Paññāsamo kiṃkaṇipupphavaggo
paṭhamaṃ tīṇikiṃkaṇipupphiyattherāpadānaṃ (491)
[81] |81.1| Kaṇikāraṃva jotantaṃ nisinnaṃ pabbatantare
addasaṃ virajaṃ buddhaṃ vipassiṃ lokanāyakaṃ.
|81.2| Tīṇikiṃkaṇipupphāni paggayha abhiropayiṃ
sambuddhaṃ abhipūjetvā gacchāmi dakkhiṇāmukho.
|81.3| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|81.4| Ekanavute ito kappe yaṃ buddhamabhipūjayiṃ
duggatiṃ nābhijānāmi buddhapūjāyidaṃ phalaṃ.
|81.5| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|81.6| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|81.7| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā tīṇikiṃkaṇipupphiyo thero imā gāthāyo abhāsitthāti.
Tīṇikiṃkaṇipupphiyattherassa apadānaṃ samattaṃ.
Dutiyaṃ paṃsukūlapūjakattherāpadānaṃ (492)
[82] |82.8| Himavantassa avidūre udabbalo 1- nāma pabbato
tatthaddasaṃ paṃsukūlaṃ dumaggamhi vilambitaṃ.
|82.9| Tīṇi kiṃkaṇipupphāni ocinitvānahaṃ tadā
haṭṭho haṭṭhena cittena paṃsukūlaṃ apūjayiṃ.
|82.10| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|82.11| Ekanavute ito kappe yaṃ kammamakariṃ tadā
duggatiṃ nābhijānāmi pūjetvā arahaddhajaṃ.
|82.12| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|82.13| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|82.14| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā paṃsukūlapūjako thero imā gāthāyo abhāsitthāti.
Paṃsukūlapūjakattherassa apadānaṃ samattaṃ.
@Footnote: 1 Ma. udaṅgaṇo. Yu. udako.
Tatiyaṃ koraṇḍapupphiyattherāpadānaṃ (493)
[83] |83.15| Vanakammiko pure āsiṃ pitupitāmahenahaṃ 1-
pasumārena jīvāmi kusalaṃ me na vijjati.
|83.16| Mama āsayasāmantā tisso lokagganāyako
tīṇi padāni dassesi anukampāya cakkhumā.
|83.17| Akkamante 2- pade disvā tissassa nāma satthuno
haṭṭho haṭṭhena cittena pade cittaṃ pasādayiṃ.
|83.18| Koraṇḍaṃ pupphitaṃ disvā pādapaṃ dharaṇīruhaṃ
caṅkoṭakaṃ 3- gahetvāna padaseṭṭhaṃ apūjayiṃ.
|83.19| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|83.20| Yaṃ yaṃ yonūpapajjāmi devattaṃ atha mānusaṃ
koraṇḍakachavi homi sappabhāso 4- bhavāmahaṃ.
|83.21| Dvenavute ito kappe yaṃ kammamakariṃ tadā
duggatiṃ nābhijānāmi padapūjāyidaṃ phalaṃ.
|83.22| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|83.23| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ
@Footnote: 1 Ma. pitumātumatenahaṃ. 2 Ma. Yu. akkante ca .... 3 Ma. sakosakaṃ. 4 Ma.
@suppabhāso.
|83.24| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā koraṇḍapupphiyo thero imā gāthāyo abhāsitthāti.
Koraṇḍapupphiyattherassa apadānaṃ samattaṃ.
Catutthaṃ kiṃsukapupphiyattherāpadānaṃ (494)
[84] |84.25| Kiṃsukaṃ pupphitaṃ disvā paggahetvāna añjaliṃ
buddhaseṭṭhaṃ saritvāna ākāse abhipūjayiṃ.
|84.26| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|84.27| Ekattiṃse ito kappe yaṃ kammamakariṃ tadā
duggatiṃ nābhijānāmi buddhapūjāyidaṃ phalaṃ.
|84.28| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|84.29| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|84.30| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti
itthaṃ sudaṃ āyasmā kiṃsukapupphiyo thero imā gāthāyo abhāsitthāti.
