พระไตรปิฎกเล่มที่ ๑๗ ภาษาบาลี อักษรไทย
พระสุตตันตปิฎกเล่มที่ ๙ สุตฺต. สํ. ขนฺธวารวคฺโค

     [๒๔๓]   เสยฺยถาปิ  ภิกฺขเว  สรทสมเย ถุลฺลผุสิตเก เทเว วสฺสนฺเต
อุทเก   อุทกปุพฺพุฬํ   ๘-  อุปฺปชฺชติ  เจว  นิรุชฺฌติ  จ  ตเมนํ  จกฺขุมา
@เชิงอรรถ: ๑ สํวทฺธนฺติ ปาโฐ ฯ  ๒ โป. ยุ. โลเก ชาโตติ เทฺว ปาฐา น ทิสฺสติ ฯ
@๓ สํวทฺโธติ วา ปาโฐ ฯ  ๔ ยุ. อโยชฺฌายํ ฯ  ๕ โป. เผณุปิณฺฑํ ฯ
@๖ ม. ยุ. ตนฺติ ทิสฺสติ ฯ ๗ ยุ. อติตานาคตํ ฯ  ๘ อุทกพุพฺพุฬนฺติปิ ปาโฐ ฯ
ปุริโส   ปสฺเสยฺย   นิชฺฌาเยยฺย   โยนิโส  อุปปริกฺเขยฺย  ตสฺส  ปสฺสโต
นิชฺฌายโต   โยนิโส   อุปปริกฺขโต   ริตฺตกญฺเญว  ขาเยยฺย  ตุจฺฉกญฺเญว
ขาเยยฺย   อสารกญฺเญว   ขาเยยฺย   กิญฺหิ  สิยา  ภิกฺขเว  อุทกปุพฺพุเฬ
สาโร  ฯ  เอวเมว  โข ภิกฺขเว ยา กาจิ เวทนา อตีตานาคตปจฺจุปฺปนฺนา
ฯเปฯ   ยา   ทูเร  สนฺติเก  วา  ตํ  ภิกฺขุ  ปสฺสติ  นิชฺฌายติ  โยนิโส
อุปปริกฺขติ    ตสฺส    ปสฺสโต    นิชฺฌายโต    โยนิโส    อุปปริกฺขโต
ริตฺตกญฺเญว      ขายติ      ตุจฺฉกญฺเญว     ขายติ     อสารกญฺเญว
ขายติ กิญฺหิ สิยา ภิกฺขเว เวทนาย สาโร ฯ
     [๒๔๔]   เสยฺยถาปิ   ภิกฺขเว   คิมฺหานํ   ปจฺฉิเม   มาเส  ฐิเต
มชฺฌนฺติเก  กาเล  มรีจิ  ๑-  ผนฺทติ  ตเมนํ  จกฺขุมา  ปุริโส  ปสฺเสยฺย
นิชฺฌาเยยฺย    โยนิโส    อุปปริกฺเขยฺย    ตสฺส   ปสฺสโต   นิชฺฌายโต
โยนิโส   อุปปริกฺขโต   ริตฺตกญฺเญว   ขาเยยฺย   ฯเปฯ   กิญฺหิ   สิยา
ภิกฺขเว มรีจิกาย สาโร ฯ เอวเมว โข ภิกฺขเว ยา กาจิ สญฺญา ฯเปฯ
     [๒๔๕]   เสยฺยถาปิ   ภิกฺขเว   ปุริโส   สารตฺถิโก   สารคเวสี
สารปริเยสนํ  จรมาโน  ติณฺหํ  กุธารึ  อาทาย  วนํ  ปวิเสยฺย  โส ตตฺถ
ปสฺเสยฺย   มหนฺตํ   กทลิกฺขนฺธํ   อุชุํ   นวํ   อกุกฺกุชกชาตํ  ๒-  ตเมนํ
มูเล   ฉินฺเทยฺย   มูเล   เฉตฺวา   อคฺเค   ฉินฺเทยฺย  อคฺเค  เฉตฺวา
ปตฺตวฏฺฏึ    วินิพฺภุชฺเชยฺย    โส    ตตฺถ    ปตฺตวฏฺฏึ    วินิพฺภุชฺชนฺโต
@เชิงอรรถ: ๑ ม. ยุ. มรีจิกา ฯ ๒ สี. อกุกฺกชาตํ ฯ โป. อกตชชาตํ ฯ ม. อกุกฺกุกชาตํ ฯ
เผคฺคุํปิ   นาธิคจฺเฉยฺย   กุโต  สารํ  ตเมนํ  จกฺขุมา  ปุริโส  ปสฺเสยฺย
