พระไตรปิฎกเล่มที่ ๒๖ ภาษาบาลี อักษรไทย
พระสุตตันตปิฎกเล่มที่ ๑๘ สุตฺต. ขุ. วิมานวตฺถุ-เปตวตฺถุ-เถรคาถา-เถรีคาถา

     [๓๔]   |๓๔.๔๐๖| ๖ ททฺทลฺลมานา วณฺเณน   ยสสฺสา จ ยสสฺสินี
                        สพฺเพ เทเว ตาวตึเส        วณฺเณน อติโรจสิ
     |๓๔.๔๐๗|    ทสฺสนํ นาภิชานามิ       อิทํ ปฐมทสฺสนํ
                        กสฺมา กายา นุ อาคมฺม      นาเมน ภาสเส มมนฺติ ฯ
     |๓๔.๔๐๘|    อหํ ภทฺเท สุภทฺทาสึ      ปุพฺเพ มานุสเก ภเว
                        สหภริยา จ เต อาสึ            ภคินี จ กนิฏฺฐกา
     |๓๔.๔๐๙|    สาหํ กายสฺส เภทาย     วิปฺปมุตฺตา ตโต จุตา
                        นิมฺมานรตีเทวานํ                อุปปนฺนา สหพฺยตนฺติ ฯ
     |๓๔.๔๑๐|    ปหูตกตกลฺยาณา         เต เทเว ยนฺติ ปาณิโน
                        เยสํ ตฺวํ กิตฺตยิสฺสสิ             สุภทฺเท ชาติมตฺตโน
     |๓๔.๔๑๑|    กถํ ตฺวํ เกน วณฺเณน    เกน วา อนุสาสิตา
                        กีทิเสเนว ทาเนน                สุพฺพเตน ยสสฺสินี
     |๓๔.๔๑๒|    ยสํ เอตาทิสํ ปตฺตา      วิเสสํ วิปุลมชฺฌคา
                        เทวเต ปุจฺฉิตาจิกฺข       กิสฺส กมฺมสฺสิทํ ผลํ (อิติ) ฯ
     |๓๔.๔๑๓|    อฏฺเฐว ปิณฺฑปาตานิ   ยํ ทานํ อททํ ปุเร
                        ทกฺขิเณยฺยสฺส สงฺฆสฺส       ปสนฺนา สเกหิ ปาณิหิ
     |๓๔.๔๑๔|    เตน เมตาทิโส วณฺโณ     ... เป ...
                        วณฺโณ จ เม สพฺพทิสา ปภาสตีติ ฯ
     |๓๔.๔๑๕|    อหํ ตยา พหุตเร ภิกฺขู    สญฺญเต พฺรหฺมจาริโน
                        ตปฺเปสึ อนฺนปาเนน          ปสนฺนา สเกหิ ปาณิหิ
     |๓๔.๔๑๖|    ตยา พหุตรํ ทตฺวา         หีนกายูปคา อหํ
                        กถํ ตฺวํ อปฺปตรํ ทตฺวา      วิเสสํ วิปุลมชฺฌคา
                        เทวเต ปุจฺฉิตาจิกฺข          กิสฺส กมฺมสฺสิทํ ผลํ (อิติ) ฯ
     |๓๔.๔๑๗|    มโนภาวนีโย ภิกฺขุ        สนฺทิฏฺโฐ เม ปุเร อหุ
                        ตาหํ ภตฺเตน นิมนฺเตสึ     เรวตํ อตฺตนฏฺฐมํ
     |๓๔.๔๑๘|    โส เม อตฺถปุเรกฺขาโร   อนุกมฺปาย เรวโต
                        สงฺเฆ เทหีติ มํ อโวจ       ตสฺสาหํ วจนํ กรึ
     |๓๔.๔๑๙|    สา ทกฺขิณา สงฺฆคตา  อปฺปเมยฺยา ปติฏฺฐิตา
                        ปุคฺคเลสุ ตยา ทินฺนํ        น ตํ ตว มหปฺผลนฺติ ฯ
     |๓๔.๔๒๐|    อิทาเนวาหํ ชานามิ      สงฺเฆ ทินฺนํ มหปฺผลํ
                        สาหํ คนฺตฺวา มนุสฺสตฺตํ   วทญฺญู วีตมจฺฉรา
                        สงฺเฆ ทานํ ทสฺสามิหํ       อปฺปมตฺตา ปุนปฺปุนนฺติ ฯ
     |๓๔.๔๒๑|    กา เอสา เทวตา ภทฺเท  ตยา มนฺตยเต สห
                        สพฺเพ เทเว ตาวตึเส         วณฺเณน อติโรจติ (อิติ) ฯ
     |๓๔.๔๒๒|    มนุสฺสภูตา เทวินฺท       ปุพฺเพ มานุสเก ภเว
                        สหภริยา จ เม อาสิ          ภคินี จ กนิฏฺฐกา ๑-