Kiṃsukapupphiyattherassa apadānaṃ samattaṃ.
Pañcamaṃ upaḍḍhadussadāyakattherāpadānaṃ (495)
[85] |85.31| Padumuttarabhagavato sujāto nāma sāvako
paṃsukūlaṃ gavesanto saṅkāre rathiyā 1- tadā.
|85.32| Nagare haṃsavatiyā paresaṃ bhatiko 2- ahaṃ
upaḍḍhadussaṃ datvāna sirasā abhivādayiṃ.
|85.33| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agañchahaṃ.
|85.34| Tettiṃsakkhattuṃ devindo devarajjamakārayiṃ
sattasattatikhattuñca cakkavatti ahosahaṃ.
|85.35| Padesarajjaṃ vipulaṃ gaṇanāto asaṅkhayaṃ
upaḍḍhadussadānena modāmi akutobhayo.
|85.36| Icchamāno ahaṃ 3- ajja sakānanaṃ sapabbataṃ
khomadussehi chādeyyaṃ aḍḍhadussassidaṃ phalaṃ.
|85.37| Satasahasse ito kappe yaṃ dānamadadiṃ tadā
duggatiṃ nābhijānāmi aḍḍhadussassidaṃ phalaṃ.
|85.38| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|85.39| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Ma. carate. Yu. carate sadā. 2 Ma. Yu. bhatako. 3 Po. Ma. Yu. cahaṃ.
|85.40| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā upaḍḍhadussadāyako thero imā gāthāyo abhāsitthāti.
Upaḍḍhadussadāyakattherassa apadānaṃ samattaṃ.
Chaṭṭhaṃ ghatamaṇḍadāyakattherāpadānaṃ (496)
[86] |86.41| Sucintitaṃ bhagavantaṃ lokajeṭṭhaṃ narāsabhaṃ
upaviṭṭhaṃ mahāraññaṃ vātābādhena pīḷitaṃ.
|86.42| Disvā cittaṃ pasādetvā ghatamaṇḍaṃ upānayiṃ
katattā upacitattā 1- ca gaṅgā bhāgīrasī ayaṃ.
|86.43| Mahāsamuddā cattāro ghataṃ sampajjare mama
ayañca paṭhavī ghorā appamāṇā asaṅkhayā.
|86.44| Mama saṅkappamaññāya bhavanti 2- te madhusakkharā
catuddisā 3- ime rukkhā pādapā dharaṇīruhā.
|86.45| Mama saṅkappamaññāya kapparukkhā bhavanti te
paññāsakkhattuṃ devindo devarajjamakārayiṃ.
|86.46| Ekapaññāsakkhattuñca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|86.47| Catunavute ito kappe yaṃ dānamadadiṃ tadā
duggatiṃ nābhijānāmi ghatamaṇḍassidaṃ phalaṃ.
@Footnote: 1 Ma. Yu. ācitattā. 2 Ma. Yu. bhavate madhusakkharā. 3 Ma. Yu. cātuddīpā.
|86.48| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|86.49| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|86.50| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā ghatamaṇḍadāyako thero imā gāthāyo abhāsitthāti.
Ghatamaṇḍadāyakattherassa apadānaṃ samattaṃ.
Sattamaṃ udakadāyakattherāpadānaṃ (497)
[87] |87.51| Padumuttarabuddhassa bhikkhusaṅghe anuttare
pasannacitto sumano pānighaṭaṃ 1- apūrayiṃ.
|87.52| Pabbatagge dumagge vā ākāse vātha bhūmiyaṃ
yadā pānīyamicchāmi khippaṃ nibbattate mamaṃ.
|87.53| Satasahasse ito kappe yaṃ dānamadadiṃ tadā
duggatiṃ nābhijānāmi udakadānassidaṃ phalaṃ.
|87.54| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|87.55| Svāgataṃ vata me āsi mama buddhassa santike
tisso vijjā anupattā kataṃ buddhassa sāsanaṃ.
@Footnote: 1 Po. Yu. pānīyaghaṭaṃ.
|87.56| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā udakadāyako thero imā gāthāyo abhāsitthāti.