นิชฺฌาเยยฺย    โยนิโส    อุปปริกฺเขยฺย    ตสฺส   ปสฺสโต   นิชฺฌายโต
โยนิโส   อุปปริกฺขโต   ริตฺตกญฺเญว   ขาเยยฺย   ตุจฺฉกญฺเญว  ขาเยยฺย
อสารกญฺเญว   ขาเยยฺย   กิญฺหิ  สิยา  ภิกฺขเว  กทลิกฺขนฺเธ  สาโร  ฯ
เอวเมว   โข   ภิกฺขเว   เย  เกจิ  สงฺขารา  อตีตานาคตปจฺจุปฺปนฺนา
ฯเปฯ   เย   ทูเร  สนฺติเก  วา  ตํ  ภิกฺขุ  ปสฺสติ  นิชฺฌายติ  โยนิโส
อุปปริกฺขติ    ตสฺส    ปสฺสโต    นิชฺฌายโต    โยนิโส    อุปปริกฺขโต
ริตฺตกญฺเญว    ขายติ    ตุจฺฉกญฺเญว    ขายติ   อสารกญฺเญว   ขายติ
กิญฺหิ สิยา ภิกฺขเว สงฺขาเรสุ สาโร ฯ
     [๒๔๖]   เสยฺยถาปิ  ภิกฺขเว  มายากาโร  วา  มายาการนฺเตวาสี
วา  จาตุมฺมหาปเถ  ๑-  มายํ  วิทํเสยฺย  ตเมนํ จกฺขุมา ปุริโส ปสฺเสยฺย
นิชฺฌาเยยฺย    โยนิโส    อุปปริกฺเขยฺย    ตสฺส   ปสฺสโต   นิชฺฌายโต
โยนิโส   อุปปริกฺขโต   ริตฺตกญฺเญว   ขาเยยฺย   ตุจฺฉกญฺเญว  ขาเยยฺย
อสารกญฺเญว   ขาเยยฺย   กิญฺหิ   สิยา   ภิกฺขเว   มายาย  สาโร  ฯ
เอวเมว    โข    ภิกฺขเว   ยงฺกิญฺจิ   วิญฺญาณํ   อตีตานาคตปจฺจุปฺปนฺนํ
ฯเปฯ   ยํ   ทูเร   สนฺติเก  วา  ตํ  ภิกฺขุ  ปสฺสติ  นิชฺฌายติ  โยนิโส
อุปปริกฺขติ    ตสฺส    ปสฺสโต    นิชฺฌายโต    โยนิโส    อุปปริกฺขโต
ริตฺตกญฺเญว    ขายติ    ตุจฺฉกญฺเญว    ขายติ   อสารกญฺเญว   ขายติ
กิญฺหิ   สิยา   ภิกฺขเว   วิญฺญาเณ   สาโร   ฯ   เอวํ  ปสฺสํ  ภิกฺขเว
สุตวา   อริยสาวโก   รูปสฺมึปิ   นิพฺพินฺทติ  เวทนายปิ  ฯ  สญฺญายปิ  ฯ
@เชิงอรรถ: ๑ ยุ. มหาปเถ ฯ
สงฺขาเรสุปิ   ฯ   วิญฺญาณสฺมึปิ   นิพฺพินฺทติ   นิพฺพินฺทํ   วิรชฺชติ  วิราคา
วิมุจฺจติ    ฯ    วิมุตฺตสฺมึ   วิมุตฺตมิติ   ญาณํ   โหติ   ฯเปฯ   นาปรํ
อิตฺถตฺตายาติ ปชานาตีติ ฯ
    อิทมโวจ   ภควา   อิทํ   วตฺวาน   สุคโต   อถาปรํ   เอตทโวจ
สตฺถา
     [๒๔๗]   เผณปิณฺฑูปมํ รูปํ           เวทนา ปุพฺพุฬูปมา
         มรีจิกูปมา สญฺญา                 สงฺขารา กทลูปมา
         มายูปมญฺจ วิญฺญาณํ             เทสิตาทิจฺจพนฺธุนา ๑- ฯ
         ยถา ๒- ยถา นิชฺฌายติ          โยนิโส อุปปริกฺขติ