                        สงฺเฆ ทานานิ ทตฺวาน      กตปุญฺญา วิโรจติ (อิติ) ฯ
     |๓๔.๔๒๓|    ธมฺเมน ปุพฺเพ ภคินี      ตยา ภทฺเท วิโรจสิ
                        ยํ สงฺฆสฺมึ อปฺปเมยฺเย    ปติฏฺฐาเปสิ ทกฺขิณํ
     |๓๔.๔๒๔|    ปุจฺฉิโต หิ มยา พุทฺโธ   คิชฺฌกูฏสฺมึ ปพฺพเต
@เชิงอรรถ: ๑ ม. ยุ กนิฏฺฐิกา ฯ
                        วิปากํ สํวิภาคสฺส                  ยตฺถ ทินฺนํ มหปฺผลํ
     |๓๔.๔๒๕|    ยชมานานํ มนุสฺสานํ           ปุญฺญเปกฺขาน ปาณินํ
                        กโรนฺตํ ๑- โอปธิกํ ปุญฺญํ         ยตฺถ ทินฺนํ มหปฺผลํ
     |๓๔.๔๒๖|    ตํ เม พุทฺโธ วิยากาสิ             ชานํ กมฺมผลํ สกํ
                        วิปากํ สํวิภาคสฺส                     ยตฺถ ทินฺนํ มหปฺผลํ
     |๓๔.๔๒๗|    จตฺตาโร จ ปฏิปนฺนา            จตฺตาโร จ ผเล ฐิตา
                        เอส สงฺโฆ อุชุภูโต                   ปญฺญาสีลสมาหิโต
     |๓๔.๔๒๘|    ยชมานานํ มนุสฺสานํ            ปุญฺญเปกฺขาน ปาณินํ
                        กโรนฺตํ ๑- โอปธิกํ ปุญฺญํ         สงฺเฆ ทินฺนํ มหปฺผลํ
     |๓๔.๔๒๙|    เอโส หิ สงฺโฆ วิปุโล มหคฺคโต
                        เอสปฺปเมยฺโย อุทธีว สาคโร
                        เอเต หิ เสฏฺฐา นรวิริยสาวกา
                        ปภงฺกรา ธมฺมกถํ อุทีรยนฺติ
     |๓๔.๔๓๐|    เตสํ สุทินฺนํ สุหุตํ สุยิฏฺฐํ
                        เย สงฺฆมุทฺทิสฺส ททนฺติ ทานํ
                        สา ทกฺขิณา สงฺฆคตา ปติฏฺฐิตา
                        มหปฺผลา โลกวิทูหิ วณฺณิตา
     |๓๔.๔๓๑|    เอตาทิสํ ปุญฺญมนุสฺสรนฺตา
                        เย เวทชาตา วิจรนฺติ โลเก
                        วิเนยฺย มจฺเฉรมลํ สมูลํ
@เชิงอรรถ: ๑ กโรตนฺติปิ ทิสฺสติ ฯ
                        อนินฺทิตา สคฺคมุเปนฺติ ฐานนฺติ ฯ
                                    ททฺทลฺลวิมานํ ฉฏฺฐํ ฯ
     [๓๕]    |๓๕.๔๓๒| ๗ ผลิกรชตเหมชาลจฺฉนฺนํ
                        วิวิธวิจิตฺรตลมทฺทสํ สุรมฺมํ
                        พฺยมฺหํ สุนิมฺมิตํ โตรณูปปนฺนํ
                        รุจกูปกิณฺณมิทํ สุภํ วิมานํ
     |๓๕.๔๓๓|    ภาติ จ ทส ทิสา นเภว สุริโย
                        สรเท ตมนุโท สหสฺสรํสี
                        ตถา ตปติมิทํ ตว วิมานํ
                        ชลมิว ธูมสิโข นิเส นภคฺเค
     |๓๕.๔๓๔|    มุสตีว นยนํ สเตริตาว
                        อากาเส ฐปิตมิทํ มนุญฺญํ
                        วีณามุรชสมฺมตาฬฆุฏฺฐํ
                        อิทฺธํ อินฺทปุรํ ยถา ตว ยิทํ
     |๓๕.๔๓๕|    ปทุมกุมุทอุปฺปลกุวลยํ
                        โยถิกาภณฺฑิกาโนชกา จ สนฺติ
                        สาลกุสุมิตปุปฺผิตา อโสกา
                        วิวิธทุมคฺคสุคนฺธเสวิตมิทํ
     |๓๕.๔๓๖|    สลฬลพุชสุชกสํยุตฺตา
                        กุสกสุผุลฺลิตลตาวลมฺพินีหิ