Udakadāyakattherassa apadānaṃ samattaṃ.
Aṭṭhamaṃ puḷinathūpiyattherāpadānaṃ (498)
[88] |88.57| Himavantassavidūre yamako 1- nāma pabbato
assamo sukato mayhaṃ paṇṇasālā sumāpitā.
|88.58| Nārado nāma nāmena jaṭilo uggatāpano
catuddasasahassāni sissā paricaranti maṃ.
|88.59| Paṭisallīnako santo evaṃ cintesahantadā
mahājanā 2- maṃ pūjenti nāhaṃ pūjemi kiñcanaṃ.
|88.60| Na me ovādako atthi vattā koci na vijjati
anācariyupajjhāyo vane vāsaṃ upemahaṃ.
|88.61| Upāsamāno yamakaṃ 3- garucittaṃ upaṭṭhahe
so me ācariyo natthi vanavāso niratthako.
|88.62| Āyāgaṃ me gavesiyaṃ 4- garubhāvaniyaṃ tathā
sāsassayo 5- vasissāmi na koci garahissati.
|88.63| Uttānakūlā nadikā supatitthā manoramā
susuddhapuḷinākiṇṇā avidūre mamassamaṃ.
@Footnote: 1 Po. Yu. samaṅgo. 2 Ma. sabbo jano maṃ pūjeti. Yu. sabbajano. 3 Po.
@Ma. Yu. yamahaṃ. 4 Ma. Yu. gavesissaṃ. 5 Ma. Yu. sāvassayo.
|88.64| Nadiṃ amarikaṃ nāma upagantvā 1- ahantadā
saṅkaḍḍhitvāna 2- puḷinaṃ akaṃ puḷinacetiyaṃ.
|88.65| Ye te ahesuṃ sambuddhā bhavantakaraṇā munī
tesaṃ etādiso thūpo taṃ nimittaṃ karomahaṃ.
|88.66| Karitvā puḷine 3- thūpaṃ sovaṇṇaṃ māpayiṃ ahaṃ
soṇṇakiṃkaṇipupphāni sahasse tīṇi pūjayiṃ.
|88.67| Sāyaṃ pātaṃ namassāmi pītijāto 4- katañjalī
sammukhā viya sambuddhaṃ vandiṃ puḷinacetiyaṃ.
|88.68| Yadā kilesā jāyanti vitakkā gehanissitā
sarāmi sukataṃ thūpaṃ paccavekkhāmi tāvade.
|88.69| Upanissāya vihariṃ 5- satthavāhaṃ vināyakaṃ
kilese saṃvareyyāsi 6- na yuttaṃ tava mārisa.
|88.70| Saha āvajjite thūpe gāravaṃ hoti me tadā
kuvitakke vinodesiṃ nāgo tuttaṭṭito 7- yathā.
|88.71| Evaṃ viharamānaṃ maṃ maccurājābhimaddatha
tattha kālaṃ kato santo brahmalokaṃ agacchahaṃ.
|88.72| Yāvatāyuṃ vasitvāna tidive 8- upapajjahaṃ
asītikkhattuṃ devindo devarajjamakārayiṃ.
|88.73| Satānaṃ tīṇikhattuñca cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
@Footnote: 1 Ma. upagantavānahantadā. 2 Ma. Yu. saṃvaḍḍhayitvā. 3 Ma. puḷinaṃ.
@4 Ma. vedajāto. Yu. vittijāto. 5 Ma. viharaṃ. 6 Ma. Yu. saṃvaseyyāsi.