         ริตฺตกํ ตุจฺฉกํ โหติ                โย นํ ปสฺสติ โยนิโส ฯ
         อิมญฺจ กายํ อารพฺภ                ภูริปญฺเญน เทสิตํ
         ปหานํ ๓- ติณฺณํ ธมฺมานํ       รูปํ ปสฺสถ ฉฑฺฑิตํ ฯ
         อายุ อุสฺมา จ วิญฺญาณํ           ยทา กายํ ชหนฺติมํ
         อปวิฏฺโฐ ตทา เสติ                ปรภตฺตํ อเจตนํ ฯ
         เอตาทิสายํ สนฺตาโน             มายายํ  พาลลาปินี
         วธโก เอโก ๔- อกฺขาโต        สาโร เอตฺถ น วิชฺชติ ฯ
         เอวํ ขนฺเธ อเวกฺเขยฺย              ภิกฺขุ อารทฺธวีริโย
         ทิวา วา ยทิ วา รตฺติ ๕-         สมฺปชาโน ปฏิสฺสโต ฯ
         ปชเห ๖- สพฺพสํโยคํ             กเรยฺย สรณตฺตโน
         จเรยฺยาทิตฺตสีโสว                 ปตฺถยํ อจฺจุตํ ปทนฺติ ฯ
@เชิงอรรถ: ๑ ยุ. ทีปิตาทิจฺจพนฺธุนา ฯ  ๒ โป. ยถา นํ นิชฺฌติ ฯ   ๓ โป. ปหาสิ ฯ ม. ปหานา ฯ
@๔ ม. เอส ฯ ยุ. เอโส ฯ  ๕ ม. ยุ. รตฺตึ ฯ   ๖ ม. ยุ. ชเหยฺย ฯ
     [๒๔๘]   สาวตฺถี  ฯ  อถ  โข  อญฺญตโร  ภิกฺขุ  ฯเปฯ  เอกมนฺตํ
นิสินฺโน   โข   โส   ภิกฺขุ  ภควนฺตํ  เอตทโวจ  อตฺถิ  นุ  โข  ภนฺเต
กิญฺจิ   รูปํ   ยํ   รูปํ   นิจฺจํ   ธุวํ   สสฺสตํ  อวิปริณามธมฺมํ  สสฺสติสมํ
ตเถว   ฐสฺสติ  ฯ  อตฺถิ  นุ  โข  ภนฺเต  กาจิ  เวทนา  ยา  เวทนา
นิจฺจา   ธุวา   สสฺสตา   อวิปริณามธมฺมา  สสฺสติสมํ  ตเถว  ฐสฺสติ  ฯ
อตฺถิ   นุ   โข   ภนฺเต   กาจิ   สญฺญา   ยา   สญฺญา  ฯเปฯ  อตฺถิ
นุ   โข  ภนฺเต  เกจิ  สงฺขารา  เย  สงฺขารา  นิจฺจา  ธุวา  สสฺสตา
อวิปริณามธมฺมา   สสฺสติสมํ   ตเถว  ฐสฺสนฺติ  ฯ  อตฺถิ  นุ  โข  ภนฺเต
กิญฺจิ    วิญฺญาณํ   ยํ   วิญฺญาณํ   นิจฺจํ   ธุวํ   สสฺสตํ   อวิปริณามธมฺมํ
สสฺสติสมํ   ตเถว   ฐสฺสตีติ   ฯ  นตฺถิ  โข  ภิกฺขุ  กิญฺจิ  รูปํ  ยํ  รูปํ
นิจฺจํ   ธุวํ   สสฺสตํ   อวิปริณามธมฺมํ   สสฺสติสมํ   ตเถว   ฐสฺสติ   ฯ
นตฺถิ  โข  ภิกฺขุ  กาจิ  เวทนา  ฯ  กาจิ  สญฺญา  ฯ  เกจิ สงฺขารา ฯ
กิญฺจิ    วิญฺญาณํ   ยํ   วิญฺญาณํ   นิจฺจํ   ธุวํ   สสฺสตํ   อวิปริณามธมฺมํ
สสฺสติสมํ ตเถว ฐสฺสติ  ๑- ฯ