                        มณิชาลสทิสา ยสสฺสินี
                        รมฺมา โปกฺขรณี อุปฏฺฐิตา เต
     |๓๕.๔๓๗|    อุทกรุหา จ เยตฺถิ ปุปฺผชาตา
                        ถลชา เย จ สนฺติ รุกฺขชาตา
                        มานุสฺสกา อมานุสฺสกา จ ทิพฺพา
                        สพฺเพ ตุยฺหํ นิเวสนมฺหิ ชาตา
     |๓๕.๔๓๘|    กิสฺส สมทมสฺส ๑- อยํ วิปาโก
                        เกนาสิ กมฺมผเลนิธูปปนฺนา
                        ยถา จ เต อธิคตมิทํ วิมานํ
                        ตทนุปทํ อวจาสิ อาฬารปขุเมติ ฯ
     |๓๕.๔๓๙|    ยถา จ เม อธิคตมิทํ วิมานํ
                        โกญฺจมยุรจโกรสงฺฆจริตํ
                        ทิพฺยปิลวหํสราชจิณฺณํ
                        ทิชการณฺฑวโกกิลาภินาทิตํ
     |๓๕.๔๔๐|    นานาสนฺตานกปุปฺผรุกฺขวิวิธา
                        ปาฏลิชมฺพุอโสกรุกฺขวนฺตํ
                        ยถา จ เม อธิคตมิทํ วิมานํ
@เชิงอรรถ: ๑ ม. สญฺญมทมสฺสยํ ฯ
                        ตนฺเต ปเวทิสฺสามิ สุโณหิ ภนฺเต
     |๓๕.๔๔๑|    มคธวรปุรตฺถิเมน
                        นาฬกคามโก นาม อตฺถิ ภนฺเต
                        ตตฺถ อโหสึ ปุเร สุณิสา
                        เสสวตีติ ตตฺถ ชานึสุ มมํ
     |๓๕.๔๔๒|    สาหํ อปจิตตฺถธมฺมกุสลํ
                        เทวมนุสฺสปูชิตํ มหนฺตํ
                        อุปติสฺสํ นิพฺพุตํ อปฺปเมยฺยํ
                        มุทิตมนา กุสุเมหิ อพฺโภกิรึ
     |๓๕.๔๔๓|    ปรมคติคตญฺจ ปูชยิตฺวา
                        อนฺติมเทหธรํ อิสึ อุฬารํ
                        ปหาย มานุสกํ สมุสฺสยํ
                        ติทสาคตา อิธมาวสามิ ฐานนฺติ ฯ
                                    เสสวตีวิมานํ สตฺตมํ ฯ
     [๓๖]   |๓๖.๔๔๔| ๘ ปีตวตฺเถ ปีตธเช      ปีตาลงฺการภูสิเต
                        ปีตนฺตราหิ วคฺคูหิ         อปิลนฺธา ว โสภสิ
     |๓๖.๔๔๕|    กา กมฺพุกายุรธเร        กญฺจนาเวฬภูสิเต
                        เหมชาลกสญฺฉนฺเน          นานารตนมาลินี
     |๓๖.๔๔๖|    โสวณฺณมยา โลหิตงฺกมยา จ
                        มุตฺตามยา เวฬุริยามยา จ
                        มสารคลฺลา สหโลหิตงฺกา
                        ปาเรวตกฺขีหิ มณีหิ จิตฺตตา
     |๓๖.๔๔๗|    โกจิ โกจิ เอตฺถ มยูรสุสฺสโร
                        หํสสฺส รญฺโญ กรวีกสุสฺสโร
                        เตสํ สโร สุยฺยติ วคฺคุรูโป
                        ปญฺจงฺคิกํ ตุริยมิวปฺปวาทิตํ
     |๓๖.๔๔๘|    รโถ จ เต สุโภ วคฺคู ๑-      นานารตนจิตฺตงฺโค ๒-
                        นานาวณฺณีหิ ธาตูหิ              สุวิภตฺโต ว โสภติ
     |๓๖.๔๔๙|    ตสฺมึ รเถ กาญฺจนพิมฺพวณฺเณ
                        ยตฺถ ฐิตา ภาสสิมํ ปเทสํ
                        เทวเต ปุจฺฉิตาจิกฺข       กิสฺส กมฺมสฺสิทํ ผลนฺติ ฯ
     |๓๖.๔๕๐|    โสวณฺณชาลํ ๓- มณิโสณฺณจิตฺตํ
