Catutthaṃ ñāṇatthavikattherāpadānaṃ (484)
[74] |74.46| Dakkhiṇe himavantassa sukato assamo mama
uttamatthaṃ gavesanto vasāmi pavane tadā.
|74.47| Lābhālābhena santuṭṭho mūlena ca phalena ca
anomasanto 1- acari 2- vasāmi ekako ahaṃ.
|74.48| Sumedho nāma sambuddho loke uppajji tāvade
catusaccaṃ pakāseti uddharanto mahājanaṃ.
|74.49| Nāhaṃ suṇomi sambuddhaṃ napi me koci sāsati
aṭṭhavasse atikkante assosiṃ lokanāyakaṃ.
|74.50| Aggiṃ dāruṃ niharitvā sammajjitvāna assamaṃ
khāribhāraṃ gahetvāna nikkhamiṃ pavanā ahaṃ.
@Footnote: 1 Ma. anvesanto ācariyaṃ. 2 Yu. cariyaṃ.
|74.51| Ekarattiṃ vasantohaṃ gāmesu nigamesu ca
anupubbena candavatiṃ 1- tadāhaṃ upasaṅkamiṃ.
|74.52| Bhagavā tamhi samaye sumedho lokanāyako
uddharanto bahū satte deseti amataṃpadaṃ.
|74.53| Janakāyamatikkamma vanditvā jinasāgataṃ 2-
ekaṃsaṃ ajinaṃ katvā santhaviṃ lokanāyakaṃ.
|74.54| Tuvaṃ satthā ca ketuva 3- dhajo yūpova 3- pāṇinaṃ
parāyano patiṭṭhā ca dīpo ca dipaduttamo.
Ekavīsatimaṃ bhāṇavāraṃ.
|74.55| Nepuñño dassane dhīro tāresi janataṃ tuvaṃ
natthañño tārako loke tavuttarittaro mune.
|74.56| Sakkā bhave 4- kusaggena pametuṃ sāgaruttamo 5-
na tveva tava sabbaññu ñāṇaṃ sakkā pametave.
|74.57| Tuladaṇḍe ṭhapetvāna mahi 6- sakkā dharetave
na tveva tava paññāya samānaṃ 7- atthi cakkhuma.
|74.58| Ākāso minituṃ sakkā rajjuyā aṅgulena ca 8-
na tveva tava sabbaññu sīlaṃ sakkā pametave.
|74.59| Mahāsamudde udakaṃ ākāso ca vasundharo 9-
parimeyyāni etāni appameyyosi cakkhuma.
@Footnote: 1 Po. dhāvanto. 2 Ma. jinasāgaraṃ. Yu. jinasāsanaṃ. 3 Ma. Yu. ca.
@4 Ma. theve. Yu. have. 5 Ma. sāgaruttame. 6 Ma. mahiṃ. 7 Ma. Yu.
@pamāṇaṃ. 8 Ma. vā. Yu. pi. 9 Ma. Yu. vasundharā.
|74.60| Chahi gāthāhi sabbaññuṃ kittayitvā mahāyasaṃ
añjaliṃ paggahetvāna tuṇhī aṭṭhāsahaṃ tadā.
|74.61| Yaṃ vadanti sumedhoti bhūmipaññaṃ 1- sumedhasaṃ.
Bhikkhusaṅghe nisīditvā imā gāthā abhāsatha
|74.62| yo me ñāṇaṃ pakittesi vippasasannena 2- cetasā.
Tamahaṃ kittayissāmi suṇātha mama bhāsato
|74.63| sattasattati kappāni devaloke ramissati.
Sahassakkhattuṃ devindo devarajjaṃ karissati
|74.64| anekasatakkhattuñca cakkavatti bhavissati.
Padesarajjaṃ vipulaṃ gaṇanāto asaṅkhayaṃ
|74.65| devabhūto manusso vā puññakammasamāhito.
Anūnamanasaṅkappo 3- tikkhapañño bhavissati
|74.66| tiṃsakappasahassamhi okkākakulasambhavo.
