บาลี ข้อ 116 พระไตรปิฎกเล่มที่ 26

หน้าที่ ๒๑๖.

[๑๑๖] |๑๑๖.๔๔๗| ๖ นคฺคา ทุพฺพณฺณรูปาสิ กีสา ธมนิสนฺถตา ^๑- อุปฺผาสุลิเก กีสิเก กา นุ ตฺวํ อิธ ติฏฺฐสติ ฯ |๑๑๖.๔๔๘| อหํ ภทนฺเต เปตีมฺหิ ทุคฺคตา ยมโลกิกา ปาปกมฺมํ กริตฺวาน เปตโลกํ อิโต คตา (ติ) ฯ |๑๑๖.๔๔๙| กินฺนุ กาเยน วาจาย มนสา ทุกฺกฏํ กตํ กิสฺส กมฺมวิปาเกน เปตโลกํ อิโต คตา (ติ) ฯ |๑๑๖.๔๕๐| อนวชฺเชสุ ติตฺเถสุ วิจินิ อฑฺฒมาสกํ สนฺเตสุ เทยฺยธมฺเมสุ ทีปํ นากาสิมตฺตโน ฯ |๑๑๖.๔๕๑| นทึ อุเปมิ ตสิตา ริตฺตกา ปริวตฺตติ ฉายํ อุเปมิ อุเณฺหสุ อาตโป ปริวตฺตติ ฯ |๑๑๖.๔๕๒| อคฺคิวณฺโณ จ เม วาโต ฑหนฺโต อุปวายติ เอตญฺจ ภนฺเต อรหามิ อญฺญญฺจ ปาปกํ ตโต ฯ |๑๑๖.๔๕๓| คนฺตฺวาน หตฺถินีปุรํ ^๒- วชฺเชสิ มยฺหํ มาตรํ ธีตา จ เต มยา ทิฏฺฐา ทุคฺคตา ยมโลกิกา ปาปกมฺมํ กริตฺวาน เปตโลกํ อิโต คตา ฯ |๑๑๖.๔๕๔| อตฺถิ จ เม เอตฺถ นิกฺขิตฺตํ อนกฺขาตญฺจ ตํ มยา จตฺตาริ สตสหสฺสานิ ปลฺลงฺกสฺส จ เหฏฺฐโต ฯ |๑๑๖.๔๕๕| ตโต เม ทานํ ททาตุ ตสฺสา จ โหตุ ชีวิกา ทานํ ทตฺวา จ เม มาตา ทกฺขิณํ อนฺวาทิสฺสตุ ^๓- เม ^๔- @เชิงอรรถ: ^๑ ยุ. ...สณฺฐิตา ฯ ^๒ ม. หตฺถินึ ปุรํ ฯ เอวมุปริปิ ฯ ยุ. หสฺตินีปุรํ ฯ @^๓ สี. ยุ. อนุทิสฺสตุ ฯ ม. อนุทิจฺฉตุ ฯ ^๔ ม. เมสทฺโท นตฺถิ ฯ

--------------------------------------------------------------------------------------------- หน้าที่ ๒๑๗.

ตทาหํ สุขิตา เหสฺสํ สพฺพกามสมิทฺธินีติ ฯ |๑๑๖.๔๕๖| สาธูติ โส ตสฺสา ^๑- ปฏิสุณิตฺวา คนฺตฺวาน หตฺถินีปุรํ ^๒- ตสฺสา อโวจ มาตรํ ธีตา จ เต มยา ทิฏฺฐา ทุคฺคตา ยมโลกิกา ปาปกมฺมํ กริตฺวาน เปตโลกํ อิโต คตา สา มํ ตตฺถ สมาทเปสิ ฯ |๑๑๖.๔๕๗| คนฺตฺวาน หตฺถินีปุรํ ^๒- วชฺเชสิ มยฺหํ มาตรํ ธีตา จ เต มยา ทิฏฺฐา ทุคฺคตา ยมโลกิกา ปาปกมฺมํ กริตฺวาน เปตโลกํ อิโต คตา ฯ |๑๑๖.๔๕๘| อตฺถิ จ เม เอตฺถ นิกฺขิตฺตํ อนกฺขาตญฺจ ตํ มยา จตฺตาริ สตสหสฺสานิ ปลฺลงฺกสฺส จ เหฏฺฐโต ฯ |๑๑๖.๔๕๙| ตโต เม ทานํ ททาตุ ตสฺสา จ โหตุ ชีวิกา ทานํ ทตฺวา จ เม มาตา ทกฺขิณํ อนฺวาทิสฺสตุ เม ตทาหํ สุขิตา เหสฺสํ สพฺพกามสมิทฺธินีติ ฯ |๑๑๖.๔๖๐| ตโต หิ สา ทานํ อทาสิ ^๓- ทตฺวา จ ^๔- ตสฺสา ทกฺขิณมาทิสิ เปตี จ สุขิตา อาสิ ตสฺสา จาปิ สุชีวิกาติ ฯ เสรินีเปตวตฺถุ ฉฏฺฐํ ฯ

เนื้อความพระไตรปิฎกฉบับภาษาบาลีอักษรไทย เล่มที่ ๒๖ หน้าที่ ๒๑๖-๒๑๗. https://84000.org/tipitaka/read/pali_item.php?book=26&item=116&items=1&pagebreak=1&modeTY=2 อ่านโดยใช้เครื่องหมาย [เลขข้อ] เป็นเกณฑ์แบ่งข้อ :- https://84000.org/tipitaka/read/pali_item.php?book=26&item=116&items=1&pagebreak=1&modeTY=2&mode=bracket อ่านเทียบพระไตรปิฎกฉบับภาษาบาลีอักษรโรมัน :- https://84000.org/tipitaka/read/roman_item.php?book=26&item=116&items=1&pagebreak=1&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=26&item=116&items=1&pagebreak=1&modeTY=2 ศึกษาอรรถกถานี้ได้ที่ :- https://84000.org/tipitaka/attha/attha.php?b=26&i=116 สารบัญพระไตรปิฎกเล่มที่ ๒๖ https://84000.org/tipitaka/read/?index_26 https://84000.org/tipitaka/english/?index_26