paliTIPITAKA Volume 33 - Sutta Pitaka 25

[72] |72.9| Ajjhāyiko ^1- mantadharo tiṇṇaṃ vedāna pāragū lakkhaṇe itihāse ca sanighaṇḍusakeṭubhe. |72.10| Nadīsotapaṭibhāgā sissā āyanti me tadā tesāhaṃ mantaṃ ^2- vācemi rattindivamatandito. |72.11| Siddhattho nāma sambuddho loke uppajji tāvade tamandhakāraṃ nāsetvā ñāṇālokaṃ pavattayi. |72.12| Mama aññataro sisso sissānaṃ so kathesi me sutvāna te etamatthaṃ ārocesuṃ mamaṃ tadā. |72.13| Buddho loke samuppanno sabbaññū lokanāyako tassānuvattati jano lābho mayhaṃ na vijjati. |72.14| Adhiccuppattikā buddhā cakkhumanto mahāyasā yannūnāhaṃ buddhaseṭṭhaṃ passeyyaṃ lokanāyakaṃ. @Footnote: ¹ Ma. Yu. sabbattha ajjhāyako. ² Ma. Yu. mante. |72.15| Ajinaṃ me gahetvāna vākacīraṃ kamaṇḍaluṃ assamā abhinikkhamma sisse āmantayiṃ ahaṃ. |72.16| Udumbarikapupphaṃva candamhi sasakaṃ yathā vāyasānaṃ yathā khīraṃ dullabhaṃ ^1- lokanāyakaṃ. |72.17| Buddho lokamhi uppanno manussattaṃpi dullabhaṃ ubhosu vijjamānesu savanañca sudullabhaṃ. |72.18| Buddho loke samuppanno cakkhuṃ lacchāma no bhavaṃ etha sabbe gamissāma sammāsambuddhasantikaṃ. |72.19| Kamaṇḍaludharā sabbe kharājinanivāsino te ^2- jaṭābhārabharitā nikkhamma pavanā tadā. |72.20| Yuttamattaṃ ^3- pekkhamānā uttamatthaṃ gavesino āyanti ^4- nāgapotāva asambhītāva kesarī. |72.21| Appatāsā ^5- aloluppā nipakā santavuttino uñchāya caramānā te buddhaseṭṭhaṃ upāgamuṃ. |72.22| Diyaḍḍhayojane dese ^6- byādhi me upapajjatha buddhaseṭṭhaṃ saritvāna tattha kālaṃ kato ahaṃ. |72.23| Catunavute ito kappe yaṃ saññamalabhiṃ tadā duggatiṃ nābhijānāmi buddhasaññāyidaṃ phalaṃ. |72.24| Kilesā jhāpitā mayhaṃ bhavā sabbe samūhatā nāgova bandhanaṃ chetvā viharāmi anāsavo. @Footnote: ¹ Ma. dullabho lokanāyako. ² Yu. ye. ³ Po. Ma. Yu. yugamattaṃ. @⁴ Ma. āsatti dosarahitā. ⁵ Ma. appakiccā. Yu. appabhāsā alīlatā. @⁶ Ma. Yu. sese. |72.25| Svāgataṃ vata me āsi mama buddhassa santike tisso vijjā anuppattā kataṃ buddhassa sāsanaṃ. |72.26| Paṭisambhidā catasso vimokkhāpica aṭṭhime chaḷabhiññā sacchikatā kataṃ buddhassa sāsananti. Itthaṃ sudaṃ āyasmā buddhasaññako thero imā gāthāyo abhāsitthāti. Buddhasaññakattherassa apādānaṃ samattaṃ. Tatiyaṃ bhisadāyakattherāpadānaṃ (483)

The Pali Tipitaka in Roman Character Volume 33 page 100-102. http://84000.org/tipitaka/pitaka_item/roman_item_s.php?book=33&item=72&items=1&mode=bracket Classified by content :- http://84000.org/tipitaka/pitaka_item/roman_item_s.php?book=33&item=72&items=1 Compare with The Pali Tipitaka in Thai Character :- http://84000.org/tipitaka/read/pali_item_s.php?book=33&item=72&items=1&mode=bracket Compare with The Royal Version of Thai Tipitaka :- http://84000.org/tipitaka/read/byitem_s.php?book=33&item=72&items=1&mode=bracket Study Atthakatha :- http://84000.org/tipitaka/attha/attha.php?b=33&i=72 The Pali Atthakatha in Thai :- http://84000.org/tipitaka/atthapali/read_th.php?B=50&A=5542 The Pali Atthakatha in Roman :- http://84000.org/tipitaka/atthapali/read_rm.php?B=50&A=5542 Contents of The Tipitaka Volume 33 http://84000.org/tipitaka/read/?index_33