Chaṭṭho sobhitabuddhavaṃso
[7] |7.1| Revatassa aparena sobhito nāma nāyako
samāhito santacitto asamo appaṭipuggalo.
|7.2| So jino sakagehamhi mānasaṃ vinivattayi
patvāna kevalaṃ bodhiṃ dhammacakkaṃ pavattayi.
|7.3| Yāva uddhaṃ 1- avīcito bhavaggā cāpi heṭṭhato 2-
etthantare ekaparisā ahosi dhammadesane.
|7.4| Tāya parisāya sambuddho dhammacakkaṃ pavattayi
gaṇanāya na vattabbo paṭhamābhisamayo ahu.
|7.5| Tato paraṃpi desente naramarūnaṃ 3- samāgame
navutikoṭisahassānaṃ dutiyābhisamayo ahu.
|7.6| Punāparaṃ rājaputto jayaseno nāma khattiyo
ārāmaṃ ropayitvāna buddhe niyyādayī tadā.
|7.7| Tassa yāgaṃ 4- pakittento dhammaṃ deseti cakkhumā
tadā koṭisahassānaṃ tatiyābhisamayo ahu.
|7.8| Sannipātā tayo āsuṃ sobhitassa mahesino
khīṇāsavānaṃ vimalānaṃ santacittāna tādinaṃ.
|7.9| Uggato nāma so rājā dānaṃ deti naruttame
tamhi dāne samāgañchuṃ arahantā satakoṭiyo.
@Footnote: 1 Ma. heṭṭhā. 2 Ma. uddhato. 3 Ma. marūnaṃ ca .... 4 Yu. yogaṃ.
|7.10| Punāparaṃ pūgagaṇo 1- dānaṃ deti naruttame
tadā navutikoṭīnaṃ dutiyo āsi samāgamo.
|7.11| Devaloke vasitvāna yadā orohatī jino
tadā asītikoṭīnaṃ tatiyo āsi samāgamo.
|7.12| Ahantena samayena sujāto nāma brāhmaṇo
tadā sasāvakaṃ buddhaṃ annapānena tappayiṃ.
|7.13| Sopi maṃ buddho byākāsi sobhito lokanāyako
aparimeyye ito kappe ayaṃ buddho bhavissati.
|7.14| Ahu kapilavhayā rammā nikkhamitvā tathāgato
padhānaṃ padahitvāna katvā dukkarakārikaṃ.
|7.15| Ajapālarukkhamūlasmiṃ nisīditvā tathāgato
tattha pāyāsaṃ paggayha nerañjaramupehiti.
|7.16| Nerañjarāya tīramhi pāyāsaṃ adi so jino
paṭiyattavaramaggena bodhimūlamhi ehiti.
|7.17| Tato padakkhiṇaṃ katvā bodhimaṇḍaṃ anuttaraṃ
assattharukkhamūlamhi bujjhissati mahāyaso.
|7.18| Imassa janikā mātā māyā nāma bhavissati
pitā suddhodano nāma ayaṃ hessati gotamo.
|7.19| Anāsavā vītarāgā santacittā samāhitā
kolito upatisso ca aggā hessanti sāvakā
ānando nāmupaṭṭhāko upaṭṭhissatimaṃ jinaṃ.
@Footnote: 1 Yu. pūragaṇo.
|7.20| Khemā uppalavaṇṇā ca aggā hessanti sāvikā
anāsavā vītarāgā santacittā samāhitā.
|7.21| Bodhi tassa bhagavato assatthoti pavuccati
citto ca hatthāḷavako aggā hessantupaṭṭhakā.
|7.22| Nandamātā ca uttarā aggā hessantupaṭṭhikā
āyu vassasataṃ tassa gotamassa yasassino.
|7.23| Idaṃ sutvāna vacanaṃ asamassa mahesino
āmoditā naramarū buddhavījaṅkuro ayaṃ.
|7.24| Ukkuṭṭhisaddā vattanti apphoṭenti hasanti ca
katañjalī namassanti dasasahassī sadevakā.
|7.25| Yadimassa lokanāthassa virajjhissāma sāsanaṃ
anāgatamhi addhāne hessāma sammukhā imaṃ.
|7.26| Yathā manussā nadiṃ tarantā paṭititthaṃ virajjhiya
heṭṭhātitthaṃ gahetvāna uttaranti mahānadiṃ.
|7.27| Evameva mayaṃ sabbe yadi muñcāmimaṃ jinaṃ
anāgatamhi addhāne hessāma sammukhā imaṃ.
|7.28| Tassāpi vacanaṃ sutvā tuṭṭho saṃviggamānaso
tamevatthamanupattiyā uggaṃ dhitimakāsahaṃ.
|7.29| Sudhammaṃ nāma nagaraṃ sudhammo nāma khattiyo
sudhammā nāma janikā sobhitassa mahesino.
|7.30| Navavassasahassāni agāraṃ ajjhāvasi so
kumudo naḷinī 1- padumo tayo pāsādamuttamā.
