อรรถกถาเล่มที่ ๑๕ หน้าที่ ๒๕๑.

ทฬฺหปรกฺกโมติ ถิรปรกฺกโม. อนิกฺขิตฺตธุโรติ อฏฺฐปิตธุโร, ^๑- อคฺคผลํ อรหตฺตํ อปฺปตฺวา วิริยธุรํ น นิกฺขิปิสฺสามีติ เอวํ ปฏิปนฺโน. อิมสฺมึ สุตฺเต จตุสจฺจวเสน โสตาปตฺติมคฺโค, โสตาปตฺติมคฺเคน จ ^๒- ญาณชวสมฺปนฺนตา กถิตาติ. ฉฏฺเฐ ตีณิ จ มคฺคานิ ตีณิ จ ผลานิ, ตีหิ มคฺคผเลหิ จ ญาณชวสมฺปนฺนตา กถิตา. สตฺตเม อรหตฺตผลํ, อรหตฺตผเลเนว จ มคฺคกิจฺจํ กถิตํ. ผลํ ปน ชวิตชเวน อุปฺปชฺชนโต ชโวติ จ วตฺตุํ น วฏฺฏติ. ^๓- ๘. โปตฺถกสุตฺตวณฺณนา [๑๐๐] อฏฺฐเม นโวติ กรณํ อุปาทาย วุจฺจติ. โปตฺถโกติ วากมยวตฺถํ. มชฺฌิโมติ ปริโภคมชฺฌิโม. ชิณฺโณติ ปริโภคชิณฺโณ. อุกฺขลิปริมชฺชนนฺติ อุกฺขลิปริปุญฺฉนํ. ทุสฺสีโลติ นิสฺสีโล. ทุพฺพณฺณตายาติ คุณวณฺณาภาเวน ทุพฺพณฺณตาย. ทิฏฺฐานุคตึ อาปชฺชนฺตีติ เตน กตํ อนุกโรนฺติ. น มหปฺผลํ โหตีติ วิปากผเลน น มหปฺผลํ โหติ. น มหานิสํสนฺติ วิปากานิสํเสน ^๔- น มหานิสํสํ. อปฺปคฺฆตายาติ วิปากคฺเฆน อปฺปคฺฆตาย. กาสิกํ วตฺถนฺติ กปฺปาสสุตฺตํ ^๕- กนฺติตฺวา กตวตฺถํ, ตญฺจ โข กาสิรฏฺเฐเยว อุฏฺฐิตํ. เสสํ อุตฺตานเมว. สีลํ ปเนตฺถ มิสฺสกํ กถิตนฺติ. ๙. โลณผลสุตฺตวณฺณนา ^๖- [๑๐๑] นวเม ยถา ยถายนฺติ ยถา ยถา อยํ. ตถา ตถา ตนฺติ ตถา ตถา ตํ กมฺมํ. อิทํ วุตฺตํ โหติ:- โย เอวํ วเทยฺย "ยถา ยถา กมฺมํ กโรติ, ตถา ตถาสฺส วิปากํ ปฏิสํเวทิยเตว. น หิ สกฺกา กตสฺส ^๗- กมฺมสฺส วิปากํ อปฺปฏิสํเวเทตุํ. ^๘- ตสฺมา ยตฺตกํ กมฺมํ กโรติ, ตตฺตกสฺส วิปากํ ปฏิสํเวทิยเตวา"ติ. เอวํ สนฺตนฺติ เอวํ สนฺเต. พฺรหฺมจริยวาโส น โหตีติ ยํ มคฺคภาวนโต @เชิงอรรถ: ^๑ ฉ.ม.,อิ. อฏฺฐปิตธุโร ปคฺคหิตธุโร ^๒ ม. โสตาปตฺติมคฺเคเนว @^๓ ฉ.ม. วตฺตุํ วฏฺฏติ ^๔ ฉ.ม.,อิ. วิปากานิสํเสเนว @^๕ ฉ.ม. ตีหิ กปฺปาสอํสูหิ สุตฺตํ, อิ. ตีหิ กปฺปาสํสูหิ สุตฺตํ @^๖ ฉ.ม. โลณกปลฺลสุตฺตวณฺณนา ^๗ สี. ตสฺส ^๘ ฉ.ม. ปฏิเสเธตุํ

เนื้อความอรรถกถาฉบับภาษาบาลี อักษรไทย เล่มที่ ๑๕ หน้าที่ ๒๕๑. http://84000.org/tipitaka/read/attha_page.php?book=15&page=251&pages=1&modeTY=2&edition=pali ศึกษาพระสูตร (เนื้อความ) นี้แยกตามสารบัญ :- http://84000.org/tipitaka/pitaka_item/read_th.php?B=15&A=5821&modeTY=2&pagebreak=1 http://84000.org/tipitaka/atthapali/th_line.php?B=15&A=5821&modeTY=2&pagebreak=1#p251