@7 Po. tuṇṇaṭṭito. Yu. tuttaddito. 8 Yu. tidase.
|88.74| Tesaṃ kiṃkaṇipupphānaṃ vipākaṃ anubhomahaṃ
bāvīsatisahassāni parivārenti maṃ bhave.
|88.75| Thūpassa pariciṇṇattā rajojallaṃ na limpati
gatte sedā na muñcanti sappabhāso bhavāmahaṃ.
|88.76| Aho me sukato thūpo sudiṭṭhāmarikā nadī
thūpaṃ katvāna puḷinaṃ 1- pattomhi acalaṃ padaṃ.
|88.77| Kusalaṃ kattukāmena jantunā sāragāhinā 2-
natthi khettaṃ akhettaṃ vā paṭipattiva sārakā 3-.
|88.78| Yathāpi balavā poso aṇṇavaṃ taritussaho 4-
parittaṃ kaṭṭhamādāya pakkhandeyya mahāsaraṃ.
|88.79| Imāhaṃ kiṭṭhaṃ 5- nissāya tarissāmi mahodadhiṃ
ussāhena viriyena tareyya udadhiṃ naro.
|88.80| Tatheva me kataṃ kammaṃ parittaṃ thokakañca 6- yaṃ
taṃ 7- kammaṃ upanissāya saṃsāraṃ samatikkamiṃ.
|88.81| Pacchime bhavasampatte sukkamūlena codito
sāvatthiyaṃ pure jāto mahāsāle suaddhake.
|88.82| Saddhā mātāpitā mayhaṃ buddhassa saraṇaṃ gatā
ubho diṭṭhasutā 8- ete anuvattanti sāsanaṃ.
|88.83| Bodhipappaṭikaṃ gayha soṇṇathūpaṃ akārayuṃ
sāyaṃ pātaṃ namassanti sakyaputtassa sammukhā.
@Footnote: 1 Yu. pubine. 2 Po. Yu. pāragāminā. 3 Ma. sādhakā. Yu. sādhikā. 4 Ma. Yu.
@taritussahe. 5 Po. Ma. Yu. kaṭṭhaṃ. 6 Po. Yu. thokakañcanaṃ. 7 Yu. kataṃ.
@8 Ma. Yu. diṭṭhapadā.
|88.84| Uposathamhi divase soṇṇathūpaṃ vinīharuṃ
buddhassa vaṇṇaṃ kittentā tiyāmaṃ vītināmayuṃ.
|88.85| Samā 1- disvānahaṃ thūpaṃ sariṃ puḷinacetiyaṃ
ekāsane nisīditvā arahattaṃ apāpuṇiṃ.
Bāvīsatimaṃ bhāṇavāraṃ.
|88.86| Gavesamāno taṃ dhīraṃ dhammasenāpatiddasaṃ
agārā nikkhamitvāna pabbajiṃ tassa santike.
|88.87| Jātiyā sattavassena arahattaṃ apāpuṇiṃ
upasampādayi buddho guṇamaññāya cakkhumā.
|88.88| Dārakeneva santena kiriyaṃ niṭṭhitaṃ mayā
kataṃ me karaṇīyajja sakyaputtassa sāsane.
|88.89| Sabbaverabhayātīto sabbasaṅgātigo isi
sāvako te mahāvīra soṇṇathūpassidaṃ phalaṃ.
|88.90| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|88.91| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
|88.92| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
@Footnote: 1 Ma. Yu. saha.
Itthaṃ sudaṃ āyasmā puḷinathūpiyo thero imā gāthāyo abhāsitthāti.
Puḷinathūpiyattherassa apadānaṃ samattaṃ.
Navamaṃ naḷakuṭikadāyakattherāpadānaṃ (499)
[89] |89.93| Himavantassavidūre hāriko 1- nāma pabbato
sayambhū nārado nāma rukkhamūle vasi tadā.
|89.94| Naḷāgāraṃ karitvāna tiṇena chādayiṃ ahaṃ
caṅkamaṃ sodhayitvāna sayambhussa adāsahaṃ.
|89.95| Tena kammena sukatena cetanāpaṇidhīhi ca
jahitvā mānusaṃ dehaṃ tāvatiṃsaṃ agacchahaṃ.
|89.96| Tattha me sukataṃ byamhaṃ naḷakuṭikāya nimmitaṃ
saṭṭhiyojanamubbiddhaṃ 2- tiṃsayojanavitthataṃ.
|89.97| Catuddasesu kappesu devaloke ramiṃ ahaṃ
ekasattatikkhattuñca devarajjaṃ akārayiṃ.
|89.98| Catuttiṃsatikkhattuñca 3- cakkavatti ahosahaṃ
padesarajjaṃ vipulaṃ gaṇanāto asaṅkhayaṃ.
|89.99| Dhammapāsādamāruyha suññāgāravarūpagaṃ
yathicchakāhaṃ vihare sakyaputtassa sāsane.
|89.100| Ekattiṃse ito kappe yaṃ kammamakariṃ tadā
duggatiṃ nābhijānāmi naḷakuṭikāyidaṃ phalaṃ.