                        มุตฺตาจิตฺตํ เหมชาเลน ฉนฺนํ
                        ปรินิพฺพุเต โคตเม อปฺปเมยฺเย
                        ปสนฺนจิตฺตา อหมาภิโรปยึ
     |๓๖.๔๕๑|    ตาหํ กมฺมํ กริตฺวาน     กุสลํ พุทฺธวณฺณิตํ
                        อเปตโสกา สุขิตา             สมฺปโมทามนามยาติ ฯ
                                   มลฺลิกาวิมานํ อฏฺฐมํ ฯ
@เชิงอรรถ: ๑ ม. ยุ. วคฺคุ ฯ  ๒ ม. ยุ. นานารตนจิตฺติโต ฯ  ๓ ม. มณิโสณฺณจิตฺติตํ ฯ
@โป. มณิโสวณฺณจิตฺตํ ฯ
     [๓๗]   |๓๗.๔๕๒| ๙ กา นาม ตฺวํ วิสาลกฺขี    รมฺเม จิตฺตลตาวเน
                        สมนฺตา อนุปริยาสิ            นารีคณปุรกฺขิตา
     |๓๗.๔๕๓|    ยทา เทวา ตาวตึสา       ปวิสนฺติ อิมํ วนํ
                        สโยคฺคา สรถา สพฺเพ          จิตฺรา โหนฺติ อิธาคตา
     |๓๗.๔๕๔|    ตุยฺหญฺจ อิธ ปตฺตาย     อุยฺยาเน วิจรนฺติยา
                        กาเยน ทิสฺสติ จิตฺตํ            เกน รูปํ ตเวทิสํ
                        เทวเต ปุจฺฉิตาจิกฺข              กิสฺส กมฺมสฺสิทํ ผลํ (อิติ ฯ)
     |๓๗.๔๕๕|    เยน กมฺเมน เทวินฺท      รูปํ มยฺหํ คตี จ เม
                        อิทฺธี จ อานุภาโว จ            ตํ สุโณหิ ปุรินฺทท
     |๓๗.๔๕๖|    อหํ ราชคเห รมฺเม         สุนนฺทา นาม อุปาสิกา
                        สทฺธาสีเลน สมฺปนฺนา         สํวิภาครตา สทา
     |๓๗.๔๕๗|    อจฺฉาทนญฺจ ภตฺตญฺจ   เสนาสนํ ปทีปิยํ
                        อทาสึ อุชุภูเตสุ                 วิปฺปสนฺเนน เจตสา
     |๓๗.๔๕๘|    จาตุทฺทสึ ปญฺจทสึ        ยา จ ปกฺขสฺส อฏฺฐมี
                        ปาฏิหาริยปกฺขญฺจ            อฏฺฐงฺคสุสมาคตํ
     |๓๗.๔๕๙|    อุโปสถํ อุปวสึ              สทา สีเล สุสํวุตา
                        ปาณาติปาตา วิรตา          มุสาวาทา จ สญฺญตา
                        เถยฺยา จ อติจารา จ          มชฺชปานา จ อารกา
     |๓๗.๔๖๐|    ปญฺจสิกฺขาปเท รตา      อริยสจฺจาน โกวิทา
                        อุปาสิกา จกฺขุมโต             โคตมสฺส ยสสฺสิโน
     |๓๗.๔๖๑|    ตสฺสา เม ญาติกุลํ อาสิ  สทา มาลาภิหารติ
                        ตาหํ ภควโต ถูเป             สพฺพเมวาภิโรปยึ
     |๓๗.๔๖๒|    อุโปสเถวหํ คนฺตฺวา       มาลาคนฺธวิเลปนํ
                        ถูปสฺมึ อภิโรเปสึ             ปสนฺนา สเกหิ ปาณิหิ
     |๓๗.๔๖๓|    เตน กมฺเมน เทวินฺท      รูปํ มยฺหํ คตี จ เม
                        อิทฺธี จ อานุภาโว จ          ยญฺจ มาลาภิโรปยึ
     |๓๗.๔๖๔|    ยญฺจ สีลวตี อาสึ          น ตํ ตาว วิปจฺจติ
                        อาสา จ ปน เม เทวินฺท     สกทาคามินี สิยนฺติ ฯ
                                    วิสาลกฺขิวิมานํ นวมํ ฯ
     [๓๘]   |๓๘.๔๖๕| ๑๐ ปาริฉตฺตเก โกวิฬาเร    รมณีเย มโนรเม
                        ทิพฺพมาลํ คนฺถมานา        คายนฺตี สมฺปโมทสิ
