148| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ucchaṅgapupphiyo thero imā gāthāyo abhāsitthāti.
Ucchaṅgapupphiyattherassa apadānaṃ samattaṃ.
Aṭṭhamaṃ yāgudāyakattherāpadānaṃ (418)
[8] |8.149| Atithiṃ me gahetvāna āgañchiṃ gāmakaṃ tadā
sampuṇṇanadikaṃ disvā saṅghārāmaṃ upāgamiṃ.
|8.150| Āraññakā dhutadharā 2- jhāyino lūkhacīvarā
vivekābhiratā dhīrā saṅghārāme vasanti te.
@Footnote: 1 Ma. Yu. yaṃ pupphamabhipūjayiṃ . 2 Yu. dhūtavādā.
|8.151| Gati tesaṃ upacchinnā suvimuttāna tādinaṃ
piṇḍāya te na gacchanti oruddhanadikāyatiṃ 1-.
|8.152| Pasannacitto sumano vedajāto katañjalī
taṇḍulaṃ 2- paggahetvāna yāgudānaṃ adāsahaṃ.
|8.153| Pacanaṃ 3- yāguṃ datvāna pasanno sehi pāṇibhi
sakakammābhiraddhohaṃ tāvatiṃsaṃ agañchahaṃ.
|8.154| Maṇimayañca me byamhaṃ nibbattaṃ 4- tidase gaṇe
nārīgaṇehi saṃhito 5- modāmi byamhamuttame.
|8.155| Tettiṃsakkhattuṃ devindo devarajjamakārayiṃ
tiṃsakkhattuṃ cakkavatti mahārajjamakārayiṃ.
|8.156| Padesarajjaṃ vipulaṃ gaṇanāto asaṅkhayaṃ
devaloke manusse vā anubhotvā yasaṃ 6- ahaṃ.
|8.157| Pacchime bhavasampatte pabbajiṃ anagāriyaṃ
saha oropite kese sabbasampattivijjahaṃ.
|8.158| Khayato vayato cāpi sammasanto kalevaraṃ
pure sikkhāpadānena 7- arahattaṃ apāpuṇiṃ.
|8.159| Sudinnaṃ me dānavaraṃ pāṇijaṃ 8- suppayojitaṃ
teneva yāgudānena pattomhi acalaṃ padaṃ.
|8.160| Sokaṃ pariddavaṃ byādhiṃ darathaṃ cittatāpanaṃ
nābhijānāmi uppannaṃ yāgudānassidaṃ phalaṃ.
@Footnote: 1 Ma. oruddhanadikāya hi. Yu. oruddhanadikā yadi. 2 Ma. Yu. me gahetvāna.
@3 Ma. Yu. pañcannaṃ. 4 Ma. nibbatti . 5 Ma. Yu. sahito. 6 Ma. sayaṃ.
@7 Ma. sikkhāpadādānā. Yu. --- padādāne. 8 Ma. Yu. vāṇijaṃ.
|8.161| Yāguṃ saṅghassa datvāna puññakkhette anuttare
pañcānisaṃse anubhomi aho yāgusuyiṭṭhatā.
|8.162| Abyādhitā rūpavatā khippaṃ dhammaṃ 1- nibujjhitā
lābhitā annapānassa āyu pañcamakaṃ mama.
|8.163| Yo koci vedaṃ janayaṃ saṅghe yāguṃ dadeyya so
imāni pañca ṭhānāni paṭiggaṇheyya paṇḍito.
|8.164| Karaṇīyaṃ kataṃ sabbaṃ bhavā ugghāṭitā mayā
sabbāsavā parikkhīṇā natthi dāni punabbhavo.
|8.165| So ahaṃ vicarissāmi gāmā gāmaṃ purā puraṃ
namassamāno sambuddhaṃ dhammassa ca sudhammataṃ.
|8.166| Tiṃsakappasahassamhi yaṃ dānamadadiṃ tadā
duggatiṃ nābhijānāmi yāgudānassidaṃ phalaṃ.
|8.167| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|8.168| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|8.169| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā yāgudāyako thero imā gāthāyo abhāsitthāti.
Yāgudāyakattherassa apadānaṃ samattaṃ.
@Footnote: 1 Ma. Yu. dhammanisantitā.
Navamaṃ patthodanadāyakattherāpadānaṃ (419)
[9] |9.170| Vanacārī pure āsiṃ satataṃ vanakammiko
patthodanaṃ gahetvāna kammantaṃ agamāsahaṃ.
|9.171| Tatthaddasāsiṃ sambuddhaṃ sayambhuṃ aparājitaṃ
vanā piṇḍāya nikkhantaṃ disvā cittaṃ pasādayiṃ.
|9.172| Parakammāyane yutto puññañca me na vijjati
ayaṃ patthodano atthi bhojayissāmimaṃ muniṃ.
|9.173| Patthodanaṃ gahetvāna sayambhussa adāsahaṃ
mama nijjhāyamānassa paribhuñji mahāmuni.
|9.174| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|9.175| Dvattiṃsakkhattuṃ 1- devindo devarajjamakārayiṃ
tettiṃsakkhattuṃ rājā ca cakkavatti bhavissati 2-.
|9.176| Padesarajjaṃ vipulaṃ gaṇanāto asaṅkhayaṃ
sukhito yasavā homi patthodanassidaṃ phalaṃ.
|9.177| Bhavābhave saṃsaranto labhāmi amitaṃ dhanaṃ
bhoge me ūnatā natthi patthodanassidaṃ phalaṃ.