     [๒๔๙]   อถ   โข  ภควา  ปริตฺตํ  โคมยปิณฺฑํ  ปาณินา  คเหตฺวา
ตํ   ภิกฺขุํ   เอตทโวจ   เอตฺตโกปิ  โข  ภิกฺขุ  อตฺตภาวปฏิลาโภ  นตฺถิ
นิจฺโจ   ธุโว   สสฺสโต   อวิปริณามธมฺโม  สสฺสติสมํ  ตเถว  ฐสฺสติ  ฯ
เอตฺตโก    เจปิ   ภิกฺขุ   อตฺตภาวปฏิลาโภ   อภวิสฺส   นิจฺโจ   ธุโว
สสฺสโต    อวิปริณามธมฺโม    น    ยิทํ   พฺรหฺมจริยวาโส   ปญฺญาเยถ
สมฺมาทุกฺขกฺขยาย     ฯ    ยสฺมา    จ    โข    ภิกฺขุ    เอตฺตโกปิ
@เชิงอรรถ: ๑ ม. ยุ. ฐสฺสตีติ ฯ
อตฺตภาวปฏิลาโภ    นตฺถิ    นิจฺโจ   ธุโว   สสฺสโต   อวิปริณามธมฺโม
ตสฺมา พฺรหฺมจริยวาโส ปญฺญายติ สมฺมาทุกฺขกฺขยาย ฯ
     [๒๕๐]   ภูตปุพฺพาหํ  ภิกฺขุ  ราชา  อโหสึ  ขตฺติโย  มุทฺธาวสิตฺโต ฯ
ตสฺส    มยฺหํ    ภิกฺขุ    รญฺโญ    สโต    ขตฺติยสฺส   มุทฺธาวสิตฺตสฺส
จตุราสีติ    นครสหสฺสานิ   อเหสุํ   กุสาวติราชธานิปฺปมุขานิ   ๑-   ฯ
ตสฺส   มยฺหํ   ภิกฺขุ   รญฺโญ  สโต  ขตฺติยสฺส  มุทฺธาวสิตฺตสฺส  จตุราสีติ
ปาสาทสหสฺสานิ   อเหสุํ   ธมฺมปาสาทปฺปมุขานิ   ฯ   ตสฺส  มยฺหํ  ภิกฺขุ
รญฺโญ   สโต   ขตฺติยสฺส   มุทฺธาวสิตฺตสฺส   จตุราสีติ  กูฏาคารสหสฺสานิ
อเหสุํ    มหาพฺยูหกูฏาคารปฺปมุขานิ   ฯ   ตสฺส   มยฺหํ   ภิกฺขุ   รญฺโญ
สโต   ขตฺติยสฺส   มุทฺธาวสิตฺตสฺส   จตุราสีติ   ปลฺลงฺกสหสฺสานิ   อเหสุํ
ทนฺตมยานิ    สารมยานิ    โสวณฺณมยานิ    รูปิยมยานิ    โคนกตฺถตานิ
ปฏิกตฺถตานิ       ปฏลิกตฺถตานิ      กทลิมิคปวรปจฺจตฺถรณานิ      ๒-
สอุตฺตรจฺฉทานิ    อุภโตโลหิตกูปธานานิ    ฯ    ตสฺส    มยฺหํ    ภิกฺขุ
รญฺโญ    สโต    ขตฺติยสฺส   มุทฺธาวสิตฺตสฺส   จตุราสีติ   นาคสหสฺสานิ
อเหสุํ     โสวณฺณาลงฺการานิ     โสวณฺณธชานิ     เหมชาลปฏิจฺฉนฺนานิ
อุโปสถนาคราชปฺปมุขานิ ฯ
     {๒๕๐.๑}   ตสฺส  มยฺหํ  ภิกฺขุ  รญฺโญ สโต ขตฺติยสฺส มุทฺธาวสิตฺตสฺส
จตุราสีติ    อสฺสสหสฺสานิ    อเหสุํ   โสวณฺณาลงฺการานิ   โสวณฺณธชานิ
เหมชาลปฏิจฺฉนฺนานิ   วลาหกอสฺสราชปฺปมุขานิ   ฯ   ตสฺส   มยฺหํ  ภิกฺขุ
รญฺโญ   สโต   ขตฺติยสฺส  มุทฺธาวสิตฺตสฺส  จตุราสีติ  รถสหสฺสานิ  อเหสุํ
โสวณฺณาลงฺการานิ          โสวณฺณธชานิ         เหมชาลปฏิจฺฉนฺนานิ