|7.31| Ticattāri 2- sahassāni nāriyo samalaṅkatā
makilā 3- nāma sā nārī sīho nāmāsi atrajo.
|7.32| Nimitte caturo disvā pāsādenābhinikkhami
sattāhaṃ padhānacāraṃ caritvā purisuttamo.
|7.33| Brahmunā yācito santo sobhito lokanāyako
vattacakko mahāvīro sudhammuyyānamuttame.
|7.34| Asamo ca sunetto ca ahesuṃ aggasāvakā
anomo nāmupaṭṭhāko sobhitassa mahesino.
|7.35| Nakulā ca sujātā ca ahesuṃ aggasāvikā
bujjhamāno ca so buddho nāgamūle abujjhatha.
|7.36| Rammo ceva sunetto 4- ca ahesuṃ aggupaṭṭhakā
nakulā ceva cittā ca ahesuṃ aggupaṭṭhikā.
|7.37| Aṭṭhapaññāsaratanaṃ accuggato mahāmuni
obhāseti disā sabbā sataraṃsīva uggato.
|7.38| Yathā suphullaṃ pavanaṃ nānāgandhehi dhūpitaṃ
tatheva tassa pāvacanaṃ sīlagandhehi dhūpitaṃ.
|7.39| Yathāpi sāgaro nāma dassanena atappiyo
tatheva tassa pāvacanaṃ savanena atappiyaṃ.
@Footnote: 1 Ma. nāḷino. Yu. naḷiro. 2 Ma. chattiṃsa .... Yu. asattati ....
@3 Ma. manilā. Yu. samaṅgīlā. 4 Ma. Yu. sadatto.
|7.40| Navutivassasahassāni āyu vijjati tāvade
tāvatā tiṭṭhamāno so tāresi janataṃ bahuṃ.
|7.41| Ovādaṃ anusiṭṭhiñca datvāna sesake jane
hutāsanova tāpetvā nibbuto so sasāvako.
|7.42| So ca buddho asamasamo te 1- ca sāvakā balappattā
sabbaṃ samantarahitaṃ nanu rittā sabbasaṅkhārāti.
|7.43| Sobhito varasambuddho sīhārāmamhi nibbuto
dhātuvitthārikaṃ āsi tesu tesu padesatoti.
Sobhitabuddhavaṃso chaṭṭho.
Sattamo anomadassibuddhavaṃso
[8] |8.1| Sobhitassa aparena sambuddho dipaduttamo
anomadassī amitayaso tejasī duratikkamo.
|8.2| So chetvā bandhanaṃ sabbaṃ viddhaṃsetvā tayo bhave
anivattigamanaṃ maggaṃ desesi devamānuse.
|8.3| Sāgarova asaṅkhobbho pabbatova durāsado
ākāsova ananto so sālarājāva phullito.
|8.4| Dassanenapi taṃ buddhaṃ tositā honti pāṇino
byāharantaṃ giraṃ sutvā amataṃ pāpuṇanti te.
@Footnote: 1 Ma. tepi. Yu. tepi ca.
|8.5| Dhammābhisamayo tassa iddho phīto tadā ahu
koṭisatāni abhisamiṃsu paṭhame dhammadesane.
|8.6| Tato paraṃ abhisamaye vassante dhammavuṭṭhiyo
asītikoṭī abhisamiṃsu dutiye dhammadesane.
|8.7| Tato paraṃ 1- hi vassante tappayanteva pāṇinaṃ
aṭṭhasattatikoṭīnaṃ tatiyābhisamayo ahu.
|8.8| Sannipātā tayo āsuṃ tassāpi ca mahesino
abhiññābalappattānaṃ pupphitānaṃ vimuttiyā.
|8.9| Aṭṭhasatasahassānaṃ sannipātā 2- tadā ahu
pahīnamadamohānaṃ santacittāna tādinaṃ.
|8.10| Sattasatasahassānaṃ dutiyo āsi samāgamo
anaṅgaṇānaṃ virajānaṃ upasantāna tādinaṃ.
|8.11| Channaṃ satasahassānaṃ tatiyo āsi samāgamo
abhiññābalappattānaṃ nibbutānaṃ tapassinaṃ.
|8.12| Ahantena samayena yakkho āsiṃ mahiddhiko
nekānaṃ yakkhakoṭīnaṃ vasavattimhi issaro.
|8.13| Tadāpi taṃ buddhavaraṃ upagantvā mahesinaṃ
anna pānena tappesiṃ sasaṅghaṃ lokanāyakaṃ.
|8.14| Sopi maṃ tadā byākāsi visuddhanayano muni
aparimeyye ito kappe ayaṃ buddho bhavissati.