     |๓๘.๔๖๖|    ตสฺสา เต นจฺจมานาย  องฺคมงฺเคหิ สพฺพโส
                        ทิพฺพา สทฺทา นิจฺฉรนฺติ         สวนียา มโนรมา
     |๓๘.๔๖๗|    ตสฺสา เต นจฺจมานาย  องฺคมงฺเคหิ สพฺพโส
                        ทิพฺพา คนฺธา ปวายนฺติ          สุจิคนฺธา มโนรมา
     |๓๘.๔๖๘|    วิวตฺตมานา กาเยน      ยา เวณีสุ ปิลนฺธนา
                        เตสํ สุยฺยติ นิคฺโฆโส               ตุริเย ปญฺจงฺคิเก ยถา
     |๓๘.๔๖๙|    วฏํสกา วาตธูตา          วาเตน สมฺปกมฺปิตา
                        เตสํ สุยฺยติ นิคฺโฆโส              ตุริเย ปญฺจงฺคิเก ยถา
     |๓๘.๔๗๐|    ยาปิ เต สิรสฺมึ มาลา   สุจิคนฺธา มโนรมา
                        วาติ คนฺโธ ทิสา สพฺพา        รุกฺโข มญฺชูสโก ยถา
     |๓๘.๔๗๑|    ฆายเส ตํ สุจิคนฺธํ    รูปํ ปสฺสสิ อมานุสํ
                        เทวเต ปุจฺฉิตาจิกฺข            กิสฺส กมฺมสฺสิทํ ผลํ (อิติ ฯ)
     |๓๘.๔๗๒|    ปภสฺสรํ อจฺฉิมนฺตํ    วณฺณคนฺเธน สญฺญุตํ
                        อโสกปุปฺผมาลาหํ              พุทฺธสฺส อุปนามยึ
     |๓๘.๔๗๓|    ตาหํ กมฺมํ กริตฺวาน กุสลํ พุทฺธวณฺณิตํ
                        อเปตโสกา สุขิตา              สมฺปโมทามนามยาติ ฯ
                                    ปาริฉตฺตกวิมานํ ทสมํ ฯ
                                         อุทฺทานํ
          อุฬารํ อุจฺฉุปลฺลงฺกํ ๑-      ลตา จ คุตฺติเลน จ
          ททฺทลฺล เสสวตี มลฺลี       วิสาลกฺขิ ปาริฉตฺตโก
                                วคฺโค เตน ปวุจฺจตีติ ฯ
                              ปาริฉตฺตกวคฺโค ตติโย ฯ
                                        ----------
                               จตุตฺโถ มญฺชิฏฺฐกวคฺโค
     [๓๙]   |๓๙.๔๗๔| ๑ มญฺชิฏฺฐเก ๒- วิมานสฺมึ    โสวณฺณวาลุกสนฺถเต
                        ปญฺจงฺคิเกน ตุริเยน                รมสิ สุปฺปวาทิเต
     |๓๙.๔๗๕|    ตมฺหา วิมานา โอรุยฺห  นิมฺมิตา รตนามยา
@เชิงอรรถ: ๑ ม. อุฬาโร ฯ อุฉุปลฺลงฺโก ฯ  ๒ ยุ. มญฺเชฏฺฐเก ฯเปฯ
                         โอคาหสิ สาลวนํ                ปุปฺผิตํ สพฺพกาลิกํ
     |๓๙.๔๗๖|    ยสฺส ยสฺเสว สาลสฺส     มูเล ติฏฺฐสิ เทวเต
                        โส โส มุญฺจติ ปุปฺผานิ      โอนมิตฺวา ทุมุตฺตโม
     |๓๙.๔๗๗|    วาเตริตํ สาลวนํ           อาธุตํ ทิชเสวิตํ
                        วาติ คนฺโธ ทิสา สพฺพา     รุกฺโข มญฺชูสโก ยถา
     |๓๙.๔๗๘|    ฆายเส ตํ สุจิคนฺธํ        รูปํ ปสฺสสิ อมานุสํ
                        เทวเต ปุจฺฉิตาจิกฺข            กิสฺส กมฺมสฺสิทํ ผลนฺติ ฯ
     |๓๙.๔๗๙|    อหํ มนุสฺเสสุ มนุสฺสภูตา
                        ทาสี อยฺยิรกุเล ๑- อหุํ
                        พุทฺธํ นิสินฺนํ ทิสฺวาน                 สาลปุปฺเผหิ โอกิรึ
     |๓๙.๔๘๐|    วฏํสกญฺจ สุกตํ            สาลปุปฺผมยํ อหํ
