พระไตรปิฎกเล่มที่ ๑๙ ภาษาบาลี อักษรไทย
พระสุตตันตปิฎกเล่มที่ ๑๑ สุตฺต. สํ. มหาวารวคฺโค

                  พลกรณียวคฺโค เอกาทสโม
     [๒๖๔]   สาวตฺถีนิทานํ  ฯ  เสยฺยถาปิ  ภิกฺขเว เย เกจิ พลกรณียา
กมฺมนฺตา   กยิรนฺติ   ๑-  สพฺเพ  เต  ปฐวึ  นิสฺสาย  ปฐวิยํ  ปติฏฺฐาย
เอวเมเต   พลกรณียา   กมฺมนฺตา  กยิรนฺติ  ฯ  เอวเมว  โข  ภิกฺขเว
ภิกฺขุ   สีลํ   นิสฺสาย   สีเล  ปติฏฺฐาย  อริยํ  อฏฺฐงฺคิกํ  มคฺคํ  ภาเวติ
อริยํ อฏฺฐงฺคิกํ มคฺคํ พหุลีกโรติ ฯ
     [๒๖๕]   กถญฺจ   ภิกฺขเว   ภิกฺขุ  สีลํ  นิสฺสาย  สีเล  ปติฏฺฐาย
อริยํ   อฏฺฐงฺคิกํ   มคฺคํ  ภาเวติ  อริยํ  อฏฺฐงฺคิกํ  มคฺคํ  พหุลีกโรติ  ฯ
อิธ   ภิกฺขเว   ภิกฺขุ   สมฺมาทิฏฺฐึ   ภาเวติ   วิเวกนิสฺสิตํ  วิราคนิสฺสิตํ
นิโรธนิสฺสิตํ   โวสคฺคปริณามึ   ฯเปฯ  สมฺมาสมาธึ  ภาเวติ  วิเวกนิสฺสิตํ
วิราคนิสฺสิตํ   นิโรธนิสฺสิตํ   โวสฺสคฺคปริณามึ   ฯ   เอวํ   โข  ภิกฺขเว
ภิกฺขุ   สีลํ   นิสฺสาย   สีเล  ปติฏฺฐาย  อรยํ  อฏฺฐงฺคิกํ  มคฺคํ  ภาเวติ
อริยํ         อฏฺฐงฺคิกํ         มคฺคํ        พหุลีกโรตีติ        ฯ
(ปรคงฺคาเปยฺยาลี วณฺณิยโต ปริปุณฺณสุตฺตนฺติ วิตฺถารมคฺคิ ๒-) ฯ
     [๒๖๖]   สาวตฺถีนิทานํ  ฯ  เสยฺยถาปิ  ภิกฺขเว เย เกจิ พลกรณียา
กมฺมนฺตา   กยิรนฺติ   สพฺเพ   เต   ปฐวึ   นิสฺสาย   ปฐวิยํ  ปติฏฺฐาย
เอวเมเต   พลกรณียา   กมฺมนฺตา  กยิรนฺติ  ฯ  เอวเมว  โข  ภิกฺขเว
ภิกฺขุ   สีลํ   นิสฺสาย   สีเล  ปติฏฺฐาย  อริยํ  อฏฺฐงฺคิกํ  มคฺคํ  ภาเวติ
อริยํ อฏฺฐงฺคิกํ มคฺคํ พหุลีกโรติ ฯ
@เชิงอรรถ: ๑ ม. กริยนฺติ ฯ เอวมุปริ ฯ ๒ ม. ยุ. วิตฺถารมคฺคี ฯ
     [๒๖๗]   กถญฺจ   ภิกฺขเว   ภิกฺขุ  สีลํ  นิสฺสาย  สีเล  ปติฏฺฐาย
อริยํ   อฏฺฐงฺคิกํ   มคฺคํ  ภาเวติ  อริยํ  อฏฺฐงฺคิกํ  มคฺคํ  พหุลีกโรติ  ฯ
อิธ    ภิกฺขเว    ภิกฺขุ    สมฺมาทิฏฺฐึ    ภาเวติ    ราควินยปริโยสานํ
โทสวินยปริโยสานํ   โมหวินยปริโยสานํ   ฯเปฯ   สมฺมาสมาธึ   ภาเวติ
ราควินยปริโยสานํ   โทสวินยปริโยสานํ   โมหวินยปริโยสานํ   ฯ   เอวํ
