paliTIPITAKA Volume 33 - Sutta Pitaka 25

[171] |171.1| Bhavā sabbe parikkhīṇā bhavasandhi ^1- vimocitā sabbāsavā ca no natthi ārocema mahāmune. |171.2| Parikammañca ^2- kusalaṃ yaṅkiñci sādhu ^3- patthitaṃ paribhogaṃ ^4- mayā dinnaṃ tuyhatthāya mahāmune. |171.3| Buddhapaccekabuddhānaṃ sāvakānañca patthitaṃ paribhogaṃ mayā dinnaṃ tuyhatthāya mahāmune. |171.4| Uccānīcaṃ mayā kammaṃ bhikkhūnaṃ sādhu patthitaṃ uccākulaparikkammaṃ katamhehi ^5- mahāmune. |171.5| Teneva sukkamūlena coditā kammasampadā mānusikamatikkantā jāyiṃsu khattiye kule. |171.6| Upacite ^6- kate kamme jātiyā cāpi ^7- ekato pacchime ekato jātā khattiyā kulasambhavā. |171.7| Rūpavatī bhogavatī lābhasakkārapūjitā antepure mahāvīra devānaṃ iva nandane. |171.8| Nibbinditvā agāramhā pabbajimhānagāriyaṃ katipāhaṃ upādāya sabbā pattāmha nibbutiṃ. @Footnote: ¹ Ma. bhavā santi .... ² Ma. Yu. purimaṃ kusalaṃ kammaṃ. ³ Po. Yu. sabbaṃ. @⁴ Ma. paribhogamayaṃ. Yu. paribhogaṃ ayaṃ. ito paraṃ īdisameva. ⁵ Ma. katametaṃ. @⁶ Ma. uppatteca. Yu. uppatteva. ⁷ Ma. vāpi.

--------------------------------------------------------------------------------------------- page377.

|171.9| Cīvaraṃ piṇḍapātañca paccayaṃ sayanāsanaṃ upanenti bahū amhe sadā sakkatapūjitā. |171.10| Kilesā jhāpitā amhaṃ bhavā sabbe samūhatā nāgīva bandhanaṃ chetvā viharāma anāsavā. |171.11| Svāgataṃ vata no āsi buddhaseṭṭhassa santike tisso vijjā anuppattā kataṃ buddhassa sāsanaṃ. |171.12| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ yasavatīpamukhāni khattiyakaññā bhikkhuniyo aṭṭhārasasahassāni bhagavato sammukhā imā gāthāyo abhāsitthāti. Aṭṭhārasasahassakhattiyakaññātherīnaṃ apadānaṃ samattaṃ. Dutiyaṃ caturāsītisahassabrāhmaṇakaññātherīnamapadānaṃ (32)

The Pali Tipitaka in Roman Character Volume 33 page 376-377. http://84000.org/tipitaka/pitaka_item/roman_item_s.php?book=33&item=171&items=1&pagebreak=1&mode=bracket Classified by content :- http://84000.org/tipitaka/pitaka_item/roman_item_s.php?book=33&item=171&items=1&pagebreak=1 Compare with The Pali Tipitaka in Thai Character :- http://84000.org/tipitaka/read/pali_item_s.php?book=33&item=171&items=1&pagebreak=1&mode=bracket Compare with The Royal Version of Thai Tipitaka :- http://84000.org/tipitaka/read/byitem_s.php?book=33&item=171&items=1&pagebreak=1&mode=bracket Study Atthakatha :- http://84000.org/tipitaka/attha/attha.php?b=33&i=171 Contents of The Tipitaka Volume 33 http://84000.org/tipitaka/read/?index_33