Nadīsotapaṭibhāgā bhogā nibbattare mama
parimetuṃ na sakkomi patthodanassidaṃ phalaṃ.
@Footnote: 1 Ma. Yu. chattiṃsakkhattuṃ. 2 Ma. Yu. ahosahaṃ.
|9.178| Imaṃ khāda imaṃ bhuñja imamhi sayane saya
tenāhaṃ sukhito homi patthodanassidaṃ phalaṃ.
|9.179| Ekanavute 1- ito kappe yaṃ dānamadadiṃ tadā
duggatiṃ nābhijānāmi patthodanassidaṃ phalaṃ.
|9.180| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|9.181| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|9.182| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā patthodanadāyako thero imā gāthāyo abhāsitthāti.
Patthodanadāyakattherassa apadānaṃ samattaṃ.
Dasamaṃ mañcadāyakattherāpadānaṃ (420)
[10] |10.183| Parinibbute kāruṇike siddhatthe lokanāyake
vitthārike pāvacane devamanussasakkate.
|10.184| Caṇḍālo āsahaṃ tattha āsandipīṭhakārako
tena kammena jīvāmi tena posemi dārake.
|10.185| Āsandiṃ sukataṃ katvā pasanno sehi pāṇibhi
sayameva upagantvā bhikkhusaṅghassadāsahaṃ.
@Footnote: 1 Ma. Yu. catunnavutito kappe.
|10.186| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|10.187| Devalokaṃ gato santo modāmi tidase gaṇe
sayanāni mahagghāni nibbattanti yathicchakaṃ.
|10.188| Paññāsakkhattuṃ devindo devarajjamakārayiṃ
asītikkhattuṃ rājā ca cakkavatti ahosahaṃ.
|10.189| Padesarajjaṃ vipulaṃ gaṇanāto asaṅkhayaṃ
sukhito yasavā homi mañcadānassidaṃ phalaṃ.
|10.190| Devalokā cavitvāna emi ce mānusaṃ bhavaṃ
mahārahā susayanā sayameva bhavanti me.
|10.191| Ayaṃ pacchimako mayhaṃ carimo vattate bhavo
ajjāpi sayanakāle sayanaṃ upatiṭṭhahi.
|10.192| Catunavute ito kappe yaṃ dānaṃ adadiṃ tadā
duggatiṃ nābhijānāmi mañcadānassidaṃ phalaṃ.
|10.193| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|10.194| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|10.195| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā mañcadāyako thero imā gāthāyo abhāsitthāti.
Mañcadāyakattherassa apadānaṃ samattaṃ.
Uddānaṃ
bhaddālī ekachatto ca tiṇasūlo ca maṃsado
nāgapallavako dīpaṃ ucchaṅgi yāgudāyako.
Patthodani mañcadado gāthāyo gaṇitā visā
dve satāni ca gāthānaṃ gāthā cekā taduttari.
Bhaddālivaggo dvācattāḷīsamo.
---------------------
Tecattāḷīso sakiṃsammajjakavaggo
paṭhamaṃ sakiṃsammajjakattherāpadānaṃ (421)
[11] |11.1| Vipassino bhagavato pāṭaliṃ bodhimuttamaṃ
disvāva taṃ pādapaggaṃ tattha cittaṃ pasādayiṃ.
|11.2| Sammajjaniṃ gahetvāna bodhiṃ sammajji tāvade
sammajjitvāna taṃ bodhiṃ avandiṃ pāṭaliṃ ahaṃ.
|11.3| Tattha cittaṃ pasādetvā sire katvāna añjaliṃ
namassamāno taṃ bodhiṃ gañchiṃ paṭikuṭiṃ ahaṃ.
|11.4| Cārimaggena 1- gacchāmi saranto bodhimuttamaṃ
ajagaro maṃ pīḷeti ghorarūpo mahabbalo.
|11.5| Āsanne me kataṃ kammaṃ phalena tosayī mamaṃ
kalevaraṃ me gilati devaloke ramāmahaṃ.
|11.6| Anāvilaṃ mama cittaṃ visuddhaṃ paṇḍaraṃ sadā
sokasallaṃ na jānāmi cittasantāpanaṃ mama.
|11.7| Kuṭṭhaṃ gaṇḍo kilāso ca apamāro vitacchikā
daddu kaṇḍu ca me natthi phalaṃ sammajjanāyidaṃ.
|11.8| Soko ca pariḷāho ca hadaye me na vijjati
abhantaṃ 2- ujukaṃ cittaṃ phalaṃ sammajjanāyidaṃ.