โข   ภิกฺขเว   ภิกฺขุ   สีลํ   นิสฺสาย  สีเล  ปติฏฺฐาย  อริยํ  อฏฺฐงฺคิกํ
มคฺคํ ภาเวติ อริยํ อฏฺฐงฺคิกํ มคฺคํ พหุลีกโรตีติ ฯ
     [๒๖๘]   สาวตฺถีนิทานํ  ฯ  เสยฺยถาปิ  ภิกฺขเว เย เกจิ พลกรณียา
กมฺมนฺตา   กยิรนฺติ   สพฺเพ   เต   ปฐวึ   นิสฺสาย   ปฐวิยํ  ปติฏฺฐาย
เอวเมเต   พลกรณียา   กมฺมนฺตา  กยิรนฺติ  ฯ  เอวเมว  โข  ภิกฺขเว
ภิกฺขุ   สีลํ   นิสฺสาย   สีเล  ปติฏฺฐาย  อริยํ  อฏฺฐงฺคิกํ  มคฺคํ  ภาเวติ
อริยํ อฏฺฐงฺคิกํ มคฺคํ พหุลีกโรติ ฯ
     [๒๖๙]   กถญฺจ   ภิกฺขเว   ภิกฺขุ  สีลํ  นิสฺสาย  สีเล  ปติฏฺฐาย
อริยํ   อฏฺฐงฺคิกํ   มคฺคํ  ภาเวติ  อริยํ  อฏฺฐงฺคิกํ  มคฺคํ  พหุลีกโรติ  ฯ
อิธ    ภิกฺขเว   ภิกฺขุ   สมฺมาทิฏฺฐึ   ภาเวติ   อมโตคธํ   อมตปรายนํ
อมตปริโยสานํ   ฯเปฯ   สมฺมาสมาธึ   ภาเวติ   อมโตคธํ  อมตปรายนํ
อมตปริโยสานํ  ฯ  เอวํ  โข  ภิกฺขเว  ภิกฺขุ  สีลํ นิสฺสาย สีเล ปติฏฺฐาย
อริยํ อฏฺฐงฺคิกํ มคฺคํ ภาเวติ อริยํ อฏฺฐงฺคิกํ มคฺคํ พหุลีกโรตีติ ฯ
     [๒๗๐]   สาวตฺถีนิทานํ  ฯ  เสยฺยถาปิ  ภิกฺขเว เย เกจิ พลกรณียา
กมฺมนฺตา   กยิรนฺติ   สพฺเพ   เต   ปฐวึ   นิสฺสาย   ปฐวิยํ  ปติฏฺฐาย
เอวเมเต   พลกรณียา   กมฺมนฺตา  กยิรนฺติ  ฯ  เอวเมว  โข  ภิกฺขเว
ภิกฺขุ   สีลํ   นิสฺสาย   สีเล  ปติฏฺฐาย  อริยํ  อฏฺฐงฺคิกํ  มคฺคํ  ภาเวติ
อริยํ อฏฺฐงฺคิกํ มคฺคํ พหุลีกโรติ ฯ
     [๒๗๑]   กถญฺจ   ภิกฺขเว   ภิกฺขุ  สีลํ  นิสฺสาย  สีเล  ปติฏฺฐาย
อริยํ   อฏฺฐงฺคิกํ   มคฺคํ  ภาเวติ  อริยํ  อฏฺฐงฺคิกํ  มคฺคํ  พหุลีกโรติ  ฯ
อิธ   ภิกฺขเว   ภิกฺขุ   สมฺมาทิฏฺฐึ   ภาเวติ   นิพฺพานนินฺนํ  นิพฺพานโปณํ
นิพฺพานปพฺภารํ     ฯเปฯ     สมฺมาสมาธึ     ภาเวติ     นิพฺพานนินฺนํ
นิพฺพานโปณํ  นิพฺพานปพฺภารํ  ฯ  เอวํ  โข  ภิกฺขเว  ภิกฺขุ  สีลํ  นิสฺสาย
สีเล   ปติฏฺฐาย   อริยํ   อฏฺฐงฺคิกํ   มคฺคํ   ภาเวติ   อริยํ  อฏฺฐงฺคิกํ
มคฺคํ พหุลีกโรตีติ ฯ
     [๒๗๒]   สาวตฺถีนิทานํ   ฯ   เสยฺยถาปิ   ภิกฺขเว  เย  เกจิเม