Gotamo nāma nāmena satthā loke bhavissati
|74.67| agārā abhinikkhamma pabbajissatikiñcano.
Jātiyā sattavassena arahattaṃ pāpuṇissati 4-
|74.68| yato sarāmi attānaṃ yato pattosmi sāsanaṃ.
Etthantare na jānāmi cetanaṃ amanoramaṃ
|74.69| saṃsaritvā bhavābhave 5- sampattānubhaviṃ ahaṃ.
@Footnote: 1 Ma. Yu. bhūripaññaṃ. 2 Po. Ma. pasanno sehi pāṇibhi. 3 Yu. anūnamatasaṅkappo.
@4 Ma. Yu. phusissati. 5 Ma. Yu. bhave sabbe.
Bhoge me ūnatā natthi phalaṃ ñāṇassa thomane
|74.70| tidhaggī 1- nibbutā mayhaṃ bhavā sabbe samūhatā.
Sabbāsavaparikkhīṇo natthi dāni punabbhavo
|74.71| tiṃsakappasahassamhi yaṃ ñāṇamabhithomahaṃ 2-
duggatiṃ nābhijānāmi phalaṃ ñāṇassa thomane.
|74.72| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|74.73| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|74.74| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ñāṇatthaviko thero imā gāthāyo abhāsitthāti.
Ñāṇatthavikattherassa apadānaṃ samattaṃ.
Pañcamaṃ candanamāliyattherāpadānaṃ (485)
[75] |75.75| Pañcakāmaguṇe hitvā piyarūpe manorame
asītikoṭiyo hitvā pabbajiṃ anagāriyaṃ.
|75.76| Pabbajitvāna kāyena pāpakammaṃ vivajjayiṃ
vacīduccaritaṃ hitvā nadīkūle vasāmahaṃ.
@Footnote: 1 Ma. tiyaggī. Yu. tivaggī. ito paraṃ īdisameva. 2 Ma. ñāṇamathaviṃ ahaṃ.
|75.77| Ekekaṃ 1- maṃ viharantaṃ buddhaseṭṭho upāgami
nāhaṃ jānāmi buddhoti akāsiṃ paṭisantharaṃ.
|75.78| Karitvā paṭisanthāraṃ nāmagottaṃ apucchahaṃ
devatā nusi gandhabbo ādū 2- sakko purindado.
|75.79| Ko vā tvaṃ kassa vā putto mahābrahmā idhāgato
virocasi disā sabbā udayaṃ suriyo yathā.
|75.80| Sahassārāni cakkāni pāde dissanti mārisa
ko vā tvaṃ kassa vā putto kathaṃ jānemu taṃ mayaṃ.
|75.81| Nāmagottaṃ pavedehi saṃsayaṃ apanehi me
namhi devo na gandhabbo namhi sakko purindado.
|75.82| Brahmabhāvo ca me natthi etesaṃ uttamo ahaṃ
atīto visayaṃ tesaṃ dālayiṃ kāmabandhanaṃ.
|75.83| Sabbe kilese jhāpetvā patto sambodhimuttamaṃ
tassa vācaṃ suṇitvāhaṃ idaṃ vacanamabraviṃ.
|75.84| Yadi buddhosi sabbaññū nisīda tvaṃ mahāmuni
tamahaṃ pūjayissāmi dukkhassantakaro tuvaṃ.
|75.85| Pattharitvā jinacammaṃ adāsi satthuno ahaṃ
nisīdi tattha bhagavā sīhova girigabbhare.
|75.86| Khippaṃ pabbatamāruyha ambassa phalamaggahiṃ
sālakalyāṇikaṃ pupphaṃ candanañca mahārahaṃ.