@เชิงอรรถ: ๑ ยุ. กุสาวตินาม ฯ  ๒ โป. กทลิปิตฺตปจฺจตฺถรณานิ ฯ
ปฏิจฺฉนฺนานิ    เวชยนฺตรถปฺปมุขานิ   ฯ   ตสฺส   มยฺหํ   ภิกฺขุ   รญฺโญ
สโต    ขตฺติยสฺส    มุทฺธาวสิตฺตสฺส    จตุราสีติ   มณิสหสฺสานิ   อเหสุํ
มณิรตนปฺปมุขานิ   ฯ   ตสฺส   มยฺหํ   ภิกฺขุ   รญฺโญ   สโต   ขตฺติยสฺส
มุทฺธาวสิตฺตสฺส  จตุราสีติ  อิตฺถีสหสฺสานิ  อเหสุํ  ภทฺทาเทวิปฺปมุขานิ ๑- ฯ
ตสฺส    มยฺหํ    ภิกฺขุ    ฯเปฯ    จตุราสีติ   ขตฺติยสหสฺสานิ   อเหสุํ
อนุยนฺตานิ    ปริณายกรตนปฺปมุขานิ   ฯ   ตสฺส   มยฺหํ   ภิกฺขุ   ฯเปฯ
จตุราสีติ   เธนุสหสฺสานิ   อเหสุํ   ทุกุลสนฺทนานิ   กํสูปธรณานิ  ๒-  ฯ
ตสฺส    มยฺหํ    ภิกฺขุ   ฯเปฯ   จตุราสีติ   วตฺถโกฏิสหสฺสานิ   อเหสุํ
โขมสุขุมานิ    โกเสยฺยสุขุมานิ    กมฺพลสุขุมานิ    กปฺปาสิกสุขุมานิ   ฯ
ตสฺส   มยฺหํ   ภิกฺขุ   ฯเปฯ  จตุราสีติ  ถาลิปากสหสฺสานิ  อเหสุํ  สายํ
ปาตํ ภตฺตาภิหาโร อภิหริยิตฺถ ฯ
     [๒๕๑]   เตสํ  โข  ปน  ภิกฺขุ  จตุราสีติยา นครสหสฺสานํ เอกญฺเญว
ตํ  นครํ  โหติ  ยมหํ  เตน  สมเยน  อชฺฌาวสามิ  กุสาวตี  ราชธานี ฯ
เตสํ   โข   ปน   ภิกฺขุ   จตุราสีติยา   ปาสาทสหสฺสานํ  เอโก  เยว
โส   ปาสาโท   โหติ   ยมหํ   เตน   สมเยน   อชฺฌาวสามิ   ธมฺโม
ปาสาโท   ฯ   เตสํ   โข   ปน  ภิกฺขุ  จตุราสีติยา  กูฏาคารสหสฺสานํ
เอกญฺเญว   ตํ   กูฏาคารํ   โหติ   ยมหํ   เตน  สมเยน  อชฺฌาวสามิ
มหาพฺยูหํ    กูฏาคารํ    ฯ    เตสํ   โข   ปน   ภิกฺขุ   จตุราสีติยา
ปลฺลงฺกสหสฺสานํ    เอโก    เยว    โส    ปลฺลงฺโก    โหติ   ยมหํ
เตน    สมเยน    ปริภุญฺชามิ    ทนฺตมโย    วา    สารมโย    วา
@เชิงอรรถ: ๑ โป. ม. ยุ. สุภทฺทา- ฯ  ๒ โป. กํสุจนารณานิ ฯ ยุ. กํสุ ... ฯ
สุวณฺณมโย   วา  รูปิยมโย  วา  ฯ  เตสํ  โข  ปน  ภิกฺขุ  จตุราสีติยา
นาคสหสฺสานํ   เอโก   เยว   โส  นาโค  โหติ  ยมหํ  เตน  สมเยน
อภิรูหามิ อุโปสโถ นาคราชา ฯ
     {๒๕๑.๑}   เตสํ  โข  ปน  ภิกฺขุ  จตุราสีติยา อสฺสสหสฺสานํ เอโก
เยว โส อสฺโส โหติ ยมหํ เตน สมเยน อภิรูหามิ พลาโห ๑- อสฺสราชา ฯ