                        พุทฺธสฺส อุปนาเมสึ           ปสนฺนา สเกหิ ปาณิหิ
     |๓๙.๔๘๑|    ตาหํ กมฺมํ กริตฺวาน      กุสลํ พุทฺธวณฺณิตํ
                        อเปตโสกา สุขิตา             สมฺปโมทามนามยาติ ฯ
                                    มญฺชิฏฺฐกวิมานํ ปฐมํ ฯ
     [๔๐]   |๔๐.๔๘๒| ๒ ปภสฺสวรวณฺณนิเภ
                        สุรตฺตวตฺถนิวาสเน
                        มหิทฺธิเก จนฺทนรุจิรคตฺเต
                        กา ตฺวํ สุเภ เทวเต วนฺทเส มมํ
     |๔๐.๔๘๓|    ปลฺลงฺโก จ เต มหคฺโฆ
@เชิงอรรถ: ๑ ม. อยิรกุเล ฯ ยุ. อยฺยรกุเล ฯ  ๒ ยุ. จนฺทร ... ฯ
                        นานารตนจิตฺติโต รุจิโร
                        ยตฺถ ตฺวํ นิสินฺนา วิโรจสิ
                        เทวราชาริว นนฺทเน วเน
     |๔๐.๔๘๔|    กึ ตฺวํ ปุเร สุจริตมาจริ ภทฺเท
                        กิสฺส กมฺมสฺส วิปากํ อนุโภสิ
                        เทวโลกสฺมึ เทวเต ปุจฺฉิตาจิกฺข
                        กิสฺส กมฺมสฺสิทํ ผลนฺติ ฯ
     |๔๐.๔๘๕|    ปิณฺฑาย เต จรนฺตสฺส
                        มาลํ ผาณิตญฺจ อททํ ภนฺเต
                        ตสฺส กมฺมสฺสิทํ วิปากํ
                        อนุโภมิ เทวโลกสฺมึ
     |๔๐.๔๘๖|    โหติ จ เม อนุตาโป
                        อปราธํ ๑- ทุกฺขิตญฺจ เม ภนฺเต
                        สาหํ ธมฺมํ นาสฺโสสึ
                        สุเทสิตํ ธมฺมราเชน
     |๔๐.๔๘๗|    ตํ ตํ วทามิ ภทฺทนฺเต
                        ยสฺส เม อนุกมฺปิโย
                        โกจิ ธมฺเมสุ ตํ สมาทเปถ
                        สุเทสิตํ ธมฺมราเชน
     |๔๐.๔๘๘|    เยสํ อตฺถิ สทฺธา พุทฺเธ
@เชิงอรรถ: ๑ ม. ยุ. อปรทฺธํ ฯ
                        ธมฺเม จ สงฺฆรตเน จ
                        เต มํ อติวิโรจนฺติ
                        อายุนา ยสสา สิริยา
     |๔๐.๔๘๙|    ปตาเปน วณฺเณน อุตฺตริตรา
                        อญฺเญ มหิทฺธิกตรา มยา เทวาติ ฯ
                                    ปภสฺสรวิมานํ ทุติยํ ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๒๖ หน้าที่ ๕๙-๗๑.
http://84000.org/tipitaka/read/pali_item_s.php?book=26&item=34&items=7&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item_s.php?book=26&item=34&items=7&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=26&item=34&items=7&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=26&item=34&items=7&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=26&i=34
             The Pali Atthakatha in Thai :-
http://84000.org/tipitaka/atthapali/read_th.php?B=30&A=3557
             The Pali Atthakatha in Roman :-
http://84000.org/tipitaka/atthapali/read_rm.php?B=30&A=3557
             สารบัญพระไตรปิฎกเล่มที่ ๒๖
http://84000.org/tipitaka/read/?index_26