พีชคามภูตคามา   วุฑฺฒึ   วิรูฬฺหึ  เวปุลฺลํ  อาปชฺชนฺติ  สพฺเพ  เต  ปฐวึ
นิสฺสาย   ปฐวิยํ   ปติฏฺฐาย   เอวเมเต  พีชคามภูตคามา  วุฑฺฒึ  วิรูฬฺหึ
เวปุลฺลํ   อาปชฺชนฺติ   ฯ   เอวเมว  โข  ภิกฺขเว  ภิกฺขุ  สีลํ  นิสฺสาย
สีเล   ปติฏฺฐาย   อริยํ   อฏฺฐงฺคิกํ   มคฺคํ  ภาเวนฺโต  อริยํ  อฏฺฐงฺคิกํ
มคฺคํ พหุลีกโรนฺโต วุฑฺฒึ วิรูฬฺหึ เวปุลฺลํ ปาปุณาติ ธมฺเมสุ ฯ
     [๒๗๓]   กถญฺจ   ภิกฺขเว   ภิกฺขุ  สีลํ  นิสฺสาย  สีเล  ปติฏฺฐาย
อริยํ    อฏฺฐงฺคิกํ    มคฺคํ    ภาเวนฺโต    อริยํ    อฏฺฐงฺคิกํ    มคฺคํ
พหุลีกโรนฺโต   วุฑฺฒึ   วิรูฬฺหึ   เวปุลฺลํ   ปาปุณาติ   ธมฺเมสุ   ฯ  อิธ
ภิกฺขเว  ภิกฺขุ  สมฺมาทิฏฺฐึ  ภาเวติ  วิเวกนิสฺสิตํ วิราคนิสฺสิตํ นิโรธนิสฺสิตํ
โวสฺสคฺคปริณามึ     ฯเปฯ     สมฺมาสมาธึ     ภาเวติ    วิเวกนิสฺสิตํ
วิราคนิสฺสิตํ   นิโรธนิสฺสิตํ   โวสฺสคฺคปริณามึ   ฯ   เอวํ   โข  ภิกฺขเว
ภิกฺขุ   สีลํ  นิสฺสาย  สีเล  ปติฏฺฐาย  อริยํ  อฏฺฐงฺคิกํ  มคฺคํ  ภาเวนฺโต
อริยํ   อฏฺฐงฺคิกํ   มคฺคํ  พหุลีกโรนฺโต  วุฑฺฒึ  วิรูฬฺหึ  เวปุลฺลํ  ปาปุณาติ
ธมฺเมสูติ ฯ
     [๒๗๔]   สาวตฺถีนิทานํ  ฯ  เสยฺยถาปิ  หิมวนฺตํ  ภิกฺขเว ปพฺพตราชํ
นิสฺสาย   นาคา   กายํ   วฑฺเฒนฺติ   พลํ   คาเหนฺติ  เต  ตตฺถ  กายํ
วฑฺเฒตฺวา  พลํ  คาเหตฺวา  กุสุพฺเภ  ๑-  โอตรนฺติ  กุสุพฺเภ  โอตริตฺวา
มหาโสพฺเภ   โอตรนฺติ   มหาโสพฺเภ   โอตริตฺวา   กุนฺนทิโย  โอตรนฺติ
กุนฺนทิโย   โอตริตฺวา   มหานทิโย   โอตรนฺติ   มหานทิโย   โอตริตฺวา
มหาสมุทฺทสาครํ   ๒-   โอตรนฺติ   เต   ตตฺถ   มหนฺตตฺตํ   เวปุลฺลตฺตํ
อาปชฺชนฺติ   กาเยน   ฯ   เอวเมว  โข  ภิกฺขเว  ภิกฺขุ  สีลํ  นิสฺสาย
สีเล   ปติฏฺฐาย   อริยํ   อฏฺฐงฺคิกํ   มคฺคํ  ภาเวนฺโต  อริยํ  อฏฺฐงฺคิกํ
มคฺคํ พหุลีกโรนฺโต มหนฺตตฺตํ ๓- เวปุลฺลตฺตํ ปาปุณาติ ธมฺเมสุ ฯ
     [๒๗๕]   กถญฺจ  ภิกฺขเว  ภิกฺขุ  สีลํ  นิสฺสาย  สีเล ปติฏฺฐาย อริยํ
อฏฺฐงฺคิกํ   มคฺคํ   ภาเวนฺโต   อริยํ   อฏฺฐงฺคิกํ   มคฺคํ   พหุลีกโรนฺโต