เตสํ  โข  ปน  ภิกฺขุ  จตุราสีติยา รถสหสฺสานํ เอโก เยว โส รโถ โหติ
ยมหํ  เตน  สมเยน  อภิรูหามิ  เวชยนฺโต  รโถ  ฯ  เตสํ โข ปน ภิกฺขุ
จตุราสีติยา  อิตฺถีสหสฺสานํ  เอกา  เยว  สา  อิตฺถี  โหติ  ยา  มํ เตน
สมเยน   ปจฺจุปฏฺฐาติ   ขตฺติยา   วา   เวลามิกา  วา  ฯ  เตสํ  โข
ปน   ภิกฺขุ   จตุราสีติยา   วตฺถโกฏิสหสฺสานํ   เอกญฺเญว   ตํ  วตฺถยุคํ
โหติ   ยมหํ   เตน   สมเยน   ปริทหามิ  โขมสุขุมํ  วา  โกเสยฺยสุขุมํ
วา   กมฺพลสุขุมํ   วา   กปฺปาสิกสุขุมํ   วา  ฯ  เตสํ  โข  ปน  ภิกฺขุ
จตุราสีติยา    ถาลิปากสหสฺสานํ    เอโก    เยว    โส   ถาลิปาโก
โหติ   ยโต   นาฬิโกทนปรมํ   ภุญฺชามิ  ตทุปิยํ  จ  สูปพฺยญฺชนํ  ๒-  ฯ
อิติ   โข   ภิกฺขุ   สพฺเพ   เต   สงฺขารา  อตีตา  นิรุทฺธา  วิปริณตา
เอวํ  อนิจฺจา  โข  ภิกฺขุ  สงฺขารา  เอวํ  อทฺธุวา  โข  ภิกฺขุ สงฺขารา
เอวํ  อนสฺสาสิกา  โข  ภิกฺขุ  สพฺเพ  ๓-  สงฺขารา  ฯ  ยาวญฺจิทํ ภิกฺขุ
อลเมว สพฺพสงฺขาเรสุ ๔- นิพฺพินฺทิตุํ อลํ วิรชฺชิตุํ อลํ วิมุจฺจิตุนฺติ ฯ
     [๒๕๒]   สาวตฺถี   ฯ  อาราเม  ฯ  เอกมนฺตํ  นิสินฺโน  โข  โส
@เชิงอรรถ: ๑ ม. พลาหโก ฯ  ๒ สี. ม. สูเปยฺยํ ฯ  ๓ ม. ยุ. สพฺเพติ น ทิสฺสติ ฯ
@๔ ยุ. สพฺเพสุ ฯ
ภิกฺขุ   ภควนฺตํ   เอตทโวจ   อตฺถิ   นุ   โข   ภนฺเต  กิญฺจิ  รูปํ  ยํ
รูปํ   นิจฺจํ   ธุวํ   สสฺสตํ  อวิปริณามธมฺมํ  สสฺสติสมํ  ตเถว  ฐสฺสติ  ฯ
อตฺถิ   นุ   โข   ภนฺเต   กาจิ   เวทนา  ยา  เวทนา  นิจฺจา  ธุวา
สสฺสตา   อวิปริณามธมฺมา   สสฺสติสมํ   ตเถว   ฐสฺสติ   ฯ   อตฺถิ  นุ
โข   ภนฺเต   กาจิ   สญฺญา   ฯเปฯ   เกจิ  สงฺขารา  เย  สงฺขารา
นิจฺจา   ธุวา   สสฺสตา  อวิปริณามธมฺมา  สสฺสติสมํ  ตเถว  ฐสฺสนฺติ  ฯ
อตฺถิ   นุ   โข   ภนฺเต   กิญฺจิ   วิญฺญาณํ   ยํ   วิญฺญาณํ   นิจฺจํ  ธุวํ
สสฺสตํ   อวิปริณามธมฺมํ   สสฺสติสมํ   ตเถว   ฐสฺสตีติ   ฯ   นตฺถิ  โข
ภิกฺขุ    กิญฺจิ   รูปํ   ยํ   รูปํ   นิจฺจํ   ธุวํ   สสฺสตํ   อวิปริณามธมฺมํ
สสฺสติสมํ   ตเถว   ฐสฺสติ   ฯ   นตฺถิ   โข  ภิกฺขุ  กาจิ  เวทนา  ฯ
กาจิ   สญฺญา   ฯ   เกจิ   สงฺขารา   ฯ  กิญฺจิ  วิญฺญาณํ  ยํ  วิญฺญาณํ