@Footnote: 1 Ma. ekakaṃ. Yu. ekakammaṃ. 2 Yu. uda.
|75.87| Khippaṃ paggayha taṃ sabbaṃ upetvā 1- lokanāyakaṃ
phalaṃ buddhassa datvāna sālapupphaṃ apūjayiṃ.
|75.88| Candanaṃ anulimpitvā avandiṃ satthuno ahaṃ
pasannacitto sumano vipulāya ca pītiyā.
|75.89| Ajinamhi nisīditvā sumedho lokanāyako
mama kammaṃ pakittesi hāsayanto mamaṃ tadā.
|75.90| Iminā phaladānena gandhamālehi cūbhayaṃ
pañcavīse kappasate devaloke ramissati.
|75.91| Anūnamanasaṅkappo vasavatti bhavissati
chabbīsatikappasate manussattaṃ gamissati.
|75.92| Bhavissati cakkavatti cāturanto mahiddhiko
vekaraṃ 2- nāma nagaraṃ visukammena māpitaṃ.
|75.93| Hessati sabbasovaṇṇaṃ nānāratanabhūsitaṃ
eteneva upāyena saṃsarissati yoniyo 3-.
|75.94| Sabbattha sukhito 4- hutvā devatte atha mānuse
pacchime bhavasampatte brahmabandhu bhavissati.
|75.95| Agārā abhinikkhamma anagāri bhavissati
aviññattipaccayo 5- hutvā nibbāyissatināsavo.
|75.96| Idaṃ vatvāna sambuddho sumedho lokanāyako
mama nijjhāyamānassa pakkāmi anilañjase.
@Footnote: 1 Yu. upesiṃ. 2 Ma. Yu. vebhāraṃ. 3 Ma. so bhave. Yu. yoniso.
@4 Ma. pūjito. 5 Ma. abhiññāpāragū.
|75.97| Tena kammena sukatena cetanāpaṇidhīhi ca
jahitvā mānusaṃ dehaṃ tusitaṃ 1- upapajjahaṃ.
|75.98| Tusitato cavitvāna nibbattiṃ mātukucchiyā
bhoge me ūnatā natthi yamhi gabbhe vasāmahaṃ.
|75.99| Mātukucchigate mayi annapānañca bhojanaṃ
mātuyā mama chandena nibbattati yathicchakaṃ.
|75.100| Jātiyā pañcavassena pabbajiṃ anagāriyaṃ
oropitamhi kesamhi arahattaṃ apāpuṇiṃ.
|75.101| Pubbakammaṃ gavesanto orena naddasaṃ ahaṃ
tiṃsakappasahassamhi mama kammaṃ anussariṃ.
|75.102| Namo te purisājañña namo te purisuttama
tava sāsanamāgamma pattomhi acalaṃ padaṃ.
|75.103| Tiṃsakappasahassamhi sambuddhamabhipūjayiṃ
duggatiṃ nābhijānāmi buddhapūjāyidaṃ phalaṃ.
|75.104| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|75.105| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|75.106| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. tāvatiṃsamagacchahaṃ.
Itthaṃ sudaṃ āyasmā candanamāliyo thero imā gāthāyo abhāsitthāti.
Candanamāliyattherassa apadānaṃ samattaṃ.
Chaṭṭhaṃ dhātupūjakattherāpadānaṃ (486)
[76] |76.107| Nibbute lokanāthamhi siddhatthe lokanāyake
mamaññātī samānetvā dhātupūjaṃ akāsahaṃ.
|76.108| Catunavute ito kappe yaṃ dhātumabhipūjayiṃ
duggatiṃ nābhijānāmi dhātupūjāyidaṃ phalaṃ.
|76.109| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|76.110| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|76.111| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā dhātupūjako thero imā gāthāyo abhāsitthāti.
Dhātupūjakattherassa apadānaṃ samattaṃ.
The Pali Tipitaka in Roman Character Volume 33 page 104-111.
http://84000.org/tipitaka/pitaka_item/roman_item_s.php?book=33&item=74&items=3
Classified by [Item Number] :-
http://84000.org/tipitaka/pitaka_item/roman_item_s.php?book=33&item=74&items=3&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=74&items=3
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=74&items=3
Study Atthakatha :-
http://84000.org/tipitaka/attha/attha.php?b=33&i=74
The Pali Atthakatha in Thai :-
http://84000.org/tipitaka/atthapali/read_th.php?B=50&A=5556
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5556
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