มหนฺตตฺตํ   เวปุลฺลตฺตํ   ปาปุณาติ   ธมฺเมสุ   ฯ   อิธ   ภิกฺขเว  ภิกฺขุ
สมฺมาทิฏฺฐึ     ภาเวติ     วิเวกนิสฺสิตํ     วิราคนิสฺสิตํ    นิโรธนิสฺสิตํ
โวสฺสคฺคปริณามึ   ฯเปฯ  สมฺมาสมาธึ  ภาเวติ  วิเวกนิสฺสิตํ  วิราคนิสฺสิตํ
@เชิงอรรถ: ๑ ม. กุโสพฺเภ ฯ ๒ ม. มหาสมุทฺทํ ฯ ยุ. มหาสมุทฺทํ สาครํ ฯ ๓ ยุ. มหนฺตตํ
@เวปุลฺลตํ ฯ เอวมุปริ ฯ
นิโรธนิสฺสิตํ  โวสฺสคฺคปริณามึ  ฯ  เอวํ  โข  ภิกฺขเว  ภิกฺขุ  สีลํ นิสฺสาย
สีเล   ปติฏฺฐาย   อริยํ   อฏฺฐงฺคิกํ   มคฺคํ  ภาเวนฺโต  อริยํ  อฏฺฐงฺคิกํ
มคฺคํ พหุลีกโรนฺโต มหนฺตตฺตํ เวปุลฺลตฺตํ ปาปุณาติ ธมฺเมสูติ ฯ
     [๒๗๖]   สาวตฺถีนิทานํ  ฯ  เสยฺยถาปิ  ภิกฺขเว  รุกฺโข ปาจีนนินฺโน
ปาจีนโปโณ   ปาจีนปพฺภาโร   โส   มูลจฺฉินฺเท   ๑-  กเต  ปปเตสฺสติ
เยน  [๒]-  นินฺโน  เยน โปโณ เยน ปพฺภาโรติ ฯ เอวเมว โข ภิกฺขเว
ภิกฺขุ  อริยํ  อฏฺฐงฺคิกํ  มคฺคํ  ภาเวนฺโต อริยํ อฏฺฐงฺคิกํ มคฺคํ พหุลีกโรนฺโต
นิพฺพานนินฺโน โหติ นิพฺพานโปโณ นิพฺพานปพฺภาโร ฯ
     [๒๗๗]   กถญฺจ  ภิกฺขเว  ภิกฺขุ  อริยํ  อฏฺฐงฺคิกํ  มคฺคํ  ภาเวนฺโต
อริยํ   อฏฺฐงฺคิกํ  มคฺคํ  พหุลีกโรนฺโต  นิพฺพานนินฺโน  โหติ  นิพฺพานโปโณ
นิพฺพานปพฺภาโร  ฯ  อิธ  ภิกฺขเว  ภิกฺขุ  สมฺมาทิฏฺฐึ  ภาเวติ วิเวกนิสฺสิตํ
วิราคนิสฺสิตํ    นิโรธนิสฺสิตํ    โวสฺสคฺคปริณามึ    ฯเปฯ    สมฺมาสมาธึ
ภาเวติ   วิเวกนิสฺสิตํ   วิราคนิสฺสิตํ   นิโรธนิสฺสิตํ   โวสฺสคฺคปริณามึ  ฯ
เอวํ  โข  ภิกฺขเว  ภิกฺขุ  อริยํ  อฏฺฐงฺคิกํ มคฺคํ ภาเวนฺโต อริยํ อฏฺฐงฺคิกํ
มคฺคํ      พหุลีกโรนฺโต      นิพฺพานนินฺโน     โหติ     นิพฺพานโปโณ
นิพฺพานปพฺภาโรติ ฯ
     [๒๗๘]   สาวตฺถีนิทานํ  ฯ  เสยฺยถาปิ  ภิกฺขเว  กุมฺโภ  นิกฺกุชฺโช
วมเตว   อุทกํ   โน   ปจฺจาวมติ  เอวเมว  โข  ภิกฺขเว  ภิกฺขุ  อริยํ
อฏฺฐงฺคิกํ   มคฺคํ   ภาเวนฺโต   อริยํ   อฏฺฐงฺคิกํ   มคฺคํ   พหุลีกโรนฺโต
@เชิงอรรถ: ๑ ม. มูลจฺฉินฺโน กตเมน ปปเตยฺยาติ ฯ ยุ. มูเล ฉินฺโน กตเมน ปปาเตน ปปเตยฺยาติ ฯ