นิจฺจํ ธุวํ สสฺสตํ อวิปริณามธมฺมํ สสฺสติสมํ ตเถว ฐสฺสตีติ ๑- ฯ
     [๒๕๓]   อถ   โข   ภควา  ปริตฺตํ  นขสิขายํ  ปํสุํ  อาโรเปตฺวา
ตํ  ภิกฺขุํ  เอตทโวจ  เอตฺตกํปิ  โข  ภิกฺขุ  รูปํ  นตฺถิ  นิจฺจํ  ธุวํ สสฺสตํ
อวิปริณามธมฺมํ   สสฺสติสมํ   ตเถว   ฐสฺสติ   ฯ   เอตฺตกํปิ   เจ  ๒-
ภิกฺขุ   รูปํ   อภวิสฺส   นิจฺจํ   ธุวํ   สสฺสตํ   อวิปริณามธมฺมํ   น  ยิทํ
พฺรหฺมจริยวาโส    ปญฺญาเยถ    สมฺมาทุกฺขกฺขยาย    ฯ    ยสฺมา   จ
โข   ภิกฺขุ   เอตฺตกํปิ   รูปํ   นตฺถิ  นิจฺจํ  ธุวํ  สสฺสตํ  อวิปริณามธมฺมํ
ตสฺมา   พฺรหฺมจริยวาโส   ปญฺญายติ   สมฺมาทุกฺขกฺขยาย   ฯ  เอตฺตกาปิ
โข   ภิกฺขุ   เวทนา   นตฺถิ   นิจฺจา   ธุวา  สสฺสตา  อวิปริณามธมฺมา
@เชิงอรรถ: ๑ โป. อิติสทฺโท น ทิสฺสติ ฯ  ๒ ม. ยุ. เจปิ ฯ
สสฺสติสมํ ตเถว ฐสฺสติ ฯ
     {๒๕๓.๑}   เอตฺตกาปิ  เจ  ภิกฺขุ  เวทนา  อภวิสฺส  นิจฺจา  ธุวา
สสฺสตา    อวิปริณามธมฺมา    น    ยิทํ   พฺรหฺมจริยวาโส   ปญฺญาเยถ
สมฺมาทุกฺขกฺขยาย   ฯ  ยสฺมา  จ  โข  ภิกฺขุ  เอตฺตกาปิ  เวทนา  นตฺถิ
นิจฺจา    ธุวา    สสฺสตา   อวิปริณามธมฺมา   ตสฺมา   พฺรหฺมจริยวาโส
ปญฺญายติ สมฺมาทุกฺขกฺขยาย ฯ
     {๒๕๓.๒}   เอตฺตกาปิ  โข  ภิกฺขุ  สญฺญา  ฯเปฯ  เอตฺตกาปิ  โข
ภิกฺขุ  สงฺขารา  นตฺถิ  นิจฺจา  ธุวา  สสฺสตา  อวิปริณามธมฺมา  สสฺสติสมํ
ตเถว  ฐสฺสนฺติ  ฯ  เอตฺตกา  เจปิ  ภิกฺขุ สงฺขารา อภวิสฺสํสุ นิจฺจา ธุวา
สสฺสตา    อวิปริณามธมฺมา    น    ยิทํ   พฺรหฺมจริยวาโส   ปญฺญาเยถ
สมฺมาทุกฺขกฺขยาย  ฯ  ยสฺมา  จ  โข  ภิกฺขุ  เอตฺตกาปิ  สงฺขารา  นตฺถิ
นิจฺจา    ธุวา    สสฺสตา   อวิปริณามธมฺมา   ตสฺมา   พฺรหฺมจริยวาโส
ปญฺญายติ สมฺมาทุกฺขกฺขยาย ฯ
     {๒๕๓.๓}   เอตฺตกํปิ   โข   ภิกฺขุ   วิญฺญาณํ   นตฺถิ  นิจฺจํ  ธุวํ
สสฺสตํ    อวิปริณามธมฺมํ    สสฺสติสมํ    ตเถว   ฐสฺสติ   ฯ   เอตฺตกํ
เจปิ   ภิกฺขุ   วิญฺญาณํ   อภวิสฺส   นิจฺจํ   ธุวํ   สสฺสตํ  อวิปริณามธมฺมํ
น   ยิทํ   พฺรหฺมจริยวาโส  ปญฺญาเยถ  สมฺมาทุกฺขกฺขยาย  ฯ  ยสฺมา  จ