@Footnote: 1 Ma. tādimaggena. Yu. cārimamaggena. 2 Yu. asattaṃ.
|11.9| Samādhiṃ 1- puna pajjāmi visuddhaṃ 2- hoti mānasaṃ
yaṃ yaṃ samādhiṃ icchāmi so so sampajjate mama.
|11.10| Rajanīye na rajjāmi atho dosaniyesu ca
mohanīye na muyhāmi phalaṃ sammajjanāyidaṃ.
|11.11| Ekanavute ito kappe yaṃ kammamakariṃ tadā
duggatiṃ nābhijānāmi phalaṃ sammajjanāyidaṃ.
|11.12| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|11.13| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|11.14| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā sakiṃsammajjako thero imā gāthāyo abhāsitthāti.
Sakiṃsammajjakattherassa apadānaṃ samattaṃ.
Dutiyaṃ ekadussadāyakattherāpadānaṃ (422)
[12] |12.15| Nagare haṃsavatiyā ahosiṃ tiṇahārako
tiṇahārena jīvāmi tena posemi dārake.
|12.16| Padumuttaro nāma jino sabbadhammāna pāragū
tamandhakāraṃ nāsetvā uppajji lokanāyako.
@Footnote: 1 Ma. samādhīsu na majjāmi. Yu. na sajjāmi. 2 Ma. visadaṃ.
|12.17| Sake ghare nisīditvā evaṃ cintesi tāvade
buddho loke samuppanno deyyadhammo na vijjati.
|12.18| Idaṃ me sāṭakaṃ ekaṃ natthi me koci dāyako
dukkho nirayasamphasso ropayissāmi dakkhiṇaṃ.
|12.19| Evāhaṃ cintayitvāna sakaṃ cittaṃ pasādayiṃ
ekaṃ dussaṃ gahetvāna buddhaseṭṭhassadāsahaṃ.
|12.20| Ekaṃ dussaṃ daditvāna ukkuṭṭhiṃ sampavattayiṃ
yadi buddho tuvaṃ vīra tārehi maṃ mahāmuni.
|12.21| Padumuttaro lokavidū āhutīnaṃ paṭiggaho
mamaṃ dānaṃ pakittento akā me anumodanaṃ.
|12.22| Iminā ekadussena cetanāpaṇidhīhi ca
kappasatasahassāni vinipātaṃ na gacchati.
|12.23| Chattiṃsakkhattuṃ devindo devarajjaṃ karissati
tettiṃsakkhattuṃ rājā ca cakkavatti bhavissati.
|12.24| Padesarajjaṃ vipulaṃ gaṇanāto asaṅkhayaṃ
devaloke manusase vā saṃsaranto tuvaṃ bhave.
|12.25| Rūpavā guṇasampanno anuvattantadehavā
akkhobhaṃ amitaṃ dussaṃ labhissati yathicchakaṃ.
|12.26| Idaṃ vatvāna sambuddho jalajuttamanāmako 1-
nabhaṃ abbhuggami dhīro haṃsarājāva ambare.
@Footnote: 1 Yu. jalajuttamanāyako.
|12.27| Yaṃ yaṃ yonūpapajjāmi devattaṃ atha mānusaṃ
bhoge me ūnatā natthi ekadussassidaṃ phalaṃ.
|12.28| Paduddhāre paduddhāre dussaṃ nibbattate mama
heṭṭhā dussamhi tiṭṭhāhi uparicchadanaṃ mama.
|12.29| Cakkavāḷaṃ upādāya sakānanaṃ sapabbataṃ
icchamāno ahaṃ ajja dussenacchādayeyya taṃ.
|12.30| Teneva ekadussena saṃsaranto bhavābhave
suvaṇṇavaṇṇo hutvāna saṃsarāmi bhavābhave.
|12.31| Vipākaṃ ekadussassa ajjhagaṃ 1- tattha bhikkhutaṃ
ayaṃpi 2- pacchimā jāti vipaccati idhāpi me.
|12.32| Satasahasse ito kappe yaṃ dussamadadiṃ tadā
duggatiṃ nābhijānāmi ekadussassidaṃ phalaṃ.
|12.33| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|12.34| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|12.35| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ekadussadāyako thero imā gāthāyo abhāsitthāti.
Ekadussadāyakattherassa apadānaṃ samattaṃ.
@Footnote: 1 Ma. Yu. nājjhagaṃ kattha cikkhayaṃ. 2 Ma. ayaṃ me antimā jāti.
The Pali Tipitaka in Roman Character Volume 33 page 1-27.
http://84000.org/tipitaka/pitaka_item/roman_item_s.php?book=33&item=1&items=12
Classified by [Item Number] :-
http://84000.org/tipitaka/pitaka_item/roman_item_s.php?book=33&item=1&items=12&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=1&items=12
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=1&items=12
Study Atthakatha :-
http://84000.org/tipitaka/attha/attha.php?b=33&i=1
The Pali Atthakatha in Thai :-
http://84000.org/tipitaka/atthapali/read_th.php?B=50&A=5478
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5478
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