@๒ ม. ยุ. ภนฺเต ฯ
วมเตว ปาปเก อกุสเล ธมฺเม โน ปจฺจาวมติ ฯ
     [๒๗๙]   กถญฺจ  ภิกฺขเว  ภิกฺขุ  อริยํ  อฏฺฐงฺคิกํ  มคฺคํ  ภาเวนฺโต
อริยํ    อฏฺฐงฺคิกํ   มคฺคํ   พหุลีกโรนฺโต   วมเตว   ปาปเก   อกุสเล
ธมฺเม   โน   ปจฺจาวมติ   ฯ  อิธ  ภิกฺขเว  ภิกฺขุ  สมฺมาทิฏฺฐึ  ภาเวติ
วิเวกนิสฺสิตํ    วิราคนิสฺสิตํ    นิโรธนิสฺสิตํ    โวสฺสคฺคปริณามึ    ฯเปฯ
สมฺมาสมาธึ     ภาเวติ     วิเวกนิสฺสิตํ    วิราคนิสฺสิตํ    นิโรธนิสฺสิตํ
โวสฺสคฺคปริณามึ   ฯ   เอวํ  โข  ภิกฺขเว  ภิกฺขุ  อริยํ  อฏฺฐงฺคิกํ  มคฺคํ
ภาเวนฺโต   อริยํ   อฏฺฐงฺคิกํ   มคฺคํ   พหุลีกโรนฺโต   วมเตว  ปาปเก
อกุสเล ธมฺเม โน ปจฺจาวมตีติ ฯ
     [๒๘๐]   สาวตฺถีนิทานํ   ฯ   เสยฺยถาปิ  ภิกฺขเว  สาลิสุกํ  วา
ยวสุกํ   วา   สมฺมาปณิหิตํ   หตฺเถน  วา  ปาเทน  วา  อกฺกนฺตํ  หตฺถํ
วา   ปาทํ   วา  ภินฺทิสฺสติ  ๑-  โลหิตํ  วา  อุปฺปาเทสฺสตีติ  ฐานเมตํ
วิชฺชติ   ฯ   ตํ   กิสฺส  เหตุ  ฯ  สมฺมาปณิหิตตฺตา  ภิกฺขเว  สุกสฺส  ฯ
เอวเมว   โข   ภิกฺขเว  ภิกฺขุ  สมฺมาปณิหิตาย  ทิฏฺฐิยา  สมฺมาปณิหิตาย
มคฺคภาวนาย    อวิชฺชํ    ภินฺทิสฺสติ    วิชฺชํ    อุปฺปาเทสฺสติ   นิพฺพานํ
สจฺฉิกริสฺสตีติ  ฐานเมตํ  วิชฺชติ  ฯ  ตํ  กิสฺส  เหตุ  ฯ  สมฺมาปณิหิตตฺตา
ภิกฺขเว ทิฏฺฐิยา ฯ

             เนื้อความพระไตรปิฎกฉบับภาษาบาลีอักษรไทย เล่มที่ ๑๙ หน้าที่ ๖๘-๗๓.
https://84000.org/tipitaka/read/pali_item.php?book=19&item=264&items=17
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
https://84000.org/tipitaka/read/pali_item.php?book=19&item=264&items=17&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
https://84000.org/tipitaka/read/roman_item.php?book=19&item=264&items=17
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=264&items=17
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=264
             สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19