@Footnote: 1 Ma. hārito. Yu. bhāriko. 2 Ma. sabbattha ...mubbedhaṃ. 3 Po. Yu.
@catuttiṃsakkhattuñceva. 4 Ma. Yu. sabbākāravarūpamaṃ.
|89.101| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|89.102| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ
|89.103| paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā naḷakuṭikadāyako thero imā gāthāyo abhāsitthāti.
Naḷakuṭikadāyakattherassa apadānaṃ samattaṃ.
Dasamaṃ piyālaphaladāyakattherāpadānaṃ (500)
[90] |90.104| Migaluddho pure āsiṃ vivane 1- vicaraṃ tadā
addasaṃ virajaṃ buddhaṃ sabbadhammāna pāraguṃ.
|90.105| Piyālaphalamādāya buddhaseṭṭhassadāsahaṃ
puññakhettassa vīrassa pasanno sehi pāṇibhi.
|90.106| Ekattiṃse ito kappe yaṃ phalaṃ adadiṃ tadā
duggatiṃ nābhijānāmi phaladānassidaṃ phalaṃ.
|90.107| Kilesā jhāpitā mayhaṃ bhavā sabbe samūhatā
nāgova bandhanaṃ chetvā viharāmi anāsavo.
|90.108| Svāgataṃ vata me āsi mama buddhassa santike
tisso vijjā anuppattā kataṃ buddhassa sāsanaṃ.
@Footnote: 1 Yu. vicine. ito paraṃ īdisameva.
|90.109| Paṭisambhidā catasso vimokkhāpica aṭṭhime
chaḷabhiññā sacchikatā kataṃ buddhassa sāsananti.
Itthaṃ sudaṃ āyasmā piyālaphaladāyako thero imā gāthāyo abhāsitthāti.
Piyālaphaladāyakattherassa apadānaṃ samattaṃ.
Uddānaṃ
kiṃkaṇi paṃsukūlañca varakoraṇḍakiṃsukaṃ
upaḍḍhadussi ghatado udakaṃ thūpakārako.
Naḷāgāri ca navamo piyālaphaladāyako
satamekañca gāthānaṃ navakañca taduttari.
Kiṃkaṇipupphavaggo paññāsamo.
Atha vagguddānaṃ
metteyyavaggo bhaddāli sakiṃsammajjakopica
ekavihārī vibhedako jagati sālapupphiyo.
Naḷamāli paṃsukūlaṃ kīkaṇipupphiko tathā
asīti dve ca gāthāyo catuddasā satāni ca.
Metteyyavaggadasakaṃ pañcamaṃ satakaṃ samattaṃ.
-----------------------
The Pali Tipitaka in Roman Character Volume 33 page 125-138.
http://84000.org/tipitaka/pitaka_item/roman_item_s.php?book=33&item=81&items=10
Classified by [Item Number] :-
http://84000.org/tipitaka/pitaka_item/roman_item_s.php?book=33&item=81&items=10&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=33&item=81&items=10
Compare with The Royal Version of Thai Tipitaka :-
http://84000.org/tipitaka/read/byitem_s.php?book=33&item=81&items=10
Study Atthakatha :-
http://84000.org/tipitaka/attha/attha.php?b=33&i=81
The Pali Atthakatha in Thai :-
http://84000.org/tipitaka/atthapali/read_th.php?B=50&A=5597
The Pali Atthakatha in Roman :-
http://84000.org/tipitaka/atthapali/read_rm.php?B=50&A=5597
Contents of The Tipitaka Volume 33
http://84000.org/tipitaka/read/?index_33
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