@Footnote: 1 Yu. ... pi. 2 Po. Ma. sannipāto.
|8.15| Ahu kapilavhayā rammā nikkhamitvā tathāgato
padhānaṃ padahitvāna katvā dukkarakārikaṃ.
|8.16| Ajapālarukkhamūlasmiṃ nisīditvā tathāgato
tattha pāyāsaṃ paggayha nerañjaramupehiti.
|8.17| Nerañjarāya tīramhi pāyāsaṃ adi so jino
paṭiyatta varamaggena bodhimūlamhi ehiti.
|8.18| Tato padakkhiṇaṃ katvā bodhimaṇḍaṃ anuttaraṃ
assattha rukkhamūlamhi bujjhissati mahāyaso.
|8.19| Imassa janikā mātā māyā nāma bhavissati
pitā suddhodano nāma ayaṃ hessati gotamo.
|8.20| Anāsavā vītarāgā santacittā samāhitā
kolito upatisso ca aggā hessanti sāvakā
ānando nāmupaṭṭhāko upaṭṭhissatimaṃ jinaṃ.
|8.21| Khemā uppalavaṇṇā ca aggā hessanti sāvikā
anāsavā vītarāgā santacittā samāhitā.
|8.22| Bodhi tassa bhagavato assatthoti pavuccati
citto ca hatthāḷavako aggā hessantupaṭṭhakā.
|8.23| Nandamātā ca uttarā aggā hessantupaṭṭhikā
āyu vassa sataṃ tassa gotamassa yasassino.
|8.24| Idaṃ sutvāna vacanaṃ asamassa mahesino
āmoditā naramarū buddhavījaṅkuro ayaṃ.
|8.25| Ukkuṭṭhi saddā vattanti apphoṭenti hasanti ca
katañjalī namassanti dasasahassī sadevakā.
|8.26| Yadi massa lokanāthassa virajjhissāma sāsanaṃ
anāgatamhi addhāne hessāma sammukhā imaṃ.
|8.27| Yathā manussā nadiṃ tarantā paṭititthaṃ virajjhiya
heṭṭhā titthaṃ 1- gahetvāna uttaranti mahānadiṃ.
|8.28| Evameva mayaṃ sabbe yadi muñcāmimaṃ jinaṃ
anāgatamhi addhāne hessāma sammukhā imaṃ.
|8.29| Tassāpi vacanaṃ sutvā tuṭṭho saṃviggamānaso
uttariṃ vattamadhiṭṭhāsiṃ dasa pāramipūriyā.
|8.30| Nagaraṃ candavatī nāma yasavā nāma khattiyo
mātā yasodharā nāma anomadassissa satthuno.
|8.31| Dasavassasahassāni agāraṃ ajjhāvasi so
siri upasiri vaḍḍho tayo pāsāda muttamā.
|8.32| Tevīsati sahassāni nāriyo samalaṅkatā
sirimā nāma sā nārī upasālo nāma atrajo.
|8.33| Nimitte caturo disvā sivikāyābhinikkhami
anūna dasamāsāni padhānaṃ padahī jino.
@Footnote: 1 Po. ... titthe.
|8.34| Brahmunā yācito santo anomadassī mahāmuni
vattacakko mahāvīro sudassanuyyānamuttame.
|8.35| Nisabho ca anomo ca ahesuṃ aggasāvakā
varuṇo nāmupaṭṭhāko anomadassissa satthuno.
|8.36| Sundarā 1- ca sumanā ca ahesuṃ aggasāvikā
bodhi tassa bhagavato ajjunoti pavuccati.
|8.37| Nandivaḍḍho sirivaḍḍho ahesuṃ aggupaṭṭhakā
uppalā ca 2- padumā ca ahesuṃ aggupaṭṭhikā.
|8.38| Aṭṭhapaṇṇāsaratanaṃ accuggato mahāmuni
pabhā niddhāvatī tassa sataraṃsīva uggato.
|8.39| Vassa satasahassāni āyu vijjati tāvade
tāvatā tiṭṭhamāno so tāresi janataṃ bahuṃ.
|8.40| Supupphitaṃ pāvacanaṃ arahantehi tādihi
vītarāgehi vimalehi sobhati 3- jinasāsanaṃ.
|8.41| So ca satthā amitayaso yugāni tāni atuliyāni
sabbaṃ samantarahitaṃ nanu rittā sabbasaṅkhārāti.
|8.42| Anomadassī jino satthā dhammārāmamhi nibbuto
tattheva tassa jinathūpo ubbedho pana vīsatīti.
Anomadassibuddhavaṃso sattamo.
@Footnote: 1 Po. sundarā ca sunāmā ca. Ma. Yu. sundarī ca. 2 Ma. Yu. ceva.
@3 Ma. Yu. sobhittha.
The Pali Tipitaka in Roman Character Volume 33 page 458-466.
http://84000.org/tipitaka/pitaka_item/roman_item_s.php?book=33&item=187&items=2
Classified by [Item Number] :-
http://84000.org/tipitaka/pitaka_item/roman_item_s.php?book=33&item=187&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=187&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=187&items=2
Study Atthakatha :-
http://84000.org/tipitaka/attha/attha.php?b=33&i=187
The Pali Atthakatha in Thai :-
http://84000.org/tipitaka/atthapali/read_th.php?B=51&A=5433
The Pali Atthakatha in Roman :-
http://84000.org/tipitaka/atthapali/read_rm.php?B=51&A=5433
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