โข   ภิกฺขุ  เอตฺตกํปิ  วิญฺญาณํ  นตฺถิ  นิจฺจํ  ธุวํ  สสฺสตํ  อวิปริณามธมฺมํ
ตสฺมา พฺรหฺมจริยวาโส ปญฺญายติ สมฺมาทุกฺขกฺขยาย ฯ
     [๒๕๔]   ตํ   กึ  มญฺญสิ  ภิกฺขุ  รูปํ  นิจฺจํ  วา  อนิจฺจํ  วาติ  ฯ
อนิจฺจํ   ภนฺเต   ฯ   เวทนา   ฯ   สญฺญา  ฯ  สงฺขารา  ฯ  วิญฺญาณํ
นิจฺจํ  วา  อนิจฺจํ  วาติ  ฯ  อนิจฺจํ  ภนฺเต  ฯเปฯ  ตสฺมา  ติห  ฯเปฯ
เอวํ ปสฺสํ ฯเปฯ นาปรํ อิตฺถตฺตายาติ ปชานาตีติ ฯ
     [๒๕๕]   สาวตฺถี   ฯ  อาราเม  ฯ  เอกมนฺตํ  นิสินฺโน  โข  โส
ภิกฺขุ   ภควนฺตํ   เอตทโวจ   อตฺถิ   นุ   โข   ภนฺเต  กิญฺจิ  รูปํ  ยํ
รูปํ   นิจฺจํ   ธุวํ   สสฺสตํ  อวิปริณามธมฺมํ  สสฺสติสมํ  ตเถว  ฐสฺสติ  ฯ
อตฺถิ   นุ   โข  ภนฺเต  กาจิ  เวทนา  ฯเปฯ  กาจิ  สญฺญา  ฯ  เกจิ
สงฺขารา    ฯ   กิญฺจิ   วิญฺญาณํ   ยํ   วิญฺญาณํ   นิจฺจํ   ธุวํ   สสฺสตํ
อวิปริณามธมฺมํ   สสฺสติสมํ   ตเถว   ฐสฺสตีติ   ฯ   นตฺถิ   โข   ภิกฺขุ
กิญฺจิ   รูปํ   ยํ   รูปํ   นิจฺจํ   ธุวํ   สสฺสตํ  อวิปริณามธมฺมํ  สสฺสติสมํ
ตเถว   ฐสฺสติ   ฯ   นตฺถิ   โข   ภิกฺขุ  กาจิ  เวทนา  ฯเปฯ  กาจิ
สญฺญา    ฯ    เกจิ   สงฺขารา   ฯ   กิญฺจิ   วิญฺญาณํ   ยํ   วิญฺญาณํ
นิจฺจํ ธุวํ สสฺสตํ อวิปริณามธมฺมํ สสฺสติสมํ ตเถว ฐสฺสตีติ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๑๗ หน้าที่ ๑๗๑-๑๘๑.
http://84000.org/tipitaka/read/pali_item_s.php?book=17&item=243&items=13&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item_s.php?book=17&item=243&items=13&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=17&item=243&items=13&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=17&item=243&items=13&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=17&i=243
             The Pali Atthakatha in Thai :-
http://84000.org/tipitaka/atthapali/read_th.php?B=12&A=7714
             The Pali Atthakatha in Roman :-
http://84000.org/tipitaka/atthapali/read_rm.php?B=12&A=7714
             สารบัญพระไตรปิฎกเล่มที่ ๑๗
http://84000.org/tipitaka/read/?index_17